|
|
 هذه آخر إكتشافات داوجونز لقياس الرومانسية
|
هذه الأيام يتساءل البعض عن اختفاء الرومانسية من خارطة حياة الشعب السوداني، وكيف أن الرجل عندنا صاراً بارداً وأحمقاً، ولا يستطيع أن يعبر عن مشاعره بـ المواصفات المتبعة عالمياً
- مع ملاحظة أنني أتحدث عن الرومانسية بعد الزواج، لأن التي قبل الزواج يعتبرها البعض (قلة أدب ساكت)
- وأرى أن الرجل السوداني يُتهم ظُلماً وبهتاناً بأنه لا يملك مثقال ذرة هيدروجين من الرومانسية، وكـ ضرب مثل، عبارة (صباح الخير)، هذا المقطع إذا أراد الرجل أن يقوله لزوجته تجده يتردد ويردد في نفسه أفكاراً على غرار:
- هسع الولية ده أقول ليها صباح الخير .. تقول الراجل ده الليلة مالو؟
وأعتقد أن الزوج السوداني لديه من الرومانسية ما يكفي لأن يغرق بحنانه كل من دول المكسيك وتركيا ومنطقة حوض البلقان، ولكنه لديه طرقه الخاصة للتعبير عنها، في القرى مثلاً يُعبّر الرجال عن رومانسيتهم بأساليب مبتكرة، منها أن يقول الرجل لزوجته بصوت يحاول أن يجعله حنوناً بقدر الإمكان:
- يا مرة هووي .. قومي سوي لينا الشاي.!
2
بالطبع توجد عدة أسباب مقنعة لانحسار الرومانسية من حياتنا، ومن أهمها (الفلس) .. نعم عزيزي القارئ وعزيزتي القارئة، على حد علمي لا رومانسية مع (الفلس)، الرومانسية كائن ملازم لـ الغني، ويتناسب عكسياً مع (الفلس)، أي كلما زاد (الفلس) قلّت الرومانسية، وكلما قلّت الرومانسية ستجد الفلس من أهم الأسباب، فـ (الفلس) حيثما وُجد يعتبر هادماً لـ اللذات ومفرقاً لـ الرومانسيات، الرومانسية تحتاج إلى جيب ممتلئ بـ (الكاش)، لأن من (تترمنس) معها –من المفترض أن معناها: التي تمارس معها الرومانسية- تحتاج إلى رحلات بريّة وزيارة مطاعم فاخرة، ومنتزهات وحدائق، وتتناسب الرومانسية مع بيت تزغرد فيه العصافير، وتتحاوم فيه الفراشات حول الزهور، وتحفّه نوافير المياه من كل جانب، وتوقد فيه الشموع عند العشاء، بينما تنساب موسيقى حالمة من مكان ما، كل هذا من الصعب أن تجده في بيت سوداني متوسط الحال يمتلئ بالأطفال الذين يتقاذفون بـ (السفنجات) و(الشباشب)، على مدار اليوم.!
كذلك تجد أنّ (السخانة) تعتبر من أهّم مثبطات الرومانسية، فـ الرومانسية أخي الزوج تحتاج إلى جو معتدل وشمس تحجبها الغيوم، لذا تجد أن الرومانسية تتلاشى تدريجياً كلما اقتربنا من خط الاستواء من الشمال أو الجنوب، ويميل مقياس الرومانسية للصفر المطلق عندما تتحد السخانة مع انقطاع التيار الكهربائي، وهنا تصبح الأخلاق أضيق من المسافة بين الهمزة والألف، حينها تهرب الرومانسية من الباب أو الشباك أيهما أقرب.!
ومما لا شك فيه أن الرومانسية تحتاج إلى ذاكرة قوية، فـ أنت حتى تكون رومانسياً يشار إليه بالبنان، تحتاج أن تتذكر تاريخ أول لقاء بينكما .. تاريخ الخطوبة .. تاريخ زواجكما حتى تفاجئ بعلتك الكريمة بهدية في هذه التواريخ، ولكن المشكلة أنك قد تنسي حتى السنة التي تزوجت فيها، دعك من تذكر اليوم والشهر، علاوة على أن هنالك من ينسون حتى القرن الذي تزوجوا فيه.!
الرومانسية تحتاج إلى تنازل، مثل أن تدخل المطبخ وتساعد زوجتك في (كتل البصلة) أو تحمير شيء ما، وهذا الفعل يعتبره الرجل السوداني عيباً كبيراً يتطور إلى مصيبة فادحة إذا تم قبضه متلبساً بفعلته هذه من قِبَل أحد معارفه، (كبتنية بحتة) وإذا أردت أن تُطبّق ما عُلم من الرومانسية بالضرورة، يمكنك أن تستيقظ مبكراً قبل زوجتك وتجهّز شاي الصباح وتُحْضِر لها كوبها إلى السرير، وهذه لعمري لا يفعلها إلا (قيس بن الملوح) إذا حدث وجمعته القسمة بـ (ليلي العامرية).!
3
الإنجليز لديهم مثل يقول:
- في العام الأول من الزواج يتكلم الرجل وتصمت المرأة، وفي العام الثاني تتكلم المرأة ويصمت الرجل، وفي العام الثالث يتكلم الاثنان ويسمع الجيران.!
من الواضح أن الإنجليز هؤلاء رومانسيون كما أتت الرومانسية في الكتلوج، عندنا هنا الزوجان يتكلمان والجيران يستمعون منذ الشهر الثالث، وما اعرفه أن الخواجات لديهم أساليبهم الخاصة والغريبة في إظهار رومانسيتهم، ولديهم اقتراحات عديدة، وكلها على مستوى واحد من الحماقة، وإذا كنت من محبي الإنجليز يمكنك تجربتها وإن كنت أشك في ذلك.!
منهم من يوصي بني جلدته ويعطيهم نصائح قيمة ليكونوا رومانسيين على طراز رفيع، ومن هذه الوصايا أن تأخذ زوجتك في رحلة إلى سفوح (جبال الألب) لتستمتعان بالتزلج هناك، بما أننا –للأسف- ليست لدينا جبال (ألب) في سوداننا الحبيب، لكن أعتقد أن (جبل عوينات) أو (جبل الدائر) يمكن أن يقوما بهذه المهمة على أكمل وجه.!
يقولون أيضاً أدعوها –أي زوجتك- لمطعم راق واستأجر لها أوركسترا لتعزف لكما أغاني الحب والسلام حتى تحس بطعم جديد للرومانسية، ولكن نقول نحن: أن هذا الشيء لا يمكن حدوثه إلاّ في فيلم هندي غير مترجم.!
4
• هكذا يمكننا أن نصل إلى أن الرجل السوداني من الصعب أن يكون رومانسياً حتى النخاع، ولن يصل بالهين إلى مرحلة (سأبقى من أجلك حتى تحترق النجوم)، ومن الصعب أن تنفجر ماسورة عواطفه لتغرق الميادين في أرض الواقع والبيئة السودانية التي لا تشجع على الرومانسية التي نراها في الفضائيات.!
• المرأة أحياناً لا تشجع على الرومانسية، وبالذات النساء اللواتي لا يسرهنّ سوى انخفاض سعر الطماطم ولا يضايقهن سوى ارتفاعها، ومعهنّ اللواتي يعتبرن أن زيادة عدد الصحون في المائدة يعتبر من أرقى أنواع الرومانسية، سبق وأن قصصتُ عليكم حكاية الفتاة التي قال لها زوجها:- داير حبة رومانسية في البيت ده.!
فذهبت البنت لأمها لتسألها ماذا يقصد الرجل، فقالت لها:
- والله يا بتي أنا ما عارفة رومانسية دي شنو .. لكن للضمان أعملي جدادة مسبكة في الغداء.!
• الرجل السوداني يعتبر أن الرومانسية هي تنازل واستسلام للمرأة، ويعتقد أن الرجل حينما يبدأ بتنازل بسيط بعدها ستتحول بقية حياته كلها إلى استسلام.
• وآخر الكلام إذا لم تستطع أن تكون رومانسياً، فكن زوجاً مثالياً، وتذكري أيتها الزوجة أن الزوج لا يكون مثالياً إلا إذا كانت الزوجة مثالية.!
منقول
|
|
  
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
| Quote: ولا يستطيع أن يعبر عن مشاعره بـ المواصفات المتبعة عالمياً |
يا الطيب ،
مؤشر داوجونز بتاعك دا لا يهمنا،
نحن بيهمنا مقياس ريختر،
--
شوف يا الطيب، ما تنقلوا لينا الكلام بتاع الإكليشيهات
دا ساكت ، الرجل السوداني، الرجل السوداني ، الرجل السوداني..إلخ،
الرجل السوداني دا كغيره من رجال المجموعة الشمسية يحب
ويكره ويتأثر بعوامل التعرية والظروف العجيبة التي تصفعه صباح
مساء - من المهد إلى اللحد،
من خلال ممارستنا لمهنتنا اكتشفنا أننا من أكثر رجال الأرض
رومانسية وتقديرا للمرأة ،
ياخ ابوداؤود، ونيابة عن جموع الرجال السودانيين أعلن
في الراديو أن مشاكلنا بسيطه بالريده بتُحَل.
يا شيقا يا رومانس، هسه عليك الله أم مرتضى ، بعد مليار سنه خدمه
ما موهطه في البطينين الأيمن والأيسر والشريان التاجي؟
حكِّم ضميرك ياخ،
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: محمد المرتضى حامد)
|
عزيزنا الطيب
سلامات
طبعن هن كتار مؤشرات داوجونز .
اها يا الطيب . جماعتى شغالين بمؤشر داوجزنز الكتامى .
يعنى الواحد من جماعتى يخلى المؤشر يفرفر فى حنانو وهو ساكت .
وهى برضو . ( كتمان )
وبكون متكيف وساكن ورايق ويردد فى الأغنية . فى صفاء وتأمين فى الخوجلاب
ياقلبى .
يا أخى هناك الرومانسية فاتت الحد زاتو بس كتامى .
تحياتى
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: Osman Musa)
|
المرتضى
Quote: شوف يا الطيب، ما تنقلوا لينا الكلام بتاع الإكليشيهات
دا ساكت ، الرجل السوداني، الرجل السوداني ، الرجل السوداني..إلخ،
الرجل السوداني دا كغيره من رجال المجموعة الشمسية يحب
ويكره ويتأثر بعوامل التعرية والظروف العجيبة التي تصفعه صباح
مساء - من المهد إلى اللحد، |
طيب يا اخي نحن بنقول في شنو ؟ ما هي دي العوامل ذاتها الخلت رومانسيتو تمشي على عجل الحديد
Quote: من خلال ممارستنا لمهنتنا اكتشفنا أننا من أكثر رجال الأرض
رومانسية وتقديرا للمرأة ، |
وين التقدير هسع انا ام اولادي ولا بقدر اخليها تشق معاى السوق الحجل بالرجل
بقول ليها امشي منى بعيد وبعاين ليك بالطوالة
اوع تكون المعاينة بالطوالة دي هي الرومانسية وانا ما خابر؟
Quote: ياخ ابوداؤود، ونيابة عن جموع الرجال السودانيين أعلن
في الراديو أن مشاكلنا بسيطه بالريده بتُحَل. |
نان وينا هي الريدة - ابو داؤود بقصد الريدة من جوووووووووووووة حتك
Quote: يا شيقا يا رومانس، هسه عليك الله أم مرتضى ، بعد مليار سنه خدمه
ما موهطه في البطينين الأيمن والأيسر والشريان التاجي؟ |
هو ساى لكن ؟ دي بكتاباتا ومحاياتا وحجباتا
اللحكم فكي قوني ضميرو اول
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
عتمان
| Quote: اها يا الطيب . جماعتى شغالين بمؤشر داوجزنز الكتامى . |
اوع يكون البعبرو عنو بكلمة ( ام احمد تعالي امسكي لي العجيل عايز احلب ليك البقرة)؟
Quote: يعنى الواحد من جماعتى يخلى المؤشر يفرفر فى حنانو وهو ساكت .
وهى برضو . ( كتمان ) |
يا عثمان اخوي هو كان في مكتول جوووووة كويس بس اخاف يكون تم اجهاضه في شهره الثالث من العرس
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: طارق جبريل)
|
| Quote: دايما بتجيب الاوكسجين في حالة الإختناق! |
داير افطسك يا الفاتح
| Quote: ( The platonic love) |
يا اخي ات قايلني انا منتحب للرومانسية انا ما كايس كلامكم الحلو دا اولاد البندر - شوف قال The platonic love يا خي دي بيرناتشو ما ختها سمحة كدا - تم اجرك ختها لينا باليابانية والفرنسية
| Quote: لمن كنا في كلية القانون كان أقصى ما يفكر فيه الواحد إنه يحظى بإبتسامة صباحية تزيح عنه زمهرير الشتاء او تمر في وجدانه كنسمة في عز الهجير.!ولمن يودعوك يوم الخميس بمصافحة ودودة، تتذكر خوجلي عثمان بأثر متقدم" كتير بتناسى إيدي واسيبا عنوة فوق ايدك". وترجع الداخلية ويصبح سماع الكحلاوي وأغنية" زهر الرياض في ربيعو باسم" فرض عين ولمن تجي للمقطع البيقول" ما دام انحنا هوانا عذري ولو حبيت انا لي عذري! تشعر إنه الناس كلها إنتابتها حالة أشبه بـ " صمت الحملان". |
اها كمان دي عندنا كلها قلة ادب يا الفاتح نحن تعرس وممكن بعد داك تفاصح
| Quote: قلت لي قالوا الرومانسية قبل الزواج مالها؟ |
تسالي بس
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
عاين عاين يا الطيب
زمان بدرى
عندنا واحد كان طالب ورجع من مصر .
وجاب معاو كارو فل كتب كتب .
اها يا الطيب يوم فى ساعة القيلولة زولك كان بطالع فى كتاب قديم .
كلام عن الرومانسية وما الرومانسية والحرص على تخصيص وقت يومى للجلوس مع الزوجة
الغالية والانصات لهمومها وكلامها وشغلات زى دى .
عندو يا الطيب عمو كان راقد قام حيلو فرتلب وقال :
الولد ده رجع من مصر مجنون ؟؟؟
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: Osman Musa)
|
| Quote: وأعتقد أن الزوج السوداني لديه من الرومانسية ما يكفي لأن يغرق بحنانه كل من دول المكسيك وتركيا ومنطقة حوض البلقان، ولكنه لديه طرقه الخاصة للتعبير عنها، في القرى مثلاً يُعبّر الرجال عن رومانسيتهم بأساليب مبتكرة، منها أن يقول الرجل لزوجته بصوت يحاول أن يجعله حنوناً بقدر الإمكان: |
والله كلامك دا بعث في نفوسنا الامل ..
لكن البيقنع الطرف التاني شنو !!!
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: عبدالفتاح أبوشيمة)
|
Quote: هسع الولية ده أقول ليها صباح الخير .. تقول الراجل ده الليلة مالو؟
وأعتقد أن الزوج السوداني لديه من الرومانسية ما يكفي لأن يغرق بحنانه كل من دول المكسيك وتركيا ومنطقة حوض البلقان، ولكنه لديه طرقه الخاصة للتعبير عنها، في القرى مثلاً يُعبّر الرجال عن رومانسيتهم بأساليب مبتكرة، منها أن يقول الرجل لزوجته بصوت يحاول أن يجعله حنوناً بقدر الإمكان:
- يا مرة هووي .. قومي سوي لينا الشاي.!
|
الطيب الحبيب
لعلك بخير ياهبشت حتة
حساسة جدا انت عارف معظم الازواج الشفغتهم في حياتي
يعيشو الحياة كانها واااااااجب
بكل اسف لارومانسية ولا اجواءعشق ولا نديةفي الفهم
عبارة عن تحديات انت صح وانا غلط ..وهكذا
برجع ليك بي مهلة
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: باسط المكي)
|
عتمان ود موسى
Quote: عندنا واحد كان طالب ورجع من مصر .
وجاب معاو كارو فل كتب كتب .
اها يا الطيب يوم فى ساعة القيلولة زولك كان بطالع فى كتاب قديم .
كلام عن الرومانسية وما الرومانسية والحرص على تخصيص وقت يومى للجلوس مع الزوجة
الغالية والانصات لهمومها وكلامها وشغلات زى دى .
عندو يا الطيب عمو كان راقد قام حيلو فرتلب وقال :
الولد ده رجع من مصر مجنون ؟؟؟ |
هههههههههههههههها
لكن يا عثمان زولكم دا جاي راجع وبذاكر في الرومانسية؟ فعلا مجنون الجاب كتب الرومانسية بالكارو .
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
ود اب شيمة
وينك انت يا الحبيب امانة ما اتلومت بالحيل لا خبر لا اتر مشيت وين يا العشاء ؟
ود شيقوق بالعافية تروق
ما تشوف شر ودايماً فوق
فقاد للعشرة وقايد النوق
يا شيخ الحكمة وكلك دوق
16>5>2010-05-16
شيخ العرب كلك طرب
يحميك بس من عيني رب
تفضل تربرب للطرب
تحمد لربك كم وهب
آسرني بي فضل الدعاء
الوداني للعافية أم دوا
ورجعت أكتب لي رؤى
كمين قصيد للاستوا
يجمعنا بس ربي سوا
عشان نقالد الشوق هوا
نديك من قلبا هوى
من دون مصالح أو هوى
يحفظ وليداتك معاك
والعافية تبراك زي ضل الأراك
أخضر مندي على لماك
وتبيض سنونك لين أراك
ما تشوف لي شر درب الهلاك
وتحقق كمان لي كل مناك
في الدنيا والآخرة علاك
شايل قطر فوق السماك
وترش على العبد الهواك
من جود نعيماً خوة جاك
الله ينول لي جناك
كل التريده على هواك
في الجنة فوق مع سيدي داك
تسعد بصحبته يا ملاك
مافيش مصالح تجمعم
لكن هواك هو الهداك
قول مستشار ما كافية ليك
إنت الأمير إنت المليك
لو ناس حضارم عرفوا ليك
فضلك موسم بالفريك
طاير على كل شي يليك
جاب الخبر من عنده ليك
خلاني أخجل من وليك
الشايله في جوة الضلوع بي قوة هو يشابي ليك
يطلع يفضفض لي علوك
للعالمين ويشيدوا بيك
والله فت الباشا بيك
الله يتمم ليك حلوك
بالعافية ما يعري السلوك
في الصافية يرفع ليك بنوك
والدافية يوت انت التلوك
رطانة ديل ما يشبهوك
انت الملك ود الملوك
الخصلة ما فايتة الملوك
والنفس ما عالية في علوك
والهمة فوق هامة الملوك
أبو عبدالله ما كسير تلج
يا هو القليب والبيه خلج
والسن تدافر للفلج
بي بسمة صافية وتعتلج
والشوق يعافر في الدلج
بي دعوة بتسد الأفق
تصحيك تقول ليك أفق
يا درة من لون الشفق
حق الصباح وكتين يفج
للظلمة لي كل العنج
الناس تسافر للشفق
ويسدوا ليك كل الفجج
وانت البدر لازم تحج
تلقى الرسول بيك مبتهج
ويرد سلامك بي بهج
يغفر ذنوبك وتبتهج
وتعيشها في فرح رهج
أبو عبدالله أجرك على الله
ما بنقدر نجازي ونحن نعاني بي درب العلة
أصلا ضعفنا ما بجازي أخلة
إلا دعانا يا سمح الطلة
يمكن يقدر يمحي العلة
نلقاك فوق فوق علا وعلا
جاب نجم الليل واتدلى
ماسك ضنبو ما خلا الحلة
ولا اتباعد لي ضرب الجلة
الليلة الكلام السمح دا خمشتو من وين النبي؟ ولا دا شيطان شعرك جاك تاني
Quote: أنت سوداني وسوداني أنا أها يا عرروب دا كسير تلج واللا حب
تعرف القلب الشايله السوداني دا زول شايله مافي
أما موضوع الحروم برجع ليك تاني إن شاء الكريم |
عليك النبي ترجع يا اب شيمة امانة ما قلت كلام
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
باسط ود مكي
كيفك
Quote: لعلك بخير ياهبشت حتة
حساسة جدا انت عارف معظم الازواج الشفغتهم في حياتي
يعيشو الحياة كانها واااااااجب
بكل اسف لارومانسية ولا اجواءعشق ولا نديةفي الفهم
عبارة عن تحديات انت صح وانا غلط ..وهكذا
برجع ليك بي مهلة |
ههههههههههههههههها يا زول مالك عايز تخلي الجنادر يجوا فينا نيران.
المهم اتشمر وشد حيلك للجاياك - اتصلت فيني واحدة غاشيها زوجها بكليمات وقايلاها صحي صحي وقالت لي ود المكي عايز يخرب بيوتنا وخلاني اشك في مصداقية زوجي .
يا زول تعال وقول العندك ومحل رهيفة تنقد
| |
|
|
|
|
|
|
|
|
 Re: هذه آخر إكتشافات داوجونز لقياس الرومانسية (Re: الطيب شيقوق)
|
| Quote: وآخر الكلام إذا لم تستطع أن تكون رومانسياً، فكن زوجاً مثالياً، وتذكري أيتها الزوجة أن الزوج لا يكون مثالياً إلا إذا كانت الزوجة مثالية.! |
اضعف الأيمان وكده يا شيقا ههههههههههههه
تناولت موضوع حيوي جداُ ويمس كل زوج وزوجة
فعلاً هناك خلل ولكن غير متعمد لان الظروف المحيطة بك
تلعب دور مهم في ذلك .
ولكن هذا لا يمنع ان نمارس حياتنا حسب ما نراه مناسباً
الكلمة الطيبة صدقة وتبسمك في وجه اخيك صدقة
اذا لماذا لا نعطي زوجاتنا كلمة طيبة أو بسمة حلوة ؟
بس بيني وبينك كده , يوم من الأيام أم أحمد عاملة زعلانة
بقيت اشاغل فيها واقول ليها كلمات غزل لحدي ما كونت لي
ستة مقاطع شعرية وقلت اقرأها ليها , أها يا سيدي جيت اقرأ
ليها في القصيدة بمزاج , قالت لي كلامك ده امشي اكتبه في المنبر
أنا عايزة اشتري لي حاجات من السوق يلا دور عربيتك خلينا نمشي
هههههههههههههههههههههههههههههه
آل رومانسية آل
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: هاشم أحمد خلف الله)
|
اب احمد
Quote: يوم من الأيام أم أحمد عاملة زعلانة
بقيت اشاغل فيها واقول ليها كلمات غزل لحدي ما كونت لي
ستة مقاطع شعرية وقلت اقرأها ليها , أها يا سيدي جيت اقرأ
ليها في القصيدة بمزاج , قالت لي كلامك ده امشي اكتبه في المنبر
أنا عايزة اشتري لي حاجات من السوق يلا دور عربيتك خلينا نمشي
هههههههههههههههههههههههههههههه
آل رومانسية آل |
يجازي محنك يا هاشم ضحكتني - تعيش ام احمد تعيش ام احمد تعيش ام احمد -
يا هاشم اعجبني هذا الرأي من بعض الاخوة السودانيين عن الرومانسية حيث قال :-
الرومانسية هي إحساس داخل كثير من الناس ولا ترتبط بأشخاص معينين .. كثير من الناس يكونون رومانسيون وهذا لا يعني أنهم كثيرو الحب .. ولكن يعني أن لدى هؤلاء إحساس قوي ولديهم إحساس فطري وربما لن يعبّروا عن تلك الرومانسية إلا عند وجود شخص في حياتهم .. والرومانسية رقة في المعاملة .. أدب في الحوار .. خوف على الآخرين .. إحساس بمن حولنا ..
الرجل السوداني والمرأة السودانية متهمان بعدم التعبير عن مشاعرهما!!
هناك حقيقة يجب معرفتها وهي: أن الحب والالتزام بسلوكياته فن لا يجيده كل الأشخاص فهو يحتاج إلى موهبة ورومانسية وتدريب مستمر منذ الطفولة .. هذه المشكلة يعاني منها الكثير في مجتمعنا الشرقي .. نحن نفتقد لثقافة الحب وكيفية التعبير عن مشاعرنا الدافئة تجاه الآخرين .. من السهل علينا أن نعبر عن الغضب والكره للآخرين ، ولكن يصعب علينا أن نعبر عن مدى حبنا لهم . معنى ذلك أن هناك شيء في ثقافتنا أو تربيتنا يضع حاجزا بيننا وبين أن نكشف عما بداخلنا من حب وود نكنّه للآخرين .. فإذا أنت اعتدت على إظهار مشاعرك نحو أولادك منذ الصغر فهم سيتعلمون ويتدربون على ذلك ومن ثم مستقبلا سيقوم هؤلاء الأولاد بإظهار مشاعرهم نحو الآخرين لأنهم تربوا على ذلك .
لذلك تربيتنا هي السبب التي جعلت الرجل والمرأة في مجتمعنا لا يعبران عن مشاعرهم .. تربية قامت على جفاف المشاعر .. وعلى التعامل بشكل غير عاطفي مع الزوجة والأبناء إعتقادا بأنه أفضل لإدارة الأسرة لاعتقاد البعض أن إظهار المودة والحب يفسد الأولاد .. التربية هي التي تقوم ببلورة العواطف والمشاعر .. يمكننا القول أيضا أن البيئة والحياة القاسية التي عاشها الآباء والأجداد ربما تكون سببا في تربية الابن أن يكون صلبا ويجب ألا يبكي أو يظهر عواطفه .. المرأة والرجل عاشا في مجتمع تحكمه عادات وتقاليد وعاشا في أسر لا يبوح أفرادها بمشاعرهم.. وفاقد الشيء لا يعطيه. كأن الفرد في مجتمعنا بُرمج عبر التربية والثقافة على إخفاء مشاعره العاطفية وعدم التعبير عنها .. مما يوحي أن هناك حالة انقطاع في الاتصال العاطفي بين الزوجين .. نضف إلى ذلك أن بعض الرجال لا يبوحون بمشاعرهم ليقينهم وقناعتهم أن الزوجة ستعيش معه مدى الحياة فهم يعتبرون أن الحب شيء مضمون لا يحتاج إلى إيصال رسالة تعبير عن مدى تعلقه العاطفي .. البعض الآخر يرى أن الحب مكانه القلب ولا ضرورة للتعبير عنه بالكلمات .. وكلاهما مخطئ .. فكيف يعرف الطرف الآخر أنك تحبه؟
مشكلة إخفاء المشاعر وعدم التعبير عنها لا يجب علينا أن نلصقها فقط بالرجل السوداني أو المرأة السودانية .. هي مشكلة تعاني منها أغلب المجتمعات خاصة في محيطنا العربي .. وأساسها تربوي في المقام الأول .. فأنت كأب عندما تعبر عن مشاعرك تجاه أولادك سيتربون على ذلك ويتعودون ومن ثم ستكون من ضمن سلوكياتهم وهم بدورهم سيتدربون ويتعلمون كيفية التعبير عن مشاعرهم ..
أعتقد الآن قد تغير الوضع في ظل التطورات والمتغيرات التي حدثت في عصرنا الحالي .. القنوات الفضائية والانترنت رغم المساوئ لكن ساهمت نوعا ما في تغذية ثقافة الحب لدى الشباب .. فشباب اليوم عندنا ليس كشباب الأمس .. أصبح لديهم قدرات في التعبير عن مشاعرهم ولعلنا سنصل في مرحلة قادمة يكون فيها الرجل السوداني أكثر جرأة في البوح عما بداخله من مشاعر نحو الطرف الآخر ..
تسلم يا الحبيب
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
| Quote: اها قمت تاني علي العنكوليب |
الطيب اخوى بسم الله عليك وما تشوف شر
علك مو ميريود مالك قمت تهابش وتهضرب الرايح منك ليهو كم حول بتدور تفتشلووووووووو اليوم.
الشى روماشية ولا عاشق ومعشوق كدى ورينا بصدلك تانى ههههههههههههههههه
بشوف ناس قرعتى طفحت كتار بالحيل هنااااااا اظنوووووووو رايح ليهم الدرب متلك آآآآ المسنوح
سلامى ليهم بلا حدود
والعاقبة عندكم فى المسرات انشاء الله
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: Yousif A Abusinina)
|
ابو سنينة
انت وين مشيت ؟ للعنكوليب؟
Quote: علك مو ميريود مالك قمت تهابش وتهضرب الرايح منك ليهو كم حول بتدور تفتشلووووووووو اليوم.
الشى روماشية ولا عاشق ومعشوق كدى ورينا بصدلك تانى ههههههههههههههههه
بشوف ناس قرعتى طفحت كتار بالحيل هنااااااا اظنوووووووو رايح ليهم الدرب متلك آآآآ المسنوح |
انت مالك ما مركز ؟ ظاهر قاعد تكتب وتتلفت بوراك
يا اخي شد حيلك وما تخاف ادخل البوست دا ساى ولو قالت ليك جيت ليش هذا البوست؟ قول ليها عايز اشوف المتخلفين ديل بقولوا شنو .
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
جعفر
Quote: وحتى أكون صادقا أحيــــــــانا تزورنا ملائكة الرومانس
ونرجع نترومنس مع شريكاتنا حمالات الشيلة السمحات أمات الأولاد
قمة الرومانسية عند جدي ود مسعود كانت تتجلى حين يجلب بطيخة حمرررررراء
وخرج شمام ... ويدخل على بنت سليمان . |
والله عجبتني بصدك وصراحتك يا جعفر اخوي - عاين يا جعفر جدك ود مسعود دا ذكرني قصة رواها لنا احد اعضاء المنبر في بوست يحكي عن قصة اغنية بعد ايه لاسماعيل حسن .
يقول حكى اليه احد اصدقائه ان جده البالغ من العمر 90 سنه كان ماشيا مع حفيده لزوم المجاملة في بعض المناسبات ولدى عوتهم مروا بعجوز في عمر جده وجدي قال لي نغشاها ونسلم عليها - قال جدى ودانا ليها سلم وطلع وبعد ذهبنا بعيد جدى فتح جزلانه وجد فيه عشره جنيات وقال لحفيده نرجع تاني لحبوبتك دي . قال رجعنا ليها تاني ولاحظت جدى طلع العشرة جنيهات وعصرها ليها .
قال سألت جدى قلت ليهو ليش اديتها العشرة جنيهات ؟ جدو رد قائلا حبوبتك دي كنت بحبها يا ولدى .
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: Yousif A Abusinina)
|
ود شيقوق
السلام عليكم
اختياراتك جميلة مثل قلبك الطيب
ياخي الرومانسية دي حاجة صعبة خلاص
جيناتنا فيها شيء بيتعارض نهائي معاها
وأجزم أن حتى الرجال السودانيين المولود في العصر الرومانسي
كانوا يفتقرون للرومانسية
فما بالك بالمولودين في عصر (أمك ولّعت - أمك طفت )
قبل الزواج دلقنا براميل من الرومانسية وبعد الزواج سكتنا حتى عن الكلام المباح
وحتى أكون صادقا أحيــــــــانا تزورنا ملائكة الرومانس
ونرجع نترومنس مع شريكاتنا حمالات الشيلة السمحات أمات الأولاد
قمة الرومانسية عند جدي ود مسعود كانت تتجلى حين يجلب بطيخة حمرررررراء
وخرج شمام ... ويدخل على بنت سليمان .
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: باسط المكي)
|
ود المكي
Quote: زمان حاولت اعيش الرومانسية ..
في البدايات حبيت بت الجيران
اهديتهاكاتب تحت ظلال الزيزفون .
وشريط الحزن النبيل ..اهدت لي
منديل وخلال ومراية...
بعد فترة جا قريبها من وين ماعارف
خلاني لافي صينة |
يعني باعوك بالرخصة يا باسط اخوي؟ اكان تشوتها ضفاري قبل تشوتك يا مسنوح
Quote: معظم السودانيات
يريمن حبيبهن في اقرب لفة ..اذا اتوجد البديل المناسب ووو |
دى لعبة مصالح يا ود المكي
Quote: وتتحول الحياة لازواج عادين
وتتحول هي لربة بيت عادية
واب يقوم بواجباته ..علي احسن الفروض
اما الرومانسية لها ادواتها ومعايريها..
نحن كشعب سوداني بعيدين منها كل البعد..
ووتلا تكون لنا رومانسية مفصلة لنا بمقايس
نعرفها نحن فقط .. |
يا اخي انتوا بس ما بتعرفوا اللعبة - نحن نسوانا كان الواحدة جلست على النطع ساى بنعرف دي رومانسية واكان نحن بدرنا صلاة العشاء برضهن بفهمن دي رومانسية .
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
قريبي
بكل الأدب اسمح لي اختلف معاك في الحتة دي
| Quote: على حد علمي لا رومانسية مع (الفلس)، الرومانسية كائن ملازم لـ الغني، ويتناسب عكسياً مع (الفلس)، أي كلما زاد (الفلس) قلّت الرومانسية، وكلما قلّت الرومانسية ستجد الفلس من أهم الأسباب، فـ (الفلس) حيثما وُجد يعتبر هادماً لـ اللذات ومفرقاً لـ الرومانسيات، الرومانسية تحتاج إلى جيب ممتلئ بـ (الكاش)، لأن من (تترمنس) معها –من المفترض أن معناها: التي تمارس معها الرومانسية- تحتاج إلى رحلات بريّة وزيارة مطاعم فاخرة، ومنتزهات وحدائق، وتتناسب الرومانسية مع بيت تزغرد فيه العصافير، وتتحاوم فيه الفراشات حول الزهور، وتحفّه نوافير المياه من كل جانب، وتوقد فيه الشموع عند العشاء، بينما تنساب موسيقى حالمة من مكان ما |
نسواننا ديل قنوعات صدقني
ولو جربت أبسط لمحة رومانسية بدون أي تكاليف
أتوقع حا يكون مفعولها سريع جداً
بس نحن كيف نبادر .. ولو بالنية حتى !!
تحياتي
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
أخى الحبيب الطيب...
ماعايز اقول ليك أستاذ الطيب...عشان كلو مرة شابكنى أستاذ إسماعيل..
كلامك جميل ومرتب ..وواقع معاش..
عجيتنى فكرة إرتباط الرومانسية بالجيب والصلة اللصيقة بينهم.وإن كنت ارجح بأن الرومانسية أصلآ راجعة.. للتربية والبيئة المحيطة بالشخص..
النص القادم منقول:
Quote: إن علي بن الجهم كان بدوياً جافياً ، فقدم على المتوكل العباسي ، فأنشده قصيدة ، منها :
أنت كال###### في حفاظك للود وكالتيس في قِراع الخطوب
أنت كالدلو ، لا عدمناك دلواً من كبار الدلا كثير الذنوب
فعرف المتوكل حسن مقصده وخشونة لفظه ، وأنه ما رأى سوى ما شبهه به ، لعدم المخالطة وملازمة البادية ، فأمر له بدار حسنة على شاطئ دجلة ، فيها بستان حسن ، يتخلله نسيم لطيف يغذّي الأرواح ، والجسر قريب منه ، وأمر بالغذاء اللطيف أن يتعاهد به ، فكان – أي ابن الجهم – يرى حركة الناس ولطافة الحضر ، فأقام ستة أشهر على ذلك ، والأدباء يتعاهدون مجالسته ومحاضرته ، ثم استدعاه الخليفة بعد مدة لينشده ، فحضر وأنشد :
عيون المها بين الرصافة والجسر جلبن الهوى من حيث أدري ولا أدري
فقال المتوكل : لقد خشيت عليه أن يذوب رقة ولطافة.
|
شفت البيئة ليها اثر كيف اخى الطيب..يعنى الناس الما عاشوا على الكلام الحلو والرومانسية حاتكون ليهم صعبة..ولكن دى ايضأ دلالة على إنها شىء مكتسب..
يا أبو احمد..إتهرشته يعنى وسكت ساى وما قلت لى..
Quote: ولكن هذا لا يمنع ان نمارس حياتنا حسب ما نراه مناسباً
الكلمة الطيبة صدقة وتبسمك في وجه اخيك صدقة
اذا لماذا لا نعطي زوجاتنا كلمة طيبة أو بسمة حلوة ؟
بس بيني وبينك كده , يوم من الأيام أم أحمد عاملة زعلانة
بقيت اشاغل فيها واقول ليها كلمات غزل لحدي ما كونت لي
ستة مقاطع شعرية وقلت اقرأها ليها , أها يا سيدي جيت اقرأ
ليها في القصيدة بمزاج , قالت لي كلامك ده امشي اكتبه في المنبر
أنا عايزة اشتري لي حاجات من السوق يلا دور عربيتك خلينا نمشي
هههههههههههههههههههههههههههههه
آل رومانسية آل |
الكلمة الحلوة جسر مودة بين القلوب...ما اجمل أن نتناول الكلمات الطيبة بيننا..والرومانسية شىء رائع وجميل....
تسلم اخى الطيب على هذا البوست الجميل..
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: ismeil abbas)
|
| Quote: ولو جربت أبسط لمحة رومانسية بدون أي تكاليف |
والله يا ود النور كلامك في محلو المراة السودانية هدية ورضية
| Quote: بس نحن كيف نبادر .. ولو بالنية حتى !! |
بادر ولو بجلسة جنبها عندما تكون بتعمل ليك في القهوة .
انت بس قول ليها شمميني قلاي البن وحاة الله دي عندها افضل من تقدم ليها شوال ورود
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
استاذنا ابو السباع
كيفك
| Quote: ماعايز اقول ليك أستاذ الطيب...عشان كلو مرة شابكنى أستاذ إسماعيل.. |
يا اخي الاستاذية سلوك قبل كل شيئ فان انعدم السلوك فلا معني للحديث عن اى قيمة اخري
| Quote: كلامك جميل ومرتب ..وواقع معاش.. |
عفوا سيدي ابو السباع الكلام دا انا خامشو من جهة ما عارفها وين
| Quote: عجيتنى فكرة إرتباط الرومانسية بالجيب والصلة اللصيقة بينهم.وإن كنت ارجح بأن الرومانسية أصلآ راجعة.. للتربية والبيئة المحيطة بالشخص.. |
بالتاكيد للبيئة والتربية دورها في غرس السلوك الرومانسي المسؤول
Quote: النص القادم منقول:
Quote: إن علي بن الجهم كان بدوياً جافياً ، فقدم على المتوكل العباسي ، فأنشده قصيدة ، منها :
أنت كال###### في حفاظك للود وكالتيس في قِراع الخطوب
أنت كالدلو ، لا عدمناك دلواً من كبار الدلا كثير الذنوب
فعرف المتوكل حسن مقصده وخشونة لفظه ، وأنه ما رأى سوى ما شبهه به ، لعدم المخالطة وملازمة البادية ، فأمر له بدار حسنة على شاطئ دجلة ، فيها بستان حسن ، يتخلله نسيم لطيف يغذّي الأرواح ، والجسر قريب منه ، وأمر بالغذاء اللطيف أن يتعاهد به ، فكان – أي ابن الجهم – يرى حركة الناس ولطافة الحضر ، فأقام ستة أشهر على ذلك ، والأدباء يتعاهدون مجالسته ومحاضرته ، ثم استدعاه الخليفة بعد مدة لينشده ، فحضر وأنشد :
عيون المها بين الرصافة والجسر جلبن الهوى من حيث أدري ولا أدري
فقال المتوكل : لقد خشيت عليه أن يذوب رقة ولطافة.
|
اها مش قلت ليكم يا اخوانا ممارسة الرومانسية خشم بيوت؟ نحن يا ابا السباع مجرد قومة المرة من البنبر عشان تشممك قلاي البن تعتبر قمة الرومانسية لا سيما لما تقوم انت الشامي بتكرف القلاي شدييييييييد وتعاين للمرة وتقول ليها الليلة سويتي العجب
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
Quote: مجرد قومة المرة من البنبر عشان تشممك قلاي البن تعتبر قمة الرومانسية لا سيما لما تقوم انت الشامي بتكرف القلاي شدييييييييد وتعاين للمرة وتقول ليها الليلة سويتي العجب
|
والله دى رومانسية بكيف شديد..وإنت سويت العجب برضو..
تسلم يا اخى الطيب...
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: ismeil abbas)
|
| Quote: يا اخي انتوا بس ما بتعرفوا اللعبة - نحن نسوانا كان الواحدة جلست على النطع ساى بنعرف دي رومانسية واكان نحن بدرنا صلاة العشاء برضهن بفهمن دي رومانسية . |
الطيب
وضيوفه الاعزاء ..
سلام واحدة جعلية معجبة جدا باسلوب
جيرانها المصرين .اساتذة باسرهم .
وتعاملهم بدون كلف وكده..ورمانسية
من ياحبيبي صباحك ورد الي انت نور عيوني
...ولماتزور جارتها المصرية..عادي المصرية
تقول لزوجها وانبي يااحبيبي اعملينا شاي
اها الجعلية اعجبت بالطريقة دي ..
في يوم جارتها المصرية زارتها في البيت..
ودون تعشر قالت لي زوجها قوم سولينا شاي ..
زوجها الجعلي قام عليها بي بسطونة ...هي وضيفتها
وعينك ماتشوف الا النور..
.......
لو في رومانسية بنمارسها .بطرق
نعرفها نحن وكل واحد علي حسب طريقته ..
من المناقرة الي الونسة الدقاقة ..
ولو سالت اي واحد تقوليه متي اتعاملت مع الورد
وتبادلت هدايا اريحية لزوجتك ..يقول ليك انت زول فائق..
ونفسي الشي نسوانا حياتهن كلها طرابيز وصحووووووووووون
وستائر .ووووو وبعد الانجاب ..تتحول لدشر ة
كتيرة النقة ..
زمن تجار الجنوب .بغيبو ..
ويجو بعد سنين ..لاحظت حتي الازيار يحكوهن
وتطرز الملايات ..ويتغير شكل البيت.
دةنوع من التعبير الرومانسي اظنو اختفي
الان...وراجع ليك
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
ود المكي
سلام واحدة جعلية معجبة جدا باسلوب
جيرانها المصرين .اساتذة باسرهم .
وتعاملهم بدون كلف وكده..ورمانسية
من ياحبيبي صباحك ورد الي انت نور عيوني
...ولماتزور جارتها المصرية..عادي المصرية
تقول لزوجها وانبي يااحبيبي اعملينا شاي
اها الجعلية اعجبت بالطريقة دي ..
في يوم جارتها المصرية زارتها في البيت..
ودون تعشر قالت لي زوجها قوم سولينا شاي ..
زوجها الجعلي قام عليها بي بسطونة ...هي وضيفتها
وعينك ماتشوف الا النور..
.......
Quote: لو في رومانسية بنمارسها .بطرق
نعرفها نحن وكل واحد علي حسب طريقته ..
من المناقرة الي الونسة الدقاقة ..
ولو سالت اي واحد تقوليه متي اتعاملت مع الورد
وتبادلت هدايا اريحية لزوجتك ..يقول ليك انت زول فائق..
ونفسي الشي نسوانا حياتهن كلها طرابيز وصحووووووووووون
وستائر .ووووو وبعد الانجاب ..تتحول لدشر ة
كتيرة النقة ..[/QUOTE
خلي يجي واحد يقول غير ذلك
Quote: ]زمن تجار الجنوب .بغيبو ..
ويجو بعد سنين ..لاحظت حتي الازيار يحكوهن
وتطرز الملايات ..ويتغير شكل البيت.
دةنوع من التعبير الرومانسي اظنو اختفي |
انت مسكين والله يا باسط اخوي دى قمة الرومانسية وبتكون احلى لما هو يجيب ليها من الجنوب حاجات ومشتاق ويقول ليها دي حقتك براااااااااااااك
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
سلامو لأستاذ الطيب ولكل المتداخلين,
Quote: نسواننا ديل قنوعات صدقني
ولو جربت أبسط لمحة رومانسية بدون أي تكاليف
أتوقع حا يكون مفعولها سريع جداً
بس نحن كيف نبادر .. ولو بالنية حتى !! |
ح أرد ليك على كلام نادر , وبرضو -أعتقد-.
يعنى التعامل الودود, عملية تفاعلية فى المقام الأول, الطرفين جزء أصيل فيها, أخذ وعطاء, وممكن اى من الطرفين يكتسبا من الآخر.
ودة أساسه المودة والرحمة.
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: Yousif A Abusinina)
|
الاخت الفضلى ندى عثمان
Quote: يعنى التعامل الودود, عملية تفاعلية فى المقام الأول, الطرفين جزء أصيل فيها, أخذ وعطاء, وممكن اى من الطرفين يكتسبا من الآخر.
ودة أساسه المودة والرحمة |
نعم يا ندى بس الزوجة ما عايزة ود بالافعال وبس عايزة ود بالكلمات وكدا . ودا نحن بنشوفو تقيييييييييييل وحياتك
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
سنو
| Quote: آآآت المسنوح جاى محكر يدياتك فوق حنك وتكلم على الرومانسية مع ناس العنكوليب |
يطول عمرها السمحت ليك تجي بوستينا يا مسنوح
قول ليها اقلي لي بن الجبنة وبعد تقلاهو قول ليها مشتهي لي شمامة في البن دا . وبعد تشم البن اتكرف كويس وارف عيونك عليها قول ليها تسلم يدك - دي قمة الرومانسية عند اهلك ناس نور الجليل وام عقرب
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
عليك النبي ترجع يا اب شيمة امانة ما قلت كلام
غير سوداني مين الببوس راس أمه
راس خالاته راس عماته لي بت عمه
يقالد بي صفا أماته لي جاراتو كأنهن من دمه
ست الشاي يعدها بالجبر من همه
غير سوداني مين بحمل جبايل فقره يتبلمبه
لا بقول ماني حامل همه
يتغرب ويتكرب ويتعذب يحرق دمه
عشان العازة ما تنحاس ولا تنداس تتألم
تشيل هم همه
تشيل هم الصغار يتلموا ما ينخموا
الحب ما في اللديد داك نضمو
في فعلاً صعيب ويصعب هضمه
فعل التضحيات المغلباتننا فهمه
سيدي المستشار بين فكين رحى واتلموا
يطحنوا في دماه ولحمه
يبقى أخو البنات!؟ واللا الراب يلخلخوا عضمه
يمسدر للحريم؟! والنوق ديك يحملا همه!؟
لو فلت العيار ما الكل بيهدروا دمه
وصاة الرسول في وداعه؛ داك فك الرحى الفوقاني
ولا يبكي على الحب إلا النسا؛ مارضاني
وبين الحافتين ياني البقيت سوداني
والسفينة شان تبحر أهي الكاوياني...
وقفات البطان ضهر مسلوخ بو كياني
عشان العازة تتلقاني بي تحنان
تضمد للجروح وحنان
يوم الانتخاب فوق حر الشمس راجياني
خوف الجندرة الخلاني في كسير تلج يا إخوان
دا كله عشان وطن يفضل موحد تان
وتقول عزة مالك تعاين لي بي تحنان
ماك شايفني قبل كدا واللا اتولد من تان
وأسكت بس أعاين
والفي قلبي داك خلو... بعرفه مكاني
بين فكين رحى أحسن لي من تبيان
التبيان بجيب كتر الطلة المسخت خلق الله
بجيب البنات المن عمر تمنتاشر بفوتوا الحلة
شباب ما بشوفوا أبواتم غير في الجنازة محلة
أخير أضغط قليبي على العليه من علة
ولا أصرح بي حبي فوق الحلة
وألولو في الكلام من غير نفس يا أخلة
وأفضل في الفعل من دون دي أي مذلة
وأحب بي طريقتي بي قولي يا بسم الله
ووصاة الرسول تبقالي الدليل يا أخلة
يا مستشار
وصاة الرسول كانت لنا ولكل البشرية؛
وأول دروس الجنس كانت لنا لأنه يعرف ضعفنا من لدن خالقنا
لهدا جاءت الوصية؛ ولأنه يعرف اهتمامها(المرأة) كانت المقدمات.
والسودانيون من أكثر الدين عبروا بسائر ألوان التعبير؛ يا أخي الغنا الكتير دا شنو؟؛ يا أخي المغنواتية بقوا أكثر من السميعين ذاتهم؛
دا ما كلام سوداني؛ موجه في معظمه لهده الزوجة الحبيبة والخطيبة والنسيبة الجايبة لي كل النصيبة. وهييييع ماني خايف.
شعر شنو يا أخي
الشعراء ديل العروب
لو بعرف شعر ما كنت خليتك ترقد على جنب؛ نحن مفطومين على الرطانة؛
وناس بطحان من شيخ فرح لسمية؛ بالمناسبة وين سمية بت الأصل والفصل؛ تحياتي إليها.
أما اللوم فليك الحق وأبداً تب ما بتتعيب
لكن برضو ما بتعذر زولا في درب المرض اتوكر
لوما هي دعواتك ودعوات ناس كتار بالحيل
جميلهم فاض علينا وسيلهم ما بتقابلوا غير دعوات يجازيهم الله[/green]
إن شاء الله لنا عودةإن ظل في العمر بقية
والود بكل الرومانسية
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: الطيب شيقوق)
|
كانت تردد
عشان هواك حبيت قمرية
فوق الدوح..
بصوت خافت..وحنين ..مشغولة.بابرة الكرشيه
تنسج شي ماء ..شعرت بقدومي .وسكتت
سالتها صوتك جميل قالت اه ياولدي
السنين جرت ..عليها شلوخ مطارق ..وجمال
بداء بالرحيل ..حكت عن الاغاني ..الكانت.
زمان .وطلوع قمر اربعة عشر..علي رمال الفريق.
كانت الطنابير ..والصفقة ..حباها ود الفريق
واتزوجها ..لايتفارقاابدا ..في البيت والزراعة ..
كل شتاء تهدي له فردة دمور ابزيق رباعي ويهدي لها..
ماجلب في السوق من الموضة من ثياب..
قالت لو طعنتو شوكة وهو بعيد مني اعرفه متالم..
سافر الصعيد ومارجع ..
منحت فيه ..ياسيفي البهزبيك
وياتوبي البتغطي بيك..
........
الطيبب الحبيب
من واقع الحياة ..
يبدو للرومانسية وجود كبير
في الماضي ..اما الان كل ما اذداد ايقاع الحياة..
اذدات دقة مقايس الرومانسية..
دة بشكل عام ..
| |
|
|
|
|
|
|
|
|
|
Re: هذه آخر إكتشافات داوجونز لقياس الرومانسية (Re: باسط المكي)
|
ود المكي
Quote: كانت تردد
عشان هواك حبيت قمرية
فوق الدوح..
بصوت خافت..وحنين ..مشغولة.بابرة الكرشيه
تنسج شي ماء ..شعرت بقدومي .وسكتت
سالتها صوتك جميل قالت اه ياولدي
السنين جرت ..عليها شلوخ مطارق ..وجمال
بداء بالرحيل ..حكت عن الاغاني ..الكانت.
زمان .وطلوع قمر اربعة عشر..علي رمال الفريق.
كانت الطنابير ..والصفقة ..حباها ود الفريق
واتزوجها ..لايتفارقاابدا ..في البيت والزراعة ..
كل شتاء تهدي له فردة دمور ابزيق رباعي ويهدي لها..
ماجلب في السوق من الموضة من ثياب..
قالت لو طعنتو شوكة وهو بعيد مني اعرفه متالم..
سافر الصعيد ومارجع ..
منحت فيه ..ياسيفي البهزبيك
وياتوبي البتغطي بيك.. |
........
الله يحفظك ويغطيك يا باسط - هذا هو الصدق هذا هو الوفاء وهذه هي العشرة النبيلة
Quote: الطيبب الحبيب
من واقع الحياة ..
يبدو للرومانسية وجود كبير
في الماضي ..اما الان كل ما اذداد ايقاع الحياة..
اذدات دقة مقايس الرومانسية..
دة بشكل عام .. |
صحيح يا باسط اخوى واحسب ان للعفة والحياء وصعوبة رؤية الحبيبة كلها عناصر تزيد من وله المحب
تخيل يا باسط حبينا وكنا ننتظر الاعياد لتكون مناسبة لرؤية الحبيبة .
يا اخي صدق من قال :-
يغيب الهوى عني اذا لاقيتها ويورق ثم يزيد حين تغيب
عميق ودي
| |
|
|
|
|
|
|
|
| |
الطيب شيقوق
محمد المرتضى حامد
Osman Musa
الفاتح ميرغني
طارق جبريل
عماد الشبلي
عبدالفتاح أبوشيمة
باسط المكي
هاشم أحمد خلف الله
Yousif A Abusinina
جعفر محي الدين
نادر النور آدم
ismeil abbas
ندى عثمان حسن
فيس بوك
تويتر
انستقرام
يوتيوب
بنتيريست