|
|
 أسأل عن طول المسواك المستحب...وياجوج وماجوج علي الأبواب
|
عادة يومية سيئة:
امارسها مثل التدخين هي مطالعة سودانيز أون لاين،هذه العادة امتدت لسنوات طويلة مع فترات الانقطاع لدراسات عليا ومشاغل حياتية اخري كثيرة والشاهد في ذلك انني متواجد في الفترة الماضية كثيرا اتداخل مبتسما ومتجهما وحزينا لفقد احدهم وفرحا للاخرين..ما علينا
دخلت سودانيز اليوم كالعادة والمؤكد انني اتعامل مع المساحة هذه بشيء من الاختلاف فلا خصم لي فيها لا قضية محددة تثيرني وتجعل الكتابة ملحة عندي غير قضية السدود في الشمال تحديدا ورغم هذه العشرة سنوات الا انني اعترف انني قرأت الكثير بلا فائدة والوم نفسي في ضياع الوقت في غير مكانه. ومع انني شديد الحرص أن اقرأ لاشخاص محددين جدا في مسألة انهم يضيفوا لي معلومة مثلا عمنا البشمهندس ابوبكر في عمق تناوله للقضايا باسلوبه ومعاوية حسين والاخير في بوستاته التقنية كشخص مهتم بالمجال فقط وليس الهلال.
ابحث كدأب اي انسان عن ما يروح عن النفس عن الونسة البتفرفش بالزول وبخش اناوش ناس كتار واصحاب اسفيرين جميلين،بقرا مرة مرة لاصحاب خبرتهم مبدعين منهم خضر وعماد وحسيت بانسحاب ناس مبدعين زي اسامة معاوية بعرفهم وما بعرفهم زي شقاق قريت ليهم برضو..
ومرات كتيرة بتبادل السلام والتحية مع ناس عرفناهم ونعزهم في المساحة دي او قبل المساحة دي برغم من انو دخول بوست زول تاني ذاتو بقي مشكلة لصعوبة القراءة عند الناس كلهم وتشغيلهم لمكنات الخيال المريض .
اما عناوين البوست المفخخة مثل جريدة الدار فوالله لو قلت ليكم خمسة سنة ما بخش فيها بتصدقوا؟...ما علينا تاني
بتعامل مع البورد بربع مكنة لكن اصلو ما اتخيلت انو الناس دي كلها بتتعامل معاه بخمس مكنة مع انهم عاملين مركزين ساي.
فيا فقهاء البورد ومفكريه وواضعي قوانينه و (معاييره) افتوني في فشلنا كنخبة سودانية متواجدة في مساحة تتيح ليها معرفتها التقنية والمادية في التواجد في هذا المكان وهم عندهم المال اللازم للتواجد في الانرنت وفي غيرهم بشربوا الحنضل وما عندهم سكة لحاجة اسمها انترنت خليك من المنبر بتاعنا ده أسالكم قليل من المسئولية.
إذن شن جدا علي المخدة
الجدا يا جماعة الخير ناس المنبر يالفقهاء الإفتراضين منشغلين بقضايا لا تسمن ولا تغني من جوع..مثلهم مثل علماء الازهر ان كنت (دقيقا) او حتي دراش انهم يختلفون واحتدموا في نقاش قضية طول المسواك المستحب في حين الحملة الفرنسية كانت في شاطئ الاسكندرية وتضرب في مصر ذاتايعني ما الجزائر
بنفس الفهم
وبمعني بسيط القضايا الحولنا صارت كبيرة لدرجة ما قادرين نصدقها وهي من الصفحة الاولي للمنبر
1.السودان فقد حصته المائية...بعد التوقيع الذي سيجري في مقبل الايام في الاتفاقيات المفصولة والسودان صار تابع ما عنده قرار بخيار الوقوف مع مصر يعني اجيالكم الجاية ماحيسقوا ورد البلكونة بموية صحة معالجة بالاوزون سيموتون عطشا في مدن البلاد قبل صحاري البلاد.
2.سوق المواسير وكضب كبر الظاهر والاكبر من اي صورة بروفايل مثيرة.
3.برغم المساعدة الواضحة من بكري برفع عنوان واحد في الصفحة الرئيسة وبالبنط العريض موضوع دار المسنات الا ان والداتنا في تلك الدار آخر همنا.
4.دارفور وشهداء كجبار وواقع الاحزاب الوطنية
5.مقتل قرنق والسكوت عنه
6.وحدة السودان وانفصاله وحلايب
5.الخ الخ من القضايا الساخنة في الصفحة الاولي والبتناقشها الناس حسب مزاجها بس
تناقض اول
1.أنني اصبحت اصاب بالغثيان في هذا المكان كل ما اري مداخلة طويلة لا اخرج منها بغير ترف فكري يمارسه احدهم والاخرون يتفاعلون في لا شيئ الا حائط قديم امامهم وهمهم الوحيد هو تخطي ذلك الحائط.
2.انني اصبت في مقتل إدمان القراءة في منبر اسمه سودانيز اون لاين.
3.انني لم ادخل بكلام جارح لشخص الا مرة واحدة وبعد ان حذرته وتركت السبيل.
تناقض تاني
1.حين اسمع خدر يغني بطربني بعوده وبسجل ليه؟
2.لما اشوف عمل انساني من نعيم علي بقول بكرة احلي
3.لما اشوف ونستي مع الناس وبضحك بتمني انو البلد ذاتها تضحك زينا
السؤال ؟؟؟
ليه بتعولقوا روحكم قدر ده وبتتلايقوا علي بعض وما بتتضامنوا مع زول البلد البسيط في قضاياه ومشاكله وجنكم غلات في حاجة ما جايبة حقها...خلونا نفكر شوية باستراتيجية في الاولويات وده ممكن يقعد حاجاتنا بشكل بسيط ليه بس شغالين رزق اليوم باليوم
فالقضايا ما صارت مخارجة بقدر ماهي مشكلة راكبانا من الراس للقدم
ياخي لو انتو مبسوطين للمعايير وللمواسير والنقة الطويلة انا غايتو ما مبسوط وقاعد معاكم هنا وببساطة
القضايا الانتو بتتكلموا عنها من معيار وقوي استنارة ووغزوات فكرية و و و ..انتو مافي مرحلة بتاهلكم لسة
شوفوا بلدكم حدودوها وين واتباعت لمنو واخوانا الكتلوهم في جغرافية البلد الاربعة حقهم وين
بعد داك الثقافة ملحوقة والمعايير العلمية مكتوبة من سنة اسكت التجاوزات بتم ضبطها بالقانون والابتذال معروف والاحترام معروف ومافي زول عاقل بختلف في بديهيات.
وصعب علي الناس انهم يمارسوا ترف كتابة في مساحة وياجوج وماجوج علي الابواب وقد وصلوا
رجاء فقط رتبوا الاولويات نكون معاكم..والا فبوستات الونسات العامة والمضحكة هي من تسع مأساتي في التواجد في مثل هذا المنبر
هم خاص
تمنيت وانا ذاهب لصلاة الجمعة انو الامام ما يقدني سياسة ويحمد الانقاذ والثورة ويشكرها..تمنيت اما جامع يضيف لي في وجدان العقيدة خطوة اكبر وما يرجعني نفس الخطة لورا...فخطبة الامام في مسجدنا صارت مرهونة بوجود مسؤول من الدولة...مرة دين وعقيدة ومرة سياسة بيور..
شكرا واتمناكم طيبين وجمعة مباركة
|
|
 
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
Quote: وبخصوص التعليم وخلفا در شاهدت امس العالم المصري احمد زويل وهو يخاطب منتدي دبي الاعلامي ويقول ": رغم أني أفتخر دائماً بأني تلقيت تعليماً ممتازاً في مدارس مصر في المراحل الابتدائية وحتى الثانوية، فإني أؤكد لكم أن ذلك التعليم الذي تلقيته، وكذلك التعليم الحالي في الوطن العربي لا يصلح أبداً لمواكبة العصر الحالي!".....
______
الوطن العربي : ينتمي اليه السودان طوعا او جبرا لا يهم ولكن التعليم السوداني الحالي هو نسخة مشوهة من التعليم العربي فتخيلو .... |
السودان : خلفا در؟؟؟؟
وجدل المعايير شغال وعداده رامي
Quote: والمطالب باختصار هي :
1- خلق سجل قانوني لحقوق الملكية النوبية لمصضادر المياه والارض في المنطقة
2-الاسراع في تكويين سلطة اراضي في الولاية الشمالية وتعطي سلطات قانونية في كل ما يختص بالاستثمار في المنطقة
3-توفيير مياه كافية للزراعة في المنطقة بين دنقلا ووادي حلفا
4- انشاء هيئة لتنمية جميع المشاريع الزراعية في الولايه الشمالية. وينبغي لهذه السلطة أن تكون الهيئة الوحيدة ذات الاختصاص القانوني على أي استخدام في المستقبل من الأراضي والموارد المائية في الأراضي النوبية. وتكون للسلطة القدرة على الإشراف وتوفير الإدارة لجميع قضايا الاستثمار والتنمية المتصلة بالري ، والزراعة وإدارة الموارد الطبيعية. وينبغي لجميع المستثمرين من القطاع الخاص والعام الحصول على إذن للقيام بأي أنشطة من هذه الهيئة
|
المياه الجوفية السودانية : الحوض النوبي Nubian Aquifer
ولسة الجدل في طول المسواك
في سؤال مفروض الناس تجاوبه بصراحة اكتر من كدة عشان المواطن يفهم؟؟
| Quote: و لماذا أغْلقت الحركة هذا المِلف الأهم (يٌفْترض) بالنِّسبة لها؟ |
مَنْ قَتَلَ قرنق ؟ و لِماذا ؟
يا دينق السؤال كان واضح وماكان في داعي للاشتباك المتوقع
هل اقفلت الحركة ملف اغتيال قرنق؟؟
نواصل
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
برضو من الصفحة الأولي
د.بكري الصائغ
لمن توثق؟؟؟
هذا الشعب.. لا ذاكرة له
لو بالغ برجع لارشيف سودانيز اون لاين في الاختلاف الشخصي....ويجي يخت الاقتباس منتصراَ ..مش ده كلامك؟؟؟؟؟؟
كأنو اخترع الذرة..مع انو ادوات البحث ابسط ما تكون الا الاختلاف الشخصي بقي ما عنده حدود ولا معني
_
توثيقك محل تقدير
نواصل
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: مزمل خيرى)
|
يا مزمل تسلم
صلينا وجينا
وفي الجامع شحاد سوداني الناس زاغت منه
لمتين نتزاوغ...الغريبة فهمت انو الشحاد ده ما كان زول ساهل ويمكن مثل البلد قبل كدة ...دي حسب مزاعمه غايتو
لكن المؤكد بقي انو الناس بقت تخطب لنصرة هيفاء وهبي وما عندها شغلة بلبني احمد حسين
مالي وفلسطين وحلايب محتلة
مالي وطائرة سقطت في مطار طرابلس وسودانير بتقوم الطائرة عشان تقع
مش اولي بينا الهم الداخلي ولا ما كدة
_
الخطبة كانت متزمزغه ما فهمنا حاجة غايتو لا في السياسة لا في الدين ودي اول مرة
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
الكلام اعلاه للمنبر
النقوم نعمم المسألة اكتر ونقول مافي زول فاضي لتنظير زول في مناحي الحياة غير كتب بمتحن فيها اكاديميا وبعض سبل بتضيف ليك معرفة جديدة
الفكرة واضحة جدا..المعرفة بدون نقة وتنظير حباباوالا يكفي الزول تجاربه الحياتية العايشها وهي كفيله انها تديه كل المعايير وسبل التحرك في الاتجاه السليم
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
وبتعميم اكبر وبرة البورد نمشي علي صفوة البلاد بأمثلة برضو
يا الصادق انت شن طعمك بلا عمل
أكثرنا يجيد تهذيب الكلام و وضعه في قوالب مخدرة
كأن يقول امام في درجة الصادق المهدي عن الإنقاذ ( ديك المسلمية البصلتو بتتحمر) كتار اتخدروا في المقولة دي
والتجربة مرت
والحقيقة الماثلة قدامنا هسة برضو انو الصادق تقليته اتحرقت في طوة الانقاذ..لم اجد في اي متحدث سياسي سوداني اللباقة والادب وعفة اللسان مثل الصادق..النتيجة شنو ..كلام كتير ومنمق وهو حلته حرقت ساي..وفي الواقع هو صاحب اكبر حلة حرقانة...
أها من الليلة ولي بكرة حتعمل شنو عشان تغير واقع الناس يا امام الانصار؟؟؟
__
التنظير حبابه الا كمان حبة عملي ما بطال وشوية احترام للمتلقي والجمهور برضو واجب
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
مولانا محمد عثمان الميرغني
من كنت تسأل وانت في لحظة غضب؟
اصوات الناس القابلوك في كسلا مشت وين؟؟شالها نهر القاش؟؟
وهو بقي في نهر اسمه القاش؟؟؟ النيل ذاتو انتهي يا مولانا...وانت ذاتك بتسأل منو..نحن البنسألك انت الخشيت الانتخابات وعن قناعة ..مالك خشيتها لو ما عندك فيها نفقة؟؟
وفوق ده سؤال تاني: انت كسلا بقي عندك فيها صوت؟؟؟
وتجي تجاوب ومن سكات
_
ولسة بنسأل عن طول المسواك المستحب في زمن قضايا كبيرة
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
نقد سكرتير الشيوعيين
انت ذكي لكن كمان ما عندك سكة تاني ...كتلوك مع عبدالخالق
لو فوق الارض ولا تحت الواطة..ما عندك سكة...بل اديك نصيحة يا زول يا انسان
غير في مؤسستك والهيكلة وخلي المتحدثة باسم الحزب زولة انيقة او زول شاب بدل الشنبات والديناصوارت
واتكلم عن الاجور.. وتأهيل السكة حديد وحقوق العمال -بدون نقابات- وبشكل عصري ... حينها قد تكتشف ان للاشتراكية قاعدة جديدة
غير كدة ما عندك سكة
لا احد يقرأ الافكار ..لا احد ينتظر تغيير من احد
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
بالرجوع للمنبر
يا سادة يا كرام
كم مرة ونحن في هذه المساحة قرأنا ان قتلوا اشخاص من جلدتنا...كم مرة نزحوا وعانوا اهلنا في اطراف البلاد
الكتابة لم ولن تكن هادفة ذات يوم اذا ما لامست وجع الاهل في البلد
عايزين تكتبوا اكتبوا ولا انا دافع حساب دخولكم لشبكة الانترنت ولا سبيل لحظر أفكاركم ولا عندي الحق غير ما اسمع منكم
فقط تضامنوا مع الانسان المقهور في البلد دون ان تطلقوا مصطلحات ثقافية غير متدوالة تتداولوها بينكم كأنهم قد تنقذ اهليكم من المآسي
ختو الكورة واطة..واتمني الانسحبوا من المنبر ده يرجعوا لانهم ناس متضامين في الانسانية وما لقوا نفاج في الغاغة دي معانا غير العنف والتعنيف وان يظنو بهذه المساحة الف خير ويتفاعلوا لمصلحة البلاد
ويجوا راجعيين يغيروا معانا ومع الشعب السوداني القاعد هنا في اولوية الحاجات وفي الاول الحق حق..في التاني نفتش الوسائل
والله غالب
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
Quote: كنت اليوم متتبعا لقاءا تلفزيونيا مع واحد بروفيسير سوداني مسؤول عن المياه وقد اكد هذا البروف ان السودان دولة منبع ومصب ربما بسبب الانهر الكثيرة التي تغذي النهرين الرئيسيين ولان فيضان بعض هذه الروافد سببه الامطار التي تنزل في الاراضي السودانية .
|
في المشكلة الموجودة قدامنا
خبر مهم جدا
هل نحن دولة مصب ولا منبع
ولا المصريين لاعبين بينا ساي؟؟
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: ALZOLZATOO)
|
| Quote: مبدئيا:ممنوع التغني بالأغاني الوطنية حتي نعرف اللينا والعلينا ونعرف حدود الدولة |
حدود الدولة ياصديقي معروفة شوف اولاد بمبة دايرين لي وين والباقي حقنا
اما الغنا يابوبا ده طلب صعب خلاص يعني الناس دي يسوقوها بي شنو والريس ده يرقصوه شنو ؟؟
يابوبا النجيضة : الزول قال ليك خليك ارجوز وانسى
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: البدري عبد الله)
|
يا البدري أو Taha زمان
السلام عليكم ورحمة الله وبركاته
مشيت لمصدرك...شبكني اولوية شخصية في الأول وبعد داك اسرية وبعد داك قضايا عامة
تعرف يا طه
مصدرك ده (تبكلي) بخدم اولويات العضوية في سودانيز اون لاين..انا وبعدي الطوفان...لو الله نجاني باخد معاي ناس البيت وأنا ابن عمي علي الغريب ولو ربنا اكرمني مالو ناس الحلة وهكذا لحدي ما يصل طوق النجاة للبلد كلها.
أولوية معكوسة...خلونا في الاول نلقي البلد
بالمناسبة مصدرك في النهاية شبكني مسائل فقهية انحراف وحلال وحرام وما تعرف شنو وانا ما عميق للدرجة دي ....للضمان مصدرك متزمزغ لكن المهم قلت اكتب ليك الرد ده علي سبيل الاولويات برضو...لانو لي فترة بكون قاعد في الانترنت 88ساعة في اليوم وبخش سودانيز نهاية الاسبوع
اتمناك طيب يا طه
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
حيدر الزين
اتمناك بالف خير
قلت لي بأذن في مالطا؟؟
مالي ومالطا؟؟
تعرف يا حبوب انا كل ربع عندي اذان برفعه هنا في المنبر ده ما بسمعه مسلم اصلا؟؟مشكلة المسلمين يا الطريفي لازم تكون زول جعار وعندك دقن وبترهب عشان يسمعوك...اسلامنا وسط وديننا حنيف عشان كدة شغالين علي رواقة في المساحة دي لا بنشتم زول ولا نقسو علي زول ،بل بنقرا وقراية سجمانة ما طلعنا منها بشي؟
تصدق يا حيدر؟؟
في البلد الانا قاعد فيها..ما في زول شغال بالمنبر ده الشغلة..مافي زول شغال بالصحف.مافي زول واصلاه اصلا رسالة من مؤسسة اعلامية بتوجهه لاي حاجة حتي من الحزب الحاكم..يا حيدر دي ناس رايحة ساي وفاقدة بوصلة
مافي غلو في تناول الحاجات الا في المنبر دهح
الناس حياتها بقت فاضية من حاجة اسمها فكر ثقافة سياسة واي حاجة
اتحدي اجعص طالب جامعي تسأله من الطيب صالح يقول ليك ده مش بتاع منبر السلام العادل؟؟
هو أذان مالطة ده كيفنو؟؟
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
حاتم علي
التحايا كما تستحق
مواليد المنبر 2009 ولا 2004 او حتي 2000 دي اكبر خرافة
ياخي لك الحق ان تعبر كما تريد
من حقك يا حاتم وحق اي شخص هنا أن تختار topic علمي ومفيد وتتحدث عن واقع السلاح الحايم و ظاهرة الجريمة بالمواتر وعن فشل اتفاقية نيفاشا
طالما انت تتحدث بموضوعية ولا تستفيد في رفع بوستاتك بالشكل الشائك في البورد
يا حاتم لو عدد زوارك في بوست 3 اشخاص في قضية انت شايفها كبيرة لا تحزن...لك ان تحزن لمئات المداخلات ذات الطابع الشخصي في موضوع لا يستحق اي شيء
يا سيدي الفاضل اكتب عن المسرح وعهد حمدنا عبدالقادر
وعن اغنيات ذهبية ايام وردي في الثمانينيات وعن مصطفي ...يا سيدي اكتب عن النيل الطلع حق الدول الجنبنا ونحن نمتلك شرف مروره في بلادنا،عن مشروع الجزيرة،سرقة الآثار
اكتب كما تريد ولا تعبأ بمكنات الخياطة العندها مقاسات الكف وطول الجلابية الملبوسة في الاسفير ...هو العلينا شوية؟؟
دعك يا سيد من شتايم البورد المتجذر فيه والنبذ وابقي مارق
لولا احمد المرضي لما شفنا فن تشكيلي في المنبر لخمسة سنوات مضت.
يا سيدي ..نتلاقي في الاحساس
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
زاتووو
السياسة ما مشكلة... كعب اللياقة..والثقافة ما المشكلة كعب النقة
__
يحسدوك الناس ...اكتر من تمنية تسعة سنة يا بوكو وما عندك مخالفة وانت شغال زي فابريقاس بس(ملك الاسست) او الباص الذهبي عندك جاهز؟؟؟ ...برضو ما علينا
تعرف يا صاحب..ما كان عندي نية ارفع البوست ده ولا اي حاجة لانو ليه اسبوع لو ما لقيت البوست ده بعد خمسة يوم كدة من البوست ده وعجبني :هل آن اوان ان اقول وداعاَ ؟
نحن ما برانا....حتي الناس الفنانين العشمانين فيهم قرفوا
شوف عدد الناس الجميلين الاتساقطوا وخلوا المساحة وراهم بور في بور
انا لله
وين ود عزة
وين المريود
واللستة الطويلة
ياخي وين الناس النقاشها كان مباشر وبسيط...ده تنظير شنو ده
وانا اليه راجعون
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
خدركة
خليني اختم بيك البوست
وتاني البوست ما حقي
_
يا ابن خالتي كرهان المنظر كله وانت عارف..لمتين الحال يكون مجوبق؟؟
لمتين اللياقة وعدم الخروج بنتائج
اسئلة مباشرة الناس بتلولوا فيها
البلد منتهية والناس بتتناقش في طول المسواك المستحب..وعن crest وابو وردة ما لاقنها
ده زمن ضلالة زمن قواسي زمن مهين
_
البوست ده ارهقني بالمناسبة... نتلاقي بكرة في التمرين
| |
|
|
|
|
|
|
|
|
|
Re: أسأل عن طول المسواك المستحب...وياجوج وماجوج علي الأبواب (Re: GamarBoBa)
|
من جمعة لجمعة
وحبة وكت نلقاه عشان نكتب يا ابو رمزي وعفوا نسيت ارد ليك
هذه الكوة يمكن ان تكون نواة كويسة الناس تتفق فيها وتعمل منها حاجة برغم عدم تاثيرها..لك العتبي يالشفيع
...
وفي ذات السياق
ثبت تماما ان نهر النيل بعد ان يلتقي في مقرن النيلين ويتصافح الابيض بالأزرق نودعه للمصريين ولا حصة لنا فيه (تاني مافي زول يقول النيل حقنا)
ثبت تماما ان الذي نصب كرئيس بحضور خمسة رؤساء وبعض ممثلين من الدرجات الادني لن يكون رئيسا بقدر ما يؤسس لدولة كوبا جديدة ليس الا
ثبت تماما من بوست المعيار (كمثال حي فقط) أن حتي ادباؤنا موتورون او موتورين...لا يمتلكون حتي ادوات التعبير
ثبت تماما ان محجوب شريف مواطن صالح يلقي شعرا في ابعد نادي وهمه الانسان في ليلة الامس..وكان جميلا وكما نظن ان الوطن بذلك الجمال
يا اهل سودانيز...الحق هو الحق..اكتبوا ...يا يحي فضل الله يا بشري الفاضل يا اسامة معاوية ويا عماد وخضر عن قضايا
لا تكتبوا عن الجسد.. لا تكتبوا عن الاشواق .. وعن طرح الصبايا ولا عن عن اي شي ..لاتكتبوا في اشياء تجلب الجدال وعن اشياء تحاكموا بهالاحقا..فالدولة كلها علي مهب الريح فنحن لسنا في عهد المسواك المستحب..نحن علي اعتاب ترسيم حدود واتفاقية مياه جديدة قد نموت بالعطش..ويا خدر ويا عاطف انيس غنوا في هذه الكوة للوطن والحقيبة رغم تحفظكم وواصلوا دوركم الايجابي..
اكتبوا وغنوا
عن حلايب
عن حصتنا في مياه النيل والسدود ذات المردود السيء
عن مثقفينا الفاقدين البوصلة
عن الموت الذي لا زال يحصد الارواح
ونتونس برضو ما كعب
_
اقتراح :كرموا محجوب شريف...اعملوا له تمثال في الصحراء..اكبر تمثال في اكبر صحراء..احفروا بئرا ستجدون الماء..ركبوا موتور مياه ازرعوا الارض حول التمثال ثم اجعلوا منه انسان الوطن فلتكن بداية لوعي شعبي مرتبط بالانسان والارض وثقافة الانسان...انجلترا مازالت مملكة برغم ديموقراطيتها شخص يتفق حوله الجميع...خلونا نحب زول واحد وما نعمل فيها عندنا رأي في كل حاجة..علينا ان نحب الوطن ..وعلينا ان نجد من نحبه في هذا الوطن..كتيرة علينا ؟؟نمش نخدر صحرا بمعاني شعر محجوب شريف ولا كتيرة عليه نعمل في جفاف الصحرا واحة ورد الجميل؟؟؟
ومعيار اي سليمان له وحده وليس لنا ...وده ما وقته وزي ما قال حميد
الناس بدل من نقتها
التلقي فكة ريقتها
وبدل القصور الفي الخيال
التبقي ماهلة كريقتها
_
جمعة مباركة
| |
|
|
|
|
|
|
| |
GamarBoBa
مزمل خيرى
البدري عبد الله
Hani Arabi Mohamed
HAIDER ALZAIN
ALZOLZATOO
حاتم علي
خضر حسين خليل
Salahaldeen Nadir
ممدوح أبارو
قيقراوي
فيس بوك
تويتر
انستقرام
يوتيوب
بنتيريست