محتــوم عليكـ

محتوم عليك
تشرب غُبار الغربة
سااااااكِت
فلا حِساً يطوفك نيل
ولا مطراً قفاهُ السيل
تلاوِح في المُني المابيك
تباصِر في الدُجي
البااااهت ..

تفيق من ضيق
وكتمة شوق
يجيك من فوق
جبل خازوق
عواتي المنفي تتلقاك
تجيك بالساحِق الماحِق
بي باقي البلا المتلاحِق
وبي هِدم الشقا المرتوق

قدُر ما يِعلا شانك يوم
يزالِف مِرقك المرفوع
في دمك همك ..
وصوت الإلفة ما مسموع
نصيبك يا فتِي ومجدوع
تفِك ريقة غناك بالجوع

واتباعَض كُلك
قِصرت قامة شمسك
حتَلت هامة الفيك في ضُلك
هدَّ سُكاتك موت ميقاتك
فوق الحَدَب البدري بدُلك
فَجَّت إيدك يم الشجن الراقِد
في راكوبةً تنشد فُلك
أنا واشواقك إتمارقنا
يا تلفانا..
وتسقي غنانا
يا ندخُلك..
شِربك مطرك
قرطع شهدك
ياتو سحاباً
يقدر إغُلّك ؟
قِبَلك جابت
مطرك ضايِق
صالِح برقك
خير يهطلك
ما اتوهدبت
قُبالة حقك
وإنت صباحك
ما رِق
يدُلك.


فاروق أبوحوه
أبوظبي
12 مايو 2010

(عدل بواسطة فاروق أبوحوه on 05-15-2010, 05:53 PM)