|
|
|
 Re: فيديو فضائح الانتخابات السودانية .. ليس كما يبدو عليه (Re: HAIDER ALZAIN)
|
كتب الزول الرفع الفيديوهات في اليوتوب من السودان
الفضائح الانتخابية في ولاية البحر الاحمر
(السودان)
هكذا فاز المؤتمر الوطني (الحزب الحاكم) في السودان عامة وولاية البحر الاحمر خاصة
وهذه النماذج توضح الطريقة التي فاز بها ايلا و جميع نواب المؤتمر الوطني في ولاية البحر الاحمر
1-
المكان:- ولاية البحر الاحمر
الدائرة (4) الاوليب مركزهوشيب
الذي يعبي البطاقات هو رئيس لجنة مركز هوشيب
كل اعضاء اللجنة يقومون بتعبئةصناديق الاقتراع و قد وضع الملتحي شعار الموفوضية تاج علي راسه مثال للصدق و الامانة و النزاهة الانتخابية. و قد قام بهز الصندوق لوضع بطاقات اضافية مزوره
هذا جز من الاساليب الانتخابية الفاسدة
| |
 
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: عبدالوهاب علي الحاج)
|
يا وهبة تصدق الكيزان ما مفتحين لا شيتين لكن هباني متوسط الذكاء حبتين
ما يسمع ليهو شئ الا ويجي طاير بعاجل عاجل ..
والغريبة ما يخت قدامو اي خط رجعة ..
هسع الليلة من الصباح فد كوز من ناس القوة الخفية والمدرعات المقاتلة ما شفت
والسبب شنو ؟!
ورطة الفيديو دا
وانا متخيل لي سيناريو في راسي بيطلع بعدين عشان كدة الناس ديل لابدين وساكتين
ومخليين هباني ينفجط ..
دقيقة اديها سيجارة واحكي ليك السيناريو - زي ما حلمت بيهو امس -
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: عبدالوهاب علي الحاج)
|
عارف يا وهبة قبل ما يتنشر الفيديو دا ..
كانت دائرة جبيت اعلنوا فيها فوز مؤتمر البجة وتقدمه على الكيزان
وبدات جقلبة الكيزان انه كيف البجة يفوزوا ..
بل وصلوا مرحلة انهم يشككوا في انه حصل تزوير في الدائرة نفسها - بدون ضحك بالله -
وقالوا في الخبر النقلوا هاشم نوريت - انه في حزب طائفي متورط بتزوير دائرة البجة-
قادر تتخيل معاي القصة دي
وقبل الفرز بيومين نشرت الاخت ميادة كمال خبر تقدم مؤتمر البجة وجبهة الشرق
ويبدو انها تسرعت حيث اتضحت انه مافي حاجة اسمها جبهة شرق ..
فقالت بلاش من النضم دا ونشوف البديل قدام طالما الموضوع ما ظبط من اول
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: جعفر محي الدين)
|
في النهاية وجود التزوير ومن قبل موظفي المفوضية أنفسهم ولمصلحة أي طرف كان
يقدح في العملية الانتخابية برمتها
وبعدين الشفناهو في الفيديو ده ما تزوير وبس ..
دي عباطة فايتة الحد لمن بهناك ..
وأنا ما عارف الناس الاتخففوا ومشوا صوتوا ديل لمن يشوفوا منظر زي ده إحساسهم وشعورهم بكون شنو!
الحقيقة حاجة تستدعي الشماتة جد جد ..
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: Elhadi)
|
| Quote: عارف المنظر الشايفنو ده بالضبط كأنوا جماعة النظام ديل بطلعوا صباعهم (بالحركة البايخة إياها) للناس المشت صوتت دي وبيضحكوا على عقولهم.. |
مش طليع صباع ساي يا الهادي ومعاها كلام كمان ..
بعدين الكيزان ديل احترموا الناس ووفروا ليهم مفوضية نزيهة ومحايدة وتمت الانتخابات
على اكمل وجه في جو اثبتته احترافية المفوضية وخلوها من الاخطاء ( ماعدا بعض الهنات البسيطة )
لكن الكرامات والقوة الخفية هي الما احترمت الاحزاب المشاركة وعملت على انها تثبت فوز الكيزان
بفارغ خيالي .. بعض الدوائر ينال مرشح المؤتمر الوطني 4998 صوت واقرب منافس ليهو 18 صوت فقط
وبعضها يفوز المرشح الرئاسي بنسبة 97% واقرب منافسيه بنسبة 1.5%
ـــــــــ
احزاب لا تحترم نفسها وتهزل بروحها ساي وهي تركض خلف البلياتشو ديل
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: جعفر محي الدين)
|
الحبيب جعفر محي الدين
سلامات يا ملك
Quote: لجماعة المرة لو استوردوا أسامة أنور عكاشة بذات روحوا
ما يقدر يكتب سيناريو للمخارجة من هذه الورطة
أقرب سيناريو إنه يرموها في حزب طائفي
بس حتكون الورطة أكبر لو ما في أي حزب طائفي فاز بدائرة لا في البحر الأحمر ولا بحر أبيض |
شكلك بتشكك في القدرة الابداعية للجماعة ديل يا جعفر محي الدين ..
أنا بالمناسبة عندي سيناريو جاهز ومفصل على المقاس للفيديو دا
والفيديو دا بالمناسبة اكبر دقسة دقستها المعارضة في حياتها
وسرب ليها عن عمد وقصد وعندي الدليل ..
بس ما عاوز اخرب المفاجاة علي اصحابي
عشان كدة منتظر ضربة البداية تكون منهم ..
وحا تُفاجا مفاجاة من العيار الثقيل
وخلي هباني والا غيرو تاني ينططو باي خبر يجيهم طالع من مركز انتخابات ..
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: د.محمد حسن)
|
على قناة الجزيرة بث الفيديوهات المصورة التي تكشف تزوير الانتخابات ..
الفيديوهات منتشرة بكثافة في هذا الموقع .. صورة وصوت ّ
من المفترض أن تبث الجزيرة التسجيلات تحت "عاجل" .. فهي أهم وأخطر
من التسجيلات الصوتية لاسامه بن لادن التي تعتني بها هذه القناة ..
التسجيلات مهمة بالنسية لقناة الجزيرة لأن الجزيرة اهتمت بانتخابات السودان
وأفردت الساعات الطوال .. وبعثت إليها بفلذات كبدها من المحررات والمحررين ..
هذا من الوجهة المهنية البحتة
| |
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: د.محمد حسن)
|
كويــس انــو قلــت موظفــى المفوضيـة ولـم تقــل المؤتمر الوطنــى ..
لماذا ( هــذا السلوك اذا صـح ) يقدح فى العملية الانتخابية فى مركز شمبات
الاراضــى شمال ....او اى مركز اخـر ..
الانتخابات العراقيــة اليوم القضاء اصدر قرار باعادة العـد فى ( 11) الف مركز
ولم يقدح ذلــك فى مجمل العملية الانتخابية ..
Quote: في النهاية وجود التزوير ومن قبل موظفي المفوضية أنفسهم ولمصلحة أي طرف كان
يقدح في العملية الانتخابية برمتها |
ود الزيــن خليــك مراقــب القنبلــة ( متوقعهــا شنــو )
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: د.محمد حسن)
|
والله انا قاعد فى امريكا دى ....
صحيت هسع لقيت الفيديو مالى النت ...
طبعاً ضحكت فى صعلقة الكيزان وجهل المعارضين ...
وأى زول متابع ما كان حا يتفاجأ ...
انا كنت دايماً بحاول اساعد ناس المعارضة انهم يفهموا الكيزان ...
لاكين المرّة دى حا اقعد اتفرج ... وما حا اخرب "المفاجأة" ...
(والله كان جينا للجد؛ لا مفاجأة ولا حاجة!)
... المهم ....
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: تبارك شيخ الدين جبريل)
|
| Quote: الانتخابات العراقيــة اليوم القضاء اصدر قرار باعادة العـد فى ( 11) الف مركز |
مية وحداشر الف مركز ...
11000×10000= 11,000,000
هى العراق دى لو فيها 11 مليون ناخب فى بغداد براها ... الأمريكان ديل خشوها كيف؟
وقاعدين فيها لحدى هسى كيف؟
(مع ملاحظة انو متوسط الناخبين فى المركز الواحد اكتر من 10 الف بى كتير، بس قلنا براحة على الراجل)
... المهم ....
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: محمد حسن العمدة)
|
| Quote: تبارك يا خوي الكيزان الكيزان تبت ولا شنو ؟؟ |
يا محمد حسن العمدة اتوب من شنو؟
انا دايماً قاعد افرز الكيزان كظاهرة أيديولوجية ..
من المؤتمر الوطنى كتنظيم عندو تيار مختلف من الشعبى والأخوان ...
وبفرز المؤتمر الوطنى من حكومة الوحدة الوطنية الإنتقالية (بشقيها)
وبفرز الممارسة التنظيمية ... من الممارسة الحكومية ... لشغلة المناصب السياسية من الكيزان ...
انت اظنك ... يا عادّينى كوز ... يا ما قاعد تتابع كتاباتى كويس ...
الكيزان ساعدوا ناس المعارضة إنهم يبنوا عنهم فهم خاطئ .. وانتهزوا سوء الفهم المقصود لتحقيق مكاسب سياسية ...
أنا - لأنى ما كوز - من رأيى إنو الكيزان كان مفروض يجوا بالدرب العديل ... لأنو - فى رأيى برضو كزول ما كوز - مكاسب الكيزان السياسية مشروعة وما دايرة ليها لف ودوران ...
يعنى من ناحية استراتيجيات بختلف معاهم ...
ومن ناحية أهداف سياسية ... رغم أنى محايد تجاه معظم مواقفهم وشايفا ما بتستحق مجهود الشجب أو التأييد .... إلاّ إنو نقاط الإتفاق بينى وبينهم ما شوية ... وشايفهم متجاوزين الأحزاب التانية بى كتير ... وموقفى دا اتخذتو عشان اكون منصف تجاههم ... وعشان اكون مبدئى تجاه القضايا البتبنّاها أنا بشكل شخصى كقضايا محورية للنضال ... زى مكتسبات الشعب السودانى فى السلام والتنمية والتحول الديموقراطى والسيادة واستقلال القرار السياسى وهلم جرا ...
فى الآخر ... انا انا ...
والكيزان .... كيزان ..
والفيديو ..... مفاجأة الموسم ...
.. المهم ....
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: تبارك شيخ الدين جبريل)
|
Quote: كويــس انــو قلــت موظفــى المفوضيـة ولـم تقــل المؤتمر الوطنــى ..
لماذا ( هــذا السلوك اذا صـح ) يقدح فى العملية الانتخابية فى مركز شمبات
الاراضــى شمال ....او اى مركز اخـر ..
|
لأنو ببساطة يا بدر الدين موظفي المفوضية هم المشرفين والقائمين على العملية الانتخابية برمتها
وإذا كان موظفي ما يسمى بمفوضية الانتخابات بيتدخلوا بأنفسهم في العملية الانتخابية وتزويرها بالشكل الفضائحي القدامنا ده
فماذا يتبقى بعد من العملية الانتخابية إذا كان حاميها هو نفسو حراميها ؟؟
أما ما جرى في العراق فهو أمر مختلف تماماً( عشان ما تجري بينا ساي ) ..
في العراق سبب الإعادة هو الاعتراض على نظام العد الالكتروني لانعدام الدقة فيه ..
وعليه قبلت المحكمة العليا العراقية الاعتراض المقدم في هذا الشأن وقررت إعادة فرز الأصوات يدوياً في بعض المناطق
يعني الشغلانية ما كان فيها خجخيج صناديق وتعبئة أوراق وحشرها في الصناديق بواسطة مسئولي الانتخابات كما يفعل مزوراتية مفوضية الانتخابات السودانية وخجاجي صناديقها أعلاه ..
ولو حصل ما رأيناه في الفيديو أعلاه في أي انتخابات في أي بلد لألغيت الانتخابات على الفور
| |
|
|
|
|
|
|
|
|
 Re: فيديو فضائح الانتخابات السودانية .. ليس كما يبدو عليه (Re: Faisal Elrasheed)
|
Quote: حيدر الزين ..
انت مشيت تاكل شنو يا شقي الحال .. |
منو الياكل ..
اكلنا زمااان مما السمك بقي يجينا ناطي بالمواسير هبطرش
ثم اكلت بدري وقاعد منتظر المفاجاة .. وإنت بقنبورك الامشيت جبتو من بوست عمر عثمان الجوع كتلك
لانك لسع خيالك ما خصب ليهو سيناريو كافي ..
عمر عثمان زاااتو طلع نفاي بخشمو ساي
تابع تبارك شيخ الدين بس
الشغلة جضمها وفهمها قبال يصحي من النوم زاااتو
تقول لي الا الناس تاكل
| |
|
|
|
|
|
|
|
|
 Re: فيديو فضائح الانتخابات السودانية .. ليس كما يبدو عليه (Re: Mohammed Awad)
|
Quote: Quote: تقول لي الا الناس تاكل
انت يا الطريفى تقعد تتلائم كدا مع الشيخ تبارك دا يقوم يطرٍشك البوست دا..
بعدين تعال قول دا السمك |
إنت بتعاين وين يا عمكـ
كدي اتلفت جاي عشان الصورة تكتمل .. تبارك مين الانا بتلاءم معاهو..
يازول من هنا ورايح ركز كويس انت ما شايف الجماعة اتغدو وجوو والمشاركات بقت تنزل هبطرش
بقيادة علاء وعمر عثمان وبشير والمخضرم بدر الدين اسحق..
عالم تحب السمك بشكل
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: HAIDER ALZAIN)
|
طبعاً الكوز السرّب الفيديو وقّت ليهو توقيت ابن كلب ...
والكيزان هسى كلهم بكونوا عرفوا "ساعة الصفر" لتفجير المفاجأة ...
ولو فى "ساعة صفر" ... معناها فى انتظار ... وتشويق ... ومتعة ...
وانا ما داخل الفلم دا ويا دوب صحيت (خمسة صباحاً بى توقيت امريكا هنا)
كل الطالبوا من الكيزان ... تفويض ...
"أم دلدوم" الحايبلع بيها "هشام هبانى" تكون حقتى انا دا ...
انا ساكت ليهو لى تلاتة سنين ...
وادوا لى "كوستاوى" فرصة يصحى ويتجدّع فى الفيديو شوية ... هو و "كمال عباس" ...
الباقر موسى وسالم احمد سالم واحمد طراوة وهلم جرا ما مشكلة ... ديل حمّى خفيفة ...
(شايف يا حيدر ... انا ما بظبّز زى بدرالدين اسحاق)
... المهم .....
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: امجد البصيرى)
|
الحبيب امجد البصيري .
فتلت بوست المفاجاة يآخ
صغر الصورة شوية بالله .. عشان نستمتع كلنا بالمفاجأة ..
ـــــــــــ
بالمناسبة الفيديو ( إحتمال كبير ) يطلع ما من المركز دا
تابع مع تبارك شيخ الدين السيناريو المرسوم مسطرة وبرجل وحاول استكشف معانا الحاصل ..
تبارك حاشاك من التطبيز دا انت طلعت اشفت من الكيزان زاااتهم
( هشام هباني حاجزنوا انا وهبة فوووق قبل ما تصحي من نومك )
اما الباقيين فإنت حر اكل وقسم براحتك
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: تبارك شيخ الدين جبريل)
|
امجد البصيري ما اشتغل بكلامي الشغلة يا تبارك .. وخلي البوست مفتول
المهم ..
الجماعة اتاخروا بفكو القنبلة او يوضحو السيناريو
لذلك بنفتح باب المشاركة من بقية الأخوة الاعضاء ليشاركونا في وضع السيناريو
وللأخوة من غير الاعضاء من القراء والمتابعين يمكنهم مراسلتنا على الايميل :
[email protected]
ـــــــــــ
الجائزة الاولي ستكون تذكرة سفر مجانية الي لاس فيجاس
والفرصة لدخول هوليوود لمشاهدة تصوير فيلم مقتبس من قصة حقيقة بعنوان
Boxgate تعيد للأذهان قصة فيلم Watergate
( لا تدعو الفرصة تفوتكم )
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: حمد فتح الرحمن)
|
بكلامكم دا الدراما السودانية تكون تطورت شديد
بس الهجمة العكسية واردة من عمك هباني بس الا تبقي زي خم الولد في الكتشينة الواحد يدردق نفسه بولد ويكون لابد بالتاني
يعني لو لحدي الساعة خمسة الليلة الموضوع ما ظبط الرماد كال حماد البوست
لكن الجخجخة الكيزانية ما شديدة
نقاط:::
في رقصة اسمها جخة الصنددوق نزلت بعد الفيديو دا
واول واحد اداها هو عمك الريس شخصيا
في احتفال فوز الموتمر اللاوطني
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: الشفيع وراق عبد الرحمن)
|
Quote: لكن لو طلع حقيقي تبقى دي ما انتخابات ويشوفوا ليها اسم تاني
وح نطالب بي حكم شمولي لمدة عشرين سنة أخرى |
معقول يا وراق ؟
بس اوع يكونو هم برضو ؟
وتاني ح تجي تهتف ليهم برضو ؟
--------------
Quote: بس ملاحظ سغيرة :
الناس ديل كانوا عارفين انو بصوروا فيهم |
يا عمك الموضوع كلو مرتبط بالكنجالات
يعني يعرفو ما يعرفو ما مهم
واحتمال كبير يكونو بعرفو
عشان يقبضو من هنا ويبيعو الشريط ويقبضو تاني
شغل سوق بس
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: محمد حسن العمدة)
|
هل المؤتر الوطني استجلب هولاء لهذه العملية الخطيرة
اشخاص غرباء بدلا عن كوادره وهل عجز ان يحيطها بالسرية لتتسرب في اليوم الثاني
وكيف سمح كادره في هذه المهمة الصعبة بان يقف احدهم ويصور
ولماذا لم تذهب هذه الصور الى السيد جيمي كارتراو لماذا لم تباع لقناة الجزيرة
او تجمع احزاب جوبااو محكمة العدل الدولية التي يعولون عليه كثيرا
الجزيرة ستدفع فيها الاف الدلارات لكنها ليست بتلك السذاجة لتتعامل مع عمل غير احترافي
بهذا المستوى
شخص يزور 102 مليون بطاقة في لمح البصر
هذا هو الجان
ثم يسقط مع هذه المجموعة العبيطةوكاميرة جوال 663 القديم
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: تبارك شيخ الدين جبريل)
|
Quote: وكيف سمح كادره في هذه المهمة الصعبة بان يقف احدهم ويصور
|
عبدالملك المستبد دائماً مايصور نفسه ذكي وحريف ولن يستطيع اي كان ان يكتشف والضحايا البسطاء
هم من يصدقون ذلك ،لان التماهي في خدمة المستبد غالباً مايولد عند المقهور ثقافة اشبه بالعبادة
الم تسمع بان هذا لن يسلمها الي عيسي؟
الم تسمع بانهم يسمعون دبيب النملة؟
الم تسمع نكتة ال16 ولكن لا اعرف الواحد باليمين ولا باليسار؟؟؟؟
ان تصديق شفتنة المؤتمر الوطني وجهزة امنه هي ثقافة تبث بواسطة اجهزة امن وماكينة الدعاية
خاصة الاستبداد لتجد طريقها عند المقهورين ثم لا يلبث الضحايا يتولون امر اشاعتها واستقرارها
في مخيلتهم المخربة.
فيا عبدالملك هذا هو الحاصل ومن الجائز حزب المؤتمر الوطني يعكف هذه الايام علي محاسبة المسربين
بل المصورين واستبعد المزورين .
ان فرية شفتنة المؤتمر الوطني وذكاءه لن تنطلي الا علي الاغبياء؟
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: ibrahim alnimma)
|
الظاهر يا تبارك شيخ الدين الجماعة ما عجبهم السيناريو ..
ولقوا الممثلين ما ظابطين مع النص خاصة صاحبنا الخجاج الأكبــر داك
فقامو منعو عرض الفيلم على قنوات اليوتيوب عندهم وحظروه ..
يا جماعة قلنا نديكم السيناريو عملتو فيها راسكم كبير وباريتو لي نضم لا يمكن
وما معقول ونحن حزب كبير ومنظمين ومشيتو في درب عمر عثمان جنابو
هسع جنابو زاااتو قنع من خيراً فيها وفك الشغلة
وغرفة العمليات والمفوضية وكلهم بعد غلبتهم الحيلة وما لقوا مؤلف كارب
قاموا شلعوا الحكاية وقالوا ريحو اضنينكم وعيون الناس واحجبوا الفيديو
والغريبة يجيك عبد الملك يضحكنا بنكتة في نص السيناريو الكارب دا
ويقول ليك كاميرا جوال 663 قديم
طيب الجوال لو قديم بالله ظهر الخجة دي ما شايفوا جابها بتلابيبها ..
ــــــــــــ
سنحجب باقي السيناريو كما حجبتم اليوتيوب يا الشفيع
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: HAIDER ALZAIN)
|
Quote: مصور مقاطع فيديو تزوير الانتخابات يكشف الفضائح المثيرة
تقييم المستخدمين: / 0
سيئ جيد
الأخبار - الأخبار المحلية
http://www.alsudani.sd/local-news/15654-2010-04-23-07-29-14.html
الجمعة, 23 أبريل 2010 07:28
بورتسودان: عبدالقادر باكاش
قطع الحزب الإتحادي المسجل بولاية البحر الأحمر الشك باليقين في شأن التشكيك في صدقية ظهور منسوبين لمفوضية الانتخابات في مقاطع الفيديو المثير للجدل وهم يقومون بتزوير الإنتخابات في أحد مراكز الإنتخابات بالدائرة (4) الولائية، في الوقت الذي احضر الحزب مصور المقاطع للصحافيين في مؤتمر صحفي ببورتسودان امس.
وقال مصور الفيديو الشاب مصطفي طاهر عثمان بارواي إنه كان وكيلاً لمرشح الحزب بالدائرة ورصد مظاهر تزوير صريح في مراكز هوسيت وهوشيب وثقها بكاميرا هاتفه الجوال (نوكيا 6020) وأكد أن المزورين يتبعون للمفوضية وهم رئيس لجنة مركز الإقتراع عبد السلام محمد علي، وحسين أوهاج ومصطفي عيسى أوكير وكانوا يقومون بالتزوير لصالح مرشحي الوطني. وأوضح بارواي أن التزوير بلغ أشده في اليوم الثالث لإحساس المزورين بقرب انتهاء موعد الاقتراع وقام بتصويرهم دون أن يلاحظونه ثم قام ببث المقاطع في النت إلا أن السلطات عملت علي تشويش المقاطع في كل المواقع الالكترونية وزاد أنه تعرض للتهديد في حي الوحدة من قبل منسوبين للمؤتمر الوطني ومن قبل أهل وذوي المزورين.
وأكد رئيس الحزب الاتحادي المسجل (جناح الهندي) بالبحر الأحمر مولانا عوض الله إبراهيم بركية أن هذه الممارسات تمت في كل أرجاء الولاية وأن كل انتخابات البحر الأحمر مزوَّرة. ودعا بركية مفوضية الإنتخابات لإعادة الانتخابات بالبحر الأحمر، مشيراً إلى أنهم في الحزب يمتلكون وثائق تؤكد التزوير الذي تم في الانتخابات وأن مقاطع الفيديو التي تم حجبها في الانترنيت قاموا بنسخها في إسطوانات لمن يرغب، محذرا المؤتمر الوطني من التلاعب بإرادة الشعب ودعاه إلي ممارسة ديمقراطية حقيقية ترسخ لممارسة شريفة دون كذب أو نفاق أو تدليس لإرادة المواطن.
من جانبه تعهد المرشح المستقل الخاسر لإنتخابات منصب والي ولاية البحر الأحمر عبد الله أبوفاطمة بملاحقة المزورين قانونياً، في الوقت الذي اعلنت المفوضية القومية للانتخابات فوز مرشح المؤتمر الوطني للدائرة الولائية (4) موضوع النزاع المهندس محمد طاهر محمد الأمين بـ(30.257) صوتاً.
|
تصدق أنا تابعت البوست دا من تيت لأنو كنت شاكي )و قليل من الشك يكفي لهدم اليقين( إنو الحكاية دي يمكن تكون حصلت في واحدة من الدوائر المجمدة لما اتدكت و الجماعة بلموا الورق و كدا.
و طبعاً الخبر الفوق دا بيؤكد أن المركز المعني يقع أيضاً ضمن دائرة قومية مجمدة، أما التزوير و الخج فهو في الدائرة الولائية الجابها اخوكم البصيري قبيل و ابيتو تصدقوهو!
ياها الخالق الناطق و هي تشمل نفس المركزين المذكورين في الخبر.
طق بالجنبة:
عل و الله، أخونا محمد طاهر محمد الأمين حمد .... بالغ تب!
و ربما يكون في سيرته، و هي قصيرة ـ طويلة لمن تحرى في نفسه نقبها، درس من دروس ألف باء تا ثاء السياسية السودانية خارج الخرطوم و بعيداً عن الأسافير.
و الهام:
اها شن العمل يا حيدر و صاحبو تبارك؟
السيناريويوهات)كم( ديا بتدورلوها موية
و لا تبلعوا ناشف و من سكات؟
ما تشمتوا فيكم أخونا أمين محمد سليمان.
يا تبارك ود الشيخ، شفت فيديو بنتنا الشجاعة في كسلا؟ شوف بوست هشام المجمر فيديو كسلا
و من بعد تثمين شجاعتها و أمانتها و تفانيها في الحق آخذين في الاعتبار أحوال المسرح الهمشكوريبي ذي الستارة المذدوجة
و بغض النظر عن سيرة كلامها عن )الرطانة( و عن بعض عسر في هضمها المديني لأحوال الهاش هاشونا
مثلها في ذلك كمثل الشقيق الخليفة أبي الحسين مثلاً، أو للحق، الغالبية منا و منهم،
فإن فيه، أي حديثها، من قبل و من بعد الكثير المثير الخطر، فيه كشف الحال الجد جد، و من ضمنه تجد سر أسرار الأحوال الواقعية في السودان
و الذي تتفادى صفوتنا السياسية فض ختمه بالحق و بالصبر ثم الصبر، ثم يولولون!
و بس فالحين لينا في أداء دور شيالين حال )أندب حظي و آمالي(. كرهتونا.
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: هاشم الحسن)
|
ابو الهادى ... (ومبروك البنية ...)
Quote: يا تبارك ود الشيخ، شفت فيديو بنتنا الشجاعة في كسلا؟ شوف بوست هشام المجمر فيديو كسلا
و من بعد تثمين شجاعتها و أمانتها و تفانيها في الحق آخذين في الاعتبار أحوال المسرح الهمشكوريبي ذي الستارة المذدوجة
و بغض النظر عن سيرة كلامها عن )الرطانة( و عن بعض عسر في هضمها المديني لأحوال الهاش هاشونا
مثلها في ذلك كمثل الشقيق الخليفة أبي الحسين مثلاً، أو للحق، الغالبية منا و منهم،
فإن فيه، أي حديثها، من قبل و من بعد الكثير المثير الخطر، فيه كشف الحال الجد جد، و من ضمنه تجد سر أسرار الأحوال الواقعية في السودان
و الذي تتفادى صفوتنا السياسية فض ختمه بالحق و بالصبر ثم الصبر، ثم يولولون!
و بس فالحين لينا في أداء دور شيالين حال )أندب حظي و آمالي(. كرهتونا. |
أمانى العجب فتحت بوست فى نفص الموضوع ...
قلت ليها البركة فى التعارف التمّ بينك وبين الشعب السودانى ...
وبعد داك ... المركز مركز والهامش هامش ...
بت القبايل النضمت تستحق الإحترام طبعاً ... انا كان مزهّجينى القاعديييين وبصفقوا ...
لاكين ياهو حال السودان ... ما صاح نقبلو هناك ونرفضو هنا ...
____________________________________________________________
بالنسبة لى سيناريو الفيديو ...
المؤتمر الصحافى الذى عقده مرشح منصب الوالى المستقل عبدالله ابوفاطمة عبدالله محمد نيابة عن الحزب الإتحادى يدخل السيناريو فى منعطف خطير ومضحك ...
وقد كشف عن اسم شاب يدعى مصطفي طاهر عثمان بارواي وهو وكيل بالدئرة الولائية (4) الأوليب لمرشح الإتحادى الديموقراطى مصطفى عثمان محمد الحاج ... أو ربما ... لمرشح الحزب الديموقراطى الأصل محمد احمد محمد ابوزينب .... فصياغة "الخبر" غير واضحة فى هذا الخصوص ... ولكنى سأنتظر "الخبر اللكيد" ...
عموماً ... هذا المنعطف يزيد من متعة المفاجأة ...
ولكنه سيؤجلها قليلاً لأسباب قانونية ... إذا ما أوفى المرشح لمنصب الوالى عبدالله ابوفاطمة عبدالله محمد بعهده ... بملاحقة كلٌ من عبد السلام محمد علي وحسين أوهاج ومصطفي عيسى أوكير قانونياً ...
لأنه ربما يعطل الإفراج عن القطعة الأخيرة فى هذه الفسيفساء الدرامية ...
... المهم ....
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: تبارك شيخ الدين جبريل)
|
| Quote: الطريفي ، لو أديتني تفسير منطقي لانو الناس دي بصورو فيها و هم عارفين ، إحتمال أعلنك ( مفكر ) زيي واحد !!! |
طيب ، طالما الطريفي جلاني :
يسرني أن أعلن عن فتح الأعلان أعلاه - بنفس الجوائز المذكوره - لمن يانس في نفسه الكفأه !!
يعني لو جاء مصطفي محمود ولا صديق مهدي علي و أدوني إجابه مقنعه علي السؤال أعلاه ، حا أعلنهم مفكرين زيي واحد !!!
| |
|
|
|
|
|
|
|
|
|
Re: فيديو فضائح الانتخابات السودانية .. ليس كما يبدو عليه (Re: أمين محمد سليمان)
|
Quote: طيب ، طالما الطريفي جلاني :
يسرني أن أعلن عن فتح الأعلان أعلاه - بنفس الجوائز المذكوره - لمن يانس في نفسه الكفأه !!
يعني لو جاء مصطفي محمود ولا صديق مهدي علي و أدوني إجابه مقنعه علي السؤال أعلاه ، حا أعلنهم مفكرين زيي واحد !!! |
أبداً والله يا حاج امين ما بيحصل ولا حصل بجليك
كل الموضوع بقية الادلة والاوراق مع الاستاذ تبارك شيخ الدين
وانت عارف في الفضائح الزي دي الممكن تمس الامن القومي
فبعض المستندات والأدلة لا يُفصح عنها للصحافة فوراً ..
عشان كدة بنديها فرصة للناس توسع مخيلتها..
أما إجابة سؤالك التالي :
| Quote: الطريفي ، لو أديتني تفسير منطقي لانو الناس دي بصورو فيها و هم عارفين ، إحتمال أعلنك ( مفكر ) زيي واحد !!! |
فحا اجاوبك عليه فقط بغرض اني ادخل نادي المفكرين واصحاب الفكر المستنير ( ان شاء الله حاجب الباب)
ما علينا ..
إنت ما فكرت يا امين انه الجماعة ديل وقت بيصوروا فيهم صاحب الكاميرا نفسه كان بيتونس معاهم
بدلالة انه وقت سمعو صوت العربية كشوا واتخلعوا وهو طمنهم بكل اريحية انه مقطعها في اصوات العربات
وبيمز صوتها ونمرة التعشيقة الهي ماشية بيها .. وقال ليهم دي عربية كبيرة وما تخافوا مابتاع المرشح
فلان الفلاني ..
يبقي بعد كدة الناقص شنو عشان تكتمل ليك الفكرة !!
ــــــــــ
كدي اتخيل شكل الفراغ لو اتخيلتو بتقع القصة
او بجيك بكرة بالباقي
| |
|
|
|
|
|
|
| |
HAIDER ALZAIN
Medhat Osman
محمد عبد الماجد الصايم
عبدالوهاب علي الحاج
جعفر محي الدين
Elhadi
د.محمد حسن
سالم أحمد سالم
خالد العبيد
بدر الدين اسحاق احمد
تبارك شيخ الدين جبريل
ادريس خليفة علم الهدي
سيف الدين حسن العوض
Faisal Elrasheed
Mohammed Awad
صديق مهدى على
فيصل أحمد سحنون
حمد فتح الرحمن
الفاتح سليمان
الشفيع وراق عبد الرحمن
ibrahim alnimma
أمين محمد سليمان
هاشم الحسن
فيس بوك
تويتر
انستقرام
يوتيوب
بنتيريست