|
|
|
 Re: عيونك كانوا فى عيونى (Re: محمد النيل)
|
اجمل الاغانى
او سمها الاغانى المنسية
كانت تذاع فى زمن غابر فى هدوء الظهرية
عندما تهدأ الشوارع وتترك الامهات او ربات البيوت (حلة الغداء) على جمر نار هادية لتسبك
والراديو مهمل معلق بشعبة من شعب الراكوبة
او على رف مهلهل داخل التكل
يتحدث ويغنى لوحده كانه منسي
فتتسلل الى اذنى مثل هذه الاغنيات
التى عشعشت فى دواخلى منذ الصغر
ما قبل التعليم الابتدائى
او ايام دك المدرسة
فعرفنى بها كثيرون
فى احتفالات المدرسة
او مراكز الشباب
وهناك كان من يعتقد خطاء انها اغنيتى
وصاحبها
يفوق ابى عمرا
وبعد زمن بعيد
او سمه قريبا
او قبل شهور
وعلى بعد آلاف الاميال
من السودان
وسنين عددا من تلكمو الراكوبة
هناك من دعتنى بدلا من اسمى
باسم الاغنية
فقلت:
| |
 
|
|
|
|
|
|
|
|
Re: عيونك كانوا فى عيونى (Re: محمد النيل)
|
لقد كشفتى إذاً عنوانى
فأعطنى نظارة بيرسولٍ غامئة
أدارى بها أغنية
نمت معى منذ اغانى الظهرية
وحَلةُ أُمِّى تُجَقجِق الباميةَ
فوق جمرٍ مدفون برماد
لتكون النارُ هادية
اكلتى المفضلة
مع شطّةٍ بالدكوة حامية
وعبد المنعم حسيب يترنم
"اصبر بى هواك البال
وازرع قلبى بالآمال"
ومزياعنا الفقير يشخشخ
فهو يعمل ببطارية
أُعضيها بأسنانى
علها تصير قوية
ادركت آخر الاغنية
"يصدونى وينادونى
واخاف لو قلت حبونى
واقول يمكن يحبونى
ويصافونى
عيونك
كانوا
فى عيونى
ففضلت ابحث عنها
فى اعين المحبين
فى اكشاك الليمون
فى موقف الباصات
فوجدتها تكمن فى دواخلى
فى عودى
حتى اعتقد الكثيرون انى صاحبها الحبيب
وقد نسوا انها لعبد المنعم حسيب.
فاعطنى نظارتى
أدارى بها عنوانى
| |
|
|
|
|
|
|
|
|
|
Re: عيونك كانوا فى عيونى (Re: محمد النيل)
|
Quote: واذا ابتليت بحكومة لا خلاق لها
قلا تصمت كالاخرس الاصم الذى لا يسمع
الا ان تكون من بطانتها فقافلتكم تحمل
اموال الشعب على ظهور ابلها
وكل ذهب المع
والفقراء يتضورون الجوع
وكذا الاطفال الرضع
واطباءهم الفقراء يضربون عن الطعام
فبدلا ان يزيلوا عن الشعب آلام الوجع
صار حال اطبائنا اوجع
والبشير باموال شعبنا فى حملته الانتخابية يرتع
وسكلانا على اطفالهم اعينهم تدمع |
كدي حدِّد لينا نت بتاع سياسة ولاّ عيون
إيه الإنفصامات الحاصلة دي ياخ
ولا نامت أعين الـ (جُبناء - عُشّاق) حدِّد إنت
| |
|
|
|
|
|
|
|
|
Re: عيونك كانوا فى عيونى (Re: صلاح عباس فقير)
|
شوف يا عبّاس
عيونك في عيونو
عيونك فيها قضا
فيها رمد فيها حساسِيّة
تشيلا و تتخارج
أنا بطبعي زول أهبشو بدون سبب ماف
و إنت جيتني براااااااااااااك
رمتني بداءها و انسلّت
فأنا النوع البلحِّقك ليهو
مافي حاجة إسمها إنسلّت معاي
تنسل بي داءك
أها شوف
| Quote: وهل تعتقد انه يصعب عليَّ انزال صور لحملات المنافسين على هذا البوست؟ |
أنا أتوقع أي حاجة و جاهز معاك لأي حاجة
تشيل قرفك بتاع الإضراب دة و تتخارج بي وِشّك
علاقة إضرابكم عن الطعام بالبوست دة شِنو؟
إنشاء الله تضرِبوا عن التنفُّس ذاتو
أنا مالي و مالكم؟
فشوف
عايز ترمي مزيد من الصور حبابك
و بالمناسبة أنا عندي كِمِّية من صور عرمانك على براميل النفايات تنفع معاك؟
نهايتو
أحذف نحذِف
| |
|
|
|
|
|
|
|
|
|
Re: عيونك كانوا فى عيونى (Re: khaleel)
|
| Quote: نمت معى منذ اغانى الظهرية |
حبيبنا النيل ....
لا تستهن بـ (أغاني الظهرية)، فقد أنقذني ذلك البث منتصف النهار أكثر من مرّة.
متأكد أنك لا تذكر الحادثة، ولكن في الفترة القصيرة التي عزفت مع مجموعتكم، كنا في مرّة نحيي حفل في (العزوزاب)، وفي الحقيقة كانت على ما أظن أول مرة لي معك، فكنت في بداية كل أغنية أستمع دون أن أعزف، ثم أنضم بعد أن (أمسك الدرب) (شغل عشوائي بدون بروفات). أما أغنية (عيونك كانوا في عيوني)، فلم أواجه فيها مشكلة، ومشى الحال حتى تنبّهت أثناء العزف أن هناك (صولو) لآلة الساكسفون ................ رغم الموقف الصعب، إلاّ أن (أغاني نص النهار) أنقذتني، ووجدت لحن الصولو مخّزن في مكان ما في الـ Hard disk بتاع الدماغ و ........ مشى الحال.
أغنية في التــــــنك ..... يديك العافية
| |
|
|
|
|
|
|
|
|
|
Re: عيونك كانوا فى عيونى (Re: محمد أبوالعزائم أبوالريش)
|
محمد النيل
تحياتى
عبد المنعم حسيب
من اجمل اصوات الغنائية
لكنه لم يجد حظه فى الانتشار
لعدة اسباب
لكنه مع ذلك ترك بصمة خاصة فى نفوس معجبيه وكنت واحدة منهم
كما ذكرت انت انه من فنانى الظهيرة
لكنهم كانوا مثله من الذين اسسوا لجوانياتنا ولجمالها
منذ تلك الفترة والى الان
بالاضافة لكون هذه الاغنية احد جماليات الغناء فانها تشى عن ذوق عال فى التلحين
رقة تتماشى والرقة التى كتبت بها الكلمات
وعنفوان فى اللحن لا ينتهى
شكرا لك محمد
ولعبد المنعم حسيب ان يظل خالدا فى دواخلنا
| |
|
|
|
|
|
|
|
|
|
Re: عيونك كانوا فى عيونى (Re: علاء الدين يوسف علي محمد)
|
Quote: شوف يا عبّاس
عيونك في عيونو
عيونك فيها قضا
فيها رمد فيها حساسِيّة
تشيلا و تتخارج
أنا بطبعي زول أهبشو بدون سبب ماف
و إنت جيتني براااااااااااااك
رمتني بداءها و انسلّت
فأنا النوع البلحِّقك ليهو
مافي حاجة إسمها إنسلّت معاي
تنسل بي داءك
أها شوف |
يا علاء ..
بقيت غاوى مشاكل بشكل واضح !!
حمى الإنتخابات ولا شنو يا عمك ..!!
* بوست أكثر من رائع
وسرد جميل ..!!
| |
|
|
|
|
|
|
|
|
|
Re: عيونك كانوا فى عيونى (Re: محمد كابيلا)
|
| Quote: رجعتنا لأيام جميلة ولحظات لا زالت حية في الذاكرة! |
الاخ صلاح فقيرى
الغناء السودانى فيه الكثير من الكنوز المدفونة
وكلما تستمع لاحداهما بجانب هيجان الذكريات فانى اشم رائحة ذاك الزمان كانى اعيش لحظتها
شكرا على المرور
| |
|
|
|
|
|
|
|
|
|
Re: عيونك كانوا فى عيونى (Re: محمد النيل)
|
| Quote: ومشى الحال حتى تنبّهت أثناء العزف أن هناك (صولو) لآلة الساكسفون |
حتى حفلاتنا نفسها اصبحت ذكريات تثير شجون الماضى
كيفك يا استاذ
ليك وحشة وكذلك بوست برى
| |
|
|
|
|
|
|
|
|
|
Re: عيونك كانوا فى عيونى (Re: محمد النيل)
|
Quote: لكنه مع ذلك ترك بصمة خاصة فى نفوس معجبيه وكنت واحدة منهم
كما ذكرت انت انه من فنانى الظهيرة
لكنهم كانوا مثله من الذين اسسوا لجوانياتنا ولجمالها
منذ تلك الفترة والى الان
بالاضافة لكون هذه الاغنية احد جماليات الغناء فانها تشى عن ذوق عال فى التلحين
رقة تتماشى والرقة التى كتبت بها الكلمات
وعنفوان فى اللحن لا ينتهى |
الاخت سلمى
تحياتى
سرد تحليلى وتعبير رائع فى حق الاغنية
لو كان لكل شخص شعار موسيقى خاص
لكانت هذه الاغنية شعارى
كانت الاغنية المفضلة لناس البيت
لعبد المنعم حسيب الف رحمة
ولك الشكر على المرور
| |
|
|
|
|
|
|
|
|
|
Re: عيونك كانوا فى عيونى (Re: محمد النيل)
|
Quote:
نحاول نبرز الاخلاص وزادنا البهجة والنشوة
ونفتح في قلوب الناس الناس مشاتل من حنان حلوة |
اخ خليل تحياتى
وشكرا للمشاعر المرهفة الطيبة
وشكرا لعلاء الدين يوسف الذى نكت البوست وجابو بغرض التخريب
ولكن حركته الما جميلة دى صادفت هوى من يعشقون الاغنية وقاموا بالاعمار بدلا من التخريب
| |
|
|
|
|
|
|
|
|
|
Re: عيونك كانوا فى عيونى (Re: أسامة الفضل)
|
Quote:
Thanks
Mohamed
You made my day |
You welcome any time
اخ اسامة
عليك الله مش غنية حلوة
انى لا املها ابدا
فيها الكثير من الاحاسيس النبيلة
ولحن انسيابى
كانه مافى لحن تانى ينفع مع الكلمات دى الا اللحن دا
شكرا على المرور
| |
|
|
|
|
|
|
|
|
|
Re: عيونك كانوا فى عيونى (Re: محمد النيل)
|
العزيز محمد
رغم حبي لهذه الأغنية التي لم أسمعها منذ مدة ....... لكن يا محمد لم تكن الأغنية وحدها
أنت لم تذكرني بأغنية أحببتها لكنك نقلتني لعوالم كاملة .... دنيا يا محمد وقت يحر النهار و الناس تدخل بيوتها و تهدأ الحركة و ينام الرجال و تنهمك الأمهات في أشغال عدة في صمت تام .. كان ذلك الوقت للراديو و للجرايد و الكتب من ألغاز و قصص و بداية التعرف على الطيب صالح .. و المكان دائما الراكوبة او أحيانا عنقريب في المطبخ .
جعلتني أشاركك هذه الأحاسيس بدرجة أحسست معها أنني كنت معك أو أنك كنت معي في تلك النهارات الحبيبة في تلك الراكوبة الباردة في عز الهجير أو أننا نعرف بعضنا منذ ألف عام .
شكرا يا إنسان
شكرا محمد
| |
|
|
|
|
|
|
|
|
|
Re: عيونك كانوا فى عيونى (Re: أسامة الفضل)
|
| Quote: دنيا يا محمد وقت يحر النهار و الناس تدخل بيوتها و تهدأ الحركة و ينام |
نعم اخ اسامة
احس تماما ما تقول
لما كنا فى المراحل الاولى من الابتدائى
كانوا يطلقونا للبيوت قبل الكبار
والواحد يكون جاى راجع البيت فى الهجيرة
نمشى مع ضل الحيط فى الشارع
شايلين خرتاية الكراسات وكتاب المطالعة
وحتى الغنم راقدين مع قعر الحيط يجتروا ويلوكوا ما خزنوه بامعائهم
او يكرشون باجسامهم على الحيط صانعة خطا عميقا على جدران حيطان الجالوص والزبالة
واحيانا تجد من يضع سلك شايك غلى الجدران المطرطشة منعا لتخريب الماعز لها
والواحد لما يصل البيت ويلقى الوالدة نايمة فى الراكوبة يتغاظ لانو ما بتكون انو عرفت انك جيت عشان تدلعك شوية
وبس تسمع صوت (الحلة) بتجقجق بى هدوووء بايخ فوق الكانون
وتسمع نقاط موية الزير واحيانا تكون جاية (سوسيوة) كتكوت ماشة تشرب من تلك النقاط
لم تكن هناك مراوح لانو العرش كان بلدى لا يحتاج
وصلطة الغداء الخدراء لسع فى بستلة تحت الزير واحيانا بطيخة جمبها
الطفولة عايزة حركة فى البيت وشوية اهتمام من الوالدة لكنها بتكون نايمة
ترمى الخرتاية فى اى مكان لا تلفزيون لا ديجتل لا بليى استشن
تنخمد ترقد فى العنقريب ابو كرابا مرخى فى الراكوبة
وتستمع للراديو معلق فوق راسك وتسمع اغانى الظهرية غصبا عنك فتخلد فى الذاكرة
شكرا اخ اسامة
اثرت فينا الذكريات
| |
|
|
|
|
|
|
| |
محمد النيل
علاء الدين يوسف علي محمد
أيوب خليل
khaleel
محمد أبوالعزائم أبوالريش
سلمى الشيخ سلامة
محمد كابيلا
أسامة الفضل
فيس بوك
تويتر
انستقرام
يوتيوب
بنتيريست