|
|
 من أجل الأيدلوجية.. انتخبوا زكريا
|
من أجل الأيدلوجية.. انتخبوا زكريا
تجربتي مع الانتخابات في السودان، تجربة خائبة باطلة بكل المقاييس، تفتح وعي عليها و أنا طفل أبان الحقبة التي تلت ثورة أكتوبر، والتي صلى فيها الأمام النميري صلاة الغائب عليها ولما تبلغ الحلم، و لعل كل ما علق بذهني من صورتها، هتاف ساذج يقول ( الفانوس حرق القطية)، و يخيل لي أن ثبات هذه التحفة اللغوية في عقلي، كان بسبب من الإثارة التي تبعثها في عقلي الصبياني المتوفز للخراب ، أو لأن أبي كان يميل إلى مرشح الفانوس، فصرنا أبناؤه بالضرورة من ( دعمته) دون أن يكون لنا أي خيار تحت سقف الديكتاتورية الأبوية الصارمة، جاء النميري إلى الحكم بعد ذلك، فلم يعد للرموز الانتخابية وجود، لم يعد لها مكان غير سطح ( الكرتلة)، الفانوس، القطية، الفرار، السلوكة، البرمة، و نجمة المريخ.
بيد أن بعض أنواع النشاط الديمقراطي ، ما لبثت أن أطلت بوجهها في حياء و خفر، شهدنا منها في عطش حقيقي للممارسة الديمقراطية، انتخابات ( اتحاد مزارعي الجزيرة و المناقل) ، و انتخابات ( دار فلاح للغناء الشعبي)، و تمخض عن أخريات ، ظهور منتخبات ( شباب التاكا) ، و منتخب (فريق أولاد البحر)، وفاز من فاز برئاسة مجالس إدارات و أندية رياضية ، ثم برزت للوجود مصطلحات سياسية جديدة، من بينها ( القرعة) و ( الطرة و كتابة)، ثم ( شختك بختك)، و امتلأت ملفات و أضابير بدرر الأدب السياسي الجديد، بدءا بنظرية ( بالملايين قلناها نعم) و التسعة و تسعين و تسعة من عشرة بالمائة، فوز ساحق للمشير رحمه الله.
ما غاب عن خاطرنا ذكر مراكز اقتراع ( توتو كورة)، و التي اهتم الناس فيها بتصليب مربعات جداولها الأنيقة، أملا في الفوز ( بالأفنجر) و بعض مال جزيل، أشباعا لرغبات ايدولوجية دفينة في نفوس الفقراء منا، و بالأصح كلنا، وقف الناس صفوفا في سلوك حضاري أصيل، حتى قضى على الكورة و التوتو نفر من ( سناجك الدعوة) جاءوا على متن ( الفور ويل درايف الأسلامي)، بمساعدة اللواء اركانحرب السابق، بعد اكتشافه المفاجيء للأسلام عوضا عن النفط!
وكان ان تمفنست ( من مانيفيستيشن)، قلنا تمفنست الرغبة في نظام شورى يحقق العدل الاجتماعي، فنجح برنامج ( جراب الحاوي) التلفزيوني أيما نجاح، و تعلل الناس عن شقاء الدنيا و ظلم الحسن و الحسين، و طابت خواطرهم حين سماع ( دخل ايدك في الجراب ... اوعى من الفاضي)!!! و تحولت الدنيا أمام ناظريهم إلى ( دبنقا) ندردقها ( بشيش) جهد الطاقة، و حينما تأبت و تمنعت تلكم الديمقراطية، وأصاب القوم الهم العظيم و اليأس المقيم، منح الناخبون أصواتهم في استسلام كامل و بمحض إرادتهم، إلى قنصل المملكة و قنصل الأمارات و قنصل الجماهيرية، وانعم به من فاز بالفيزا ( الحرة)، و قبل أن ( ننتهي على كده)، قال جارنا العزيز، أن السبب في عدم حصوله على الفيزا، أن حماته قد دست له العمل، و أنها تمارس ( الفنقوسية) سرا، حين يغطي الليل الجبال.
أتت الأنتفاضة الأبريلية، فوجدتنا في حيرتنا منشغلين بالسؤال الشكسبيري ، فصل دراما آخر ساعة
عبد الصادق انتحر أم نحروه ؟؟؟؟
فأدلى العسكر كالعادة بالتصريحات إلى ( البي بي سي) و ( رويتر)، و تأملن النسوة كالعادة في وسامتهم
سوار الدهب احلى ولا عثمان عبدالله؟؟؟ الجزولي ما كشفة.
و لا نستبعد أن يكن غنين لهن، خصوصا الطقطاقة، فهي لا تدع سانحة تمر دون أن تطقطق فيها، فيحمل العساكر ( عصاية الأبنوس) تذكارهم المفضل من الجنوب، تلك التي تشبه ( كدوساً عظيماً)، ابشري...ابشري...أبشري، و ذاك لعمري أس الديمقراطية في الأدب الشعبي المعاصر، و ( جدليهن اذا ما عاد) أو أذا عاد فجدلينا، والأمر للمتبصر، سياااااان.
بيد أنني أعود في حيرتي، أسائل أهل العلم، عمن جاء باختراع الرموز للمرشحين و المترشحين؟؟؟ ما هو المعنى المقصود برمز ( الحمار) الذي يمثل الحزب الديمقراطي الأمريكي، و الذي من ضمن عضويته الرئيس الحالي (باراك حسين اوباما؟؟ و الذي لو قدر له أن يولد في كينيا ، لكان ( سواق متاتو زى العجب)؟؟؟؟ ما معني الفانوس و القطية و الكباية الشوب، و عصاة الأبنوس و شوربة العدس و الربابة و شايب الديناري و بت الشيريا، و المجروس، و مدفعية صلاح الدين و كتيبة جعفر و صيف العبور و خور عمر و النهج الإسلامي لماذا و مركز صحي اللاماب بحر ابيض و كبري بيكة.؟؟؟
و بذكر الرموز، فقد أتانا حديث مرشح غرب القاش ، أبان صحوة ديمقراطية مايوية قصيرة الأمد، ترشح فيها السيد زكريا، رمز البطارية، فجرى ( الهايلوكس موديل ستة وسبعين)، في طرقات المدينة هزجا، يحمل على صفحتيه شعار المرشح (انتخبوا زكريا لحماية الأيدلوجية)، روى صديقى، و العهدة على من روى، أن قصيدة تقديمه إلى المنبر ليخاطب الجماهير، كانت من سجع كهنة التكارين الذين ( جابوا رمضان و الكدنكة بالواد) كما يلي
زكريا
رمز البطارية
لحماية الايدلوجية
يجيد اللغة الانجليزية
و لولا ظروفه العائلية
لأجاد الفرنسية
و قد علمت حيث لا نفع و لا جدوى لمعلم، بأن الأيدلوجية، ما هي إلا السلطة و الثروة في حقيقتها، و أن الأيدلوجية ، خلقت ( الفولغا القبيحة)، و بعثت بالكلبة ( لايكا) لتتبول في الفضاء، و صنعت راكوبة ( الفيس بوك) و قريبا ( الفيس بوكس)، و قضت على التمساح الذي ( غلّب الشايقية)، و تنبأت بالكوكب ( نيبرو) و خلقته اختلاقا حتى يتسنى للفيلم أن ينتشر، و أن يبيع حتى لا يتبقى درهم في جيب عاقل بالغ، و تمددت الأيدلوجية تبيع للناس صكوك الغفران و تخبيء مال النفط ، و اهتم أصحابها بتنوير الناس عن عظم ذنب من يشتري ( طرمبة موية)
( عاد نان ياجماعة الكلام ده ما بيصح، المويي دي ما حقت الناس كلهم، علا البترول ده حق الناس الصالحين، يبنوبو الجوامع و يدبلوبو النسوان ، انتو مالكن كدي)
آمنا و صدقنا، و(شحدنا) الله ، تطلعو يوم القيامة أوائل الدفعه.
|
|
  
|
|
|
|
|
|
|
|
Re: من أجل الأيدلوجية.. انتخبوا زكريا (Re: Tagelsir Elmelik)
|
يالملك زمااااااانك كدة في كرتلة دست علي القطية وكسبت ساعة جوفيال كانت حديث اسطوري لاولاد السكة حديد في كوستي .....د ة زماااااااانك زمن عنبر جودة .....انت ما كسبت شيتا عند ناس مسز بللين وماكيين ناس الكوكس (دة شنو قطية كمان باللوندي مش ؟؟) لي هسع ؟؟؟؟
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: abubakr)
|
أبوبكر العزيز
نحنا زاتنا زمانك كان اهم شي عندنا ( الكرتلة)، كنا بنشتريها بعدين نبلها بالجاز من ورا
نشوف الرمز الفائز شنو ( أنا و أخوى الكبير) ، و نمشي نقطع لشفع الحلة ، بعدين الرمز الفائز
بنصلبو و نقوليهم دفع حقو زول وهمي بنخترعو ، لمن نلم القروش نفتحا و نمشي نشيل الهدية من سيد الدكان
تاااااااااني نجيب واحدة جديدة..... بنينا عمارات بالطريقة دي ههههه
لك مودتي و شكري على الحضور و التعليق
الملك
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: Tagelsir Elmelik)
|
Quote:
Khalid Yousif
Al-Hilal kaman
hhh |
سلام يا ملك
ديموقراطية نميري دي ما ياها الاتحاد الاشتراكي ذاااااتو ؟
اها في تمنينات كوستي - ما عارف بتعادل كم عندكم ؟  - يا سيد الامانتي ليك بدكتاتورية الاباء التقليدية ، ( الهلال ) دا كان رمزنا غصباً عننا، ما الراجل بلدياتنا و كدا كمان !
هلالك هلًَا يا " مركب على الله " *
الغريبة نفس شغلة " الفانوس حرق القطية " كانت في ، الا انقر شنو ؟
لو ما اخاف الكضب ظنيتو القطية طلعت في الفانوس و طفتو
غايتو المتأكد منو انو " الامين على الامين " فاز
و ناس الحلة الجديدة و انصار " علي بيّن " الضحك شرطم
اها زكريا عمل شنو في موضوع " الايدلوجية " بعد فاز
ياخ ما مشتاقين عديل كدا ياخ !
-------------
* اوعكم تضحكوا في اسم قريبنا
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: قيقراوي)
|
القيقراوي
ابدأ ليك بالشوق و الوطن
الشوق الديل زى سواقة الطاشم في نيروبي ، بيقع في الحفر واحدة واحدة
نحنا شوقنا ملولوووو كده، كيفك و كيف البنيات.
زكريا آخر علمنا بما آل اليه شأنه، أنه فاز بمقعد اتحادي اشتراكي
و تصوف في نهاية العهد، و يتأهب هذه الأيام بمساعدة ابنه ( محمد زكريا)
الى السفر الى مصر للعلاج.
تحياتي
الملك
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: Tagelsir Elmelik)
|
Quote:
زكريا آخر علمنا بما آل اليه شأنه، أنه فاز بمقعد اتحادي اشتراكي
و تصوف في نهاية العهد، و يتأهب هذه الأيام بمساعدة ابنه ( محمد زكريا)
الى السفر الى مصر للعلاج.
|
اولا نشكركم بالعربيه والانجليزيه وبالحمدلله الفرنسيه ايضا
اول بالتبادي تبعا الوالد بخير....شفتو ليكم زول بضرب القدوقدو بكون ايان؟؟
الوالد اخد المعاش الاختياري وتنازل عن كل المناسب والمكاسب وتوجه الي السلاتو والعبادات
وبعد ان كان مع التجانيه اتبع لنفسه تريقه اسماهو التريقه الزكريه الاتيشيه الاشتراكيه
وانحنا اولاده الخلفاء من بعد اومرين تويل سننشرو الدعوه في مصر والدول المجاوره ان شاء اللاهو
وللمعلوميه يااني الوالد ما بتالج في مصروكده لانه الحمدلله ناسيح وزي الهوسان
لانو كان ايان بنجيبو المانيا ولا بريتانيا.....وهذا للماالوميه فخت.....وقولو ماشاء الله
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: محمد زكريا)
|
Quote: اولا نشكركم بالعربيه والانجليزيه وبالحمدلله الفرنسيه ايضا
اول بالتبادي تبعا الوالد بخير....شفتو ليكم زول بضرب القدوقدو بكون ايان؟؟
الوالد اخد المعاش الاختياري وتنازل عن كل المناسب والمكاسب وتوجه الي السلاتو والعبادات
وبعد ان كان مع التجانيه اتبع لنفسه تريقه اسماهو التريقه الزكريه الاتيشيه الاشتراكيه
وانحنا اولاده الخلفاء من بعد اومرين تويل سننشرو الدعوه في مصر والدول المجاوره ان شاء اللاهو
وللمعلوميه يااني الوالد ما بتالج في مصروكده لانه الحمدلله ناسيح وزي الهوسان
لانو كان ايان بنجيبو المانيا ولا بريتانيا.....وهذا للماالوميه فخت.....وقولو ماشاء الله |
هههههههه
موهانقمادو
سندوق بريد تمنتاشر
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: Tagelsir Elmelik)
|
| Quote: لانو كان ايان بنجيبو المانيا ولا بريتانيا.....وهذا للماالوميه فخت.....وقولو ماشاء الله |
ما شاء اللاهو تبارك الله
و الله مع لواري شوق الملك و نجرات بريتانيا دي بس ذكرتوني عمك " فاروق " بتاع بص الكنوز
عمك فاروق دا عندو هوستن عملو باص ، زول غتيت بامتياز . مرة واحد مفلّس ركب تستطيح في البص قايل نفسو بتخارجو ، وين يا مع عمك فاروق ؟! . . جا يطقطقو ليك ، اعتذر و الحف في الحلف و اشتكى لصقة حواف قمشا جيبو من عدم البفرقن ! . . فاروق لا يرحم . . شوف يا زول مش لو ركبت مسطح لو جريت في ضل باص فاروق تدفع !
اها فاروق دا بتاع فايات بإمتياز . . بحكم سفروا الكتير مرة بزلق فيها للجماعة و مسطح ليك بيهم انو في بلدة : " كاكا كومبا" * !! و اشار بيده لمستوى صدره علواً من الارض
الشفوت قاااااااااااعدين ، عصروهو ليك بحزم : فا!!!روق !!!
قلب ليك جيييييييييت . . . و اطاح بيده ، و عينوا على الجماعة و يلقى ليك عيون حمممممممممر . . ناس ناقشة اي شئ . . و يشيل و ينزل لما قرب الى الارض بمقدار ( سوسيو ) بس . . لما هو ذاتو خجل ينزل اكتر من كدا . . و اطلقها " كومبا ني " **
---------
*
**
الترجمة على محمد زكريا
| |
|
|
|
|
|
|
|
|
|
Re: من أجل الأيدلوجية.. انتخبوا زكريا (Re: قيقراوي)
|
جنى زكريا
Quote: اول بالتبادي تبعا الوالد بخير....شفتو ليكم زول بضرب القدوقدو بكون ايان؟؟
الوالد اخد المعاش الاختياري وتنازل عن كل المناسب والمكاسب وتوجه الي السلاتو والعبادات
وبعد ان كان مع التجانيه اتبع لنفسه تريقه اسماهو التريقه الزكريه الاتيشيه الاشتراكيه
وانحنا اولاده الخلفاء من بعد اومرين تويل سننشرو الدعوه في مصر والدول المجاوره ان شاء اللاهو |
مزنوق في رتيمزا بت كلب ,,
رغم اني حافظ الايدلوجيا ,, الا ما قادر افوز في كرتله ,,
وصى لينا الهاج ,,
| |
|
|
|
|
|
|
| |
Tagelsir Elmelik
خدر
محمد زكريا
تبارك شيخ الدين جبريل
abubakr
ibrahim kojan
حبيب نورة
قيقراوي
عمار عبدالله عبدالرحمن
فيس بوك
تويتر
انستقرام
يوتيوب
بنتيريست