|
الزهج .. تعريفه و اسبابه و كيف الناس تتخطاه موضوع للنقاش
|
طيب الزهج هو حالة انك تكره روحك و تكون قرفان و ما طايق نفسك
اما اسبابه فمشكلة كبيرة .. بعض انواع الزهج بكون عندها اسباب
ودي مافيها مشكلة لانه اذا عرف السبب بطل العجب او بطل الزهج لانه ممكن تكون محاولات
التخلص من السبب ناجحة و يتحول الزهج الى فرح
اما الزهج الصعب هو الما عنده سبب .. تصحى الصباح تلقى الدنيا بدون اي سبب
مقفلة في وشك وماطايق روحك و كل محاولات اصحابك للتخفيف عنك تروح سدى
اهايلا سوا نناقش الزهج
|
|
|
|
|
|
|
|
Re: الزهج .. تعريفه و اسبابه و كيف الناس تتخطاه موضوع للنقاش (Re: حافظ كنجال)
|
الزهج أو الزهق أو الطفش أو القرف أو كونك غير طايق روحك كلها مترادفات مفادها أن الإنسان يتقوقع أو يمر بمرحلة ربما يكون فيها كرهان كل شئ حوله وبعيداً عن أسباب الزهج فهو إيحاء أو مرض يمر به كل واحد وهو حالة من التياسه (من تيس) ولا أعرف ما ذنب التيس في هذا الأمر أو الحمار حتى فكلاهما مخلوقات أثبت العلم أنها ما عندها عوجه. المهم أسباب الزهق أو الزهج كتيرة وتتعدد وتتنوع وتتفاوت وتلعب بعض الظروف المحيطة بالزهجان دوراً كبيراً في تسريع وتيرة الوصول إلى حالة الزهج الكبرى ، فالزهج أنواع وفيها مقاييس زي أوزان الملاكمة يعني زهج ذبابة (ودا أنا بعاني منه وخاصة في فصل الصيف) تكون تعبان وزهجان وقرفان والكهربه قاطعه ونايم في درجة حرارة تفوق الـ 45 درجة مئوية ولو فتحت الشباك ولا خليتو الحال ياهو نفس الحال وتكون نايم لمن عرقان والمخدة كأنما دفقوا فيها جك موية أها وإنت في هذه الحالة القردية تقوم تجي ضبانه ترك في وشك تنهرا بي إيدك وإنت مغمض برضو ما في فايده تنهرا تاني بنصف عين مفتحه برضو تجي راجعه أها دا أقل درجات الزهج يعني حا تقوم وتمشي الحوض تفتح الماسورة تلقى الموية قاطعة تفتح التلاجه تقوم ترمي تلات بيضات دفعه واحدة من طبق البيض – الإشتروهو أصلاً عشان يخبزو بيهو لي أخوك الجاي من تورونتو مع أولاده المهم الثلاث بيضات كشششش يقعو ويتكسروا ويملو أرضية المطبخ بالصفار والبياض وتزيد كمية الذباب تضطر تجري تجيب ليك قطعة بشكير قديمه تبلها بي موية من نقاع الزير أها وتجي تمسح الأرضية وأثنا عملية المسح تقوم تخبط الباب بتاع المطبخ بي ضهرك لمن نفسك يتكتم تقوم تلعن أبو أى حاجه ، أها دي الدرجة الصغري من الزهج وتتوالي الدرجات إلى الزهج الثقيل. عشان تفك الزهجة بتعتمد على نوعها هل هى زهجة كم ولا نص كم ولا سواريه (بدون أكمام) ، أخطر ما في الزهج أنه أصبح موضه يعني أى واحد يقول ليك يا أخ أنا زهجان ، والزهجان أو الزهجانه لا فرق شخص بيكون عاوز شوية حنان في لحظة الزهج دي عايز إهتمام زيادة عاوز حاجات كده ربما يكون هو أصلاً ما محتاج ليها وإن كان عقله الباطن (الكلام دا ما علمي ولا في مصادر ليهو ولا حاجه دي تجارب بس قد تصدق وقد لا تفعل) يصور ليهو أنه شخص الناس ما مهتمين بيهو يعني أمك الصباح لمن نادت مازن أخوك كان صوتها بختلف لمن صبحت عليك ، يعني تقعد تدخل في ظنون وشكوك في نفسك وكل الناس الحوليك فتعيش في تعب وقرف بأوهام أنت صنعتهاوعشتها وبالضرورة لابد أن تعاني منها. أنا لو ما زهجت كان واصلت لأنه بصراحه موضوع يزهج
| |
|
|
|
|
|
|
|