|
|
 ريهان .. و ريهام
|
ريهان الريح - ماشين في السكة غدا...ريهام محمد علي ـ حنبنيهو
جلسنا إليها شابة تبدو واقفة على عتبة البرلمان وبينما خاطبناها بتلك الصفة اجابت بانها ليست على العتبة وانما هي داخل البرلمان يعني وصلت وهي الآن تحمل يدها ومعها راية التغيير لكثير من المفاهيم البالية ولتعيد صياغة وبناء الوطن على اسس جديدة تعترف بالتعدد والتنوع وتعطي الجميع حقهم في هذا الوطن المترامي الاطراف. ريهان الريح الشاذلي.. والتي تمثل نموذجاً لهذا التعدد فهي خليط ما بين رمال الغرب الغارقة في الجمال هناك من بارا وما بين صفة النضال الاولى التي انطلقت من ديار المك في متمة الجعليين كانت هي سليلة تلك الثنائية وتربت في الامتداد وواصلت رحلتها التعليمية حيث تخرجت في جامعة السودان كلية الهندسة وتدخل الآن محاولة هندسة الواقع السياسي واصلاح اضلاع المربع وصنع مثلثات جديدة من خلال التنافس في الانتخابات ووضع رجلها في الطريق نحو البرلمان باعتباره الخطوة الاولى لانجاز حالة من الاصلاح. جلسنا إليها مناقشين وسائلين ومحنكين وخرجنا بالحصيلة التالية مع اجاباتها:
٭ متى بدأت ممارسة العمل السياسي؟
- بدأت ممارسة النشاط السياسي في جامعة السودان ضمن منظومة رابطة الطلاب الاتحاديين الديمقراطيين وفي كثير من الاحيان أنت لا تذهب للسياسة ولكنها تأتيك هي في مكانك وتبقى مطالب بالتعامل معها من اجل ان تعيش دون ان يعني هذا ان السياسة قدر سئ بل هي قدر جميل ان تم التعامل معها باخلاق ولكن ليس بما يحدث الآن من بعض الجماعات.
٭ يعني دخلت السياسة بالصدفة؟
- أنا دخلت السياسة برغبة اصلاح الحال المايل وليست عبر الصدفة.
٭ ترشيحك للبرلمان كان مخططاً له؟
- الترشح للبرلمان تطور طبيعي لمسألة طموحي السياسي وليس هو غاية في حد ذاته وانما وسيلة لتحقيق غايات أخرى لاصلاح الحال عموما واتمنى انو انجح فإنه أمل.
٭ تصلي عشان امتيازات المجلس الوطني؟
- ما عشان امتيازات المجلس وانما عشان تقوم السياسة بدورها الحقيقي وهو خدمة المجتمع وتحقيق مطالب الفئات المستضعفة ونشر القيم الفاضلة وتغذية الشعور بالانتماء لهذه الارض.
٭ ده كلو من التميز الايجابي الادوكم ليه؟
- ده حقنا يا بيه وبالمناسبة القاليك منو نحنا هسة رضيانين بـ 25% نحنا دايرين نكون 100% مش المواطنة هي اساس الحقوق والواجبات الموضوع ما منه من زول من الناس فاذا كانت النساء جزء من كل الانشطة الدائرة في البلد فمن حقنا ندور البدور كل حاجة ده ولا شنو رأيك وتاريخ المرأة السودانية يمنحها الحق ده وزي ما قلت ليك انو 25 دي بداية الغيث ومطرتنا جاية قريب وهي ما زي مطر الحروب والمشاكل دي مطرة خير وبركة وسلام ومحبة يا حبة.
٭ انتي بتتكلمي كده زي الفزتي وقاعدة في البرلمان؟
- أنا منطلقة من مسألة الثقة الكاملة في مقدراتي وبرنامجي والذي سيقنع الرجال قبل النساء وسيجعلني عضوة برلمان قدر الدنيا.
٭ انتي الرجال ديل هسة ما كنتي شغالة ضدهن؟
- انت شكلك بتعمل في حركات الصحفيين وبتجيب في كلام من راسك نحنا ما ضد الرجال نحنا معاهم وبيهم وبالمناسبة كان دي حركاتك من هسة اوع اشوف وشك في البرلمان ونحنا حنفوز باصوات المسجلين وبدعوات غير المسجلين.
٭ وبعد ما تفوزي حتسوي شنو؟
- نعمل كتير وما بنقيف في حاجة واحدة يعني اول حاجة حاقوم بتغيير شكل النائب الذي سيكون جزء من الحراك الاجتماعي في الحي وليست كم يفعل النواب الذين يجلسون في برج عاجي وينظرون للقضايا من منطقة عالية وبعيدة حانزل للناس واعرف مشاكلا واقوم بحلا حسب استطاعتي وحاعمل على نشر الثقافة السودانية من خلال اللغات انني بالمناسبة نحن ابدينا المسألة دي من خلال البرنامج ذات الذي حنترجمه لكل لغات السودان يعني حنقرأ البرنامج بالحلفاوي والنوبي والدنقلاوي ولغة الدينكا والنوير والشلك ولغة البجة وكل اللغات عشان أي زول يحس بانو البرنامج ده حقوا ويعمل على فوزنا بالمنصب وبعداك لكل حدث حديث.
٭ هسة مباراة السياسة دي ما بتعطل حاجات تانية؟
- حاجات زي شنو يعني..
٭ العرس مثلاً؟
- منو القال انو السياسة حتعطل العرس ما في أي تناقض ما بين اداء الادوار المختلفة لنا كنساء والحركة دي بس بقولوها عشان يقللوا من الادوار التي يجب ان تقوم بيها على مستوى المجتمع وبصراحة العرس لو بقى بعطل موضوع تقديم الخدمة والوصول للبرلمان يطير العرس والعريس.
٭ أنت جادة في كلامك ده؟
- جادة جداً يا باشا.. والموضوع غير قابل للنقاش يعني خدمة الناس أولاً ومن ثم تحقيق الامنيات الشخصية.
٭ كلمة أخيرة
- هي رسالة للجميع جيبوا النساء في البرلمان وما حتندموا يعني ما حتكون في حروب ولا مشاكل بل محبة وتواصل وسلام ووئام وزي ما يقولوا ما تجربوا المجرب وشوفوا الجديد والجديد شديد.
ريهام محمد علي ـ حنبنيهو)
عمرها الصغير وسنواتها القليلة تقف على تجربة قد تكون اكبر من سنها ولكن هذا لم يمنعها من ان تخطو على سلالم الطموح الذي قادها لان تكون مرشحة تقف على عتبة البرلمان ممثلة لشريحة الشابات ومؤكدة على ان الشباب هم وقود الحاضر وكل المستقبل الذي تسعى لرسمه بشكل جديد يحقق طموحات الامة السودانية في ان تعيش في سلام وامان واستقرار وتوحد في المشاعر، وتلك هي الراية التي تحملها القادمة من بحري ريهام محمد علي خريجة الهندسة المدنية التي تعمل في مصنع النالة للثياب النسائية وتحاول تفصيل ثوب جديد يرتديه الجميع وشاحا وهي تقف على عتبة البرلمان التقيناها لنتونس في القادم من المواعيد عبر التمثيل في برلمان الانتخابات فماذا قالت بت محمد علي؟
! انت ما شايفة انك صغيرة على القعاد في كرسي البرلمان؟
- العمر لا يحسب بعدد السنوات وانما بالقدرة على العمل والانجاز وهذا ما بقدر عليه الشباب الذين يحملون لواء التغيير والتبديل بعداك تعال انت الناس البقولوا كبار وقعدوا في البرلمان سووا شنو وحال البلد ظاهر وواضح.
٭ يعني انتي قائدة ثورة ضد القديم؟
- انا ما بتاعت ثورة ضد القديم بالفهم البالي وانما احاول قيادة ثورة للاصلاح وما كل القديم سيء بنفس القدر الضيعو ما كل جديد كويس ونحن نحاول صناعة مستقبل يمازج ما بينهما من اجل الاصلاح الذي نحاول الغوص لانجازه.
٭ كيف يعني؟
- بصراحة كده نحنا في الانتخابات دي محتاجين لكل الاصوات عشان كده نحنا بنحترم كل الناس وليس هذا سعي للاصوات فحسب بل القيم التي ننطلق منها تجعلنا في خانة احترام للجميع دون فرز كما ان خدمة المجتمع لن تقوم على فرز فئة دون اخرى.
٭ وحا تخدموا المجتمع دا كيف؟
- نحنا ما جايين من المريخ يعني نحنا جزء من المجتمع ده.. عشنا جزء من المعاناة بل كل المعاناة وخصوصا نحن من جيل اصابه الوجع والالم والقهر وحنحاول معالجة ازماته كلها بصراحة كده نحنا جيل دفع كل اخطاء الماضي ويحاول صنع المستقبل من خلال الاقتحام.
٭ اقتحام شنو انتي بص ولا مرشحة؟
- انا مرشحة عشان كل الناس ومن اجل جميع الناس عشان كده بعمل اي حاجة وليه ما اكون بص اقلاهو عشان احل مشكلة المواصلات ومعاها مشكلة العطالة في البلد دي.
٭ يعني انتي ما لقيتي وظيفة قلتي تبقي نائبة؟
- انا دايرة ابقى نائبة ما عشان الوظيفة الخاصة وانما ايجاد وظيفة لكل العطالة في البلد وده حيكون البرنامج الاساسي الذي سأسعى من اجله يعني حارفع شعار وظيفة لكل شاب واضافت ضاحكة وكده حا نضمن حل مشكلة العطالة ومعاها مشكلة العزوف عن الزواج يعني برنامج لفك البورة وده ذاتو سبب اساس عشان الناس يدوك صوتهم واللا رأيك شنو.
٭ ده حنك ساكت؟
- ده ما حنك ده جد السبب الدفعنا لدخول الانتخابات والحنعمل من اجل انزاله على ارض الواقع وليس العكس وده انطلاقا من مبادئ آمنا بها والتي مفادها ان الشعب وقضاياه اولا وده انطلاقا من مبادئ الجيل الاول الذي صنع هذا الوطن وتظل مسألة الدفاع عن حقوقه هي قوى الدفع التي سننطلق منها وبصراحة سفينة التغيير سارت لا تبالي بالرياح وحياتنا انشودة صيغت على لحن الكفاح الذي نرفع اكفنا للجميع من اجل انجازه على ارض الواقع وانا ما شاكة ولو لحظة في انه سأحقق المأمول واكون سيادة النائبة من الشعب السوداني والتي يخرج صوتها بالدفاع عن حقوقهم في كل المحافل بس ربنا يوفق.
الصحافة
|
|
 
|
|
|
|
المعز ادريس
فيس بوك
تويتر
انستقرام
يوتيوب
بنتيريست