|
|
 مهرجان الشعر والحرية ليلة الشاعر المبدع هاشم صديق الجمعة 12/3 بيت الفنون/الدعوه عامة
|
ليلة من ليالي بيت الفنون
نستضيف الشاعر المبدع هاشم صديق
علي شرف تدشين مجموعاتة الشعرية المسموعة والمرئية
ويشارك في الليلة نخبة من المبدعين
الشعراء الكرام
1 . محجوب شريف
2. محمد طه القدال
3. محمد الحسن سالم حميد
4. د ناهد محمد الحسن
5. ازهري محمد علي
6.امام الصاوي
7 . ايمان ادم
رؤي فكرية - قراءات شعرية- استماع - مشاهدة- تسويق
تبدا الليلة في الساعة 7.30 مساء
والدعوة عامة
|
|
  
|
|
|
|
|
|
|
|
Re: مهرجان الشعر والحرية ليلة الشاعر المبدع هاشم صديق الجمعة 12/3 بيت الفنون/الدعوه عامة (Re: Hussein Mallasi)
|
التحية ليكم (مدينة الفنون) وانتم تسعون لإعادة صياغة الواقع المتردي في البلد
لغياب مثل هذه الليالي الشعرية وغياب الدور الطليعى الذي تلعبه الدور الثقافية والفنية..وبيت الفنون
اتى لايجاد هذه الحلقة المفقودة .. و هذه المراكز تمثل بذرة او نواه لخلق مجتمع متطور وواعي
وهي المرآة التى تعكس وعي الشعوب وتقدمها وكذلك اكتشاف الذات ..
.كثيرا ما ارتبط الفن و المسرح تاريخيا بحركات النضال والتحرر ومساهمته الفعالة في بث روح المقاومة والنخوة
ونحن بنعتبر مثل المبدع هاشم صديق ومحجوب شريف وحميد وغيرهم من الشعراء الذين عبروا عن معاناة الشعب وقضاياه
ويمثلون شعراء الثورة الشعبية في بلادي ودوما كانوا منحازين لقضايا الجماهير بالكلمة والقلم وتعرضوا لمضايقات
وجبروت السلطان وزج بهم في السجون وهذا يعكس مدي قوة الكلمةو تاثيرها النافذ في بث الوعي الذى يكون وسيلة او اداة للغيير
أنتم موعودون ياناس الخرطوم بليلة من اروع الليالي والواحد بقي يحس بروح العافية في الوسط
الفنى والثقافي في ظل وجود مؤسسة متل بيت الفنون ويجب ان يلتف الناس حولها ويقدموا لها كل السند
والدعم لمزيد من العطاء والازدهار
مع فائق تقديري
والتحايا لقائد هذه المؤسسة طارق الامين و صحبه
| |
|
|
|
|
|
|
|
|
|
Re: مهرجان الشعر والحرية ليلة الشاعر المبدع هاشم صديق الجمعة 12/3 بيت الفنون/الدعوه عامة (Re: معتصم مصطفي الجبلابي)
|
طبقات ود ضيف الله
شعر هاشم صديق
(1)
ياكمسارى
دى حافلة وين؟؟
دى ماشة الشعبى
اركب واسرع
نفر .. ونقوم
ياولد جنيت؟؟
وكمان بتكورك
وبالحقلوم
وتقول الشعبى؟.!
.........
انا ماشى...
ماشى
الـ....
الـ.....
وين ياعم؟؟
لو ماشى الحركة
برضو بنمشى
بنفس الشارع
ياولد
انت مسلط؟!
حركة وشعبى
وفى وشى؟؟
دى خلطة وين؟؟
انا عندى قلب
ماتوقف قلبى
طيب يا عم
وين ماشى ؟؟
اسرع اقول
انا ماشى ....
ما شى ....
يا ربى لوين
ياود جاد الله؟؟!
نسيت يا زول
طيب يا عم
خلينا ننادى
( يصيح)
تيجاني الماحي
تيجااانى الماااحى
باقي نفر
نفر ... وسفر
سفر .. و.. نفر
يوماااتى
ليلاااتى
صباااحى
نفر... وسفر
لا ياولدى
كورك وقول:
جوع .. وسهر
حفر .. مطر
.. غم .. وكدر
فلس فى شهر
طشاش فى نظر
عمر..وهدر
طيب يا عم
ما انت العاقل
ورينا الناس
اللاقو الراحة
لقوها فى وين؟؟
كفر..ووتر؟؟
لا لا
تبيع لى روحك
تخون لجروحك
وتختا الشر
تعوم فى البر
تكون نص
حاجة
وتصبح واحد
تكون كضباب
ونجمك صاعد
تكون سراق
لا ضمير
لا شاهد
تكون ود موية
او حربوية
وزمنك واعد
يا عم مالك؟؟
مرات مجنون
مرات عاقل
مرات خايف
مرات راجل
حتجننى ...
انت منو ؟؟
انا ولد جاد الله
فى كل محطة
فى كل مظلة ......
كورك يا وليد
تيجانى الماحى
باقى نفر
تيجااانى المااحى
نفر..وسفر
تيجانى الماحى
يوماااتى
صباحى
ليلااتى
نفر... وسفر
جوع... وسهر
حفر...ومطر
طشاش فى نظر
عمر وهدر ....
| |
|
|
|
|
|
|
|
|
|
Re: مهرجان الشعر والحرية ليلة الشاعر المبدع هاشم صديق الجمعة 12/3 بيت الفنون/الدعوه عامة (Re: معتصم مصطفي الجبلابي)
|
(2)
الحيشان
يا ايدى
شيلينى
ختينى
فى البيت الشعب
تلات حيشان
فى نص القلب
هنا المسرح
هنا التلفاز
هنا الرادى
هنا امدرمان
هنا السودان
...........
اتحزمت
كتبت
نضمت
انتجت
عديل بالغت
ماقصرت
نصحنى الغاشى
والدانى..
منو القال ليك
دة بيت الشعب
فى نص القلب؟؟
دة بيت السلطة
يالسطى
كلو بديع
هنا بينزاح
بايد ضباح
كلو بديع
مصيرو صريع
ويكون فانى
............
اتفلسفت
خطبت
اتقعرت
ما خليت
حرف عربى
ما خليت
مثال غالى...
رفعت الصوت
كبير عالى
لما الصوت
عديل بح
واتحذلقت بالفصحى
_ بيان هام
يا اهل الفن
دعونى اضع
( طوبة )
على صرح
البناء العام
فهذا الشعب
مجبول على الافعال
لا ا لاحلام
هذا الصرح
صرح الشعب
لا السلطة
هنا الفنان
ملك الناس
فهو الحادى
و ( الاسطى )
تعالوا
يا بنى وطنى
وبا لابداع
لا الاحلام
نوكد ان....
.....
فجاة سمعت
صوت فرقع
تحت كرعيا
زى ألغام
ونص ألراس
وقع شاكوش
دفن برشام
عصار وقيامة
قول لا حول
ياود جاد اللة
مافى كلام
..........
قلت دراما
شان الشعب
سمعت هتاف
مكرب تب
_ لا للفجرة
بل اسلام
........
_ لا بالعالى
وبالقسم الغالى
لود جاد اللة
بل دين اللة
.....
_ مافى دراما
الا ( عقال)
وجبال وجمال
وسيوف ودفوف
وخيل ولجام
............
يا ود جاد اللة
اطلع برة
وشيل الطوبة
ما دايرين
لو جبت الطوب
فى ( كماين سوبا )
.....................
_ نحنا ولاد
الصرح الخاص
لو حتى قعدنا
تحت راكوبة
ما دايرين
للصرح العام
_ يا ود جاد اللة
انت شيوعى.....
وبعثى عراقى
ومرات ( الصحوة )
والاسلام....
.....
_ ما دارين
فى دراما خلاعة
امراة سافرة
فى بيت زوجية
او صبحية
اوحتى مسافرة
ولابسة بلوزة
بدون اكمام
.............
_ ممنوع افلام
لنعامة بتجرى
وريشها قصير
عاريات كرعينها
طــــــويــــــــــــلـــــــــــــة
( سيكسى) (1)
دة تبذل عام
.............
ياود جاد اللة
اطلع برة
ان شاء اللة تهاجر
تمشى لكندا
او تمشى تموت
فى لغم فى الشام
.............
يا ود جاد اللة
امرق برة
ما دايرين الحاد
وحرام ..
.................
................
طلعت
مرقت
تانى خطبت ؟؟؟؟
اتفلسفت؟؟؟
اتفاصحت
لقت نفسى
الوم روحى
ليل وصباح
_ يا ود جاد اللة
بدل ما قلت
بى هوبة
تضع طوبة
على صرح
البناء العام
وبا لافعال
وما الاحلام
ايا مسكين
يقع شاكوش
فى نص الراس
دفن وبرشام
..............
يا ود جاد اللة
تطلع برة
صالح عام
مليون عام؟؟؟
| |
|
|
|
|
|
|
|
|
|
Re: مهرجان الشعر والحرية ليلة الشاعر المبدع هاشم صديق الجمعة 12/3 بيت الفنون/الدعوه عامة (Re: معتصم مصطفي الجبلابي)
|
(4)
المانشيت
بورولوج
تف من خشمك
الحنضل
هداك برقا
شرق اجمل
لافى جريدة
لاسيرة
لا رادى
لا وادى
ولاغزلوهو
فى معمل
داك برقا
طلع من سالبك
الموجب
ومن ضحكة بكاك
تبتب
وفى صنة
سكون غنبنك
وقف تاتا
وعديل كركب
ومن جبل الحزن
حجاك
وساق دمعك
بحر ساساق
دفربى عشقو
للمركب
وكان الدنيا
كل ماتضيق
تلاقى صديق
تلاقى طريق
صعب
اسهل....
تف من خشمك
الحنضل
هداك برقا
بلج اجمل
.............
لو ماكنت
سودانى
ولو ماجرحك
الصابر
سراح حدادى
مدادى
من شرقك
ولى غربك
ومن عقلك
ولى قلبك
شنو الخلى
الوطن بى حالو
مليون ميل
تشيلو عديل
ويتمهل
فى ضيق صدرك
لو ماكنت
من وجعك
شرب حرفك
وماقبل
على الاسهل
شنو الخلى
العيون تحمل
عذاب الرؤيا
للاجمل..
ولو ما كنت
ناى سواى
وماحداث
وسر ضحاك
ومابكاى
شنو النحتك
من الاهوال
فى احسن حال
بقيت سودانى
با لازميل
وبالتجريح
وبالتجريج
وبالتنكيل
وما باللفة
ولاسهل
شنو البقاكا
ياهلكان
من السودان
شنو السواكا
نار وعصار
ودار وعمار
وانت وحيد
كمان اعزل
تف من خشمك
الحنضل
داك برقا
شلع اجمل
رغم (الظاهرة)
والخافية
رغم العصبة
والمافيا
رغم الشفتو
والجاكا
وناس ( دلاكة)
كنداكة.
ناس (ودوك)
وجبناكا
ناس الزانة
والزازاى
ناس الزانة
ناس (البزة)
والتاتاى
ناس (المزة)
سيرة الناس
فى ضل البن
وبو الشاى
ناس (البيع)
وستين وش
_ عشان الخش
ومليون راى
...............
الا حجاكا
ما بكمل
تجى الكنداكا
تمشى وراكا
تلقى الستاتر
الناصر
طويل امهل
وما اهمل
تعاين
والعصار حاسر
ويلوح ليكا
يوم باكر
تتق من خشمك الحنضل
تشوف برقا
سطح اجمل
............
لو ما كنت
سودانى
ولو ماكنت
سودانى
ولو ماحرجك
الصابر
سرح حدادى
مدادى
شنو الخلى الوطن
بى حالو
مليون ميل تشيلو
عديل ويتهمل
فى ضيق صدرك
...................
تف من خشمك
الـــــــــــحـــــــــــــنـــــــــضــــــــــل
| |
|
|
|
|
|
|
|
|
|
Re: مهرجان الشعر والحرية ليلة الشاعر المبدع هاشم صديق الجمعة 12/3 بيت الفنون/الدعوه عامة (Re: معتصم مصطفي الجبلابي)
|
قرنتية .. ما غواصة روسية
قرنتية
لا دبابة برمائية
لا جاسوسة مدسوسة .. لا غواصة روسية
لا جندية في "حركة" .. لا مختلسة مال شركة
لا قصفت حدود "فشَلا"
لا كسرت صريف كسلا
لا معروفة ختمية .
قرنتية
لا صعلوقة لبست "شورت"
لا بتعرف شنو البظبورت
لا محتاجة جنسية .
هي قايلة النيل سقِف بيتها
وقايلة ضِفافو "محمية" .
جات منسابة عز الصيف ..
قايلة الناس بِكِرمو الضيف ..
وقايلة النيل أمان والقيف
وقايلة "الحاضرة" عصرية
قرنتية ..
جات بصغارها دايرة الخير
لا شافت يٍفَط تحذير
لا نزحت تكوس توزير
لا جاطت حركة السير
لا دارت وسام تقدير
لا مستلفة عشرين وش
ولا بتعرف تعيش بالغش
كان محتاجة بس للقش
وجات أحلامها دوغرية
قرنتية
لا بلعت عديل السوق
لا نضمت بدون طايوق
لا كنزت دهب أو ماس
لا ظلمت بدون إحساس
لا عصرت شباب الناس
لا كتمت على الأنفاس
لا قطعت عشم بي فاس
لا داستنا زندية
قرنتية
لا دست سلع في الخيش
لا شربت مريسة عيش
لا ضبطوها في التفتيش
لا خانت قسم أو ديش .
لا اجتمعت "بمستر جون"
لا أكلت "مؤنة العون" .
لا سدّت علينا الكون
لا سبت كتاب أو دين
لا سامتنا حمرة عين
ولا باعتنا ضهرية
قرنتية
جات مشتاقة للخرطوم
تزور أحبابها خايفة اللوم .
تصيح وتنادي بالحلقوم :
"جنينة النزهة" وين يا زول .
"جنينة النزهة" وين يا زول .
***
لقت حال الجنينة خلا .
حليل زمنها وحليل أهلها
لا قرنتية .. لا أصلة
لا صوت ككّو .. لا بغلة
لا حلوف .. لا أسداً مهاب بالخوف
لا نمراً يشد للشوف .
لا ضل فيل .. لا تيتل جريهو جميل
ولا غزلان .. ولا طاؤوس يباهي النيل
لا زفة طيور ونعام
لا نمراً دفر قِدّام
كل الشُلّة ياقرنتية غمضة عين
أحالوهم لصالح عام
تقول الدنيا "مهدية"
قرنتية .. ؛
جات زي ضيفة ما غارة .
لا محتاجة لي فيزا .. ولا تصديق على زيارة .
جات والشوق دموع حارة .
تجدد في العيون الشوف .
بين توتي وعلالي أبروف
قايلة الدنيا لسة سلام ما خيم زمان الخوف
لسة هناك ضفاف حرة .
ما مطمورة للمُرّة
قايلة الناس بعزو الضيف
ما بسوقوهو لي حفرة وجوار القيف .
ما بياكلوهو في الصفرة ومصيرو مخيف
قايلة الحاضرة ما غابة .
وقايلة حقوقها محمية
قرنتية ..
لا قدلت في شارع القصر .
لا حامت في وكت الحظر
لا خشت على المأمور .
ولا نطت سلك أو سور
لا دخلت على أمد رمان
ولا كسرت قفل دكان
لا دفرت على التلفاز
ولا عضّت كراع فنان
لا ذاعت بيان للناس
لا احتلت كمان "حيشان"
ولا نصبت شبك للحشّ
جات بصغراها كايسة القش
تلاقي القوت صبح محظور .
وخير البقعة جوه السور
سماحة الدنيا منسية
قرنتية
لا بتعرف عجن أو لخ
وجات أحلامها دوغرية .
عجب .. ساقوها جوه الفخ
عجب .. من طولها وقعت تخ
عجب .. سلخوها صبحية
عجب .. ونحنا بنسلخ الإنسان
كيف ما نغدر الحيوان
عجب .. والدنيا عصرية
قرنتية ..
لا دبابة برمائية
لا جاسوسة مدسوسة
لا غواصة روسية
لا جندية في حركة
لا مختلسة مال شركة
ولا حزبية بعثية
قرنتية
| |
|
|
|
|
|
|
| |
بيت الفنون
Hussein Mallasi
معتصم مصطفي الجبلابي
محمد عبد الماجد الصايم
naeem ali
فيس بوك
تويتر
انستقرام
يوتيوب
بنتيريست