|
|
 Re: السرطان ينتشر من المرض إلى الوباء (Re: مريم بنت الحسين)
|
شكراً بت الحسين حمى الله الجميع من المرض والفقر والجهل.
نحن من الشعوب المتأخرة جداً في شأننا كله وبالأخص في الجانب الصحي خدمة وتثقيف ورعاية ، وفي حاجة ماسه إلى توعية صحية في أمورنا الحياتية كافة ، ونحن نعيش في العام 2010 وهنا من يشحد دواء وحبوب من الجيران زيها وزي الملح والبصل والمفراكه ، وهناك من هو أحسن حالاً قليلاً يذهب لصيدلي – عديم ذمة في تقديري – ويشتري دواء دون وصفة طبية ضارباً عصفورين بحجر واحد ، أول تلك العصافير الحزينة المضروبة هو توفير تكاليف الطبيب الباهظة وثانيها أن قلبه مطمئن لأنه قام بشراء الدواء من صيدلية ولم يشحده من ناس سكينه أو حليمه وأكيد الصيدلي عارف ببواطن الأمور ، والأهم أن الصيدلي هذه الأيام أفضل من الطبيب المعالج فالدكتور ينظر للمريض بشئ من التعالي في بعض الأحيان ويكتفي فقط بسؤاله عندك شنو؟ ومن متين بتشعر بالوجع دا ، ويكتفي بهذا القدر من التحقيق ويكتب في ورقة يناولها صاحبنا ويقول ليهو لو ما بقيت كويس بعد أسبوع تعال لي لا كشف لا سماعه لا ميزان مويه لا ميزان دكان لا أفتح خشمك ده حتى ما بلمس المريض وصاري وشو كأن المريض ما دافع دم قلبو في فاتورة العلاج أو كأن الطبيب مكّره على الخدمة التي يقدمها للمريض وسمعنا أن نص العلاج والتطبيب يكون نفسي أها وكت نفسك تتسد من الدكتور من البداية والله لو بقى سيدنا عيسي ما يعالجك تاني.
الناس يا بت الحسين ويا ناس المنبر كلها ماشه ساااااكت عندها شنو ما عارفه والواحد لمن تقول ليهو حاجه يقول البتكل والبحي الله ، ونعم بالله ، لكن الجهل قاتل والفقر قاتل والجوع قاتل والظلم قاتل وعدم التثقيف الصحي قاتل ، ونوعية الحياة زاتا خشم بيوت وزي ما قالو ناس حلمنتيش المعذب أخير يموت.
| |
  
|
|
|
|
almulaomar
مريم بنت الحسين
فيس بوك
تويتر
انستقرام
يوتيوب
بنتيريست