|
|
 بعشـــــــــوم الدروشـــــــــــــــــــــــــاب.......
|
اليَّمات الفاتت ... ولي حسِّي... دخلت الناس خُلعة وزلعة وخُوفة... ما مرقت وما أظنها بتمرق بي هينة... قالو ظهرت بعاشيم تعضعض وتساكك في الناس ... البعاشيم ظهرت في الدروشاب ثم أمدرمان ثم الحلفاية ثم الخرتوم.... وماشة وسارحة... واحدين قالو جاية من مصر.. واحدين قالو دي هجين بين كلابنا وكلاب أجنبية.. وانتجت النصايب دي.. واحد قال لي دا من عمايل الناس .. الناس عمايلا كعبة وتراهو ربنا سلَّط عليهم بعاشيمو... وواحدة من المؤمنات بترب البنية.. ترب البنية هم الناس البعد ما يموتو بيقومو بعاعيت.. قالت لي هذه المرا المؤمنة بترب البنية... ديل تيراب البنية لقو إنو الناس بقت ما بتخاف من البعاعيت عشان كدا جاتهم في النيولووك الهو بعاشيم.. حسِّي عليك الله يا ود عمي في بعاتية أكتر من محاسن الساكنة معانا في الحلة ديك؟؟؟؟.. وحات الله وما طالبني حليفة ديك الليلة كان عندهم بكا ... والله جنس شناة المرا دي وهي بتبكي ما شفتو في أنسية... والله أنا دي كان ما الحجاب اللابساهو دا كنت جنِّيت... ودخلّت إيدا في سدُرا ومرقت لي فلاش مجّلد بجلد كديسة وورتني ليهو... والفلاش محمّلة فيهو طلاسم الحرس من البعاعيت... وفي خضم الخوف والخلعة والزلعة من البعاشيم قالو في سواق ركشة كان سايق ليهو مرا معاهو ولما وصللت بكانا الدايراهو، وما سألها من القروش .. رفعت توبا ومرقت ليهو ضنبا.. واتخلع وخلّى ركشتو وقام جاري ولي حسِّي جاري.. وأكان قريب يكون في انجمينا ..... ذكر لي من لا أثق في روايتو إنو الضبعة وهي من فصيلة البعاشيم.. أنها لما تلم في الزول وتكون دايرة تاكلو أول حاجة تسويها تقعد تكلكلو لحدِّي ما يموت من الضحك....تقنية الكلكلة تقنية مبتكرة .. يا ربِّي ناس أجهزة الاستخبارات ما سمعو بيها ؟.. منكن يخلو الزول يعترف وهو تحت الكلكلة.. وخلِّي ناس حقوق الانسان يقولو ليهم إنتو عذبتو الزول دا.. في زول بيضحكوهو يكون بعذبِّو فيهو؟ العيب الوحيد في تقنية الضبعة دي إنو في حاجات ممكن تحصل من الكلكلة قبّال الموت .... ذكرت لي جدتي وقالت لي نحن زمان يا عادل يا ولدي ربنا مرقنا من أكلة.. يعني كُنّا ح نستاكل.... قالت إنه في ليلة شتوية مخضبة بالسواد والرماد .. استضافت جدتي وأختها عدد إتنين سحارية.. وكانن السحاريات يتونسن لحدِّي الصباح، ويخربن عيونن دي ما ضاقت الغمدة وبين كل جملة والتانية كانت الواحدة فيهن تتوحوح ودا الخلاني أعرفن سحاريات.. والوحوحة من أهم صفات السحاريات وتزداد عند الجوع! يعني لو في زول بايت مع زول ولقاهو بيتوحوح يعرف إنو دا سحاري ويستعد للأكل... وفي أثناء الونسة واحدة فيهن إدشت وإترعت ...ووقعت من خشوما حاجة .. وبهمس قالت لأختها" دنيقيسة أختي... أدان دهيش شوفتي؟".... يعني " دنيقيسة اختي أضان الدحيش شفتيها؟".... واستطردت جدتي التي ربنا مرقا من الأكل.. قائلة" أتاريهن يا وليدي هن متعشيات بي دحيش.. وشبعانات كان ما كدي كانن أكلننا أنا واختي"..... قلت ليها بركة الما أكلنك كنت أنا ألقى لي حبوبة وين؟....
|
|
  
|
|
|
|
|
|
|
|
Re: بعشـــــــــوم الدروشـــــــــــــــــــــــــاب....... (Re: Hisham Ibrahim)
|
سجيمان الساحريات ديل ما قابلن حبوبة صلاح غريبة على لسان حفيدها شابكانا ما تصوتوا إلا للبشير وكان شفتولكم زول غير البشير حا تتعبوا وتندموا عليك الله شوف المرا دي كان عندها لاب توب كانت عملت لينا شنو دي الحالة بتكتب through حفيدها صلاح غريبه مش كده.
من زمااااان زمن الخريف تربية الأسر السودانية لي أولادها كلها خزعبلات وتخويف وترهيب – المفروض في الحتة دي نمسك قوي وكل واحد يشتكي حبوبتو ويقول عليها إرهابية كانت بتخوفني والما عندو حبوبه اليشتكي حبوبة صلاح غريبه تراها ديك عايشه والله يديها طولة العمر والعافية كمان – كان داير تلعب ساكت يقولو ليك الدودو والسحار والبعشوم وكان ما شربت اللبن وبطنك ملانه تشربو إن شاء الله تطرشو أو يطق فيك عرق وإن بقيتاً ما شربتو أم قيردون أو أى إسم حركي لأي بعاتي سوف يشربه ويمكن كمان يكفتك ويعوج خشمك ويبقي سجمك. أها مع التربية دي إن إنزنقت ساكت في الليل تأكلها في حنانك وتأجل الواجب للصباح إذا كان التكل فيهو بعشوم المستراح محل النجاسه والشواطين الما كضب يكون فيهو شنو وطبعاً الكنيف عادة ما يبعد عن أقرب منطقة مأهولة بالسكان في البيت بمسافة 30 خريفاً يعني يا بي ركشه يا جكه لو لياقتك fit يا كمان إنت وصبرك وقوة تحملك كان قحيت أو عطست أو عترت ساكت يمكن يحدث ما لا يحمد عقباه وتبقى سيرتك هى الكلام.
أنا زماااااااان زمن الإنجليز مشيت ناس عمتي بت وهب وإتمسيت عندهم بالحيل وكان ما في قمره الضلمه دي يسألني الله أصبعك ما تشوفو وفي حتة كدي في غابة كبيرة فيها منطقة زي رأس أخونا الأدمنستيريتور ما فيها طندبايه ساكت قايمه وناس الحلة والحلال المجاورة مسمنها أم بطناً طويلة – أسألوا منها منصور المفتاح عنده أصحاب وأصدقاء من تلك الأمصار – أها أم بطناً طويلة دي قالو ليك مستفه بالبعاعييت والسحاحير والشواطين وأرجل راجل كان بقي سكران ما بشقاها بعد المغرب وحتى الدواب بتحرن وما بتمشي إلا تحت تهديد الضرب بالسياط واللكلكه بالكرعين زي الكابويات بس ديل عندهم حديدة مدورة في نعلاتهم قالو إسمها المهماز بهمزو بيها الحصان عشان يفتح ويجري صاح ساعة الضرب يصبح شديد المهم راكب فوق حمار عمي وهو حمار الصلاة على النبي باقيلو شويه ويكون فرس مش زي حمير اليومين ديل الحمار من شدة ما قصير تقول بمبر في بيت مريسه بالله كرعيك يجرن بالواطه أو تعقلن وتبقي زي المزنوق في رحلة من رحلات السنغافورية من منطقة الخليج إلى مطار changi الدولي ، أها وكت دخلت تلك المنطقة الجرداء (أم بطناً طويلة) بدأت الوساويس تنتابني وبدأت أسمع أصوت غريبة وأتخيل مناظر أمامي لبعاعيت وسحاحير يحاولوا يخوفوني وبعد شوية بديت أسمع صوت جنزير وحكيت أضاني لامن جابت شمع وبرضو الصوت ياهو الصوت وقدر ما حاولت أتلفت وراي أشوف دا صوت شنو رقبتي دي إتعسمت وبقت ما بتلف تقول مصبوبه وبقيت متل العنز البترضع روحا يقومو يجيبو ليهم علبة نيدو أو بسله قديمه يحشروها ليها في رقبتا وكل ما تحاول تتني رقبتا عش ترضع العلبه تعتر ليها ، المهم نفسي قام وقلت خلاص الليله شياطين وسحاحير أم بطناً طويلة ديل كلهم بسجمو خشمي وقدر ما حاولت أتذكر شي من القرآن أتحصن بيهو غلبني أجي أقول قل هو الله أحد أتكس في قل دي وما أقدر أقول البعدا أها وأنا في الحاله الشلش دي يقوم الحمار يفرمل أتاري وصلت أهلي وأول ما نزلت من الحمار يقوم يدنقر رقبتو في الأرض بعد أن حط الحمل الثقيل عن كاهله ويديها نفخه يتطاير معاها رزاز أها أقوم أسمع ليك صوت الجنزير أتاريهو كان مربوط في رقبة الحمار ومن غيظي وحماقتي أعاين لي الحمار وأقولو أمك وأسجو أم كف وأيدي طبعاً ورمت وإنفصلت وبقيت في جبيرة والطريقة التنومني مساهر لا الصباح لامن الديك عوعا عيني ما لاقن النوم ، وحبوبتي ما حبوبة غريبة قالت لي يا ولدي في زول عاقل بكفتلو حمار قلت ليها "كناطح صخرة يوم ليوهنها" قالت لي هووووي آجنا أعقل والله تمشي تنطح تور عمك إلا يعور عينك ولا يقدلك بنطنك.
إنت آ جنا ماك نصيح ولا شنو ، وإلى أن أجد طريقة لمناطحة التيران أتركك في بحثك الدؤوب عن السحاحير والبعاعيت وعشه أم ضنب والسعلوه وبقية أساطير الأولين.
نحنا غايتو مجتمع يفك الكضبه ويصدقا وبعدين يخاف منها وهي كضبه ، ومرات كدي بقول حبوباتنا ديل كان متعلمات كان ألفن كتب تقول لي أجاثا كريستي ودان براون إنتو بتعرفوا شنو
| |
|
|
|
|
|
|
|
|
|
Re: بعشـــــــــوم الدروشـــــــــــــــــــــــــاب....... (Re: سجيمان)
|
تقول الروايات أن البعشوم هو في الأصل فوكس ولما كانت هذه المصائب التي حلت بالدروشاب وشرق النيل قاطبة أصبحت تكارد في الركشات وتساكك في الهايسات وقرمت مؤخرة إبن السيدة التي كان إبنها ينام بجوارها وفجأة جاتا صحية لقت صغيرها ما جمبها – أريتك أم التاباني والياباني والتايواني – الشافع دا لو كان نايم مع أهل الكهف كان على أقل تقدير كلبهم صحا وسكا المصيبة دي ونجا الطفل من الضرب تحت الحزام. أها بي كده تنتفي حكاية أن الجاتنا في حوارينا بعشوم.
نجي نشوف الرواية التانية ناس كلاب بوليسية جعانه ، أبداً الكلب كلب ولو ترك النباح يعني كان بوليسي ولا كلب إشلاق ولا كلب خواجات ولا كلب حر ولا كلب عبد الجليل كلها كلاب وقالو لينا في المدرسه "جوع كلبك يتبعك" والزول سيد الكلاب دا لو ما قدامنا بي دفعتين بيكون عتر في الكتاب دا ، يبقي الشئ دا مو كلب ولا له علاقة بالفصيلة الكلبية ولا بالشكلة السموها يوم الكلاب وهي شوية شمارات بين نسوان قبيلتين إندلع بسببها دواس بين أهل اليمن وبين بني تميم ، وبرضو لما كان الكلب بالكلب ينبح كان لابد من ذكر براقش الكلبه الجربانه السعرانه التي نبحت وفضحت أهلها وفشلت الخطة بتاعت ألبد يا لبود وخلت ناس الـ CIA يتفشخروا أنهم أحبطوا محاولات إرهابية وإكتشفوا خلايا نايمة والكلب ينبح والشكر للخواجه.
أها الشئ الجا لا هو كلب ولا هو بعشوم ولا هي ضباع جات من الحبش غازية في هجرات غير شرعية أو قل لجوء.
وحتى ينجلى الأمر نتوقف ونسأل الله أن يلطف بالبلاد والعباد
| |
|
|
|
|
|
|
|
|
|
Re: بعشـــــــــوم الدروشـــــــــــــــــــــــــاب....... (Re: سجيمان)
|
سجيمان
شكراً على كرمك وتفضلك بأن أديتني الريموت كنترول أشوف الجزيرة ولا قناة حنبعل وبي كده بتأكد المقولة المأثورة
لوجئتنا لوجدتنا نحن الضيوف وأنت رب الدار (الغريبة دي عبارة ما أنفكت عالقة بالذاكرة كتبها فخري في كرت دعوة زواج بنتو ستيه البايره وحاتك مشينا وفي صقط يقطع النخره لغاية الحفلة ما إنتهت ما في شئ الغريبة الفنانه تقول يا أم العروس حسي وقدمي البيبسي ورغم البرد الشديد لا بيبسي لا إستيم تفاح ما ضقناهو ورجعنا لي دكان على موية فول ما لقيناها والواحد نام والمغسه جايه تشقو)
فلك الشكر والتقدير والإحترام ولدارك العمار ، لكين وجب على أن أتوقف فقد كمل نضمي فوق البعاشيم فأنا رجل أعشق الـ Breaking News ويبدو أن بريك البعاشيم قد خفت حدته بعد أن سحبت إتفاقية الدوحة ومقالدة البشير لي خليل على الهواء مباشرة الأضواء من قصة البعشوم برغم من المحاولات المستميته من زميلنا في المنبر الذي قال يسأله الله أنه شاف بأم عينه بعشوم مجندل بالقرب من جنينة عبود في بحري وهو ذات الصفحي الجاب خبر الهايس الدقشت في شارع المطار.
أها بي كده إنطوت صفحة البعاشيم على الأقل في تقديراتي وحساباتي وأنا الآن سوف أبرطع في الساحة السياسية مع صلاح غريبه وحبوبتو وبقية الساسه في المنتدى. دحين آخوي هاك ريموت كنترولك أمسكو عليك وخليني النلحق المواصلات أنا مكاني بعيد وقفاي أعوج وعصا ساااكت ما عندي أدافع بيها عن نفسي كان ظهر لي عتوت ساكت مركب ليهو مكنة بعشوم.
سعال:
إنت إن قلت لي البعشوم جّر بمشي
| |
|
|
|
|
|
|
|
|
|
Re: بعشـــــــــوم الدروشـــــــــــــــــــــــــاب....... (Re: سجيمان)
|
أنا خشمي أعضي بيهو جلابيتي ولا أقرأ بيهو آية الكرسي ، بعدين المصيبة دي قالو سرعتها لمن تفتح تصل لحوالي 64 كيلومتر في الساعة يعني ممكن بالراحة تسبق بص ود أب كمه وهو البص الوحيد الباقي من بصات بلدنا بعد أن دخلتها الحافلات والهوايس (جمع هايس) وبقية أمات أربعة عجلات وأمات تلاته ، وأنا أكيد كان بقيت زي أوساين بولت العداء الجامايكي ما بقدر أفوت المصيبة دي كان نجرت ساكت بتكتل حيلي وسرعتي بتقل وبتتمضمض بي دم عرقوبي يا أخوي هوي مداراة المؤمن على نفسه حسنه علا هسي خلينا مع ناس شيخ حسن ودكتور خليل والرئيس المؤمن لأنها دي الأخبار الحاااااارة الأيام دي وبعد ما ينفض مولد الإنتخابات بنرجع تاني ونعمل recall للضباع والبعاشيم أصلو ما عندنا شغله
| |
|
|
|
|
|
|
|
|
|
Re: بعشـــــــــوم الدروشـــــــــــــــــــــــــاب....... (Re: almulaomar)
|
بعد أن قالد خليل البشير وظهر الترابي على الهواء مخاطباً ناس المؤتمر الشعبي العام بي صديرو وقلع كما أخبرنا عبد الله عبدج القادر البعيو حيث تلاحظ أن الشيخ كل شويتين وأثناء الخطاب يقوم يجر شالو لاورا بالرغم من أن الشال ما خانق الشيخ ما علينا موضوعنا هو البعاشيم التي إنحسرت عنها الأضواء بسبب الإنتخابات وعدم وجود كاميرات كفاية لفبركة الأخبار بالإضافة إلى عدم وجود قروش لشراء أو قراءة أكثر من ثلاثة صحف في اليوم ، أها لقيت ليك كاركتير عن الزول الساكيهو البعشوم أتمنى أن يثري الموضوع ويزيح الغمة من عقول الأمة التي أصبحت تخاف من الكديسه بعد كانت لا بتخاف ولا بتتر قدام العينينم خدر - هوي خدر بضم الخاء عشان ما يكون زميلنا عضو المنبر - وتاني واحد خليهو يجي يقول لي الأسد النتر أو التمساح العشاري أو جاموس الخلا
| |
|
|
|
|
|
|
| |
سجيمان
Hisham Ibrahim
almulaomar
عبدالرحيم أبراهيم العبيد
المكاشفي الخضر الطاهر
فيس بوك
تويتر
انستقرام
يوتيوب
بنتيريست