|
|
 ترشح نقد شكلي وحزبه سيصوت لعرمان ومرشح الميرغني سينسحب للبشير والمهدي سيرأس مجلس الوزراء!
|
نعم هذا ما اتوقعه
الصادق المهدي الذي سيتنازل له ابن اخيه سينال اصواتا مقدرة في الانتخابات المقبلة ولكنها اقل من مقاعد المؤتمر الوطني خاصة اثر انضمام حركة العدل والمساواة اليه فجأة وبالتالي الظفر بمعظم دارفور الكبرى .
ياسر عرمان الذي يدعمه اليسار العريض بقيادة الحزب الشيوعي ، بنفس الصورة غير المباشرة ، سوف يواجه صعوبات في النجاح نسبة لسوء حسابات الشارع الذي لا يستجيب لمثل هذه الطروحات او غيرها الا تحت شرط صدورها من شخصية لها احد حضورين :
اما عسكري لا يعادي الاسلام على الاقل
او طائفي اسلامي .
هذا الفهم العميق لثنايا العقل الشعبي السوداني العريض هو ما ادركه الترابي بذكائه وواقعيته فاستتر وراء نميري تارة ووراء البشير اخرى
وحينما خسرهما خسر تعاطف الشعب بل حتى تلاميذه
بمعنى ان ياسر سوف لن يكون الثاني في الترتيب وانما الثالث بعد البشير والصادق
بل ربما يتم سحب ترشيحه لصالح البشير في اللحظة الأخيرة اثر ضغوط من جانب سلفاكير وملك عقار الذي ضمن ولاية النيل الازرق في اطار صفقة جعلت جنوب كردفان لمولانا محمد هارون .
واما حاتم السر فلابد ان يتنازل للبشير بايعاز من الميرغي ضمن صفقة تتضمن توزيع مناصب من جهة كما تتضمن وحدة الصف الاتحادي بمساعي البشير شخصيا وحزبه لجهة الصلة الوثقى بين المؤتمر الوطني وبعض تيارات الاتحادي .
العدد المقدر من مقاعد حزب الامة الملتئم سيضطر البشير وحزبه الى تشكيل حكومة قومية تفي بالتزامات المؤتمر الوطني التي ذكرناها ازاء مولانا محمد عثمان وحفز الوحدة ( اليائسة ) مع الجنوبيين عبر وزارات اتحادية وكذلك استيعاب حزب المهدي حيث سيتم ايكال منصب رئاسة مجلس الوزراء للامة ولكن ذلك ربما يتقلده مبارك الفاضل او دكتورة مريم الصادق ، لأنه سيصعب على السيد الصادق القبول بمنصب رئيس الوزراء في ظل نظام رئاسي يحد من حركته وفوق ذلك عقب هزيمته في الانتخبات.
هذا والله اعلم ..
______________________
اللهم اغفر لنا وارحمنا
|
|
  
|
|
|
|
|
|
|
|
Re: ترشح نقد شكلي وحزبه سيصوت لعرمان ومرشح الميرغني سينسحب للبشير والمهدي سيرأس مجلس الوزراء! (Re: عزاز شامي)
|
| Quote: ده استبصار ولا استشراف ولا تعبئة وجدان الناخبين أوبالأحرى تثيبطهم؟ |
عزاز شامي
السلام عليكم ورحمة الله وبركاته
دا شنو دا والله ما عرفتك
لوغارسون كمان؟!
طيب ياعزاز
اوعك تقولي لي ( دا شخصي وما شخصك )
بالنسبة لي الزي والصورة المنشورة والرأي المعلن كله نشاط عام يجب ان يخضع للقانون وللنقد
والقانون في الحالة دي احترامنا المتبادل
يارب يارب سلطني على عزاز دي
فأكون الآمر والناهي عليها وشوفني بعد داك حا اعمل فيها شنو
والله يا عزاز الا اخليك تأسسي جماعة ( كفاية ) ضد الما متحجبات !!!
وأما بخصوص سؤالك
فانا عندي اعتقاد كدا انو ربنا رازقنا بصيرة استشرافية
ان شا الله يكون الكلام دا صاح
قولي آمين
انت عارفة براك انا بحب دعواتك كيف وبثق فيها.
__________________
اللهم ردني وأمة محمد الى شرعك وزينه في قلوبنا وكره الينا الكفر والفسوق والعصيان واجعلنا راشدين
| |
|
|
|
|
|
|
|
|
|
Re: ترشح نقد شكلي وحزبه سيصوت لعرمان ومرشح الميرغني سينسحب للبشير والمهدي سيرأس مجلس الوزراء! (Re: عاطف مكاوى)
|
Quote: انت ما تقول
صوتوا للبشير والمؤتمر الوطني
وتريح نفسك ! |
عاطف اخوي
السلام عليكم ورحمة الله وبركاته
انا مرتاح كدا ياخ جزاك الله خير
وبعدين سبق وقلت ليكم احسن ليكم سقطوا الكيزان ما بدا لكم بس اتحاشوا سقوط البشير وعلي عثمان وعوض الجاز وقوش : سقوطهم شر مستطير
لكن هنا انا بستشرف زي ما قلت استاذة عزاز
ولو داير موقفي الحقيقي انا شيف ان وضع السودان يحتاج لحكومة على النحو التالي
رئيس الجمهورية : البشير
وزير المالية : عبد الرحيم حمدي بشرط ان يحفه وكلاء ووزراء دولة ومراجعون شيوعيون وجنوبيون
وزير الطاقة : عوض الجاز
وزير الدفاع : بكري حسن صالح/ او ضابط يختاره البشير
النائب الأول : سلفاكير
نائب الرئيس : د. خليل
رئيس المجلس الوطني: علي عثمان
بقية الحقائب الاتحادية توزع بين بقية الاحزاب حسب نسبتها في البرلمان.
وهكذا تكتشف انني ادعوا الى التصويت لجميع الاحزاب دون تغليب احدها غلبة ساحقة مطلقة لأن ذلك ليس في صالح خدمة الوحدة والاستقرار السياسي في ظرف عصيب جدا يحتاج الى التماسك السياسي والوطني
__________________
رب اوزعني ان اشكر نعمتك التي انعمت علي
| |
|
|
|
|
|
|
|
|
|
Re: ترشح نقد شكلي وحزبه سيصوت لعرمان ومرشح الميرغني سينسحب للبشير والمهدي سيرأس مجلس الوزراء! (Re: محمد عبدالقادر سبيل)
|
محمد عبد القادر سبيل قائم مقام الحرملك ..
الآمر الناهي ؟ لووووووووووووووووولز يضحك نهارك يا عملات محسن خالد ..
إلا تبقى ابوي في حياتك القادمة بس انا ناوية ابقى شجرة لبلاب في الحياة المقبلة ..
هاردلك ..
بعدين يا اخوي في دعوات كده فيها منفعة ليك ووبال على آخرين،
و المسلم من سلم المسلمون من لسانه و يده، داير لي الغبينة مالك؟
انت غض البصر ده ما شايلو السمستر ده كمان؟
Quote: اما عسكري لا يعادي الاسلام على الاقل
او طائفي اسلامي . |
نرجع لقدراتك الخفية للاستبصار، طبعا جماعتك كتر الله خيرهم شكلوا
لينا شعب بذاكرة مقدودة، و ووعيو الجمعي زاتو بقى مقدود - إلا من رحم ربي،
و بقيتوا تعرفوا مداخلهم – هم الشعب - و مسارب خياراتهم و تكضبوا عيني عينك
و تنكروهو دون ان يطرف لكم جفن كتجلي البشير عندما هتف بحرارة سائلا من تبقى
من الشعب "حصل كضبنا عليكم؟" و الناس قامت تبشر و تعرض هيييييييع هلا هلا .. لا .. لا ...
غايتو السيناريو الفوق ده بيصب في اتجاهين: انو يا اخوانا جنا تعرفوا أخير من جنا ما تعرفوا
و الثاني دس السم في العسل و تدي بيد و تشيل بيد .. برااااحة كده
حسي انت تحت تحت كده بقيت عرمان "معادي للاسلام"
و الصادق المهدي" طائفي نخب أو قطفة أولى ايهما اقرب للنية
و مرقت البشير من غير سوء من المعادلة "عسكري اسلامي" بس موهت سمممح وما قلت متقاعد
عافية منك ،
بتكيفني نباهتك!
انت قريت رياضيات وين؟
| |
|
|
|
|
|
|
|
|
|
Re: ترشح نقد شكلي وحزبه سيصوت لعرمان ومرشح الميرغني سينسحب للبشير والمهدي سيرأس مجلس الوزراء! (Re: عزاز شامي)
|
Quote: كتجلي البشير عندما هتف بحرارة سائلا من تبقى
من الشعب "حصل كضبنا عليكم؟" و الناس قامت تبشر و تعرض هيييييييع هلا هلا .. لا .. لا ...
غايتو السيناريو الفوق ده بيصب في اتجاهين: انو يا اخوانا جنا تعرفوا أخير من جنا ما تعرفوا
و الثاني دس السم في العسل و تدي بيد و تشيل بيد .. برااااحة كده
حسي انت تحت تحت كده بقيت عرمان "معادي للاسلام"
و الصادق المهدي" طائفي نخب أو قطفة أولى ايهما اقرب للنية
و مرقت البشير من غير سوء من المعادلة "عسكري اسلامي" بس موهت سمممح وما قلت متقاعد
عافية منك ،
بتكيفني نباهتك!
انت قريت رياضيات وين؟ |
شوفي يا عزاز
انا من ناحية شاطر شاطر ، لكن مشكلتي : الرياضيات والضجر من السكون
واقول ليك سر تحفظيه ولا تسيئي فهمه :
عزاز جيبي اضانك قريب ( انا ما بحب الحرية ولا بحب الديمقراطية السودانية) بس ما تكلمي زول
خاصة التكفيريين ديل( اقصد غلاة العلمانية ) !!!
طيب بتحب شنو يا سبيل ؟
بحب المسؤولية والعمل المبدع والانجازات والتقدم والتغيير نحو الاصلح والارادة التي تحقق ذلك وباسرع وقت ممكن .
بحب الأوامر الخيرة ( المعروف ) والنواهي ضد( المنكرات ) مما يعرفه وينكره الناس بالفطرة والايمان.
وطبعا مصدر الاوامر والنوهي دي ما اي زول اتاحت له الظروف ذلك مثل ( المنصب او الانتخابات او النسب الخ )
لا
هنالك اناس اختصهم الله تعالى بامامة الناس ( يعني رياستهم وقيادتهم ) بالفطرة وهؤلاء منحهم الحكمة والبصيرة وحب اصلاح الحال والعدل
تلك صفات لا يتوفر عليها كل الناس ، وانما لها مصطفون يمتلكون مواهب
اعتقد انا من النوع دا
واحمد الله عز وجل انو فضيلة ( الحق ) ليست ثابتة في مقام واحد ولا عند اناس بعينهم ولا في زمان وحد معين ( الحق متنقل ) بين الناس والامكنة والمواقف .
وهكذا اميل معه حيث يميل
دا الما قادرين يفهموه الناس الحولي
شوفي ربنا جعل الجمال في مصادر متعددة ومتباينة كيف ، فأميل معه حيث يميل، حاسر الرأس عند كل جمال
وشوفي الارض والكواكب والشمس تتنقل حتى في مستقرها نفسه تتصوري ( وَالشَّمْسُ تَجْرِي لِمُسْتَقَرٍّ لَّهَا ذَلِكَ تَقْدِيرُ الْعَزِيزِ الْعَلِيمِ ، وَالْقَمَرَ قَدَّرْنَاهُ مَنَازِلَ حَتَّى عَادَ كَالْعُرْجُونِ الْقَدِيمِ، لَا الشَّمْسُ يَنبَغِي لَهَا أَن تُدْرِكَ الْقَمَرَ وَلَا اللَّيْلُ سَابِقُ النَّهَارِ وَكُلٌّ فِي فَلَكٍ يَسْبَحُونَ )يس.
الخلق دي كلها ما راسية على بر : كل في فلك يسبحون )
الطغرائي قال :
ان الألى حدثتني وهي صادقة فيما تحدث ان العز في النقل
لو كان في شرف المأوى بلوغ منى ما جازت الشمس يوما دارة الحمل
اعلل النفس بالآمال ارقبها ما اضيق العيش لولا فسحة الأمل
وانا اقول لولا فسحة الفرص او لو فسحة التحولات والتطور
وانا شخصيا احب ربي لمثل هذه الاشياء البديعة
اقصد
هذه الفرص العديدة لممارسة التأثر والجنوح
طبعا الزول البليد حا يجي جاري يقول لي كيف بتكره الحرية وانت بتضجر من النمط وبتعشق التنقل بين الفرص عبر الزمان والمكان .. هل في ممارسة حرية اكتر كمن كدا يا متناقض؟
دا كلام بلادة ساكت
لأنو تنقلي دا مهما كان فما حا يخرج عن قيود الزمان والمكان والوسع ، سواء وسع الفرصة او وسع نفسي المتعلق بالقدرة والرغبة في التعاطي مع الفرصة المعينة الى ان انتقل منها ، وبالتالي فانا امارس الحرية المقيدة الخاضعة لارادة تقع خارج ذاتي
وبالتالي فان ما امارسه ليس سوى استهلال خيارات فقط
فالانسان مخير وليس حرا ، والفرق كبير
ذلك لأن المخير محكوم بعدد من الخيارات ومدى محدود من الرغبة والقدر على استنفاد خيار من الخيارات.
لعل هذا ما يجعلني اعتبر بلا جدوى السؤال المأزوم القائل : هل الانسان مخير ام مسير ؟
يا سيدي : مخير ولكن ليس حرا ..هه !
الناس ديل كانوا بلداء يا عزاز وللا شنو؟
الحر هو الله عز وجل ، والحرية صفة اصيلة من صفاته فهو غير محكوم ولا محدود ولا مخير وبالتالي فهو فعلا حر
ناسكم ديل شابكننا الحرية ، ونناضل من اجل الحرية ، ونحن احرار .. قولوا بسم الله وبطلوا الوهم
انا بسمي مطلبهم دا : الحريانية وليس الحرية وذلك في اشارة الى انها مجرد وهم مرتبط بالحرية اليتوبية ( بالمناسبة انا بعتبر افلاطون واقعي جدا في الجمهورية : دا الصاح بالمناسبة والممكن من خلال العسكر وكمان بحترم هيجل في اعتباره لنابوليون روح الوجود ونهاية الجدل الخاوتننا بيو دا!!)
ناسك ديل عايزين يكونوا مخيرين في الحقيقة ، لأنو مستحيل يكونوا احرار
اذا اتفقتي معاي : تعالي نقول ليهم ربنا من فوق سبع سماوات منحكم الخيرة وهداكم النجدين وما من حق زول مصادرة الحق دا.
بس بلاش لخبتة ، يعني ما ممكن تقول انا مؤمن مسلم وعايز خيرة من امرك ، فالأمر في الحالة دي امر الله تعالى ويجب ان تلتزم به . وامر الله واضح ابلج ومحاولة الالتفاف عليو باطل لجلج .
واخير بخصوص الزعيم الذي يحبه السودانيون والذي قلت من جانبي انه يبجب ان يستوفي احد شرطين :
فاما ان يكون عسكريا له كاريزما الزعامة ويحترم شريعة الاسلام
او ان يكون زعيما طائفيا كبيرا
هذا ليس رأيا مبتكرا ولا اقتراحا من عندي يا عزاز
هذا هو الواقع
فما التف هذا الشعب حول احد الا حينما يستوفي احد هذين الشرطين
وهذا تحديدا ما حدا بالازهري الى الاحتماء بالطائفية التي من دونها لا فرصة له للرواج الشعبي
وهذا ما حدا بالترابي للاحتماء بالطائفية تارة ( وصال المهدي ) وبالعسكر تارتين : نميري والبشير والزبير
المسألة دي محسومة مافي كلام
اي محاولات لا تطبق هذا القانون تبقى مجرد مضيعة وكت بس
وكان شايفة في الواقع شئ اخر غير المجازفات والاماني الطايرة ناولينيه.
ذكائك انا اتمنى اتحصل نصو ( ورغم ذلك نحن قوامون قومة تمام عارف ليه؟ أسأليني )
لكن هسع كدي اتحجبي وشيلي النضارة دي عشان امكن تقري الواقع وتاريخ السلطة عندنا بصورة اوضح.
فاما عسكري يحترم قيم هذا الشعب الراسخة
او زعيم طائفي مرموق
او الاحتماء باحدهما على نحو خضوعي تبعي.
او الفشل .
اخيرا
الا يعد استمرار البشير امرا مملا
الاجابة في العدد المقبل
_______________
ربنا لا تزغ قلوبنا بعد اذ هديتنا
| |
|
|
|
|
|
|
| |
محمد عبدالقادر سبيل
محمد إبراهيم علي
عاطف مكاوى
فيس بوك
تويتر
انستقرام
يوتيوب
بنتيريست