الشتاء *** شعر عزمى احمد خليل جيت ياشتا وياحليلنا نحنا من الشتا الذكريات والشوق هنا يعصر قلوبنا يفتتها الحفله والحلوات وقمصان الشتا الليل يجى والناس تفتش للغطه واصحابى صياع المدن يتدفوا بى برد الشتا يساهروا لى وش الفجر ما يحسوا بى لفح الشتا دفيانه روحهم بالجمال نديان صباحهم صيف شتا ويا حليلنا نحنا من الشتا ########## شايفك غريب هنا ياشتا وواحشاك كمان ذيى البلد ذى عاشقآ بيكتب رسايلو وحبايبوا ما بيجيبوا رد وين صفقتك على بابنا داك وريحك تنقر فيهو جد واصوات غناك فى كل حى ذى الكنائس يوم احد لكن هنا شايفك غريب ذى بحر ما لاقى مد الغربه جات قبلك هنا وملت رياحها فى كل حد وجيت ذى غريب شايل هواك والغربه مابتديك امد فى الغربه ما بتعرف ربيع ولا حتى تشعر بالشتا ويا حليلنا نحنا من الشتا ####### بردين على انا يا شتا بردك وبعدى من الاهل وبردك احنه على كمان الا البعاد لى بس كتل بتذكرك لامن تجينا فى ليل طويل ونجم افل الحله ترقد بدرى بدرى وانا والصحاب نحياك ازل نتناجى فيك ونغنى بيك ونقول خلاص بردك نزل والحاجه ديك ام الصغار باكيه بتفتش لى حلل جنياتا ما لاقين غطه وابو العيال سابهم رحل وخلاها ذيك ياشتا فى صمت تذرف دمعتها وده حالها ديمه فى كل شتا وياحليلنا نحنا من الشتا ####### هنا ياشتا ما ليك وجود ولا ناس تحسك وتبكى فيك قايل هنا ذى حال هناك لامن تجى بنتغطى ليك نتلمى فى صبحك دوام ونتدفى فى اوضتنا ديك امى الحنينه تسوى شاى وتصلى قبلو عشان مجيك وابوى يرتل فى الكتاب والبيت منور كلو بيك لكن حليلك هسه وين فى الغربه اسيان بالعليك برضك كمان كايس الدفو والغربه جد فضحت عينيك وفضلت تسال عن غطه يلاكا نرجع ياشتا لى ليلنا والناس وبهجتها وياحليل زمانك ياشتا ويا حليلنا نحنا من الشتا
الشكر لك دكتور صلاح لامتاعك لنا من حين لآخر بآخر ابداعات الشاعر المرهف الحبيب عزمى أحمد خليل ، وهذه القصيدة التى تقطر شوقا وحنينا للوطن صاغها بوجدان متأجج فأنا أعرف عزمى منذ زمن طويل وأعتز بصداقته وعلاقته الحميمة ايام الصبا والمراهقة وتواصلنا فى المنطقة الشرقية الا أن تركنا لأمريكا، صدقنى يادكتور صلاح الوطن يفتقد ابداعات عزمى واذكر ان صديقه الشاعر هلالى فى سهرة تلفزيونية تباكى على غياب عزمى من الساحة الغنائية فى السودان فلقد كان أحد نجومها البارزين فى عهدها الذهبى، أرجو تبليغه تحياتى وأشواقى ، اضافة الى ذلك كان الريس بكرى قبل فترة قد أعلن عن طلبه لمزيد من المعلومات عن مجموعة من المبدعين للتوثيق لهم وكان عزمى أحدهم ، ياليت لو تزود بكرى بعنوان عزمى فى امريكا للتواصل والتوثيق فهو يستاهل، مع مودتى لكم وتقديرى.
الأخ العزيز عماد أحمد لك التحية والتجلة ووافر الإحترام شكرأً لكلماتك، وتوعدنا وتبخل بالصورة، وتقبل سلام الشاعر المبدع/ عزمي مع خالص تحياتي د. صلاح البشير
الأخ العزيز هاشم محمد الحسن لك التحية والود ووافر الإحترام نشكر لك عظيم كلماتك، سلامك وصل للأخ الشاعر المبدع عزمي أحمد خليل، وهو شاعر غني عن التعريف، وهو على تواصل مع المهندس / بكري ، ونسأل الله أن يرد غربتنا جميعاً. مع خالص تحياتي د. صلاح البشير
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سيف الدولة كامل
هاشم محمد الحسن عبدالله
Emad Ahmed
فيس بوك
تويتر
انستقرام
يوتيوب
بنتيريست