سيد البلد .. سيدالبلد .. سيد البلد

Quote: } ناس الهلال ديل كلهم طلعوا (خلفاء)...نحن كنا قايلنهم واقفين علي (خليفة) براه. } خليفة ما فاضل ليه إلا يلبس ليه (عقال). } تقول من عائلة بني نهيان. } قلت ليكم الجماعة كلهم طلعوا (خلفاء). } هيثم مصطفي طلع (خليفة)...وديمبا (خليفة)...وعمر بخيت (خليفة)....والمعز محجوب (خليفة)...والدعيع (خليفة). } كلهم خلفاء. } خليفة طبعا هو خليفة بن احمد بن (شمعدان). } شمعدان دا زول صعب. } قالوا ليك في واحد قال لي خليفة ...عاوز لي (اقامة). } الهلال دا اصلو في اي مناسبة بكون خطر. } اي عيد ...الهلال بفوز فيه. } في المولد الهلال بكون حاضرا في حلاوة المولد ...حيث (جكسا)...الذي وزع السمسمية بهدفه الشهير. } وفي كل الاعياد ..يتجلي الهلال ..مع هلال السماء. } وانت بدر السما في صفاك. } في عيد العمال ...الهلال بنتصر. } حتي في عيد الحب ..وزع الهلال فرحه ليتوافق فرح الهلال وانتصاره مع بدايات تدشين الحملات الانتخابية. } هذه مناسبة كان لا بد ان ينتصر فيها الهلال ...ان يغالب فيها كل الظروف وهو يلعب بعشرة لاعبين ...وهو خاسر 0/2 ...ليتعادل ويكسب بالضربات الترجيحية. } هلال الديمقراطية ..توافق انتصاره مع تدشين الحملات الانتخابية ..ودشن موسمه الرياضي ببطولة ...رغم انها بطولة ودية ...إلا انها كفى انها كانت والهلال في طور الاعداد. } الهلال الذي بدأ اعداده قبل اسبوعين استطاع ان يكسب المحرق وهو الذي جاء لهذه البطولة بعد ان ختم موسمه في البحرين بفوزه ببطولتي الكاس والدوري. } وكسب الهلال بني ياس المدجج بالمحترفين والذي يلعب في خواتيم الدوري الاماراتي والذي يحتل المركز الرابع في دوري المحترفين الاماراتي. } الهلال بعد راحة طويلة ...وبعد غياب امبيلي ..وسامي عبدالله وحمودة ...ويوسف محمد ..وغيرهم استطاع ان يكسب ويفوز بهذه البطولة التي افرحت الهلالاب في الامارات وادهشت الاماراتيين بهذا العشق الخرافي الذي يحظي به الهلال. } كان اهل الامارات في دهشة حقيقية ..وفريقهم يحس بالغربة وهو يلعب في ارضه ..لكن كان بني ياس وسط جمهور الهلال. } كم عظيم هذا الهلال...كم جميل. } لقد كان الجميع يتحدثون عن سوء اعداد الهلال وعن تأخر مدرب الهلال. } وكان افضل المتفائلين ..يري ان موسم الهلال الجديد سوف يكون داميا. } كان الاحباط كبيرا ...والطاش وعماد الطيب والشاذلي يستقيلون. } والاحباط كبير ..ويوسف محمد يصاب. } وامولادي يعود ليملأ الصحف تصريحات وتهديدات. } وتسجيلات الهلال تجعل الجميع يشفق علي الهلال. } لكن الهلال غالب كل هذه الاشياء ..هزم كل الاحباطات ..وفاز ببطولة وهو في طور الاعداد. } لقد وضح لنا فكر كامبوس ...وبصمته تظهر في هذه المباريات بشكل واضح وظاهر. } شكل لم نشهده في الهلال حتي وهو يفوز في الموسم الماضي بالدوري والممتاز. } الهلال ظهر بشكل رائع وجميل وتميز الاداء بالحلاوة والسرعة وقد كانت هذه الاشياء غائبة عن الهلال في الموسم الماضي. } رغم ما حققه الهلال من بطولات. } الهلال في هذا الموسم جعل انتصاراته مرفقة بالاداء الجميل ..مما يجعلنا نقول ان الهلال سوف يذهب بعيدا في البطولات القارية التي سوف يشارك فيها. } اما البطولات المحلية ...فامرها محسوم لأن الهلال اضحي يفوز بها حتي لو كان الهلال في اضعف حالاته. } في الموسم الماضي افرغ الهلال كل دفاعه ..خالد جوليت وعلاءالدين جبريل وعمار مرق وريتشارد واسحاق كرنقو ...لكن مع هذا فاز الهلال بالدوري والكاس. } فاز الهلال رغم ان المريخ احضر لاعبا كلف خزينته 5 مليون دولار...ورغم ان المريخ سجل كلتشي مهاجم الهلال. } لكن كل هذه الاشياء لم توقف الهلال. } فاز الهلال بالدوري والكاس بالدعيع وخليفة واحمد الفاضل وصدام الدروشاب. } هذا يوضح قدرة الهلال وقوته ..يثبت سحر جماهيره التي بلغت الامارات وتغنت من علي البعد لسيد البلد. } تغنت لهذا الفريق الذي لا يعرف المستحيل ..ولا يبالي بكل العوارض ...ولا يرتهن للظروف. } لقد وضع كامبوس (الخلطة) التي تجعله ينتصر ..ويفوز تحت اي ظرف وفي اي مكان. } اسقطنا عامل الارض والمكان...لأن جمهور الهلال في كل البقاع ..يكسر الوحشة والغربة. } اسقطنا عامل الزمن ..لأن الهلال وهو متأخر 0/2 يتعادل ويفوز رغم انه يلعب بعشرة لاعبين. } رغم انهم في فترة الاعداد. } جميل ان يكون لنا (الفرح)...وان يكون الضحك والابتسامات حق يملك الهلال ان يوزعه علي عيون الناس ووجوههم. } رائع منك هذا الاداء. } جميل هذا الاداء ...عندما تخالط (هوبة) مهند الطاهر ..قهوة البجا ..فيكون طعم القهوة مخالطا لهوبة مهند الطاهر ....فنشرب (الهوبة) ونقلب (القهوة). } لا عجب من ذلك فهوبة مهند الطاهر تصلح ان تكون (تقاطعا) لطريق البهجة مع (شنقلي طوباية). } لا عجب ...وتمريرات هيثم مصطفي مثل طعم (النعناع)...لها عطر ولها رائحة لا تغيب عن الانف. } كأنك ترسمها ..اولا وتخرج (معادلاتها) ثانيا ..ثم (تفكها) ..تسحر فتدهش وتصنع (الهدف) قبل موعد حلوله. } جميل انت يا فييرا. } نري فيك الهلال ..قوتك ..صمودك ...حبك ...نخاصم بيه ونشاكل ...ونشيل بيك (شليل). } بصم ..ما بصم. } نطلع بيك الشارع ..ونتزاور بيك ...نتونس ...ونمشي في الرملة الدقاقة. } جميل انت. } وحدك تمنحنا الفرح ..في زمن انت فيه الترياق والتطعيم وصرفة السكر. } اليوم تشرق الشمس ...بالتوقيت (المهندي)...عند الساعة هوبة واربع دقائق. } حالة الطقس ...تميل الي الجو الربيعي (الخليفي)...ما بين درجة حرارة اقصاها هدف خليفة الثاني. } الفطور الليلة ...بي السمك ..مع (تمريرة) هيثم مصطفي الدافئة. } احدهم ذهب للطبيب يشكو من النظر والضهر والمصران الاعور وسيد البيت وسيد الدكان. } الطبيب كتب ليه هوبة قبل الاكل ..وهوبة بعد الاكل. } زولكم بقي متل الحصان. } الحصة الاولي في اية مدرسة ...حصة مفتوحة ...عن قتالية فييرا. } عن بصمتو...وشاي العصر. } الليلة (عيد الحب) علي كل العشاق ان يتبادلوا الهدايا هدف (خليفة بن احمد). } والله يا خليفة ...عقالاتك بقت تلخم. } لو كنت في مكان المريخ كنت شطبت (بلة جابر). } بلة جابر ذنبو شنو هسع؟. } بلة جابر كلامو كتير. } ملحوظة: بكرة يوم اخر. هوامش } وضح ان خليفة في الطرف اليمين سوف يعوضنا غياب يوسف محمد. } خليفة بقي يجيب اقوان. } الله يستر علي ناس كلتشي. } من هسع نرشح خليفة بن احمد (فالنتاين) هدافا للدوري الممتاز. } انتوا عارفين سادومبا عمل شنو؟. } سادومبا جاب لي اكرم الهادي سليم (الحصوة). } عارفين (الحصوة) دي من شنو؟. } عشان اكرم زحف علي الارض. } التراب جاب ليه (الحصوة). } قلنا ليك ما تاكل التراب. } خليفة جاب قون التعادل ...وجاب الضربة الترجيحة الاخيرة. } عشان تعرفوا ان اصابة يوسف محمد الله عوضنا عنه بتوهج خليفة. } علي شوية كدا كان خليفة سوف يكون هداف البطولة. } والله يا خليفة لو قلبت لينا (الهوبة) تكون ما خليت لينا حاجة. } عودة سامي عبدالله سوف تجعل دفاع الهلال اكثر صلابة وصمودا. } موقف الكروت الملونة التي نالها لاعبو الهلال كيف سوف يتعامل معها الهلال؟. } علي مجلس ادارة نادي الهلال مراجعة امر هذه الدورة مع الاتحاد العام ...حتي لا يكون موسم الهلال الجديد قبلة للطامعين الذين ليس لهم ان ينالوا من الهلال إلا عبر الشكاوي. } المعز محجوب مع عبدالرحمن الدعيع وصلوا لمستوي نموذجي. } حراسة المرمي ما عندنا فيها اي مشكلة. } خبر عاجل: المريخ لسع في (التمهيدي).