فارس الصافنات اللحرابة مدرب صنديد دار جعل سيفا سنين ومجرب راسيات الجبال امكن تقول تضطرب ثابت يالبشير لا بتجرى لا بتتهرب للضيفان ذبيحك دايما جليدو مسلب عطشان الطريق من فيض فضايلك يشرب بالنيل الطمح رازم خريفو مصبب بابك ما انقفل فاتح عديل مو مورب اب وجها صبوح عند الملاقاه يتب اب رايا سديد العمرو ما بكضب ما كشر يمين فى الضايقة ما بيسب مرحبتين حباب من خشمو ما بتغب عمل الخير تتمو فارس حوبتو ما كليت وقلت تعب للجار والعشيرة امين وحتى الكان بعيد فيض نبعو ليهو يكب ما اضضاريت وما اتواريت بتاتا ودايما ساطع فى سماك شهب فصيحا فى اللسان واضح فى البيان فكاك شبكة الوكرة ام لهيبا يهب فاقداك المجالس ومجمع الاخيار وكلام صدق طاعة وعبادة رب ما ضنيت بمال ان قلت قل وكتر ركازة الضعاف ان جار زمان وصعب تبكيك المتمة القبة والكردة والسيال اهل شجرة ورمال وترب فى الوديان هناك تبكيك صلوعاب وكروماب والكل فيك حزين ونحب من الحقنه لى بقروسى ليك اصحاب يا التلب اللزوم الليلة نجمك غاب فاقداك القبايل وبعدك رباها يباب فى دار الخلود موشح بالرضى والنعيم فى صحبة نبينا والاصحاب تعمك رحمة الرجمن وفى الفردوس مقامك طاب بفقدك يا البشير هطل الدمع كباب محزون القلب اضحى الزمن غلاب غرارة العبوس عزلت اعز اصحاب فاقداك العشيرة وكنت ساتر وباب
نم هانئا فى رحاب المولى عز وجل مع الصديقين والشهداء والصالحين وحسن اولئك رفيقا لقد كنت اخا برا رحيما مؤمنا ذاكرا شاكرا رئوما عطوفا فارسا صدوقا لا يشق له غبار
اخوك ابدا عمر النور عبد الله سكرتير رابطة ابناء المتمة بولاية الخرطوم
ونعزى اسرة الفقيد فى مصابهم الذى هو مصاب اهل المتمة جميعا وانا لله وانا اليه راجعون
لك التحية اخى وصديقى د/طه كروم اننا نفقد هؤلاء الرموز حيث يغيبهم الموت وتبقى ذكراهم العطرة ويبقى السودان احلى ما فيه عبق اشخاصه نساء ورجال وحتى الاموات يطلون فى دنيانا فتزداد تالقا ويزداد الوطن جمالا اتراه الحزن الجميل وجميل ان نحزن على من يستحق ان نحزن على فراقه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Alrayah Senhuri
د.يوسف محمد طاهر
SAIF MUstafa
فيس بوك
تويتر
انستقرام
يوتيوب
بنتيريست