|
|
|
 Re: يا بت أنا ود الحله (Re: almulaomar)
|
الملا عمر.. وين الحي بيك؟
حمد لله على السلامة
ياحليل ود الحلة لما كان بيعلن عن مشاعره بالصورة الشريفة دي ويتقبل الهزيمة بصدر رحب.
شوف ود الحلة هسع بسوي شنو؟ طوالي يا موية نار يا سكين تسكن الصدر..
يا حليل اولاد الحلة.. اما العشق داك اسكت خليه ساي.. الله يرحمه.
البركة في شوفتك..--
---------
انا ما سمعت الاوديو او الفيديو دا.. لكن العنوان حرك مواجعي..
تسلم اخوي.
| |
  
|
|
|
|
|
|
|
 Re: يا بت أنا ود الحله (Re: حليمة محمد عبد الرحمن)
|
شكراً حليمة على مرورك. أنا عايش ودايش داقس وبصراحة شغلتنا أموالنا بالرغم من الفلس الظاهر على ملامحنا.
حاولت أنزل الأغنية لكين يبدو أنني لا أجيد التعامل مع التقنية بالقدر جعلني أنا وحمار الشيخ والشيخ زاتو في إنتظار إشارة المرور لمتابعة السير.
الأغنية تغني بها فنان أثيوبي أضفي عليها الكثير من الجمال ، وفي الحتة دي بالذات غناها شريف ونادر وكانت برضو جميلة. رحم الله الأستاذ سيد خليفة.
محاولة تانيه إن نجحت فضربة حظ وإن لم تفعل يكفيني شرف المحاولة
http://www.sudanvoice.net/v2/GariWanaGaro.ram
| |
|
|
|
|
|
|
|
|
|
Re: يا بت أنا ود الحله (Re: almulaomar)
|
المُلا عمر
إزاى الحال ووينك يا زول
أحد الفنانين المتيمين كان يستبدل كلمة (فرحة) الواردة فى الأغنية بكلمة (طرحة) فى إشارة صريحة لطرحة بت (نجااضة) فى الحلة.
تخريمة:
نفس البنية دى كانت طالبة عضوية هنا ما عارف بكري أداها ليها ولا لا
عموماً لو حصل وبقت بوردابية (قبل الأرشفة) ليك على أمشى إرشيف الربع الأول لعام 2010 وكوبي& بيست.
تحياتى،،
| |
|
|
|
|
|
|
|
|
|
Re: يا بت أنا ود الحله (Re: walid taha)
|
وليد طه
تحياتي
أما عن ويني فأنا على طريقة الأغنية جاري وما عارف متين أكون جارو ، وزي ما عارفين أنا فاطي سياسة وصاقط (راسب) في التعليق السياسي على الأنباء وجني وجن قناة الجزيرة وبرنامج Opera مالو أها عيبوهو لي قال أسماء في حياتنا قال.
المهم الحته هنا بقت زحمة شديدة زي المولد وكلها أحزاب وحركات مسالمه ومسلحه ودي بالمناسبة ظاهرة كويسه بس الماكويس إنو كل واحد شايف نفسو على حق ومش بتمني للتاني الغلط دا بتمني ليهو الزوال عديل كده.
خلينا من السيرة الهم دي
قلت لي بكري ما فك الباس ثرو للبنيه إذا كانت بنفس الكلام الفي الطرحة أقصد الفي الأغنية دي نقدر نقول دي ما ياها الحساده زااااتا دي مش المفروض يدوها باسوورد دي يدوها باسورد ويخلوها تسبق الناس بي تلاته بوستات وعشره مداخلات (عملاً بأغنية فايت الناس مسافه يا ناس) وكل ما عضو يجي يدخل تجيهو رساله من بكري تقول ليهو أرشفه أو صيانه أو تعال بكره التوقيع بكري الفقرى.
سعدت بمرورك يا وليد طه
==
فلقة دماغ
بمناسبة السياسة إتفلسفت وجبت ليك كل كتب الإبتدائي وشكيت لي موضوع سميتو حزب سياسي وحاتك غطس وصل الحدود لولا أن تداركته رحمة زميلتنا عزاز شامي للبث في قعر المنبر إلى يوم يبعثون.
| |
|
|
|
|
|
|
|
|
|
Re: يا بت أنا ود الحله (Re: almulaomar)
|
ود الجيران
ما زال فى بعض الاحياء فى امدرمان ، الابيض ، كسلا ، القضارف ونيالا نفس الزول الجميل
البجى النفير يوم العرس ، ويوم البكا ويوم "ضرب الطوب الاخدر "
نفس الزول السمح البقيف فى الباص لبت الجيران ويحقب ويحقص جمبها "كانه ولى حميم"
شفتهم قبل ايام فى زواج بتى
الله على اولاد الحلة
لمن دخلوا البيت وترسو الحوش ونضفوه من الكان عليهولانه حوش كبير
يسلم ود الحلة الصافى النقى الامين على بنوت فريقه
لكين فى ود حلة عاشق وما قادر يقول
قالو فى بت سمحة فى الفريق منجضة العيال كلهم
يوم العيال جو مارين قدام بيتها لقوا الناس يبكو
ـ فى شنو هنا ؟
واحدة قالت ليهم سميةابوها مات
امانة العيال مافرحو فرح واحد منهم قال
ـ امك الليلة القلدى الليلة القلدى
حكيت القصة دى لزول صحبى وتصادف كنا ماشين بيت بكا زول صاحبنامشترك
مما دخلنا واخوات صديقنا الراحل دا شافونا وهاك ياقلدى
لمن طلعنا من بيت البكا صحبى وزوجته قالو لى "يعنى دى قصة تحكيها لينا ونحنا ماشين بيت البكا؟
لا عرفنا نقلد ولا نبكى
رحم الله الفنان الجميل سيد خليفة وازعم ان القصيدة للشاعر الراحل ابو امنه حامد عطر الله ثراه
تحياتى يا ملا
| |
|
|
|
|
|
|
|
|
|
Re: يا بت أنا ود الحله (Re: سلمى الشيخ سلامة)
|
الزولة الفنانة سلمي الشيخ
بصراحة كنت قايلك جايه هنا بتستردي حماركم والحمد لله إنو طلع ظني سئ في الحته دي ، فقد كتبت في ذات البوست العبارة التالية
| Quote: يبدو أنني لا أجيد التعامل مع التقنية بالقدر جعلني أنا وحمار الشيخ والشيخ زاتو في إنتظار إشارة المرور لمتابعة السير |
وقلت خلاص الليلة أسياد الرايحه حا يفتحوا خشمي وراسي شارعين بإعتبار أنني في مكان البقرة الضاحكة في الحته دي بالذات ، وحمدت الله كثيراً أنه ليس لديكم حمار وكل علاقتكم بهذا المخلوق كانت في عهود قد خلت وكان شعار سيد اللبن وبالتالي لم تعد لديكم رايحه تضطركم لفتح رأسي بهراوه أو طوبه أو جنزير معقود جانبه.
هي فعلاً ثقافة وعادة وإرث إجتماعي جميل ورائع سميه النفير أو العمل الطوعي أو الخدمة الإجتماعية أياً كان ، صحيح أنه مازال هناك وإن كان على إستحياء ، لكنه ومع شديد الأسف بدأ في الإندثار فلم تعد الروابط بتلك القوة حتى داخل الأسرة الواحدة ناهيك عن الجيران في الحى.
==
تخريمة
من منطق كل شئ زاد عن حدو ، كنا نعاني أشد المعاناة في عصور قد خلت من المراسيل ، فقد كانت فاطمه ..... ترسلنا في منتصف نهار تكون درجة حرارته قد شارفت الخمسين درجة مئوية لكي نشتري لها كيس تمباك ولما تكرر الأمر لإعتبارات الكيف والمزاج أصبحنا نمارس كب الزوقان والتعامل بالشفرات فقد أطلقنا عليها إسم العقرب ، وأيضاً هناك عم عثمان وهو رجل أرهقنا وقلب حياتنا إلى جحيم وبالتالي أطلقنا عليه إسماً حركياً تداولناه فيما بيننا وكان من نصيبه اللغم ، وهناك خاج فضل وأستحق عن جداره وإستحقاق لقب الشرك ، فمهما تخفينا وموهنا عليه يكون هو السباق ويفوز بمباغتتنا ويحبط كل خططنا وتكتيكاتنا.
سلمي خلاص حكاية الحمر إنتفت وحتى سيد اللبن الأيام دي عند بيك أب نوع تويتا منها العادي ومنها الدبل كابين وبرضو لسه بغشوا وبدوها كوز وبزيدو اللبن شوية مويه
| |
|
|
|
|
|
|
| |
almulaomar
حليمة محمد عبد الرحمن
humida
طارق جبريل
walid taha
سلمى الشيخ سلامة
فيس بوك
تويتر
انستقرام
يوتيوب
بنتيريست