|
|
 امواج الترحيب العكسي من لدنى اليكم
|
الاخوة و الاخوات اعضاء المنبر المحترمين
السلام عليكم
انا سعيد ان اكون بينكم فى يومى الاول هاهنا واتوجه بجزيل شكري وتقديري للمهندس بكري ابوبكر
على كريم الاستضافة واتيكم من الاخر لاعلن شكري لكل من رحب بي غير ان امواج شكري تمتد لتلفح وتغمر وجه
من لم يرحب ايضا فارفعوا القزاز يارعاكم الله .
لدي الكثير من الاصدقاء هنا بينكم من من جمعت بيننا الحقب و الاسفار و التقينا بعض الوقت الجميل هنا او هناك
متسامرين ومتثاقفين و اخلاء فى حب هذا البلد الجميل الطارد المضياف .... هكذا تستمر دورة حياة السودانى
فى المهجر لتمتد مثلا من شارع عائشة التيمورية الي بعض شواطئ الخليج ومنها يامرك الغراب
ان ترحل بعيدا بعيدا الى مرافئ البلاد الباردة
ياغراب البين قد طال السفر انقضى العمر ولما استقر
حان بعد السير القاء العصا حبط المسعى و سيري مستمر
اقتفى الدرب الذي اجهله تارة يعلو و طورا ينحدر
لا تري فى نهجه من معلم غير لمع الآل فى مد البصر
واهتزام الريح من بين لصوى يسفع الوجه لظاها المستعر
يا غراب .... هل وجدت البين فى اصل الكتاب
فتلوت الياس آى و سور ؟؟
نضر الله وجه الدكتور محمد الواثق قائل الابيات السابقة واحسب انه قد قالها فى الثمانينات هذا
قبل الطوفان الكبير وله ولكم منى العتبى ان كنت قد نسيت او اخللت بقافية على غير ما كان يشتهى اويتمنى .
اذن بهذا الفهم تمتد امواج الترحيب العكسي من لدنى اليكم و اسمحوا لى ان اختص ابناء بلدتى
بشئ من الحفاوه وابدا بابناء بارا ثم الابيض ثم اهل القاهرة و اسيوط ثم اهل جدة والدمام و تبوك
ثم اهل لندن ودبلن وجولوى.
كان زميلنا صديق ايام دراستنا بمصر يعرف نفسه بانه من ابناء مدنى ثم فى بداية العام التالى مع وصول البرالمه
انه من كوستى ثم كسلا و هكذا الى ان زالت عنا الدهشة حينما عرفنا ان والده الموقر كان يعمل فى السكة حديد ..
للذين كانوا يقراون صحيفة الخرطوم ايام التيه اواخر التسعينات
يمكننى ان اؤكد لهم بانه انا انا من كان يكتب و يعمل فى مكتب الصحيفة فى جدة
و كذلك فى صحيفة (المدينة) ايام الرائع د.مازن بليلة حيث تزاملت مع اخوة اجلاء
فى عالم الصحافة المكتوبة و تعلمت منهم الكثير المفيد فشكرا لهم و شكرا لكم وللحديث بقية ان شاء الله
ابوبكر
|
|
 
|
|
|
|
|
|
|
 Re: امواج الترحيب العكسي من لدنى اليكم (Re: احمد معتصم الطيب)
|
حبابك
انا من الرعيل الاول...بس ماصرت
ارحب بالجدد عشان مايطلبو نجدتى عند الزنقة
لكن عنوانك عجبنى,,كسر حاجز الملل
واكثر ما نبهنى كلمة( لدن ى)
كتبتها هكذا لامر يخصنى,,,
عموما خلينا نتصاحب على رقم فارق العمر البوردى
اها اجدع برواقة ونحن متابعين
مخلصك ابو لدن
رياض السعودية
| |
|
|
|
|
|
|
|
|
Re: امواج الترحيب العكسي من لدنى اليكم (Re: munswor almophtah)
|
| Quote: امواج الترحيب العكسي من لدنى اليكم |
حياك الله أستاذ أبو بكر ..
ومرحب بيك في هذا المنبر العامر إضافة نوعية ..
ملحوظة: كلمة لدني دي كلمة خاصة ولم ترد إلا في كتاب الله على ما أذكر ..
ولم يستعلمها قدماء الكتاب ولا المعاصرين ..
تجبنها الكتاب والخطباء لأنهم عرفوا قدرها .. وأنها من كلام الجليل القدير ..
بالله شوف غيرها يا أبو بكر ..
مع الود ..
جاد
| |
|
|
|
|
|
|
|
|
|
Re: امواج الترحيب العكسي منى اليكم (Re: Magdi Ahmed Elsheikh)
|
...................
...................
شكرا أخى الكريم كمال ادريس
وسمينا أول ونسمى تانى عشان الحبايب
والعمة يعنى ماشالله ما عارف طريقة اللفة دى بنلقاها فى قوقل؟
والعمدة مجدى ود الشيخ
يارفيق الايام الاول ..وأيام لا تنسى فى روكفيلد
ياخى مرة أفتح لينا السيرة فى بوستا مكررب
تعرف الواحد ما بتكون عندة مشكلة لو يوم لم فيك
عمر الجزلى ..ممكن بالراحه تقفل معاة شهرين
فى روكفيلد براهو ..
وبعدين ورينا الحركة دى بمعلوها كيف يا فنان
الكتابة الماشا بالجنبة ...عشان يعنى قلنا أ مواج
أهلنا قلنا كمان الترحيب مطر...
مشتاقين كتير ...رسل لى تلفونك
سلامى لعوض الكريم و لاهو معاى فى الفيس بك
خلاص بسلم عليهو براى
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: Abobakr Shadad)
|
الاخ العزيز الدكتور ابوبكر خليل الشيخ شداد
الف تحية وسلام.... لقد فرقت بيننا الايام وها نحن نلتقي في هذا المنبر
رغم انك اقدم مني باسبوع لكنني امد لك يد الترحيب
وهذه امواج الترحيب العكسي تنطلق
راجين منك الكثير علي هذا المنبر
لك كل الود
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: عبدالمجيد المقابل)
|
الاخ العزيز ابوبكر شداد
قال المثل صاحب صاحبك صاحبك
دحين اولاد عما ليك اصحابى "لزم" محمد وابراهيم شداد
محمد حامد كان استاذى واتصاحبنا بعد داك
ونفس الحاجة ابراهيم شداد
يا سلام عليهم الاتنين من تواضعهم وادبهم وعلمهم ومعرفتهم
اتمنى لك اقامة طيبة بيننا فى هذا البيت الذى بناه ابوبكر اسفيريا
وجعلنا فيه وبه اسرة تكاد تكون واحدة
رغم الاختلافات والتباين
لكنك تحس بالاخوة
مرحبا بك اخى شداد بيننا
قنبو طولا
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: سلمى الشيخ سلامة)
|
..
..
أهلا بأخى وقريبى الدكتور الرائع احمد القرشى
ومن أمثالك سيدى نستزيد أدبا وعلما وحسن خلق
والى الكاتبة الرائعة سلمى
مرحبا بك و سعدنا أيما سعادة بأصحاب محمد شداد و ابراهيم شداد
وهم كما تعرفيهم دائما يرفدون ايامنا بخير الناس و خير الصحاب
ويا سيدتى انما حللنا هذه المنابر ناشدين الكلمة الطيبة وعبق الاخوة
وألق التواصل بعد أن أصبحنا أمة فاقدة حنان ... نزغ الشيطان بين بعض بنيها
فاصبحنا هكذا هائمين بأحزاننا المؤجلة ..فاهلا بك وسهلا
والسلام اليك يامجيد وأنت تكتب اسمى كمن يريد ان يبيعنى قطعة أرض فى وطن
لا أعلم متى أعود اليه ..أهلا بطلتك المفرحة و أبتسامتك الرائعة يا صديقى ...
ودمتم يا أفاضل الناس .....
.......
.......
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: العوض المسلمي)
|
لا حولللللللللا و لا غوللللللللللا ..
د. أبو بكر شخصياً ..
ياخي بالغت و الله بالغت عدييييييل كدة ..
ياخي أقلو كلمنا قول أنا جاي و اللا جيت ..
الماسنجر دة عملو لشنو .. ما لي الرمتلة ..
جيت و لقيتنا شغالين بلنجات و ناطين جوزات وما شفناك مع العجاجة و الكتاحة ..
و الله زمان .. زمان .. يا دكتور ..
و الله أسعدني جداً وجودك هنا .. فأهلاً حللت و سهلاً نزلت و حبابك عشرة و جيدن جيت ..
و حقيقي يا أخوة د. أبوبكر خليل شداد زول جميل ..
ولد من بارا الخضار و الأبيض الجميلة زمن مولعة نار ( الحي البريطاني ) و من عبد الكريم حسين جعفر و زمن خورطقت الرائع .. درس الطب في أسيوط وواصل في أيرلندا .. طبيب صحافي و بجهجه الباكات أيام الزمن زين و الشعر مغطي الإضنين
ياخي إزيك ؟؟
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: عصام دهب)
|
....
....
الف مرحب بالعمدة الكبير العوض المسلمى
لك الشكر والتقدير على ترحيبك ونحن نسعد
بانا فى ضيافة العمد و النظار
ويا أخى وبلدياتى عصام أسعدتنى كلماتك وأخجلنى ماقلت وأرجو
أن يكون بعضه صحيحا ,لكنى على أية حال أطمئنك بأن الشعر لا يزال
يغطى مساحة مقدرة من الاضنين ..اما خورطقت فتلك أيام لن ننسى ذكراها .....
أتمنى أن نلتقى قريبا ذات مساء بهيج فى عروس الرمال لنذهب معا لملعب
التنس ثم قدورة ثم نادى البنوك أو المكتبة القبطية ونعيدها تارة أخرى تلك الايام لو تعود ...
اليك ودى وشوقى الذى يتمدد ويتفاعل ويتفاعل ويتفاعل تماما مثل (ريد) وخليك قريب ...
..
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: Abobakr Shadad)
|
طبعا أن خجلان جدا يابكرى انى اكون من آخر المرحبين
يأخى المفروض نتلقاك فى خشم الباب ونجر ليك البنبر ، ونتحكر نتذكر نيمتكم الظليلة ديك
تهفهف علينا ريحة دعاش السواقى وتراب حفرة الجاندى ، طبعا الكلام دا قريب من المزيرة بتاعتكم ( السبيل )
نتاوق ليك يابكرى وانت جاى من جيهة المدرسة الجنوبية ، نحن متحكرين تب فى بنابرنا وبنلعب الشطرنج ، طبعا انا قتلت وزير محمد خليل وقعد يعض فى اصبعة وبفكر تفكير عميق وهو يردد عبارته الشهيرة
عارفنى ما بعتمد على الوزير ، ومن البداية ما عندى مانع نلعب بدون وزراء
يازول تجيننا وتكرر السلام مثنى وثلاث ، ونحن بالزنقة ديك ما نجيب ليك خبر
اها اخيرا نتلفت ليك ونلقى كل حوش بكرى رحب بيك . . .
الله ينعل ابو الغربة والضهب يابكرى
ربنا يرجعنا للقرش والمليم ويصلح الحال
الف مرحب بيك و وتعال علينا فى ضل لبخ بارا دا عايزين نتفقدها جوه حوش بكرى الكبير
عايزين ننفض الغبار عنها ونتكلم عنها ونقول مدينة عسكر فيها ود النجومى ولليوم ليس بها ابسط مقومات الحياة الكريمة
نادى لينا ود القرشى وعيال العونى وما تنسى ابو النضال سيف الدولة احمد خليل
دايرين لينا بوستات كاربة عن طفلة المدائن وام القرى ، بارا الخضراء
فمرحب بيك قلم عرفناه ولسان خبرناها وقلب يتحرك بيننا بكل الحب والحنان . . .
مرحب يادكتور.
| |
|
|
|
|
|
|
|
|
|
Re: امواج الترحيب العكسي من لدنى اليكم (Re: الفاتح ميرغني)
|
أخى الاكبر عادل
لك الود كله والتقدير على ترحابك وانت تاخذنا عبر سياحة رائعة
فى عالم بارا الساحر الملون والذى حتما نعود اليه قريبا لا لكى نجتر الذكريات
الجميلة وحسب بل لنتنادى وكل الرائعين الذين أنجبتهم تلك الديار الى عمل
خلاق وجهد نافع ...لقد جعلتنى أتذكر تلك الايام بروعتها ومشكلتى أنى أتذكر
تلك الحقبة وتفاصيلها بأكثر ما أتذكر الاسبوع الماضى ...وقد دونت بعض التفاصيل
فى عمل سردى يشبه الروايه وان كان يعوزه الكثير من أدوات العمل الروائى ,أتعرض بجرأة
لا أحسد عليها لبعض منه انشاء الله لدواع معلومة ..... إذن تكون البداية
خلال الايام القليلة القادمة ...وننادى كل الرائعين
لك الشكر والتقدير ياعادل.
واليك أخى الكريم المبجل الاستاذ الفاتح ميرغنى
لك الشكر واطيب التحية وانت أيضا تأخذنى وتعيدنى الى عالم
(جريدة الخرطوم) الثر الذاخر بالمبدعين والموهوبين والذى خرجت منه
بخير الاصدقاء ولا اخفيك سرا باعتقادى أن تلك الفترة هى احدى مفترقات
التاريخ السياسى السودانى بخيره و شره , لعبت الخرطوم فيها دورا كبيرا ومهما فى جمع شتات
السودانيين والتقريب بينهم و سواء رضى الناس عن (الخرطوم) أم لم يرضوا فهذا لن يغير حقيقة
دورها الايجابى الكبير ودور القائمين عليها من أؤلئك الرائعين الذين ذكرتهم وآخرين
كان لى شرف العمل بينهم فى القاهرة وجده ولعلنا نعود لهذة السيرة عن ما قريب .
لك خالص المحبة و التقدير
| |
|
|
|
|
|
|
| |
Abobakr Shadad
طارق جبريل
احمد معتصم الطيب
abuguta
ابو جهينة
عماد الدين عبدالله
أبو عبيدة البصاص
محمد عبد الماجد الصايم
munswor almophtah
JAD
كمال ادريس
Magdi Ahmed Elsheikh
وجن
Ahmed al Qurashi
عبدالمجيد المقابل
سلمى الشيخ سلامة
OSMAN SAYED MOHAMED
العوض المسلمي
عادل سهل
الفاتح ميرغني
فيس بوك
تويتر
انستقرام
يوتيوب
بنتيريست