دة عمود النور ا من الليلة انا ح اجيب حجرى واختو هنا تحت العمود دة بجى اقعد فيه كل ما ازهج
وكان لقيت اى واحد قاعد فيه ليه كامل الحق طبعا دة مجرد حجر مجدوع تحت عمود فى شارع عام فى ركن هادى لبيت يفتح فى تقاطع الشارع العام وزقاق جانبى يؤدى لحارة شعبية عامرة بالحياة السودانية بكل ماتحمله سمات
من الليلة ولى قدام ذى عمود النور فى حلتنا زمان ح يكون المكان الوحيد الى ح ارتادو واترتاح كلما زرت هذا الوطن الافتراضى سودانيز اونلاين
مكانى المفضل والوحيد للانس والسمر ومكان لاكتساب الكثير من الثقافة العامة ربطى بما يجرى حولى من الاخبار السياسية والاجتماعية الرياضية اى شئ لو ما بالحوار بالمشاهدة والفرجة
يطيب الجلوس والحوار مع المارة الجيران الاهل والاصدقاء دون اعتراض من صاحب المسطبة الاسمنتية للحوش العم بكرى فهو لايمانع اذ ا لم نحدث ضجيجا يقلق منامه
تحت ضوء مصباحه الابيض الناصع سوف اكتب ما يخطر على بالى من تجاربى وافكارى المقتنع بيها دون حسيب الا اعراف الحارة التى يوجد فيها هذا العمود ولو لقيت روحى ما داير ابرطم بالكتابة براى ذى المجنون ومافى رواد حا اقعد اتفرج فى الشارع العام واتفرج شئ ركشات وشئ دفارات كل شئ يمر من هنا حتى كاسحات الالغام تمر من هنا وطريق الدروة يمر من هنا ايضا
عمود التور تعال ليه لو داير دون اذن او تكليف كما هو متبع فى بعض البوستات الاخرى ولن تطاردك الاتهامات فى مقاصدك ميولك او نواياك فى النهاية انت قاعد فى الشارع ما قاعد فى بيت زول اكتب ما شئت وحاور من شئت او لا تحاور ومباح المشاكل كمان بس ما تصحو عمكم بكرى عشان ما يكرشنا وكمان لازم نحترم الشارع العام
دة لو ما جاكم مولانا الجار وطرشق ليكم الونسة بعد حداشر وللسكرجية نصيحة يكونو حورفة عمك بكرى دة ممكن يشمها فيكم وتكون كارثة عشان كدة اعملو حسابكم ومافى داعى للحكاية دى بدون مناسبات ولانو احتمال برضو البنات البجو هنا من زميلات البورد لاى سبب كان انشاءالله لو دايرة تفتش اخوها او زميلها فى الجامعة او العمل تقوم تلقاكم مسنسنين وتقوم تاخد فكرة كدة ولا كدة وتجرح مشاعرهم خاصة بعضهن الما معقدنها ودايرة تقعد معانا برضو نحن اولاد حارة ومافى عوجة
تعال اكتب هنا لو داير دة مجرد حجر فى شارع عام
احس ليك من دقدقة ابواب الناس للونسة الساى. ساى لله كدة وفى اى شئ اتونس هنا فى العمود واكتب بالعفوية السودانية لا تكترث كثيرا للاخطاء اللغوية او تتعب نفسك دى حجر مجدوع فى شارع عام
انشاء الله تكتب فيه بالفحم ممنوع البول يا حمار بتكون شاركت فى نظافة الشارع العام
لو مشغول وما مداوم على التواصل ذينا دة مكانك يكفيك شر الحرج ويحفظ ليك ماء وجهك المهدرة مع بعض القوم الظالمون
وكان زهجان وما داير تسلم برضو نحنا ناس قدر ظروفك
الكويس انو الادارة المركزية مداومة على تغيير المصباح اربعة مرات فى السنة عشان كدة لمبتنا ما بتحرق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Ahmed Osman
فيس بوك
تويتر
انستقرام
يوتيوب
بنتيريست