|
|
 حـكـايـة حـاج سـومـيـت مـع الـخـواجـيـّة...
|
إنطلقت زغرودة فرح صاخبة من بيت حاج سوميت مسافرة عبر بيوت الحِلة لترطضم
بالجبل القابع في الناحية الغربية ليترجمها بدوره ويردها للحِلة في شكل صدى غازل
كلّ أُذن صاغية أو لآهية ليخبرها أنّ الكرير ود حاج سوميت نجح للجامعة. ثمّ أعقبتها
زغرودة ثانية وثالثة لِيتدافع أهل الحِلة إلى بيت حاج سوميت وحاجة البِخيتة لمباركة
نجاح ولدهن الكرير...
|
|
 
|
|
|
|
|
|
|
 Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
إستطاع الكرير بذكائه ونباهته أن يجتاز المرحاة الجامعية بتفوق ليواجه مرحلة من أصعب
المراحل في حياته، ألا وهي رحلة البحث عن العمل. رغم تفوقه لكنه فشل في الحصول على
عمل. تذكر الكرير في غمرة محنته تلك الزغرودة التى إرتدّت من قمة الجبل يوم نجاحه
وهو يرى آماله العراض ترطضم بجبال المحسوبية والرشاوي والفساد وترتدَّ إليه خاسئة
وهي حسيرة.
إلتحق الكرير بشركة (لآف)، وأصبح مدوّر طاحونة مع الخريجين في الأزقة والحواري،
والكل منهم يفكر في المخارجة إن شاء الله لوآق الوآق وقد توزعوا على الركشات والأمجادات
والهايسات ما بين سواق غدير وكمساري شِفِت...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
بعد عدة محاولات إستطاع الكرير أن يصل إلى إقناع حاج سوميت وحاجة البخيتة بفكرة
السفر إلى أمريكا البقت حلم الوليدات لحدهن، زي ما بتردد بت الحاج دايماً في الحِلة.
حاجة البخيتة مرقت الدِهيبات الداخراهن لليوم النفر ده وحاج سوميت رسّل البلد باع
عيدان الأرض والبِقيرات بعد أن حصل الكرير على التأشيرة لأرض الأحلآم.
مرّت الأيام كالخيال أحلآم ليجد الكرير نفسه في رحلة بين طيات السحاب كانت نهايتها
في مطار (جى آف كندي). إستقبله الأصحاب وأولاد البلد، وطوالي أخدوهو على
الشقة. بعد فترة رآحة لمدة ثلاثة أيام ما كان على الكرير إلا أن ياكل نارو ويواصل رحلة
البحث عن العمل التي بداءها في السودان.
الجماعة ما قصروا معاهو، شبكوهو ليك وصايا: شوف يا الكرير، البلد دى هنا ما زي
السودان. ماتمشي تعمل فيها قلبك حار يشوتوك.
: أسمع يا مان، الجماعة ديل هنا لو إشتغلوا معاك مفكات أعمل فيها ما سامع يا مان
إقنور زم.
: أعمل حسابك من الـ42 وهارلم، والبرونكس يا مان دي محلات ختره.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
أصبح الكرير متسكع بين البرادوي في منهاتن، وفلتون إستريت في بروكلن من دكان
يماني لدكان يماني حتى تحصل على شغل مع أحد اليمانية.
لم يكن الكرير مرتاح للشغل مع اليماني، نسبةً لأنّ اليماني بيبيع القناني. ظلّ مداوم مع
اليماني على مضض إلى أن تحصل على شغل مع يهودي في دكان لبيع الملابس
(ديسكاونت). أصبح الكرير مرتاح للشغل الحلال رغم إنه ساكن في برونكس والشغل
في بروكلن وبيقضي يومو كلو من ترين لترين.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
أبو صلعة أصبح وآفد رسمي على حاج سوميت وحاجة البخيتة من قِبل الكرير. الكرير
يشيل ويرسل، والحاجة ما مقصرة مع الحاج تشيل وترشد فيهو شى دمعة جداد، شى
لحمة محمرة، شى قراصة بالسمنة والسُكّر، تُرمسة الشاي مطنبجة اليوم كلو وسُكريّة
السُكّر مقوزة سُكّر، والحاج يشيل ويطعِم ويجغم،و يضرب في المِلحات والقراريص
والزلابيا. سكريهو طاير السماء، والدغت رادمو حد الردم، والرطوبة مخلياهو يجرجر
في كرعيهو يااااا الله. الكرير يشيل ويرسل في أب صلعة، وقدر ما يضرب تلفون
الحاج يشتكي من الأمراض.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
مرّت السنين وبداء الكرير يفكر في الوالد والوالدة والبلد، ودرب الرجعة. لكن يرجع كيف؟
لو رجع بدون ورق ما عندو طريقة تاني يدخل أمريكا. طيّب يعمل شنو؟
الجماعة نصحوهو إنو يتزوج زواج بيزنيس. والفكرة وقعت للكرير تب.
في رحلة البحث عن عروس ورق، التقى الكرير بمليسا. مليسا فتاة في مُقتبل العمر وعنفوان
الشباب، ممشوقة القوام، على قدرٍ كافٍ من الجمال، خفيفة الظل، وتعمل في مجال التمريض.
ده كلووووو الكرير ما عندو فيهو غرد، لكن مغرود بالحيل في الورق. إتفق الكرير مع
مليسا على 2000 دلار.
بدأت إجراءت المحاكم وكان لابُد أن تتخللها لقاءات بين الكرير ومليسا. دوّرت التلفونات
بيناتهن، وهاك يا لقاءات في المقهى الفلاني، في الحديقة الفلانية، في شقة مليسا في
منهاتن، ومدورين نقاش جاد بخصوص الورق. تكررت اللقاءات وبدأت الكُلفة تترفع
شويّة شويّة إلى أن شعر الكرير بعواطفه تنجرف نحو مليسا. ظلَّ الكرير يقاوم عواطفه
التي إعتبرها من عمل الشيطان، لكن يبدو أنّ شيطان العاطفة تملك مليسا من الجانب
الآخر، ظلت هي الأُخرى تحاول طرد الهواجس من دواخلها.
أصبحت كلما ترى الكرير تزداد ضربات قلبها فتردد بينها وبين نفسها: اووووه نو...
اوووووه ش........ت...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
كان لابُدّ من البوح والمصارحة لتصبح أُسطورة أبو الداردوق جد جد. بدل زواج الورق
أصبحت مليسا زوجة الكرير شرعياً، لتتحول بقدرة قادر من مراة ورق، لمراة راجل.
كان لابُد للكرير أن يشتقّ من إسمه إسم يكون خفيف على أولاد وبنات جون نسابتو. فقام
بتعديل إسمه إلى (كرج سوما) بدل الكرير ود سوميت.
بعد عدة إتصالات تردد فيها الكرير بمصراحة الوالد، إتوكل وراح فاكي ليهو البص.ثارت
ثورة حاج سوميت، والحاجة تحاول أن تهدي ثورته من خلف دموعها لكن دون جدوى.
صلايب السكري زادت والدغت طار السما، والمُسكن الوحيد كان أب صلعة.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
بعد أن تحصل الكرير على الجنسية قرر أن يصحب زوجته لزيارة البلد والأهل. حاول
الكرير المستحيل لإقناع والده السماح له أن يأتي برفقة زوجته لكن باءت كلّ محاولاته
بالفشل الزريع، وإنفتحت الواسطات والأجاويد على حاج سوميت.
حاج العوض: يا حاج سوميت إستهدى بالله. يازول البتسوي فيهو ده غلط، والزواج أصلوا
قسمة ونصيب.
حاج سوميت: يا حاج العوض ده كلام ده! دايرني كمان أخليهو يجيب لي الكافرة في البيت؟.
حاج العوض: يا حاج سوميت الله يرضى عليك لاتكسر خاترو، الولد مشتهيكم وداير يجي
يشوفكم.
حاج سوميت: اليجى برا. الكافرة دى لاتجي معاهو.
حاج العوض: عاد ده كلام ده يا حاج سوميت؟ كمان هو مو دايركم تشوفو مرتو.
حاج سوميت: شافا بلا يخمها. كمان قال أسما مريسة! شفته المصيبة الوقعت فوقنا يا حاج
العوض!؟. كافرة وأسمها مريسة ودايرني أدخلا بيتي؟ أنا عاد مانى حالف الكافرة مابتجي
داخلة هنا.
المهم بعد رجّة، وبعد تحنيس حتى وافق حاج سوميت أن تحضر مليسا مع الكرير...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
زفّ الكرير الخبر لمليسا التي لم تستطيع أن تتمالك نفسها من الفرحة، فهي في شوق شديد
جداً لزيارة السودان والتعرف على أهل الكرير رغم علمها برفض حاج سوميت لها. تعلمت
مليسا بعض المفردات العربية، وقامت بتجميع كميّة من الأدوية وموازين للسكري والدغت
لتأخذها معها لمساعدة الناس في البلد.
في اليوم المحدد شدّ الكرير ومليسا الرحال للسودان. كان الكرير طوال الرحلة يحاول تهيئة
مليسا للوضع في بيتهم ، وإستقبال والده لها الذي سيكون في غاية البرود. مليسا كانت متفهمة
الوضع تماماً ومهيئة نفسها للتعامل مع الصعاب التي ستواجهها.
حطت الطائرة في مطار الخرطوم، وظهر الكرير ومليسا. كان إستقبال الأهل للكرير حافل جداً،
عداء والده الذي إستقبله إستقبال عادي جداً، في نفس الوقت الذي إستقبل فيه مليسا إستقبال بارد
جداً. سلّم عليها بطرف أصابعينو، ولم يخفي كِجنته لها...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
مرّت الأيام رتيبة، وجو البيت مكهرب في الوقت الذي تحاول فيه مليسا كسر الرتابة وإزالة
الحواجز بينها وبين نسابتها، وحاج سوميت موجوع وجع شديد جداً وكلما سنحت له الفرصة
مع الكرير يعاتبو: ده آخر تربيتنا ليك يالكرير! تجيب لنا كافرة في البيت؟
الكرير: يا أبوي لكن...
حاج سوميت مقاطعاً: لكن شنو؟ شوف، تانى وكت تدور تجينا تجى براك. الكافرة دى لاتجيبا
لينا.
كلما يحاول الكرير يتفاهم مع أبوه، حاج سوميت يقاطعو: أها داير تقول شنو؟ بعد جبلنا كافرة
غزيتا في البيت!. الكافرة دى المرّة الجاية ما تجى معاك. كرهو ليك الإجازة.
قرر الكرير السفر إلى بورتسودان لمدة إسبوعين في مهمة، بينما آثرت مليسا أن تقعد مع
نسابتها في فترة غياب زوجها.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
حاجة البخيتة ما زالت متوصية بالحاج الذي يبدو إنه في يوم من الأيام ضرب ضرب شديد
جداً في زلابية الحاجة وتورت فوقو السكري والدغت والنحار وجميع أنواع الأمراض. حاولت
مليسا بحكم خبرتها في مجال التمريض المساعدة لكن حاج سوميت حلف الكافرة ما تقربو.
بعد إشتداد المرض عليهو أقنعوهو بأن ياذن لمليسا فوافق على مضض.
بدأت مليسا معه العلاج بروح ملآئكية ترد الروح والغمّة تزيلا، وقامت بوضع برنامج يومي
كامل لحاج سوميت يبداء بوجبة خفيفة في الصباح البآكر تعقبها تمارين رياضة خفيفة، مع
المداومة الكاملة على قياس الدغت والسكري. وجبة الغداء تقدم له مع مراعاة القيمة الغذائية
بعيداً عن مهيجات الدغت والسكري وكذلك العشاء. كانت مليسا تقوم بكل هذا بروح طيّبة
جعلت حاج سوميت يرتاح لها من جووووه قلبو، وكان يكون دوماً في حالة تشوق شديد لتمارين
الصباح الرياضية التي كانت عبارة عن السير لمسافات تتخللها عشرة ونسة ظريفة بين الحاج
ومليسا، يحاول فيها حاج سوميت تعلم بعض مفردات الإنجليزية من مليسا، ومليسا تشيل وتحفظ
في كلامو وهي تمازحه وتضاحكه مرددةً بعض المفردات التي تسمعها منه بلكنة مكوجنة،
وحاج سوميت يقول لها ضاحكاً: أمانة ماك ممسوخة.
وهي تردد: ممخوسة هاج، ممخوسة.
حاج سوميت كان عطشان وجاهو الري. فرهد وإنتعش وضاق طعم العافية بعد أن فارقته سنين
عددا. أصبح اليوم كلو دارش ونسة مع مليسا، وعادت البهجة لجو البيت، كما عادت الصحة
لحاج سوميت، وأصبح يفر سن سن بسبب وبلا سبب ضارباً بالقاعدة عرض الحائط.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
بعد أن قضى الكرير مهمته ورجع، ذهب ليجلس مع الحاج في الديوان، وكان قد لاحظ عليه
علامات الإرتياح وسريان الصحة في جسمه.
سأل الكرير والده مستفسراً: أها يا أبوي، إن شاء الله الكافرة دى تكون إنسترت معاك، في
سفرتي دى؟
ردّ عليهو حاج سوميت بسرعة وهو متعجب غاية العجب: كآفرة!!! يا ولدي على بالطلاق
كافرة أُمّك المدموسة بهناك دى... والله قال كافرة قال!!!!!!!!!
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: هند محمد)
|
Quote: ردّ عليهو حاج سوميت بسرعة وهو متعجب غاية العجب: كآفرة!!! يا ولدي على بالطلاق
كافرة أُمّك المدموسة بهناك دى... والله قال كافرة قال!!!!!!!!! |
ضحكت لمن داير اقع فوق مليسا ( بسم الله علي قفاي )
.
.
.
بعد تنتهي الاجازة واحد من حلين
يا عمك مشى معاهن
يا مات
ابداع يا معاوية
واصل
ولا انتهت ؟
عمك ما بعرف نهاية الافلام
وكان انتهت عندك كدي خليني اتم الباقي حقي
واوريك حب العجائز الصاح
تسلم معاوية
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: عبدالله ود البوش)
|
الأخ معاوية
تسلم على القصة الممتعة و دي بتذكرني قصة حقيقة... واحد عايش برة السودان و ربنا لماه في واحدة أثيوبية بت حلال فيها كل الصفات الممكن الواحد يتمناها في زوجته... رسل لأهله و طبعا رفضوا بشدة أن يتزوج ولدهم (الحبشية) و تزوج الولد بها و كان أهله غاضبين جدا من هذه الزيجة إلى أن اضطر والده لزيارته و طبعا في نفسه نفس ما في نفس حاج سوميت من نية التعامل ببرود مع زوجة ابنه.... عمك يصحى الصباح يلقى الجلابية مكوية و معاها البشكير في انتظاره يطلع من الحمام يلقى الجبنة و الشاي و معاهم فطور و تعامل بأدب و احترام... ياخد ليهو طلعة يرجع يلقى جلابية الصباح اتغسلت و اتكوت و قاعدة في الدولاب و الغدا جاهز... البيت و سته دائما في أحسن شكل و زوجها يعاملها باحترام و ينال أضعافه في المقابل. عمك رجع السودان و حلف لأولاده والله تاني الما بعرس حبشية لا ولدي لا بعرفه.
طبعا الحكاية كلها في تصوراتنا للشعوب التانية.
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
Quote: ابداع يا معاوية
واصل
ولا انتهت ؟
عمك ما بعرف نهاية الافلام
وكان انتهت عندك كدي خليني اتم الباقي حقي
واوريك حب العجائز الصاح
تسلم معاوية |
تسلم يا خال، يديك العافية،
أنا بعد عمنا سوميت فصل وغير رايو
حكايتى إنتهت، تعال إنت جيب المعتق...
مشكور على المرور.
في الإنتظار...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: الزبير بشير)
|
Quote:
الاخ معاويه
تحياتي
والله سرد رائع ، تبارك الله و ما شاء الله ، اتمني ان تكون فاتحه خير لروائي جديد بعد الطيب صالح و الدنيا حبلي بالكثير و الايام بتلد بدون مخاض .
الزبير |
أخوي الزبير، نعلك بخير؟
أشكرك كتير على مرورك الجميل،
بس لكن مجاملتك ما عندي ضهراً بيقدر
يقلها.
رحم الله أديبنا الطيّب صالح...
أم الوليدات إن شاء الله تكون بلغت
تمام الصحة والعافية؟
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: سيف الدولة كامل)
|
Quote:
ياكافي البلا ..أصلو مافي صباح ببلج عليكم
قصدي واصل الحكي ..والناس ديل رجعن من إجازتن
ولو داير تسكنن في السودان برضو
التفاصيل كتيرة ..
كن بخير |
أخوي عبد المنعم،
تعرف، الصباح لو لآح عندنا هنا
بتلقونا معاكم هناك.
الناس أنا خليتهم إتفقوا، وفكيتهم للذي
يمتلك ناصية الكلم ويقيني إنه يستطيع
أن يسرح بهم كيفما أراد وهو أنت
أخي عبد المنعم. أبقى فيهن عشرة، وأنا
في الإنتظار...
مساك الكريم بالخير...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
اخي معاويه
الحمدلله الزوجه بصحه جيده .
قالو في مره ( امرأه ) مجنونه قاعده تشليها حجار و تجدع في الشارع فاضي . جا واحد شاف المره بتجدع في الشارع فاضي و قف اعاين و مشي و تاني رجع اعاين قال امكن المره ده بتجدع في حاجه هو ما شايفها ، المهم مشي و جا تلاته اربعه مرات ، قامت المره قالت ليه هوووي يا ولي الجن دحين نحن بديناه كده . هذه القصه حكيتها عشان اوريك انو الشهره بتبدا كده . في محاضره في قاعة الشارقه الطيب صالح و الله لما بديت ما كنت قايل بكون كاتب بهذا الحجم .
اخي معاويه واصل في الكتابه و اترك الحكم لنا ، اخوانك ذواقين كلام .
تحياتي الاسرتك الكريمه .
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: معاوية المدير)
|
Quote:
الله على بساطة الفكرة وعمقها
تعرف اهلنا ديل بسيطين جدا
والامريكان برضوعندهم بساطة غريبة
عشان كدا "الطيبين للطيبات "
شكرا ليك على النص البشبه روحك السمحة |
يسمحن إيامك وأيام أحبابك يا أختي سلمى.
معذرة الإتصال كان مجوبك وما قدرت أعيدو تاني
إنشغلت مع صديقي الذي رحل.
صدقيني وجودك يحفذني كثيراً.
أشكرك جزيل الشكر...
| |
|
|
|
|
|
|
|
|
|
Re: حـكـايـة حـاج سـومـيـت مـع الـخـواجـيـّة... (Re: طارق جبريل)
|
Quote: اها ياوالد بقينا رجعه ..
أرجع انته الكافرة خلها معاي(هي قصدي الرجعت لي شبابي خلها معاي)
الاخ/ معاوية المدير
ذي مابقولة يوم بتقتلواً ليكم زول وأنا أولهم(من الضحك)
لك التحايا |
أهلاً بيكى أختنا ناهد علي،
نان إنت يا ناهد قايله عمك تاني البنية
بيفرط فيها بعد إجيه وبقى وشي ناس،
ما أظني يفكها للكرير بالساهل...
| |
|
|
|
|
|
|
| |
معاوية المدير
هند محمد
عبدالله ود البوش
Elawad
الزبير بشير
سيف اليزل برعي البدوي
سيف الدولة كامل
سلمى الشيخ سلامة
على محمد على بشير
ناهد علي
طارق جبريل
فيس بوك
تويتر
انستقرام
يوتيوب
بنتيريست