|
|
 التمباك عاده اجتماعيه جميله(والمراه البتمنع زوجها التمباك يجب ان تطلق)
|
التمباك يزرع في غربنا الحبيب ويوزع في كل انحاء السودان بلا استثناء
95 في المائه من الشعب السودان يتعاطي التمباك كل فئات الشعب السوداني
من رؤساء وطلبه وعمال وموظفين ومثقفين ودوبلوماسين وفنانين وشعراء
يلتفون حول هذا الكيف الذي يشترك فيه كل السودانين في صناعته وزراعته من
غير عنصريه او لونيه نساء ورجال معا..
مثلا اذا وقفت في محل تمباك خمسه دقائق فقط تمر علي كل قبائل السودان
بي مختلف عاداتها وتقاليدها .
اداب التمباك
للتمباك اداب وعادات غريبه شويه مقدره ومحترمه من كل السفافين مثلا
لا احد يرفض ان يعطيك (سفه)مهما كانت الظروف حتي لوكان الشخص الطلبها بينك وبينه خصومه
لاتوخذ (السفه) الاخيره اي بمعني لوكان في الكيس او الحقه اخر سفه تترك لي صاحبها احتراما وتقديرا
اذا كان في شخص نائم وايقظته وطلبته (سفه)لايتزمر مهما كانت درجه التعب العندو .ممكن يتزمر
لو صحيتو لي اكل مثلا .
لا احد يدخل يديه في الكيس او الحقه احتراما للتمباك من التلف وتغير الرائحه
والامثله لا حصر لها في اداب التمباك
قلنا التمباك عاده اجتماعيه جميله
كما معروف انو السودان بلد تكافلي وشعب اجتماعي ومعاشر بي صوره طيبه
العلاقه الاجتماعيه في التمباك بتبداء مثلا (يا ابو الشباب مابتسف ,لو سمحته جيب سفه,
الثاني برد جدا او صعودي ده مويه كثيره او انا بسف لاكن ما معاي وحاجات من النوع د ه)
ومن هنا بتبداء الونسه والدردشه ويبداء التعارف وتبداء الاشياء المشتركه بين هذين الشخصين
تظهر وتتطور تدريجيا بي سبب هذا التمباك
فليعيش السودان ويعيش التمباك الموحد السودانين...........
|
|
 
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: عبدالله حمد العالى)
|
الأخ الكريم عبد الله،
شكــرا واستطيع قراءة المزاح بين سطور بوستك هـذا...
على اى حال لا يمكن أن يمر هـذا البوست دون تعليق، فإن عادة التمباك (التبغ) من أسوأ وأقذر العادات
فى السـودان، وهى من العادات التى يجب أن تحارب يالقانون.
والتمباك ضرره أكبر من البيرة، لأن فى البيرة الشعيـر أو غيره من المواد المفيدة غذائياً ولا يمكن أن
تجد فى التمباك إلا كل مضـر، لذلك دينيا حرام، كما حرمها المهدى.
العالم المتحضر منع التدخين، تقول لينا تمباك؟
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: نجلاء سيد أحمد)
|
Quote: الفتوة دى اوعى تكون من الجماعة هههه
|
استاذه نجلا ازيك
والفتوه دي ما من الجماعه من السفافين براهم
وعشان انتي البت الوحيده
الدخلت البوست ده حا نوجه ليك كم سؤال جوابي بي صراحه ونزاهه
زي نزاهه اخوانافي الانتخابات
1! رايك شنو في التمباك والراجل البسف؟
2!لو راجلك بسف وكل ما اتكلمتي معاهو رفض يسيبو
قمت زعلتي وقلتي ليهو (يا انا يا التمباك) قام قال ليك
التمباك شعورك شنو؟
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: Abureesh)
|
Quote: فإن عادة التمباك (التبغ) من أسوأ وأقذر العادات
فى السـودان، وهى من العادات التى يجب أن تحارب يالقانون.
|
الصديق ابو ريش تحياتي ليك
العاده تحارب كيف؟ اذكان الدوبلوماسي السوداني (بسف)
والطبيب (بسف)والمهندس (بسف) والسياسي (بسف) والشماسي (بسف)
والوزير والغفير بعملو الحاجه دي يعني بي اختصار كل الشعب السوداني
ملتف حول العاده دي يبقي كيف تحارب في حاله زي دي نقترح (نتطورها)
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: محمد النيل)
|
Quote: فإن عادة التمباك (التبغ) من أسوأ وأقذر العادات
فى السـودان، وهى من العادات التى يجب أن تحارب يالقانون. |
أبو الريش سلام
مع إنى دايره أنوم...لكن قلت البريه دى ما بفوتها....
الأستاذ لما وقف ضد قانون الختان قال العادات الإجتماعيه تحارب بالوعى وما بالقوانين...
كيف ح تحارب عاده إجتماعيه بسن القوانين....الكوره فى ملعبك
بتفق معاك تماماً فى أنها من أسوأ وأقذر العادات
وحاجه مقرفه كمان لما يطلعو ويخلو القرطاس الورقى ( التفو) فيه السفه فى الواطه لست البيت
إخخخخخخخييييييييييي!!!!
مع إحترامى لسيد البوست وجموع السفافين
ال95% لا تعليق
إقبال
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: Egbal Elmardi)
|
الاخ عبد الله
سلامات اولاً احي شجاعتك في الاحتفاء بالتمباك سئ السمعة عند المراة السودانية
اجمل كلام انا سمعتو في الموضوع دا واحد قال والله البنات السودانيات ديل لو جابوا ليهم التمباك مغلف في شكل حلو ومكتوب عليهو صناعة امريكية كانوا حبوهو
بتفق معاك في انو السفة ممكن تكون نفاج لونسة وباب تعارف وانو هو ثقافة كاملة يعني بعرف انو الزول المايتجود بالصعوت دا منتهي خالص واصحابوا بيختوا فيهو رائي.
لكن ما بعرف سر الكره عند كل البنات تحديدا للصعوت احتمال لانو زي ماقال احد الظرفاء لانو في كيس ماا نيق ومكتوب عليهو الفاشر بدلاً عن المانيا او امريكيا
او احتمال لانو اغلب الرجال بيختو السفة بطريقة ماحلوة يعني قدام كدة والخشم فاتح شوية
او لانو دا عرف سائد بين البنات انو الصعوت دا عفن , لكن تاريخيا المراة السودانية ماكانت عندها مشكلة مع التمباك بل بالعكس كثير من الحبوبات كانوا من متعاطي التمباك
وهنا اذكر قصة لطيفة كانت لي حبوبة مدمنة صعوت وكل مايجي ولد من احفادا تقلع كيس التمباك حقو المهم كانت هذه الحبوبة تصر على صيام رمضان رغم كبر السن والسكري والسفة وعندما يحاول ابنائها ان يقنعوهو بعدم الصيام لانو اصلا صيامها لايجوز بسبب السفة كانت ترد الصيام بي درب والسفة بي درب
فكرة كره التمباك عند البنات ماعندها علاقة بالادمان والتأثير السلبي على الصحة بدليل تصالحهم التام مع السجائر
يمكن برضو انو صورة فارس الاحلام عند البنت السودانية هو الراجل الموظف او الاستاذ او الاكثر تعاطياً مع ثقافات المدن ودا المفترض طبعا مايفهم ماهو التمباك بس دا كان في فترة سابقة لانو حاليا حتى هذا الشاب المتمدن او الاستايل يتعاطي التمباك اذا بالخفاء في اشكال اكثر تمدناً مثلا يلف السفة بمنديل ورقي ويختها في الشفة العليا بميلان نحو اليمين قليلاً او اليسار قليلاً عكس اتجاه جلوس الحبيبة.
بالنسبة لي في فترة كنت اعوم مع العايمين في كره التمباك لكن بعد فترة بديت افكر فيهو بحيادية هو قطعا ماصحي وبرضو افضل انو الانسان يتفك من حصار الادمان بكل اشكالو لانو الادمان هو امان وهمي وبيدخل في سجن صعب الخروج منو
بس التمباك ود ناس ياخي هههههههه وشايلين حالو شيلة صعبة وانا متضامنة معاهو بس عشان الظلم دا
على فكرة زوجي يتعاطي التمباك ماقلت ليهو يوم خليهو حتى ايام الحب وهو كان عامل فيها ظريف الوقت داك يعني لو قلت ليهو خليهو كان ممكن يخليهو عشاني شهر كدة. ببساطة لانو مامن حقي انو اقرر ليهو لو هو اختار يفك نفسو من اسر الادمان انا الاسعد
على العموم شكرا على فتح الموضوع والشجاعة واتمنى يدخلو على البوست دا كل البنات ويقولوا رائهم.
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: زينب المهدي)
|
شكرا اخ عبدالله علي البوست ..
بالرغم من امتعاضي الشديد من مدخل استحسانك للتمباك ..
التمباك له مضار اجتماعية لاينتبه لها متعاطيه
1- يترك اثر رائحة كريهة في الجيوب الانفية والفم وتتضايق منها الزوجات بالتحديد جدا
2- متعاطي التمباك يفرز عرق زو رائحة كريهة جدا والشخص المتعاطي للتمباك يمكن معرفته في مكان مزدحم وخانق
3- سبب اساسي في الحموضة الدائمة والمستمرة
4- لايمكن الاقلاع عنه بسهولة ولا حتي علي المدي الطويل
بابكر
| |
|
|
|
|
|
|
|
|
 Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: عبد اللطيف السيدح)
|
Quote: البنات السودانيات ديل لو جابوا ليهم التمباك مغلف في شكل حلو ومكتوب عليهو صناعة امريكية كانوا حبوهو
لكن تاريخيا المراة السودانية ماكانت عندها مشكلة مع التمباك بل بالعكس كثير من الحبوبات كانوا من متعاطي التمباك
وهنا اذكر قصة لطيفة كانت لي حبوبة مدمنة صعوت وكل مايجي ولد من احفادا تقلع كيس التمباك حقو المهم كانت هذه الحبوبة تصر على صيام رمضان رغم كبر السن والسكري والسفة وعندما يحاول ابنائها ان يقنعوهو بعدم الصيام لانو اصلا صيامها لايجوز بسبب السفة كانت ترد الصيام بي درب والسفة بي درب
بس التمباك ود ناس ياخي هههههههه وشايلين حالو شيلة صعبة وانا متضامنة معاهو بس عشان الظلم دا
على فكرة زوجي يتعاطي التمباك ماقلت ليهو يوم خليهو
|
أهو ده الكلام ولا بلاش
زينب لو في منك عشرة في السودان كان حالنا انصلح
يا بخت زوجك بيك
ما تدينا كده زيارة ختافية كده في البيت!
| Quote: الصيام بي درب والسفة بي درب |
ده كلام عجيب وبولد سؤال:
هل السفة تبطل الصيام؟ والدليل
| Quote: واتمنى يدخلو على البوست دا كل البنات ويقولوا رائهم |
دي ياها الكتاحة ذاتها القلناها
يا اخوي ما تفرح الكتاحة في الطريق
تحياتي
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: منتصرمحمد زكى)
|
| Quote: واداه سفة من تمباك خاتي فيه هبهان |
يا الخبراء
كدي ورونا خلطة الهبهان دي ضروري بالله
أنا في الرياض هنا لي كم سنة قاعد أمطر براي
بجيب معاي كمية معتبرة من الجاف كل مرة
Quote: بريدك ما فراغ مني
ولا ريق العشم جف
ولافي لحظة اتجليت
وقام جاني الكلام صدفة
بريدك عن وعي وادراك
وعن عرفة
وبريدك ريدة مختلفة
وبريدك انتي يا ( السفة ) |
تسلم يا بيناوي
الكتاحة لسع!
محمد أرباب
ده عشق قديييييم يا أخوي
إنتو صاحب البوست زاق من الكتاحة ولا شنو؟
تحياتي
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: الشفيع وراق عبد الرحمن)
|
يظهر إنو مافي كتاحة
نتوهط
Quote: ما اظن في شي ابشع من التمباك
وطريقة السفة وشكل المتعاطي |
ليه كده يا تسنيم
ما كان العشم
ندعو الله يلمك في واحد سفته "دقار لوري"
ده موضوع تحت اسم
{لو ما فاطر ما تخاطر}
Quote: .
لو لا شذاك تشتت أفكارى …….. فغدوت ذو عقل بلا تذكار
ما إن وضعتك فى فمى متفتتا ……. حتى خرجت كهيئة الدينار
لك نكهة من غير نار حلوة …….. لا كالسيجارة نثيرها بالنار
عمرت بك الأذهان حين عمرتها … صدق الذى سماك إبن عمارى
وممكن نشرح لناس (الشهادة العربيه ) هذه الابيات :ـ
فعندما يسف الشخص (السفاف) الصعوط يشم أولا الكيس (أو الحقة) -وغالبا ما تكون من نوع علبة النيفيا القديمه- فيتلذذ بالشذى فى المرحلة الأولى للكيف قبل السف ، وهنا يكون الشخص فى حالة من الخرم (بفتح الخاء والراء وتسكين الميم) عجيبة لدرجة ذهاب عقله .وبعد ذلك يصف الشاعر طريقة رمى السفة داخل الفم (ودى بعملوها الحريفين بس) يعنى الجماعة البدردموا السفة ديل ما حريفين وكذلك البلفوها ويدلعوها فى منديل كلينكس . وطبعا يخرج الصعوط (مرحلة تف السفة) مصفر اللون بعد ذهاب المفعول (أى إبتلاع النكهات المختلفة فيه من عطرون وغيره وغيره …. وذهابها الى داخل المعدة مباشرة) فيخرج فى شكل مدردم ووصفه هنا بالذهب (الدينار) . كما مدح النكهة والتى هى جاهزة وليست تشعل بالنار كالسيجارة . كما وأن الصعوط يعمّر الأذهان حيث تذهب الخرمة ويأتى الكيف العجيب الذى قد يساعد السفاف فى زيادة الإنتاجية فى العمل |
منقول
تحياتي
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: الشفيع وراق عبد الرحمن)
|
تحياتي ياصاحب البوست
طبعا موضوعك شيق للنقاش والله بي كل صراحة تلقي دايماً الناس البسفو والبسجرو
ناس انانيين شوية الواحد مابقدر شعور الشخص الاخر شنو هل بضايق ولا لا
يعني انت تكون في المواصلات وواحد يطلع ليك الكيس والريحة تشرقك . ولا حياة لمن تنادي
وبعدين التمباك باثر علي رائحة الفم اولاً والتعرق ( يعني رائحة الزول البسف بتكون مامحبذه)
انا زوجي كان بسف وماحصل سف قدامي احتراما لكن بعد دا كلو لمن يكون سف والله بعرفومن رائحة العرق .
وبتمني من كل الشباب يتجاوزو الادمان ويكونوا عندهم العزيمة للتخلي عن العادة السيئة دي .
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: قاسم المهداوى)
|
استاذنا زمان في المتوسطة برسلنا بدينا حقتو وقرش بنجيب ليهو التمباك وكان كاتب علي الحقه"حبك نار"
صديقنا مسافر من الخرطوم للمناقل ونسي يشتري التمباك وتحرك البص وفجاة خرم للسفه تلفت يمين شمال ماشاف زولا سافي فقال
استخدم فراستي فراي جاره وتمعن فيه وتوسم فيه الخير وساله اللخو يابن العم بتسف؟؟؟
فرد عليه: من الاصلي
وقديما قيل السفه ولاصمة الخشم
ومن حوارات السفافين قال احدهم اديني سفه فقال الاخر وكان راسك لفّ
وقال اخر لجاره اديك سفّه.
فرد الديك كمان بسف يخته كيف في خشمو العامل زي المقص
التحية لصاحب البوست وفي زول جنبي وصاني ليك قال قول ليه كضبا كاضب النسبة هي 99.9%
| |
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: مطر قادم)
|
| Quote: لاتوخذ (السفه) الاخيره اي بمعني لوكان في الكيس او الحقه اخر سفه تترك لي صاحبها احتراما وتقديرا |
افندي مشى غرب السودان وصعوطو كمل
شاف واحد طلع الحقة
ادينا سفة ياخي
اداهو الحقة
فتحها لقاها سفة واحدة
عاين ليهو وقال : دي سفة واحدة ... اسفها ؟
صاحب الحقة :كان سفيتا بطعنك وكان ما سفيتابطعنك
الله الله الله دي ورطة شنو دي الوقعت فيها دي
اتلفت يمين يسار شاف واحد من جماعتو ناداهو
ياخي تعال حلني من الورطة دي
لقيت سفة واحدة في حقة زولك دا وقال لي كان سفيتا بطعنك وكان ما سفيتا بطعنك
فرد عليه وقال ات سفها كان طعنك اني بنطعنو وكان ما طعنك اني بنطعنو
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: عبدالله ود البوش)
|
كرهتي في الدنيا التمباك وريحته
لكن مابقدر اقول ليك اني ممكن اخت نفسي في مقارنة مع التمباك
الحمد لله زوجي معافى من المكيفات
وهو نفسه بتقزز من التمباك
لكن مره حكى ليه واحد قال لي شفته مرتي دي اول ماعرسته قالت لي يا أنا يا التمباك قلت ليها التمباك طبعا
وطبعا الراجل البقول كلام زي دا بسقط من نظري تماما
ممكن يقول ليها والله أنا حا احتاج لزمن عشان اسيبه أو دي عادة متعود عليها من ماقمت
والمرأة بصبرة وحكمته تخليه يتخلص منها
وعلى فكره ممكن التأثير يكون أكبر قبل الزواج في فترة الخطوبة وقت كل الطلبات بتكون مجابه فتخيره بينه وبين التمباك
وهنا الموازين بتنقلب لكن برضو ممكن تكون ما مضمونه لانه ممكن يقول ليها سبته لكن يكون بسف بالدس
على العموم هو في نظري سلوك غير حضاري
(والمراه البتمنع زوجها التمباك يجب ان تطلق)
واكيد المرأة هي التي لالاتتشرف ان زوجها يكون (بسف)
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: محمد الشيخ أرباب)
|
Quote: ما اظن في شي ابشع من التمباك
وطريقة السفة وشكل المتعاطي
عامكم سعيد وخالي من التمباك |
القال ليك منو..؟
في يا زولة ..
في البنقو والخمرة والمريسة والمخدرات
ـــــــ
تحياتي صاحب البوست المدردم ..
أهم حاجة في التمباك ده إنك ممكن تتناولو في أي زمان وأي مكان ..
في الطيارة .. في meeting .. في إمتحان ومن غير ما يحس بيك أي زول ..
عليك الله سوعال .. التمباك ده بعدين بكون Available وين ؟؟
لي ناس الجنة وللا التانين ؟؟
..
ود عما لينا رباطابي أول ما إتعلم التمباك قال لي
أنا ندمان على أي يوم ما سفيت فيهو 
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: محمد عمر جبريل)
|
تحياتي
أتذكر الروايات عن البحارة الأوائل الذين وصلوا لجزر المحيط الهادي في عصر الكشوف الجغرافية والتي لم يكن أهلها يعرفون تبادل القبلات، ولقي البحارة الأوربيون استجابة هائلة من فتيات الجزر اللائي اشتهرن بجمالهن عندما استعملوا التقبيل كوسيلة لاجتذابهن!
التمباك انتشر في السودان قبل أن يكتشف السودانيون التقبيل، في زمن كان الرجل ينام فيه في الديوان في حوش منفصل عن حوش النساء، حيث يمكنه أن يحتفظ بجواره بشئ كريه الرائحة كالتمباك دون متاعب، أما في زمن سرير الدبل والتقبيل فلا مكان للتمباك!
مالم يقم باحثينا باكتشاف طريقة لإزالة رائحة التمباك الكريهة، الغريب إن إزالة الرائحة الكريهة جزء أساسي من صناعة السكر، لماذا لم يفكر أحد في تطبيقها على التمباك وحتى الكول؟ حينها ربما أمكننا أن نصدر هذه المنتجات لبقية العالم!
| |
|
|
|
|
|
|
|
|
|
Re: التمباك عاده اجتماعيه جميله(والمراه البتمنع زوجها التمباك يجب ان تطلق) (Re: محمد عثمان الحاج)
|
| Quote: مالم يقم باحثينا باكتشاف طريقة لإزالة رائحة التمباك الكريهة، الغريب إن إزالة الرائحة الكريهة جزء أساسي من صناعة السكر، لماذا لم يفكر أحد في تطبيقها على التمباك وحتى الكول؟ حينها ربما أمكننا أن نصدر هذه المنتجات لبقية العالم |
محمد عثمان مالك عايز تخربها علينا
يا أخوي المزة والكيف كله في الريحة العبقة الجميلة دي
شكلك يا أخوي ما سفيت أو ما كييف
أهم شيء الزول يشم الحقة ولا الكيس قبال ما يدردم
التمباك والملوحة ،أهم شيء الريحة
:مالك خليتي العريس اللقطة ده
:لقيتو بسف تمباك
:ما ليك حق ،والله حتى لو بسف ملوحة ما أخليهو
تحياتي
اقتراح مرفوض
| |
|
|
|
|
|
|
| |
عبدالله حمد العالى
ismeil abbas
Abureesh
Dr.Elsadig Abdalla
أبو عبيدة البصاص
نجلاء سيد أحمد
د.يوسف محمد طاهر
خالد عبد الله محمود
الشفيع وراق عبد الرحمن
Mohamed Yassin Khalifa
محمد النيل
انس التوم احمد
Egbal Elmardi
زينب المهدي
بابكر عثمان مكي
Akram Omara
عبد اللطيف السيدح
محمد الشيخ أرباب
ياسر بيناوي
منتصرمحمد زكى
وجدان جمال
قاسم المهداوى
مطر قادم
عبدالله ود البوش
وجن
عبدالله الشقليني
مزمل خيرى
محمد عمر جبريل
سفيان بشير نابرى
فيس بوك
تويتر
انستقرام
يوتيوب
بنتيريست