|
|
 أقوال د . أنس العاقب فى محضر المركز .. لماذا قرر العودة للغناء بعد ان توقف لمدة 30 سنة ؟ .
|
أستضاف صالون الخاتم عدلان الدكتور أنس العاقب فى أمسية الاحد 10 يناير 2010 .
د. والعودة للغناء مرة آخرى بعد توقف دام لمدة 30 سنة .
تحدث وقدم نماذج لأعمال قديمة وجديدة .
وكان فى الحديث شجن واصرار .. كان فى الحديث درس , درس ان الأنسان من الممكن ان يفعل ما يُريد وفى اى مرحلة عمرية , يفعل ما يقتنع به , دون أعتبار الا لتحقيق الذات , وباصرار لا يعرف اليأس , وان البدايات الجديدة مُمكنة .
...........
تلخيص الأمسية والتحرير لموقع سودانيز اون لاين .. شاهين .
|
|
 
|
|
|
|
|
|
|
|
Re: أقوال د . أنس العاقب فى محضر المركز .. لماذا قرر العودة للغناء بعد ان توقف لمدة 30 سنة ؟ (Re: مركز الخاتم عدلان)
|
وتحدث د. أنس العاقب :-
سعيد وانا فى هذه الخطوة المصيرية ان اجد فى الحضور من يُحبهم ويشتاق اليهم وهم ينظرون اليه وفى عيونهم السؤال .
سعيد وانا اجد (الجيلانى الواثق) بين الحضور , ونحن الدفعة الاولى عند أفتتاح المعهد فى أكتوبر 1969 , سعيد ان اتذكر كيف كانت الدراسة وكيف اصبحنا الدفعة الرائدة .
انا بعد 30 سنة عايز اغنى ليه ؟ انا اولاً اتخطيت مرحلة الخوف , بقدر ما انا زول بتاع كلام وكتابة كويس , لكن بنفس الدرجة بخاف من الغناء , خاصةً امام الجمهور , فى (القعدات) طبعاً فى مُعينات بتخلى الزول يقدر يغنى كويس , و (القعدات) وقفت ! , لكن هى ساعدتنى فى انى اقابل واتعرف بناس كتيرين .
كانت المشكلة اننا نواصل الدراسة ونخلى المعهد يقيف على رجلينو , او الزول ينجرف امام الشهرة والمجد , وكان الأختيار هو أختيار المعهد , دكتور الماحى سليمان ساب البوستة وهو كان موظف وتحول الى طالب بياخد اعانة 7 جنيه , وانا من مُحاسب كبير فى وزارة التجارة الى طالب بياخد 7 جنيه , وبعد التخرج قالوا لى امشى اعمل ماجستير , جيت راجع سنة 1980 وخلاص عايز ابدأ واستعد للغناء قالوا لى , لا , امشى المانيا عشان تعمل الدكتوارة , وهكذا لحدى ما القطر قرب يفوتنى .
لما اندمجت مع الحالة الاكاديمية , كان الغناء بكل صراحة ما مُتاح ليهو شوية حرية , والظرف كان ما زى الظرف هسع .
لما نزلت معاش , كان بالنسبة لى عالم جديد , زول قاعد فى البيت يقرأ ويكتب شعر ويترجم ويمسك العود ويغنى ويلحن , عالم أكتشاف نفسى من جديد , وبقت الموسيقى تعود لى بشكل حميم , وأكتشفت انى ممكن اغنى , لكن أتخاذ القرار كان فيهو تأجيل شوية , ولما قررت الغناء ما كان قصدى زى ما قالوا فى الجرايد انو هدفى الشهرة او القروش .
بالعكس , افتكر انى لحد ما , انا زول معروف وما محتاج للشهرة , ولو كان للقروش الحمد لله يعنى , المسألة مستورة .
على مستوى المحيط الفنى الناس بتتكلم عن الغناء الهابط وحاجات زى كده , وانا اصلاً زول بتاع مشاكل , فقلت لنفسى يا ولد يا أنس العاقب يلا خش الغناء , صحيح ح ينتقم منك كل الكانوا بيخافوا منك , وح يقولوا يا اخى ده عامل لينا فيها شنو كده ما عارف .
ببساطة شديدة جداً انا عايز اغنى , وكان عندى ظرف فى ال 5 او ال 6 سنين الفاتت , ظرف صعب جداً , كان صعب انى أسيب المعهد وانزل معاش , المعهد ده كان زى بيتنا , ولامعاش ده مُرعب , لكن انا وصلت السن القانونية وده قانون الحياة .
*
انا اساساً بكتب شعر وعندى 4 دواوين , واحد منهم طالع قريب , وانا مُترجم وهسع بترجم فى كتابين عن التمثيل والتأليف للهوة , انا داير اغنى عشان اكون تجربة جديدة , لا معليش مش تجربة جديدة , لكن الصحيح تجربة مُضافة .
بالمناسبة انا كنتا داخل معسكر عشان الأمسية دى , خليت بيتنا وقعدتا مع أختى عشان اقدر على التركيز , عشان عايز اقابل الناس بعد 30 سنة بشكل شُغل فيهو تجويد , وعملت تمرين للصوت .
كيفية الموازنة بين الرومانسية والغناء العصرى ؟ انا بالمناسبة رومانسى وافتخر بالرومانسية والحمد لله الناس بدات ترجع للرومانسية .
فى مجال الابداع انا بفتكر انو الكفاءة والموهبة اهم من الشهادة , والناس بتتكلم اننا زمان كنا دبلوم فى المعهد وهسع بقت كلية بتدى بكلاريوس , لكن الاهم الموهبة بالتأكيد .
عايز اقول حاجة عن المديح , عن المدائح النوبية , المديح ده الاسس للتنظير الموسيقى قبل الموسيقيين , لانو كان فى مصطلحات ثابتة فى المدائح , مصطلحات ثابتة فى الايقاع , قوالب محددة بيمدحوا فيها ولذلك , فى التدوين الناس بيمدحوا نفس المدحة لكن كل منطقة عندها نبر يختلف عن المنطقة الآخرى .
انا ما وجدتا ترحاب فى الوسط الفنى , وانقذنى أفتتاح معهد الموسيقى والمسرح , كان الوسط الفنى وسط غريب , انا كانتا قايل الناس ديل ناس كده بينهم احترام وحب , لكن أكتشفت ان جوه الوسط ده فيه صراع كبير , وكانت أغنية (بلدينا) شكل جديد , وناس كتير من العازفين كانوا ما بيحبوا يعزفوا معاى فى بعض الانتقالات وفى نص التون , انا اكتر من مرة طلعتا المسرح وما لقيت عازفين رغم انها حفلات بقروش وعن طريق الاتحاد , العازفين كانوا بيزغوا منى ويقولوا انى مُعقد وملول ومش عارف ايه , النشيد العملتو لمايو (موسم الحصاد) قعدت شهر عشان الناس تستوعب اللحن ويقولوا لى ليه تعمل سى دو ؟ اعمل كده وكده , انا اتعرضت للحرب فى الوسط الفنى .
اقول ليكم مثل وانا زول جعلى احمق , انى كرهتا الغناء رغم انى عندى اجازة للصوت فى سنة 1968 , أجازة صوت بامتياز من لجنة كان فيها زى 12 نفر , وبعد اجازة صوتى طوالى مشيت سهرة فى الاستديو التانى , ودى اصلوا ما حصلت فى تاريخ السودان انو زول يجيزوا صوتوا يوم الخميس ويطلع يغنى فى سهرة يوم الاتنين .
لكن الحصل بعد داك انى مشيت لواحد رحمة الله عليه , وقلت ليهو يا اخى احجز لى عشان عايز اسجل أغنية , قال لى تعال بعد 6 شهور , قلت ليهو بعد 6 شهور ؟ , قال لى ايوه , عندك كلام تانى ؟ , يعنى كان أسلوب غريب , قعدت احسب فى الأيام , وجيت راجع ليهو بعد 6 شهور , يا عم فلان ال 6 شهور تمت , تخيلوا , سمعنى كلام قذر , وشتنمى شتايم قذرة بشكل اصلوا ما معقول , كلام وسخ لدرجة بعيدة بدون اى سبب , قلت ليهو وانا مهجوم من الشتايم يا عم فلان يا اخى اقول ليك كلام , انا تانى لا عايز اغنى ولا حاجة , غايتو ربنا يرحمه ويغفر ليهو .
بقيت اغنى اكتر حاجة فى (القعدات) مع (المحجوب) و (الشريف حسين) ومع (حسب الرسول) , والماحى سليمان بيعرف الحكاية دى / الجمهور يضحك / , (قعدات) مع الناس المثقفين وعلية القوم فى الكتابة والفكر , مع (نزار قبانى) , مع (احمد الخواجة) نقيب المحامين المصريين الاسبق , بالجد لقيت نفسى مع علية القوم , ومرة ناقشت (محمد احمد المحجوب) فى النحو والاعراب , كنتا بغنى فى أغنية (( يا حبيب القلب قل لى )) ودى أغنية مخصوصة (للقعدات) / يضحك / , (( يا حبيب القلب قل لى ما الذى اقصاك عنى , ادلالاً , أم ملالاً , أم علينا تتجنى )) .. قام (المحجوب) قال لى ليه انتا قلتا دلالاً وفى التانية قلتا دلالُ , قلتا ليهو واحدة حال والتانية خبر , قام قال يا (حسبو) انتا جايب لينا فى (القعدة) فنان ولا عالم لغة ؟ .
| |
|
|
|
|
|
|
|
|
|
Re: أقوال د . أنس العاقب فى محضر المركز .. لماذا قرر العودة للغناء بعد ان توقف لمدة 30 سنة ؟ (Re: مركز الخاتم عدلان)
|
وتحدث د. أنس العاقب :-
اتعلمتا من الجلوس مع المثقفين عن السياسية , وعن المؤامرات البتحصل فيها , لقيت الجو ممتاز بلا فنانين بلا متعهدين حفلات بلا غيرو , وبعدين الحفلات من 9 لحدى 4 صباحاً وهم كلهم 4 أغنيات , ده سبب .
لكن المعهد برضو كان السبب الاهم , المعهد ده كان أمنية , كان حاجة ما بتقدروا تتخيلوها , يا ريت لو قدرتا ارجع الزمن داك , عرفتا النوتة وباخ وبيتهوفن ومش عارف ايه , وعرفتا سحر الموسيقى , وكان الأختيار يا اندمجتا فى القرأية وتكون بارز فيها , او تكون زى (زيدان ابراهيم) وهو كان من أميز الطلاب فى المعهد وكان فى قمة الغناء , و(الماحى اسماعيل) قال ليهو يا (زيدان) صحيح انتا نجم لكن هنا انتا طالب والدراسة عايزة تفرغ , و (زيدان) اختار النجومية على حساب الدراسة , وكتيرين اختاروا طريق النجومية زى (بشير عباس) وكان الدفعة الورنا و (محمد وردى) وهكذا .
بالنسبة لى كان لازم التضحية , وبعدين انا بخاف من الغناء , الليلة اول يوم احس انى ما خايف , وحياة كتاب الله , اول يوم احس انى قاعد اغنى بثقة شديدة , قاعد اغنى بثقة لانى قررت انى اغنى , قدام الجمهور بخاف وينزل من عرق يبل القميص كله , لكن فى (القعدات) خطير / الجمهور يضحك / , مافى زول فى (القعدة) يقول ليك طلعتا من الزمن لانهم هم ذاتم بيكونوا بره الزمن , متعة الشباب والدنيا كانت مفرهدة وبتاع ما زى هسع وكنا ما جايبين خبر .
بعدين كان المشى الكتير فى البعثات , امشى المانيا الشرقية , وبعدين امشى المانيا الغربية وكده , وفى العشرة سنين الاولى من الانقاذ ما كان فى طريقة انو يغنى لا الاذاعة عايزاك , لا التلفزيون عايزك .
عايز اغنى عشان اوصل رسالة , واقدم غناء للناس فيهو تفكير , الغناء بتاع (عثمان حسين) فيهو تفكير عشان كده هو غناء خالد , والغناء بتاع (خليل فرح) فيهو تفكير عشان كده هو غناء خالد .
انا طبعاً حزين انو الناس فاتونى , وناس اقل منى , وانا عارف كده كويس , قدراتهم اقل منى , لكن فى النهاية هى قسمة من ربنا .
ربنا خلقنى بقدرات كتيرة من شعر وانا بكتب الشعر من المرحلة الوسطى , وانا ممثل قدمت اعمال فى الاذاعة والتلفزيون والمسرح , ويمكن الناس ما تعرف انو عندى شهادات فى الاخراج التلفزيونى والسينمائى بالمراسلة ولسه عندى الرغبة فى التمثيل , المثل الانجليزى بيقول jack of all trades مواهب متعددة مُتشاكلة فى داخلى .
(ليل الشجن) كانت فى 1976 , (بلدينا) 1971 , (نور الهناء) 1971 , (اتعلمنا الهوى) 72 .
هسع صوتى يعنى ح يكون اكعب من منو ؟ وبعدين هسع معيار الصوت اختلف عن زمان والدليل الفنانين القاعدين يلقوا الرواج , انا صوتى ما كعب , صحيح كبرتا فى السن وعشان كده عايز احصل وعايز اقول رأيى عن طريق الغناء , قبل ما يفوت الفوات .
| |
|
|
|
|
|
|
| |
مركز الخاتم عدلان
محمد سنى دفع الله
فيس بوك
تويتر
انستقرام
يوتيوب
بنتيريست