|
|
 حبوبة" هل هي كلمة غير مواكبة للعصر؟
|
حبوبة" هل هي كلمة غير مواكبة للعصر؟ حتى تغيّر وتبدّل الى "ماما"؟؟؟؟؟
هذه ظاهرة تفشت في التسعينيات على حسب ملاحظتي لها. وبالرغم عن بعدي الطويل عن السودان فقد عايشتها وأنا في القاهرة مع صديقاتي وجاراتي، فكل من صارت حبوبة رفضتها واستبدلتها بماما ولكني لم أقف عندها كثيرا..... الى أن صرت حبوبة. فلماذا هذا التنكر لها وهي كلمة تفيض حبا وحنانا.
اه لو تعلمون ماذا فعلت بي هذه الكلمة الجميلة، فأنا جد فخورة بها وسعيدة غاية السعادة، ولا يفوتكم أحبائي فلقد دار نقاش عارم حولها مع صديقاتي، فمن تقول أنها "قديمة" ومن تقول أنها تدل على"الجفاء" أي جفاء!!! تخيلوا كلمة كلها حب تدل على الجفاء ماذا أقول: أشّد شعري؟؟؟؟؟ ومنهن من تنظّر وتقول بأنها لا تليق بحبوبات الزمن ده، ويضحكن ويتذكرن حبوباتنا اللاتي تفوح منهن رائحة الحبوبات وهي ((الكركار والخمرة والدخان ممتزجات مع العرق)). فمن منكم لم تغمره رائحة حبوبته؟؟؟
فهذا الموضوع للنقاش وأهديه الى صديقتي التي لا تعرفني ولكني أعرفها من خلال كتاباتها التي أحببتها، سلمى الشيخ سلامة، ربيبة حبوبتها "ترباية حبوبتها" فما رأيك؟؟؟
|
|
 
|
|
|
|
|
|
|
 Re: حبوبة" هل هي كلمة غير مواكبة للعصر؟ (Re: Hayat Hussien)
|
أولاً بالتبادي
مرحب بيك ( حبوبة ) حياة
كنت في مطار دبى أستقبل بعض الضيوف مع زوجتي
وجدتني وجها لوجه أمام صديقتي زميلة الدراسة الجامعية ( س )
لم نلتق منذ 25 عاماً
أول ما جاء في ذهني أنها مقيمة هنا مع زوجها واستغربت أن كيف لم أسمع بهامن قبل
أجابت على سؤالي هذا بصاعقة
" أبداً أنا قاااعدة في السودان . هسع جيت زيارة ( أنفس ) بتي "
تنفسي بتك
بنتك إتزوجت
والآن على وضوع ؟؟؟
مازحتها كما تعودنا أيام الدراسة
" يعني ممكن أقول ليك يا حبوبة ( س ) ؟؟ "
صعقت وكأنها لم تكن تتوقع هذا السؤال
أو لم تعمل حساباً له
" يقدرك الله تقول لى حبوبة ، المولودة زااتا ما بخليها تقول لى حبوبة "
________________
أين منى خوجلي ؟؟
سيدة حبوبات البورد
| |
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: عاطف عمر)
|
(*)
صديقي (حميد) بفتح الحاء - من أهالي مدينة (الحسكة)شمالي سوريا
وهو ينتمي إلى كبرى قبائل الشمال السوري _ قبيلة البقارة (أيوة إسمها قبيلة البقارة)
والواحد منهم (بقاري) ..
كنت أبحث عن أصول بعض كلماتنا الدارجية _ فوجدت عنهم كلمة (حبوبة) تطلق على الجده
مثلنا تماماً _ إلى أنهم ينطقونها (حبابة) _
تحياتي أخت حياة ..
بالمناسبة :
أهل قطر لو غبت عنهم فترة وفجأة شافوك _ أو شافو طفل ببكي مثلاً بقولو:
يا(حليلو) ..
؟
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: doma)
|
سلام (حبّوبة) حياة
| Quote: ما اظنها رفض للكبر او انها كلمه غير متحضره ابدا بدليل انه جيل امي مواليد التلاتينات كانوا بيقولوا لحبوبتهم امي . |
أوافق دومه، وأنا كمان أمي من مواليد العشرينات، وكانت بتقول لحبوبتها (أمي آمنة)، وكنا نراها كلمة حنينة وفيها خصوصية، وتنادي والدتها (يُمّه)، رحمهم الله جميعاً
يشاركنا كثير من الشعوب في: ماما، أُمّي، وحتّى "يُمّه ... ولكن (حبّوبة) هي سودانية خالصة. الغريب كنّا ننادي بها حبّوباتنا بتلقائية وبصورة عادية، ولكني أحس الآن ما فيها من حنان عندما ينادي أطفالي بها (حبّوبتهم).
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: doma)
|
العزيزة دومة تحياتي واحترامي
شكرا عزيزتي علي الترحاب والمداخلة يا حبوبه ماقصدته ظاهرة الاصرارمن الصديقات
اللاتي اعرفهن والاعتراض علي كلمة حبوبه والإصرار علي كلمة مامامما يجعل الطفل لا
يفرق بين ماما وماما .عزيزتي استميحك عذراعلي تاخري في الرد عليك وذلك لاسباب
فنية ودومتي علي خير
| |
|
|
|
|
|
|
|
|
 Re: حبوبة" هل هي كلمة غير مواكبة للعصر؟ (Re: Hayat Hussien)
|
حبوبة حياة مساء الخير
يا زولة كلمة حبوبة دي موحلة في المحنة والطيبة والأمان
يعني أنا بتذكر أمي عليها رحمة الله عندما حضرت لزيارتنا
في السعودية , عيالي كانوا سعداء بها جداً لانها كانت تحكي
لهم القصص وتحميهم من سطوتي وسطوة أمهم وكانت تشكل لهم
مصدر فخر وسعادة لا حدود لها .
وبهديك واحدة من قصائدي القديمة بهذا الشأن
مشتاقين وكل ما الشوق يزيد يكبر
بتجري دموعنا تتقطر
ونذكر زمان ولي
ونحنا صغار مع الحبوبة في بمبر
تحجينا وتحكيلنا
عن فاطمة السمحة وقصص عنتر
واهيم في الذكري واتخيل
كيف حالكم طفولة برئه في المهجر
لا حبوبة تحكيلكم وتهدهدكم قبل النوم
وفي الصبحية تطعمكم لقيمات حلوة بالسكر
ويملاء صياحكم الأفاق وكت كباية تتكسر
وتنهركم وترجع تاني بتحنان تراضيكم
تخاصمكم ؟؟ محال تقدر
ومشتاقين بالأكتر ومشتاقين كمان اكتر
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: هاشم أحمد خلف الله)
|
| Quote: اللاتي تفوح منهن رائحة الحبوبات وهي ((الكركار والخمرة والدخان ممتزجات مع العرق)). فمن منكم لم تغمره رائحة حبوبته؟؟؟ |
والمجوع والمحلبية الودك وبخور الظهر وريحة بت السودان
حبوبة دي اجمل صفة .. بس المشكلة يا حياة
النساء بفتكروها بتكبرهم.
حنينة جدا
مودتي
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: almulaomar)
|
الكريمة حياة..
ســـلام ومحبة..
"حبوبة" من أجمل الكلمات السمعتها وبستخدمها في حياتي. (ياخ دي جاية من الحب زاتوو..هههه)
أحب أن أنادي كل قريب لنفسي بـ (حبًوب)..
عشت مع 3 حبوبات. كل واحدة (أحب) و(أحن) من التانية. آخرهم توفت مايو الماضي (حبوبتي أم أمي). الله يرحمهم جميعا.
كل المجتمعات العشت فيها. خليت أصحابي وكل من يعرفني ينادي (تيتا وآنًا ونينا وجدتي بـ حبوبة). وما أحلاها عند أصدقائي المصريين. وأهلي الأردنيين. لغاية الآن وهم يرددونها. وجيراني وصحابي أبو يمن كلهم غيًروا لحبوبة.. يعني خلاص (أعتمدت -بضم الألف والتاء).
ــ
يصدمني كتير أن أجيال "الحبوبات" الآن يفضًلن كلمة "أمي" أو "ماما". مع أنه كل الكلمات حلوة. إلا أن الأم أم. والحبوبة حبوبة:))
تحاياي وسلاماتي لكل الحبوبات.
رجــا
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: almulaomar)
|
دائماً ما يقول لي أصحابي أنني تربية حبوبات
زول كباري وكلامي كلام ناس كباااااااااااار
حبوبة عندنا تطلق على عامة نساء الحلة اللائي لا تربطك بهن علاقة قربى مباشرة
حيث يستحيل على المرء أن ينادي أي إمرأة دون إضافة كلمة حبوبتي أو خالتي أو عمتي
لكننا نستخدم كلمة يمة أو أمي فلانة في حالات القرابة الشديدة
وكما قالت الخالة دومة:| Quote: البعض يرى كلمه امي احن |
وهي كذلك أكثر حنية
حفظ الله ثقافة وتراث وحنية الحبوبات
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: أبوعبيدة محمد الأمين)
|
اولا سلام اخت / حياة
ياخى ،كم وكم كانت الحياة جميله وخاصة وانا ممن تربوا على يد حبوبه ، (يا حليل الحبوبة ام شلوخ)كنت ينبوع الحنان والحضن الذى يدفانا عند المحن
وكانت الحبوبة الملاذ الآمن وتحتوي الموقف بحكمتها المكتسبة من خلال تمرسها وخبرتها في الحياة ، يا حليل زمان الحبوبة اخت حياة .
بوست جميل ويستحق المتابعة ...
مودتى ...
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: خالد درق)
|
الاخت حياة مرحبتين حبابك
عندى صاحبتى بعد غيبه طويله رجعت السودان لقت أختها بقت حبوبه لمجموعه من الاحفاد
كلهم ينادوها ماما واولادها برضو بقولوا ماما . لجدهم بنادوه بابا يعنى شويه يلحونوها
للفرز يعنى ماما فلانه وبابا فلان وماما وبابا بس للحقيقين . قالت لى قعدت الاجازه كلها
عشان اعلم الشفع ديل أن دى حبوبه ودى جدو ديلك بس ماما وبابا وان الانسان عنده أم واحده
وأبو واحد. الحكايه دى متفشيه فى حبوبات الزمن دى ماعارفه لان الحبوبه اختلفت ماحبوبه بتاعت
الكركار وبت السودان الحنينه التحضن بقت بتاعت شغل وانترنت واجتماعات وسفر مافاضيه.يعنى
كلمة حبوبه بقت مرتبطه بالحبوبه التقليديه مش العصريه .
| |
|
|
|
|
|
|
|
|
 Re: حبوبة" هل هي كلمة غير مواكبة للعصر؟ (Re: REEL)
|
..
.
والله مواكبة وحنينة زاتها ..
بس نعمل شنو مع اولاد ال الزمن دا ..
حسي بنات اختى بقول لامهم ماما
وبقول لامى ( اللهى حبوبتهم )
يمه .. زى ما انا بناديها
--------
انتو بس الواحدة من تبقى حبوبة تحاولوا تتخارجوا
وتزغوا من الكلمة وتشوفوا ليكم حاجة اصغر من حبوبة
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: Hayat Hussien)
|
تحياتي للمتداخلين ..
و صراحة موضوع رائع و مداخلات أروع ..
و بالنسبة لي فقد كانت حبوبتي ـ الله يرحمهارحمة واسعة ـ أحلى و أحب و أحن حبوبة في الدنيا، كانت أمي تناديها ( يمة ) و كنا نحن نناديها كذلك ( يمة ) لكنها كانت تصر على أنها ( حبوبة ) حتى رسخت فينا هذا اللقب الجميل الحنين ..
لاحظت أن بناتي كُن يقلن لأمي ( جدّة ) ولأني أحس بأن هناك جفاء في هذا اللقب الذي يستخدمه أهل هذه البلد وتعلمته بناتي من أُمهن و خالاتهن فقد عملت على تعويدهن على مناداة أمي بلقب ( حبوبة ) حتى أضحى و كأنه إسماً لأمي وهي تفرح كثيراً عند سماعه منهن خاصة و أن بناتي هن الوحيدات اللائي ينادينها بهذا اللقب فجميع أحفادها الآخرين ينادونها كما نناديها نحن ( أُمي ) .
حبوبة فيها حنية كتير ..
ــ
و بالمناسبة يا أخت / حياة حسين إسمك جداً رائع .. عشان برضو أُمي إسمها / حياة حسين ..
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: عصام دهب)
|
حبوبتي العظيم شأنه
راقده فوق هبابي
وخاتة الفركة تحت الرأس
تاكل ليها في تمرات
خاتة الجبنة في الواطة
حبوبتي العظيم شأنه
"حبوبة" ماأجملها من كلمة ، فيها طيبة وحنان كل أهلنا.
يا حليل "حبوبتي" وكتين أجيها تسالمني وتطايبني وتشم رقبتي، وتفتح "محفضتها"، وتديني قرش قدر "الطش"، وتقول: أجر اشتري ليك حلاوة، وانطلق كالريح لدكان جدي ود أبوسن، واشتري حلاوة "بيض" محشية بسمسم، لونها زاهي جميل، ما زلت أجد طعمها في فمي رغم مرور السنين .
فلم التنكر لـ كلمة "حبوبة"، وهي كلمة جميلة تميزنا عن سائر الشعوب العربية .
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: سيف اليزل برعي البدوي)
|
أستاذه حياة
سلامات
إستعمال كلمة حبوبه زى ما قالو الأخوان بختلف من منطقه لمنطقه ومن أسره لأسره....
أمى ربنا يديها الصحه والعُمُر... هى على مشارف الثمانين,لكنها ما بتحب كلمه حبوبه...
(كنت خاته صورتها فى شبابها فى بروفايلىّ...)
ما لأنها عايزه تِتِجهّل...جيراننا نسوان ورجال قدرها وأكبر منها
بقولو ليها ماما فاطمه أو ماما فاطنه
ولأبوى ربنا يرحمو ويحسن إليه...بابا مرضي....
أمى زوله ردودها ساخره جداً
بنت أُختى زمان لما كانت صغيره ما كانت عايشه معانا فى نفس المدينه
مره لما جات قالت ليها يا حبوبه فاطنه....
أمى قالت ليها الحبوبه بأجروها أهلك بالقروش....
لفت البت وجات ,قالت ليها يا فاطمه...
قالت ليها ده نظام قلة أدب يعنى !!!؟؟؟
البت مشت لى أُمها قالت ليها يا ماما أمك دى حيرتنا معاها....
يقولو ليها شنو يعني؟؟؟
أمها قالت ليها قولى ليها ماما فاطمه...
حبوبتى أم أبوى زوله الطيبه أتجسدت فى إنسان ...عليها شآبيب الرحمه
بنقول ليها حبوبه نفيسه...
وحبوبتى أم أمي برضو ربنا يرحمها كنا بنقول ليها أمي الجاز...
أمي برضو بتقول ليها أمي الجاز ...ولينا بتقول أُمكم الجاز...
ودى أُسره واحده شوفي إتنوعت فيها المسميات كيف بإختلاف المسميين!!!؟؟؟
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: سيف اليزل برعي البدوي)
|
والله يا حياة أنا بشوف انه طالما المحنه والحب في فاللقب ما بفرق
سواء حبوبه ولا يمه ولا أمي
وبعدين الحبوبه الصحي صحي برضو ما بيفرق معاها اللقب
نحن حبوبتنا بنقول ليها ماما قمر
وجدنا بابا يوسف
اتعودنا على كده من ما قمنا نحن والسبقونا في العمر
ومره مره كده بنقول ليها يمه مع امي
ربنا يطول لينا في عمره
أما عن بتي فمره بتنادي أمي معانا بماما أو أمي واحيانا بتقول ليها حبوبه
وأم زوجي بتفضل ينادوها بأمي بتحس بيه حنين وما خوف من كبر ولا تهرب من مسوليات الحبوبه
لكن بيني وبينك المجموعة الذكرتيها بتتهرب من لقب حبوبه لاقتني كتير في حياتي
ودي في تركيبه بعض النساء من دس العمر والخوف من الكبر
ومثال قريب كمان عندي خالتي لما أقول لبتي سلمي على حبوبه تنهرني جاده: يا بت حبوبه شنو
انا خالتو لوووول
تسلمي على البوست الجميل يا حبوبه
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: وجن)
|
ماما حياة منوره البورد
انا شخصيا الحبوبات كانوا مرتبطات عندي بالشلوخ و انا صغيره اي واحده مشلخه كنت بقول ليها حبوبه. حمودي بيقول حبوبه مرات لكن اكتر شئ ماما رغم انها بتحب كلمة حبوبه, هو ما مقتنع غير انها ماما و انا دانيه شكله فاكري اخته.
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: Hayat Hussien)
|
بعض النساء وإن كن "حبوبات"، يهتمن بمظهرهن وزينتهن ويحتفظن برشاقتهن وحيويتهن ونشاطهن.
أذكر "حبوبة" قريبة لي كانت تهتم جدا بزينتها وتولي عناية فائقة بمظهرها ، وكانت تلبس الساعة والأساور الذهبية والختم الذهبية الكبيرة، أتت إلينا في مناسبة زواج، فجلست بعض النساء يتهامسن ويتغامزن وينظرن إليها باستغراب ويعلقن، إذ كيف لأمرأة كبيرة "حبوبة"هذا الإهتمام بملايسها وزينتها التي لا تتناسب مع سنها، فعلمت من نظراتهن ما يدور في خلدهن فقالت لهن: " لبس الصغار فنجرة ولبس الكبار مقدرة"، أي أنها امرأة ميسورة الحال فما المانع من الاهتمام بمظهرها وزينتها وإن بلغت من العمر عتيا؟! فتوارين خجلا من كلامها وقلن: بلسان واحد: صدقت الكلام قرش.
حبوبة أخرى، كانت ترى نفسها أصغر من بناتها، وكانت تنافسهن في الاهتمام بنفسها وحسن التبعل لزوجها. اعتادت بناتها المتزوجات أن يتركن صغارهن للمبيت معها، ولم تكن راضية بهذا الوضع، لكنها كانت تخشى مواجهتهن.أتت ذات يوم ثلاثة من بناتها يحملن صغارهن للمبيت معها، فغضبت وانتهرتهن قائلة: من اليوم ده أي واحدة منكن تنوم شفعها معاها، والله ده كلام،وحات الله أبوكم دا أنا شايفاهو أصغر وشباب أكتر من رجالكم. نظرت البنات إلى أمهن نظرة إعجاب وأخذت كل منهن صغارها بسرور ولم يتفوهن بكلمة واحدة .
هذه رسالة واضحة من "حبوبة" تقدس سر العلاقة التي بينها وبين زوجها"الحاج" والتي امتدت لأكثر من خمسين عاما ، علاقة تزيدها الأيام متانة ورسوخا وتقديسا، واللبيبة بالإشارة تفهمدمتم بخير
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: Hayat Hussien)
|
سلام حياة و الحبابون و الحبوبات هنا,
يبدو لي أن الأجيال الحالية ما عندها مشكلة مع كلمة حبوبة في حد
ذاتها لكنها بدت تختفي مثلها و مثل مفردات كتيرة في حياتنا كانت
تشكل مع بعضها البعض قاموس من الحياة القديمة يشمل عشرات المفردات
و إذا فتشنا حا نلقى عملية إبدال المفردات مع تعاقب الأجيال و الحقب
الحياتية موضوع ممكن يؤسس لبوست آخر قائم بذاته! الكلام دا بينطبق على
شتى جوانب الحياة سواء كانت ملابس أو أرياح أو عملة نقدية أو مختلف مستلزمات الحياة .. حاليا مثلا لا تستخدم كلمة "مزيكة" إلا نادرا, كذلك
"لعبة"="حفلة" أو "تزلك"="صيوان" و حتى الوظائف المدنية و العسكرية و
أسماء الذكور و الإناث كذلك الألقاب and other terms
تبدو لي الفكرة في مسألة الإبدال و الإحلال دي أقرب لحكاية "الدقة القديمة"
مقابل نزوع الناس للتحديث,
للأسف حرمت من إستخدام كلمة حبوبة في حياتي لأنه واحدة ماتت زمن حفروا البحر و التانية ماتت و أنا في الرابعة من العمر .. غايتو بارك الله في
"بت قضيم"!
وسط أهلنا بينادو الأم البيولوجية بماما و الجدة ب"أمي" و أعتقد أنها أقوى تعبيرا عن جانب الربط و الرابطة من كلمة حبوبة لأنه كلمة حبوبة في
السودان لم تكن مستخدمة بعلاقة الحب و إنما في معنى القدم إضافة لموضوع
"الحكاوي"!
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: Hayat Hussien)
|
ألأخت حياة! سلامات
لدي تجربة معملية مع ألصفة{حبوبه}... ففي ألنصف ألأول من ألتسعينات كتبت ثلاثية للأطفال بعنوان { فاطمه السمحه} فعهدت بها لشركة{ميد لايت } للطباعة والنشر فوافقت علي شرائها مني شريطة أن أغير كلمة{ سمحه} إلي {حلوه} وإن أغير كلمة{حبوبة} إلي {ألجدة} فصار عنوان الثلاثية{ فاطمه الحلوه} وصار إسم {حبوبه كلتوم} إلي {ألجدة كلتوم}.. فعندما طبعت وقرأتها شعرت بإنني إرتكبت فداحة غالية بحق الثقافات السودانيه إذ هذه الكلمات إنولدت من صلبها وتيسمت بـملمحها ألذي يـمايزها مابين الثقافات ألأخري وما كان علي ان أرضخ لشروط الناشر إرضاءا لذوق الطفل ألغير سوداني
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: Hayat Hussien)
|
الحبوبة الجميلة الظريفة الأنيقة
حياة..
موضوع جميل يأتي من ظل معايشة تجربة أجمل
تجربة اعز الولد ابن الولد..
حينما وضعت هاشم.. كانت الوالدة،حفظها الله، تصر على
أن نلقن هاشم كلمة حبوبة..
كانت تقول أنها كلمة بها كل حنان الدنيا..
وقد جانبها الصواب..
شكرا على البوست الجميل يا أجمل حبوبة
محبتي لك والأسرة الكريمة
| |
|
|
|
|
|
|
|
|
|
Re: حبوبة" هل هي كلمة غير مواكبة للعصر؟ (Re: Hayat Hussien)
|
حبوبة حياة سلامات
وكلمة حبوبة كلمة عميقة جدا... وانا بحبهن شديد
| Quote: ومنهن من تنظّر وتقول بأنها لا تليق بحبوبات الزمن ده، |
الاقتباس اعلاه ذكرنى بايميلى مرح جدا مسمى (الحبوبات فى الالفيةالرابعة) عذرا جميلا لكِ باننى سمحت لنفسي بحيز فى هذا البوست باضافة ما جاء فى الايميل:
فى ذلك الزمن سيتغير كل شيء ... ستبلغ حبوباتنا درجة عالية من التشرب بمعطيات التكنولوجيا .. فهيا لندخل في عالم حبوبات الألفية الرابعة:
قالت حبوبة (رؤية) مخاطبة حاجة "شاهيناز" التي كانت منهمكة في فرك البامية المحورة جينياً
- والله يا شاهيناز أنا ما عارفاك بتفركي كيف بي (مفراكة الليزر) دي الناس بقو يفركو بي(المفراكة الكهرومغناطيسية ..
ردت عليها حبوبة (رؤية) وهي تطفئ البوتجاز الذي يعمل بنظرية الأوتار الفائقة
- نسوي شنو يا بت أمي نحنا لسه ما دخلنا في عصر الصرخة العلمية لكن أسكتي ساي ما وريتك
أمس حاجة هيام بت هيثم ود لؤي عملت شنو؟! ..
نططت حاجة شاهيناز عيونها تهيؤاً لاستقبال الشمار وقالت:
- مالا ؟! .. أنا عارفاها دي زولة عندها (ضلالات عدمية) تلقاها سوت ليها عملة كبيرة!!
أجابتها حبوبة رؤية: أمس مشيت ليها البيت كنت دايرة لي (ثالث كرومات السايكوبالتيك) عشان
ألون الخبيز .. لقيتا ليكي ماسكة (اللاب توب) بتاعا وعاملة (شات) مع واحد عجوز من (هضبة التبت) .. تصوري المرا الما بتخجل دي! ..
ومواصلة لهذه (القطيعة الإلكترونية) قالت حاجة شاهيناز: أنا زاتي المره دي (كجنتها) من ما سوت لينا القهوة في الجبنة الصانعنها من (معدن التيتانوم) ، يعني ما سمعت بي جبنة الألياف الضوئية
أضافت حاجة رؤية في استهجان: والله صحي (الماوس ما بزيل بلم) .. العالم بتقدم وديل لسع في التخلف لكن إنتي أمس مالك ما مشيتي معانا لي الاحتفال بالذكرى السنوية لـ (جولدن جلاشو) عالم الفيزياء المشهور أجابتها حاجة شاهيناز:
أمس بعيد عنك مشيت أفحص (الجينات) بتاعتي .. أصلو عندي (جين) كده مغلبني قلت قلعوأرتاح منو مرة واحدة .. وبالمرة غشيت الصائغ غيرت غوايشي بي معدن نفيس جديد إسمو (الزرانكلينيوم) جابوه من كوكب ما متذكراهو لكن بدور حول نجم اسمو (لالاند) مننا زي تمانية سنة ضوئية.!
هزت حبوبة رؤية رأسها وقالت: والله بقيتي خطيرة عديييل .. غوايش البتاع القلتيهو ده أنا زاتي ما سمعت بيها .. كدي وريني واحدة
قالت لها حبوبة رؤية : ديل يا اختى للمناسبات بس ما بطلعو بيهن ساي ثم رفعت حاجبها الأيسر
باندهاش مفتعل وأضافت وبعدين إنت الظاهر عليكي برضو ما سمعتي بي شنطة اليد الجديدة العاملنها من (رقائق السيلكون) سحبت حاجة شاهيناز نفساً عميقاً وهي تجهز عبارات مناسبة لترد بها هذه الهجمة الشرسة لترد بها البوبار بمثله ثم قالت: حاجاتك القلتيها دي أنا صاح ما مرت علي .. لكن إنتي برضو ما سمعتي بي الكفتيرات الجديدة البتعمل بي (موجات ألفا) و لا بـ (الكمشة الاستقطابية) ... ودي كمشة بتغرف الملاح براها وبتكبو في الصحن ... وعندك كمان (الحلة الفوتونية) ودي بتنجض الملاح بـ (الطاقة القمرية) وفي هذه اللحظة دخل عليهن (حاج رامي) زوج حبوبة رؤية وهو في الثمانينات .. وتوقف موارباً للباب ليتصنت على هذا (البوباريشن) المعتق، سمع حاجة شاهيناز تواصل حديثها لزوجته حبوبة رؤية وهي تقول: وبعدين أنا ولدي المغترب في (كوكب نبتون) جاب ليهو (ولد آلي) صغيروني يساعد مرتو في تقطيع السلطة وغسيل العـدة .. وفي هذه اللحظة دخل حاج رامي وقال: قومن يا نسوان سون لينا الغدا وخلن (الفشخرة) الفاضية دي .. وأضاف في سره بغضب وان شاء الله تقوم بيكن قنبلة (بوزوتروني) تريحنا من نقتكن الكتيرة دي.
غايتو ماما دوما ما منهن 
انتى كيف يا حياة
| |
|
|
|
|
|
|
| |
عاطف عمر
كمال علي الزين
Kabar
doma
محمد أبوالعزائم أبوالريش
هاشم أحمد خلف الله
Raja
أبوعبيدة محمد الأمين
طارق جبريل
إسحاق بله الأمين
سيف اليزل برعي البدوي
Egbal Elmardi
وجن
Dania Elmaki
المعز ادريس
عبدالله الشقليني
احلام وهبي
abdalla elshaikh
غادة عبدالعزيز خالد
فادية اليمني
فيس بوك
تويتر
انستقرام
يوتيوب
بنتيريست