لو ما كنت سوداني .... كوميديا سوداء ... وسخرية مريرة

Quote: -------------------------------------------------------------------------------- تخيل كيف يكون الحال لو ما كنت سوداني والفي الغربة ديل أهلي !!؟ - لو ما كنت سوداني .. كنت بطلت تسف ساعوط وتشهر كيسك قدام الملا وتبصق السفة في اي مكان بدون ما تراعي مشاعر الاخرين وبدون ما تنتبه انك عنوان لبلدك!! وكنت حتلبس شيك جداً حتى لو ماشي البقالة بدل ما تطلع بالعراقى والسروال والسفنجة ورأسك مكشوف وصوتك يجيب الرايح وأنت بتتكلم في الموبايل .. - ولو ما كنت سودانى .. كنت عرفت أنه الدقيقة 60 ثانية والساعة 60 دقيقة واليوم 24 ساعة وفي اليوم ممكن تعمل وتنجز حاجات كتيرة ، وكنت عرفت تلتزم بالمواعيد وتجي شغلك في الموعد المحدد بدل ما يقولوا علينا كسلانين!! - لو ما كنت سوداني كنت حتنطق حروف ال (ق ) ( غ ) ( ث ) ( ذ ) زي ما هي وما كنت حتنطق التسعة تزعــة !! وكان تخليت عن استخدام مفردات زي ( هناي ، بجاي ، بغادي ، الخ.. ) لأنها محلية جداً وغير مفهومة ابداً للاخرين ، وكنت بطلت تدخل ( آآي ) بين كل كلمة والتانية !! ( آآآآآآآي ) حقتنا لكن مرة واحدة كفاية!! - لو ما كنت سودااااااني ..كنت ترددت في ارسال حاجات تافهة لكن وزنها فوق العشرين كيلو كل ما سمعت بأنه فلان مسافر السودان!! - كنت رجعت القروش الاستلفتها في وقتها ( أو في الحقيقة رجعتها و بس!! ).. - كنت خجلت من عدد مسكولاتك للناس لا وكمان تقول ( شنو يا فردة خمسه مسكولات ما ترد عليها؟ و الله الفيك اتعرفت.. ) بصراحة الفيك أنت اتعرفت !! - كنت ح تقيف عديل في الاماكن العامة ( بدون ما تكسر ساقك أو تغز كوعك!! ) وكنت ح تقعد بأدب في الكرسي ( بدل ما تشتح رجليك وتغوص في المقعد كأنك خلاص حتنوم!! ).. - كنت ح تدفع فاتورة المحامي او الدكتور قريبك!! - كنت قاضيت قريبك المهندس اللي خرب ليك بيتك!! - كنت عملت خرطة مختلفة لبيتك بدون ما تشف حقت صاحبك بالكربون!! وكنت استثمرت فى حاجة غير الركشات والامجاد !! - كنت امتنعت عن زيارات المكاتب فقط من اجل الونسه و بحيت الشمار!! .. - ولو ما كنت سودااااااني ودايما جعلي ما كنت ح تصل قمة غضبك وثورتك وتعلن الحرب بسبب أي خلاف بسيط مع أي زول في الشارع!! لكن لانك سوداني المعركة محسومة لصالحك في كل الاحوال!! علماً بانه لو القصة ملاكمة انت مصنف ( وزن الريشة ) ولو بالكلام انت مصنف مع الصم والبكم!! - لو ما كنت سوداني .. كنت بطلت تبحلق في السودانيات لما تلقاهم في اي مكان كانك حتاكلهم بعيونك على الرغم من انه جمالهم ابدا ما بلفت النظر مقارنة بباقي الحريم !! لكن انت بتبحلق بس لأنهم بنات بلدك وعايز تشوف أي حاجة فيهم غلط !! - ولو ماكنت سوداني كنت ح تتصل بالتلفون قبل ما تزور الناس في بيوتهم ، وكنت ح تسيطر على أطفالك لما تصيبهم الهستيريا في بيوت الأخرين ( وأنت عارف أنها حتماً حتصيبهم ) وح يبهدلوا البيت ويكسروا التحف ويقطعوا الفرش ويبوظوا الكمبيوتر ووووووو...والعجب لو كان عندهم حوض سمك!! وسيادتك قاعد تضحك متعوجب باولادك وكمان بتحكي قصص عن خفة دمهم!! وناس البيت ضغطهم خلاص ح ينفجر .. كنت بتتوقع يحصل شنو لما زوجتك ترقد طفلك الصغير بدون بامبرز في سرير بيت الناس!!.. ولو ما أنت سوداني اصيل على الاقل كنت ح تتردد تاخدهم معاك المرة الجاية لنفس البيت عشان يقضوا على ما تبقى ويزقهوا ارواح اسياد البيت المساكين الحظهم العاثر خلاهم يكونو من اقاربك او معارفك !! - كنت ح تتردد في زيارة الناس.. أنصاص الليالي وتاني يوم صابح مدارس وشغل وتساهر بالناس لما يقولو الروووووب ، تشرب العصير والشاي وتكوضم العشا!! علي امل انك خلاص ح تنكشح وتخليهم ينومو حبة قبل الشمس ما تطلع!! لكن انت برضو قاعد تبراهم لحدي ما تسمع الديك بعوعي بعدين تبتسم وتقول ( يا اخوانا شكلنا اتأخرنا ولازم نمشي بعد كده )!!! ياخييييييي لا بالله.. - ولو ما كنت سوداني ...كنت ح تخلي الاطفال في البيت لما تكون المناسبة خاصة بالكبار اقله كنت اتونست بصوت عادي بدل الكواريك خصوصاً لما يكون الطرف التاني قاعد جنبك في نفس الكنبة.. و يا حبذا لوكان التاني ده ساكت ليك سااااااكت .. - كنت ح تقعد فى صالون الناس بدل ما تلوص فى البيت كلو بدون ما تراعي حرمات الناس!! وكنت ح تبطل التحشر فى خصوصياتهم وتعمل الحالة واحدة وتدى نفسك الحق تسأل اى سؤال يجول فى خاطرك بدون ما تراعي مشاعر اصحاب الشأن.. - كنت امتنعت عن التدخين في بيوت الاخرين أو على الاقل استأذنت قبل ما تولع سجارتك وتملاء البيت بريحة السجائر مع أنه ست البيت تعبت في النظافة والبخور!! - ولو ما كنت سوداني .. أكيد كنت ح تتردد قبل ما تدي معلومات أو رقم تلفون أو عنوان أي زول للاخرين من غير إذنه او حتي معرفته بالموضوع لأنه ببساطة ممكن يكون مفهمم انه ما عندوا تلفون اساسا و انه هو زاتو مات!! بدل ما تورطو وتحرجو كده!!. - ولو ما كنت سودانى ما كان ممكن تفكر انك تمشى عرس بتاع ناس وتقيف بكل جرأة وبجاحة تصور العروس بى موبايلك وانت ما بتقرب ليها ولا حتى بى حواء وآدم بدون ما تسأل نفسك سؤال بسيط ( ياربي لو صورتها ح يزعلوا !!؟ ).. - لو ما كنت سوداني ما كانت مرتك مرقت ضرعها في نص السوق قدام خلق الله عشان ترضع طفلها!! وانت قااااااعد لصقها مبتسم ببلاهة وبرضو مشتح كرعيك!! - كنت بطلت تركب طفلك الرضيع في المقعد الأمامي على حجر امه ولمن يحصل حادث يكون هو أول الضحايا بس لانه المسكين اهله سودانيين وما شغالين بالعقد دي !! - لو ما كنت سوداااااااااني ما كنت ح تمشي عنبر الولادة وتقعد تحقن النسوان الفي العنبر كلهم !! طبعا ما في غيرنا بتحاوم فى عنابر الولادة بهرجلتنا واصواتنا الزي الرعد!! وكمان زيادة الخير جبنا ليك معانا الشفع عشان يشوفوا البيبي!! .. انت البوديك شنو اصلا تزور النسوان في المستشفيات ؟؟ ممكن توصل مرتك وتقعد في الاستقبال يعني خلاص حبكت انك تبارك للأم !!؟ ( صدقني هي حتكون مرتاحة اكتر لو ما شافت طلة وجهك البهية!! عليك الله بس اليوم دا سيبها تكون على راحتها لانها يادوب ولدت وأكيييييييييد راقدة !!! ) حتى لو كانت هي اختك او زوجة اخوك ممكن سلام من باب الاوضة وتتوكل علي الله ... - لو ما كنت سوداااااااااااني ما كنت سقت معاك كتيبة وانت ماشى المطار عشان تمثلوا مع بعض مسرحية العبط والتخلف الجماعي وانتو لابسين جلاليب البيت الشربااااانة والبراطيش!! والقاشر فيكم لابس مركوب نمر يكشش وعمه ستة طوابق!!.. لا ونسوانكم معنكشات بى دكان الصايغ كلو ولابسات تياب احمر على اخضر وترتر على ترتر مع شباشب الظار البرتقالي والليموني والأصفر يعنى زفة الوان تخلي كل الجنسيات التانية من حولكم يتفرجوا على الكرنفال ده!! وشفعكم يصرخوا ويتساككو ويزعجوا كل الناس الفي الصالة باعتبار انه المطار حديقة وكده!! ده غير التحنيس والدناءة المخجلة عشان يمشو ليك الوزن بدون ماتدفع !!! - ولو ما كنا سودانيين كنا قعدنا محترمين فى الطيارة وما قرفنا المضيفات بي الطلبات الهمجية والاصوات العالية والمشية والجية والشنط والكراتين والصفايح الداخلين بيها الطيارة وما كان نسوانا اصرن يغيرن التياب فى الطيارة!! وما كان فكينا الاحزمة ووقفنا على حيلنا قبل ما الطيارة تنزل اساساَ عشان مشتاقين للناس المنتظريننا في المطار!! - ولو ما كنت سودانى مستحيييييييييييييييل كان توكل اخوك يبنى ليك بيتك ولما ترجع تلقاهو لسة ما حفر الساس!! وبس تسألو عن القروش الحولتها عبر سنوات طويلة يزعل منك ويخاصمك وتبقى قطيعة رحم!! ولو ما كانو اهلك زااااتهم سودانييين ما كان غلطوك وطلعوك انت الكعب!! وأجبروك تسكت عن حقك وفي الاخر تبقى عليك ميتة وخراب ديار!! - لو ما كنت سوداني ما كان اهلك تدخلوا في خصوصياتك وسلبو زوجتك ابسط حقوقها في انها تسمى طفلها الحملت بيه تزعة شهور واصرو عليك تسمي المولود باسم ابوك او امك او عمك النهب ارضكم كلها في البلد!! أو خالتك الماتت قبل سنتين!! بغض النظر عن انه الاسم ده قدييييييم وما بتناسب مع اسماء الاطفال في الالفية التالتة ، علما بأنه اهلك زااااتهم ما ملتزمين بالاسماء القديمة دي وبسموا اطفالهم رماز وشيرين ومهند وتامر!!.