|
|
 تشليخ أوكامبو !..
|
تشليخ أوكامبو !..
خط الاستواء
عبد الله الشيخ
من سوء حظ اوكامبو مع الانقاذ أنه سيظل مثلنا أسيراً لمقاصد العبارات التى يطلقها قادة الانقاذ كلما رغبوا فى تأكيد رفضهم لــ( إدعاءاته)!.. ومشكلة اوكامبو مع الإنقاذ طولة بالو، وطول بالا وطولة بالنا، أوكامبو يظهر ويختفى أمام الانقاذ ، وبين الانقاذ واوكامبو دلال البنت الجميلة التى ( تتحجج) وترفض العرس قائلة :ـ أنا عاوزة اقرأ !!، و ( كيتاً) على ود عمها تقول بعد التخرج: إنها عاوزة تحضر الماجستير والدكتوراة!!
ولكوننا لانستطيع تناول الدلال المشترك بحرية كاملة ، لانه دلال ( دستورى ) من جانب الحكومة ، و(قانونى) من جانب أوكامبو.. نختار ما اختار لنا قيقم ، فى رائعته الانقاذية: ( لاتحلم بى ما جرى يا ضال الطريق.. ميِّل على أهل القرى)!..
ففى تلك القرى دلال شبيه بهذا ..
فى زمن السير جون مافى وقع أحد الخواجات فى غرام شايقية من البركل ، ( كتّلت ليهو عويناتا.. وكتلت قلبو) وساقتو من أضانو ، ونزل معاها البلد ، وهناك تحول الى "أروتى"!.. كان الخواجة يقول لنفسه أمانى ما وقع راجل !! دحين وكتين غتست فى البلد دى أخير اتعلم كلام الشوايقة ..!!.. كان مستر استيفن يجالس العواجيز،، من أجل اتقان لغة الشايقية.. بعد شوية اتملا بالشفع ، لكنه ايضاً انغمس فنياً ، واصبح ( صفاق) فى الدليب..حتى انتهى من (كورس اللغة ) واصبح يجيد كسر آخر الكلام بالطريقة زاتا.. فعل الزمان فعلته فى الولية ، بعد أن كانت مزدهرة أصبحت ذات شلاضيم !! قرر الخواجة العودة الى "اسكوتلاندا" بمشروع بحث دوّن فيه كل ما يخطر على بالك من كسرات لغة الشايقة ، مكتوبة بأحرف إنجليزية ، لزوم ضبط التشكيل ..
أراد الخواجة قبل المغادرة الى بلاده أن يلقى النظرة الأخيرة على تمثال غردون، الذى كان منصوباً فى ميدان المالية ، فخطرت له فكرة اختبار (معارفه اللغوية ) مع المشلخين من سناجك وزارات شارع النيل .. كان يعترية احساس كامل بالنشوة ، وبأنه يعرف لغة الشوايقة أكثر من كدكى !..
رأى الخواجة عند تقاطع الشارع أحد رجال المرور بشلوخه الشايقية الصريحة ، فقرر أن يقترف مخالفة مرورية عشان يجيب (آخر) الشايقى .. تخطى الخواجة الإشارة الحمراء ووقف فى منتصف الطريق ، دق بوري طويل تيييت تيييتت ، وصاح ينادى ( بالشايقى طبعاً) على رجل المرور المشلخ:ـ آ خرابة ، ما تدينى سفيفى ؟.. ببرود انجليزى أخرج الشايقى حُقة التمباك ورماها للخواجة على الطبلون ، ونسى مخالفته لقوانين الحركة، إذ لا يعقل ان يستخدم شايقى القانون ضد شايقى من الناطقين بها ، وإن لم يكن من المشلخين.. اقترب الشايقى من الخواجة أكثر ، ولم يحفل باحتقان الحركة، وهو يقول للخواجة : (أسناحى ، تنضقلم ، بحتْ جيت من وين)؟..
كانت ( تنضقلم ) هذه جديدة على الخواجة .. اسقط فى يده ، وحلف ( بالتقطعو) ألا يرجع تانى يأخذ كورس متقدم فى لغة الشوايقة..
رجع الخواجة الى المزيد من الاستقصاء والدرس .. فكان كلما سألوه عن كمية المعارف اللغوية التى حصدها من كسرات الشوايقة قال:ـ ( حتيتى .. حتيتى )!.. رجع الخواجة ، و ( الكسرة الياها)!..
دحين يا ناس أكان سألتو أوكامبو وهو الذى ( يمشى ويجى ، يغيب ويظهر فى دنيا الانقاذ !! لو سألتوه :ـ (فهمت شنو من الناس دي)؟ ..
لو سألتموه ... ربما قال لكم :ـ ( تنضقلم)!!..
|
|
 
|
|
|
|
|
|
|
|
Re: تشليخ أوكامبو !.. (Re: عبد الله الشيخ)
|
ياما في البورد مظاليم!
يعني يا استاذ دي المرة العاشرة أقرا ليك
واستغرب
وما تاخد في بالك اخوك مستغرب من يومه الخشا فيه البورد ده
كتاباتك جميلة والله خفيفة وفيها قيمة تاريخية واجتماعية
اعمل شلة بالله والمسألة دي ما صعبة امشي ليك محفل محفلين (بس ما تكتر:نصيحة أخوية)..واتصور والموضوع ببقي ما صعب وبتتحل من مسألة مظاليم البورد..فقلمك يستحق ان يقرأه الكثير
ــ
في سياق منفصل ومتصل
مرة وانا في الجامعة لاقيت خواجة من ناس الآثار
سألني بعربي تافه كدة انت من وين
قلت ليه السكوت في النوبة الشمال
قام سألني بلغتنا النوبية وبدون اي فرق في اللكنات (ار هدوتونا سكوتلا)
ختيت يدي في رأسي لانو ما اتوقعت اصلا الاقي زول برطن اللحظة ديك خليك من خواجة يرطن لي
اكتشفت بعد داك انو نقب عن الآثار في مناطق صاي وصادنقا لاكثر من عشرين سنة وبعرف العمد والشيوخ وعدد النخيل ومواعيد زراعة اللوبياوموسم شراسة تماسيح النيل
وهو بقي في نيل بعد سد مروي؟؟
ابقي طيب يا حبوب
| |
|
|
|
|
|
|
|
|
|
Re: تشليخ أوكامبو !.. (Re: GamarBoBa)
|
تنضقلم يا عبد الله
اتاريك ماك هوين "سهل قيادك "
امانى ما ضحكت لمن بكيت
وحات شيخى مابراك
علا النسعلك سعال ساكت كدى لوجه الله
انت عندك قلم متل ما عندنا ؟
وحات شيخى انت زول براهو
وكتابتك فيها شيتا "كتر "
متعك الله بالصحة والعافية
يا اروع كاتب اقرا له تماما
من امتع ماقرات والمفارقة الكوميدية هنا باذخة
المفارقة السياسية انى امنت بالله
مش عشان زميلى وصحبى
لكين ايمان رحمان كتابة رغم السخرية العالية فى ثناياها الا انها
من صحيم الابداع الصحفى
ربنا يعافيك ويختيك اولاد الحرام
| |
|
|
|
|
|
|
|
|
|
Re: تشليخ أوكامبو !.. (Re: GamarBoBa)
|
| Quote: فقلمك يستحق ان يقرأه الكثير |
ماقلت الا الحق ياقمر
عبدالله دا مبارينى من سنة 1987
من كنا فى جريدة الجريدة
ودى قصة طويلة
لكنه كاتب اتشرف بالقراءة له
فهو صاحب سخرية عالية
هذه السخرية ربما قادته ان يكون كاتبا كوميديا
من اعلى الدرجات
حيث انه ملم بالخفايا كما يتضح هنا فى هذه الكتابة
لاحظ المقاربات التى تلقى بظلالها فى امر اوكامبو ومن مر عليهم من ذاك الخواجة المتزوج من البركل
قلم يستحق التكريم وان يظل عاليا
شكر لك عبد الله انك تكتبنا بهذه الدقة
| |
|
|
|
|
|
|
|
|
|
Re: تشليخ أوكامبو !.. (Re: GamarBoBa)
|
GamarBoBa
وسلمى الشيخ..
اشكر لكم هذا الاطراء ..
يا اخى كبرتوا لي راسى !!.. لدرجة اننى فكرت فى ان اعمل شلة زى ماقال قمر .. لكن شلة عشان شنو .. ؟ يكفينى ان تقرأوا لى .. هذا مقام كبير .. وخلونى واقف فى المقام دا ..
اسأل الله ان اكون دائماً عند حسن ظنكم ، وان يوفقنى الله فى التعبير عن مزاج الناس ..
واقول للاخ قمر وللاخت سلمى :ـ
اننى احلم بوطن لا يستدعى ان نستنجد بـ ( السخرية) للتعبير عن حاله ..
فهل هذا ممكن؟
اعتقد ان هذا ممكن ..
واذا حدث هذا التغيير ( قطع شك) حاكتب بطريقة تانية ..
لكن ( هسعيتى) نحن عايشين فى عصر (التشليخ)!..
ملحوظة:ـ
هسعيتى معناها ( الآن)..
ملحوظة :ـ
( هو بقى فى نيل بعد سد مروي)؟ .. العبارة دي تخلينى اقول ليك ذات العبارة .. ( تنضقلم)!.. اتمنى من سلمى من تلك المنطق الباردة ان ترمى بسهم فى تأويل أو تفسير ( تنضقلم) لك .. أو يشارك حملة اصحاب التخصص الدقيق فى اللغة فى عملية الشرح والتأويل لها ..
سلمى .. وقمر .. اشكركما .
| |
|
|
|
|
|
|
|
|
|
Re: تشليخ أوكامبو !.. (Re: عبد الله الشيخ)
|
يا سلمى ..
صاحبنا قمر دا منتظر تشرحى ليهو معنى ( تنضقلم)!
أكان غلبك تشرحى معناها اسألى عبد الواحد كمبال ، فهو من شوايقة لندن..
أو اقول ليك خلى شتلى يشرحا ..عشان ( يكبنا كلنا)!!
| |
|
|
|
|
|
|
|
|
|
Re: تشليخ أوكامبو !.. (Re: ismeil abbas)
|
اسماعيل ..
نبقى شلة كيف وانت واقف فى التلج دا؟
ارحب بصداقتك وارجو ان تسجل عندك اسماء الشلة ،
قمر
سلمى ،
انت ،
وانا ، ومن يرغب فى شلتنا من الاحبة المفقودين ..
شكراً على المرور
| |
|
|
|
|
|
|
|
|
|
Re: تشليخ أوكامبو !.. (Re: عبد الله الشيخ)
|
والله يا عبدالله
من كلام سلمي
المشكلة طلعت فيني الما صادفتك في زقاقات الصحف اليومية لانو بقراها بشكل غريب شوية
كدي زي ما قلت اشرحوا لي كلمة تنضقلم دي لانو انا قريتها مع السياق وختيتها في حتة غميسة في عربي الشوايقة ومشيت لانو اخوك بفهم عربي المدارس ناس بانت سعاد فقلبي ماعارف حصل ليه شنو ومأكمة يضيق الباب عنها والكشح الجنن الناس جن..لكن تجي تقول لي مثلا البراق برق من منا جاب القرة
قرة شنو!
طوالي بطش شبكة لانو ما درسونا ليها في مدارس
بالنسبة لموضوع الشلة ما عندك عوجة بس ما تسجل لي البورد كله شلة برضو اقوم اطش منكم شبكة
ابقي طيب يا استاذ
_
فك لي تلفونك في مسنجر داخلي واوعدك بزيارة قريبة
| |
|
|
|
|
|
|
|
|
|
Re: تشليخ أوكامبو !.. (Re: GamarBoBa)
|
يا قمر ..
يا اخى الخواجة لما سمع ( تنضقلم) رجع البركل تانى عشان يعرف معناها ..
اكيد سأل عن معناها فى اوساط شوايقة السجانة لكنه لم يقتنع بشروحهم المستفيضة .. انا شخصياً ( حاسي) بمعنى الكلمة لكن ما قادر اقيد معناها الدلالى أو المصطلحى ..
لجأت الى عصام عبد الحفيظ المصور الشهير أدانى معنى ، سألت الصايم ادانى معنى تانى ، سألت شايقية من البركل زاتا اكدت ان الكلمة موجودة فى لغة الشوايقة ومستخدمة فى الوقت الحاضر ..
اذا دخل علينا شايقى نجيض فى هذا البوست احتمال يحلنا من طششان الشبكة دا ..
لو كان معنى تنضقلم بيتلقى بالساهل ما كان الخواجة (كسر كرونة) فى جبل البركل !
اشكرك وارجو ان اراك فى اجراس الحرية / سوق الخرطوم 2 خلف صيدلية المك نمر
| |
|
|
|
|
|
|
|
|
 Re: تشليخ أوكامبو !.. (Re: عبد الله الشيخ)
|
Quote: اننى احلم بوطن لا يستدعى ان نستنجد بـ ( السخرية) للتعبير عن حاله ..
فهل هذا ممكن؟
اعتقد ان هذا ممكن ..
واذا حدث هذا التغيير ( قطع شك) حاكتب بطريقة تانية ..
لكن ( هسعيتى) نحن عايشين فى عصر (التشليخ)!. |
هو شليخ نصاح عاد...
شى مطارق وشيتن تى ..!!
كلامك سمح بالحيّل
عليك امان الله اكان تجينا صادي و تدنا الزوادة..!!
| |
|
|
|
|
|
|
|
|
 Re: تشليخ أوكامبو !.. (Re: عزان سعيد)
|
اخي ودالشيخ..
تحياتي ..
لا اظن ان تنضقلم شايقية الاصل بل من العامية السودانية...
وتقال لمن يأتي بشئ متفرد جديد او يحل امرا صعب والله اعلم...!!
| |
|
|
|
|
|
|
|
|
|
Re: تشليخ أوكامبو !.. (Re: عزان سعيد)
|
الاخ عزان سعيد ..
(لا تحلم بى ما جرى ) دى بتاعة الانقاذ
اما ( لا تحزن بى ما جرى ) دى ياها الغنية القديمة .. حتى الاغانى حين (تتمنقذ) يتغير طعمها ..
شكرا لك ياعزان
ارجو ان توافق على اقتراح الاخ قمر وتنضم الى شلتنا
الاخ مجدى ..
ارجو ان تنضم الى الشلة ..
سلامى لكم
| |
|
|
|
|
|
|
| |
عبد الله الشيخ
GamarBoBa
سلمى الشيخ سلامة
ismeil abbas
Magdi Ahmed Elsheikh
عزان سعيد
فيس بوك
تويتر
انستقرام
يوتيوب
بنتيريست