|
|
 النفاق الاجتماعي .. و طيبة السودانين .. ما هو الحد الفاصل .. تعالوا نناقش
|
نعتبر كسودانين من اكثر الشعوب مجاملة .. يعني احنا من الشعوب النادرة جدا اللحدي الان
و الحمد لله محتفظين بالولاء للاسرة الممتدة .. و لسه عندنا صلات القرابة ذات قيمة عاليه مهما
ما كانت بعيدة .. ده غير الانتماء للمنطقة المعينة او القبيلة المعينة وده بلزمنا باشكال
تعامل اجتماعي ما موجودة في دول كتيرة .. و نحمد الله على طيبتنا و على حنيتنا .
في الشعوب التانية بتلقى المجاملة و بعض من النفاق الاجتماعي .. يعني ممكن لو ما عندك رغبة
تجامل الشخص تجبر نفسك بس عشان ما يزعل .. لكن في حدود للمجاملة و حدود (( للنفاق الاجتماعي ))
لكن عندناما في الحدود دي .. مثلا لو الزول مريض في المستشفى و الدكتور مانع منه الزيارة و كعادتنا احنا كسودانين و بحكم طيبتنا
و حنيتنا و شفقتنا عليه كمريض بنكون قاعدين في المستشفى و ما بنمشي الا نطمئن عليه .. دي الحاجة الحلوة
بعد ده يبقى الاصرار على الدخول ليه (( حتى لو الدكتور مانع الزيارة )) اها اهل المريض المفروض يصروا
على اتباع تعليمات الدكتور يقوموا يحاولوا ليك عشان تدخل و بينهم و بين نفسهم يكونوا مغيوظين منك شديد
لانه على الرغم من انك عارف انه (( الزيارة ممنوعة و ممكن المريض يتضرر )) برضه بتصر تدخل .. اها ده اسمه
نفاق اجتماعي من اهل المريض .. لانهم رغم انهم بكونوا زعلانين جدا من محاولات الزول انه يدخل و يشوف المريض
تلقاهم بساعدو فيه و يحنسوا الدكتور و بتاع الامن ..
و الامثلة و النماذج كتيرة .. اتمنى اننا نحاول من خلال البوست ده نضع الحد بين المجاملة و النفاق الاجتماعي
و طيبتنا كسودانيين ..
همتكم معاي
|
|
 
|
|
|
|
|
|
|
|
Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: Nada Jamma)
|
والله بمرور الزمن يبدو الامر كأن البوصلة مفقودة فى الموضوع دا فبعض الناس يقوم بهذا الواجب خوفا من اللوم بدون رغبة حقيقية خوفا من رد فعل المريض واهله لاحقا ولهذا السبب قد نجد هذا التدافع اللاعقلانى فى الاصرار على رؤية المريض والتحدث معه رغم انه فى بعض الاحيان يكون فى العناية المركزة والدخول اليه ممنوع وايضا ومن طرف آخر نجد ان هناك من يقوم بالزيارة ورغبته الاكيدة فى الاطمئنان على المريض وعشان كدة بنقول انو البوصلة مفقودة ..
قد يلزم وعند التطرق بتوسع لهذا الموضوع التعريج الى عاداتنا الاجتماعية الحسن منها والسيىء كما لابد من التطرق ايضا الى التطرف والمغالاه فى ابداء المشاعر السالب منها والايجابى فنحن نتطرف فى كل شيء فعندما يكون هناك سوء تفاهم او خلاف بين اثنين تتملكنا مشاعر الغضب وتصل احيانا الى الرغبة فى القتل وقد يكون موضوع التفاهم تافها وتستمر هذه المشاعر السالبة لفترات طويلة عكس مانرى فى شعوب العالم حولنا فى ان فورة الغضب تنحسر بإنحسار اللحظة التى وقع فيها الخلاف وبعدها ينعل كل منهما الشيطان ويعودان الى طبيعتهما ..
| |
|
|
|
|
|
|
|
|
 Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: عابدون محمد عابدون)
|
ست البوست ..سلام
كنــت مشرف على دورة تدريبية يتشارك فيها الرجال والنساء ..
فى وجبة الغداء كان النظام (( كل ســتة فى مجموعة ))
مجموعة كانت كلها نساء ( 1 ) لــم يمدو يدهم الى الدجاجة بعد مرور اكثر من عشرة دقائق .
مجموعة كانت كلها رجال ( 2 ) لم يتبقــى من الدجاجة اى شـى بعد العشرة دقائق .
مجموعة مختلطة بين الرجال والنساء ( 3 ) كان هناك متبقــى من الدجاجــة .
فذهبــت الى مجموعة ( 1 ) وطرحــت السؤال لماذا النساء يأكلن ( الضلع / الدجاجة ) اخر حاجــة فى الصينية
والمثل السودانى بيقول .. قلة الفهم اكل الكسرة وترك اللحم ..
فردت اخت كريمة بأن هذا جزء من النفاق الاجتماعى الذى تمارسة النساء ..
فمخافــة ان يقال عليها شرفانة / ....
لن تبادر احداهن الى صحن الضلع / الدجاجة ..
......... ( دا الســرد )
......... ( النقاش بعديـــن )
| |
|
|
|
|
|
|
|
|
|
Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: عابدون محمد عابدون)
|
الاخ عبدون اشكرك على مرورك الكريم و اضافتك الثرة .. و فعلا زي ما قلت البوصلة مفقودة
لكن انا بالتحديد بتكلم عن الوضع لما يكون مجرد نفاق اجتماعي .. و بالنسبة لحالة المستشفى
في البكون شفقان لماما بقدر يمسك نفسه وده معذور . اما البكون هدفه بس شوفوني او لشيء في نفس
يعقوب دا النفاق الاجتماعي الغير محمود.
و بتمنى انك تتطرق لكل العادات الاجتماعية السيئة البتدخل تحت بند النفاق الاجتماعي و نشوف
سبل التطوير و انشا الله تعم الفائدة
و كتر خير و بارك الله فيك على المشاركة القيمة
| |
|
|
|
|
|
|
|
|
|
Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: Nada Jamma)
|
تعرفي انا عندي كلام كتيييييييييييير هنا
لكن اكتفي بذكر النكتة التالية
واحد اخونا من آل المتمة ( بلدياتي )
عمل ليه حمام وكانت الدنيا شتاء قارس
وصادف يوم الانتها ن بناء الحمام ان جوهو جماعة من البلد يسلموا عليه وكان الوقت ليلا تعدى صلاة العشاء
وكطبيعة متمية غارقة في الكرم اراد ان يكرمهم بشاي اعتذرو لانو شربوه عند ناس فلان
قال ليهم حاجة باردة
قالوا شربوها عند ناس علان
قال يسوي ليهم عشا حلفوا باليمين انهم اتعشوا عند فلتكان وانهم مستفين طب
وامعانا في الكرم منه
حلف عليهم بالطلاق الا يستحموا
واترك لخيالك العنان
هل جاماوه واستحمو والا لا ؟
| |
|
|
|
|
|
|
|
|
|
Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: Nada Jamma)
|
صباحكم خير و يومكم جميل
من الاوجه الاخرى للنفاق الاجتماعي العندنا نحن كسودانيين الاهتمام الشديد براي الاخر
حتى لو كان الراي ده غير منطقي و ما عملي .. يعني مثلا في المناسبات الناس بتفوت طاقتها
و امكانياتها بصورة رهيبة عشان كلام الناس و قلنا وقالوا و شوفوني .
دي طبعا الكلام فيها ممكن ياخد كتب و معاجم لكن خليني استفيد من مساهماتكم
كدي قولوا لي .. شوفوني رايكم فيها شنو
| |
|
|
|
|
|
|
|
|
|
Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: Nada Jamma)
|
الاخت ندى
السلام عليكم
والله موضوع حيوي جداً، بدليل المشاركات الجميلة في الموضوع!
وطبعاً هناك حكايات ونماذج كتيرة، تدل على أن المسألة (جايطة في النص) ما بين النفاق الاجتماعي والطيبة بلا ضفاف!
وهذه المسألة في النهاية تعتبر مواجهة صريحة للشخصية السودانية!
ومواجهة لبعض عيوبها الكبيرة، من أجل الحفاظ على إيجابياتها المشهود لها من الجميع!
والنموذج الذي ذكره الأخ عمر عثمان معبر جداً!
باختصار: نمتلك شيء قيم جداً، ولكن إذا لم نسعى بجدية للحفاظ عليه، حننقسم إلى أصناف:
صنف يمارس السذاجة والبساطة الفجة، تحت لواء الطيبة السودانية!
وصنف يعمل على استغلال هذه الطيبة في بني وطنه! ويُمارس معهم شتى ضروب الاحتيال المالي والسياسي والديني !
وصنف يمارس العقلانية واللباقة والإتكيت مولياً ظهره لتلك القيم الجميلة التي نشأنا عليها وعُرفنا بها!
المهم: الموضوع موضوع كبير، وياريت الناس تهتم به، وتتناوله من مختلف الزوايا!
| |
|
|
|
|
|
|
|
|
|
Re: النفاق الاجتماعي .. و طيبة السودانين .. ما هو الحد الفاصل .. تعالوا نناقش (Re: صلاح عباس فقير)
|
الاخ صلاح عباس
السلام و الرحمة و البركة
(( صنف يمارس السذاجة والبساطة الفجة، تحت لواء الطيبة السودانية!
وصنف يعمل على استغلال هذه الطيبة في بني وطنه! ويُمارس معهم شتى ضروب الاحتيال المالي والسياسي والديني !
وصنف يمارس العقلانية واللباقة والإتكيت مولياً ظهره لتلك القيم الجميلة التي نشأنا عليها وعُرفنا بها!
المهم: الموضوع موضوع كبير، وياريت الناس تهتم به، وتتناوله من مختلف الزوايا! ))
عجبتني جدا التصنيفات العملتها دي و ياها ذاتها المخوفاني .. الحقيقيي انه احنا بنتميز بارث
حضاري في شكل معاملاتنا بتفقده كتير من الدول .. و سببه الطيبة الشديدة بتاعت الانسان السودان
و الحاجات الكويسة فيه ما دايرين نفقدها بسبب العقلانية واللباقة والإتكيت زي ما قلت .. و تبقى
يا قول حبوباتنا (( فلهمة عوراء و شيل بطارية في القمراء )) .
في نفس الوقت لازم الزول يكون براعي حقوق الاخرين و خصوصياتهم و خير الامور الوسط
انا بالجد شاكرة لمساهمتك القيمة و بتمنى انك تواصل معانا عشان نصل لحدود تمكنا من اننا نكون افضل و رافعين
راسنا دايما لاننا سودانيين
| |
|
|
|
|
|
|
| |
عابدون محمد عابدون
بدر الدين اسحاق احمد
omer osman
د.محمد حسن
فيس بوك
تويتر
انستقرام
يوتيوب
بنتيريست