|
السيد : الهيئة القومية للمياه ... الموية قاطعة
|
ازيك ياخ وليك وحشة والله ياخ انا مواطن من مواطني ولاية الخرطوم ... كان عندنا صهريج يقينا عذابات انقطاع المياه المهم انو الصهريج ده فيهو مشكلة وبالتالي اعتمادنا بعدالله بقي علي (مواسيركم) . الموية دي قاطعة ليها يومين بالتمام والكمال ... والحاجة الغريبة انها بتجي مباشرة بعد الناس تنوم ... (موية هي ولا حرامي) . وانا عارفكم مشغولين ومافاضين للقصص الحزينة دي لكن بي صراحة عايز استفسر من حاجة محددة واللذي خلقني ما عايز اقول ليكم عايزين موية وموش عارف ايه . لايماني التام انكم بتعرفوا مصلحتنا أكتر مننا وبتعرفوا حوجتنا للمياه اكتر مننا وتعرفون كذلك شغلكم اكتر مننا .
العايز أسألو بي بساطة الحكمة شنو من انو الموية مثلاً تجيبوها اتنين صباحاً وتقطعوها مع آذان الديكة ؟ هل المسألة دي عندها علاقة بتقنيات محددة ولا هو مزاج شخصي للمهندس المسؤول من الوردية ولا مثلاً الموية مثلا ما بتنساب في المواسير الا في اجواء شاعرية ؟
والبمنع شنو مثلاً انكم تجيبو الموية مع صياح الديكة وتقطعوه مع آذان المغرب مثلاً ؟ طبعاً ما حأقول ليكم مفروض تعملو لينا برنامج معلن بالقطوعات لأنو عارف انكم مشغولين ومافاضين للقصص الميتة دي
أها خلاصة النتائج : في الغالب أصلي الجمعة بالتيمم (في دولة يذبحها النيل من الوريد الي الوريد) واحتمال زاتو ما القي لي صعيد طاهر وبالتالي ما اصلي الجمعة
|
|
|
|
|
|