|
|
 مستشفي امدرمان العشق الذي لاينتهي ابدا
|
الاستباليه هو الاسم السائدفي امدرمان حتي وقت ليس ببعيد لي كل سكان امدرمان
وكما كان معروف لدي جميع سكان امدرمان كانت مستشفي امدرمان تجمع لي كل الناس
وليها مكانه خاصه ما عشان كانت هي المعلم الاثري او المكان الجميل اواو...الخ
كانت تجمع للحبايب؟
عندما كونا صغار بنتمني يسقونا الاستباليه وبنكون فرحانين جدا بي المشوار
وما بنكون عارفين المريض منو؟وماهي صله القرابه وماعارفين المرض شنو؟
المهم انو حانمشي الاستباليه؟
والفرحه بتكتمل لما نصادف بص العم (ميدو)وكان اجمل بص وكان البص الوحيد البنافس
بصات ابو رجيله وكان عندو(بوري)مختلف والعم ميدو كان شخصيه محبوبه لانو كل الشارع
بشاغل العم ميدو وخاصه العم (علي)بتاع البرسيم كان بقعد في ماسوره علي وبقولوا
كان اسم المحطه علي اسمو.
وكانت رحله البص طويله من المهديه لي مستشفي امدرمان كنا بنركب من محطه شقلبان
وكانت المحطه الثالثه بعد اخر محطه ومحطه احفظ مالك وشقلبان.وجار النبي.الانصاري
والموصلات,, وماسوره علي ,,وكبري النص ,,والبلك,,والمدارس,,واشلاك البوليس,,واسماعيل الطهار,,
ووو ومكي ود عروسه,,وكثير لحدي مانصل مستشفي امدرمان......
وانا كنت اكثر زول محظوظ في نظر اولاد الحله لاني بمشي المستشفي بي استمرار
بي حكم اهلي بجو من البلد للعلاج وياكافي البلاء مافي زول واحد بجي فيهم يقول ماشي الحج
اواي حته ؟
وكان اي ود من اولاد الحي او الشارع بالذات بقولي ارح كلم امي عشان امشي معاك المستشفي
ومااقول لي امو انو هوما قال كده انو انا المصر عليهو واحنسها ليهو وكده لما ندخل
بيتهم انا بغير الاتفاق وبقول ليها ولدك اشبك وقال ماشي معانا المستشفي وقال اجي احنسك
عشان تخليهو يمشي معانا.... وعيني
ماتشوف تاني الا النور..
|
|
 
|
|
|
|
|
|
|
|
Re: مستشفي امدرمان العشق الذي لاينتهي ابدا (Re: عبدالله حمد العالى)
|
عند ماكبرت شويه في العمر اصبح المشي للمستشفي ملزم ومعاهو ثوابت
بتشيلها معاك (العمود,,,وتيرمس الشاي,,,وحفاظه المويه,,,)واهم مافي الحاجات
دي كلها (الجنيه) مامعروف كان رشوه ولا حافز معروف بس كان كثير جدا جدا كان
اكثر من مصروف المدرسه .والجنيه ده كان زي مابمشي بيهو بجي بيهو اي شي ملح
طبعا زوقه من كمساري وزوقه من بواب مستشفي..
وبعدين الامراض دي كانت زمان ثابته وواضحه امراض بطن ماعارف الناس دي زمان بتاكل شنو؟
وكان امراض العظام كثيره برضو... وكان المريض
بعيش كثير خلاص حتين يموت مازي امراض الزمن ده
ودو وجابو ميت(سبحان الله)
وانا طبعا كان بهمني الجنيه وبفرحني المريض البقعد كثير في المستشفي
(مصائب قوم عند قوم)
والطريف في الموضوع مره رجعت من المدرسه ولقيت الحاجه مافي والبيت فاضي
انتظرته شويه الحاجه ماجااات وزمن المستشفي جاء والحاجه ما جاااات والخوفه علي الجنيه
والحاجه ماجاااات قمت مشيت لي جارتنا كلمتا وانو مواعيد الغداء للمستشفي جات وكده
والحاجه ده ما عارفها وين؟
وبكل طيبه سودانيه قالت لي انا ماعارفاها وانا كنت مافي لاكن بسوي ليك الغداء
شيلو وديهو وشلت الغداء ومشيت؟
| |
|
|
|
|
|
|
|
|
|
Re: مستشفي امدرمان العشق الذي لاينتهي ابدا (Re: عبدالله حمد العالى)
|
اها جارتنا الطيبه الله يرحمها سوت لي الغداء
ومعاهو( تيرمس الشاي,,, وحفاظه المويه) واتوكلت طلعته
عشان اللحق بص العم ميدووفعلا وصلت المستشفي ومشيت علي العنابر
وصلت سرير عمنا عبداللطيف لقيتو فاضي قلته الناس ديل قاعدين تحت
ونزلت اشوف في النجيله مالقيت اي زول طلعته تاني العنابر المره الثانيه
دي سالت قالوا اعمك اتوفي من الصباح ,,,,ومات عمي عبد اللطيف وضاع معاهو
الجنيه الماشلتو اليوم داك
العشق الثاني
العشق الثاني للمستشفي كان في اول مادخلت المدرسه المتوسطه
كانت في ماده اللغه الانجليزيه ماده جديده بالنسبه لي وكنا بنسمع انها صعبه
وما بتتفهم وكلام من البقولوا الزمن داك..
كانت في بنيه لذيذه ووصغيرونه بريدها ريده المراهقين ديك وكان بمشي بستناها في
عماره شانتير جوار مدارس كرري المتوسطه في الثوره الخامسه وكان عندها سبعه اخوان
وابوها راس مالي كبير معروف وكان صاحب محلات كبيره في سوق امدرمان
وكانت البت من اسره كبيره وكلام بت ماشه مع ولد الزمن داك صعب وعيبه كبيره للولد
والبت في نفس الوقت .
ده غير لو لاقوك اخوان البت يقتلوك واولاد الحله يدقوك وحالتك تتبشتن وسمعتك تخرب خراب
فما بالك بالنسبه لي كان عندها سبعه اخوان بس اذا قلنا اخوانا ديل اي واحد عندو صاحب
ديل كده 14 غير اولاد جيرنها يعني ديل بلقوك بلاقوك ,,,,,
فقمت اقنعتها انو تسجل في مدارس الارساليه كورسات لغه انجليزيه عشان نلقي طريقه ندرس سواء
ونتقابل وكده وفعلا سجلت ومره شهر واحد او شهرين ناس المدرسه جابو قرار الاولاد يوم والبنات يوم
(خربوا لينا الرصه)
قلته ليها نمشي مشوار بس المستشفي ونجي البت خايفه ماشه وتتلفت وانا خايف وماشي واتلفت
المهم بي جاي جاي وصلنا المستشفي ودخلنا والدخله الياها ثلاثه سنه حب شديد في مستشفي امدرمان
عز النطاره والجو الحار داك نقنب بعدين من بعض شويه ونبدا الكلام والنقه مره نقراء ومره نضحك
المهم ماكان في زول بخطر في بالوا انو ديل متواعدين هنا او مجرد فكره ساي تراودهم ومرت الايام
بي مرها وحلاوتها والناس كبرت ووعت للدنيا
وماكنت فاكر انو لسه في علاقه وجدانيه او ربانيه حاتربطني بي مستشفي امدرمان...........
يكمل
| |
|
|
|
|
|
|
|
|
 Re: مستشفي امدرمان العشق الذي لاينتهي ابدا (Re: عبدالله حمد العالى)
|
بعد الزول كبر في العمر واصبح في المرحله البكون فيها مسؤل من تصرفاته وتكوين الشخصيه الزاتيه البتميزو من دون الغير
والاجتماعيات الملزمه ووو.....الخ من مطلبات الحياه في سودانا الجميل بي عاداتو وتقاليدو
اصبح المشي لي مستشفي امدرمان للواجب الملزم والاجتماعيات المختاره
وفي مره صادف مشيت مستشفي امدرمان لي زياره جار عزيز لينا في الحي وكنت في قمه الضيق والتعب والزهج
اليومي والسب والنعل المتواصل للحياه والشكوه من الظروف المعيشه والي اخره من الاشياء التافه حقيقه في الحياه
فلما دخلت علي جارنا المريض زياره خفيفه وخرجت انتابني احساس بالراحه من غير ماادري وحسيت اني اسعد انسان
في الحياه يمكن لاني شعرته بي قيمه الصحه والعافيه التي لا تساوي مال وحمد الله علي ذلك واصبحت من غير ماادري
اجوب معظم عنابر المستشفي واتمعن في حاله المرضي واحمد الله علي النعمه الانا فيها .,,,
ومن ذلك الوقت وانا اتردد علي مستشفي امدمان بااستمرار وبالاخص كل ماازعل من صديق اوغريب
او لما اشعر بالفلس الشديد ماعندي حل غير الركوب والذهاب للمستشفي والتمعن في المرضي والخروج منها
في حاله جميله جدااا
وفي الفتره الاخيره باللزات كثرالمشي للمستشفي ولدرجه اتعرفت علي شباب يعملون هناك من دكاتره ودكتورات وعمال
وموظفين وممرضين وفيهم الباادي عملوا فقط وفيهم الانساني بصوره تخليلك تغير علي نفسك من انسانيتهم الزائده في مساعده
المرضي علي حسب ظروفهم المتاحه من غير عنصريه في التعامل او جوديه او افضليه شخص علي اخر اورياء اوبوبار او اي
شي اخر بل هي انسانيه ومقصود بيها وجه الله تعالي وحب في عمل الخير ومساعده الغير
ومن غير تردد اصبحت من ضمن هذه المجموعه الصغيره من الشبان والشابات البتاعملوا بالمصداقيه فقط والتكليف المتاح عندك
وعند الغير والتكليف عباره عن (شراء روشته دواء لمريض) اذا كنت مابتقدر تعتزر واذا كنت بتقدر انت او احد اقاربك او اصحابك
حسيت انو ممكن يساعد توافق وتمشي انت شخصيا المستشفي تستلم الروشته وتصرف الدواء وتجي تسلموا وتكون حليت مشكله وساعدته
ناس واجزيت شكر ونلت ثواب ان شالله
ا لمهم الخلاني انا اقول الكلام ده شنو؟ انو انا عارف في ناس خيرين في المنبر ده وعندهم اصحاب خيرين
منكن انضموا لينا والخير بعم لي كل الناس واي زول حاسي انو منكن يساعد ما عليهو غير يرسل لينا رساله فيها رقم تلفونه
وينتظر متي مايصلو تكليف ماعليهو الا المشي للمستشفي و القيام بالواجب ,,,,,,
وربنا يوفقنا لي مافيهو الخير
| |
|
|
|
|
|
|
|
|
|
Re: مستشفي امدرمان العشق الذي لاينتهي ابدا (Re: عبدالله حمد العالى)
|
امدرمان لذيذة خلاص,,,سلامات يا العلي ليك وحشة.
كنا في الستينات بنجي زيارة لي حبوبتنا ونقعد معاها
اسابيع في منطقة الشهداء بالقرب من بوابة ابو العلا
وبتذكر كنا بنلعب كورة في ميدان التنس خلف المستشفي.
زيارة المستشفي زمان فسحة زي المشيت السينما ولا الكورة
وطبعا لازم تطلع ليك بي هدية من المستشفي صفارة اي لعبة
زمن جميل يا عبد الله , وفي الصباح نتسكع في المحطة الوسطي
مع عمك جاد عليه رحمة الله وعم خليل بتاع حلاوة المولد ونعرج
شوية علي ميدان الاسكلة,, حليل قهوة ود اللغا وسينماء برمبل
وبار استانيوس ووووووو وفعلا امدرمان لذيذة خلاص .
| |
|
|
|
|
|
|
| |
عبدالله حمد العالى
سيف الدولة كامل
فيس بوك
تويتر
انستقرام
يوتيوب
بنتيريست