منقول: شموس الأمين : المدراس والتسجيل والانتخابات

مرحبا Guest
اخر زيارك لك: 03-29-2024, 01:44 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الرابع للعام 2009م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
12-02-2009, 06:24 PM

Hani Arabi Mohamed
<aHani Arabi Mohamed
تاريخ التسجيل: 06-25-2005
مجموع المشاركات: 3515

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
منقول: شموس الأمين : المدراس والتسجيل والانتخابات

    للكاتبة السودانية الواعدة شموس الأمين :

    Quote: صوتك في ذمتك (1),,المدارس والمغايس,,يوم من دفتر الذكريات ,,بعض التحايا واللاتحيات,,Share
    Wednesday, November 4, 2009 at 1:43pm

    الزمان : بداية التسعينات,,المكان : ليلة صيفية,,

    هززت عروستي الصغيرة وسرحت ليها شعراتا

    ولعبت معاها طباح وشليل وين راح

    وفجاة هزتني يد امي واقتلعتني من احلامي الوردية,لي مواعيد المدرسة

    شربت الشاهي بتمهل وانا افكر في يومي الطويل المنتظر

    ولبست فستاني البيج المكشكش وشرابي اب ركامة داك وانتعلت شدتي

    وجلست الهو بشرائطي البيضاء واصنع منها ورودا

    اكيد سنة رابعة دي دي اخر سنة للشرايط والتساريح

    لانو امبارح جلدوا بنات خامسة لحدي تامنة المالابسين طرح

    انتو قايليني بكضب؟؟وحات الله من زمان بجلدوا في الهدوم

    و

    اشعر بانعدام الاكسجين وسط طوفان الذكريات,,ثم خففت علي نفسي,

    يايما بركة,علي الاقل,,ضوقنا اللبني في العالي,,,

    غايتوا احسن من طلبة الزمن دا,,لابسين المبرقع والصاقعة

    لان هذه البلاد رقعة في ثوب الدنيا,,نشاذا في نسيج الانسانية

    لبس عسكري للمدارس؟؟؟ يخترق الحزن احشائي

    يلفني الذهول كلما تمعنت في ماحدث لهذه الخرابة المسماة وطن


    لاتحية ,,,,الي كل من ارهق الطفولة البريئة

    **** **** *****

    طرحت الخواطر جانبا حين لاحظت غيمة علي وجه امي

    ونظرات مستنجدة الي والدي,,الذي تشاغل بربط حذائه الباتا

    عامل بسيط في مكان ما,وشم القهر وجهه و وقع الفقر عليه علامة الجودة,

    ,لم يصرف مرتبه منذ بضعة اشهر,,ومديره يستبدل عربته كل بضعة اشهر

    ايييييييه ابي كالاخرين,,القهر مائدة هذا الوطن,,يطعمها الجياع

    القلق اليومي,,طبعا ,,السندوتش بي شنو؟؟ وطبعا حق الفطور مافي

    اكيد التلاجة خاوية علي رفوفها, ونظر اليها بعبارة صامتة اظنها تقول

    ((ماتعايني للتلاجة الفاضية يامرة,بكره نبيعا هي والتلفزيون زاتو

    كانت امراة بسيطة,,وصمت الاستكانة عينيها,

    دموعها تمطر دوما في احشائها

    ارتجفت كسمكة لفظها المحيط في لحظة غضب,,,,وسكنت تماما

    ادركت الموقف ,,الرحلة شبه اليومية لي جارتنا ست البنات

    خالتو ستنا امي قالت ليك ادينا جني جداتين احشي بيهم))

    وقبل ان اكمل طلبي المشفوع بالاعتذارات نهضت ستنا بامتعاض

    وعزلت لي اصغر بيضة عندها,كانت تبيعه بالاجل لي نسوان الفريق

    اما باقي اخوتي الصغار فتغافلهم امي بشوربة بصل علي ارغفة بائتة

    لاتحية الي كل من سرقنا وامتص دماءنا واكتنز من حرام مرتبات البسطاء

    احذر ان تضيع/ي تسجيل اسمك/ي,احذر/ي ان تدع/ي لهم فرصة العبث مجددا

    ,احذر/ي ان تكون الانتخابات سباقا يعدو فيه حصان واحد,,



    *** **** *** ****

    وصلت متاخرة كالعادة مع هموم الصباح ووجدت الجميع ترك لي مهمة

    مسح الفصل كالعادة,,اتمحركت في المسح عشان ننجلد كلنا

    دق الجرس عاليا,,وهرولت ناحية الحوش مع الجميع للطابور

    ست نفيسة الناظرة,,الملك المفدي,,تقف بصلف والحاشية من خلفها

    قرانا نشيد العلم كباقي الاناشيد المعتادة,,لحن وكلمات بلا ادني احساس

    لم يكن الوطن سوي كلمة في المطالعة واحيانا التاريخ,

    اخدنا جلدتنا علي النضافة الماكملت وكنت اسعدهن

    هيييييييييي هههيييي :شان تاني يخلن لي المسح

    لا تحية الي تلك البدايات الصباحية السخيفة

    *** **** ****
    اصطففنا عشرة خلف تلك الكنبة الخشبية الطويلة القاسية

    جاءت ست انوار,,عجوز شمطاء,,لم ادرك سر كرهي لها

    قسوتها علينا,,ام بلادتي في الرياضيات؟,,من الامانة بمكان ان اذكر

    اكبر انجازاتي في الرياضيات, كان 23 من 60,انتو دايريني انجح كيفن

    بتدينا درسين في الحصة,,الدايرة تنجح تدخل معاها دروس خصوصية

    مغيوظة منها,لكين صفية الجمبي قالت لي هم زاتم مابدوهم مرتبات

    وفي خضم طلاسم القاسم المشترك الاعظم والاصغر,,دخلت علينا

    الناظرة ومعها رجل ملتحي مرتديا لبسة سفاري ينظر الينا كالصقر

    ااه موجه جديد,,وستبدا التشريفات المعتادة,,قيام واقروا النشيد يابنات

    اقسمت يانفسي لتنزلن,,لتنزلن او لتكرهن,,مالي اراكي تكرهين الجنة,,

    والموجه شغال ياصابعينو الاتنين,,والمديرة مزهوة بهذا النبوغ

    الموجه طلع مبسوط,,واصدر حكمه المنتظر:جزاك الله خيرا ياست نفيسة

    جيل جهادي بحق,,تاصيل التعليم واسلمة المناهج دا دورنا الرسالي

    انفرجت اسارير الناظرة كانها تلقت خبرا سماويا

    فرحنا بالاطراء,, وقوتا في نفسي : ياربي جهاد زي الفي ساحات الفداء

    وتذكرت دموعي الغزيرة وانا اشاهد (جند الله) تحارب (كفار الجنوب)ه

    وتمنيت ان اذهب هناك واري الملائكة واشم رائحة الجنة ورددت معهم


    امريكا روسيا قد دنا عذابها,,,علي ان لاقيتها ضرابها


    وبين دموعي واهازيج الشهادة,,احضرت حجر سنين لي روسيا

    و طوبة كبيرة محرقة لي امريكا,,استعدادا ليوم الصقعي داك


    احيييييييي, احييييييييييي تاني

    ,لاتحية الي كل من لوث ادمغتنا الصغيرة بالخزعبلات

    *** **** ****

    الحصة التانية عربي,,ست اشراقة..اللوستاذة دي كتر خيرا

    كنا بنريدا شديد,,حصة العربي اسمح حصة,,الاناشيد والمطالعة

    مريم الشجاعة الوقفت القطر,,وبرز الثعلب يوما في ثياب الواعظينا

    ودجاجي يلقط الحب ويجري وهو فرحانا

    الكلام دا هسي بباااااااح

    طبعا لازم يلغوا مريم الشجاعة,عشان مادايرين قطر الفساد يقيف

    وموضوع السعلب دا مفصل عند ترزي حريف علي مقاسم

    والدجاج يقيف لانو حب عيش للناس مافي خليك من الجدادات

    وهنا يطيب لي بمزيد من الحزن ان الفت انتباه السادة الكرام ان

    الاحصاءات الحكومية زاتا,,بتقول ان هناك مجاعة العام القادم

    خاصة اذا دقست/ي و صوت/ي لي كوز,,يسرقكم علي عينكم

    *** *** ***

    رغم بعض الالم ايامها,,,كان هناك بعض الالق

    شفع الزمن دا مسخوتين,, الحاجات دي كلها اتلغت,,

    ورحلات الجغرافيا,,ومنقو زمبيزي وفي القولد التقيت بالصديق

    ياحليلو استاذ النعيم بتاع الجغرافيا.

    .قال لينا الجنوب دا مهمش عشان كدا الحرب قامت

    ست نفيسة وصلتا الاخبار,,رسلت ليه وادتو جملة وادة

    مادايرين استاذ رجعي,,, في ظل توجه حضاري


    استاذ النعيم شنقتو العبارة,,خت الطبشيرة ومرق برة المدرسة,, وبره التدريس كلو

    اليوم هناك فوضي خرافية,,تذهلك من شدة اتقانها,,,المناهج تغيرت

    جات بدالا خزعبلات كبيرة, كوننا وضلنا ومنزلنا وعشنا,وكلو كوم والداهية

    الاسمو الاسباين دا كوم,,خلا الناس ماعندها تنقليشي بي تعريفة,

    احيييييييييي,,,, ,تهي انقهي يابلد



    لاتحية الي وزارة التعليم الغبية ومناهجها التالفة وسياساتها الرعناء

    اتحسر علي اطفال اليوم.,يظلون نهبا لمزاجات وزارة التعليم كانهم فئران تجارب

    ,اخاف ان ياتي زمن يتحسر فيه اطفال اليوم علي اقرانهم بعد سنوات

    خاصة اذا انت يا الجني/ة المطوفش/ة ,, مشيت/ي صوت/ي لي كوز

    *** **** ****

    جاءت اللحظة الذهبية في اليوم الدراسي,,جرس الفسحة دق

    وهطلت السعادة الغامرة علي وجوهنا وقلوبنا

    فتينا فطوراتنا في جريدة كبيرة,والتهم الجميع البيض والطعمية وظل

    الفول بحباته الكبيرة يسبح في فضاء الجريدة في كساد مؤقت

    لمحت بطرف عيني نجاة تتسلل الي جريدتنا المرمية, كعادتها اليومية

    لم تكن كالكثيرات تملك حق الفطور

    وضحكت في سري,,لابد انها تحسبنا من علية القوم

    ههههههه,,نجاة يكون ماعندهم خالتوست البنات بتاعة الجني جدادات


    لا تحية ولاصفح ولا تسامح مع تلك العصابة التي افقرت البلاد وامتصت دم العباد

    قديما شكت العجوز الفقيرة الي الحاكم: اشكو قلة الفئران في بيتي

    وانا اشكو اليك ياربي من الحاكم

    اشكو في بيتي انعدام الفئران,, و في وطني كثرة الكيزان

    اجابني هاتف ما

    :غبية,,لاتفهمين,, في مخزن البيت انعدمت سرقة الفئران

    لانهم اصبحوا يقتاتون علي مخزن الشعب تحت اسم الكيزان

    ادونا شنكل ننط معاكم ونتلب جوة مخزن,,ناخد فرصة الحرمنة دي

    ااااه بلد كلو حرامية..ماشبعتوا لسه,,تاني دايرين تترشحوا؟؟؟

    اظنهم لو طالوا اعضاء الموتي لسرقوها

    احذر يامواطن ياغبيان ,,,انو تصوت للكيزان


    **** **** ,

    يازووول ,,انا مالي ومال قصة الانتخابات دي,,انا لسة في المدرسة

    والفسحة لسة شغالة

    قوام جرينا لي حاجات التسالي و القنقليز والنبق

    والسفوفة والداردومة والدوم وحلاوة قصب وباقي اللغاويس

    ملحوظة : ينتهي الشرح بانتهاء المصطلحات ولاعزاء للشهادات العربية


    *** ****

    كانت الفتيات يتهامسن وينظرن لي اولاد

    المدرسة الجمبنا,,كانوا شينين ومكرفسين وكمان بستعرضوا

    هووووي يابنات , داك منو النضيف المسبسب الواقف براو,؟,

    صفية التبر جيابة الخبر,, غربلت الشمار سريع: : دا علي

    اهلو جوا من السعودية قريبات دي,,اهاااا تراهو مابشبهم المغبشين ديل

    بكرة يابنات نجيب ليهم فتايل جرسلين ,,وتطايرت الضحكات الشامتة

    حاشية :

    هذا,,ومن المفيد للذكر انو نحنا كنا بنات مادبات,, وحات كتاب الدين

    *** *** ***

    ,وشفتا سارة,, واحدة معانا في الفصل

    مرة اللوستاذة قالت اي زول يتكلم عن مهنة الوالد,

    ,البت دي قالت ابوها كان موظف,, بس شالوه في الصالح العام

    لكين امها شغالة تاجرة,,ساعتا اتحيرنا.تجارة شنو؟,, فهمت يادوب ,

    كانت بتحشي السندوتشات مع امها ,,وتبيع لي زميلاتا بدون خجل

    تحية صادقة لكل النساء المكافحات,ست الشاي والفطور

    وست العرقي زاتوووو,,

    الفقر سبب الانحراف الاول,,لعن الله الفقر ودراكولات دماء الشعب

    وقال كمان شنو ؟ دور الدولة المحافظة علي المظهر العام وجلد المنحرفات

    ياحلوين الدولة دورا موية وكهربا ووظائف وتعليم وصحة اول

    ,التشوف انحرافا,,و,تاني التكابس لي البنطلونات وستات العرقي

    هو في ست عرقي اكتر من الحكومة دي؟؟؟ه

    احييييييي من البلد الساطلة ليها عشرين سنة دي

    ااااي الكلام ليك يالمطير/ة عينيك/ي,,داير/ة تصوت/ي لي كوز؟؟

    انت بس لازم تسجل اسمك,,وخلي التصويت لي منو دي بعدين

    وحات الله كلنا مجهجهين


    *** ****
    هووووووي انا ماعندي شغلة ولا عارفة زاتو اصوت لي منو,

    خلوووووني في سغرتي دي

    ,انا هسي في المدرسة و جرس الفسحة دق,,جرينا علي الفصول

    ,,ست فوزية,,ام الفصل.. جاءت والشرر يتطاير منها

    اول شئ البت الالفة السنيحة ديك ادتا لستة المهرجلين

    صوت عنج طوووويل انطرح علي الضهور

    احييييي التصبر لي الالفة العاملة زي العنكوليبة دي

    نهاية اليوم اقلام الحبر البرميل (متذكرينها يا بروليتاريا؟) مليناها

    ,من محبرة بت الناظرة ,,والباقي كشحناهو في كراسات الالفة

    عشان تاني تخلي الشمشرة والقوالة

    *** **** ****
    بالطبع لم تكن اخر الاثافي,, كانت هناك لستة اخري غير لستة الالفة

    لستة المادافعين رسوم الامتحانات

    انا طبعا الموضوع دا الله حلاني منو

    امي باعتلي دبلتا الاسبوع الفات ودفعت الرسوم

    المادافعات انطردن,,

    ,عرفنا انو واحدة من المطرودات راحت ولقوها اهلا بعد المغرب

    **** ****

    ملحوظة : ما اهاج ذكرياتي اليوم اني سمعت توا :

    انو قبل اسبوعين طفلين من توتي انطردوا من المدرسة

    مادافعين الرسوم ورجعوهم براهم البيت يجيبوا القروش,

    ,خافوا يرجعوا قبل المواعيد,, قاموا مشوا البحر

    وغرقوووووووووووا

    احييييي من البلد الغرقانة لي الليلة في الوجعة

    غرقانة في كل شئ,,تعليم,, صحة,, اخلاق,, الحياة كلها

    وحاتغرق زيادة ,,لو صوت/ي لي كوز

    اهم شئ يطفش الكيزان ديل انو نحنا نسجل اسمنا,

    ,حقك ماتضيعوا,,كفاية ضايع عشرين سنة

    *** **** ****
    حصة التاريخ ,, المسيخ

    ,اخرجنا الدفاتر.وبدات ست سعاد بذلك الوجه المتزمت الفاتر

    في التملية المعتادة لكل الحصص..كانت تدرس 3 مواد

    .تديهم في نفس الحصة..وفي نفس الحصة تاكل بتها السمينة ديك

    . الكنا بنشيلا ليها باقي اليوم,,وتقعد تعد قروش الصندوق

    طبعا بعد تكون رسلت البنات يلموا ليها الختة من باقي اللوستاذات

    كانت دايما بتعزلني باعتباري البت السمينة وباقي الشفع مساويك

    وهنا لابد ان الفت نظر السادة القراء انني ابدا لم اكن هكذا

    الا ان هذه اللوستاذة عندها طول قصدي عرض نظر

    يابنات,,, همست تحت الكنبة:--بكرة.

    .بكرة,, اتوقعوا تجيب خدرة وتقول ليكم تعالوا ورقوها معاي

    ***

    وسمعنا تحت تحت ليه هي بتدرس 3 مواد

    الشمار جابتو اقبال ضنب بت المديرة كانت بتشيل ليها شنطتا

    قصاد تكشف ليها السؤال الاول في كل امتحان

    قالت لينا انو خاتين اسامي مدرسات وهميات وبياخدوا مرتباتم

    الكلام دا ظبط معاي.لانو كل ما اجي موجه برسلوني لي بت جيرانا

    سعيدة :هوووووي ست نفيسة الناظرة بتقوليك الفحي

    التوب الابيض الجبنا ليك سريييييع وتعالي قوام خشي فصل تالتة

    ***

    ست سعاد لسة قاعدة بتملي

    كنا بنشمها..جنها مراسيل وتملية لانو طبعا كان في كتابين في الفصل

    واحد حقها و واحد حق بت الناظرة الشوم ديك

    ضبطتني وان ارمقها بنظرات الغيط والحنق,,ورمتني بالدعوة الماثورة

    في تاريخ التعليم السوداني,,,اكتبي,,, اكتب اوزارك ياحيوانة

    اي والله ياحيوانة عدييييييييييييل كدا

    ست سعاد دي خلاص عشعشت كراهيتا في نافخونا...

    صفية الجمبي يومي تنقنق في راسي انو نطفشا مننا

    ومشت سالت اخوها عزو عن خطة تطفيش محكمة

    اصلو كان جني ممسوخ خلاس,,يومي جالدنو علي البعملوا في الاساتذة

    اخر مرة ربط فار في كرسي استاذ عبود..

    لي يوم الليلةاللوستاذ دا ماظهر تاني في حقل التعليم السوداني

    عزو المطوفش ادانا نبلة طويلة..وقال لينا دي بتجيب خبرا

    ظلت النبلة شهورا في درج الكنبة ترمقنا ونرمقها

    وبعد ان ننتهي من تبادل الرمقات اليومي هذا

    نديها لزة لي جوة الدرج

    التصبر لي المرة دي ..بكرة دي حانيشا ليكم نيشة.

    ونظل شهورا نعزي ايدينا المرهقة بالكتابة في انتظار ذلك الحلم الجميل

    **** **** ****

    الساعة واحدة,,الناس نايمة وست فتحية حايمة

    جات شايلة كتب كتيرة,,الناس كرفست وشوشا

    سمعت السور بالسوط وبعد اخدت نصيبي,,بدت تدرس

    ((وطبعا الناس الكفار والبعملوا الغلط والمابحفظوا السور

    الله بعذبم بي نار جهنم تشويهم زي خروف الضحية

    وفي سير اسمو الصراط سنين زي الموس بجرح الكافر والعاصي

    وبكون ماشي والنار بي تحت والدم في رجلينو,))ه
    ,
    وتوقفت قلوبنا الصغيرة عن الخفقان ونحن نسمع تلك التهديدات

    ولم افهم ماذا قالت بعدها,,بل شعرت بالموس في قدمي والدماء تنزف

    عبير صديقتي الاثيرة بكت باقي اليوم ولم تاتي بقية الايام

    جاء والدها واخبر الناظرة انها ترفض المدرسة,,وانها

    تصرخ كل يوم في النوم بالصراط والموس والنار

    اخيرا في يوم تعيس انتقلت عبير للانجيلية حيث حصة الدين لا اجبارية

    وذهبت متبوعة بنظرات الحسد والغيرة من الصغيرات

    واسفي علي رفيقة طفولتي,,ولم ارها مرة اخري في حياتي

    احي يافتحية ياست الدين,,يوم حاشنقلك وحا اشكيك لي الله زاتو

    هي ست فتحية براها.. هي البلد كلها اتملت مهاويس الدين

    التجار( بائعي)هوي الضلال والكذب والفجور باسم الله في( الطرقات)ه

    ان الكيزان ظلوا هم اسوا مثال وافضل منفر من الدين

    احذر ان تضيع صوتك وماتسجل,,احذر اكثر ,,

    احذر ان تساهم/ي بصوتك/ي في استمرار هؤلاء المتاسلمين

    *** ***
    تصوت لي منووووو؟؟؟ماتسالني؟والله ماعارفة المهم ماكوز

    سيكون من المعيب ان ننتخب ديمقراطيا عصابة حكمتنا عسكريا

    خلاااااااس فكوا دربنا,,وجعتوا قلبنا,,مفروض تنتهوا

    بمناسبة النهاية,,جرس البيوووووت دق,,بريتكم بي ذكرياتي؟ اعترفوا؟ه

    هههه,,انتو لسة بتقروا؟؟,,يعرفوكم سودانيين كيف؟ بالكم طويييل

    صابرين عشرين سنة علي العصابة دي,ماتصبروا علي نوتة طويلة مسيخة

    **** ****

    نهاية البيوت مستحيل نمرق برانا,,عصابات سنة تامنة تغلق الطريق

    لابد من دفع الاتاوات,,باقي التحلية واكياس الشطة والتسالي واللذي منو

    اخترت الاحتماء باحدي العصابتين..بدل ادعاء الشجاعة

    العصابة توفر الحماية اثناء الفطور وساعة البيوت

    دارت معركة عنيفة,,, استخدم فيها الحصحاص والشدات

    ,وتناثر الضحايا,سير شنطة انقطع وكراس انشرط وو

    وفي النهاية تنتصر احدي العصابتين وتطارد الاخري,,وهذا ماحدث لنا

    لبعونا لبع نضيف و فررنا يومها مع الوعيد بالسد والرد غدا

    انتو ناس وزارة التعليم ديل نصيحين؟؟؟ه

    حوش واحد فيهو من اولي لي تامنة؟ من 6 لي 15 سنة سوا

    طفل ومراهق معا؟؟؟؟؟محن يابلد محن


    سمعت بفكرة عابثة تدور في طايوق احدهم ان يزيدا سنة تاسعة

    حيث اكتشف فطاحلة الوزارة والتاصيل مؤخرا ان المناهج مبتسرة

    عليك الله ديل مادايرين ليهم قانون نظام عام يجلدم,,ويفش مغستنا حبة


    عزيز/ت/ي المواطن/ة يسعدني ان انقل اليك النبا التالي

    صوتك/ي ليست بطاقة انتخابية تعني ولائك الحزبي

    صوتكك/ي يعني مسؤليتك امام الاجيال القادمة عن مصيرهم

    ومستقبلهم في التعليم والصحة والعيش الكريم,,,في حق الحياة

    احذر/ي ان تكون سببا في مواصلة هذه الخزعبلات بتتضييع تسجيلك

    احذر/ي ان تساهم/ي في ان يتعذب الجيل القادم بتصويتك/ي للكيزان

    *** ****

    بالمناسبة,, بكل اسف انا مازلت ببري فيكم بذكرياتي السخيفة

    بعد السكسك الحصل,, قررنا نخفف علي مغستنا وبشتنة سمعتنا

    اننا نمشي نلعب في الروضة ,,ياحليل اللعب

    بالله حصة الرياضة الوحيدة بمرقونا ننضف حوش المدرسة .

    نطن الشويطينات المعاي وفضلت انا : ارحكاكي قوام وانزلي لاجاي

    وهاك ياتشجيع,, والنطة غلبتني,, صروا لي البنوت

    واعملي رياضة ماقنا تاني اوعك تاكلي قراصة في العشاء

    نظرت اليهن شذرا

    ليس هذا وقت النصائح وبعدين القراصة دي جاتوه الغلابة.ولا مو كدا؟؟ه

    و و الغفير سمع النضمي وهجم علينا

    وكالعادة غلبني التصرف واثناء الهبوط نحو الهرب

    تمزق فستاني المكشكش,, دبسناهو بي شوكة في الشارع

    واطلقنا ساقينا مرة اخري للريح

    في الطريق طمنني وقالن لي نحنا يومي بنتاخر ولما نرجع بنخت قشتين

    في شعرنا وكدا بتتكون طاقية الاخفاء زي ماقالت الساحرة ذات المقشة

    الدرس دا ادونا ليهو في سنة سادسة,,لسة انتو سوغار مابتعرفوهو

    فرحت لافلاحي في الهروب من التوبيخ ولاكتشافي هذا السر الرهيب

    ووصني اني ما اقول لي باقي البنات.. طرت والسعادة تملا جوانحي

    وقررت ان اتوقف عن مصاحبة الشفع,,فالاسرارالعظيمة تؤخذ من الكبار

    دخلت المنزل اجرجر قدمي, من التعب بعد ان حشوت راسي بكل انواع الحشائش

    وعبرت امام امي بثقة ظنا مني اني ارفل داخل طاقية الاخفاء

    و واجهتني امي بنظرة هلعة: جاية متاخرة ومنكوشة وفستانك مشروط؟؟ه

    واعقبت نظرتها بعلقة جامدة بي وصلة رادينا الكبير داك


    جرررررررررررررررر ياقول بطوط,,احيييي

    لاتحية الي السناير الذين برلموننا من الابتدائي للجامعة

    وش مغيوووووووووز

    وبين دموعي وتنهيداتي وكوابيس الصراط نمت وانا احلم كالعادة

    بعروستي التي لم الاعبها يوما سوي في الاحلام,

    ,امي كانت تقول : نجيب ليك كراسات ولا عروسة؟؟؟ه

    كنت بعمل عروسة في نومي

    واسرح ليها شعرها والعب معاها طباح وشليل وين راح

    لاتحية الي من سرقوا حتي احلامنا البريئة تلك

    جاء زمان كنا نستعيض عن الفرح بالاحلام,,وحين

    اصبح حتي صمتنا من صمته يخاف,,قرروا ان يسرقوا احلامنا ايضا

    لو طالوا انجم السماء والبدر في العلياء لسرقوهما

    عشرون عاما تدهور في كل الحياة,,

    .قتلوا فينا الهمم والقيم والفرح ومنابع الضياء,

    قتلوا فينا الانتماء لهذا الحبيب الضائع منا

    ,هذا المعشوق العذاب,,نناديه عله يحن الي العودة فينا,هذا الوطن

    تضيق بنا شوارع الروح ونحن صعودا الي حضرته

    عبثا احاول تناسي الاوجاع,,كما نستل السكين من جرح عميق

    هل يمكننا ان نقوم من تحت الرماد كطائر الفينيق بعثا من جديد؟؟

    هل لجمرة الانتخابات ان تشتعل في موقد هذا الوطن

    وان تحي الانتماء فقط,,؟؟ يمكن ان لم تضيع/ي حقك/ي في التسجيل والتصويت

    لاتعرض/ي الابناء .الاخوة ..الصغار ..الاحفاد,,جميع القادمين من رحم الغيب

    لاتعرضوهم لما مررنا به في وطن الجراح هذا,انتم مسؤولون امام الله

    والتاريخ عنهم,,وعن مصائرهم,,اسعوا لغد افضل لهم

    لاتحية الي كل متقاعس عن الذهاب للتسجيل وضمان حقه


    *** *** ***

    صوتك/ي امانة ,, سجل/ي,,دي الخطوة الاولي

    صوتك/ي امانة في عنقك/ي ,,لا تعطيه/ي للسفاحين القتلة

    المحرش مابكاتل ..لكين بردو النقوليك لي بعدين يوم التصويت : - ه


    لو تنكسر ايديك/ي الجوز,, ماتصوت/ي بيها لي كوز
                  

12-02-2009, 06:37 PM

Hani Arabi Mohamed
<aHani Arabi Mohamed
تاريخ التسجيل: 06-25-2005
مجموع المشاركات: 3515

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: منقول: شموس الأمين : المدراس والتسجيل والانتخابات (Re: Hani Arabi Mohamed)

    المصدر:

    شموس الأمين - فيسبوك
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de