|
|
 من داخل السودان الجزء 1-5 اختراق وحقائق (لمن نقول كوادر امنية مؤهلة مافى يزعلوا) بدون زعل
|
صدفة ويالها من صدفة لمتنى فى الفيديو دا ومع انو ماندهشت شديد لكن بحكم الوطنية وزى ماجدودنا زمان وصونا على الوطن زعلتة شديد من طريقة السخرية وسذاجتنا الخلت الناس يقولو علينا كدا.
للبيتابع الفديو البيشرح قصة واحد شغال فى وكالة اعلامية واكيد عميل استخبارات بلا شك فى زيارة للسودان اكيد ماسياحة ولكن سياسة فى شكل سياحة.
المهم انو بيشرح طريقة دخولو بواسطة مصدر لديهم فى الخرطوم ليهو علاقة بالسفير والسفير بيعرف ابو واحد فيهم ابوهو وزير فى الدولة ومعرفة المهم هم كانوا مقتنعين انو ماحيدوهوم فيزا لكن فى اخر لحظة محاولاتهم نجحت نسبة لانو الواسطة ادت دورها تمام والجماعة ركبوا الطيارة والخرطوم جاك زول.
تبدا طريقة السخرية فى وصف السودانيين من الجلابية وللعمة وانو ماممكن تميز بين اتنين (امال لو مشى الصين يعمل شنو) وبلد اشبه بالصحراء والأجمل من كدا وصفوا لى كمية الحكومة والبوليس والامن والاغرب من كدا الدليل بتاعهم فى السودان وهى شابة متعلمة وفاهمةوشغالة فى مكان مفروض على الاقل يكون محايد لكن ماعارف المشكلة وين قالت ليهم انو ممكن بى سبب الكاميرات يعتقلوهم ويفتشوهم وحاجات من كدا لكن هى بتخارجهم فى الاخر مايخافوا.
بيقول انو الحظ كان حليفهم انو الطيارة نزلت الساعة 4 صباحا وناس البوليس كان مرهقين جدآ فما كلفوا روحم كتير فقالوا ليهم ادخلوها بسلام آمنين فدخلوها وانظروا ماذا حدث.
بعدين الشابة حادعوها بالدليل من هنا ولى قدام قالت ليهم لازم تلبسوا جلاليب عشان الناس مايدوكم اهتمام شديد ودا يمنح عوامل مساعدة كتيرة للمهمة الجايين عشانها من هناك.
اجمل تعليق عجبنى لما بيلبسو فى واحد فيهم الجلابية بتقول ليهو انو (راسو كبير) بالجد عجبتنى, مابعيد عليها كلام زى دا.
بعد كدا اتحصلوا على بطاقات للصحفيين لتسهيل مهمتهم (وشوف الغشامة) متصورين مع السكرتير العام لوزارة الاعلام ومبسوط عالاخر انو هم لابسين جلاليب (اظنوماسمع بى انو ياما تحت السواهى دواهى) وطوالى نصحهم انو يمشو لى مدرسة ابونا الشيخ مين ماعارف عشان يشوف الطلبة بيتعلموا القرآن بس فى الوقت الهو قبل كدا قال انو مدارس زى دى هى الاخرجت طالبان فى باكستان.
يتخلل الفديو غناء سودانى وبسمات اطفال ماعارفين هم بيقولوا عنهم شنو ويدعى انو معظمهم من دارفور وجو المدرسة القرانية بسبب الحرب وانو المدرسة عبء عليهم شديد وان شاف فى نظرات عيونهم بؤس وخوف لانو اهلهم ذبحوا وهم ارسلوا هنا عشان يتعلمو القرآن بس وبعد كدا طلع وجا اليوم التانى على امل يشوف حاجات تانى كويسة لكن على العكس لقا ما هو اسوأ.
http://www.youtube.com/watch?v=6v0kf1T04dg&feature=Play...ext_from=PL&index=13
نواصل. . .
|
|
 
|
|
|
|
|
|
|
|
من داخل السودان الجزء 2-5 اختراق وحقائق (لمن نقول كوادر امنية مؤهلة مافى يزعلوا) بدون زعل (Re: Mohammed Awad)
|
فى الجزء التانى من البرنامج بيقوموا بى زيارة بيت بيهتم بى المشردين وتعليمهم نسبة لانو جابتهم ظروف الحرب وكدا وبيشرح انو فى المكان دا بيقدموا ليهم اكل وشراب وبرامج تعليمية وخدمات مفروض الحكومة تكون قايمة بيها( دا من باب التنصير طبعآ)
جميل نشيد العلم منهم وانا متأكد انو لو كان عارفهم حيقولوا لى نشيد العلم والذى يرمز الى الوطنية ماكان جا من بلدو لكن الله غالب, بعد داك عجبوا رقيص قبايلنا شكلوا كدا.
تخلل الشرح طرقة ادمانهم للسيلسيون (للمابعرف دا حاجة عندنا هنا زى الماروجوانا) لكن صممت عشان تسطل لساتك العجلات عشان تلف لكن طبيعة البنى ادم بيحب يعدل فتم التعديل لاستعمالات اخرى) كلنا عارفين ياخوانا اسباب الحاجات دى وشايفين فى الشارع مافى داعى للشرح مع انو الدليل ماقصر فى الشرح التفصيلى الممل عن مساوئ بلدنا(بالمناسبة الساعة كانت مقدمة).
المهم قال انو ليهم كم يوم فى السودان بس وشافوا مئات المشردين بسبب الحرب واطفال مدمنين لى صماغ وهم حابين يتعمقوا اكتر ويتكلمو مع الناس عن اسباب الحاجات الحاصلة الادت لى النتائج الفظيعة دى.
http://www.youtube.com/watch?v=suF-1BoZrXo&feature=fvsr
نواصل . . .
| |
|
|
|
|
|
|
|
|
|
Re: من داخل السودان الجزء 3-5 اختراق وحقائق (لمن نقول كوادر امنية مؤهلة مافى يزعلوا) بدون زعل (Re: Mohammed Awad)
|
فى الجزء الثالث بيقوموا بى زيارة لى منطقة نازحين حرب خارج الخرطوم زى ماهو بيقول وصحبو وانو معظمهم من الجنوب ودارفور وناس حالتهم مزرية لدرجة انو اعتقد انو فى فيلم بتاع حرب النجوم وماشاء الله مع انو اى زول صوروهو ابتسم ليهو (هم ماعارفين انو النجوم اتحاربت ولا شنو؟) لكن نحن كسودانيين طبعآ تسبقنا الطيبة.
المهم حاول يقارن بين امريكا واروبا والسودان وانو حياتهم هناك باسطة وهنا هو خايف يهبش حاجة احسن يضربو وباء ولا مصيبة بى كمية الوساخة والجفاف (طيب الجابرك شنو انت قايل روحك الجابرى؟)
يتخلل الفيديو ايضا رقص و مصارعةلقبائل سودانية برضو ينم عن عزتنا لسة لكن الصورة بتتقلب زى ماحصل اول ماتطلع برة يقولو ليك ديل ماقادرين يرقصو مرتاحين ولا ناس الصراع ماقادرين يصارعوا كويس .
بدا الحديث السياسى لما بدا يسأل فى اخواننا دللاء برضو زى اختنا الفاتت مع انو دورها لسة ما انتهى انو المشاكل دى سببها شنو والناس فى الجنوب بيقولوا كلام وفى الغرب كلام مختلف وفى الشمال كلام تانى وهو عاوز يعرف الحقيقة ورجع الحديث للبترول كالعادة انو هو سبب المشاكل (انا ماعارف هو ماوروهو سعر البنزين بى كم ليه!!)
بعد داك بدت قادت مرحلة التحقيق لى انو الجنجويد رحلوا الناس لانهم عبيد والمامشى حرقوها حى ولى درجة انو فى طفل تم احراقه فى برميل من الوقود وهو حى بى شهادة اخوه وانو هم بيحرقوا الاولاد وبيخلوا البنات (المقصودبالفاعل الجنجويد).
المهم انو المشاكل بدت من ما شيفرون اكتشفت البترول المليشيات كانت حريصة من الجانبين على التنازع غير مراعين للمدنيين والعارف تاريخ شيفرون بيغنينى عن اجابة السؤال.
الحقيقة الوصل ليها انو البترول كان سبب الحرب فى الجنوب لى 20 سنة وحاليآ دا نفس السبب بتاع الحرب فى دارفور.
عشان يتأكد من كدا قرر انو يسافر لولاية الوحدة ويرجع بالزمن مرة لتنكيت الحقائق (حرية تنقل مبالغة)
http://www.youtube.com/watch?v=12oXAySYLi0&feature=Play...ext_from=PL&index=90
نواصل . . .
| |
|
|
|
|
|
|
|
|
|
Re: من داخل السودان الجزء4-5 اختراق وحقائق (لمن نقول كوادر امنية مؤهلة مافى يزعلوا) بدون زعل (Re: Mohammed Awad)
|
الجزء الرابع يحمل حاجات كتيرة مثيرة وتدعو للتساؤل وهو برضو مستغرب ومبسوط لى انو اامورهم ماشة تمام, فى زمن وجيز كان زبطوا ليها بطاقات وركبوهم طيارة تابعة للامم المتحدة نسبة لأنو الدليل يعمل فى الامم المتحدة ويمكن مهمتهم تكون متواصلة تحت غطاء الامم المتحدة نسبة للحصانة الدولية وهلم جرا.
المهم زولنا ماشى ولاية الوحدة عشان يشوف اساس المشكلة لمن بدت وربنا سهل وركبوهو الطيارة والمحطة الاولى كانت بانتيو وانو دا مكان سبب النزاع بتاع الحرب الدامت 20 سنة وماشاء الله على الدليل التانى ماقصر فى الشرح التفصيلى بعد رحيل شيفرون.
الرحلة السياسية التانية بدت فى الشرح فى انو كيف الحكومة بتشيل البترول من الجنوب وتضخو الى الشمال وحتى مصافى البترول فى شمال السودان وليس الجنوب ومافى اى استفادة من البترول فى جنوب السودان عموما تلاحظ (مع العلم انو الحركة الشعبية مستلمة نصيبها على داير مليم كما يقال والله اعلم).
الجميل انو هم عارفين انو بتاعين الامن لو لموا فيهم بتكون مشكلة,, مش مشكلة بالنسبة ليهم لكن فى احتمال انو يقلعوا الفيديو وكدا تبقى خسارة واحتمال العميل يترفد من الشغل وكلام من كدا فكانوا حريصين جدا والدليل زاتوا ماقصر فى توزيعهم من عيون الامنجية.
المهم شرح انو البترول بتستفيد منو الدولة وبيتصدر لى بلاد تانية برضو مستفيدة ومافى عائد يبرجع لى الكان المستخرج منو البترول والدليل على كدا البنية التحتية التعبانة وتدنى الخدمات وشكل البلد يوضح بالحاصل تمامآ.
اخونا مقتنع وزادو الدليل اقناع انو البترول بيمشى ماليزيا والصين فقط والخرطوم المستفيدة فقط من العوائد والفائدة الوحيدة الاتعملت فى الجنوب انو انشئوا طرقات ولكن لترحيل البترول بالشاحنات الى الشمال وهذه سياسة الحكومة التى شردت وقتلت السكان منذ اعلامها من قبل شيفرون بوجود البترول فى تلك المناطق. مشكلة تانى مافى, الناس عادية ,, الآن يوجد دارفور فى بترول والحكومة اتبعت نفس السياسة حترسل المليشيات عشان يشردوا ويقتلوا السكان وتجى الحكومة تستخرج البترول وتستفيد منو وعلى بال ما الحرب تقيف يكونوا كنزوا الخزائن. مافرقت كتير اساسآ هم كانوا بيعملوا كدة 20 سنة.
http://www.youtube.com/watch?v=ByV2dJkMrJY&feature=related
نواصل . . .
| |
|
|
|
|
|
|
|
|
 Re: من داخل السودان الجزء5-5 اختراق وحقائق (لمن نقول كوادر امنية مؤهلة مافى يزعلوا) بدون زعل (Re: Mohammed Awad)
|
مكمن القصة كله فى الجزء دا وهو الاخير والمتعلق بى دارفور
من التصوير بتلاحظ انو المنطقة هى فى شمال السودان وبالتحديد منطقة الجيلى وهو مكمن القصة بتاعت البترول وانو دا مكان قاصى الحكومة قصدت منو انها تعمل المصفاة فى مكان قريب للعاصمة بعيد من منطقة استخراجه وحتى فى العاصمة فى مكان بعيد يكون غير مرئى لى معظم الناس (الزول دا ماجادى يا اخوانا بس هو ماعارف انو الماشى شندى-عطبرة-بورتسودان شايف المصفاة ناهيك عن ناس الجيلى زاتهم)
فجأة من دون مقدمات ظهر واحد (امنجى) شايل مسدس قلع منهم الكاميرا لكن لحسن حظهم الزول المرافق ليهم (دليل تانى) من وزارة الاعلام شال منو الكاميرا وبدا يتناقش معاهو (فى معظم الحالات بتنتهى مواضيع زى دى بى رقعة (تيوبلس) وغالبا مايكون الحصل.
اجمل من كدا اختنا العزيزة بتشرح ليهم انو الجماعة ديل (الامنجية) فى الاول يكسروا ليك كاميرتك ويتفاهموا معاك فيما بعد لكن فى معظم الحالات يكسروك ةيكسروا ليك كاميرتك ويعتقلوك لكن هم مجرد محظوظين ( والله ماحظ لكن راجعى عنوان الموضوع بتفهمى)
بعد داك اهلنا مشوا اهرامات البجراوية (طبعآ دا غطاء لتصوير المصفاة) واخونا العميل دا بيضحك فى التناقضات بتاعت انو قالوا ليهو لو مشيت السودان ماحتقدر تطلع من الخرطوم ولو طلعت حيقبضوك ولو قبضوك حيجدعوك فى السجن وماحتطلع تانى لكن الحقيقة انو هو حاليآ برة الخرطوم ومافى اى زول غير سيد الجمل (المقصود ناس الامن)
طيران الى الفاشر ومن الجو بتلاحظ تغير البيئة من غنية الى قاحلة ودليل الحروب ظاهر من الجو, هو كان عارف انو التصوير ممنوع اول مانزلو المطار لكن باعترافو هو انو وجودهم غير قانونى من الاساس فما فرقت انو يصور الطيران الحربى الموجود فى المطار, وهو سمع قبل كم يوم انو مذيع قناة ناشيونال جيوغرافيك قبضوهو معاهو المصور عشان دخلو من غير تصريح (ويعنى الداخل بى تصريح معصوم من الخطأ)
لى دار مناوى وسؤالو عن اسباب الحرب هل هى بسبب البترول ولا اسباب تانى؟
مناوى: والله طبعآ اى زول عندو فهم انو اساس المشكلة البترول لكن مافى زول قادر يجزم بى حقيقة المشكلة ومافى زول حدد منطقة معينة يوجد فيها بترول لكن يمكن انت (الامريكان) تكونوا عارفين نسبة لاقماركم الصناعية الملت السما فوقنادا.
كيف هى وجهة نظركم للمشكلة واسبابها وحلولها ولاان انتو اصبحتم جزء لا يتجزء من الحكومة ذات نفسها التى كانت تحاربكم من قبل؟
مناوى: نحن الان بداخل الدائرة ونستطيع ان نرى ماذا هم فاعلون, ماذا هم طابخون (نعيمية ولا كول) ونبحث بين اهلنا ماهى مشاكلهم ونرفعها الى رئاسة القصر للحلول فى نفس الوقت نقوم بتعبئتهم وتجهيزهم, فى معظم الحالات عندما نقاتل نكون نقاتل من اجل السلام.
بالرجوع لى مقر القيادة مركز تجمع قوات مناوى واثناء رقيصهم على نغمات غنائية اكاد اميز فى وجوههم مسؤولية تهجير المدنيين لمخيمات النازحين وانا ارى الاخ الاصغر لرشيد ذو الشهرين والذى احرق حيا فيتضح لى ان هذا النزاع سوف يظل مستمرآ مادا هكذا هو الحال.
http://www.youtube.com/watch?v=0SNgE_9zSSg&feature=channel
خلاصة
كنت بتونس مع صديق لى وصدف تواجد صديق ليهو البعد كدا عرفت انو انو تابع للامن برتبة كبيرة وكان كلاموا عن انو هم عارفين ومراقبين كل صغيرة وكبيرة فى البلد فقمت باهداءه نسخة من الفيديو بعد تحميله من الانترنت وكان تعليقه انو دى مشكلة ناس المطار فى المقام الاول وليست مشكلتهم!!
وتعجبت عندما نظر الى بنظرة المتهم وهو يسألنى من اين لى هذا مع العلم انها مشرورة زى شر الغسيل فى الحبل !!! عجبى ثم عجبى
الحكم متروك للقراء
| |
|
|
|
|
|
|
| |
Mohammed Awad
Faisal Elrasheed
فيس بوك
تويتر
انستقرام
يوتيوب
بنتيريست