|
Re: حبيب نورة ... سلام عليك ... (Re: ست البنات)
|
العزيزه ست البنات هذه الكتابة يتوفر لها قدرا عظيما من حسن الظن والنوايا والصدق ولهذا الفتي حبيب نوره مكانة ما فقد اسميها انا انه "محل محبة" فهو يبذل الود والحميمية لكل الناس
Quote: وحبيب نورة لمن لم يلتقيه يافع وشاب صغير يملؤه الوعى والجمال والشهامة |
شكرا لهذا العطاء الانساني الذي عودتينا عليه من فجر معرفتنا بك رافقتك السلامة ست البنات الي تلك البراري القصية وحتما سنلتقي ...ان لم يكن هنا....فهناك.....اوهناك
| |
|
|
|
|
|
|
Re: حبيب نورة ... سلام عليك ... (Re: ست البنات)
|
ست البنات لي حدّهِن بعد ما بكّمتيني وسرقتي مني الكلام! مضطر ٌشقش باقي دميعاتي دي و أفتش ليك في شوراعاً أجيكي بيها يعني أول حاجة ما كان في داعي تعملي فيني كدي هسة أنا أستنفدت المخزون الإستراتيجي من المناديل ! وعشان أوريك إنوا القلوب شواهد أتصلي هسة بي (نون) و القلم وما يسطرون بتقول ليك هسة كان بتكلم معاي وجبنا سيرتك بما يعادل خمسة جنيه حسب التعريفة المصرية لشركة إتصالات تستعاشر قرش للدقيقة! ياخي إنتي زولة نفيثة ونادرة وبتعب الواحد عشان يلاقي زولة في طيبتك وسماحتك وعفويتك و ضكرنتك علي اليمين أنا أدق القسم أقول لي أيي زول ست البنات بي مية راجل وكمان بنحفظ ليك حقك الأنوثي
ياخي كتّر خيرك وربنا يديكي حسب نيتك وربنا يوفقك وبي كدة إنتي أستحقيتي الدعوة الحبيبو نورانية الحصرية المستجابة
ربنا يعليكي ويخليكي ويضاريكي ويهنيكي ويغطيكي ويعليكي وما يدليكي و للجنة يوديكي بركة من صلّي وقال يا الله بإذنِ واحدٍ أحد الفرد الصمد الذي لم يلد ولم يولد!
شكرن كتيرن!
| |
|
|
|
|
|
|
Re: حبيب نورة ... سلام عليك ... (Re: حبيب نورة)
|
سلام عليكي يا ست البنات ويا حبيب نورة سلام يغشاكم ذات ليل صاخب في تلكم العاصمة التي لا يكل اهلها الكواريك وضرب البوري و في تلك البورصة التي تعج بمواطني بلادي حتي ظننتها استاد ود نوباوي..... ازيكم يا اخوانا في بلاد المهجر .؟؟؟.
وليكم من التحايا بقدر ما اسعدتني ملاقاتكم ..
| |
|
|
|
|
|
|
Re: حبيب نورة ... سلام عليك ... (Re: مطر قادم)
|
ست البنات يعني انتي رايحة مني الزمن دا كلو ؛ كنت في القاهرة ولاقيتي حبيب نورة وتلفونك لا يصد ولا يرد .. وبس ما تقولي انك رجعتي استراليا عشان انا واولادي نزعل منك ؛ كنا عايزنك تعيدي معانا بس البركة في شوفة حبيب نورة الجنى الطيب البارك في الواطة دا اكيد حيكون كلو جمال وكلو حلا بس لكن يا ست البنات .... بس وريني انتي وين ؟؟ عشان اتصل وتسلمي
| |
|
|
|
|
|
|
Re: حبيب نورة ... سلام عليك ... (Re: عشة بت فاطنة)
|
ست البنات يا نفيسة حسن الغاليات فى البورد ازيك انت لاقيتى حبيب نورة؟؟ والله انت بخيته فى عمرك ده ده زول ايدو بتخجل العينه ام سحابا نيل لم التقيه حقيقة ولكن الله يشهد الجنا ده ايدو لاحقة ... انا هنا وهو هناك، اسدانى فضائل انا عارف كان سويت ليه قبة ما حا اقدر اجازيه.. مدد ...مدد...ياشيخى لحاق بعيد حبيب الله يديك قدر نيتك وسماحتك وبكل الذين ذكرهم شيخى البرعى فى مصر المؤمنة الله يحفظك فى مصر المؤمنة باهل الله. حبيب لانريدكم معنا ولانريدنا معكم، ان شاء الله نتلاقى طيبين فى الخرطوم ليطيب اللقاء زمانا ومكانا ويبقى الود،،،،
| |
|
|
|
|
|
|
Re: حبيب نورة ... سلام عليك ... (Re: حنين للبلد)
|
Quote: انا هنا وهو هناك، اسدانى فضائل انا عارف كان سويت ليه قبة ما حا اقدر اجازيه.. مدد ...مدد...ياشيخى لحاق بعيد
|
تحالف الهاربين
اجتمع اوغاد البورد الموج وحبيب نورة الله يكون في عونك ياست البنات ..... ديل نجهوا افراح السودان ومع ذلك محبتي لهما ولك
| |
|
|
|
|
|
|
Re: حبيب نورة ... سلام عليك ... (Re: بهاء بكري)
|
Quote: تحالف الهاربين
اجتمع اوغاد البورد الموج وحبيب نورة الله يكون في عونك ياست البنات ..... ديل نجهوا افراح السودان ومع ذلك محبتي لهما ولك |
بهاء يا جميل ياخي نحن والله حلاة الدنيا علينا بالذات الموج زول سكرة بس
أمشي يا حاسد
| |
|
|
|
|
|
|
Re: حبيب نورة ... سلام عليك ... (Re: صديق الموج)
|
حبيب نورة الظريف وهميم
اريتك انت تبقى عفى
وزى النيل يزيد خيرك
ويخدر عودك المشرق
وتصابح العيد ووراهو العيد
غلام يافع
رضى وميمون
وفايت الناس
ملان احساس
وماخد الكاس
وشايل الشكرة فوق الشكرة
ماك كسلان
ولا داقس
ناقش الألف والمضمون
صغير فى السن
بس فهمان
ذكى وفاطن
خال فاطنة البكنز الخير
يا مقنع ضرا الكاشفات
للعاجز تسند الحيل
اريتك يابا ديمة نبيل
وزايد فى السماحة الفيك
ست البنات.
| |
|
|
|
|
|
|
Re: حبيب نورة ... سلام عليك ... (Re: ست البنات)
|
مطر قادم ،
جميلة القاهرة بكم ، ومعكم تتسارع الساعات وتنطوى المسافة ما بين زهرة البستان وعين شمس ، فتختزل الأذن أصوات أبواق السيارات العجيبة يا رهان !
فلا أسمع سوى أصواتكم جميعا !
كانت امسية جميلة جمعتنى بكم فاحتزلتم كثيرا من أحزانى وبعض القلق ، ومعكم صالحنى الفرح وخاصمتنى بعض همومى ، فتمنيت البقاء معكم !
وقد شارككم فى صنع مهرجان فرح الدواخل هذا آخرون ، فتحية للحبيبة نون , وهيام ، عثمان ، عادل ، عزيز ، جدو ، مؤيد ، وخالد .
ولك يا ليلى كل الود والتمنيات بالشفاء .
ست البنات.
| |
|
|
|
|
|
|
Re: حبيب نورة ... سلام عليك ... (Re: ست البنات)
|
والتحية ليك العزيزة مريم عبدالله ،
طبعا الواحد مننا لما يلاقى الناس السمحين وهو طاحناهو الغربة اللئيمة بيحس بإنه سالم الوطن بأسره !
وكتر خير الأسافير وشكرا لك أخى بكرى اذ جعلت ذلك ممكنا ! ولك الود.
ست البنات.
| |
|
|
|
|
|
|
Re: حبيب نورة ... سلام عليك ... (Re: ست البنات)
|
عشة بت فاطنة ،
الصافية زى موية الزير القناوى فى سبايل رفاعة البهية !
الشوق مطر (ما مطر قادم ) دى جملة فعلية والآ اسم يا مطر ؟ والله كل مرة اقول اسالك السؤال دا وأنسى !
عشة الحبيبة ، مشتاقين والزمن غلاب ! والله يا عشة ذهبت الى القاهرة بنصف قلب وشريان ! والباقى خليتو فى الرباط مع الحبيب ، توأم الروح ، وربنا يشفيه . والقاهرة كانت فاقداك ، هى مالها مصر أبتك ؟
رسلت ليك رسالة فى الماسينجر هسة ، وفيها كل الرد والمضمون .
وتحياتى للأسرة .
ست البنات.
| |
|
|
|
|
|
|
Re: حبيب نورة ... سلام عليك ... (Re: ست البنات)
|
العزيز صديق الموج ،
سوميتة المنبر وجرتك الأفراح حباب الطلة يا المبروك ،
وكل البيعرف حبيب نورة سعيد وبخيت ! أها انت كمان مشاركنى البخاتة !
ودا أول زول اقراهو وأشوفو والقاهو واحد !!!(فهمت حاجة ؟)
الزول دا هو وكتابتو تيمان ! وغايتو بخت المنبر بيهو .
(الليلة غايتو حبيب نورة دا راسو بيبقى ليهو تقيييل !!)
شكرا على الكلم السمح دا ، وربنا يتقبل دعوتك ونتلم فى الوطن .
ست البنات.
| |
|
|
|
|
|
|
Re: حبيب نورة ... سلام عليك ... (Re: ست البنات)
|
العزيز بهاء بكرى ،
تحياتى ،
يا اخى حبيب نورة دا مراية الوطن ، وصديق الموج سوميتة المنبر وتميمته الباهية .
انت بس من حبك ليهم بتهاظر معاهم ساكت ! مش كدا ؟
شكرا لمرورك .
ست البنات.
| |
|
|
|
|
|
|
Re: حبيب نورة ... سلام عليك ... (Re: ست البنات)
|
Quote: حبيب نورة الظريف وهميم
اريتك انت تبقى عفى
وزى النيل يزيد خيرك
ويخدر عودك المشرق
وتصابح العيد ووراهو العيد
غلام يافع
رضى وميمون
وفايت الناس
ملان احساس
وماخد الكاس
وشايل الشكرة فوق الشكرة
ماك كسلان
ولا داقس
ناقش الألف والمضمون
صغير فى السن
بس فهمان
ذكى وفاطن
خال فاطنة البكنز الخير
يا مقنع ضرا الكاشفات
للعاجز تسند الحيل
اريتك يابا ديمة نبيل
وزايد فى السماحة الفيك
ست البنات. |
انا بغييييييير ( عادل امام)
وبالرغم فقد صدقت يا ست البنات
| |
|
|
|
|
|
|
Re: حبيب نورة ... سلام عليك ... (Re: ست البنات)
|
وجه غريب استقبلتنى به القاهرة !
زحمة كأنه مولددائم ولخمة وازعاج وضجيج لا يعلمها الآ الله ! وكأن العالمين جميعاعجلون وراحلون ! كل شخص يحمل حقيبةنساء ورجالا وأطفالا
وتتسارع خطاهم فى شوارع وأزقة ضيقةينسلون عبرها كالسحرة أو الثعابين !
تتلامس الكتوف ،والأحذية تطأ بعضها، وتتشابك الأيادى دون وعى ، فتضل طريقك وتتعثر الف مرة فى قدم أو أقدام فتبدو حركة سيرك بهلوانية
وتنسى أى السبل كنت تقصد !
ولن تفلح فى العبور من شارع الى آخر وإن كنت ظرزان !
الباعة الجائلون الملحاحون يبدلون رغبتك فى التبضع الى لوم نفسك الأمارة بالشراء !فتعود غافلا الى مكان إقامتك سالما فى ضجر وكآبة ،
فتصرف النظر بل تتملكك رغبة عارمة فى التفكر فى حذائك القديم فتحترمه ،وتراه جديدا ولا يحتاج الى تبديل ، ويسرح ذهنك الى ردائك
القديم وإن كان مهترئا فتجده يصلح لعامين أخريين ! وكل ذلك أملا فى الوصول الى مقرك سالما ولا ينقصك أصبح أو قدم وحفاظا على كحل عينك !
أما الخضروات فالنفس تأبى ذكرها ( فقد شاهدت برنامجا يوضح وسائل الرى الحديثة فى مصر ( وشوف عينى ال...عائم ومطفح وسط الجرجير والخس
والملوخية ) فقد ابتدعوا رى المزارع بمحتويات الصرف ( كل ما تحويه البلاعات والمراحيض عديل كدا ودون تعديل ) ولا أدرى إيه لازمة
اتفاقيات مياه النيل والمشادات مع دول حوض النيل على حصة مصر من مياه النيل ، اذا كان لديهم البديل الطبيعى (ومن دقنو وافتلو )!!
ولعربات التاكسى وسائقيها قصص وقصص ! فإن سلمت مما تتركه مقاعدها من آثار على ملابسك تصعب إزالته بأقوى المنظفات ، فلن تسلم من تعذيب
السائق لك وما يمارسه من خداع عليك والسطو على جيبك !
وفيما يختص بالبيئة ، فالشوارع تغطيها أكوام الزبالة فى كل شارع وكل شبر وحارة ، أكياس البلاستيك ، الورق ، مخلفات الحيوانات ، القطط
والكلاب النافقه ، وباقى الأطعمة ، قبائل من الصراصير لا خصر لها فى الشقق والمحال والمطاعم ، مناظر لا يخلو شبر منهافى كل الأحياء شعبية
كانت أم راقية فى ذلك سواء !
وإذا كنت من مرتادى المطاعم بكل أنواعها فلك أن تتوقع بأنك إن فلتت من حجر فى الطبيخ واللحمة أو الساندوتش ، فلن تفلت من صرصار أو
ذبابات مطبوخات بدقة ضمن الوجبة ، وقد يتخلل طبق السلطة الورور أمامك بعض الديدان إن لم يكن فبضع بيض أو يرقات تستقبلها معدتك
هنيئالتبدأ رحلة الزيارات المتكررة لفحص الديدان إن لم يكن فيروس (سى أو بى).
وهنالك أوبئة أخرى لن ينجو منها بعض محبى العادات الخفية الذميمة !!
أما مصروفك الخاص وممتلاكاتك فتحتاج الى (طاقية إخفاء ) للحفاظ عليهما ما دمت بين المصاروة تقيم !
وعموما لا أدرى إذا كانت مصر تصلح لأن تكون بلدا للعيش أم أننا فى السودان علينا الأستعداد لاستقبال وفود المصريين الفارين من ويلات
كل ذلك الضجيج !!!
وللأسكندرية ومطار النزهة قصة يطول شرحهاوتحتاج إلى بوست .
وشكرا لصديقاتى وأصدقائى الذين جعلوا كل هذا بردا وسلاما على ، بمحبتهم وظرفهم وودهم ، فشكرا لهم جميعا .
ست البنات.
| |
|
|
|
|
|
|
Re: حبيب نورة ... سلام عليك ... (Re: نيازي مصطفى)
|
Quote: ست البنات لي حدهن زي ما بقولوا والله المحظوظ هو حبيب نورة ان التقاك والف حمدا لله على سلامة الحل والترحال لكم التحية .. |
نيازي
علي قولك
أنا ال الأمي داعية لي ألاقي زولة بالسماح دة
| |
|
|
|
|
|
|
Re: حبيب نورة ... سلام عليك ... (Re: صديق الموج)
|
Quote: ست البنات يا نفيسة حسن الغاليات فى البورد ازيك انت لاقيتى حبيب نورة؟؟ والله انت بخيته فى عمرك ده ده زول ايدو بتخجل العينه ام سحابا نيل لم التقيه حقيقة ولكن الله يشهد الجنا ده ايدو لاحقة ... انا هنا وهو هناك، اسدانى فضائل انا عارف كان سويت ليه قبة ما حا اقدر اجازيه.. مدد ...مدد...ياشيخى لحاق بعيد حبيب الله يديك قدر نيتك وسماحتك وبكل الذين ذكرهم شيخى البرعى فى مصر المؤمنة الله يحفظك فى مصر المؤمنة باهل الله. حبيب لانريدكم معنا ولانريدنا معكم، ان شاء الله نتلاقى طيبين فى الخرطوم ليطيب اللقاء زمانا ومكانا ويبقى الود،،،، |
صديق الموج والله الكلام دة كتير علي والله عقدتونا والواحد بقي ما عارف يقول ليكم شنو
تسلم كتير يا سيد الناس وربنا يديك حسب نيتك
برجع ليكم كلكم تاني بس أفضي و أديها نفضة
| |
|
|
|
|
|
|
Re: حبيب نورة ... سلام عليك ... (Re: ريهان الريح الشاذلي)
|
Quote: سلام عليكي يا ست البنات ويا حبيب نورة سلام يغشاكم ذات ليل صاخب في تلكم العاصمة التي لا يكل اهلها الكواريك وضرب البوري و في تلك البورصة التي تعج بمواطني بلادي حتي ظننتها استاد ود نوباوي..... ازيكم يا اخوانا في بلاد المهجر .؟؟؟.
وليكم من التحايا بقدر ما اسعدتني ملاقاتكم .. |
ريهانا
إزيك يا جميلة والله وحشة يا أختي فيكي الخير وسلام كبير للحلوين كلهم تلفوني تلقيه في الفلاني
| |
|
|
|
|
|
|
Re: حبيب نورة ... سلام عليك ... (Re: Magdi Ahmed Elsheikh)
|
الصديقة..ست البنات لك التحايا ولزائريك.. اما زالت زهرة البستان..بكل نضارتها وجمالها (عمك سيد..عمك احمد..واحمد)وقشطة وجويلى وكل الرائعين. مازالت خطواتنا فى..ذلك الممر الضيق.. الواسع..بثقافته..وجمال مرتاديه (الاتيلية..ولقاء الاسبوع) وسكن امل دنقل..وكل تلك التفاصيل الانيقة. اكاد اجزم..ان لنا..بعضا من ذكرى. لك التحية وعودا حميدا.
| |
|
|
|
|
|
|
Re: حبيب نورة ... سلام عليك ... (Re: عبد المنعم سيد احمد)
|
Quote: والله يا عشة ذهبت الى القاهرة بنصف قلب وشريان ! والباقى خليتو فى الرباط مع الحبيب ، توأم الروح ، وربنا يشفيه .
|
مقتبس من مداخلة لست البنات. اصلا انتم الكمباليين،لكم انجذاب،مدهش،طيبوبه وعفويه وحنيه و سودانويه وماذا ثم ماذا. فالطيبون للطيبات صداقة ومودة والتقاة.لم اتشرف بقابلة حبيب نورة لكني متابع ونهم لمداخلاته وبوستاته،ولا عجب، ستي عنوانه وسيرته،سوداني نقراء ونتابع صناعة الرداءة بالمنبر وهناك في بلادنا،فنصاب بالغثيان لكن بلاد بها سيرة حبيب نورة وست البنات كمبال وعبد الواحد كمبال،تعيد الينا ذهوة الانتماء، وغبطةوسرور، لا تعادلها قوي الكون مجتمعة. ياحلاوة بلادي بيكم ويا ذهوي وافتخاري ببلادي بيكم اللهم اشفي استاذي كمبال من كل سقم،ويدم المحبة والمعروف في بلادي. مودتي
| |
|
|
|
|
|
|
Re: حبيب نورة ... سلام عليك ... (Re: الفاضل يسن عثمان)
|
Quote: مقتبس من مداخلة لست البنات. اصلا انتم الكمباليين،لكم انجذاب،مدهش،طيبوبه وعفويه وحنيه و سودانويه وماذا ثم ماذا. فالطيبون للطيبات صداقة ومودة والتقاة.لم اتشرف بقابلة حبيب نورة لكني متابع ونهم لمداخلاته وبوستاته،ولا عجب، ستي عنوانه وسيرته،سوداني نقراء ونتابع صناعة الرداءة بالمنبر وهناك في بلادنا،فنصاب بالغثيان لكن بلاد بها سيرة حبيب نورة وست البنات كمبال وعبد الواحد كمبال،تعيد الينا ذهوة الانتماء، وغبطةوسرور، لا تعادلها قوي الكون مجتمعة. ياحلاوة بلادي بيكم ويا ذهوي وافتخاري ببلادي بيكم اللهم اشفي استاذي كمبال من كل سقم،ويدم المحبة والمعروف في بلادي. |
الفاضل ما أجمل هذه الكلمات وما أشد صدقها
ياخي بنحبوكم كلكم وربنا يقدرنا علي جزاكم و أشكر للمرة الدشليون الأخت ست البنات الكمبالية و أسمحوا لي بي الكمبلة معاكم
وحياة غلاوتكم بحبكم و إنه قسمٌ لو تعلمون عظيم!
| |
|
|
|
|
|
|
Re: حبيب نورة ... سلام عليك ... (Re: ست البنات)
|
ست البنات كلهن
ياخي وحشة موت أول حاجة خليني أسعلك شن سويتي ؟ والحاجات إنشاء الله كلها في محلاتة
ما يكون زي جوباكي دة بيجاي !
بتمني ليك كل الخير
والبوست دة مساحة نسأل فيه عن بعض
ونهترش كلما شعرنا بي ألم طلق صناعي
لي شافع كلام !
شكرن كتيرن!
| |
|
|
|
|
|
|
|