|
|
|
 Re: أيــام وليــالي من ذاكـرة البركس......1998 - 2002م (Re: شمائل النور)
|
بوابة عريضة علتها لافتة غير مضيئة ، كتب عليها:
صندوق دعم الطلاب - ولاية الخرطوم
مدينة الزهراء الجامعية للبنات
تسارعنا نحو تلك البوابة لمعرفة كيفية الانتماء إلي هذه البلدة ،،، فتاة تجاوزت العقد الثالث وبدت التجاعيد ترسم خطوطا واضحة تنبئ بوضوح رؤية العقد الرابع ، تلك الفتاة وضعت على رأسها خمارا عريضا اتخذ شكل لسانين من الأمام ومثلث متساوي الساقين من الخلف..هكذا كان زياً شبه رسمياً للعاملات بتلك البلدة.لم تجتهد تلك الفتاة لتخرج في حلة مقبولة على الأقل فرأيتها تعاملت بإهمال مع هندامها، لعله فتنة في تلك البلدة.
....................
كان شرطا مهماً للانتماء ان يحضر ولي الأمر فكم كان عصي علي ان يكون برفقتي ولي أمري في تلك الساعة ،، تساءلت:: أنّى يحضر ولي امر في هذه الساعة وهو خارج العاصمة؟؟؟ لم يجد تساؤلي هذا إجابة سوى نظرة صارمة من تلك الفتاة لاتخلو من لهجة تأديب وقهر ربما ، يبدو أن أمر ولي الأمر لا جدل ولا جدال فيه في هذه البلدة....لا أذكر بعدها ماذا حدث لكني أذكر اني انتميت إلي هذه البلدة.
................
رجعة
| |
 
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
توجس وفرح وغربة
هو احساس يسيطر علي جميع المنتميات الي تلك البلدة..توجس من المرحلة الجديدة وكذلك فرح بها وغربة زمان ومكان..لكن هذه الاحساس سرعان مااندثر مع صخب تلك البلدة.
لنتعرف على الذين يحكمون هذه البلدة
المدير: كان وقتها عوض النور ، كان كثيرا ما يحركه احساس ابوة تجاه الطالبات
المشرفة: وهي صفة القائمة بالاعمال ، فهي تدير المبنى بما فيه، تسكن في غرفة منفصلة في ذات المبنى وغالبا ما يكون معها في نفس الغرفة اختها التي تدرس بالجامعة بالاضافة إلي المشرفة المسائية
المرابطة: اعاذكم الله من لؤمها
الحرس: اللهم لا نسألك رد القضاء
ثمة علاقة وثيقة تربط بين المرابطة والحرس ، لم اعرف سرها الي ان قضى الله امره وتخارجنا وتخرجنا......
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
لم يكن بوسعنا أن نختار من نسكن معهن ، فهي السنة الأولى ، فالكل أطرش في الزفة.....
8 طالبات مختلفات في الفكر ، والاخلاق ، والتربية ، والعرق ، والمعتقدات ............... في غرفة واحدة....
كيف التأقلم ياربي على هذا الجو لـ 4 سنوات وربما خمس ؟؟؟؟؟؟
......................
عد الاسبوع الأول على ظهر سلحفاة ، لكن بدت روح التجانس تدب ... مواضيع مشتركة ، محاضرات وتخصصات مشتركة تقربنا اكثر فاكثر ...
......................
في يوم دراسي عادي عدنا إلي بلدتنا كالمعتاد...لم يكن ثمة شئ غير عادي فكل الاشياء تبدو كما الأمس واول الأمس ... الي ان اتت الساعة 11 مساء ، فبعضهن نام وبعضهن ما بين النوم والغفوة ، وبعضهن في صالات التلفزيون ، والآخر ما بين العشاء والتجهيز ليوم غد و..... و......
صرخة مدوية اطلقتها احدي الطالبات،من احد المباني وتبعتها صياحات وهرولة من الطوابق العليا نحو مكان الحدث ، يا الهي ...ماذا دهى تلك الطالبة وماذا يحدث ليلا في هذه البلدة؟؟؟
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
ماذا دهى تلك الطالبة وماذا يحدث ليلا في هذه البلدة؟؟؟
في شنو ياجماعة ، البت مالها وساكنة وين بالضبط واسمها منو؟؟؟؟؟
لم يكن هناك تضارب في الروايات واصل القصة ، فهذه الطالبة عادت بعد عناء يوم دراسي لتاخذ دشا قبل النوم ، ففي هذه الاثناء اذا بروح خفية تداهمها..شيطان/عفريت/جان.....فالغالبية هنا يسلم بوجود ارواح خفية بهذه البلدة ، تلك الارواح تجعل من الحمامات مسكنا رئيسا لها وتمارس عملها من هناك.
لم تمر تلك الليلة دون خسائر ، الزميلة (ر) اصيبت رجلها بعد ان قفزت من السرير العلوي في الغرفة الزميلة (أ) لم تستطع النوم بعدها فما بين الهلوسة والتخيل قضت ليلتها... والبقية ما بين الدردشة وسرد قصص الرعب وما بين الارق.
...كان اسبوع الرعب ...
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
سلام يا شمائل..
والله ياخي علي البركس..!!!
ولفترة كنت احاول ان اسرج الخيال واطقس خبوراته عندما ارتحل عن جموع سكانه الذين قطنوا في كراكيره الف عام وعام وذهب الي الاخوات
فعليك الله احكي لينا عن البركس في عهد النسائي..
اسامي الداخليات..
نظافته
اسامي السفر والكافتيرات
احكي واصفي البركس واعيدي وصفه... فانه يعلم الله يقبع عميقا في الدواخل ويكاد المرء فينا ان يحفظه ركن ركن
وكورنر كورنر.
والا ليت ايام السيجا مع عوض وفيصل قادة الحرس وعمك امين بتاع السفرة وطه النور اسحق اروع الناس
اني اذن لسعيدو
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: عبدالكريم الامين احمد)
|
عبد الكريم
مرحبا، بساكني البركس في العهد الرجالي (انتم السابقون ونحن اللاحقون)
الله ، على الكافتريات والمستثمرين والمرابطات والمشرفات والحرس ومحمد بتاع السلطة وعبد العاطي بتاع الاتصالات (الممول الكبير الي حين ميسرة)...................لن انسى
تعرف يا عبد الكريم:
مازلت اتذكر ادق تفاصيل تلك الايام،احيانا اتمنى ان تعود ، واحيانا احمد الله انها انقضت
| Quote: والا ليت ايام السيجا |
ياخ انت من زمن السيجا ، نحن بتوع البلياردو
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
حكاية البت السطلت
خرجنا في يوم دراسي عادي ، ما ان انتصف النهار حتى تفجرت القنبلة في الكلية ،بت من بنات البركس قبضوها ساطلة، ... انها طالبة في كلية العلوم واظن التخصص كيمياء ، زبطت لنفسها شرابا مختلف الوانه في معمل الكلية وذهبت به الي الداخلية برفقة صديقاتها ، وتمت هناك السطلة ،، هكذا كانت الرواية،، لم يكن من السهل اكتشاف مثل هذه الافعال إلا ان هذه الطالبة كانت غائبة الوعي فوصلت حتى بوابة الخروج التي تجلس عليها المرابطة الما خمج ، الوصول الي هذه البوابة يعني الخروج خارج البلدة مما يتطلب ان تكون على هيئة خروج بالنسبة للمظهر العام ، الا انها لم تكن بالهيئة المتعارف عليها فكانت بالبيجامة وتصر على الخروج ، بعدها لوحظ عدم توازنها في الوقوف والكلام .... أخذت بعدها إلي غرفة الإشراف -بيت اشباحنا المتواضع-
هكذا كانت تنهى القصص لا نعرف نهاياتها....
| |
|
|
|
|
|
|
|
|
 Re: أيــام وليــالي من ذاكـرة البركس......1998 - 2002م (Re: شمائل النور)
|
حساسية المشرفة مع المسجل
لحسن وسوء الحظ كنا نجاور المشرفة (الحيطة بالحيطة)....وما احلى ايام الـ off والجمع في البركس ،، فأغلب الطالبات يخرجن في زيارات اسرية ، اما المفتحات يظلن في الداخلية فالغرف هادئة والمغاسل تناديكـ بمزاج ، تستطيع الواحدة انجاز ما توده في الاسبوع خلال العطلة ، كانت هذه ميزة قطع الرحم في العطلات...............
كنا نحن ننظف الغرفة نظافة شبه كاملة،ونقوم نتشغيل المسجل ، فيصدح محموداً بصوته الشجي ، مهما يكون ذكراك باقية وما بتهون يا منبع الاخلاص ويانور العيون(من البوم نور العيون)،، وكثيرا ما يطمننا محمود فيغني:: من الظروف ما تشيلي هم بكره الزمن ليك يبتسم (من البوم ما تشيلي هم) ،، ثم آآآآآآآآآآآآآآه الأهيف ، ونتأوه جميعا مع محمود ،، هذا السلوك لم يكن يعجب المشرفة أبدا ،، (لا ادري سبب كره الاسلاميين لمحمود) حتى الآن،،ماعلينا،،
تطرق المشرفة باب الغرفة وقبل الاذن لها بالدخول تجدها دخلت:: شنو يا جماعة صوت مسجلكم في السماء ساكنين براكم انتو؟؟ ، فنقوم بتخفيض الصوت إلي درجة غالبا لاترضينا،،،، تعودنا وتعودت هي ، واصبحنا عندما تاتينا آمرة بخفض الصوت اضع انا يدي على موجة الصوت دون تحريكها مع ترديد حاضر حاضر آسفين يا استاذة ، فتخرج المشرفة ظنا منها (اننا سمعنا كلامها) هكذا إذا العلاج النفسي مفيد في مثل هذه المسائل.
ربما لو كنا نسمع إلي الصحوة لم يحدث هذا...
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
مظاهرات اطاحت بالمدير:عوض النور
تردت خدمات المياه بشكل فظيع لفترة قاربت الاسبوع،فاصبحت المياه الغازية بديلا للماء الذي جعل الله منه كل شئ حي، اقتربت الساعة من العاشرة كنا مجموعة أمام احد المتاجر (الأكشاك) وكنا جميعنا عطشى،فلم يروي البيبسي ولا الميرندا ظمأنا،بشكل أكثر من عفوي سيرنا تظاهرة لم نتوقع انه سيكتب لها مظاهرة في تاريخ البركس،خصوصا واننا لا نمثل تيارا سياسيا ولا حركة ولا جمعية، كنا خمس طالبات ، هتفنا باهمال ننادي للمياه، ففيما يبدو ان الجميع كان على شفا حفرة،،خرجن الطالبات بشكل مرهب وكن يهتفن بحماس غير متوقع،الغريب في الأمر ان المشرفات قابعات في حجورهن ، لم يعترضن تلك المسيرة الهادرة ، وصلت المسيرة البوابة الرئيسية ، فاعترضهن الحرس ،فهو متوقع، لكن غير المتوقع ان يحدث اشتباك بين الطالبات والحرس ، فكسرن البوابة وخرجن خارج حرم البلدة ،،يا للهول،، وصلت المسيرة النفق وحدثت اتصالات بين الطالبات وزملائهن الطلاب فوصل بعضهم الي موقع الحدث، وصلت شرطة فض الشغب ، ولم تستطع كبح جماح هذه الثورة ، اتت عربة المطافى، لم تقبل الطالبات هذا الحل ، وصل السيد مدير الصندوق وحول المسيرة إلى ركن نقاش ، وحاول تصبيرنا حتى صباح اليوم التالي ، اصرار غريب وغير معتاد من قبل الطالبات......
انتهت تلك الأحداث بالاطاحة بالمدير :: عوض النور
أتانا المدير الجديد:
الاستاذ/فيصل.................وكان عهد فيصل ............
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: منتصر الامين)
|
البركس في عهد فيصل
مرة اضحك ومرات ابكي ومرة تغلبني القراية
من أغرب وأطرف ما حدث في عهد فيصل..
فيصل .. كان ضابط سجون .. هكذا يقولون..فكانت ادارة البركس بالنسبة له مرحلة تحول كبيرة...كان يعاملننا كما المساجين والمتهمين..متزمتا..حاداً..ساخراً احيانا...متغلب المزاج...حقيقة كان رجل غريب والغرابة هي الصفة الرئيسة لفيصل...لم يستوعب فكرة ادارة البركس بسهولة...كان يضع طشتا ملئ بالماء بالقرب من المرابطة ، فكلما اتت طالبة خارجة من حرم تلك البلدة وهي تضع روجا (احمر شفاه) يجبرها على غسله قبل الخروج ، فكأنه يغسل عارا....كان هذا السلوك من فيصل اغرب من غريب ، ترك دور المدير واشتغل بدور المرابطة...
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: عمر الفاروق)
|
Quote: عايني إنتي قاصدة من ذاكرة البركس ولا البايركس ؟
|
الجامعة...الاحصاء...القبول...البركس/العيون......بحرى
هذا هو خط سير المركبة التي تقلك الي البركس ، وكثير من الكماسرة الملاعين ، عندما تقترب الحافلة من محطة البركس ، يتعمدون اضافة أ وياء بعد الباء...يسمعونك اياها وانت نازل من الحافلة مع ابتسامات خبيثة.....لكن اكيد قاصدين السناير
عمر الفاروق
اقوليكـ... فلتكن من ذاكرة البايركس
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
بت البركس
كلامك ماااادقيق ومابينفى عنك العووضية
| Quote: وبالتالي تجدنا كل خميس طابين شنطنا وجارين للعوض |
حسب خبرة العبد لله الكلام دة بيكون فى السنة الاولى وبعد ناس العوض يفتر
حماسهم لزوار كل خميس فى شكل السلام البارد واخفاء البطانيات منهم فى الشتاء
بعدها بيفهم اهل العوض (الدمهم خفيف بس) انهم no more welcome
وبعدها بيلزموا البركس بحجة الداخلية فاضية والهدوء وكدة
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: احمد التجانى احمد)
|
سلام يا شمائل و بقية البركسيين و البركسييات
و الله حكاية " الروح الخفية " دي الا تكون جات معاكن ؟
غايتو ما لاقتنا تب ! إلا البركس كان فيهو" نبي " او بالاصح " متنبي " . . **
رسالتو دي منجورة عشان " جرسونات السفرة " خصيصاً ، و فحواها ما هدي بل هدم ! . . عاوز يهدم السفرة فوق رؤسهم
" إعدام إجرام جرسونات السفرة "
دي آياتو المشخبط بيها حيط كل سفر البركس !!
قيقا راوي الانتقالي
متردد كل الداخليات
ترهاقا
البركس
داخلية البنات ( بعد احتلالكن للبركس )
----------------
يا كيكي لاحظت انو دفعتنا ديل ( انتقاليين ) في كل شئ ؟! لكن كل التنقل و النقلات دي كانت جبراً لا خياراً !
** مرة " نبي البركس " دا راصد المصلين و يقست فيهم - يجمع أتآوات - الغريبة مصرَ على ( عشرين جنية ) ليه ما عارف ؟!
سألتو انت نبي ، القروش داير بيها شنو ؟ . . قال لي في نبي ما عندو جيش ؟!
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: emad altaib)
|
شمائل ..
ذكرتيني ايام...
ايام يا جامعة الخرطوم..
البركس سكنا فيها فترة من ايام الدراسة..
مطرودين من جميع الغرف..(انحنااريعة ,اتنين من امدرمان واحدة بحري واحدة الخرطوم)قالوا مزعجين وبنمنعهم القراية والتركيز ومستغربين كيف انحنا بننجح؟؟
قدر ما حاولنا نغريهم ابوا ليناالبنات..في النهاية اضطرينا نعمل برجوازين ونأجر في الخاص..وبعد دة كنا بنمارس هوايتنا المفضلة (البرمجة ببنات الداخلية)..اصلا انحنا ما كنا مؤهلين لسكن البركس باعتبار اننا من الخرطوم..السكن العام كان حاجة متعة, مافي علاقة بينو وبين الخاص..عملنا كمية من المقالب يا شمائل ما طبيعية..بسببا انطردنا من صحباتنا الفي السكن ههههههههه..كنا تلاتة لكن زي التلاتين..جزء من السنة التالتة والرابعة والخامسة رجعنا لبيوتنا..لكن اجمل فترات الجامعة السكنا فيها البركس..وخاصة ايام الامتحانات..
المرابطات ديل ما عندنا معاهم شغلة بس المشرفات حللنا ليهم ماهيتم..كل دقيقة والتانية شاكننا الروميت المعانا في الغرفة..برجع ليك احكي ليك المقالب..
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: سارة علي)
|
سارة علي
طبعا ناس الخرطوم ما عندهم حق السكن فعلا ، لكن ممكن استضافات مجازفات كدا ايام الامتحانات ، اما السكن الخاص وما ادراك ما السكن الاستثماري والغرف الجانبية، والحمامات الخاصة، ...
طبعا نحن بعد السنة الاولى تعلمنا الكثير المثير الخطر...صحباتنا بنات الخرطوم..كنا بنجازف ليهم شهادات سكن من الاقاليم ، ويسجلوا عاااااااااادي زيهم وزينا ويستلموا بطاقات رسمية ، لكن ما بسكنوا الا ايام الامتحانات ، وبكدا الغرف تكون فاضية ، لكن حسك عينك لو المشرفة حست انو الغرف غير مكتملة العدد .... فكنا دي بنعالجها كيف؟؟؟؟
لما يجي وقت التمام ، بنطلع كلنا نعمل فيها مشينا للعشاء....
شكرا ع المرور يا برجوازية
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
| Quote: شكرا ع المرور يا برجوازية |
في برجوازي بيطردوهو؟؟
مضطرين يا شمائل كنا..وحاتك عمايلنا عمايل ما بقدر اوصفا ليك..غايتو ربنا يغفر لينا الرعب الدخلنا في ساكنات البركس..ياخ انحنا لمن كنا في السكن العام(قبل البرجوازية) كان تخصصنا البنات الحناكيش والشهادة العربية الفي الخاص..وخاصة البنات البركبوا مكيف..الغريبة انو ذاكرتي خربة..لكن حكاوي الداخلية دي ما مرقت من راسي نهائي..
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: قيقراوي)
|
شمايل
والله ليك وحشة
شكراً على البوست الجميل
هكذا هو ديدن الذين سكنوا تلك الديار
وكانو من طلاب تلك البقعة
البركس
كانت لنا ايام
قعدنا فيهو سنتين قبل ان يرحلونا داخلية البنات لنقضى بقية سنى الجامعة
يعنى اكملنا سنين الجامعة مناصفة بين بركس الاولاد وبركس البنات
ولبركس البنات دا حكاوى وقصص..
كان البركس يمثل السودان يومها
اربعات.. السوباط..الدندر..القاش..النيل الازرق..عطبره
القرشى شهيدنا الاول فى اكتوبر
اسماء الداخليات كانت تمثل السودان شماله وجنوبه، شرقه وغربه
اول ما يقابلك عند مدخله جوار داخلية اربعات حائط الجرايد التى تمثل كل التنظيمات السياسية
واذكر يومها ونحن فى طريقنا للجامعة صباحاً
ان وجدناكل الناس متحلقين حول الجرايد
وكانو بصوت عالى صوت واحد يقرأون (من اين اتى هؤلاء)
وكان مقال الطيب صالح الذى ملأ الدنيا يومها وشغل الناس..
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: حسن سنوسى)
|
حسن سنوسي
اقصد عمو حسن
طبعا انتو لما سكنتو كانت اسماء الداخليات تمثل السودان باكمله ، لكن عندما اتيناها ، كانت عبارة عن مسلسل ديني ،، فكان السناير بيقولو لينا الداخلية دي زمان اسمها كدا ، وحتى في ناس كانت متمسكة بالاسماء الاولى
بعض اسماء الداخليات:
ام المؤمنين - اربعات سابقا
الشيماء - السوباط -على ما اعتقد-
حفصة - كسلا
جويرية
نسبية
ام كلثوم - تلك الداخلية التي سطلت فيها الطالبة المذكورة في القصة أعلاه
وسآتيك باسماء الكافتريات ،،
تحياتي ، وشكرا ع المرور
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: Amany Elamin)
|
اماني الامين
تحياتي واعتذراتي اليكم جميعا ،، اجازة طويلة عن المنبر وعن الشغل وعن كلو ،،
الله اكبر عليك والله ماربت ولا سنة ،، والجامعة في عهدنا ماقفلت ، لكن قفلت قبلنا 10 شهور ، اصلو بعيد عنك نحن عزة السودان 1
| Quote: انتي قريتي دبلوم وللا شنو؟ |
لا يا حبة نحن اولاد السنتر ، يعني ندوس على الزرار ونرفع الشعار
اتفضلي واستمتعي يا بتاعة الليسانس انت
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
حكاية امر قبض للطالبة( و.أ)بت مدني
غراء فرعاء مصقول عوارضها، بيد انها لا تمشي الهوينا، ذات خطوات سريعة، شعرها كستنائي طويل كنا نحسبه طويل خلقة الله ، تسكن في غرفة خاصة ولوحدها ، كانت فكرة اكثر اثارة ان تسكن طالبة لوحدها في غرفة ، حتى السكن الاستثماري (من 2 - 3 في غرفة) ، عداد الكهرباء منفصل ، منفصل لانهاتملك فريون بغرفتها، تاكل ماتشتهيه الطالبات في الخيال ، كانت تملك موبايل في عهد كنا نتزاحم على وكالة امونة وتلفون عبد العاطي ، ننتظر اخبار المصاريف بفارق الصبر....
(و.أ) جميلة ومفترية ، هكذا كانت تُقرأ
نواصل
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
لا يفوتني ان اذكر ان (و.أ) طالبة طب.... ليس لديها صديقات ، ربما لانها تسكن لوحدها ، وربما لانها تداري سرا ما ، سرعان ما انكشف ، عندما كانت في السنة الرابعة (اعتقد)
الساعة حوالي الـ 9 مساء ، تفأجأ الحرس بعسكري أمامه ، عسكري في داخلية بنات وفي هذا الوقت المتأخر ، اللهم اجعله خير ،
نواصل
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: شمائل النور)
|
حقيقة قصة الطالبة و.أ
علاقة ربطتها بالشاب أ خلال فترة الجامعة ، فيما يبدو ان الشاب وقع في حبها بصدق وكان ينوي الارتباط الجاد ، صرف عليها كما يصرف الرجل على أهل بيته ، وفي نهاية المطاف تمردت على نعمتها هذه بانهائها العلاقة ، ولم تكن واضعة في الحسبان ان هذا الشاب (مسلط) وكانما كان يستشعر خيانتها، فقد تحوط قانونيا وانتقم بما ارضى بعض من كرامته.
تبين
ان هذا الترف الذي كانت تعيشه (و) لم يكن ترف اسرة كما كانت تظهره هي ، فالكل كان على يقين بانها (بت عز) لكن سرعان ما انكشف الامر بحضور الشاب(الضحية) الي الداخلية حيث فضحها فضيحة لم تحدث في تاريخ البركس ، فقد قالها بالحرف الواحد:
البت دي انا عايز منها ما يقارب الـ .... مليون (حينها كان مبلغ فلكي)،وكان حريفا عندما كان يحرر لها الشيكات باسمها فلم يعطيها كاش (يا له من ذكي)
البت دي انا صرفت عليها:
- مراجع الطب
- المكيف الفريون + مستلزمات الغرفة
- حتى الشعر الزارعاهو دا انا دافع قروشو (كانت اكثر شي يدعو إلي الضحك في عز المحنة) بالله طلع شعر حكومة
- ناهيك عن الأكل والشراب
| |
|
|
|
|
|
|
|
|
 Re: أيــام وليــالي من ذاكـرة البركس......1998 - 2002م (Re: خالد عبد الله محمود)
|
العزيزه شمائل:
سعيده بعودة البوست للسطح مره أخري,
ده بالجد بوست ممتع ولذيذ,
Quote: مرحبتين بالعزيزة أماني
كبير كيكي ياخ انا الدفعة القدامكم طوالي . . شفتي كيف ؟
عارفك قاصدة شنو لكن برضو كبير كيكي براهو !
ما اجتمع في جملة بالعطف الاستاذ والتلميذ ، الا و كان بينهما( ثم ) تفيد الترتيب اقل شي ( فاء) . . فاء قيقراوي ياخ ! |
قيقراوي مداخلتك دي يادوب الليله قريتها,
ناس كيكي ديل لما كانوا في جامعة الخرطوم "أم نخيل" أنا كنت في الابتدائي المبكر كمان,
يعني سنه أولي ابتدائي فما فوق حبه,
أما انت ياقيقا فصورتكم الفي بوست النشاط العاطفي بتاعك شاهده عليك براها, أنا ماليش دعوه :)
المهم مش لاقيت ليك شمائل فيس تو فيس !
فييييي عقد داليا وتمبس, وطلعت دفعتي لزم مع اختلاف الكليات,
واختلاف سنين التخرج, لاني أخدت سنه خامسه بتاعت ال honor وهي قررت تشتغل علي طول,
مع ذلك من حكاويها اللذيذه دي اتأكدت اني ما شفت شئ للجامعه,
والله القصص والشمارات بتاعت البركس دي فاتتني, حكاوي ساكت ماسمعتها,
عليه أطالب بالعوده للوراء بالزمن والرجوع لسنين الجامعه تاني,
عسي ولعل أعيد صياغتها بشكل يجعل عندي ذكريات لطيفه زيكم كده عن البركس :)
سلامات وتحايا وواصلوا حديث الذكريات,
وانا بجيكم في مداخله منفصله لي جنابو الاعترف لينا اعتراف خطير ده ...
| |
|
|
|
|
|
|
|
|
|
Re: أيــام وليــالي من ذاكـرة البركس......1998 - 2002م (Re: Amany Elamin)
|
كدي خلينا نقبض علي جنابو ده هنا:
Quote: طالما كلكم عندكم ذكريات في جامعة الخرطوم نحن برضوا عندنا ذكريات هناك .........
بس ما كنا طلبة ......... كنا بنفض الشغب |
ياسلااااام أخيرا لقيت لي فرصه أعبر عن شعوري تجاه ناس فض الشغب ديل,
ياخ نحن كنا بنحبكم حب "بالعكس .. بالعكس" ..
خليني أحكي ليك أقرب موقف في ذاكرتي,
كنا خلصنا سنه رابعه وفي بداااااااااية خامسه لما حصلت أحداث اتقفلت علي أثرها الجامعه شهور طويله,
كانت المشكله علي ما أذكر تردي أوضاع الداخليات المريع,
في يوم مشهود قام مدير الجامعه بالسماح لجماعتكم باقتحام الجامعه علي اثر هتافات الطلبه ومحاولات خروجهم للشارع,
فما كان من ناسكم بتوع فض الشغب ديل الا انهم اقتحموا الجامعه والداخليات,
وعينك ما تشوف الا النور,
ضربوا البنات من طرف, وما حأخجل اني أقول ليك انهم بيحكوا- والعهده علي الراويات- انهم كانوا بينزعوا منهم موبايلاتهم,
وحتي الدهب اللابسينوا بالقوه, نهب مسلح يعني,
عاثوا في الجامعه فسادا ..
كنت يومها وزميله في اللاب شغالين في بحث التخرج وما جايبين خبر,
لما حصل الاقتحام واضطرينا نتحبس قبلنا,
لما شفنا من بلكونة القسم الطلبه بيتجاروا والبنات بيصرّخوا وما لاقين مكان يقبلّوا عليه,
ونحن كنا سناير وعندنا مفاتيح معمل طويل عريض,
قمنا بايواء كل من يمكن ايواءه داخل المعمل الخاص بينا,
أقلّ من مائة بشويه من الطلاب والطالبات دليناهم علي مكاننا وخليناهم يختبئوا داخل المعمل, قفلنا الباب وأسدلنا الستائر ومنعنا حتي الهمس,
كنا جلوس علي الأرض وتحت البينشات وأسفل الشبابيك,
والعساكر تحت بيطلقوا في صرخات مجنونه كلما يلقوا زول مختبئ ويضربوهو حتي الاستغاثه,
أخوي كان دفعتي في الجامعه في كليه مختلفه, كان بيني وبينه مكالمات تطمينيه هامسه قصيره بالموبايل لأنه ما كان في موقف أحسن من موقفي,
كان مختبئ مع مجموعه أخري من الطلاب داخل مكتب مسجل الكليه ههههههه, ده طبعا بعد ما كمّل الهتاف ومرق الشارع مع الطلبه,
لكن لما المعركه بقت ما متكافئه وجماعتكم جابوا قوات شرسه تضرب وتنهب كان الاختباء الحل الأسلم,
لما العسكر اقتحموا اللاب الملاصق لينا مباشرة وكسروا الأبواب عنوه, كدنا نفقد صوابنا,
ربنا وحده جعلهم يفقدوا الأمل من أنهم يجدوا طلبه في المكان, وما يفكروا يقتحموا اللاب بتاعنا,
كنا بنسمع صوت أقدامهم وصرخاتهم علي بعد خطوات مننا,
ونحن حالنا كمحمد (ص) وأبي بكر في الغار يوم الهجره,
بعد ساعات طويله من الحصار, وقبيل المغرب بلحظات,
تمكن أخي من عبور فناء الجامعه ركضا واختباءا والوصول الي,
وقمنا بفتح المعمل والتسلل جماعات وزرفانا الي خارج الجامعه بأبوابها الخلفيه,
وكانوا أختي وزوجها في انتظارنا علي مقربه من الجامعه بالعربيه,
ربنا ستر علينا يومها, لكن زملاء كثر منهم اللي حاصروهو جوار النيل بعد خروجه من الجامعه,
واضطر الي عبور النيل سباحة وشارف علي الغرق,
ومنهم من تم ضربه حتي أصيب بكسور,
ده غير النهب والسلب بالاكراه,
شفت نحن كنا بنحبكم كيف؟
دي كانت عمليه عسكريه من اسرائيل علي الفلسطينين العزّل ولّا فض شغب؟
نحن كنا طلبه ياجنابو ياخ, أولاد وبنات عزّل, لزوم كسر أبواب الكليات, ونهب الطلاب شنو؟
غايتو أنا من اليوم داك اللون الصاقعه البلو ده بحبو حب هههههههه
شكرا لأنك أتحت لي الفرصه أعبّر عن شعوري الدفين :)
| |
|
|
|
|
|
|
| |
شمائل النور
emad altaib
عبدالكريم الامين احمد
naeem ali
هواري نمر
منتصر الامين
Amna Mohamed Arh
عمر الفاروق
طلال جبير جابر
احمد التجانى احمد
Sayed Bekab
قيقراوي
سارة علي
omer osman
خالد عبد الله محمود
فيس بوك
تويتر
انستقرام
يوتيوب
بنتيريست