نحن شعب بلاد السودان شعب يتميز بخاصية لا توجد فى معظم شعوب الله على نطاق العالم العريض … فيندر ان تسأل أي انسان عن شخص آخر فيجاوبك بأنه لا يعرفه او لا يعرف منزله اولاً يعرف الكنتين الذى يوجد بالقرب من منزلهم بالرغم من انه ربما لم يسمع بذلك الاسم من قبل … وقد حدثت لى مفارقات لطيفة وذلك عندما قررت ان اختبر هذه الخاصية السودانية مية فى المية وان اجرى عليها بعض التجارب … هل منكم من سمع باسم شروم الكدمبوس ؟ … لا اظن ، فانا نفسى لم اعرف شخصاً بهذا الاسم ولم بخطر بذهنى ان يكون هناك شخص بهذا الاسم فى السودان … وانما هو اسم اخترعته اختراعاً واستحدثته استحداثاً فهو اذا اسم مخترع مستحدث . وقد كان ان ارتبكت عربتي (الهتاري) وعملت واحد (سفاري) بين الازقة والحوارى أبحث عن هذا الشخص الوهمي …وبالقرب من سوق احد الاحياء في مدينة امدرمان قابلت احد المواطنين. - اسمع بالله ممكن اسألك سؤال - جداً اتفضل . - شكراً .. تعرف لى بالله شروم الكدمبوس ساكن وين ؟ - شروم منو؟ - شروم الكدمبوس . - ايوه .. كدى خلينى اتذكر … شروم الكدمبوس … شروم الكدمبوس … ايوه … دا مش ولد ناس الطريفى ؟ - الطريفى منو ؟ - ياهو زاتو .. دا ولد ناس الطريفى وهو ساكن بجاي كدي تعال معاى نسال صاحب الكنتين دا . وذهبنا للسيد صاحب الكنتين والذى يقع على ناصية الشارع … - اسمع يا خضر … بتعرف واحد اسمه شروم الكدمبوس . - شروم مين ؟ - شروم الكدمبوس - دا مش الراجل الشغال فى مصنع البلاستيك دا ؟ وقال المواطن الاول : - مصنع البلاستيك بتاع شنو ؟ يا اخى الراجل ولد ناس الطريفى الساكنين بهنا ديل . - لا … دا مش ولد ناس الطريفى … شروم الكدمبوس اعرفه كويس … دا كان بيجينى هنا … دا راجل شغال فى مصنع البلاستيك … وكل يوم عربية المصنع بتجي تاخذه من هنا . وقد كان هناك شخص اخر يستمع الى هذا الحوار فقال : - اسمعوا يا اخوانا منو العايز شروم الكدمبوس . قلت : انا … قال : ازيك يا ابن العم … اولاً انا الاسم دا ما غريب على … وكان ما اخاف الكضب اقول دا كان سكان جنب الجامع … شفت جامع البلة … ؟ ولا اقول ليك استنى شوية … ايوه شروم الكدمبوس … عرفتو ليك – دا ما شغال فى مصنع البلاستيك ، وصاح خضر صاحب الكنتين : انت بتتكلم كيف ؟ يا اخى دا راجل بيجى يشترى من هنا سجاير وحاجات كل يوم و … وقاطعه الشخص المتكلم قائلا: يا اخى دا نسيب عبد الرحمن اخو هناى … ما تقول معاى يا اخى … عبد الرحمن أخو حسن الراجل صاحب الموتر الاصفر دا … حتى قريب دا كان عندهم عرس وصيوان هنا جنب الكوشة الكبيرة دى . ويبدو ان الجماعة لم يتذكروا عبد الرحمن ولا حسن صاحب الموتر الاصفر ولكنهم قطعاً تذكروا الكوشة فقد صاح احدهم : - الكوشة ياتا ؟ الفيها برميل ولا الثانية البدون برميل . - اجاب المتحدث الاخير : يا اخى الكوشة البي اللفة بتاعة ناس اسماعيل الحاج … يا اخ بيت عبد الرحمن الراجل الشغال في وقاية النباتات دا .. وصاح احدهم : لكن داك ما اسمه عبد الرحمن … داك اسمه عبد الرحيم وصاح فيه المتحدث الاخير : ما ياهو يا اخى … عبد الرحمن ولا عبد الرحيم اصلو انا ماسك فايلاتهم ؟ والتفت نحوي قائلاً : شوف يا ابن العم … زى ما قلت ليك … تلف بهنا ولما تجى جنب الكوشة بيلاقيك مثلث فيه كنتين .. ولا اقول ليك احسن انا زاتي اجي معاك . ( وارتكب) معى هذا الدليل العربة ( الهتاري) وهو يرشدنى الى الطريق لف يمين ولف شمال … وعرج بجاى حتى وصلنا الى الكوشة ثم وصلنا الى احد المنازل ونزل الدليل وخبط الباب فجاء احد الاشخاص : - اسمع … بالله ممكن تنادى لينا شروم الكدمبوس ؟ وغاب ذلك الشخص فترة داخل المنزل … وفى هذه الاثناء كنت اجهز في سري ما يمكن ان اقوله لهذا الشروم الكدمبوس وهو اسم اخترعته دون ان ادري ان هناك شخصاً بهذا الاسم موجود وحي يرزق … ويا لها من مصادفة وتبقى مصيبة لو طلع فعلاً ان هناك شخصاً بهذا الاسم ويقيم فى هذ1 المنزل . وبعد مدة جاء ذلك الشخص من الداخل وهو يقول : - والله شروم الكدمبوس ما عندنا هنا .. ولكن فى واحد اسمه صالح لو عاوزينو اناديهو ليكم …
------------------------
10-11-2009, 09:15 AM
عبد الناصر الخطيب عبد الناصر الخطيب
تاريخ التسجيل: 10-25-2005
مجموع المشاركات: 5180
لأول مرة يحس مشلهت بالهواء منعشاً يهب عليه من النافذة. لقد كان هواء مختلفاً عن هواء المكيفات أو المراوح. فربما كان هذا اليوم هو الفاصل بين الشلهتة وراحة البال. لقد أجاب علي السؤال الأخير الذي يقول في أي البلدان العربية توجد جزيرة توتي؟ وتحت هذا السؤال وضعت ثلاثة أجوبة موريتانيا - اليمن - السودان. طبعاً السودان.. فهو يعرف توتي وأهالي توتي وبنطون توتي. بالله دا سؤال دا؟والآن وقد اكتملت كل الكبونات، ثلاثون كبوناً هي عدة الشهر الذي انصرم. وراجع كل الاجابات والتي كان يحمل أوراقها في جيبه ويتصل بأصدقائه في أماكن متفرقة ليحصل علي الإجابات الصحيحة حتي اكتملت كلها بالسؤال عن جزيرة توتي: قال وهو يخاطب زوجته: خلاص كل الإجابات اكتملت ومن دربي دا علي البوستة عديل. وتهرع زوجته إلي الصالون حيث يقف مشلهت وهو يمسك بالظرف في يده.. فيبادرها قائلاً: وحتي الكوبونات نفسها كتبتها باسم نوال عشان لا انحسك ولا تنحسيني.. يمكن نوال حظها أحسن من حظنا. ولكن زوجته لا تترك هذا الأمر يمر بسلام دون تعليق حاد من جانبها. يا سلام عليك.. يعني أنا كنت ناحساك؟ أنت ياخوي ناحس نفسك براك. ويجيب مشلهت: يا ستي خلينا من القصة دي.. أنا بقول ليكي نوال حظها يكون أحسن من حظنا.. أصلو نحنا الاتنين مشلهتين مما اتزوجنا.. وتصبح المرأة أكثر حدة. شوف أوعاك ترمي الشلهتة فيني.. أنت من يومك وزمانك مشلهت.. حتي قبل زواجنا îوينطلق سؤال مثل الصاروخ من مشلهت: يعني أنتي ندمانة علي زواجك مني؟ يعني أنتي الكنتي مامشلهتة؟ كدي بالله ماتبوظي علينا اليوم السعيد دا.. أهو دي خمسمية ألف ريال.. يعني نص مليون ريال.. مش جايز الشلهتة دي ذاتها تنتهي لو عندك ولا عندي؟وتهدأ حدة الجمل التي تنهمر بعد ذلك في هذا الحوار حتي تقول الزوجة: انت عارف أول حاجة تعملها نشتري كل العدة الأنا نفسي فيها.. طقوم العشاء وطقوم السفرة والشاي والخلاطات وكل حاجة بالكهرباء.. ولكن مشلهت لا يري أن لكل تلك العدة التي ذكرتها زوجته أهمية.. عدة شنو كمان؟ يازولة دي قال ليكي خمسمية ألف.. نص مليون.. تقولي لي عدة.. ودي قروش بتاعة عدة؟.. وبعدين هسع نحنا ناقصين عدة. ماهو البيت كله من أوله لآخره عدة بالله عندك كم ترنك ولا صندوق مستف؟.. وتجادل المرأة بقوة لأن العدة هذه شعار مرفوع في كل بيت.. هسع العندنا دي انت بتسميها عدة؟ شوية كراكيب وكبايات شكلها كيف ماعارفه؟.. انت ماشفت العدة كيف عند ناس سلافة.. ولا عند ناس آمال.. وبعدين كدي وريني أنت القروش دي عايز تعمل بيها شنو؟ويجيب مشلهت: أعمل بيها أي حاجة الا العدة. حاجة زي شنو يعني؟ياستي.. دي قروش بتاعة مشاريع مش بتاعة عدة.. يعني يمكن تعمل مصنع لانتاج العدة.. مش عشان نشتري بيها شوية صيني وكبايات. أنا بقول لازم نفكر في مشاريع حقيقية.. مش زي الكلام البدور في راسك.. وتجادل المرأة بضراوة: انتو أصلو الواحد مما تجيهو شوية قريشات بتلخم وتفكيره بتشل.. أنا خايفة لو قالوا ليك عدها ماتقدر تعدها.. بالله شوف دي.. ودي كمان عايزة ليها عد؟انتي ماشفتي في الجريدة كيف بدوا الواحد شيك؟دا شيك معتمد والواحد بيفتح بيهو حساب في البنك.. يعني انتي متوقعاني أنا أجي شايل لي خمسمية ألف ريال في جيبي؟ بالله شوف دي ! ولكن زوجته تصر علي معرفة تلك المشاريع: طيب قلنا ليك ورينا عايز تعمل بيها شنو؟ زي شنو يعني؟ويجيب الأخ مشلهت وهو يشعر بضجر وتوتر عال: أولاً لازم نشتري بيت جاهز في الجريف. وتستشيط المرأة غضباً: ياخوي أقيف عندك هنا.. الجريف بتاعة شنو؟يعني انت عايز تكون قريب من أهلك.. وأنا يعني ماعندي أهل؟.. إذا اشتريت بيت جاهز في الجريف إلا تسكن فيهو براك.. ولو انت عايز تشتري بيت جاهز عندك الرياض أو أي حتة في بحري.. وإذا كنت عايز حتة محايدة ودينا مدينة النيل في أمدرمان. ويرتفع صوت مشلهت: الرياض بتاعة شنو ومدينة النيل بتاعة شنو؟إنتي نسيتي الحرامية وزوار الليل. في الجريف هنا عندنا علي الأقل أولاد أهلنا عاملين دوريات ومافي حرامية. تمشي تودينا للحرامية في محلهم.. يعني أنا أقعد أساهر مع الباعوضة ولا مع الحرامية؟ولكن الزوجة لا تقتنع بهذا المنطق: ياخوي الحرامية في أي محل موجودين.. وانتو بيتكم ذاتو اتسرق كم مرة؟ تتذكر الشهر الفات مش قالوا ليك ترسل ملابس عشان الحرامي ما خلي ليهم قطعة؟ انت قايلني أنا نسيت. ولكن السيد مشلهت لا يتزحزح قيد أنملة عن الجريف: بعدين انتي مش قلتي لو عندنا قروش عايزة تفتحي محل كوافير؟ طيب بالله أحسن تفتحي محل كوافير في الرياض وهناك بين كل محل كوافير ومحل آخر محل كوافير.. ولا تفتحي المحل دا في الجريف.. الفيهو المحلات بتعد بأصابع اليد؟ ياولية من فضلك ماتعكري مزاجنا.. وموضوع الجريف دا اعتبريهو منتهي. منتهي يعني شنو؟ أنا من بدري فهمتك أنا مابمشي الجريف. وانت عارف كدا.. يعني دلوقت مافكرت إلا في الجريف؟ خلاص أمش براك.. وأسكن براك. ويجيب مشلهت: أنا ما بمشي براي.. ومابسكن براي وانتي عارفه كدا.. وبعدين أنا مش عارف ليه انتي عندك حساسية من الجريف؟وتنفي المرأة عن نفسها هذه التهمة: أنا شايفة الجريف دي بعيدة.. وبعيدة ليه.. انت ناسية إنو حتكون عندنا عربية كريسيدا آخر موديل؟ويرتفع صوت المرأة هذه المرة أعلي من قبل: شنو.. شنو..؟ كريسيدا؟ ليه كريسيدا..؟والله حكايتك حكاية.. واللاندكروزر بعمل في شنو؟ - ياولية.. أنا ما مستعد اركب لاندكروزر.. مش علي كيفي.. وبعدين.. انتي قايلة القروش دي شنو عشان نلعب بيها كدا؟. مانحن لازم نعمل حساب للمستقبل. ولكن المرأة لا يبدو عليها الاقتناع: إذا كان عايز تشتري بيت في الجريف وتشتري عربية كريسيدا. أنا عايزه أعرف باقي القروش حتعمل بيها شنو؟ويجيب الأخ مشلهت: نخليها للزمن. وفي هذه الأثناء وصل النقاش إلي هذه المرحلة.. تدخل البنت نوال وقد علمت أن والدها السيد مشلهت قد كتب الكبون باسمها فتهتف قائلة: شوف يا بابا.. أنا أول ما أكسب الجائزة دي.. حاخد القروش واختها في البنك البريطاني في لندن عشان أنا عايزة أكمل دراستي هناك وانتو ممكن تجوني في الإجازة. حاجة لذيذة مش؟
--------------------------------------------- مقوقلة من مواقع نشرت كتابات للدكتور محمد عبدالله الريح
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست