|
|
 الغلبك بي التلاتة الله يجيب ليك يوم غلبو..
|
هل أصبح الهلال العظيم هو جالب الفرح الوحيد في وطننا المحبوب الذي نبكيه مع كل أخفاق تسببنا فيه بمحض حماقتنـا ..؟
لا غبـار على كل من هتف بالأمس مع أو ضد الهلال العظيم.. وتوسد أحلامه الخالية من كابوس مرعب أصبح يلازمه كلما تقدم الهلال خطوة أو ترقى سلماً محاولا تصحيح مسارات الكرة السودانية أو الإعلان عنها في المحافل الدولية.. فما قدمه أبناء الهلال طيلة مسيرة هذا الموسم الأفريقي لا ينكره إلا من في قلبه شي من (حتى) .. وتضخمت تلك (الحته) وانتشر سرطانها ليس بأحداث (11/ سبتمبر) التي غيرت ( قانون اللعبة) كما غيرت الخارطة العالمية سياسيا واقتصاديا ، إنما بإحساس الآخر ببعد ما .. في داخله بخطورة أن يعتلي الهلال بعظمته منصات للتتويج بحجم القارة.. تفتح له أبواب الدخول للعالمية من أوسعها.. ويظل رصيفه وظله لسنوات طويلة في عداد المفقودين في هذه المسيرة الأفريقية التي خصصت فقط من أجل الأبطال ولا سواهم والتي فارقها يجر من خلفه أذيال الهزيمة متجرعاً السم الزعاف ورجم (الحجارة الصديقة) وضرباً مبرحاً من نفس الرماة الذين حاول إعلامه النيل منهم في سخرية واستهانة وخرجت قاعدته أمس فرحة اضاءة سماء الخرطوم المظلمة بالألعاب النارية وأبواق السيارات المتشنجة ابتهاجاً.
.
.
V
|
|
 
|
|
|
|
|
|
|
 Re: الغلبك بي التلاتة الله يجيب ليك يوم غلبو.. (Re: tmbis)
|
| Quote: فما قدمه أبناء الهلال طيلة مسيرة هذا الموسم الأفريقي لا ينكره إلا من في قلبه شي من (حتى) .. |
ياراجل ..
ياخ دا انتوا قتلتوا الحلم فى قلب الاول من اغسطس وتامبو شنو داك برضو
وكانو وزسكو كلهم اغتلتوهم بى الدولارات وليس داخل الميدان
الوحيدين الذين اطلقتوا عليهم رصاصة الرحمه بى ايدكم كنا نحنا ديل
غلبتونا خدمة يمين وعرق جبين .. اما الاخرين فقد غدرتوهم بى دولاراتكم
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: على محمد على بشير)
|
Quote: ياراجل ..
ياخ دا انتوا قتلتوا الحلم فى قلب الاول من اغسطس وتامبو شنو داك برضو
وكانو وزسكو كلهم اغتلتوهم بى الدولارات وليس داخل الميدان
الوحيدين الذين اطلقتوا عليهم رصاصة الرحمه بى ايدكم كنا نحنا ديل
غلبتونا خدمة يمين وعرق جبين .. اما الاخرين فقد غدرتوهم بى دولاراتكم |
بي هناك ..
امشي بي هناك .. محلات الكوار ..
إنتو يعني شان ما لاقين البصنفكم ..؟
الواحد فيكم يترشى تلاتة زي السم .. ويعمل فيها ما شايف
وكان عمل شايف يشوف ليك البورد دا تلاتة تلاتة .. ويغيب تلاتة اربعة اسابيع ما يجي ..
واكان جا
اهـا
يجيب ليهو صورة فيها حمار .. يا حصان .. يا اي من الدواب .. دا مستواكم في التشجيع وفلسفتكم في الكورة
شان كدا بقيتو تدخلو الكورة والواحد مالي جيبو حجار .. بدل التسالي ..
وكان ما لقى حجار بيملاهو تراب ..
اطلع قدامي بي هناك محلات الكوار .. اصلو الليلة يوم تصنيفكم ..
عندنا ليكم تصنيف ورص .. تترصو .. وتتصنفو .. وتترشو ..
الجاهز فيكم ومستعجل .. يرفع لينا يدو بس ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: حمزاوي)
|
Quote: نحن ناس خياراتنا كتيرة وبنفتح مجالات واسعة للناس الزعلانه .. وقاعده تزوغ وتتدسى ..
كلو شي عندنا بي نظام .. |
يا ابوالنسب
انا من اول امبارح بالليل فرحان جنس فرح
والله لا جاب الزعل بين الاخوان
أما بخصوص تزوغ وتتدسى ... فعلاً حقيقة انا لمن اكون مهزوم طوالي بعمل حمد لبد .. معقول اجي اقابلكم عشان اتلطش اكتر ... طوالي بطفي النور وبغمض عيني وبهلوس مع نفسي
هاردلك يا ابوالنسب
إلا قول لي انت امبارح كنت فين
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: وليد محمد المبارك)
|
| Quote: نحن ناس خياراتنا كتيرة وبنفتح مجالات واسعة للناس الزعلانه |
تمبس
ياخ احسن الله عزائكم
وما درناها ليكم بالطريقة دي لكن ده امر الله
بالطريقة دي كسرتو الرقم القياسي في الرششان داخل الحيشان
ــــــــــــــــــــــــــــــــــــــــــــــــــــ
بالجد كده: رايك شنو في رقصة الدباسه حقت الحارس لووووووول
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: Faisal Elrasheed)
|
لا غبار على كل من هتف أمس من داخل شريانه للهلال العظيم .. فهو حب لا إرادي فطري يقود صاحبه إلى الموت بفعل تزاحم كريات الحب الزرقاء لتحبس الشرايين .. صرعنا هذا الحب القاتل قبل المنتخب الكنغولي لحظت أن تعجلنـا في اندفاعنـا بكلياتنا للوصول إلى ذروته فمن الحب ما هزم.. وكانت كل الشوارع في انتظار هذا الفرح لتضمد به الكثير من الجراح .. ولتعود به إلى ذكريات قديمه لا تعرف حداثة الكرة أو قدمها ولا تعترف بمهارة (بيليه) أو مهنية (صامويل ايتو) إنما تعرف الميدان ونزاله بكل ما تعني الكلمة من مدلولاتها ..
بالمقابل إذا كان هناك من الحب القاتل .. أيضا أن هناك ما يقابله من معدلات عالية جدا من جرعات الكراهية المركزة تعمل جادة على أن تطغي على أساسيات هذا الحب الكبير فالعذر أيضا لكل من هتف بالأمس ورقص وخرج من مكان قصي .. لا أقول شامتا فعبارة (الشماتة) ذكية وماعون واسع يحتمل العديد من العناصر أهمها أن تضغط على جراحك وتعيش لحظات من النشوى مردهـا حكمة قديمة موغلة في السودانية (الغلبك بي التلاتة الله يجيب ليك يوم غلبو) ..
.
.
V
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
قلت لي الخرطوم تلاتة فاتحه للهلال ..؟
إنت لما قلت كدا كنت جادي .. واللا زعلــه ساكت كانت منك ..؟
جادي ونص
واكدتها ليك عدة مرات
وباكدها ليك هنا كمان
وأكدها كمان الباشمهندس همت
وأزيدك كمان سواها هلال كادوقلي كمان واضحة
بس دا علاقتو شنو برقصة مازيمبي وكاروشة حارس المرمى
| |
|
|
|
|
|
|
|
|
 Re: الغلبك بي التلاتة الله يجيب ليك يوم غلبو.. (Re: حمزاوي)
|
Quote: جادي ونص
واكدتها ليك عدة مرات
وباكدها ليك هنا كمان
وأكدها كمان الباشمهندس همت
وأزيدك كمان سواها هلال كادوقلي كمان واضحة
بس دا علاقتو شنو برقصة مازيمبي وكاروشة حارس المرمى |
.. الباشمهندس همت دا بيلعب وين ..؟
هلال كادوقلي ؟؟ وواضحة كمان ..؟
والله انا خايفك كمان تجي تأكد لي إنو التلاتة العامله ليكم وجسع قلب دي برضو الفاتح حسين ..
حارس المرمى بتاع مازيمبي فرحـان ودا من حقـو .. وأنا لو كنت هناك .. كان دقيت كاروشة برضو ورقصته معاهـو .. ما كمان غالب وبي حقو.
تتذكر لما مهند الطاهــر طلع ليكم فوق العراضة .. لحدت ما الجماعة نزلوهو ..
ما كمان برضو بي حقـو ..
بالمناسبة ..
إنتو ما قدمتو شكوى لييه لما الخرطوم تلاتة فتحت للهلال ..؟
والله مني ومنك كان تكلم مزمل ..
قال ايه .. المهندس همت اكدها
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
| Quote: الغلبك بي التلاتة الله يجيب ليك يوم غلبو |
تمبس
طبيعي ان تحاول انت مداواة جراحك بان تظن ان كل المحصلة هي شماتت المريخاب
وطبيعي ان تصب جام غضبك عليهم ظانا ان كل الناتج من تلك المذبحه قد مثل انتصارا للمريخاب
يا اخي
ماحدث اول امس كان وسمة عار في جبين هذه البلد
لقد بشعتم بسمعة السودان وليس الهلال وحده وها انتم ودون خجل (عينكم قوية وما بترمش) تاتون افرادا وجماعات للنيل من المريخ
ماذا فعل المريخ وما ذنبه ؟
هل كان الحكم من اختيارنا ؟
هل سيف مساوي لاعبنا؟
هل كابوندي والذي سمي شارع الاربعين باسمه لاعبنا؟
هل كامبوس وضع التشكيله بمعاونة ابراهومة؟
ام هل كانت المباراة في الرد كاسل؟؟
يا عزيزي
لا ترمو بكوراثكم ومصائبكم علي المريخ وجمهوره النبيل
ولانني اقدر الحالة النفسية التي تمر بها انت واصدقائك
فها هو فيصل نوبي يترنح منذ يومين وهو لا يدري اي مصيبة حلت بهم
وحميده اصبح بقول كلام لا في السما ولا في الواطه من هول الصدمة
نحن نقدر ما انت عليه
فاجتمعوا هنا واخرجوا ما في صدوركم عل الله يريح هذه الصدور المحترقه والاثمة بحب من لا يستحق
وصدقني قلوبنا معكم فوالله ما تعرضتم له من اذلال في داركم لهو ما لم نره في حياتنا
والحمد لله علي نعمة الاسلام والتي لولاها فانا اكيد من ان بعضكم كا سيلجأ للانتحار
احسن الله عزائكم يا اخي
ولي عودة
| |
|
|
|
|
|
|
|
|
 Re: الغلبك بي التلاتة الله يجيب ليك يوم غلبو.. (Re: Faisal Elrasheed)
|
Quote: طبيعي ان تحاول انت مداواة جراحك بان تظن ان كل المحصلة هي شماتت المريخاب
وطبيعي ان تصب جام غضبك عليهم ظانا ان كل الناتج من تلك المذبحه قد مثل انتصارا للمريخاب |
عاين لي ابوي انا ..
مداوات الجراح دي خليها على جمب .. لو في مداوات جراح حقو تنصح بيها نفسك ., لانك ماخد تلاتة مني انا القدامك دا في نفس البطولة دي .. وقعدتك في الشارع هناااك .. صاح ..؟ واللا انا غلطان ..؟
يعني لو جينا لي حسابات زي دت المفترض إنت زاتو ما تتدخل في موضوع انو الهلال اتغلب من منو .. يعني تكون نفسك .. وتجتهد في الدوري الممتاز علشان تجيب الكاس .. وبعداك تدخل معانا في الدوري دا الموسم الجاي ., وبعداك تجي تغلبني وتجرحني يا مياس .. عشان اداوي جروحي .. دا كلام منطقي واللا داير ليهو بخرات ..؟
Quote: ماحدث اول امس كان وسمة عار في جبين هذه البلد
لقد بشعتم بسمعة السودان وليس الهلال وحده وها انتم ودون خجل (عينكم قوية وما بترمش) تاتون افرادا وجماعات للنيل من المريخ |
والله نحن كان عينا قوية وما بترمش إنتو عيون زاتو ما عندكم .. بعدين ساعدني ياخ بي برود الاعصاب .. لانو البوست دا .. ما عايز فيهو تشنج وكلام خارم بارم .. يا بتضطر اقول ليك باااص .. من الردود .. سمح ؟؟ لانو في نوعيات كدا منكم لا عندها منطق .. ولا عندها اخلاق تشجيع ..
Quote: ماذا فعل المريخ وما ذنبه ؟
هل كان الحكم من اختيارنا ؟
هل سيف مساوي لاعبنا؟
هل كابوندي والذي سمي شارع الاربعين باسمه لاعبنا؟
هل كامبوس وضع التشكيله بمعاونة ابراهومة؟
ام هل كانت المباراة في الرد كاسل؟؟
|
فعلا الحاجات دي كلها مافيشة .. طيب يعني فرحانين ساكت كدا .. ومستلمين البورد ومستلمين الشوارع ..؟ طيب ياخ اديني مبرر واحد بس لي الانبساطة دي .. لو منبسطين عشان ناس مازمبي ديل غلبو ليكم الهلال الغلبكم تلاتة .. يكون كدا عندكم حق وكلامي مشى وجا ..
بعدين كدي اطلع لي من وهمة البلد وسمعة البلد .. والكلام الفضفاض دا .. دا كلام اتحسم كرويا من بدري جدا في البورد دا .. ممكن الواحد يناقشو في مكان تاني غير المكان دا .. | Quote: ولانني اقدر الحالة النفسية التي تمر بها انت واصدقائك |
معليش .. الكلام التحتو خط دا ما بيقسم معاي .. لو كررتو زي ما قلت ليك بتضطر اوقف رد ليك .. لانو تشجيعي للكورة هنا مبني على اسس محددة .. وعندي ناس محددين قاعد امارس معاهم الحركة دي .. في حدود .. لا تتجاوز الكربنة العادية .. لو عندك مكان بيقدر يحتمل الكلام دا .. ممكن تمشي عليهو وتعفيني انا منو ..
| Quote: وصدقني قلوبنا معكم فوالله ما تعرضتم له من اذلال في داركم لهو ما لم نره في حياتنا |
.. قلوبكم دي خلوها معاكم .. لانكم محتاجين ليها شديد .. نحن ديل بصيرين علي نفسنا .. إنتو تمو فرحتكم .. ولمو حجارتكم .. وامشو طقعوا لعيبتكم .. نحن ديل بصيرين بي نفسنا الوكت البنحتاج لي قلوبكم معانا بنجيكم في استادكم الما اتغلبتو فوقو خاااالص دا .. ونقول ليكم عليكم الله ادونا قلب قلبين تلاتة قلوب .. وبنرجعه ليكم ..
Quote: والحمد لله علي نعمة الاسلام والتي لولاها فانا اكيد من ان بعضكم كا سيلجأ للانتحار
احسن الله عزائكم يا اخي
ولي عودة |
الإنتحار ..؟ والله دي فلسفة كويسة اظني اول مرة اسمع بيها.. ما انتحرتو يوم التلاتة الحرقت قلبكم ورقصتكم لي الصباح اول امس .. ما انتحرتو بي نقطتينكم ديل .. ننتحر نحن ؟؟
ليك عودة؟؟
تعال ياخ اتفضل ...
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
طبعا حيرتني بالكتاب الكاتبه فوق ده
وكدي نبدا بي
| Quote: مداوات الجراح دي خليها على جمب .. لو في مداوات جراح حقو تنصح بيها نفسك ., لانك ماخد تلاتة مني انا القدامك دا في نفس البطولة دي .. وقعدتك في الشارع هناااك .. صاح ..؟ واللا انا غلطان ..؟ |
صحيح ماخدين التلاته وما نكرناها لكن الخمسه برضو حارة
يتخيل لي لو كان في اجاويد كما في تونس كان الموضوع اتحله
بالمناسبه سمعنا انه الاجاويد الزمان ديلك حيتدخلو في كورة الرد ... يعني ما تخافو وتقلقو بالكتير بتكون واحد صفر او درون
| Quote: والله نحن كان عينا قوية وما بترمش إنتو عيون زاتو ما عندكم .. بعدين ساعدني ياخ بي برود الاعصاب .. لانو البوست دا .. ما عايز فيهو تشنج وكلام خارم بارم .. يا بتضطر اقول ليك باااص .. من الردود .. سمح ؟؟ لانو في نوعيات كدا منكم لا عندها منطق .. ولا عندها اخلاق تشجيع .. |
طبعا يا عمك دي حرية شخصيه في انك تقول باص او دك او قوم لف فما مافي داعي تجيبه هنا اذا كلامي ما عجبك طوالي باصيه يعني ما ترد عليه صدقني عادي صدورنا تحتمل كل الاحتمالات
وكل الود
| Quote: طيب يعني فرحانين ساكت كدا .. ومستلمين البورد ومستلمين الشوارع .. |
منو هم المستلمين البورد هسه في زمتك؟
والله صحي جو يساعدوهو دسه المحافير لووووووووووولز
| Quote: طيب ياخ اديني مبرر واحد بس لي الانبساطة دي |
هسه انت حاسي انو انا مبسوط؟
سبحان الله فيكم ده من الاسباب الودت الهلال في 60 داهيه ياهو الكلام الزي ده
دايما تفكيركم في المريخ ومركذين عليه .... حسادتكم تحير
والله كان عملتو 50% من تركيزكم في الهلال كان احتمال تلعبو مع برشلونه الفاينال في ابو ظبط
عينكم للفيل تطعنو في ضله ... ما ياهو دااااك مازمبي امشو شوفو مشكلته معاكم شنو؟ يا الراشننا تلاته
| Quote: لو منبسطين عشان ناس مازمبي ديل غلبو ليكم الهلال الغلبكم تلاتة .. |
والله لكن قصه...
اخر الزمن نحن دايرين يغلبو لينا بالانابة؟
نحن حقنا بنجيبو حااااار وما جديد عليكم وتشوف وتتذكر كلامي انشا الله في اول كورة والممتاز بدا نشوف انتو حتسوو شنو
| Quote: ولا عندها اخلاق تشجيع .. |
اخلاق التشجيع دي اسال منها جمهورك ويشهد ليكم استاد الخرطوم من زمن دحدوح .البسل الروح..متذكره كويس انته وصدقني بتكون فلقته معاهم قطع شك
| Quote: ونقول ليكم عليكم الله ادونا قلب قلبين تلاتة قلوب .. وبنرجعه ليكم .. |
من غير ما تطلبوها اديناكم ليها عشان نوريكم انه نحن صفوه ..لكن المثل بقول الحسنه ...................
| Quote: ما انتحرتو يوم التلاتة الحرقت قلبكم ورقصتكم لي الصباح اول امس .. ما انتحرتو بي نقطتينكم ديل |
تمبس
والله السطر ده مفروض تعمل بيه بوست لانه بعبر عن الحالة (النفسية والذهنيه )البتمر بيها انت وجميع الهلالاب
وطوالي جيت جاري للنقطتين حقاتنا ونسيت انك كنت الطيش قبال كده؟
بجي بي مزاجي يا عمك لانه شايفك بديت تفك اخرك بسرعة ....
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: Faisal Elrasheed)
|
Quote: تمبس
والله السطر ده مفروض تعمل بيه بوست لانه بعبر عن الحالة (النفسية والذهنيه )البتمر بيها انت وجميع الهلالاب وطوالي جيت جاري للنقطتين حقاتنا ونسيت انك كنت الطيش قبال كده؟ |
.. ياخ والله ما خليت لي مساحة عشان اقول ليك بيها باص زاتو ..
عاين بتقدر تباصي نفسك براك .. ؟
الخيارات متروكة ليك .. وبي كدا تكون ريحتني من الرد على كلامك الفوقاني دا ..
تقدر تباصي نفسك من البوست دا كان بها .. ما قدرته .. كتابتك الح تكتبه المرة الجاية .. اكتر حاجة ح اعمله ليك .. ح اجر .. الاسكرول لي تحت ..
الحركة دي ممتعة جدا .. لانو شكلك عايز تجر البوست دا لي حتة انا ما قاعد احب اعمله بالذات في تشجيع الكورة في البورد دا .. حاوله معاي واحد هنا قبل فترة .. قمت وقفته من الكتابة عن الكورة ..
فياخ انا ما عايز ارجع للمربع داك .. كلامك الكاتبو دا ما فوقو حاجة بالنسبة لي منطقية .. وبتجدع ليك في كلام كدا انا مش ما بقدر عليهو .. والله بقدر عليهو ونص وخمسة .. لكن ما عايز استعملو بالذات فيما يخص الهلال .. يعني لو خدمتني ولقيت ليك واحد من جماعتكم وفتحت ليك بوست ووهبتوهو لي روح تمبس .. بيكون امتع من كدا .. | Quote: بجي بي مزاجي يا عمك لانه شايفك بديت تفك اخرك بسرعة .... |
والله لكن حاجة عجيبة جدا .. يعني حسع إنت فككتني آخري ؟؟ واللا الفهم شنو ..؟
بس لي التوضيح .. لما احس إني بفقد اعصابي .. قاعد ابعد من إني حتى اتكلم مع زول ..
يعني بالواضح كدا .. لما تكون اعصابي بايظة .. ما قاعد احضر كورة ..
بعدين مش اتفقنا في مسالة الحريات الشخصية دي ؟ طيب ياخ اعمل ليها بيست في حتت مزاجك دي .. ليه تاعب نفسك في التوضيح دي حاجة انا اساسا عارفه ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
| Quote: منبسطين عشان ناس مازمبي ديل غلبو ليكم الهلال الغلبكم تلاتة |
دي يا تمبس سبب المغصة..
أخجلوا يا طيشاب ولما تصلوا المرحلة دي تعالوا اتبجو
وإلى ذلك الحين (لما تكبروا) خليكم في مخدر الحكم هزمنا والخرطو ثلاثة فتحت للهلال وهمت قال..
واخجلتكم أب سن يضحك على أب سنتين..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: عثمان جلال الدين)
|
Quote: يا تمبس سبب المغصة..
أخجلوا يا طيشاب ولما تصلوا المرحلة دي تعالوا اتبجو
وإلى ذلك الحين (لما تكبروا) خليكم في مخدر الحكم هزمنا والخرطو ثلاثة فتحت للهلال وهمت قال..
واخجلتكم أب سن يضحك على أب سنتين.. |
والله ياعثمان جماعتك ديل مع المغصة جابت ليها فقدان منطق ..
الواحد فيهم يكتب ليهو حرف في البوست دا .. ويعمل (ارنب نط ) لي بوست تاني .. يلحس ليك كلامو زي الما حصلت حاجة ..
وشي كلام عن السايكولوجي .. والنفسيات .. والباراسايكولوجي .. والميتافيزيقيا ..
يعني بي صراحـة لو جمعت كتابات الناس دي وضربتها في (تلاتة) أو في (7) أو (9) أو (11) .. من يوم المباراة لحدت الآن .. ح تلقى إن ماف سبب واحد للاحتفال .. إلا التلاتة اياهـا ..
أما ناس الخرطوم تلاتة فتحت للهلال .. والحكم عمل شنو ما عارف .. فديل طبعا لما يكتبو ليك كلام زي دا الواحد تعمل من تحتو خط .. بعدما تخططو كويس .. ح تلقى إنو كلامو دا مجرد استهلاك لحظي .. أو زي ما بقولو ناس الوست .. مراقـه .. ولو الواحد فوقم ما لقى ليهو مراقـة .. بيعمل زغبير شهر شهرين (3) شهور وما يظهر ليك إلا في ايام زي دي .. ويعمل فيها الود فلكي وبتاع منطق وحساب مثلثات .. ويفتي في تاريخ البطولات .. والغريبه يوقف ليك الهلال في سبعة نقاط ويحلف بي التكسرو حتة حتة ..
وهو يا حسرة عندو نقطتين.. لا زادن ولا نقصن
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: وليد محمد المبارك)
|
| Quote: سياسية كل حكم فرده من بلد جابت حقها |
الحمد لله .. ريحتكم.
اها موضوع الحكام وعرفناهو ...
باقي ليك الجماعة ديل يكونو .. (قطعو) يد عمر بخيت وطلعو (الرتينزه) واللا كيف ..؟
الغريبة شايف عمر بخيت لاعب بي كرعينو ويدينو الاتنين ..
موضوع الرتينزه دا .. مسئول منو .. (عصام حجابات) .. احولك ليهو واللا اكتب ليك بخــره .. قبلك هنادا ؟ 
| |
|
|
|
|
|
|
|
|
 Re: الغلبك بي التلاتة الله يجيب ليك يوم غلبو.. (Re: وليد محمد المبارك)
|
Quote: جنس راحات هي
قدر زوغتك امبارح |
..لالالا ياخ ما تطمم لي بطني .. اتبع (الفير بلي) أنا لي فترة واقف من البورد دا .. وكتبت الكلام دا وكنت ما راجع .. لظروف عمليه وأخرى تتعلق بي ترتيبات محددة ..
ما تبقى زي خالك همزاوي .. الهلال يرش الخرطوم تلاتة .. يغيب من البورد .. الهلال يرش المريخ تلاتة .. يغيب من البورد .. وكان جا يقول ليك الخرطوم تلاتة فاتحه للهلال ..
ياخ انا عملت استنفار من عندي .. وامس القريبة دي لو كان لقيت يدي .. كان جيت زي جيتي دي ..
ياخ أنا قاعد هنا من متين معاكم .. شفتني يوم واحد عملت زايغ من البورد دا في كورة هلال ..؟
والله يا (ولي) ان لما اللقى الاستنفار حقكم دا .. بتكيف كيف ..؟
بالذات الخلايـا البتجي طالعه من كهوفه .. وتعمل ليك فيها بتاعت كربنه ..
الله بيسسالك عاين حوالينك .. شوف في كم واحد عامل فيها حريف تشجيع ظهر فجأة كدا .. ؟
تقول لي زغته امبارح .؟
ياخ إنتو لو عندكم عدادات كدا دا .. الواحد ما يرد الرسالة القصيرة بتاعت الجوال ..
يا على الاقل يبقى زي اساسي .. يقفل جوالو يا يقول ليك انا والله في الصناعية ..
احي انـا .. دي ما صناعية ..؟ 
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
والله يا تامبا ..
الضللة ديل أمس حلاة ما فرحانين الواحد يفتح بوست يجي يرد عليهو يكون فتح ليهو بوست تاني ..
أي واحد كان مدسي من معركة الحادي عشر من أغسطس جاء مارق الليلة ..
عارفنها المعركة دي ولا نجي ننزله ليكم هنا ..
بس إنتو جهزوا حالكم وتعالو أخدو الفيها النصيب وأطلبوا ألله ..
كان التلاتة دي كتيرة قولوها ياخ بنقصه ليكم ..
والله السنة الفاتت خفتوا جمال الوالي يخلي المريخ أكتر من خوفكم على المريخ يتغلب ..
اصلو الخمسة سنين دي بقت يا زينة الأيام ولا مره حاولتو تشيلو فيها كأس الدوري الممتاز ..
عشان كده الواحد لما يجي يقول المريخ بقول مريخ جمال الوالي ..
ياهو الضل دا ما فايتنو شبر ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
الضغط على الجراح وحده لا يكفي في حال هلالنـا العظيم .. نحتاج مع الضغط على الجراح مراجعة الأخطاء بشكل جيد ونشر ثقافة معالجة التشنج والانقياد الأعمى للإعلام سلبي كان أم إيجابي .. والعامل المساعد في كل ذلك هو اللاعب رقم (12) الجمهور الذي وقف بالأمس في شكل حضاري رقم الهزيمة القاسية .. (لا حصب لعيبة ولا لطم خد ولا اقتحم ملعب ولا نكل بي ممتلكات النادي) .. فكما تعود أن يخرج تدفعه أهازيج الفرح التي تقتحم شوارع الخرطوم حتى الساعات الأولى من الصباح .. خرج أيضا بصورة حضارية إلا من بعض البؤس واجترار للسيناريو الذي شاهدوه وكان ابعد للتصديق ويحتاج إلى مدة زمنية كافية للتعايش معه .... نفس هذا الجمهور الحضاري الذي يحترم النصر ويتعامل معه كقيمة جميلة بكل ما أتيح من وسائل تعبير أيضاَ تنال منه الهزيمة وهي متلازمة ثابتة في كرة القدم لا ينكرهـا إلا من كان لا يعرف أهم أساسيات اللعبة..
.
.
V
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: abdalla osman)
|
| Quote: الحبيب تمبس, والله غبينتي على الإعلام اكتر من الولولة بتاعت المساكين ديل. |
سلامات يا دكتور ..
معليش ياخ .. اصلو دا ياهو الاعلام لما يستعمل في الاتجاه السالب .. مش يغلب الهلال .. والله يعمل حرب عديل كدا ..
للاسف الاعلام اخترقوهو زي ناس مزمل ابو القاسم .. ناس بتكتب بالقلم الأسود .. وبتلقى ناس في الدولة مدياها حريته في انها تكتب البتكتبو .. وصحيفته ماشه .. وفي الناحية التانية يصادرو في الصحف البتقول ليهم عينكم في راسكم ..
لو جينا نتكلم عن الاعلام .. أول حاجة نقبل على بيت الداء .. ونبتدي بي الممارسات الدخيله الاهمها الكذب والتلفيق ..
يعني كل اللف والدوران والكضب الكان بيعمل فيهو مزمل الفترة الفاتت فيما يتعلق بلعيبة الهلال دي مفترض يلقى فيها عقاب رادع جدا عشان تاني حركة زي دي ما يعمله ..
والأردع من كدا مفترض يتعاقب من كونو مغيب شريحة كبيرة جدا من المشجعين ومزيف ليهم كتير من الحقائق .. وخالق عداوات شديدة جدا وشحن غير مبرر ينحاز ليهو كل المتشنجين .. والمتعصبين من الجهتين .. ودا للاسف بينعكس سلباً على كرة القدم .. حتى وصل مرحلة إنو المشجعين يحصبو اللعيبة وترد عليهم الشرطة بالغاز المسيل للدموع ..
مع انو مزمل ابو القاسم ما بيستاهل انو الواحد يستشهد بيهو كمثال .. لكن دايما البصلة الما مظبوطة .. بتنتهي من الشوال كلووو ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: ارصد محمد جلال)
|
Quote: الله .. الوطن .. الحكام .. الهليل
جابوها ليكم مشكل غلبوكم اهداف اشكال والوان ...
تكبر تنسى |
.. والله انا حاسدك عديل يا ارصد .. على ذاكرتك القوية دي ..
حسع الباص وورد دا اتذكرتو كيف ..؟
ايفوسـا .. ووسادومبـا .. وعمر بخيت .. وديمبا
ياخ ما بتبالغ ..؟
انا كان عارفك لابد كدا دا .. كان عملت ليك رسالة من تحت الماء من برج التجارة الدولي يوم حداشر سبتمبر
يا جماعة اخوكم ارصد دا طبعا من ضمن المجموعة الح يشمله التعداد ناس الرقم تلاتة ..
يعني تاني ما يظهر لينا في المواسم بس
الناس دي مفترض تكون روحه رياضية .. تترشة تلاتة تجي تجيب الشاي والقهوة .. ترش الناس تجيب معاها حلاوة قطن .. يا مشكل اشكال والوان
لكن يطلعكم فريق الجيران .. دي والله حقو نوديها دار الوثائق عديل كدا ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: أحمد ابراهيم عثمان)
|
Quote: 5 كتيره خالس
لا اذكر انه هنالك فريق سوداني خسر بخماسيه علي ارضه |
.. الكلام دا ما كان تقولو يوم الجمعة حداشر سبتمبر .. يعني تخلصو معانا الكلام الجواني دا وبعداك تنتقلو لي الأفريقية .. المسالة خطوة خطوة .. إنت قايله ساااكت كدا دا ..؟
اظنو الخمسة بت اعم التلاتة .. وكان اتحرفنته شوية واديته اربعة بالتونسية بتبقى سبعة .. بس ما تقوم تجيب معاك حجار ..
بالمناسبة دا اسبوع مازنبي ..؟
بي صورة أوضح:
الأسبوع دا بتشجع مازمبي ..؟
بي صورة أوضح من الأول .. فكيت الموردة قبلت على مازمبي ..؟
ما ملاحظ حاجة ..؟
طبعا ما قلت ليك مريخابي .. لانو عارفك بتشجع الأمل عطبرة ..
والله يا بكري أبوبكر .. كان جاتني قروش .. مفكر اشتري منك البورد دا .. حقارة ساكت مني كدا ..
يا بوي أنا شفتك وين قبل كدا؟؟ .. شكلك دا ما غريب علي ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
في هلال مريخ كنت داير الهلال يتغلب (لانو ظهر سجمان وصولو لدور المجموعات كان غير مستحق)
بعد الهلال غلب المريخ و لعب اجمل مبارياته مع كانو في نيجيرياذكرنا هلال 2007 فشجعته
that is all
____________________________________
عموما انا موردابي وان كان ده ما بنقص الخمسه
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: أحمد ابراهيم عثمان)
|
..
يازول والله بختك عديل كدا ..
اهـــا
ح تشجع اهلي مدني متين ؟؟ شايفك ماخد المسالة مقاولة .. وملاوووهـ .. يمسكوك بي هنا تقول الجمعة قريبة .. يجوك يوم الجمعة .. تقول التلاتة دي كتيرة علينـا ..
إنت شيت ليك ف علبة تاني من علب مم ديك واللا شنــو؟
يازول البتاع دا بضربوهو براحـه .. ما يقوم يعمل ليك تسمم ساكت ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
الاخ الكريم تمبس ..
عسمتني يشهد الله ... ولكن انا للامانة و التاريخ، زعلت ... و بكيت عديل و دموعي جرت من فرط التأثر ...واعلن من هنا تضامني اللامحدود و صادق لتعازي و البركة فيكم و بادعي ربي في الاوقات الخمسة يلهمكم الصبر و تطلعو من الحالة النفسية الجاتكم و ما حتمرق بالساهل دي و جابت ليها تضخم في الذات و الصورة المتقعرة التي تنعكس رؤاها في اطياف البعد الخامس ... و سم زعاف عديل كده ؟! الشئ كورة ولا قصص التراث ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: عزاز شامي)
|
الكرة الآن في ملعب الجهاز الفني بكامله إدارة وجهاز كرة ولاعبين .. فوقت المحاسبة (العمياء) لم يحن بعد لهدم ما تم بنيانه من فرقة مقاتلة وتثريب اليأس لعناصر أجادت مراراً تحويل الهزيمة إلى نصر مستحق وإن كان ما ينقصنا هو التعامل مع المباريات التنافسية المهمة بروح باردة بعيداً عن التشنج مع التركيز العالي ووضع اللاعب المناسب في المكان المناسب والتعامل مع الخصوم أقواها وأضعفها بمستوى فني واحد – ومعرفة سد الثغرات والاستفادة من قوة الخصم وتفكيكها إلى عوامل نجاح داخل وخارج الأرض فالروح السائدة الآن بين اللعيبة والتجانس داخل الميدان بوجود عناصر شابه ممتازة ومميزة كفيلة بتحقيق انتصارات عظيمة مقبلة فما زال هناك بريق ضوء في النفق حسب قانون المدورة وإن أدركنا بالفعل صعوبة أن يرد الهلال الصاع صاعين بعد أن فرط فيها وسط أهله وجماهيره ومن داخـل مقبرته التي أجاد فيها دفن الكثير من الخصوم بصورة شرعية ومن هم أكثر قوة وشدة عمن نازلهم بالأمس .. وتمكنوا منه بفعل غلطات إملائية كان يمكن تداركهـا بالقراءة السليمة للفرقة الكنغولية من جانب مدرب محترف ، ثم توزيع اللعيبة وفق الحوجة كما فعل مدرب مازمبي الناجح بعد أن استغل خطأ كامبوس الميداني في ضعف الجبهة الدفاعية للهلال ووظف هجومه بشكل جيد واستفاد مهاجميه من اصغر الغلطات وعالجها بحساب الثانية فالهدف يأتي نتاج كسر من الثانية
.
V
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
ياتامبا . .
أولاً : دي أول مداخلة معاك بعد مالميت في الباسوورد
ثانياً نرجع لي موضوعنا
المصيبة في عندك هلالاب بيكتبوا كتابات نوعية
فييرا قال لي : يامحمد كراعي مربوطة أو هكذا
النوعية هي دي المفترض أول شئ تبعد لينا عن هلالنا
والبطيخاب بعد كده موضوعهم بسيط .
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: السيد أحمد إبراهيم)
|
استفاد هجوم مازنبي من اندفاع اللعيبة وفتح شهيتهم لإسعاد قاعدتهم العريضة وبالمقابل قدر أن يمتص هذا التشنج والاندفاع الزائد ويوظفه لصالحه ليكسب عامل الأرض والجمهور والفرقة الهلالية التي ارتبكت وسلمت كل مفاتيح اللعبة فارتبك خط دفاعه ومن خلفه المعز محجوب وتباعد خط وسطه عن هجومه وتحرك لعيبة مازنبي في كل شبر من الملعب وفرضوا سيطرتهم بالتمريرات المحكمة وسط دهشتهم قبل دهشة الجميع – فكل الأدلة التي حملوها معهم كانت تؤكد عكس ما انتهت عليه المباراة واكبر من سقف توقعاتهم بشهادة مدربهم الذكي وتاريخ الهلال وشهادة من انتظر صافرة النهاية وخرج (منتشياً) غير مصدق إن المارد الأزرق تعثر أخيراً ووجدوا من يعوضهم ما عجزوا عنه بالشكاوى وكتابات مضحكةعن (اناطين وسحر ودجل وكجور) عزوا بها أنفسهم إلى حين ووجدوا فيها مبررات تنسيهم هزيمتهم القاسية التي دفعتهم دونما وعي إلى الرقص وإخراج اللسان كلما شعروا بسخونة ما تحت الحجاب الحاجز تباغتهم من لحظة إلى أخرى ونيران لا قبل لهم على احتمالها فأصبحوا يرقصون في نفس الدائرة المغلقة التي تخصهم ويعوها جيدا في ترتيبهم التنافسي مع الاحتفاظ بنقاطهم اليتيمة في نفس المنافسة.
هزيمة الأمس وإن كانت غير مقبولة إلا أنها أكدت اتساع القاعدة الجماهيرية الهلالية بجمهور عرف التعامل مع ثقافة الهزيمة بوعي تام بعيداً عن ردود الأفعال السالبة وهي قيمة جديدة تضاف إلى سجلات مدرسة الهلال العظيم التربوية – وجمهور ابتهج أيضا حباً لهزيمة الهلال فكلما زادت معدلات ابتهاجهم كلما كبر حجم الهلال في الأرض وصار بدراً في السماء .._
| |
|
|
|
|
|
|
|
|
 Re: الغلبك بي التلاتة الله يجيب ليك يوم غلبو.. (Re: عثمان جلال الدين)
|
| Quote: الحل الجزئي يكمن العودة للاستراتيجيةالتي بدأ بها الفريق البطولة هذا العام.. والحل النهائي بالعودة للمراحل السنية ونظام الأشبال بالأندية لتلقي التدريب اللازم (بأي ضوابط يراها الاتحاد العام لمعالجة مسألة التزوير القدانا بيها شداد دي).. |
..
العزيز عثمان جمال الدين ..
اتفق معاك في كل حرف كتبتو هنا دا .. ابتدا بي استراتيجية أول العام .. مع العودة إلى المراحل السنية وجهاز الأشبال الذي كان يغزي الفرق بشكل جيد ..
توقيف دوري الأشبال كان من أهم النكسات التي مرت على الكورة السودانية التي هي منتكسة من يومـه ..
جهاز الأشبال .. ومدارس البراعم .. من أهم الروافد المهمة في تغذية الأندية .. وقرار ايقافهـا من اسباب تدني المستويات ..
وفوق كل ذلك .. يجب في المقام الأول .. تغيير طاقم الاتحاد السوداني والذي على قمته دكتور كمال شداد الذي ادمن التنظير .. وافتعال المشكلات
في اولمبياد بكين الأخيرة .. وعلى ضوء مستوى منتخبنا لألعاب القوى .. استمعت لي تعليق مهم جدا من الكوتش حسن المصري .. فيما يتعلق بي العاب القوى .. وهو شخص مؤهل اكاديمياً ليفتي في مثل هذه الأمور .. واتفقت معاهو في نقاط بعينه حدده .. وكانت منطقية جدا .. عن توفر الخيارات المناسبة من ناحية الأختيار الأمثل للعيبة في وطن مثل السودان .. مع تعددية قبايله والميزة الجسمانية التي يمتاز بها الكثيرين سواء أن كان في السباحة أو الوثب الطويل والعالي .. إلخ من المناشط المختلفة ..
كرة القدم اصبحت صناعة اكثر مما هي لعبة .. تختلف مع اللعاب القوى بحيث يمكن أن تقوم بتعليم وتدريب وتأهيل لعيبة القوى في فترة وجيزة .. لكن كرة القدم تحتاج في المقام الأول إلى الموهبة الكروية .. والمعرفة بها .. ومن ثم يمكن أن تقوم ببناء جسم اللاعب من مرحلة الصغر .. مع إضافة المهارات المكتسبة بالتدريبات ورفع معدل اللياقة .. مع توفير الميادين الحديثة .. وتوفير من لهم خبرة كافية عن عقلية اللاعب السوداني ونفسياته ..
| Quote: الكرة السودانية تعتمد الآن على رفع الروح المعنوية للاعبين واقل عارض أثناء المباراة يشتت شمل الفريق ودونكم ما حدث للمريخ بكانو والاردن ومن قبلها الصفاقصي وماحدث للهلال بالمغرب والآن. |
كلام موزون يا عثمان وعين الحقيقة .. لكن بالروح السايده في الهلال حاليا والذكرتها في مقدمة البوست .. نجد إن الهلال إدارة ومشجعين ولاعبين تجاوزوا المرحلة .. والدليل على ذلك المران الأولاني للهلال بعد المباراة والكم الهائل من الجمهور .. تبقى فقط مراجعة الخلل والاحتفاظ بنفس الروح العالية للمجتمع الهلالي .. مع البعد كل البعد عن أي تأثيرات سلبية ممن يحاولون زرع روح انهزامية تعودنا عليها من خلال الفترة السابقة وهي معروفة لدى الجميع وما زال البعض يقوم بها على نطاق واسع .. فقط من اجل أن ينالوا من الهلال بالرغم من معرفتهم التامة .. بقدراته الحالية .. وتقدم مستواه الفني بشكل ملحوظ في فترة زمنية وجيزة جدا ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: عزاز شامي)
|
| Quote: و تطلعو من الحالة النفسية الجاتكم و ما حتمرق بالساهل دي و جابت ليها تضخم في الذات |
قلتي لي حالة نفسية يا عزاز ..؟
النبي فيك يكسرك تلاتة تلاتة ... وبعداك حتة حتة ..
حسع الحالة النفسية دي اهم مظاهرة شنو؟
ياخ نحن اخدنا خمستنا دي .. وحمدنا الله عليها .. وطلعنا من استادنا زي الشعرة من العجين .. ولسسسة لحدت تاريخ كتابتي دي .. قاعدين نحمد الله سيدنـا والاتحاد الأفريقي والفيفا قاعدين يكتبونا في الورق بتاعم ..
وابشرك كمان .. وازيدك من الشعر بيت ..
عااادي جدا ممكن ناس مازمبي ديل نطقطقم ليك هناك زي الما حصل حاجة ..
شفتي ليك زول اصبعو انقطع قام مات ... جو شايلنو ودوهو (استاد الهلال) قالو الزول دا يا جماعة استروهو؟
يللا ..
نرجع شوية .. للحالة النفسية .. بي نفس المسالة بتاعت الأصبع الفوقاني دا ,. حسع كان لقيتك يا عزاز في شارع التخصصي (وبريه يعني شديد) لقيتك قاعده ولا مؤاخذه مكومه ليك كوووم بتاع طوووب أحمر يا بلوكات وتشيلي وتطقعي ..
اهــا
حسع اودي وشي وووين أنـا في الحالة دي ..؟
مش بقول والله عزاز فطت (تلاتـة) سطور ..؟
اها ما يستفاد من الأصبع .. والحجار مع بعض .. والزول الدفنوهو في المقبرة قبيل داك .. إنو حسع العندو صمرقع منو ؟؟
نحن الاترشينا خمسة وفرحناكم معانـا قبال ما يفرحو ناس مازمبي .. واللا التلاتة بتاعت حداشر سبتمبر الخلتكم تبكو .. وتطقعوا في شارع التخصصي دي ..
| Quote: وسم زعاف عديل كده ؟! الشئ كورة ولا قصص التراث .. |
ياتو نوع من التراث افرزي .. إنت
من ناحية السم دي .. هي سم ومن الزعاف ممكن يبقى سم هاري احيانـا .. لانو إنت قايله شنـو..؟
التلاتة الرقصتكم وفتحت بوستات الشماتة دي .. ما ظنيته بتتبلع ليكم بالساهل ..
شفتي ليك سم بتبلع ؟
وبالمناسبة .. المرة دي كان زعاف وبي التلاتــة ..
يللا المرة الجاية .. ح يبقى هاااري اوووي .. يعني احتمال كبير تاخدو سبعة الأردن جوه استادكم .. ونربط ليكم اصابعينكم ونمشي ندفنكم في المقبـرة بي اثر رجعي ..
شفتي كيف الزعزفه والهريــان ..؟
نقول ليكم اي حاجة عندنا ليها نظام .. تقولو لينا دا تراث ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
أصبحنا وأصبح الملك لله
المنتدي لسع عايش افراح الــ 5
طيب نواصل ابتهاجنا وكرنفالاتنا
| Quote: اصلو الخمسة سنين دي بقت يا زينة الأيام ولا مره حاولتو تشيلو فيها كأس الدوري الممتاز .. |
تاني جابوا سيرة الخمسة
غايتو انا لو كنت هلالابي كنت لمن اعد ولمن اجي لي اربعة انط طوالي امشي لي 6
طيب عشان ما تزعلوا أها مقبرة فيها كم نقطة
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: حمزاوي)
|
| Quote: طيب نواصل ابتهاجنا وكرنفالاتنا |
إنت ياخ لو بتاع ابتهاجات وكرنفالات .. يوم ايفوسـا داك كنت وين ..؟
مالك ما جيت احتفلته معانــا ..؟
ايفوسا دا موش ولدكم ..؟
Quote: غايتو انا لو كنت هلالابي كنت لمن اعد ولمن اجي لي اربعة انط طوالي امشي لي 6
طيب عشان ما تزعلوا أها مقبرة فيها كم نقطة |
المقبرة فيها سبعة نقاط .. دا قبال المطرة طبعا ..
وضيف ليها الستة بتاعت الخرطوم تلاتــة ..
بالمناسبة آخر خبر سمعتو .. إنو ناس جماعتنا فاتحين كانو لي مازيمبي ..
بلاي ناس الخرطوم تلاتة احسن من الهلال في شنـو..؟
هوووي يا جماعة .. الناس الفرحانه لسه دي .. نحن بعد نص ساعة من الآن ح نعمل لينـا تعداد سكاني في البورد دا .. اي واحد فيكم ح نديهو نمرة في النك نيم بتاعو .. يف ناس ح نكتب ليهم تلاتة سبعة تلاتة ..
التعداد دا معمول مخصوص لي ناس غعمكم همزاوي دا ..
واي زول بيعمل (يع) بعدما يترشه .. تاني ما يظهر ايام الاحتفالات وشم النسيم وكدا ..
الكلام دا واضح يا جماعة .. واللا نجيب ليكم ايفوسـا؟
| |
|
|
|
|
|
|
|
|
 Re: الغلبك بي التلاتة الله يجيب ليك يوم غلبو.. (Re: tmbis)
|
تمبس يا اخوي ... صباح الخير (بس الخط الاحمر دا عاجبني شديد ) ..
انت عارف يا تمبس .. طبعا نحن ساكنين جمب الصحفي داك .. اسمو منو ؟؟ ايوااا مزمل ابو القاسم.. بالرغم من اني مريخابيه وشديد كمان ,
لكن حركه صلاه الجنازه قدام البيت دي كانت سخيفه جدا ..!!
هل تصق يا تمبس انو الاولاد في الحله جابوا ليهم عنقريب, ولفوا ليهم مخده بي علم الهلال وختوها في العنقريب ... وصلوا عليها في الشارع ..!!!
ياخي دا منتهى السخف والابتذال , دا ما تشجيع.... دا شي تاني ..
تصدق يا تمبس الكلام دا الساعه 3 صباحا... اخواني الصغار كانوا نايمين ... صحوا مخلوعين من كواريك الناس البره ..
تصدق انو الناس دي صلت في نص الشارع !!! ... صلاه جنازه عد ييييييييييييل كده !!!
وشالوا العنقريب .. ومشوا دفنوا المخده قدام بيت مزمل ...!!!
دا كلام يا اخوي ؟؟؟؟؟ وحيات الله ما نمنا لحدي اذان الصبح من مسجلات الرقشات ..!!!
يا مثبت العقول ثبتنا بس!!!
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: Faisal Elrasheed)
|
فيصل الرشيد:
معليش حاسب في بوست تاني .. غير البوست دا ، لانو ما بقدر اتناقش معاك في كورة ..
اتفقنـا ..؟
رديت ليك طبعا حسب التزامي معاك السابق إنو ممكن اقوليك جلا .. بس حبيت اذكرك .. اي بوست تاني حبابك مليون .. لكن كورة لا .. لانو المرة الفاتت سقت البوست دا لي مكان ما لذيذ .. وكتبت كلام هنا دا ومشيت نفيتو في ثواني معدودة .. والادهش من كدا قولتني كلام ما قلتو ..
يللا في الحالة دي .. انا بقوم بصنفك تصنيفي لي كم واحد هنا من المشجعين المريخيين الما بعرف اتعامل مع كتاباتم واللي ما بتحرج خالص اني اقول لي الواحد فوقم .. إذا سمحت التزم بي انك تحترم نفسك وتكتب كلام بشكل جيد.. يتساوى مع الطرح لو الكلام ما عجبك ما ملزم انك ترد ولا مكلف .. وطبعا عملتها قبل كدا مع كم واحد وانتهينا على كدا ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: حمزاوي)
|
Quote: اسبوعين وما دخلتوا الضل لى هسع
الليلة يوم الخروج المر |
يعني امر من خروج (ايفوســـا) ..؟ كدي خليهو خروج الخرطوم تلاتــة داك .. اظنو المرارة لسه في حلقك .. في حلاوة ف يالسوق قالو اسمه (سادومبــا ما تجري بي) .. هي جايبنها حلاوة لكن .. في جماعة قالو جربوها للملاريـا والحمى بتاعته .. طلعت كويسة ..
خاصة بعدما الحمى تطلع في الراس .. الحمى المصنفه اخيرا بي حمى ايفوسـا التلاتية ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
Quote: لقد بشعتم بسمعة السودان وليس الهلال وحده وها انتم ودون خجل (عينكم قوية وما بترمش) تاتون افرادا وجماعات للنيل من المريخ
ماذا فعل المريخ وما ذنبه ؟
هل كان الحكم من اختيارنا ؟
هل سيف مساوي لاعبنا؟
هل كابوندي والذي سمي شارع الاربعين باسمه لاعبنا؟
هل كامبوس وضع التشكيله بمعاونة ابراهومة؟
ام هل كانت المباراة في الرد كاسل؟؟
يا عزيزي
لا ترمو بكوراثكم ومصائبكم علي المريخ وجمهوره النبيل
|
لقد احسنت القول
شكرا اخي فيصل الرشيد
واليوم يوم الفضائح بمن خربوا سمعة البلد..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: Abdlaziz Eisa)
|
| Quote: واليوم يوم الفضائح بمن خربوا سمعة البلد.. |
ما خربتوها انتو ناس السبعة بي مطرتـه ..
نخربه نحن بي خمستنا دي ..؟
ما خربتوها إنتو بي اربعة ذو القعدة بي مليص فنايله .. نخربه نحن ؟؟
ما خربتوها انتو بي ثورة الحجارة وبي كروتكم المشهورة .. وبي رئيسكم القعد في دكة الاحتياطي وقرررب يدخل الميدان يشيل الكورة ويطلع بيها نخربه نحن ..
Quote: شكرا اخي فيصل الرشيد
واليوم يوم الفضائح بمن خربوا سمعة البلد.. |
عاين يا إنت :
فيصل دا ما تدخلو لينا في مسالة سمعة البلد .. والوطنية وكلزيوم .. لانو الزول دا كتب الكلام دا للاستهلاك اللحظي .. وكان حسع دي قمت جيت سالتو بيقول ليك ياخ ارخينا إنت كمان .. دا كلام خارم بارم ساكت انا كتبتو عشان احشش بيهو وبس ..
بالمناسبة:
إنتو يا الما بتخربو سمعة البلد .. اووعة تجي تقنعني إنكم لاعبين فاينال .. بي نقطتينكم ديل ..
خاتنكم في راس مجموعة .. وجاييين طالعين بي نقطتين .. ياخ شرطو عين الفيفا .. وشرطو عين الكاف .. والواو واللام زاتو ..
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: tmbis)
|
Quote: إنتو يا الما بتخربو سمعة البلد .. اووعة تجي تقنعني إنكم لاعبين فاينال .. بي نقطتينكم ديل ..
خاتنكم في راس مجموعة .. وجاييين طالعين بي نقطتين .. ياخ شرطو عين الفيفا .. وشرطو عين الكاف .. والواو واللام زاتو .. |
الأخ تمبس
سلامات
ياخي ووالله انا ما قصدت أزعلك للدرجة دي...
لكن انتو السويتوه ما ساهل..
فتحتوا ليكم عدد لا يحصى من بوستات الشماتة.. وشوف بالله كيف نحن صبرنا وتحملنا الأذى حتى يوم الخمسة..
تعرف يا أخي على طولة لسانكم دي, ربنا وراكم وجاب يوم شكركم.. ليلة الخمسة التي لم نرى فيها هليلا..
صراحة كدا.. تتمنوا يرأسكم جمال الوالي عشان يجيب ليكم محترفين بجد أحسن من المواسير والكباري الخماسية دي..
وبعدين يا حبيب.. نحن ما اخدنا خمسة في القلعة الحمراء..
وأرجوك تنتظرني في بوستك بعداربعة ساعات من الآن..
تحياتي ومودتي
| |
|
|
|
|
|
|
|
|
|
Re: الغلبك بي التلاتة الله يجيب ليك يوم غلبو.. (Re: Abdlaziz Eisa)
|
Quote: الأخ تمبس
سلامات
ياخي ووالله انا ما قصدت أزعلك للدرجة دي... |
لالا يا عبد العزيز .. زعل مايخطر على بالك .. لما الكلام بيقبل الرد عليهو .. بنرد بي نفس درجتو .. لما يكون ما فوقو حاجة بتترد يا زولو الكاتبو كاتبو بي فهم انو يكتبو بس سااكت كدا .. بيترد ليهو الرد الساااكت كدا ..
اها
لما الواحد يجي داخل بوست علشان يطول لسانو .. ويوقل كلام خارم بارم .. النوعية دي ممكن يترد عليها ويمكن تقول ليهو باص .. ودي في حد ذاته بتطرحه في شكل خيارات للواحد
إنت يا عبد العزيز ما من اي فئة اعلاه وإن كانت انطبقت عليك بعض الشروط ..
إنت من فئة الهلال دا كان غلب مانشيستر يونايتد (سكس لف) .. يفضل في نظرك ياهو الهلال القاعد يغلب المريخ وشايل منو الدوري الممتاز خمسة سنين .. وكلما تلقى ليك فريق ممكن يشكل عقبة للهلال مستعد تدفع دم قلبك شان يوقف الهلال
ودا في حد زاتو شعور كويس جدا .. ومتعودين عليهو ومما يسرنا انكم تريحو نفسكم .. طالما انو في غلب الهلال دا راحتكم .. لكن إلا كمان اعملوا حساب انكم تلاقوا الهلال .. لانو ح يبشع بيكم في اي ملف .. زي آخر فيرشن في حداشر سبتمبر ..
| Quote: فتحتوا ليكم عدد لا يحصى من بوستات الشماتة.. وشوف بالله كيف نحن صبرنا وتحملنا الأذى حتى يوم الخمسة..تعرف يا أخي على طولة لسانكم دي, ربنا وراكم وجاب يوم شكركم.. ليلة الخمسة التي لم نرى فيها هليلا.. |
لالالا .. كدا أنا أزعل .. وكان زعلته بقول ليك امشي الأرشيف وفتش .. وكان مشيت الارشيف وفتشته بتلقى البزعلك كزول متصالح مع نفسك وبتلقى البيبسطك ويخليك تتمنى غلب الهلال .. كزول مكابر ومريخي متعصب ..
قول لي كيف ..؟
قلت لي كيف ..!!
ممكن اديك كتابات بي عينه بي تواريخــه قبل تاريخ التسجيل: 03-02-2007 الظاهر على بروفايلك .. يعني زي ما تقول كدا المسالة دي قديمة .. واقدم من الكسرة .. والغريب في الأمر انها بتتكرر كل سنة يلعب فيها الهلال في الدوري دا .. اللي يادوبك شرفتونا فوقو السنة دي وشرطتو فوقو عينا بي نقطتينكم الطيرتكم برااااكم كدا دا .. بالمذهب الايفوسي .. يعني بي صراحة يا عبد العزيز ما تتكلمو عن حاجة تبقى ليكم صعبه شوية بعدين .. إنتو مدو رجلينكم على قدر نقطتينكم .. وافرحو ما شاء ليكم الفرح .. اعرضوا دقوا نقاره .. ارقصوا كمبلا .. ماف مشكلة .. بس مسالة الوطنية دي خلوها بالجمبه كدا دا .. لانو فيصل الرشيد الاستشهدت بيهو في كلامك عن البلد والوطنية .. كتب الكلام الفوق دا في لحظة .. ومشى بي يدو اليمين في بوست مجاور كتب كلام تاني بيخليك لما تقرا الكلامين ديل تحس بي انو راسك بيعمل زننننن ..
بالمناسبة:
من مصلحتكم إنو الهلال يتغلب الليلة .. شان تكونو على الاقل عايشين في موسم التخدير دا لانو السقط خاشي في العضم .. لكن لو الهلال غلب .. موضوعكم ببوظ ..
اللذيذة قريت لي واحد كدا ايام بتلقطو في نقاطكم زي دم الحجامة .. إنو مفروض المريخ يتغلب من زيسكو بي عدد وافر من الأهداف .. ويجي يغلب الهلال .. شان نطير مع بعض .. شفت الحسابات دي معقدة كيف ..؟
تقلبونا وتطيرونـا .. لكن الكورة زي ما قلنا ليكم مجنونة ومدورة دوير شديد .. لا لميتو في عنب الشام ولا بركاوي الباوقة .. اترشيتو جوه وبره وطلعتو من المولد بدون حمص .. وطايرين لحدت الآن ..
| Quote: صراحة كدا.. تتمنوا يرأسكم جمال الوالي عشان يجيب ليكم محترفين بجد أحسن من المواسير والكباري الخماسية دي.. |
لا يا ابوي جمال لاوالي دا بخيت وسعيد عليكم .. اهو بيجيب ليكم في ناس كلاتشي ولدكم .. ومصرف مركزي متحرك (وارغووو) مثالا .. أنا ما عايز اقوليك ماسورة .. علشان اعيد تفريخ المفردة دي .. لانو بتخدرني .. لكن بديك حرية إنك تختار المفردة البتناسبك .. لكن معليش اول مرة اشوف لي (سادومبـا) مسجلنو بيجري بالجناح .. ويجري يصل الخط .. ويجي جاري تانني لحدت النص .. وتاااني يجري الجناح .. والحلة كلها جارية وراهو .. بعداك يعكس يلم فيها واحد يشوته بي كرعينو الاتنين ويجيبه قوون .. الما قدر يجري عمل فيها رايح .. واخد ليهو كرت احمر .. ساااكت كدا دا .. والما اخد كرت احمر .. عمل فيها عياااان والما عمل عيااان .. داخل في غيبوبة لحدت الآن من مشاوير زملانـو .. الاتمشوروها .. اها دا نموذج واحد من العينة القلت عنها
هو جمال الوالي لو بيعرف يسجل .. كان جا قعد في دكة الاحتياطي ..؟؟ والله لو اديتوهو صنة .. كان سجل نفسو براهو شان يدخل يشيل الكورة بعد قوون ايفوسا ويخارج نفسو ..
Quote: وبعدين يا حبيب.. نحن ما اخدنا خمسة في القلعة الحمراء..
وأرجوك تنتظرني في بوستك بعداربعة ساعات من الآن.. |
.. ما مشكلة اخدتو تلاتة في المقبرة .. مع الرافة الفرق شنو يعني ..؟ واخدتو سبعة في عز المطــر وواحد في السبعة دي جايبنو من طعم طفلك الاردنية .. يعني الدنيا طااارت ما كل شئ بي نظام قلنا ليكم .. والعافية درجات ..
بعد اربعة ساعات .. لييه .. إنت ما محتفل من اليوم داك .. افتح بوستاتك من حسع دي .. مش الهلال دا مرشوش .. ومجهزين الالعاب النارية .. اربعة ساعات البعيدة دي .. إنت واصل كفاحك وحضر عدتك .. ونحن قاعدين وحسسع دي الليلة عندنا كورة في المربع الذهبي .. إنتو وين موقعكم ..؟
مشيتو عطبرة واللا لســة ..؟
| |
|
|
|
|
|
|
| |
tmbis
على محمد على بشير
وليد محمد المبارك
Faisal Elrasheed
معتصم دفع الله
حيدر حسن ميرغني
ارصد محمد جلال
abdalla osman
أحمد ابراهيم عثمان
السيد أحمد إبراهيم
علي الكرار هاشم
داليا الكباشى
شمس الدين ساتى
Abdlaziz Eisa
فيس بوك
تويتر
انستقرام
يوتيوب
بنتيريست