|
|
 اليوم بلغت سن اهل الجنة واه رمادى الشديد
|
اليوم اكملت سن اهل الجنة واحتفلت فى الصباح الباكر على غير العاده عند الناس الذين يحتفلون فى المساء احتفلت لوحدى على رمادى الشديد وقد مضى قطار العمر دون ان اضيف شى ملموس فقد تشابهت المحطات فى السنوات الاخيرة وباتت محطات اجباريه لاتستطيع ان تتخطاها الى عوالم اخرى بحثا عن مستقبل اكثر اشراقا ،، المهم اننى احضرت الشموع بعدد مرات الفشل واشعلت الشمعه الاوله وعندما نفخت عليها كى تنطفى واصفق لوحدى اذدادت اشتعال واستغربت وحاولت مرة اخرى لكنها اشتعلت اكثر علمت بعدها اننى انفخ عليها مزيحا من تلك النيران التى يمتلى بها صدرى فتشتعل اكثر فابتسمت من تلك الحالة البائسه واطلقت لها العنان كى تشتعل اكثر واكثر حتى ذابت تماما فحملت تلك البقايا اللزجه وصنعت منها مايشبه الكورة الصغيرة وقزفت بها من النافذة وانا اتابعها بنظراتى وكانت امنيتى ان تصطدم ليها فى حيطه ولا مصيبة زمان قبل ان تصل الى الارض من شدة زعلى منها ولكننى لم اظفر بهذه الامانى فقد تلاشت تماما كما احلامى فعلمت انها شمعة احلامى....................
نظرت فى اتجاه الشموع الاخرى ووجدت ان الوقت لن يسعفنى لاشعالها فقد كانت كتيره شديد ومابقدر عليها وعندما قارنتها بسنين عمرى وجدت انها اكثر بكثير فاستدركت اننى قد احضرتها بناء على مرات الفشل وعلمت انو انا كترتها شديد وماكان فى داعى لموضوع الفشل ده ...المهم اديتا ليك تكيه وانا اتجاهل باقى الشموع بعد ان شربت الشاى كعادتى فى كل صباح وان كان مزاقه محتلف فى هذا اليوم ورغم اننى وضعت كمية من السكر الا انه كان مسيخ كمساخة الايام وماليهو طعم فوضعته جانبا قبل ان انتهى من شرابه ومع ذلك التوتر الذى يتملكنى انكشح باقى الشاى بعد ان سقطت الكبايه على الارض فلم ادخر وسعا فى ان اخبط التربيزه التى بجانبى والقيها هى الاخرى بجانب كباية الشاى وبعد داك فنية وراهم الصينية واتكيت وانا افكر فى مقتبل الايام ماذا هناك؟ ومن اين ستكون البداية ان وجدت؟ ثم سألت نفسى هل سن اهل الجنه يمكن ان تكون هى منتصف العمر؟؟ لكننى لم اتوصل الى اجابة شافيه ولو صحت النظريه الفى راسى هذا يعنى انو انا باقى لى لسه من سبعه الى عشرة سنوات كى اصل الى منتصف العمر احسست بمزيحا من الامل واشتعلت فى دواخلى نشوة ونظرت فى اتجاه الشموع وحملت واحده ورفعتها الى اعلى وانا امنى قلبى ان تكون هى شمعة الامل التى من شأنها ان تساعدنى فى مقتبل الايام ثم مالبثت ان تجهمت من جديد ووضعت الشمعه فى اهمال بعد ان ذهبت عن نفسى تلك الومضه الخاطفه من الامل وحلت مكانها الاحباط ....رن جرس الموبايل بجوارى انتشيت قليلا، من يكون؟ نظرت الى الرقم فلم اتبين صاحبه جاءنى صوت رقيق وناعم من الطرف الاخر ابتسمت وقلبى خفق فى فرح وقلت فى نفسى يادوب فى زول حايبارك لى عيد ميلادى وكمان وما اى زول انها انثى رقيقه يبدو ذلك واضح من خلال صوتها الشجى الناعم ممكن ياربى يكون حب قديم او معرفه قديمه كل هذه الاستفسارات راودتنى فى لحظه دون ان اعرف الحقيقه بعدها انساب صوتها كما الانسام وهى تقول (السلام عليكم) ولم ادخر وسعا فى ان ارد التحية باحسن منها وكمان كترتها عديل كده وماخليت عبارة جميله من عبارات الترحيب الا وقلتها ليها واهديته سلامات بحجم كل ورود الدنيا والفضول يكاد يقتلنى لمعرفتها بعدها قالت لى (انت استاذ مدثر؟) ومع ان كلمة استاذ اصابتنى بشى من القلق الا اننى جاوبتها بسرعه ايوه انا مدثر وقربت اقول ليها عيد ميلادى الليله وانتى طيبه وعقبال ما احتفل معاك بعيد ميلادك وكم كانت صدمتى شديده حين ردت انها من شركة اى ار تى وتريد منى تجديد الاشتراك مع وجود تسهيلات كبيرة فى فترة السته شهور مع العلم اننى حريص جدا على متابعة كرة القدم من خلال هذه القناة احسست حينها اننى اكره كل دوريات كرة القدم فى العالم وكرهت ليك الهلال والمريخ والدورى الزفت ده ...وقلت ليها خير وماكان خير..........جلست بعدها مايقارب الساعه دون ان يحدث جديد غادرت مكانى وتجولت داخل المنزل على امل ان يتذكر احد عيد ميلادى وعملت فيها مشغول بترتيب ملابسى عشان ادخل وامرق جنبهم كتير لعل ان يتذكروا هذا اليوم دون جدوى،، جلست معهم وانا اشتكى من وجع المفاصل لعل هذا يقودنى الى موضوع العمر والحاجات دى لكنهم اكتفوا بان قالوا لى بتكون رطوبة الجو ابلع ليك بندول ،،،حاولت ان اجد مدخل جديد قلت ليهم شهر عشره ده مسخن السنه دى الحاصل شنو؟ لكنهم اكتفوا بانها الفواصل وهى الفترة التى ينجض فيها العيش ولم يفطنوا الى النجاض الانا فيهو سكت لبرهة وانا اتنهد قلت بينى وبين نفسى ان مداخلى يمكن تكون بعيده من الموضوع وجاتنى ليك فكرة عويره كده قلت اجرب انا ماخسران شى قلت ليهم واحد وعشرين اكتوبر قربت اندهشو من كلماتى واكتوبر لاتعنيهم فى شى لكن جاملونى وقال لى مافى زول بيحتفل بيها حاولت ان استرسل فى اكتوبر والتضحيات ولكن تجاوبهم معى لم يكن مشجع فانسحبت وطلعت الشارع وانا على يقين اننى لن اجد من يذكر هذا التاريخ الذى شرفت فيه الى الحياة ...عدت ادراجى الى الغرفه ولملمت كل الشموع وبقايا الاحتفال الجنائزى ورتبت المكان واخذت اتنفس بعمق شديد كأننى انفض عن نفسى تلك الهواجس ايقنت الان ان الاحتفال لايكون بعدد السنوات ولكن بالانجازات عندها يمكن للجميع ان يحتفل معك لكننى ورغم كل ذلك باركت لنفسى هذه السنه الجديده من حياتى وقلت لنفسى كل سنه وانا طيب ...اها يا اخوانا جبتها ليكم بالواضح الليله عيد ميلادى حاتغنوا معاى غنوة العيد والفرح ولا حاتجلونى تكونوا بالغتوا عديل............................
|
|
 
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: مدثر قرجاج)
|
==========================================================
يا اخوانا جبتها ليكم بالواضح الليله عيد ميلادى حاتغنوا معاى غنوة العيد والفرح ولا حاتجلونى تكونوا بالغتوا عديل............................
+++++++++++++++++++++++++++++++++++++++++++++++++++++++++++
كيف يافيلسوف زمانك يارايع
لماذا الكسل
______________________________
ولدنا علاء الدين لسه رايح ولا دخل الشبكه
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: omer abdelsalam)
|
Quote: كيف يافيلسوف زمانك يارايع
لماذا الكسل
______________________________
ولدنا علاء الدين لسه رايح ولا دخل الشبكه |
كيف ياوليد انشاالله طيب
والله ماكسل ياولى لكن بس زهج ودبرسه فى كثير من الاحيان
قولنا نفكها فى منبرنا ده ........
والله علاء الدين ده مابعرفو مرات كده يضحك ومرات يسكت
ومرات يتكلم يعنى حالتو ماوضحت لحدى هسه لكن غايتو رابط
الحزام وقاطع نص اليوم كلو وبعد مرات بلبس 7 تشرتات فى اليوم
انواع والوان مختلفه التقول داير يصور فيديو كليب
ربنا يتولاه ويتولانا...
محبتنا
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: khaleel)
|
Quote: اخي / مدثر
نقول ليك الجاتك في سنك سامحتك
كل سنة وانت طيب
بالنسبة لى
لقد اتخذت قرار ا فرديا ... يبدأ مع
الدخول في العقد الخامس
تثبيت السن وماياتي بعدها لايحسب ,,, يعنى هروب الى الخلف |
عمر
كيفنك عساك طيب
سامحتنى ساكت والله كويس جات على كده
ياعمر يااخوى فى ناس قايلنى حصلت اربعين اوخمسين
لا لا بدرى شديد لكن الفشل خلاهم كتار كلهم تلاته وتلتين
والله انت عرفتها واتحرفنت شديد الهروب للخلف ده مافى
زيو بديك دافع اكثر للعطاء
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: مدثر قرجاج)
|
Quote: عمر أهل الجنة يوم أو بعض يوم
أنت عمرك كم...
أسعد الله أيامك
عش وأنسى الرماد
أجمل الأمنيات
وبهذه المناسبة أهدي لك هذه الكلمات
"""
أصل الزول بعيش مرة
ويموت مرات
وأصل الباقي ببقى رفات
أنا عمري قصير
أنت عمرك كم
عشان نقضيه في الآهات
قول للباقي من ماضينا
لا نلاقيه لا يلقينا
لا نتلاقى لا نتلم |
المسافر
انشاالله طيب وعساك بخير
والله انا عمرى 33 سنه لكن عشت كتير خلاص
شكرا على الابيات الجميله المشتعله والله قريتا
اكتر من مره جميله جدا
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: مجدي عبدالرحيم فضل)
|
Quote: مدثر - يافرده
كل سنه وانت طيب ........
ضاقت ولما استحكمت حلقاتها فرجت وكنت اظنها لاتفرج
انشالله القادمات زي الفل ............ قول يارب
وما تنسانا من صالح الدعاء .. |
عبد الله كع انشاالله طيب ياخ
انشالله الفرج قريب والقادم
احلى يارب....
ياعبد الله الهلال ذاد علينا الجراحات
والعمل شنو اصلو ماعندنا فرح بتم للنهاية
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: مدثر قرجاج)
|
Quote: مدثر قرجاج .. كيفنك ..
ابدعته يا فرده ..
الخلاك تولع شمعه شنو ؟؟
خليك مع الجايات والسنين الفاتنك فوتها ..
والجاي احلى .. وكل سنة وانت مبسوط ..
وللسنين الجاية ابتسم مقدماً...
بت الصادق |
عفاف
عساك طيبه
والله ياعفاف تقولى شنو شلاقه منى ساكت عامل فيها
داير احتفل التقول خلاص يعنى عملت اى شى ومافضل
غير عيد الميلاد ...وانت طيبه ومبسوطه وانشاالله القادم
احلى وشكرا على كلماتك وانشالله دايما مشرقه فى البورد
كعهدنا بك
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: مدثر قرجاج)
|
..
كدي يا مدثر .. بالله عاوزك تسمي لينا الاعمار .. كلها من اول يوم تتولد فيهو .. لحدي الكهولة .. أقصد الخرف .. مش المبكر ..
عشان نشوف انحنا وصلنا لي ياتو عمر .. لانو بطلنا من زمان حكاية نحتفل دي ..
انا غايتو يبدو لي الاحتفال بعيد الميلاد بيكون لحدي عمر كمطاشر كدة والناس بتقيف من عمل الاعياد ..
انت الوداك تعمل نفسك صغير شنو ؟؟
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: عبدالحليم حامد النعيم)
|
Quote: أبن مربعي الجميل إن شاء الله سنينك القادمة أحلي ياصاحبي
نحنا فايتنك بسنيين الأ غتراب و هو في الأمريين أحتراق نسأل الله
أن يكون رمادنا بردا وسلاما علي أرض الميعاد صديقي أسلوب ينم علي مقدرة عالية من التصوير البلاغي دمت
،،،،أبوقصي،،،، |
ابوقصى ودالجيران
انشاالله القادم احلى يارب وكلماتك تطبطب على قلبى
وتجبر الخواطر جميله وكأننى احتاج اليها اكثر من
تلك الاحتفاليه الفاشله ....
ياربى مايكون عندكم رماد واذا كان لابد من ذلك الاحتراق
فليكن رمادكم اكسيد يمنحكم مزيد من القوة واليقين
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: Muna Khugali)
|
Quote: كدي يا مدثر .. بالله عاوزك تسمي لينا الاعمار .. كلها من اول يوم تتولد فيهو .. لحدي الكهولة .. أقصد الخرف .. مش المبكر ..
عشان نشوف انحنا وصلنا لي ياتو عمر .. لانو بطلنا من زمان حكاية نحتفل دي ..
انا غايتو يبدو لي الاحتفال بعيد الميلاد بيكون لحدي عمر كمطاشر كدة والناس بتقيف من عمل الاعياد ..
انت الوداك تعمل نفسك صغير شنو ؟؟ |
عبد الحليم
انشاالله طيب
والله شكلك اتخطيت سن اهل الجنه من كلامك
طبعا من 33 لى 35 سن اهل الجنه يعنى البخشوا
الجنه بكونوا كلهم فى العمر ده (يارب نكون منهم)
من 40 لى 45 سن النضج زى مابقولوا
وبعد ده بتظهر ازمة منتصف العمر اوع تكون
خاشى فى الزووم ده ..
من 45 لى 60 اسمها اكمال الرساله يعنى بتكون
عندك شى معين داير تكملو وخلاص
ومن سن 70 لى 80 ودعناك الله اسمها والاعمار بيدى الله
اها ياعبد الحليم وين انت بالضبط من تقسيماتى العجيبه دى
غايتو لو فى اى عمر من الفوق ديل انسى موضوع الاحتفال
محبتى ليك وكل سنينك هنا انشاالله
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: عبدالله كع)
|
Quote: زول ماشاء الله تكون عملت كتير في عمرك الفات..
وبأذن الله تعمل أكثر في الجايات..
كل سنة وانت طيب ويارب الخرطوم تبطل بياختها وقطع كهربتها وتقابلك كويس.. |
منى
دعواتك معانا فى الايام الجايه ربنا يصلح الحال
غايتو يامنى الامنيه التانيه بتاعت الكهربا دى
ماظنيت تحقق قالو الرد الرد السد شى يضحك ويبكى
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: وليد عبد اللطيف)
|
Quote: رغم الالم و الحزن يا مدثر كل سنة و أنت طيب و بالله حاول توقف عد بعد دا
مودتي و عقبال تطفي شموع لمين حلقك يوجعك |
حافظ
وانت طيب
والله حاولت اوقف لكن العد بفرض نفسو تقول شنو بس
المره دى عملنا اعلام عشان فى الشموع الجايه الناس
تشاركنا ويكون نفسنا واحد وننفخ مع بعض عسى ولعل
نقدر نطفيها ومايكون الناس المعاى مشعللين عشان
مايشعللوها زيادة
محبتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: مدثر قرجاج)
|
ايوه ياوليد فسح شديد لكن انا المفسحو
وقبلى يومين كان عندنا لقاء فى احد المنتزهات
العائليه لقاء عجيب سكبنا فيه ماسكبنا من اهات
مختزنه انا كنت موضوعى جدا فى اهاتى لكن اهات صاحبنا
كانت غير موضوعيه تركزت حول الحرمان والمعاناه وبدأ يتشنج
ويعلى فى صوتو ويقترب اكثر واكثر وعندما شعرت به وقد وصل
تلك اللحظه المفصليه عملت ليه مس كول فنظر فى اتجاهى من على
البعد فابتسمت له وانا اشير له بان يقلل الجرعه شويه ويبتعد
قليلا حتى لانقضى ماتبقى من هذه الامسيه فى سين وجيم فاستجاب
عل مضض لكن ذلك الجحوظ الواضح فى عينيه جعلنى غير مرتاح فى
ماتبقى من وقت فاثرت ان استعجل الرحيل والذهاب الى المنزل رغم
حلاوة اللقاء وحرارته وتلك العيون الجميله التى منحتنى مزيحا
من السعاده،، وفى طريق عودتنا بدا غاضبا على ذلك الاستعجال وهو يوبخنى
على مافعلت وانا انظر اليه واستحضر مداخلتك القديمه عن جلوسه لساعات
طويله مع السيخ والاسمنت ولم اكن ادرك ساعتها فداحة المشكلة وعلمت الان
انه كان يعانى حرمان مسلح يحتاج لى سنوات من العمل المتواصل كى يسقط
وينهار .... تبقى اسبوع نرجو ان يمر فى سلام وان لايحدث مايؤخر عودته الى
عمله وربنا يستر
مودتى
| |
|
|
|
|
|
|
|
|
|
Re: اليوم بلغت سن اهل الجنة واه رمادى الشديد (Re: Kamal Karrar)
|
Quote: قريبي طل سنة وأنت طيب...
أنت الوداك للشمع شنو؟؟؟
ها يا زول أهلنا ناس بطان ونحاس...
اصلو ما بعرفوا شموع ودموع...
عشان كده كل ما تنفخ الشمعة
تطلع الحرة (بفتح الحاء) لي بره... |
ود كرار وانت طيب
تقول شنو بس اخوك بعد مرات شليق ماعارف الودانى للشمع شنو؟
قلت انخرط مع بطان الخرطوم ده واعمل لى حركة حركتين لزوم
التماشى مع التيار و كده كلامك صاح لقيت ليك الحكاية بايظه وانا من جوه
مولع وداير مش نفخ داير ناس الدفاع المدنى عديل عشان يطفو نيرانى
لكن اوعدك السنه الجايه سكينى فى ضراعى وسوطى فى يدى نحاسنا بره
والاير يحتفل معاى اول شى يجيب الدم بعدين نحتفل
مودتى
| |
|
|
|
|
|
|
| |
مدثر قرجاج
وليد عبد اللطيف
omer abdelsalam
abdalla osman
khaleel
المسافر
عبدالله كع
عفاف الصادق بابكر
مجدي عبدالرحيم فضل
طارق جبريل
Muna Khugali
حافظ حسن ابراهيم
Kamal Karrar
فيس بوك
تويتر
انستقرام
يوتيوب
بنتيريست