|
|
 بمناسبة رأس السنة الشاعر أ.فؤاد نجم يهدى حسنى مبارك قصيدة ساخرة
|
بمناسبة قدوم رأس السنة الميلادية
كل سنة وانتو طيبين
السيد الرئيس
في عيد ميلادك الكام وثمانين
كل سنة وانت طيب
واحنا مش طيبين
واحنا منيلين بستين ألف ألف نيلة
كل سنة وانت حاكم
واحنا محكومين
واحنا مظلومين
واحنا متهانين
واحنا منفيين
واحنا منكوبين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين وألالاف المختفين
فاكر الجعانين
فاكر المشردين
فاكر اللي ماتو مصبّرين
فاكر الصيادين
الله يكون في عونك - ها تفتكر مين وللا مين
في عيد ميلادك الكام وثمانين
بقول لك كلمتين
الأوله
ليلتنا طين
وهل تعلم أن بلدنا بقي مُباح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم باعة مشردين
والإقتصاد سداح
والسرقة بقت كفاح
ومصر متاحة بس للسياح
وعرض البلد بقي مستباح
والثانية
ورتنا الويل
دا الوعد في عهدك بقى خريط
والضحك بقي نواح وعويل
والكوسة
عارف الكوسة
ممكن أقول لك فيها مواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز علي المتعلمين
والأساتذة بقم دجالين نصابين
والقادة بقم طبالين ورقاصين
واديني في الهايف يا مخلوف الملايين
والثالثة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسه مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
|
|
 
|
|
|
|
عبد السميع دفع الله
فيس بوك
تويتر
انستقرام
يوتيوب
بنتيريست