قامت صحيفة الوفاق عدد الجمعة 2 فبراير باجراء حوار لطيف وعميق مع الأخ عبدالمنعم سليمان عضو البورد ، وصراحة كدا الحوار جميل ورائع سواء في السئلة أو الأجوبة .. وحتى أشارككم الفائدة ، أنقل لكم بعضه هنا لأن الصحيفة لا تمتلك موقعا على الانترنت .. والحوار كتييييييييير ..
وهذا جزء منه :
* أنا سعيد انك استجبت أخيرا وتواضعت لنحاورك ودعنا نبدأ من... * (مقاطعا) دعني ابدأ أنا يا خليفة .. ليه بتحاورني أنا ؟ * شوف أنا علاقتي بالحوار دا قبل فترة منذ التقينا بسبب تهيئيتك لحوارنا مع دكتورة آمنة ضرار .. ورغم إني كنت مرتاب منك لاحساسي بانك سياسي غامض .. أو زرول مريب .. بعد ما جمعتنا بالدكتورة آمنة اقتربت منك وعرفت انك عندك مت تقوله .. ثم أكمل لي الصورة أصدقاءك علاء الدين بشير وآخرين .. عموما الحوار ده يوضح لي صورتك أكثر ..
* كويس .. * طيب الدور علينا بقى.. وخلينا نعيد ليك السؤال .. ليه شايف انك بتستحق يحاوروك ؟ * أنا بفتكر أجمل الأدباء هم الما موجودين في الساحة الآن في السودان وأجمل الشعراء هم الذين لم يتغنى بكلماتهم بعد .. وكذلك العيبة افضلهم الذين لم يلعبوا للهلال والمريخ وأجمل الناس هم الذين لم تحاورهم الصحف بعد وأنا شايف نفسي في هذا الباب (يضحك) * ... * الصحف بتمشي للناس المعروفين هم الذين لم يتم محاورتهم بعد . * إنت حقيقي ؟ * أنا داير أكون عادل أقول ليك أنا بقول كلماتي دون ضغوط ما خايف على شئ جينا الدنيا حفاة عراة و حنطلع منها بنفس الشكل .. * إنت من وين ؟ * أنا من قبيلة الحباب وهي أول من قام بتأييد المهدي والثورة المهدية وهي آخر معاقل المهدية ولابد أنكم تذكرون الشيخ كنتباي لذلك محبتي شديدة للصادق والأنصار ..
* إنـت أنصـاري ؟؟ "الاجابة في الحلقة القادمة " >>>>
02-04-2007, 05:24 PM
عاصم ابوبكر حامد عاصم ابوبكر حامد
تاريخ التسجيل: 03-03-2006
مجموع المشاركات: 3017
* إنت أنصاري ؟ * لا ما أنصار ولا حزب أمة .. الآن ابوقرجة كنتباي رئيس حزب الأمة ولاية الخرطوم وهذا وفاء الأنصار لحامد بك منتباي والوحيدين البسموا كنتباي ، أما نحن من قبيلة الحباب أو ألأنصار .. * ليه ما بقيت حزب أمة ؟ * (سكت طويلا) والله يا خليفة أنا ليه ما بقيت حزب أمة ؟ أنا بفتكر إنو الصادق المهدي أصدق الناس في السودان وهو يفوق السياسة أخلاقا وتهذيبا وعشان كده حزب الأمة في الفترة الأخيرة دي واللي فيه المعايير الأخلاقية مختلة فهذا الحزب ضعيف . * بقدر أقول عليم سياسي ؟ * بتقدر تقول علي ناشط لأني أخطئ وأصيب والسياسة بشكلها الحالي ما بدر أمارسها لأنها بترجعك للجهوية والقبيلة أنا مؤمن بالسودان الواحد . * يعني وطنك بتقبل فيه اي زول إلا البشخر؟؟ * (يضحك ) ايوة إلا البشخر والانتهازي .. * طلعت سنة كم من السودان ؟ * سنة 1989 بعد انقلاب الانقاذ .. * بسبب الانقلاب ؟؟ * لا لا .. أنا الوقت داك كنت صغير وما كانت بتهمني السياسة وما كنت شغال بالموضوع ده كتير وبحكم سني كنت مشغول بالهم الدراسي . * أكيد قابلت مصطفى سـيد أحمـد ؟؟ "الاجابة بعـد الفاصـل " >>>
02-04-2007, 09:48 PM
حسين يوسف احمد حسين يوسف احمد
تاريخ التسجيل: 08-17-2005
مجموع المشاركات: 4490
* أكيد قابلت مصطفـى سـيد احمـد ؟؟ * الله يرحمه .. يا أخي أنا قابلته بواسطة أصدقاء هم بدرالدين الأمسر وعصام علي ديل هم الجابوه قطر وكانوا ساكنين مع بعض والأربعة بقى ميزنا واحد غدا وعشاء ، وبالمناسبة مصطفى بحل الكسرة بالطماطم .. قعدنا مع بعض حوالي سنة ونصف صباح ومساء بنتفارق لنوم بس .. • لغاية ما اتوفى كنتو مع بعض ؟؟ • أبرز ما تتذكرو فيه ؟ • حبه للسودان وللسودانيين .. ديك فترة أنا بسميها جنون الانقاذ ، والجالية كانت منقسمة لي مع وضد .. • ما سمعناك أصلا تتكلم اتكلمت عن تلك الفترة ؟ • سيرة مصطفى من ما اتوفى أنا ما قاعد أجيبها ولا أسمع صوتو ولا أشوف صورتو لأنها مرتبطة عندي بانسان عظيم وهو الآن غير موجود ..
بعـد الفاصـل :
02-04-2007, 10:21 PM
بهاء بكري بهاء بكري
تاريخ التسجيل: 08-26-2003
مجموع المشاركات: 3518
• قادر تقرأ الشخصية السودانية الآن وسط التجمعات المتواجد فيها أنت ؟؟ • قادر أقراها لدرجة إني عندي راي في الفكي .. • ايجابي أم سلبي ؟ • الشخصية السودانية قائمة بتربية صوفية ودي تربية ما بتواكب العصر الحالي والعولمة ودائما فيها نكران ذات أكبر من اللازم ، فمثلا الطيب صالح وسط رصفاءه العرب مغمور وأنا قابلته في قطر وهو زول متواضع أكثر من اللازم .. • هل ده عيبنا الوحيد ؟ • بس ده أبرز عيبنا وإن شاء الله ما أكون حاد لو قلت الشخصية السودانية أنا شايف انها المقصودة في ( أحسن تقويم ) • الانترنت الآن خلق مجتمع جديد وأنت واحد من الناشطين في العالم ده أحكي لينا عنه وعن تجربتك فيه ؟؟ • سودانيز أو ن لايين اشتركنا فيه بوعي مقصود أنها تكون أحد أدوات تشكيل الراي العام السوداني ثقافيا وسياسيا وفكريا لأن الاشتراك والتواجد السوداني على الانترنت ضعيف وهزيل جدا غالبية الصحف والاصدارات ما بتلقاها في الانترنت في زمن الانترنت هو المسيطر ..
• حققت هدفك ؟ • في الاسبوعين الأخيرين ديل اتحققت حاجات كتيرة ، مثلا عملنا احتفال لشابة من الفاشر كانت تصدر جريدة حائطية حولناها ليها بعد نداء في سودانيزأونلاين لجريدة كمبيوترية وحضر الاحتفال ده هاشم الجاز أمين عام مجلس الصحافة والمطبوعات والتجاني خاج موسى أمين عام المصنفات الأدبية وسيد هارون وزير الثقافة بولاية الخرطوم وياسر عرمان رئيس لجنة الاعلام والاتصالات بالمجلس الوطني ود. محمد محجوب هارون .. والليلة عندنا في نادي الضباط حفل خيري لعلاج أخت عندها تليف في الكبد ومحتاجة لزراعة كبد ، ويحي الحفل عقد الجلاد وبي ده أنا شايف إن سودانيزأونلاين بقى عندها دور ومربوطة بالمجتمع . • لكن الحالات دي شكلها فردي وعلاقات خاصة و... • (يقاطع) مثلا عواطف بتاعة الفاشر أنا أخذتها من جريدة الصحافة ولغاية هسع ما بعرفها بصفة شخصية ، أما غادة نوري بطلة الليلة يعلم الله أنا اتعرفت عليها الاسبوع الفات وبالمناسبة أي زول يقول ليك السودان انتهى كضاب نحن في ظرف شهرين جمعنا 55 ألف دولار منها 20 ألف دولار تبرع بها السلطان قابوس ممثلة في سفارته بالخرطوم له ولهم حكومة وشعب الشكر والتقدير .. يا أخي انا أمس استلمت شيك من سيد هارون بي 3 مليون لعواطف (البت الجريدة) والبلد فيها خير لكن لعن الله ساس يسوس ..
• أنا سمعت أو قريت في الحقيقة في جريدة قوون انك كنت مواطن مثالي في قطـر .
الاجابة التي تثبت عظمة الزول السوداني ستأتي وإن كان عزتنا وكرامتنا لا تحتاج لاثبات .. ياها المحرية فيك عزيزي منعم !!!
نـواصـل>>>
02-05-2007, 10:23 AM
lana mahdi lana mahdi
تاريخ التسجيل: 05-07-2003
مجموع المشاركات: 16049
Quote: * ليه ما بقيت حزب أمة ؟ * (سكت طويلا) والله يا خليفة أنا ليه ما بقيت حزب أمة ؟ أنا بفتكر إنو الصادق المهدي أصدق الناس في السودان وهو يفوق السياسة أخلاقا وتهذيبا وعشان كده حزب الأمة في الفترة الأخيرة دي واللي فيه المعايير الأخلاقية مختلة فهذا الحزب ضعيف .
أخي الحبيب حسين شكراً للإتيان باللقاء الصحفي مغ أخي الحبيب عبدالمنعم و لكن الجزئية أعلاه تحتاج المزيد من الشرح لئلا يساء فهمها. محبتي لنا
02-05-2007, 10:47 AM
حسين يوسف احمد حسين يوسف احمد
تاريخ التسجيل: 08-17-2005
مجموع المشاركات: 4490
أشكركم على المشاركة .. لا تستعجلوا .. وأرجو ألا تحملوا الموضوع أكثر من اللازم .. ليس بالضرورة أن نتفق مع الأخ منعم في كل شئ وليس بالضرورة أن نختلف معه في كل شئ .. وكما تعلمون مثل هذه الحوارات لا تعكس كل الحقيقة كما أنها لا تخفي كل الحقيقة ..
وتابعوا ما تبقى من حوار .. مع الود ..
02-05-2007, 01:17 PM
عبد المنعم سليمان عبد المنعم سليمان
تاريخ التسجيل: 09-02-2006
مجموع المشاركات: 12158
RED] • أنا سمعت أو قريت في الحقيقة في جريدة قوون انك كنت مواطن مثالي في قطر؟ • أيوة .. وكرمتني الدولة هناك والفيفا .. واختارتني بناء على ده جريدة قوون الشخصية المثالية السودانية سنة 1995.. • دي بقى قصة لازم نسمعها ؟ • سنة 1995 أقيم في الدوحة كأس العالم للشباب بدلا عن نيجيريا والناس كانت بتترقب نجاح الدولة القطرية في تنظيم الاحتفالية دي نسبة لضيق فترة الإعداد وباختصار شديد يا خليفة الحاجة العملتها أنا بفتكر إنك بتعملها وأي سوداني نزيه بعملها . • اللي هي شنو ؟ • لقيت شنطة جنب عربيتي وفيها 600 ألف دولار ومعاها بطاقة صادرة من اللجنة المنظمة لكاس العالم للشباب باسم رئيس دولة شيلي وبعد دوران بالعربية لمدة نصف ساعة كان فيها حوار بيني وبين الشيطان إنتصرنا عليه في النهاية ـ وأنا دائما بغلبه ـ مشيت سلمت الشنطة بما فيها وفي فترة قياسية وبعد بلاغ رئيس البعثة بي 3 دقائق بس ، فاعتبروا ذلك سبب من أسباب نجاح دولة قطر في تنظيم كأس العالم للشباب .. • ووصل كيف هنا ؟ • جريدة كان مراسلها الفنان محمد السني دفع الله من الدوحة وبعدما نشرت الصحف القطرية صورتي والتكريم عمل معاي لقاء ونشرتو جريدة قوون .... وطبعا نشرهم للحوار في حد ذاتو تكريم .. • أنت الآن وسط مجتمع متحرك كيف تصنفه ؟ • أنا عندي قدرة على العيش في كل المجتمعات وبفتكر إنو الناس البرتادو أماكن المثقفاتية ناس ما طبيعين .. • أشرح ؟ • مثلا يقولوا ليك في ندوة عن (تأرخة الجغرافيا وجغرفة التاريخ) أو ندوة (إشاعة الفضيحة في جسد النص) .. إنت فاهم حاجة يا خليفة .... • طبعا أنا في البداية قلت علاقتي بيك بدأت بحوار مع د. آمنة ضرار إذا أنت سياسي رغم نكرانك لي ده في البداية ؟ • أنا علاقتي مع د. آمنة علاقة قرابة وجهة.. • وحزب ؟ • لا .. إقليم ..وآمنة بتعبر عن قضايا الشرق بشكل حقيقي ويعيبها المثالية والصدق كالصادق المهدي في زمن قلت فيه هذه القيم . • إنت بتصر على إنك ما سياسي ؟ • أنا منتظر الحاج وراق يسلك أو يؤسس أو ينضم لحزب سياسي لأكون خليفة له .. • الحاج وراق كان شيوعيا ثم أسس حق ولم تنضم إليه ؟ • كنت خارج السودان وأنا عرفت الحاج وراق قريب وعرفت جوانبه القيمية والأخلاقية وهو راجل وحدوي ومتدين جدا ويؤمن بالديمقراطية الاجتماعية وهذا ما ا}من به أنا .. • وياسر عرمان صاحبك ؟ • يا سر ما صاحبي ، لكن أتمنى أن يكون كذلك ، صحيح اتقابلنا عدة مرات وهو برضو رجل وحدوي وشجاع وخلوق وحقق كل أهدافه في تحديه المجتمع وهو الآن في القصر رغم إنه المجتمع كلو كان ضدو ... • رايك شنو في خروج ياسر الحالي ؟ • ياسر راجع . • كيف ترى السودان مستقبلا ؟ • عندما يترك أهل الانقاذ معالجة الامور والقضايا الحقيقية بالطرق الأمنية ويتم الاعتراف بالآخر في ذلك الوقت سيكون السودان من أعظم دول العالم وأنا متفائل جدا بمستقبل السودان .. • بتكره منو من السياسيين ؟ • بكره نيال بول رئيس تحرير (سيتزن) والطيب مصطفى رئيس مجلس ادارة (الانتباهة) .. • ليه ؟ • لأنهم قاعدين يدخلوا مشاكلهم النفسية في انهاء حياة مجتمعية عريقة باثارة النعرات العنصرية والكراهية وسط الشعب السوداني السمح . • وبتحب منو من السياسيين غير الصادق المهدي طبعا وآمنة ضرار ؟ • (سكت طويلا) أديني فرصة أفكر ..
• ملحوظة : إنتظرته طويلا شرب خلالها 2 شاي ولم يتكرم بالاجابة بعد وما زلنا ننتظر ..
• من أقواله :
• إنفقـوا من العمارات واللانكروزرات لتشملكم الآية (لن تنالوا البر حتى تنفقوا مما تحبون) .
• جون قرنق والحاج وراق ومصطفى سيد أحمد هي شخصيات عظيمة لن تتكرر في تاريخنا . إنتهـى الحـوار ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
حسين يوسف احمد
عاصم ابوبكر حامد
بهاء بكري
lana mahdi
عبد المنعم سليمان
فيس بوك
تويتر
انستقرام
يوتيوب
بنتيريست