انك درست حنتوب او تخرجت من جامعة الخرطوم ومشيت امريكا عملت دراسات عليا وبقيت وزير في بلد الوزارء فيه اكثر من المزارعين انك متزوج من النساء مثنى وثلاث ورباع ولديك بنين شهوداثم اطمع ان ازيدا..او في راوية اخرى عيال كالنمتي) انك تملك مال اقل من قارون بقليل والسيارات المطهمة والقناطير المقنطرة من الذهب (لابساها المراة الثالثة وليس الاخيرة)
وعلى حساب من كانت هذه الانجازات الفذة ..وعلى حساب ماذا ايضا؟؟وما الفائدة القدمتها لاكبر عدد من الناس المحتاجين ليها؟؟ ...... ضعف الطالب والمطلوب....هذه انجازات تصلح فقط في القرن السابع زمن ليخرجن منها الاعز الازل وتباهي عبدالله بن ابي سلول بالعرض والولد... وان شانئك هو الابتر..وراجعو تفسير الصابوني لهكذا انجازات..
هل تعرفون الانجازات الحقيقية في القرن الحادي والعشرين ام انتم لستم من سكان هذا الكوكب؟؟
ننصحكم بمشاهدة برنامجhuge construcations
في فضائية دبي ناشونال جغرافي
بدل ما تجو تورمو الناس يوم العيد في التلفزيون بالتنطع والتقعر غير المفيد والواحد بستغرب بجيبو لينا ناس ليه يتونسو في التلفزيون...ما كفاية الونسة الهنا دي...
والحقيقة لله الانجازات الحقيقية تتكلم عن نفسها ولا تحتاج لتلميع او ضجيج وهي لا تزال بعيدة المنال وهي امر ينعكس باكبر فائدة ممكنة لاكبر كمية من البشر داحل او خارج الحدود
حكاية جبرالله جابر عادل الامين [email protected] الحوار المتمدن - العدد: 1743 - 2006 / 11 / 23
دعا الابن المتفوق الذى سافر الى السويد والده المزارع لزيارته هناك بعد ان انجز رسالة الدكتوراة في الطب الوقائي.. خرج الابن والاب يتجولان في شوارع استكهولم النظيفة..وشاهدا مكان به حدائق غلبا وتغرد به العصافير.. - ما هذا يا ابني - هذه مقابرهم - ما شاء الله..دعنا ندخل لنرى ودلفا الى الداخل - اقرا لي يا ابني المكتوب على شاهد القبور اخذ الابن النجيب يقرا - بروفسر هوفن اكتشف الشي الفلاني وانجز البحث الفلاني ..العمر ست سنوات..دكتورة كلودين اكتشفت علاج الايدز..العمر سنتين...مهندس فليب..اكتشف المحرك الهايدرولجي..العمر ستة اشهر...الخ - هل يعقل يا يا بني ان هذه اعمارهم؟ - لا يا ابي..انهم يقيسون عمرهم بانجازاتهم والفترة التي قضوها فيها تنهد الاب وردد - ارجوك يا ابني عندما اموت في السودان اكتب على شاهد قبري(جبرالله جابر من بطن امه للمقابر) وذهبت مثلا
09-22-2009, 05:49 PM
adil amin adil amin
تاريخ التسجيل: 08-01-2002
مجموع المشاركات: 36995
هذا هو رائي ولا الزم به احدا 1- اكبر انجاز فكري سوداني الفكرة الجمهورية وافضل مفكر سوداني محمود محمد طه بالاضافة لذلك انجز الاستاذ محمود سد مدينة رشاد في جبال النوبةسنة 1957 كمهندس منفذ واستفاد من هذا المشروع سكان مدنية رشاد البالغ عددهم 60 الف تقريبا ولمدة خمسين عاما...والليلة الخرطوم ذاتا ما فيها موية من زمن الانجليز يا حليلم الدوام بطراهم 2- اكبر انجاز ادبي روائي الراحل الطيب صالح وموسم الهجرة الي الشمال التي تدرس في جل جامعات العالم وترجمت لاكثر من اربعين لغة عالمية مع افضل 100 رواية في القرن العشرين
3- اكبر انجاز سياسي د.جون قرنق واتفاقية نيفاشا2005 ومشروع الحركة الشعبية(السودان الجديد)
4- الرياضة العاب القوى...كاكي واسماعيل...وكرة القدم المريخ بطولة افريقية 1988 كاس مانديلا
5-الفن شعرا وموسيقي وغناء....احسن حاجة في السودان وكلهم نجوم وعبر كل الاجيال ولا استثنى احدا 6- المسرح الراحل الفاضل سعيد وتضحياته من اجل هذه الفن الراقي... 7- الفن التشكيلي راشد دياب 8- الصحافة فتحي الضو ولو كتب سقوط الاقنعة فقط لكفاه 9- افضل اكاديمي سوداني مشترك بين منصور خالد وفرانسيس دينق 10 افضل سياسي على قيد الحياة الاستاذ ابيل الير 11- افضل شخصية دينية واخلاقية مولانا محمد عثمان الميرغني
09-24-2009, 11:05 AM
adil amin adil amin
تاريخ التسجيل: 08-01-2002
مجموع المشاركات: 36995
12- افضل اقتصادي متجرد د.محمدسليمان(كتاب حروب الموارد والهوية) والتجاني عبدالقادر
..وطبعا الناس لحدت هسه ما قادرة تفرق بين التعليم العالي وبين الوعي واهو ده الظواهري الطبيب الذى درس الطب الكلية المرموقة وبقى قرد شمبانزي يختبيء في شقوق تورا بورا وحركة الاخوان المسلمين السودانية عل هدى اخوان مصر استقطبو الطلاب المتميزين اكادميا الذىن جاء بهم مجانية التعليم من الهامش للمركز عبرالمدارس ايها حنتوب وادي سيدنا وخور طقت... وطبعا بقولو نحن اتخرجنا من جامعة الخرطوم ويكون اتخرج من صفرة الغالي او ترهاقا او حسيب او فلسطين...بعدين عل فكرة ترهاقا بقت ابو قتادة
الالقاب الكبرى من دون وعي او اخلاق....لا تؤهل صاحبها ابدا ليكون مفيد او رائد من رواد التغيير لذلك حالة الاستحواذ وحب الظهور والالفاب التي يتبجج بها الكيزان الذين ضل سعيم في الحياة الدنيا لم تنجز سوى كابوس سمي بالتوجع الحضاري ولازال مستمر حتى الان واهلنا يقولو القلم ما بزيل بلم)
09-24-2009, 11:28 AM
adil amin adil amin
تاريخ التسجيل: 08-01-2002
مجموع المشاركات: 36995
من غادر الانجليز السودان الخط البياني لدولة السودانية انحدر نحو القاع بسرعة الصاروخ وحتى ما نقارن نفسنا بالدول عديمة الموارد ذى معجزة اليايان مثلا نقارن نفسنا بالجارة العزيزة مصر الانشاءات الضخمة 1- السد العالي 1959 غطت مصركله ويصدر الفائض الى الاردن 2- السكة الحديد المزدوجة من اسوان للاسكندية والطرق البرية 3- مترو انفاق القاهرة
ونحن مع ناس قريعتي راحت عبر نصف قرن من التدهور والصعود الي الهاوية ظلت السكة حديد بس ذي ما خلوها الانجليز واضافة عبود وتوفت هسه الي رحمة مولاها نفق عفراء والمطر وتعدام الصرف الصحي في الخرطوم ام سد مروي البقى حجوة ام ضبينة ما عرفناه هسه يطلع كهربا ولى سمك
وقالو عايزين مفاعلات يضحك السمك ويتبسم الباعوض(لسمك في السد والبعوض في ملكال)
اول حاجة ثبتو لينا حكم رشيد ياتي بالرجل المناسب في المكان المناسب وينيح الحريات الشخصية والمدنية دون تسلط فارغ وبائس...... بعدين كلمونا عن المفاعل النووي وصافات وكاس العالم
واما عن المشهد السياسي هل نحن فعلا دولة ام يقعة جغرافية تقع جنوب خط 22 ؟؟!! وحرب البسوس وداحس والغبراء وجساس وكليب وجديس وطسم في القبل الاربعة منذ الاستقلال الذى لا ليته كان والسبب شنو...الكرسي في القصرعلى شارع النيل...ومن غيرout-put .....
يا ايهاالملا افتوني في امري هل توجد انجازات حقيقية في السودان؟؟!!! نباهي بها الامم ام نحن ((عفطة عنز))) ضحكت من جهلها الامم
اذا كان لدينا دولة فلماذا تهزمنا نملة وان كانت عفطة عنز فلماذا نسميها دولة احمد مطر
(عدل بواسطة adil amin on 09-24-2009, 11:43 AM) (عدل بواسطة adil amin on 09-24-2009, 12:09 PM)
09-24-2009, 11:47 AM
adil amin adil amin
تاريخ التسجيل: 08-01-2002
مجموع المشاركات: 36995
كل الناس تتفق على ان الديك اغبى حيوان..ولكن نحن مع التجربة توصلنا الى ذلك..كان للوالدة العزيزة فى مدينة بربر سبع دجاجات وديك حسن الصوت..و شد ما يؤلمنى عندما يكلفونى بادخالهم ليلا فى القفص..بعد حظر التجول..اذا ظل هناك ثعلب من ثوار الدرب المضىء يتربص بهم الدوائر..كانت الدجاجات الجميلات تنساب بكل نعومة الى داخل القفص اما الديك فانه يتسمر فى الباب وعندما اقذفه بكل شى تحت يدى ليندفع داخلا ..يعود على اعقابه واظل اطارده فى الحوش الساعات الطوال..فى مرة من المرات تمكن الثعلب الخبيث من الدخول الى القفص وايقظتنى امى على الجلبة غيرالمعتادة ...حملت العكاز/العصا وفتحت الباب خرج الدجاج المزعور تباعا..اما الديك الغبى فظل يدور فى القفص مع الثعلب واعيتنى الحيلة اخيرا وبمجرد خفضى للعكاز انساب الثعلب هاربا ..مقتنعا من الغنيمة بالاياب..هذا هو الديك!! ************* اما التور وهي باللغة السودانية الدارجة تعني الثور تعبر عن القوة الرعناء..كنا فى مدينة كريمة ونريد العبور بالمعدية الى نورى.. هناك لورى فيه بقر وثور..نزلت البقرات الانيقات ودخلن البنطون/المعدية فى وداعة..وعندما ارادوا انزال الثور استدار وقابلهم بموخرته وعبر عن شعوره بصورة مقرفة لتغمر الروائح الكريهة المكان وسحبوه ليسقط بصور شنيعة،كما يسقط اللذين لايريدهم الشعب السودانى فى الانتخابات ..وعندما نهض اندفع نحو البنطون وانحرف فى اخر لحظةليطوح بالزين يمسكون بالحبال فى الماء ويسبب اافزع الرهيب للركاب فى البنطون ..واخذ يعدو بحزاء الساحل..احد الخبثاء ردد:هذا الثور فى حاجة الى نظارة..فى الاصل الثيران مصابة بعمى الالوان يمكنه ان يجلس فى مصاطب المريخ ويكون مشجعا للهلال..لذلك فى القاموس المحيط كلمة دكتور هى مزيج متجانس ابين الغباء والرعونة(ديك..تور) *********** فى ايام الجامعة وانا ادخل من باب مقهى النشاط لمحت مواطنين من شرق السودان بازيائهم المعروفة يحمل احدهم حقيبة هاند باق..كان احدهما فى العقد الخامس والاخر فى بداية العشرينات ..كان يقفان محرجين عند الباب...والطلبة والطالبات ينسابون من الباب دون ان يعبروهم..القيت عليهم السلام فبان البشر على وجهم الطيب..اخبرانى انهم يريدان الدخول لزيارة ابنهم الدكتور الذى عاد للتو من الخارج كان فى كلية الاداب..دخلت معهم الى الجامعةوقدتهما الى المكتب بعد ان اخبرنى اصدقائي اللذين يجلسون فى ضهر التور/حائط..طرقت الباب استدار ونظر الى ثم من فوق كتفى اليهما بدا فى وجه تعبير ينم عن عدم الترحيب والارتياح الرهيب اصابنى بالامتعاض..تسمرت فى مكانى واستدرت منصرفا وتركتهما يدخلان فى ارتباك ذهبت وجلست فى الهرم فى مقهى النشاط اشرب ليمون لعله يطغى على المرارة التي احسست بها..سرعان ما لمحتهما يعودان فى طريقهما الى الخارج..كان الصغير يتحدث بغضب شديد واستطعت ان التقط جملة لا يقولها السودانيين الا فى نقطة اللاعودة(لو بقى قبلة ما اصلى عليه)..وكان الرجل الجليل يطيب خاطره..خرجا من الفردوس الزائف وانا اشيعهم بنظراتى من بعيد وبقية هذه الحادثة تحز فى نفسى حتى اليوم. ولم اتخلص منها الى بعد ان اسقطه فى شخصية صابر فى رواية الساقية ولكن عزائى الوحيد ان النميرى كان يردد دائما ان حكومته تعج بمثل هؤلاء(الديك ..تور)..لذلك تطور السودان واصبح دولة عظمى تملك الصواريخ العابرة للقارات..لا مجاعة ولا هم يحزنون.. ومع ذلك هناك دكاترة اجلاء وعلماء حقيقيين تعتز بهم البلاد..واعوذ بالله من العلم الذى لا ينفع ويا نسمة يا جاية من الوطن بتقولي لي ايام زمان ما برجعن..... ..... الزول الكان حريص عل وحدة السودان من الاستقلال وليس بعد نيفاشا وباربعة سنوات عجاف...يبقي على ما تركه الانجليز من ايجابيات ويضيف عليها سكة حديد مزدوجة من نمولي لحلفا او مصر نفسها ومن نيالا الي بورتسودان بالاتجاهين كسلا وعطبره ويفعل النقل النهري بين كريمة ودنقلا وكوستي وملكال وكده نقول عندنا دولة وليس جغرافيك لوكيشن .... بعد داك يجي فوق عديلو يقعد في التلفزيون يتحدث عن انجازات...ملموسة يحس يها كل مواطن
Quote: وطبعا بقولو نحن اتخرجنا من جامعة الخرطوم ويكون اتخرج من صفرة الغالي او ترهاقا او حسيب او فلسطين...بعدين على فكرة ترهاقا بقت ابو قتادة
طبعا دورة حياة الكوز في جامعة الخرطوم عبر مثلث برمودا(الصفرة-المكتبة-المسجد)....لا توجد بها اي حلقة مفقودة...تساعد على ان الكوز يقترب من اماكن اكتساب الوعي في الجامعة او خارجها...او حتى طريقة سكنهم في الداخليات...فهم يحجزون افضل الغرف...ولا يساكنون الطلاب الاخرين...حتى لا تنتقل لهم جرثومة الوعي الاخر...,وضحو كمثل العنكبوت اتخذت بيتا وان اوهن البيوت لبيت العنكبوت...
ويظل ((الاستحواذ)) كقيمة سلوكية متاصلة فيه...وهي مفسرة فروديا بانها ترتبط باجزاء من الجسد ليس العقل احدها.... هم ادوات منظومة راسمالية عالمية طفيلية ...مرتبطة بالمرحلة الامبرالية الصهيونية ما قبل 11\9 لذلك تجد جل الكيزان تلقو دراساتهم العليا في امريكا والبعض يحمل جوازها العجيب ويتحدث عن الوطنية دون حياء..والكوز اصلا يحمل وعي اممي زائف وليس له ادنى احساس بالمواطن او الوطن..ليس سوى اداة من ادوات الحرب الباردة استنفذت اغراضها ووصلت مرحلة الاكسبياري ديت... ...... لنعود لمساءلة هامة وهي الشيزوفرنيا التي يعيشها الكوز بين المعارف التقنية الحديثة وبين معارف زمن دولة المدينة وعبدالله بن ابي سلول والتباهي بالعرض والولد....وحياة الهاكم التكاثر حتى زرتم المقابر...لذلك اني اعتبر النكاح الجماعي والذي يمتد بين دارين من huge construction بتاعة الانقاذيين في زمن التمكين والشيزفرانيا تمتد ايضا بين تمسكه بقيم المجتمع السوداني التي تربى عليها وهي تضع حد الفاصل بين العيب والحرام وبين قيم الاخوان المسلمين الوافدة من بئية اخرى و المكتسبة والشريرة والمزيفة... و سببت مركبات ذنب حادة واضطرابات وجدانية..عند جل من فارقو السلطة الان وبقيت النرجسية فقط عند المخمورين بخمر السيادة يمتطون صهواتها ويفاخرون في القبور الماضية عن مشروع هلامي كان سراب بقيعة يحسبه الظمان ماء...بعد ان اضحت العصا الدولية اكبر من الجذرة بكثير... ........
هذا الكائن المشوه القادم من الهامش...لا يجلب لاهله في الهامش الا التعاسة...بعد ما يتخطى مرحلة مولانا الحلمنتيشية(مولانا يا اسد الخلا النجر نجر...لاذك لذقة في مصلاته بكراكة ما بنجر) ويتخرج من جامعة الخرطوم .. الي مرحلة سيد بشبش...راجل حازم وسيفو برقش...وعينو الحارة يوم ما بترمش) ويصبح من سكان ( جمهورية العاصمة المثلثة)...دون الالتفات للكائنات التي تقاطرت من اركان السودان الاربعة في معسكرات النازحين...يعيشون فيها فقط لان الموت لم ياتي بعد...وبسبب حروب الموارد والهوية الكئيبة لمترفين المركز)... وثم يتبجج في التلفزيون بالسيرة الذاتية لذبابة التسي تسي اعلاه...
Quote: 9- افضل اكاديمي سوداني مشترك بين منصور خالد وفرانسيس دينق 10 افضل سياسي على قيد الحياة الاستاذ ابيل الير 11- افضل شخصية دينية واخلاقية مولانا محمد عثمان الميرغني
اكاديمى???يعنى شنو اكاديمى?* لكن انا محيرة الناس الفوق ديل منو اللى حدد انهم الافضل? ما عشان عندى اعتراض على اى واحد فيهم ....لكن عشان نوع الكلام ده هو اللى بيبقى بوستك ده " ونسة" ذى اللى انت زعلان منها فى تلفزيون السودان و فى البورد. ____________________________________ *1 : a member of an institution of learning 2 : a person who is academic in background, outlook, or methods ده معنى اكاديمى من merriam-webster dictionary
09-24-2009, 06:00 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: اكاديمى???يعنى شنو اكاديمى?* لكن انا محيرة الناس الفوق ديل منو اللى حدد انهم الافضل? ما عشان عندى اعتراض على اى واحد فيهم ....لكن عشان نوع الكلام ده هو اللى بيبقى بوستك ده " ونسة" ذى اللى انت زعلان منها فى تلفزيون السودان و فى البورد.
سمارت كل عام وانت بخير قلت في المقدمة دا رئي ولا الزم احدا(ركزي معانا كويس)...اصلو الوعي في السودان درجات ادناه التكفير والهجرة واعلاه الفكرة الجمهورية وبينهما امور متشابهات... ...... ابن ادم عندو اثنين اوت بتout-put واحد حسي....المال والبنون(بي تحت) واحد معنوي....(بي فوق )الفكر والكتب التي يصدرها
الذى جعل منصور خالد وفرانسيس دينق افضل اكاديميين في السودان الكتب الكتبوها بتجرد تعتبر رفرنس...يعني موثقة ومراجع وانا قريتا وبقيما من قرايتي ليها هذا الاكاديمي يعني العلمي اما المؤدلج هو البحمل لقب دكتور ويهضرب بسبب تشويش الايدولجية ذى حسن مكي والافندي ...... اما الكلام الهنا ده ونسة في نظرك...هي ونسة مفيدة على لال تعلم الناس التمييز بين الانجازات الحقيقية والانجازات غير الحقيقية... دا رايك ولكل بضاعة شراي وسوق لو كانت ونسة ناس التلفزيون ذى الكلام البنكتبو هنا ما كان في زول هتف ولى كف مشت بتلاقي كف وما كان الناس مرقت وراء بروفسر تهتف(خاسيء خاسيء يا عنان) وما كان 85% من الشعب السوداني اصيبو بالضغط والسكري والفشل الكلوي بسبب تلفزيون الانقاذ.....
كل سنة و انت بالف خير انا مركزه معاك تماما...و انت ما قلت فى اى حته انو ده رائك. و ما انا اللى قلت انا ما يحدث فى البورد ونسة ..you did
Quote: بدل ما تجو تورمو الناس يوم العيد في التلفزيون بالتنطع والتقعر غير المفيد والواحد بستغرب بجيبو لينا ناس ليه يتونسو في التلفزيون...ما كفاية الونسة الهنا دي...
و خلاص يا اخى نتفق انو ده رائك انت...ممكن نناقشك فيه? نقاش دى ذاتها كلمة كبيرة (على انا). ممكن نتونس معاك فى وجهة نظرك دى? و لانك كاتب الكلام ده فى البورد ده...انا ح افترض انك عاوز الناس تناقشك...صح? انا ما عندى اى اعتراض على الفكرة الجمهورية...و قريت كل كتب الاستاذ محمود قبل ما حتى اتم 20 سنة. و ما لقيت فيها اى حاجه جديدة. كل النظريات فيها قريتها زماان فى كتب الصوفية. اما ناس الهجرة و التكفير ديل فموجود ذيهم فى كل الدينات...ناس متعصبة و ما عاوزه تفكر. اما الحجات الى كان بيعملها الاستاذ محمود من ترك للصلاة و ادعاء بنزول الوحى عليه* بتخلينى افكر ان الجمهورية ذى الهجرة و التكفير. ناس ما عاوزه تفكر. كونك تقول ان الانجاز بيقاس ب الانجاز العلمى بس ده ظلم لكل امهاتنا و لكل انسان بسيط ربنا ما اداه قروش كفاية انو يدرس فى MIT عشان يخترع حاجه. كل زول انجازه بتقيسه بحسب مقدراته العقلية و المادية. السودان بلد فقير (من غير دخول فى الاسباب الان) لكن ما مكن اقارن انجازه ببرطانيا اللى كانت مستعمراه لزمن طويل. بكلامك ده انت بتقوا ان كل امهاتنا -اللى افنوا حياتهم فى تربيتنا- انجازهم فى الدنيا Zero. ________________________
* انو الاستاذ محمود رفعت عنو الصلاة و انه استلم رسالة تانية ده انا عرفتوا من الاخوة الجمهوريين فى البورد ده. لو جو الان و قالوا لى انه كان بيصلى ( الفروض الخمسة)...ممكن افكر تانى فى الموضوع.
09-24-2009, 07:58 PM
Hani Arabi Mohamed Hani Arabi Mohamed
تاريخ التسجيل: 06-25-2005
مجموع المشاركات: 3515
Quote: (ارجوك يا ابني عندما اموت في السودان اكتب على شاهد قبري(جبرالله جابر من بطن امه للمقابر)
Quote: (احد الخبثاء ردد:هذا الثور فى حاجة الى نظارة..فى الاصل الثيران مصابة بعمى الالوان يمكنه ان يجلس فى مصاطب المريخ ويكون مشجعا للهلال..لذلك فى القاموس المحيط كلمة دكتور هى مزيج متجانس ابين الغباء والرعونة(ديك..تور )
Quote: قلت في المقدمة دا رأيي ولا الزم احدا(ركزي معانا كويس)...اصلو الوعي في السودان درجات ادناه التكفير والهجرة واعلاه الفكرة الجمهورية وبينهما امور متشابهات...
الأخ/ عادل أجمل التحايا والود وينك ياراجل طوّلت الغيبة !!!؟ أم أنك بالشهود ونحن الغائبون ؟. على العموم ياسيدي أفرحت قلبي المحزون وأضحكتني إلى درجة البكاء والله .
Quote: اما الحجات الى كان بيعملها الاستاذ محمود من ترك للصلاة و ادعاء بنزول الوحى عليه* بتخلينى افكر ان الجمهورية ذى الهجرة و التكفير. ناس ما عاوزه تفكر.
Quote: انو الاستاذ محمود رفعت عنو الصلاة و انه استلم رسالة تانية ده انا عرفتوا من الاخوة الجمهوريين فى البورد ده. لو جو الان و قالوا لى انه كان بيصلى ( الفروض الخمسة)...ممكن افكر تانى فى الموضوع
Quote: انا ما عندى اى اعتراض على الفكرة الجمهورية...و قريت كل كتب الاستاذ محمود قبل ما حتى اتم 20 سنة
إسمارت يا بتي عادل قال عايز يتونس ونسة مفيدة مش ونسة زي الفوق دي ! الله يرضي عليك كان الموضوع ده ما عندك فيهو صيبة أتركيهو طلبتك بالرسول سبعة مرات , هسّع كيف عقولنا تستوعب إنك قريتي الفكر الجمهوري وما عندك إعتراض عليهو وتجي تقولي جنس كلامك ده !!!!؟ انت مشتهية ليك حجة والسلام!!! ؟ أبو حمــــــــــد
09-24-2009, 09:29 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: إسمارت يا بتي عادل قال عايز يتونس ونسة مفيدة مش ونسة زي الفوق دي ! الله يرضي عليك كان الموضوع ده ما عندك فيهو صيبة أتركيهو طلبتك بالرسول سبعة مرات , هسّع كيف عقولنا تستوعب إنك قريتي الفكر الجمهوري وما عندك إعتراض عليهو وتجي تقولي جنس كلامك ده !!!!؟ انت مشتهية ليك حجة والسلام!!! ؟ أبو حمــــــــــد
ابو حمد....لما تقرر تسخر من زول....على الاقل اقرا (الونسه) كويس بعدين ممكن تجى تضحك و تتريق. مع انى ما بحب (اللت و العجن) لكن ح اشرح ليك. 1- انا قريت كتب الاستاذ محمود 2- كنت بالنسبة لى ذى كتب ال صوفية (با لاضافه لافكاره عن المجتمع و حقوق المراه) 3- ما كان عندى اعتراض على الفكرة الجمهورية - المكتوبة فى الكتب 4- فى البورد عرفت ان الاستاذ قال بان الصلاة رفعت عنه و ان الوحى نزل عليه. 5- الجمهوريين مؤمنيين تماما بحكاية رفع الصلاة و الوحى ...عشان كده هم بالنسبة لى ذى التكفريين ( فى عدم تفكيرهم فى الموضوعين ديل) . مفروض كمان اوضح انى عارفه ان الجمهوريين ناس مسالمين جدا. خلاصة الموضوع انا ما شايفه انو فى مشكلة (و حكاية صعبة على العقول العظيمة استوعابها) كونى قلت انى ما عندى اعتراض على الفكرة الجمهورية المكتوبة فى الكتب ...لكن عندى الف راى فى ان زول جا و قال ان الصلاة رفعت عنه. حقيقى انا ما عارفه ممكن اشرح ليك اكتر من كده كيف. بعدين حكاية "يا بتى الله يرض عليك اجرى العبى بعيد" دى ما محترمة. و اتمنى انك ما تحاولها معى و لا مع اى زول تانى...اتفقنا?
09-24-2009, 10:41 PM
jini jini
تاريخ التسجيل: 02-05-2002
مجموع المشاركات: 30720
لم يضر بالسودان الا مثل هذه القطعيات! خلينا شنو لى تعصب الكورة هلال مريخ! طيب لمن فرانسيس ومنصور خالد افهم ناس ليه ما بقو جمهوريين! ياعادل انت هسة زاحمت الكيزان زعلان منهم ليه! تحياتى جنى
09-25-2009, 02:39 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: لم يضر بالسودان الا مثل هذه القطعيات! خلينا شنو لى تعصب الكورة هلال مريخ! طيب لمن فرانسيس ومنصور خالد افهم ناس ليه ما بقو جمهوريين! ياعادل انت هسة زاحمت الكيزان زعلان منهم ليه!تحياتى جنى
السودانيين كلهم جمهوريين بالفطرة من نمولي لي حلفا ومن الجنينة لبورتسودان ما عدا امراض الطفولة الستة....ولمن كان الناس بقعدو للفكرة في شارع الله ده في كل مدن السودان ويستمعو في ادب وحب لحياة الفكر والشعور...كانت هذه الكائنات المتوحشة..ناس من اين جاءهؤلاءبتاعين الطيب صالح يديرون المعارك الغبية والعنف وين؟؟؟!! في جامعة الخرطوم...اتخييل؟؟ الشارع السوداني اوعى من الجامعة... لان الفكرة الجمهورية مشروع سوداني100% ما مستورد من اي مكان..... وكل مفكر سوداني حقيقي يحترم نفسه او درجته العلميةوالاكاديمية لديه راي ايجابي جدا عن الفكرة والاستاذ وامشي اقرا كتب عبدالله الطيب او جون قرنق اوفرانسيس دينق او منصور خالد او فتحي الضو وكل كوز او شيوعي مختل الوعي والشعور...يفتقر للامانة العلمية...له قيح يقبح به نفسه ومن اتبعه من الغوغاء وبنشر الاكاذيب والتخريجات المغلوطة عن الفكرة ويهيمن على المنابر ويسمم وعي الناس الطيبة ذى سمارت دي. .....
والله فعلا الناس ديل افهم ناس لكن منو العنده وعي يستوعب بيه كلامم ونحن مع ناس كان جينا للبوبار نلقى ناسو كتار ومستلمين التلفزيون على حسابم وكذبهم تزول منه الجبال
Quote: ابو حمد....لما تقرر تسخر من زول....على الاقل اقرا (الونسه) كويس بعدين ممكن تجى تضحك و تتريق.
والله يا إسمارت يابتي وأنا مصر على بتي دي لأني بتصورك صغيرة بالنسبة لي ولا أعلم لك لقباً علميّاً أو إن كنت آنسة أو متزوجه حتى أستخدمه ولا يليق بي أن أقول يا أخت , والله المعبود بالحق أنا لا أسخر منك ولا ينبغي لي بقدر ما أن عباراتي التي تخيرتها تنم عن التعب والقنوط فنحن نتحدث منذ ثلاثين عاماً , والأستاذ محمود إلى الآن جاوز الستين عاماً ,وكنت أظن أن جيلنا وما قبل هم الذين التبست عليهم أفكار الأستاذ محمود أما وأن تأتي في القرن 21 وترددي مثل هذه الأقوال فذلك ما ِأصابني بهدة الحيل والرهق , وعلى العموم ما تزعلي والاحترام قائم بيننا رغم كل ما بدا . على الرغم من أني زاهد في الحوار فيما يخص الفكرة الجمهورية أحب لك أن تعلمي أني من تلاميذ الأستاذ محمود لم أقل ولم أسمع أو أقرأ أو أؤمن في يوم من الإيام بأن الأستاذ محمود قد رفعت عنه الصلاة ودونك كتبه وتسجيلاته الصوتية فإن وجدت بينة على ما تدّعين فأنا معك من المنكرين , وهذا الأمر ينسحب على تلاميذه إن وجدت بينهم من قال بهذا الأمر فدلينا عليه , كل القضية يا إسمارت يا بتي إنو الفكر الجمهوري ليهو فهم أساسه القرآن والسنة في موضوع الصلاة والوحي الذي تتحدثين عنه وأمور أخرى كثيرة, ولم يقل أحد بأن هناك وحياً أو رفعاً للصلاة , فإن كنت قرأت رسالة الصلاة وطريق محمد لكفتك . سؤال : هل من بين الصوفية الذين قرأت لهم من تحدث في إشكالية الحرية الفردية المطلقة وأمن الجماعة ؟ أو كتب عن دستور السودان و الفيدراليه كنظام يصلح لحكمه !!؟
أبو حمــــــــــد
09-25-2009, 12:26 PM
عثمان عبدالقادر عثمان عبدالقادر
تاريخ التسجيل: 09-16-2005
مجموع المشاركات: 1296
الأخ/ جني كل سنة وانت طيب يعني ماتلاقيني إلا هنا ؟ ياسيدي أنا حا أرد ليك نيابة عن الأخ عادل وبي copy &paste الراجل قال :
Quote: 9- افضل اكاديمي سوداني مشترك بين منصور خالد وفرانسيس دينق
وما قال أفهم ناس !!!!!! ومعياره هذا :
Quote: ابن ادم عندو اثنين اوت بتout-put واحد حسي....المال والبنون(بي تحت) واحد معنوي....(بي فوق )الفكر والكتب التي يصدرها
الذى جعل منصور خالد وفرانسيس دينق افضل اكاديميين في السودان الكتب الكتبوها بتجرد تعتبر رفرنس...يعني موثقة ومراجع
وأخيراً العبارة البدأ بيها :
Quote: هذا هو رائي ولا الزم به احدا
أما سؤالك هذا!!!!!!!:
Quote: طيب لمن فرانسيس ومنصور خالد افهم ناس ليه ما بقو جمهوريين!
نقول: ليست كل من فهم وأعترف للأستاذ محمود بعمق الفكر وقوة الإرادة والعبقرية جاء والتزم الفكر الجمهوري لأنو المسألة ليها عوامل ثانية كثيرة ومن ضمنها قوة الإرادة التي لا تتوفر إلا لقلة وهي ( الأندرينا) ومع ذلك الدكتور منصور يحفظ للأستاذ قدره ومكانته وخدم الفكرة الجمهورية بأكثر مما خدمناها نحن تلاميذه فقد كان الأستاذ محمود دائماً يقول أصدقاء الجمهوريين يخدمون الفكرة أكثر من الجمهوريين .
أبو حمــــــــــــد
09-25-2009, 12:42 PM
jini jini
تاريخ التسجيل: 02-05-2002
مجموع المشاركات: 30720
Quote: نقول: ليست كل من فهم وأعترف للأستاذ محمود بعمق الفكر وقوة الإرادة والعبقرية جاء والتزم الفكر الجمهوري لأنو المسألة ليها عوامل ثانية كثيرة ومن ضمنها قوة الإرادة التي لا تتوفر إلا لقلة وهي ( الأندرينا) ومع ذلك الدكتور منصور يحفظ للأستاذ قدره ومكانته وخدم الفكرة الجمهورية بأكثر مما خدمناها نحن تلاميذه فقد كان الأستاذ محمود دائماً يقول أصدقاء الجمهوريين يخدمون الفكرة أكثر من الجمهوريين .
وانا من الذين يؤمنون بعمق تفكير محمود وعبقريته وتفرده وتضحياته وفى نفس الوقت ارفض التعميم والاراء القطعية وما اوردته انما اردت ان يكون صادما للاخ عادل امين لاستهلاله بانكارشئ وختمه بنفس ما انكره على الاخرين! ولك تحياتى امن اكثر ما انكرته على الاستاذ محمود هو دعمه لمايو واثبت الايام للاسف انه رهان خاسر! جنى
09-25-2009, 01:09 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
عثمان عبدالقادر صدقنى انا ما فارق معاى تقولى يا بتى او حتى يا خالتى. و خلاص عفا الله عما سلف.
Quote: الأستاذ محمود لم أقل ولم أسمع أو أقرأ أو أؤمن في يوم من الإيام بأن الأستاذ محمود قد رفعت عنه الصلاة ودونك كتبه وتسجيلاته الصوتية فإن وجدت بينة على ما تدّعين فأنا معك من المنكرين , وهذا الأمر ينسحب على تلاميذه إن وجدت بينهم من قال بهذا الأمر فدلينا عليه
احنا متفقين تماما...انا ما لقيت حاجه فى كتبه او تسجيلاته الصوتيه بتقول انه رفعت عن الصلاة.... لكن انا ازكر تماما ان د. حيدر بدوى صادق قال فى البورد ده ان الاستاذ ما كان بيصلى الصلاة المعروفه لينا. و ان شاء الله فى اقرب فرصة احاول افتش البوست من الارشيف. و بصراحة الموضوع ده اكتب فيه مليون مرة فى البورد و انا ما عاوزه ارجع ليه تانى. انا -ذى جنى اخوى ده- اعتراضى على زول معترض على الكلام اللى بتقال ساااى فى تلفزيون السودان عن الانجازات وعن انو هو شايف انها ما انجازات. لكن صاحب البوست جا و عمل نفس الحاجه. طيب يا اخى الناس فى التلفزيون ديل ما برضو -احتمال يكون- ده رائهم بس و ما ملزمين بيه زول. الحاجه التانيه برضو عن الانجاز يكون بس فى ال هيوج كونستركشن. انجاز اى زول لازم يكون مقارنتة بامكانيات الزول ده. المزارع اللى ما لقى فرصة يتعلم و عاش حياته كلها فقير...حرام اقارنه ببرفسير غربى ابوه كان برفسير و لقى تعليمه فى افضل الجامعات. الجماعة ديل بدو من Baselines مختلفة تماما.
09-25-2009, 02:21 PM
adil amin adil amin
تاريخ التسجيل: 08-01-2002
مجموع المشاركات: 36995
هلا وغلا ومرحب بالزوار الحبيب عثمان عبدالله وهاني وتجربة الهند وجني الكوز من وراء حجاب وسمارت سلام عليكم
الحبيب عثمان خليني احسم مسالة اكاديمي دي لسمارت ومن دقنها ونفتل ليها هي نقلت تعريفين بالانجليزي 1- شخص ينتمي لمؤسسة علمية وكلاهما ينتمي لمؤسسة منصورخالد مدرج في مؤسسة الفكر العربي بتاعة الامير الحسن في الاردن...وفرانسيس دينق ينتمي لمعهد امريكي اعتقد اسمه بروكلين....وقد نزلت مقاطع من كتابه فى بوست(هكذا تكلم فرانسيس دينق) والتعريف الثاني(a person who is academic in background, outlook, or methods وكتب منصور وفرانسيس مستوفية كل شروط مناهج البحث العلمي لو ما بتعرفي انجليزي ما تنقلي كلام ما بتعرفي طيب يا سمارت عرفت قبل كده انه الاستاذ عمل سد رشاد؟؟ ولى مابتعرفي رشاد طيب بتعرفى جبال النوبة؟...هذه هي الونسة المفيدة التي نقدمها عن السودان لمن كان له قلب او القى اسمع وهو شهيد...يمكن يجي سؤال في من سيربح المليون.. ده انجاز عملي وعلمي غير مسبوق... وسيبك من صلاة الاستاذ وعدما..(الصلعة المقابلة الحر)هذا الامر من اختصاص رب العالمين....(انا الينا ايابهم)(ثم انا علينا حسابهم) .... والفكرة الجمهورية ملف سياسي متطور للدولة المدنيةالسودانية وسبق ان نزلته هنا في الارشيف(هكذا تكلم الاستاذ محمود) وانا اتعامل مع هذا الملف في هذه المرحلة...
اما انجازات الامهات...لم اتحدث عنها هنا لانهن لا ياتين للجعجعة في التلفزيون وما قرو حنتوب وجامعة الخرطوم ونصهن قاعد في معسكرات النازحين في دار فور بسبب عقوق ابناءهن الكيزان وشوفي صورة بروفايل السلفي الوهابي فرانكلي
Quote: انا -ذى جنى اخوى ده- اعتراضى على زول معترض على الكلام اللى بتقال ساااى فى تلفزيون السودان عن الانجازات وعن انو هو شايف انها ما انجازات. لكن صاحب البوست جا و عمل نفس الحاجه.
صاحب البوست يابتي بجي هنا ببلاش وشخصه ليست وسيلة إعلامية يدفع فيها الشعب السوداني المغلوب على أمره وبولاية الأميين الذين ارتادوا المؤسسات التعليمية والتي دفع فيها الشعب دم قلبه ايضاً , ألا يشكل هذا عندك فارقاً ؟
أبو حمــــــد
09-25-2009, 02:53 PM
عثمان عبدالقادر عثمان عبدالقادر
تاريخ التسجيل: 09-16-2005
مجموع المشاركات: 1296
Quote: امن اكثر ما انكرته على الاستاذ محمود هو دعمه لمايو واثبت الايام للاسف انه رهان خاسر!
لو كان الرهان يا عزيزي على أن مايو هي النظام الأمثل للسودان والعالم لأصبح خاسراً ,لأن مثل هذه التهمة يدحضها ماكتبه الأستاذ من النظام الأمثل للسودان والذي هو مبذول إن اردت الرجوع إليه في مظانه ,ولو كان الرهان على أن مايو ستدوم إلى الأبد فهو رهان كذبه الأستاذ بوقفته التي لم نر لها مثيلاً ,إذن كما علمنا نحن وبعقول مفتوحة لم يخف عليها الواقع الذي تعيش فيه أن الرهان كان على: إن ذهبت مايو قبل معرفتنا لما نريد فسوف تقفز الطائفية والهوس الديني إلى السلطة وهو رهان كاسب ورابح بنسبة مائة في المائة لكل ذي بصيرة . ألم يقل الأستاذ محمود بالحرف : ( سوف يأتي وقت تتمكن فيه جماعة الهوس الديني من السيطرة على الحكم في السودان ولو عن طريق انقلاب عسكري ,وسيذيقون الشعب السوداني الأمرين, وسيقلبون نهاره ليل , ولكنهم ستنشأ بينهم صراعات تقتلعهم من المجتمع اقتلاعاً )!!!
أبو حمـــــــــد
09-25-2009, 02:52 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: الذي عانى من نفس الاحتلال الإنجليزي (الذي أنادي شخصياً بعودته إلى السودان لمدة 300 سنة قادمة)
والذي كان البعض يسخر منه بحجة قلة العقل
أنظر إلى أين وصلوا
العزيز هاني سلام اشاركك نفس الراي اماالمقارنة بين الهند والسودان فدونك وهذا المقال اذ نشرته في جل صحف الخارج ما عدا السودان وصحفاته المبجلةوالسببب معروف طبعا(ناس قريعتي راحت)
اساطير النزاعات في ميزوبتميا ووادي النيل راسلوا الكاتب-ة مباشرة حول الموضوع
عادل الامين [email protected] الحوار المتمدن - العدد: 1852 - 2007 / 3 / 12 المحور: الحوار المتمدن - الكتاب الشهري 2 : المصالحة والتعايش في مجتمعات الصراع العراق نموذجا
في أرض وادي النيل شديدة الخصوبة كانت الحياة تتبع نظاماًً ثابتاً ومبتكرا باسطة في الزمن ما كان مقدراً منذ الأزل. كان الآلهة أقوياء دون أن يكونوا مفرطين في العنف. وكانت الخلافات فيما بينهم وخلافاتهم مع البشر ( غير الخالدين ) تحل عادة بالطرق السلمية. لكن في بلاد مابين النهرين ( ميسوبوتاميا ) الوعرة التي تنهبها الرياح , فان المجلس المقدس للآلهة والبطلة الإله مردوك اضطر لخوض غمار حرب يائسة ومسعورة ضد القوى الهائلة للفوضى والتحلل التي تمثلها تيامت, الأم التي أنجبت الآلهة والشياطين بطريقة مسرفة جعلت عطاءها اللامحدود يبلغ حد الكون نفسه, إلى أن قتلها مردوك ومزق جسدها إربا. ذلك يعيننا على أن ندرك أن الحضارتين لم تتوصلا, حتى في مهد الإنسانية, إلى رؤية متطابقة لمعنى الكون وبالطبع لم تعانيا من المشكلات الوجودية نفسها؛ كما أنهما بالتأكيد لم تتفقا تماماً على أنجع الطرق لمعالجتها . ففي وادي النيل كان الحل المتدرج الودي بين التنازعين والمتنافسين والخصوم من الممارسات المعتادة في مواجهة النزاعات, بينما سادت المذابح وعمليات الإبادة بلاد مابين النهرين منذ تلك الحقب والى يومنا هذا. وفي وادي النيل أعتبر " أغدود" إله الفوضى والتحلل صديقاً ومتعاوناً اذ انه هو الذي أنجب الشمس الخالقة مانحة الحياة؛ بينما كانت قوى الفوضى في بلاد مابين النهرين تعتبر قوى معادية للحياة. لقد هاجم مردوك الأم العظمية تيامت بوحشية ومزق جسدها إلى الآف الأشلاء. إن الحضارتين, وادي النيل وبلاد مابين النهرين, تمثلان طريقتين ( أو آليتين , إن شئت ) شديدتي التعارض في حل النزاعات. كيف في إمكاننا إذن, ونحن نعيش في زمننا المضطرب والمعقد هذا , أن نعثر على الخيط الأحمر الرفيع الذي يجمع ويمر عبر كل مظاهر هذا السلوك الاجتماعي شديد التعقيد والمتنوع مثل الصراع الجماعي المسلح؟ بالطبع, فأن التعقيد والتنوع في الأسباب وأشكال الإدراك والتجليات لعنف الجماعات يتعب ويتخطى المعالجة العقلانية. كما أن العمليات والظواهر الاجتماعية المعقدة,والتي تعتمد هي نفسها على العديد من العوامل الذاتية والموضوعية تضفي سراباً من عدم اليقين على فهم دوافع العنف وتفجر عمليات الصراع المسلح وبالتالي علي قدرتنا بل محاولاتنا لفهم هذه النزاعات بوصفها سلوكاًً فعلياًً لبشر حقيقيين. وعلى أعتاب الألفية الثالثة, السابعة في تقويم حضارة وادي النيل الزماني, كنا نعتقد بأننا سائرون نحو التقدم والعيش الرغيد إلى ما لا نهاية, وإن عهد المجاعات والحروب الهمجية والعصبية المقيتة قد ولى إلى غير رجعة. ولكن استمرار مسلسل المجازر التي ذهب ضحيتها الملايين من الناس زعزع ثقتنا بإمكانيات التقدم الاجتماعي السريع الوتائر. ففي المقاربة الأولية يبدو العنف سلوكاًً همجياً لاعقلانياً وكارثياً لا ينزعه منازع. يؤكد من ذلك بشاعته على المستوى الإقليمي كما شاهدنا في القرن الإفريقي, وعلى الساحة الدولية كما عاصرته الشعوب الأوروبية والآسيوية اللاتينية خلال حروب عالمية ومنازعات داخلية دامية. لكننا الآن ندرك أن الكارثة تدل على وضع متأصل يسمح لنا يتبين نسق متكرر وأن الصدفة والضرورة تعملان, بكل تأكيد, متلازمتين في نسيج جدلي شديد الاتساق,وحتى على المستوى الاجتماعي فان الضرورة الباطنية المتأصلة تقدم نفسها على شكل صدفة. لذلك فليس من المستغرب أن نجد أنه وفي النطاق نفسه الأكثر تعقيداً للعنف الاجتماعي فان البعد الذاتي لم يقض تماماً على البعد الموضوعي, وان انساقا معتادة ومألوفة وسمات متشابهة ربما يصبح من الممكن إدراكها وتمييزها. ونحن لا نعتقد بان البشر يحملون بشكل فطري في أعماقهم جرثومة التصفية الذاتية والاستمتاع بفواجع مجتمعاتهم, بقدر ما لا نفهم لماذا يعتقد بعض أن روح الانتقام والتشاؤم تسيطر على مستقبل حياتنا وعلى أبعادها المادية والروحية. حقيقة أننا لا نستطيع تقديم تبريرات عقلانية للعنف على مستوى الأفراد, لكننا نملك حظا أوفر في سبر غور الظاهرة إذا حاولنا فهمها كسلوك جماعي وإذا ربطنا المناهج المتعلقة بالبحث الاجتماعي بتطورات النظريات العملية العامة مثل "نظرية الفوضى"؛ إن ذلك يمنحنا فرصة مناسبة لفهم بعض جوانبها الغامضة بوصفها سلوكاًً ذي وتائر منتظمة, لكنه سلوك يمكن فهمه واستيعابه, أيضاً, كرد فعل لأوضاع الجماعات الإنسانية التي تتعرض لشتى أنواع الضغوط والتميز والعنف.
كما بحثنا التماثل بين حضارة الرافدين(العراق) وحضارة وادى النيل(السودان)...دعونا نتماهى مع حضارتين معاصريتن هما الهند وامريكا فاذا بحثنا عن المشترك بين كل من الهند وامريكا كنموزجين متطرفين للتنوع الاثنى واللغوى والدينى والطائفى الذى يؤسس لهويات صغرى ومع ذلك تتعايش وتتفاعل هذه الهويات الصغرى فيما بينها صانعة هوية عامة مفتوحة على المستقبل..سوف نجد ان عنصرين رئيسيين هما الديموقراطية والراسمالية الرشيدة عملا معا بلا سقف محدود وكلتاهما آليتان لاطلاق روح ابداع الذات فى الحاضر والمستقبل..بينما عطل الاستبداد والقيود للنظامين الشموليين والراسمالية الطفيلية فى العراق والسودان مسيرة التنمية فى البلدين..وهذين العاملين وثيقا الصلة بتدهور الانتاج المادى والمعرفى ايضا ..نعود للعنصر الثانى بصورة اكثر تفصيلا مع ذكر الامثلة..فى حالة الهند وامريكا التوظيف الجيد للثروة ونشؤ طبقة راسمالية قوية ومنتجة تهتم بالبحث العلمى والمعلوماتية وظفت واحترمت قواعد اللعبة السيا سية(الحرية والديموقراطية) انعكس ايجابا على مجتمعيهما..بينما فى البلدين المنكوبين(العراق/النفط والسودان المزارع /المراعى/النفط) هيمنت الراسمالية الطفيلية التى تمثلها النخبة الحاكمة على مواردالبلدين الثابتة والمتحولة ورسختها فى المركز وعملت على تهميش الاطراف(الاهوار/الاكراد /العراق،اقاليم السودان/السودان)..بينما كان يعيش سكان المركز(بغداد/الخرطوم) فى قمة البزخ والاستهلاك الحضارى..وهذا الانسان المترف الفريد افرزته الداروينية السياسية العالمية فى النظام العالمى القديم من فصيلة الانسان الاستهلاكى(homo consumatus)..كان سكان الهامش يصارعون من اجل البقاء..واستمرارهم احياء فقط لان الموت لم ياتى بعد..نهبة للمرض والجهل والتخلف وقسوة الاوضاع البيئية ..لعب النظامين الجشعين دور كبير فى مفاقمة الاوضاع البيئية نفسها لسكان الهامش بتخريب البيئة والابادة والقتل والتشريد والتهجير القسرى والاستبدال باثنيات مكان الاخرى..بعد ظهور النفط فى الاونة الاخيرة فى السودان وبدات نزاعات الموارد والهوية..فكان تجفيف الاهوار فى العراق وماساة الاكراد فى الشمال وصمة سوداء فى تاريخ النظام العراقى ..وايضا اندلاع الحروب بين الرعاة والمزارعين كانت ناجمة من استهلاك الارض الزراعية بصورة مجحفة(الزراعة الآلية)..ادت الى تدمير منطقة السافنا الغنية فى الحزام الاوسط للسودان وزحفت جحافل الرمال جنوبا للتضيق الحياة على الرعاة فى الشمال وتفجر االوضع الماساوى فيما يعرف باحداث دارفور..قادت السياسات الهدامة للنظامين الى بروز كل النزاعات الظاهرية التى تغطيها الاخبار الان..وان اختلفت الاسباب التى ينعق بها انصاف المثقفين والاكاديميين العاطلين عن المواهب الان عبر الاعلام العربي المازوم الذى لم يتخطى حتى الان اذاعة صوت العرب..عن مؤآمرة ضد العروبة/العراق او الاسلام/السودان..وكأن العروبة او الاسلام هى الفشل والفساد والاستبداد.. ونواصل مع قصة بلدين...طبعا كلما كانت الفجوة بين الوعى السائد والديموقراطية كبير ...كلما كانت الخسائر فى الارواح والممتلكات كبيرة..كان على الشعب العراقى ان يدفع ثمن العزلة غير المجيدة التى ادخله فيها نظام صدام الشوفينى الفاشى..وان يدفع ايضا ثمن اللابتزال السياسى الذى تمارسه الانظمة الشمولية فى الجوار سواء كانت ثيوقراطية/ ايران/السعودية او عنصرية/سوريا/الاردن..وما اكثر الجيران الذين لا يؤمن بوائقهم في المنطقة ومن تجربة الهند وامريكا نستخلص الاتى ،ان هناك مفتاح رئيسى للتطور وانتاج القيم الجديدة و قدرتها على الاسهام الخلاق فى الثقافة والحضارة الانسانية كعلامة على الهوية الايجابية..هذا المفتاح هو الحرية بمعناها الشامل(الحرية من شنو وليس من منوا)..لن تستطيع شعوب مكبلة بالقوانين المقيدة للحريات وبالفقر والبطالة والاستبداد السياسى والاجتماعى تتحكم فيها نخبة فاسدة وراسمالية طفيلية تابعة وضعيفة ان تنتج ثقافة جديدة وهوية عصرية متطورة حتى ولو كانت هذه الامة صاحبة اسهام مرموق فى الماضى بل تبقى مثل هذه الثقافة الجديدة والعصرية اما فى حالة كمون جنينى او فى حالة دفاع عن النفس ضد اعدءها من الطابور الخامس والسادس من انصاف المثقفين والاكادميين الايدولجيين الفاشلين وللاسف على الرغم من المعارف التكنلوجية والادارية والسياسية التي تلقوها فى درساتهم العليا، بل على الرغم من اقامتهم ردحا من الزمن فى بلاد الفرنجة واستفادتهم من كل الامتيازات المعيشية التى وفرتها لهم هذه المجتمعات الحرة يظل اللاوعى البدائى السايكوباتى وكراهية الشعوب والحرية وتمجيد الطواغيت هو السمة غالبة فى ممارسة جهلهم النشط..بينما تتجمد كل هذه المعارف المعاصرة فى ثلاجة الوعى المعطلة ************** هناك شمعة فى نهاية الدهليز...اذا ما استطاعت القوى الحية(الديموقراطيون الحقيقيون) فى كلا من البلدين ان تستجمع صفوفها وتحتشد فى جبهة ديموقراطية موحدة لهزيمة المعوقات وتخطيها بعقل مفتوح وبرنامج علمى/بيئى/سياسي..ومتطلعة لافق جديد..ستتمكن هذه الجبهة الديموقراطية ا لموحدة والتى قوامها من كافة المثقفين من ابناء الشعب افقيا/الاعراق ورأسيا/الاديان..ان تنمى بذرة لشجرة هوية موحدة..لانه ستكون مبدعة وحرة وتتحقق فى المستقبل لا فى الماضى وتتجاوز ضعف الراسمالية البنيوي ومنفتحة على عالم جديد ومشروع متكامل لتجاوز الراسمالية الدولية ذاتها ..مهما روج لها انبياء امريكا الجدد
09-25-2009, 03:15 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: السودان بلد فقير (من غير دخول فى الاسباب الان) لكن ما مكن اقارن انجازه ببرطانيا اللى كانت مستعمراه لزمن طويل.
الاخت سمارت السودان ليس بلد فقير كما تتوهمي.....بل بلد غني جدا في كافة انواع الموارد
فقط يفتقر للحكم الرشيد والمؤسسات الاكاديمية الجادة...والمنابر الحرة والشفافية والاخلاقيات السياسيةايضا.....
اليابان شحيحة الموارد وجذر صخرية... الحمار الضكر ما يعيش فيها
وشوفيها الثانية في العالم اقتصاديا....لانهم يستخدمون عقل المعاد ونحن نستخدم عقل المعاش ونجلد المرة عشان لابسة بنطلون... وما قارنتها بالسودان قارنت السودان بي مصر القريبةدي بلد فاروق الباز
وقارنت بس السكة حديد خليك من الحاجات الكثيرةالتانية عشان كده اعرفي اليوم البتلقي فيه علماء السودان الحقيقيين في التلفزيون والمتحدثين عن التنمية والتخطيط الاستراتيجي الحقيقي والشفافية حيكون السودان ده ذى اليابان مش مصر بس واتمنى اشوف د.عمر القراي في التلفزيون..
09-25-2009, 04:55 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: طيب يا سمارت عرفت قبل كده انه الاستاذ عمل سد رشاد؟؟ ولى مابتعرفي رشاد طيب بتعرفى جبال النوبة؟...هذه هي الونسة المفيدة التي نقدمها عن السودان لمن كان له قلب او القى اسمع وهو شهيد...يمكن يجي سؤال في من سيربح المليون.. ده انجاز عملي وعلمي غير مسبوق...
ح اجيك راجعه لكل كلامك الموجه لى. لكن دى و الله ما قدرت اصبر عليها لحدى ما اجى راجعة. حقيقه ما عارفه ان الاستاذ "عمل" سد رشاد. لكن بعرف رشاد و بعرف جبال النوبة. و بما انك بتوصينى ما اتكلم فى حاجه ما بفهم فيها (ذى الانجليزى). و بما انك شكلك فاااهم فى البحث العلمى و اصوله. كدى النسالك " عمل" فى
Quote: طيب يا سمارت عرفت قبل كده انه الاستاذ عمل سد رشاد؟؟
دى معناها شنو? هل كان الاستاذ المهندس المسؤل عن المنطقة و قام "قرر" هو شخصيا ان المنطقة محتاجه سد? ام انه كان مهندس فى الحكومة و someone فى الحكومة قرر عمل السد و طلب (بضم الطاء) من الاستاذ ان يصمم السد? ام انه كان مهندس فى الحكومة و ادوه تصاميم السد و قالوا ليه: اشرف على بناء سد رشاد? ام انه كان مهندس فى الحكومة و كان فى مهندس اخر بيشرف على ب نناء السد و الاستاذ كان فى مقام الاستشارى. ارجو انك توضح الموضوع ده او ما تتكلم فى حاجه ما فاهم فيها...على الاقل اجابتى تطلع صح فى من سيربح المليون. وبناء سد متين بقى "انجاز عملي وعلمي غير مسبوق"?. الناس بتبنى سدود من الاف السنيين. فى شنو انجاز عملي وعلمي غير مسبوق فى سد رشاد انا ما عارفاه?
09-25-2009, 05:24 PM
jini jini
تاريخ التسجيل: 02-05-2002
مجموع المشاركات: 30720
انت جادى يا عادل! وكان كوز داسيها ليه! انت عارف السودان كله كيزان بس ما شاعرين بي نفسهم وانت واحد منهم هسة شغلك دا شغل كيزان و بصب فى مصلحتهم! زى النقد الزى دا يا عادل المقعدهم فوق روسينا لمن الامريكان قنعوا من ود الميرغنى وود المهدى وبقوا معاهم على طريقة المصرييين الايد اللي لى ما تقدر تعضيها بوسها وادعى عليها!! يا عادل المؤسف انك بتضرب بمصر مثل كنموذج للانجاز والله وخلقه يعلم ان مصر هى نمذج باعى الابعاد للفشل فى كل مضمار ذكرتنى للاسف السودانييين فى منتصف السبعينات يمشى مصر اسبوعين ويحكى للناس بقية السنة كلها فى اسبوعين! يا اخوى قول النمور الآسوية مثلا! الابنودى قال الكل بنحبك يا مصر واحشانى يا مصر أومال لمن كلنا بنحب مصر الخراب دا جاء منين! يا عادل يا صحبى انا من اكتر الناس متابع ليم مقروءا ومسموعا فى البي بي سي بصفة مستمرة وايضا فى الحوار المتمدن وشبكة اللادينيين العرب والتى تنشر مقالاتك باعتبارها لا دينية! ياعادل اخوى انا طول عمرى بكورك فى المنبر دا لا للدولة الدينية وبرضو كوز يمكن كوز درة وانا ما عارف! يا عادل الكتابة القطعية والانفعالية تضر بقضيتك! جنى
09-26-2009, 06:07 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: وبناء سد متين بقى "انجاز عملي وعلمي غير مسبوق"?. الناس بتبنى سدود من الاف السنيين. فى شنو انجاز عملي وعلمي غير مسبوق فى سد رشاد انا ما عارفاه?
طيب ما كان تكلمي لينا ناس الانقاذ ديل بعد عقدين من الفكر ذى الابعار ودين شيخ عار....ومعسكرات تجويدسورةالنمل في الفاشر والمجاهدين والحور العين والنكاح الجماعي بقو يعرفوالتنمية....عملو سد مروي وقدونا به قبل مايطلع واط واحد بتاع كهرباء.....كيف يكون سد مروي انجاز وسد رشاد من اساطير االاولين
يا اختنا نصحناك تتابعي الفضائيةبتاعةناشونالجوغرافيك....برنامج هيوجكونستركش....عشان تعرفي انجاز العقل البشري الجبار الذى استخلف به الانسان في الارض عبرالعالم....وتقارني الناس المتبججين الذين ياتون بعوائلهم في الفضائيةالسودانية ونحن قرينا في حنتوب ونحن قرينا في خور طقت
والاستاذ كان مهندس منفذ...والحكومة كانت ديموقراطيةبتاعةاتحاديين....وهومهندس مساحةقاعد في بيت طين عمره كله ولو كان من ناس الهكم التكاثر ديل كان بقى ملك عقارات عالمي مش سوداني بس...
وانا قلت انجاز وعرفت الانجاز وبرضه مستشفي ابراهيم مالك انجاز ومدرسةخليل عثمان في الدويم انجاز...والبلك والضو حجوج...وقائمة الشرف تطول
Quote: يا عادل المؤسف انك بتضرب بمصر مثل كنموذج للانجاز والله وخلقه يعلم ان مصر هى نمذج باعى الابعاد للفشل فى كل مضمار ذكرتنى للاسف السودانييين فى منتصف السبعينات يمشى مصر اسبوعين ويحكى للناس بقية السنة كلها فى اسبوعين!
مصر فيهاالسد العالي من 1959 والكهرباء والماء في كل شبر....وانت عندك لمبة الهبوب بين كرمة وكريمةسنين عددا مصر فيها سكة حديد مزدوجة من اسوان للاسكندرية....وانت لحدت هسه الناس يطشو بين حلفا ودنقلا ويموتو بالجوع وجلالمدن السودانية معزولةعن محيطها
القاهرة فيها مترو الانفاق مدينة في القرن الحادي والعشرين وانت عندك نفق عفراء الاتملا موية بعد مطرة الخرطوم الاخيرة
مصر دولةمستقرة وانت عندك فليار ستيت ومهددة بالفصل السابع والزوال من الوجود....كبقعة جغرافية عجزت نصف قرن لتصبح دولة
اصلو كراهية مصر وبجهل دي البرامتر بتاعتي والزول البكره مصر دون مبررات اما كوز او حزب امة
وانت يا كوز يا حزب امة
لان الكوزنة وعي ..... اماقراتك لمااكتب في المواقع التى ذكرتها شرف عظيم لي ..... بعدين يا جني البوست ده ماعنده علاقة بالدولةالدينيةوالدولةالمدنية ده علاقتو بالانجازات الحقيقية والانجازات الزائفة وقررط على كده
وعشان ما تزعل
09-26-2009, 06:36 PM
adil amin adil amin
تاريخ التسجيل: 08-01-2002
مجموع المشاركات: 36995
كان عم سعد الذى يعمل خفير فى حوض السباحة فى جامعة الخرطوم فى التمانينات مثال للانسان الامى العفيف ..كان انصارىخمس نجوم ، يضىء وجهه الطيب بنور القران ولا يملك من حطام هذه الدنيا سوى دراجة هوائية تقله لبيته في ام در مان فى ايام زهونا اليسارى واوهام النخبة التى يعانى منها طالب جامعة الخرطوم كنا نثير معه جدل _يا عم سعد الطائفية تستغلكم _لا يا ابنى نحن نعطى بطيب خاطر حتى ننال البركة فينا وفى اولادنا وفى زرعنا هؤلاء من اولياء الله الصالحين ولا يجوز تبخيسهم ثم يحتدم الجدل بيننا ..ويحسمنى الرجل الطيب الذى يبغض الانظمة الشمولية اليسارية واليمينية على حد السواء كان ديموقراطى بالفطرة _يا ابنى ياكلا الاسد ولا تاكلا الضبعة* ********* الان بعد كل هذه السنين عرفت الحقيقة الغائبة ان الانسان السودانى البسيط السليم الفطرة لا يقبل كل اشكال الايدولجيات الوافدة "الشيوعيين والكيزان والبعثيين وانصار السنة انهم فقط ختمية وانصار ولو تطورت هذه الاحزاب الامة والاتحادى وتم فصل المكتب السياسى عن العباءة الطائفية حتى يمتدا جنوبا لا ستيعاب الاخوة فى الجنوب لكانو كفونا شر الافكار المستوردة التى شوهت المتعلمين ولم تفلح ابدا فى اختراق الاميين ما عدا الكيزان/الاخوان المسلمين وذلك لاستغلالهم الدين الحنيف يا ترى ماذا يفعل هذا الرجل الابى النبيل الشجاع البر الكريم فى زمن الضبعة والجباية التى لا يواكبها اى سند روحي تحت غياهب مشروع الاخوان المسلمين الفاسد والفاشل والفاشي الذى سمي بثورة الانقاذ ............... *مثل سوداني
********** ونحيطكم علما ان عم سعد هذا هو والد العقيد محمد نور سعد قائد حركة يوليو1976
09-27-2009, 12:02 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: الان بعد كل هذه السنين عرفت الحقيقة الغائبة ان الانسان السودانى البسيط السليم الفطرة لا يقبل كل اشكال الايدولجيات الوافدة "الشيوعيين والكيزان والبعثيين وانصار السنة انهم فقط ختمية وانصار ولو تطورت هذه الاحزاب الامة والاتحادى وتم فصل المكتب السياسى عن العباءة الطائفية حتى يمتدا جنوبا لا ستيعاب الاخوة فى الجنوب لكانو كفونا شر الافكار المستوردة التى شوهت المتعلمين ولم تفلح ابدا فى اختراق الاميين ما عدا الكيزان/الاخوان المسلمين وذلك لاستغلالهم الدين الحنيفيا ترى ماذا يفعل هذا الرجل الابى النبيل الشجاع البر الكريم فى زمن الضبعة والجباية التى لا يواكبها اى سند روحي تحت غياهب مشروع الاخوان المسلمين الفاسد والفاشل والفاشي الذى سمي بثورة الانقاذ
تعقيب ده كان بوست قديم جدا في هذا البورد 2002 وتم نقله للحوار المتمدن الان بعد اربعة اعوام من اكبرانجاز سياسي اتفاقية نيفاشا2005-2011 هل يستوي حزب الامة والاتحادي مثلا؟ كما يزعم جني ويضعهما في كفة واحدة بعد المؤتمر السابع لحزب الامة وحنينه الدائم للاخوان المسلمين(المؤتمر الشعبي) واعادة انتاج الجبهة الوطنية...والعلاقة الاسرية التي تربط الامام بالشيخ...والضجر الذى دب حتى في كوادر الحزب من الداخل...من سطوة الامام وفرض رؤاه باستمرار..خروجه من التجمع-عبرجنيف ثم جبوتي ثم تهتدون ثم التوقيع مع المؤتمر الوطني ثم مبادرة اهل السودان...ثم حركة العدل والمساواة...واخيرا مؤتمر جوبا مع ثالثة الاسافي الشيوعيين..و العالق حتى الان....
كل هذه المناورات وعدم الاستقرار على حال....ستقودنا الي اين؟؟ وما الهدف منها 1- هل كشف الماضي المخزى للمؤتمر الوطني كما يزعمون...وهل هناك ماضي مشرق لحزب الامة وحزب المؤتمر الشعبي المسؤل شيخه من ابشع حقبةانقاذية(زمن التمكين)ام ماضي مشرق للحزب الشيوعي السوداني..من يدين من...على الاقل المؤتمر الوطني على سؤه له انجازات تنموية متسارعة الان... وبقي يواجه التحديات الماثلة... 2- هل لاعادة النظر في نيفاشا بعد اربعة سنوات عجاف...وبقينا على مشارف الانتخابات...نيفاشا مشكلتا عدم التزام المؤتمر الوطني بتفيذها حرفيا والالتواء المستمر حول النصوص وهو السبب المباشر الذى ادخل المؤاتمر ورئيسه تحت طائلة مجلس الامن والمحكمة الجنائية الدولية...يعني الخلل في التنفيذ اكثرمن انه في الاتفاقية..والناس ديل اصلا ما مقتنعين بنيفاشا...من الاول ولم يدعمو الحركة ابدا 3- هل من اجل تحالف انتخابي...هذه الاحزاب القديمة غير قابلة للتحالف ولا تستقر على حال ومجربة عبر العصور ..بل ان التحالف معها لا يضيف اي رصيد ايجابي للسودان الجديد 4- هل مشكلة دارفور؟؟؟....هذه خرجت عن السيطرة....ومحل حلها الدوحة وليس جوبا..وعلينا تشخصيها بدون مجاملة حتى نحلها... .......
نجي للحزب الاتحادي الديموقراطي منذ مبادرة السلام 1988 ظل موقف الحزب والسيد محمد عثمان الميرغني ثابت ومتطور ايضا عبرالتجمع ومقررات اسمرا 1995 واخيرا دعم تيفاشا والحركة غبرحكومة الوحدة الوطنية...ودعم جبهة الشرق والقوى الجديدة الاخرى...ويضع الحزب تحدي الانتخابات القادمة نصب عينيه..لايمانهم العميق بنيفاشا..وبان الانتخابات امر سابق للاستفتاء ومن الافضل وضع الحصان اما العربة وليس العكس صحيح لذلك يبقى الحليف الاستراتيجي والرصيد الايجابي الوحيد للحركةالشعبية في الشمال هو الحزب الاتحادي الديموقراطي والقوى الجديدة الداعمة للحركة الشعبية في حكومة الوحدة الوطنية...ويعتبر التجمع الوطني هو اكبر تطور لمشروع حزب سوداني حقيقي حتى الان...ويتعبر الحزب الاتحادي افضل حزب وسط لمرونته ومساحات الحرية فيه وتجرد زعيمه وبعده عن التهافت....ولا يشكل الحزب عبء على مشروع السودان الجديد والدولة المدنية..لان ليس فيه امام (ولاية الفقيه)
09-27-2009, 05:41 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: يا اختنا نصحناك تتابعي الفضائيةبتاعةناشونالجوغرافيك....برنامج هيوجكونستركش....عشان تعرفي انجاز العقل البشري الجبار الذى استخلف به الانسان في الارض عبرالعالم....وتقارني الناس المتبججين الذين ياتون بعوائلهم في الفضائيةالسودانية ونحن قرينا في حنتوب ونحن قرينا في خور طقت
Please ماتقول لى اشوف "هيوج كونستركش" تانى.انا ما محتاجه اتفرج فى تلفزيون عشان اشوف "هيوج كونستركش". انا اكل عيشى فى التخطيط و تصميم مشاريع ب بلايين الدولارات.
انت للاسف قايلنى من ناس الانقاذ عشان كده ما قادر تفكر فى اللى انا قلته ليك. يا سيدى انا ما عندى اعتراض على منصور خالد و فرانسيس دينق. انا اعتراضى على انك قررت بانهم اعظم الاكادميين السودانين. و ان الفكرة الجمهورية ما فى زيها. _______________________________ انا لما كنت فى السنة التانية الجامعة اشرفت على بناء طرمبة بنزين. ممكن اعتبر ده انجاز???
09-28-2009, 12:22 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: انا لما كنت فى السنة التانية الجامعة اشرفت على بناء طرمبة بنزين. ممكن اعتبر ده انجاز???
العزيزة سمارت سلام على قدر اهل العزم تاتي العزائم
نعم انجاز لكنه لم يؤهلك للظهور فى تلفزيون الانقاذ..لانه في 1000 طرمبة في الخرطوم
وكمان انا من عطبره مدينة السكة حديد لو مافي زول او حكومة عملت سكة حديد مزدوجة من نمولي لحلفا ومن الجنينة لبورتسودان وبقاطرات حديثة بسرعة 150 ميل في الساعة.. ما بشوف ليها ايي انجاز...وانا دارس علوم وقرات ايضا في التنمية البشرية..
اما منصور خالد وفرانسيس دينق...افضل اكاديميين والفكرة الجمهورية افضل مشروع فكري سياسي سوداني
دي حقيقة ما عايزة مغالطات ولو عنك بضاعة سودانية احسن من الناس ديل ورينا ليها...نحن قاعدين معاك لحدت الانتخابات
ولو عندك بضاعة تعالي معاي في الربع القادم بعد الارشفة البوست القادم بس عن التنمية والمشاريع الحقيقية...
Quote: سيدى انا ما عندى اعتراض على منصور خالد و فرانسيس دينق. انا اعتراضى على انك قررت بانهم اعظم الاكادميين السودانين. و ان الفكرة الجمهورية ما فى زيها.
لو في احسن من ما ذكرت اعلاه ورينا وبالوثائق عشان القصة ما تبقي ونسة ساكت
09-28-2009, 12:49 PM
adil amin adil amin
تاريخ التسجيل: 08-01-2002
مجموع المشاركات: 36995
Quote: انا اكل عيشى فى التخطيط و تصميم مشاريع ب بلايين الدولارات.
العزيزة سمارت انعم واكرم انا من زمان كايس سوداني له خيال جامح ومخطط محترف وقادر يستوعب مشاريع عظيمة في السودان تغيير وجهه الكالح الي الابد وبملايين الدولارات ولا يسرق نصها(وجه ضاحك) ويا ربي تكون اكبر من الديك ولى اصغر؟؟!!
يلى نتلاقي...في الربع القادم(عندي بوست تحفة رفعتو للربع القادم) انابجيب ليك فكرة المشروع وانت اعملي ليها دراسة جدوى
عشان نشوفك في برنامج هموم واحلام
وما تستهيني بسد مدينة رشاد ابدا...لانه في زمنو كان انجاز ولازال يدعم سكان رشاد بالماء العذب لهم ولانعامهم ويبعدهم عن حروب الموارد والهوية المهلكة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
adil amin
smart_ana2001
Hani Arabi Mohamed
عثمان عبدالقادر
jini
فيس بوك
تويتر
انستقرام
يوتيوب
بنتيريست