|
|
 ناس بيتنا...........(امى دقيقة)
|
مجموعة من المشاهد...
المشهد الاول .... حوش بيتنا
البت ... لا خبزناو لا غسلنا عدة المطبخ ولا مشينا السوق ولا
الحاجة....الحماكن شنو؟؟ مش من بدا رمضان دا انا بقول....
البت ....دقيقة امى عليك الله
الحاجة...مادقيقة ولاحاجة كل سنة تشكن ما سوينا وما فعلنا وما تركنا..
البت ... امى دقيقة عليك الله اسى مافاتت حاجة نشوف روحنا دايرين شنو ونقسم الشغل
والقصة انتهت ..
الحاجة ... ما انتهت احسبن فاضل ليكن كم يوم للعيد وشوفن خدمتكن قدر شنو؟؟
البت ..امى دقيقة
الحاجة ... حليل الدقيقة .. انتو دقيقة كانت من ضمن المقرر حق الجامعة ولاشنو..
صوت.... كع
الحاجة ... بديك الدقيقة لكن باخد ساعة لامن اخلص كلامى..
الولد المنظراتى... ديكتاتورية عديل .. المسالة استخدام صلاحيات يعنى ياحاجة؟؟
الحاجة .. سميها زى ما تسميها .....
الولد المنظراتى... ياحاجة مش اتفقنا زمان اى حاجة بالمنطق وبالاتفاق ودا كلامك انتى ما كلامى انا,,,
الحاجة.... والله انتو بحججكم الكتيرة دى تخلو الزول يغير رايو ويفقد المنطق..
الحكم ... ياحاجة تتحملى النتائج .....
الحاجة ..انت قصدك شنو ؟؟ يعنى الزول مايقول النصيحة فى البيت دا ولا شنو؟... لايقول اعوج لاعديل؟؟
الحكم ... ماقلنا حاجة لكن البنات ديل اسى ما اشتكن .. قالن ما سون خدمتن ودايرات يسونها
المشكلة وين؟ شبكتيهن انتن وانتن وزمان كنتن وين ومالكن؟؟
الحاجة ... اها سكت ونشوف بتصلو لى وين ..
الولد المشاغب ... كرت اصفر...
الحاجة ... انا لو اخدت كرت اصفر انت تنطرد برة الميدان عديل
صوت...... كع
البت ... عاينى ياحاجة من غير زعل وخلينا عمليين انتى والحكم امشو جيبو لينا حاجات الخبيز من بقالة عزالدين..
وانا وبتك العويرة دى ...
الحاجة ... بتى ماعويرة ستكن....
البت .. انا وبتك الماعويرة دى طيب نمشى السوق نجيب الستاير واللذى منو(سميناها رضينة والقرد فى عينو امو عزال رجالةكدا).... والحاجة التانية واحد من الاولاد ديل يكوى لينا الملايات..
الولد الكبير... انا غايتو بدفع ليكم القروش ... ولا بقدر اكوى ولا حاجة مع الصيام دا ..
الحاجة... ماكلنا صايمين واهو بنشتغل ...
الولد الصغير...تمااااااام خلاص انا بكوى ليكم واشيل القروش وبارك الله فى من نفع واستنفع..
البت الصغيرة.....تمام ... انا معاك يدى على يدك ونضاعف السعر...
الحاجة .... شوفو قوة العين يابنات امى؟؟تشيلو القروش ومضاعفة كمان
البت الصغيرة...امى دقيقة عليك الله...دى مكوة فايف استار/طلبة جامعيين وكدا
مرددة .. دى ماشغلتنا لكن الظروف جبرتنا ..
الحاجة.... خلاص بس حتشتغلو بمكوة الفحم
البت الصغيرة ... امى دقيقة .. كترتيها...والله
الحاجة مش دافعين ليكم قروش؟ ندفع كمان كهرباء؟ ... شفتو ليكم مكوجى شغال بمكوة كهرباء...
البت والولد الصغار .. مرددين ..دى ما شغلتنا لكن الظروف جبرتنا..
الحاجة ..الاولو شرط اخرو نور....
|
|
 
|
|
|
|
|
|
|
 Re: ناس بيتنا...........(امى دقيقة) (Re: نوفل عبد الرحيم حسن)
|
Quote: شكلك لا خبزتي لا اشتغلتي شغل البيت لا مشيتي السوق يا اميره
الصوت ... كع
كل سنه وانت طيبه |
نوفل ... كل سنة وانت طيب ...
والله يانوفل انا من كنت فى الروضة بمشى مع امى الفرن بودى صوانى الخبيز
واظن من دخلت المدرسة بخبز لحدى ما هو حصل الحصل ...
اسى لاخبيز ولا يحزنون فقط شجن ... شجن .... واجترار ذكريات
فى اللحظة دى فاقدة ريحة بيتنا شديد..
فاقدة اللمة وقولة يمة والحوش الكبير وصينية الغداء يانوفل...
اخبز وين وكيف.....ولى منو زاتو...
لو سالتنى الليلة رمضان كم يوم ما عارفة لانها بقت مافارقة ودى المشكلة
وعيدك مبارك بين اهلك وحبانك
| |
|
|
|
|
|
|
|
|
 Re: ناس بيتنا...........(امى دقيقة) (Re: Amira Elsheikh)
|
Quote: انا من كنت فى الروضة بمشى مع امى الفرن بودى صوانى الخبيز
واظن من دخلت المدرسة بخبز لحدى ما هو حصل الحصل ...
اسى لاخبيز ولا يحزنون فقط شجن ... شجن .... واجترار ذكريات |
يا حليل الخبيز الكان بودوهو الفرن يا اميرة
ويا حليل افران (تندلتى)
ويا حليل ريحة الخبيز.. ورائحة تلك الايام
العيد فى حوش العمدة - حلة قدام.. هكذا كنا ننطقها
واولاد حلة قدام..منتهى الاناقة ايام العيد.. امير الشيخ، جعفر النمير..ووووو...
يا لتلك الايام
كنا نشارك فى صناعة تلك التفاصيل.. تفاصيل الاعداد للعيد
قبل ان تصبح كل الاشياء معلبة
فى عصر ثقافة التيك اوى
للضمان انا معيد فى تندلتى.. وبعد صلاة العيد فى ميدان الحرية
سنمر فى طريقنا على بيتكم..الذى تبقت منه الذكريات وكل ذلك الشجن..
| |
|
|
|
|
|
|
|
|
 Re: ناس بيتنا...........(امى دقيقة) (Re: ياسر بيناوي)
|
| Quote: واصلي ياخ واصلي ..... |
سلام ياسر ....بيتنادا داير ليهو زول حريف فى الكتابة لانو فيهو قصص متعة على مدار ال24ساعة
المشهد التالت ..الكورة
الحاجة ....شغلو الرادى ياجماعة
صوت... شغال بس بنسمع فى عالم الرياضة
الحاجة.... طيب شغلو التلفزيون
صوت ...امى دقيقة نشوف الكورة منقولة فى ياتو قناة ...
الحاجة... طيب ناولونى واحدة من الجرايد دى
الولد الصغير... دى كلها جرايد كورة ياحاجة ما بنتفع معاك.
الحاجة ..طيب ماتعلقو ليكم لافتة فى بابكم وتكتبو عليها نادى اولاد الشيخ الرياضى..
الحكم ... لو سمتحى ياحاجة تصحيح بسيط..
نادى بنات واولاد الشيخ الرياضى....
الحاجة ياهو الفضل ....انت اصلك البنات ديل خاربن من يومن
الحكم .... طيب الغلط وين ..
الحاجة... الغلط انا دى ....ماعارفة روحى قاعدة لى فى نادى ولا فى بيت
الحكم ..نحن قلنا كدا؟؟؟
الصوت.....كع..
مشكلة الحاجة مع الكورة ..... انو فى ضحايا بعد كل مبارة .. يازول اتفلق يانطة ضربتو المروحة
ولااتكسر التلفزيون دا غير السيرة الحية البتجينا من الجيران والاهل والاصحاب ......
مرة الحاجة قالت ياهى يالكورة فى البيت دا ...(بعد شكل كتير)
الولد المشاغب قال ليها بالمرة سوقى معاك الحكم لانو بقى مرتشى وببيع كتير
المهم ضحكنا ولا الحاجة مرقت خلت البيت ولانحن خلينا تشجيع الكورة
ولازالت المباريات فى بيتنا مستمرة ...
| |
|
|
|
|
|
|
|
|
 Re: ناس بيتنا...........(امى دقيقة) (Re: Abdlaziz Eisa)
|
Quote: النقة الشريتيها لينا هنا دي كان كفت ناس البيت والجيران..
ولو ما أنك صفوة ووهاجة كمان.. لكان قلت كلام تاني..
|
عبدالعزيز ...
النبى فيك تقول وماتكتم شئ ..
كلامى عن الكورة شكلو زعلك؟؟
والله ديل ناس بيتنا وانا ما زدت حاجة من عندى
بل نقصتا..
كل سنة وانت طيب ياعزيز
| |
|
|
|
|
|
|
|
|
|
Re: ناس بيتنا...........(امى دقيقة) (Re: Omayma Alfargony)
|
Quote: مشكلة الحاجة مع الكورة ..... انو فى ضحايا بعد كل مبارة .. يازول اتفلق يانطة ضربتو المروحة
ولااتكسر التلفزيون دا غير السيرة الحية البتجينا من الجيران والاهل والاصحاب ...... |
دي مشكلتكم ..
القال ليكم كونوا كلكم مريخاب منو ؟؟
أها طولوا سقف البيت عشان الجايِ لسع حا يفلق روسينكم 
| |
|
|
|
|
|
|
|
|
|
Re: ناس بيتنا...........(امى دقيقة) (Re: عمران حسن صالح)
|
اميرة مشاهد حية لتحضيرات العيد
انا كل سنة يوم الوقفة بجوط البيت كلو واصحي للصباح بكون جاهز ..
اها المرة دي من امس واقفة ليك للبنات الشغالات الف احمر لمن انتهوا
نظام انا البت الوحيدة وكدة ..
اها هسة جاهزين .. العيد متين ؟؟
كل سنة وانتي طيبة ومحبة كبيرة ليك ولي ناس بيتكم ..
| |
|
|
|
|
|
|
|
|
|
Re: ناس بيتنا...........(امى دقيقة) (Re: Amira Elsheikh)
|
رأفت ميلاد سلام ..
دا من شوقى لناس بيتنا ...
النقاشات funny دى يتحصل بشكل يومى فى بيتنا وبمحبة شديدة وفيها كثير من المتعة والاريحية
وكل زول فى بيتنا بلعب مجموعة من الادوار..مرة حكم... مرة كابتن الفريق...مرة المدرب....ومرة الجمهور ...
المهم الحاجات بتمشى بكثير من الاثارة ...... كل يوم قادرين نصنع احداث ونتفاعل معاها
وكثير من المؤمرات فى راس كل ساعة وعادى ممكن نطرد الحكم ومدرب الفريق ...
بصراحة بيت فيهو مجمومة مشاغبين وامى مسميانها اباليس برتبة بنى ادمين .
كابتن الفريق والحكم عادى بشيلو كورتهم ويشتتوو ... لانو لو طردو مننا لاعب نهائى ما بنطلع من الميدان .. غتاتة شديدة....
بيتنا ياسادتى استقبل الجيل الاول من الاحفاد وهم اولاد الولد الكبير... ياسر امير الشيخ/سنتين...ريناد امير الشيخ /15يوم....
وصلتنى شمارات انو الوضع صار اكثر تعقيدا لانو ياسر صاحب السنتين انضم للعصابة....
وامى بقت تتلقى الاومر منو عااااادى ودا على ذمة الولد المشاغب..
بمناسبة امى بقت حبوية والعيد على الابواب ...
بقول ليك .. ربنا يديك الصحة والعافية بقدر محبتك ..تسامحك .. طولة بالك ...حكمتك....
صبرك...قوتك ..سعة صدرك وبيتك المفتوح للكل ...بقدر دعواتك لينا فى كل صباح ومع كل صلاة ....
انو ربنا يقتينا ويوقينا ويجعل لينا فى كل خطوة سلامة..
يديك الفى نيتك... لاكليتى لامليتى.... صبرتى على مجموعة من المشاغبين والغلباوين الاباليس..
متعددى الامزجة والاهتمامات....
نحن كلنا بنقول ليك دقيقة ياامى... مابتكفى كلمة بحبك وكل كلمات الغرام
ليك مننا كل المحبة والتقدير ....
التوقيع... المشاغبين ومعانا الحكم زاتو..
كل سنة وانتى طيبة ياحبوبة ياسر وريناد....
| |
|
|
|
|
|
|
|
|
|
Re: ناس بيتنا...........(امى دقيقة) (Re: Amira Elsheikh)
|
Quote: فى اللحظة دى فاقدة ريحة بيتنا شديد..
فاقدة اللمة وقولة يمة والحوش الكبير وصينية الغداء يانوفل... |
في حياتي عيدته برا البيت مره واحده .. وكان طعم العيد فيها كيف .. كيف
كلماتك واندياحك دا خلاني احس بأحساس كيف .. كيف
حسيت بحسسك فيهو ... وبرضر الباقي لسه كيف .. كيف
| |
|
|
|
|
|
|
|
|
|
Re: ناس بيتنا...........(امى دقيقة) (Re: نوفل عبد الرحيم حسن)
|
Quote: في حياتي عيدته برا البيت مره واحده .. وكان طعم العيد فيها كيف .. كيف
كلماتك واندياحك دا خلاني احس بأحساس كيف .. كيف
حسيت بحسسك فيهو ... وبرضر الباقي لسه كيف .. كيف |
نوفل ....
تعرف لمة العيد هى الكونكلوشن بتاع السنة ....
مابتعادلها اى لحظة تانية فى الدنيا ..
فى كل عيد نستقبل و نودع عشرات الناس فى اليوم والالف الكلمات والعبارات المن القلب
بتسمعها من كل زول ولحظتها بجيك احساس بالامان ..حتى نومة النهار يوم العيد احساسها مختلف
تنوم وتقوم ..تقول كانك ما نمت قبل كدا ...
كل حاجة ليها طعم ...
قبل ما اجى هنا ولا مرة ماعيدتها برة من بيتنا ...لكن اهو الله وهى حكمتو ...
اتمنى ما تطول الغربة ....شان ماتفقد الاشياء طعمها
| |
|
|
|
|
|
|
|
|
|
Re: ناس بيتنا...........(امى دقيقة) (Re: Amira Elsheikh)
|
Quote: عبدالعزيز ...
النبى فيك تقول وماتكتم شئ ..
كلامى عن الكورة شكلو زعلك؟؟
والله ديل ناس بيتنا وانا ما زدت حاجة من عندى
بل نقصتا..
كل سنة وانت طيب ياعزيز |
أميرة الصفوية
نحن في العشر الأواخر .. يعني أخلي شئ للعيد بدل ما أقوله كل هنا.. صح!!
بعدين مين قال لك زعلان.. أنا في الكورة دي ما بزعل إلا لما المريخ ينهزم من الهليل..
بيتكم والله بيت رائع وملئ بالإبداعات..
وأمك دي بعد تحملها لشقاوة الشياطين الآدمية دي.. لازم تترشح لجائزة الأم المثالية!!
وأصمم ليك لافتة باسم: نـادي الشيخ الرياضي..
وعضوية من رناد وحتى الحبوبة!!
كل سنة وانتم بخير
وتحية للأم المثابرة..
| |
|
|
|
|
|
|
|
|
|
Re: ناس بيتنا...........(امى دقيقة) (Re: طارق جبريل)
|
Quote: يا بت الشيخ مالك علينا ياخ
هي مرارتنا براها مفقوعة |
طارق يا ودجبريل ....
والله بكتب فى الكلام وانت فى بالى يشهد الله
بحس اننا اول مشترك جرسة وحنين للاهل والصحبة ....
ربنا يديك الصحة والعافية .....ويكملك بجرستك
| |
|
|
|
|
|
|
|
|
|
Re: ناس بيتنا...........(امى دقيقة) (Re: Amira Elsheikh)
|
Quote:
تعرف يا عزيز ...
الامهات ديل لو حاولنا ننصفهم ما بنقدر ... صعب.. صعب ...
دينهم فى رقبتنا....الى ان تقوم الساعة....
والله مرات كتيرة بحس بامى دى حتى ونحن كويسن وناجحين ومستقرين هى شايلة همنا ..
ولاحظت دا بعد ما اخوى جاب اولاد ... بدات تربى من جديد والله العظيم حتى ولد امير
بناديها امى وبتقول لى انا كلمة امى دى عندى بالدنيا كلها ...
قلت ليها انت تااااانى حتربى .؟؟؟ ماتبتى...؟ قالت بالعكس انا يادوب اخدت خبرة واتعلمت كويس ...
تخيل.....؟
|
يا بت الشيخ
خبزتوا!!... الكلمة نستني أنا وين هسي!!
سنين مع ناس آسيا ديل.. ما عندهم حاجاتنا دي..
في بيوتات متخصصة في صناعة الخبيز بكل المواصفات..
وتجدي الناس من أول شعبان بيعملوا حجوزاتهم من الكيك..
وست البيت الخبازة عندها دفتر كبير تسجل طلبات الناس المتنوعة وما دفعوه من عربون (ديبوسيت بكلامكم يا افندية).. وتبدأ عمليات استلام الخبيز من الأسبوع الأول في رمضان حتى صباح العيد.. وتلقاها زي الترزية.. سهر في سهر..
ما نسيت حق الأمهات..
وطبعا ما حأقدر أوفيه مهما حكيت وحكيت..
يوم الإثنين الماضي 14/9 وافق الذكرى السنوية السادسة عشر لرحيل والدتي عليها رحمة الله..
فكل حديث يتطرق إلى الأم يحسسني بألم فراقها وفي نفس الوقت أفرح لكل شخص يحب أمه ويبرها..
فالأم هي أغلى انسان في أي بيت على الإطلاق..
وكتير تنتابني فكرة عمل بوست أو أسبوع للأم في المنبر..
في رجاء مني أن تغني ليها..
أمي.. أمي
أمي يا أمي يا أمي..
أمي يا أحلى قصيد يا نغمة حنونة...
| |
|
|
|
|
|
|
|
|
|
Re: ناس بيتنا...........(امى دقيقة) (Re: GamarBoBa)
|
أميرة دقيقة
أو دقيقة أميرة
ذكرتيني العيد والله
الشي العارفو إنو العيد ما كان كدي
كان كائن حي ودافي ومن زوات الثدي كمان
كان فيهو ناس بتجيك عشان دايرين يجوك موش خايفين اللوم
كان فيهو همة وحركة وفرحة غادرتنا إلى غير دوحة
بس وين ما عارف والله
دقيقة أميرة
نحنا زمان كنا بنفرح بيهو شديد .. هسي الحصل شنو
عني يا أميرة والله على ما أوق شهيد.. فرحان بي الإجازة أكتر من المناسبة
الصلاة هنا يا أميرة بعد الصبح طوالي, تقول السلام عليكم تمد يدك لليمينك ولليسارك
والسرير جاك زول, سبحانك !
كنا بنقطع المية متر في ساعة يا أميرة , من المصلى للبيت بنصل الضهر
هسي في شنو وفي منو ومع منو ولي منو وكيفن وليي وياتو وهو منو ودا شنو ؟
الله في يا أميرة
أنا بديك دقيقة تردي علي
لكن ساعة ما تقاطعي بكاي
| |
|
|
|
|
|
|
|
|
|
Re: ناس بيتنا...........(امى دقيقة) (Re: GamarBoBa)
|
Quote: أميرة!
باقي ليك بنط وتقدي السلك
الريال والخبيز ديل ما بتلموا
يا هنا يا هناك
فاتحة لينا فرن وقاعدة هنا
___
كل سنة وانتي واهلك بالف خير وينعاد عليكم العيد |
انت اصلك ما بتقول كلام كويس ؟؟؟
ريال فى عينك .....
كل سنة وانت وناس بيتكم جيرانكم واصحابكم بخير وعافية ..
-________________________________________________________
لو الحال استمر كدا يانى القادة سلك قريب
| |
|
|
|
|
|
|
|
|
|
Re: ناس بيتنا...........(امى دقيقة) (Re: محمد ابو القاسم)
|
***
**
*
اميره يا بت الشيخ
وصلت الى هذا البوست
ورمضان قد لفظ انفاسة الاخيرة
والعيد برضو
بالمناسبة العيد هناك فى اقصى الغرب
قد ذهب ايضا
وضاعت حتى فرحة الاجازة فقد صادف عيد هذاالعام
يوم الاحد والذى هو عيد النصارى بدون منازع..
ومن بكره كل الى دوامه كما يقولون فى دوحتكم اليانعة
وخشمم ملح ملح .. والمغنى لم يكمل المقطع الاول من اغنيتة
الشهيرة التى يرد بها على الشاعر الشهير
الذى قال باى حال عدت يا عيد ...
والموسيقى لازالت تلعب المقطع الاول الذى يقول
جانا العيد وانت بعيد..
....
.....
.........
............
ابقوا معنا سنعود بعد الفاصل
..
.....
فى المشهد كم من الاعلانات السمجة
من ضمنها
اعلان زيت طعام يجعل النساء فى وطنى
يتراقصن من لا شى واكيداذا خبيز بنات بلدى
بمثل هذا فعلى الدنيا السلام
...
اذا عتم تمام سنعود من مشوارنا
لنكمل الكلام الهام
*
**
******
| |
|
|
|
|
|
|
|
|
|
Re: ناس بيتنا...........(امى دقيقة) (Re: فاروق أبوحوه)
|
الى كل الاصدقاء الاعزاء ...
عيدكم مبارك وكل سنة وانت طيبين وتامين ولامين والنفوس
متصافية .....
هنا العيد ماعيد ....
صحيت اول يوم فى العيد ... لاشفت كعك ولاشفت ملاية جديدة اتفرشت
ولا ناس طالعين ماشين الصلاة ولا شفع جو داخلين عيدو وباركو
ولاحتى زول يقول ليك كل سنة وانت طيب ...
ومشيت الشغل عادى ..... وكانو بحاولو ياكدو لى انو مافى عيد
تلفونات ورسائل الاصدقاء والاهل هى الكانت بتقول لى ايوة فى عيد ...
ايوة فى عيد.....
العيد مبارك عليكم
| |
|
|
|
|
|
|
|
|
|
Re: ناس بيتنا...........(امى دقيقة) (Re: فاروق أبوحوه)
|
Quote: فقدتوها المنطق ؟؟
عاد يا أميره تسويلكم شنو..؟؟
الله يديها العافية
وعيدك مبارك |
فاروق ... كل سنة وانت طيب ....
تخيل امنا دى ما بتفقد المنطق بسهولة ... لانها حكيمة
وفى اغلب الاوقات بنكون متامرين عليها كلنا شان نشوف مدى صبرها
وكلنا بنطلع مغلوبين 3/صفر امام حكمتها ....
يا الله يا امى لو تعرفى مشتاقة ليك ومحتاجاك قدر شنو
تسلم يا فاروق
| |
|
|
|
|
|
|
|
|
|
Re: ناس بيتنا...........(امى دقيقة) (Re: مدثر قرجاج)
|
Quote: جاء العيد ومضى وانتهى مشهد طالما ننتظره كل عام
لنتبادل فيه الامانى الطيبات تبادلناها اليوم كالعاده،
تبدو جميله ومستحيله تذكرت هذا المشهد قبل يومين والبيت
مقلوب وكل شى ليس فى مكانه من اجل الترتيب ولا ابالغ اننى
خلال تلك الايام التى سبقت العيد احسست بمزيحا من االسعاده وسعت
الامانى واليوم فى صباح العيد اذداد هذا الشعور فى دواخلى وكبرت
كراعى من الفرح وانا ازور الاهل والجيران اتقبل التهانى والامانى ......
الان انتهى العيد وتلاشت تلك الامانى ولم تبقى غير امنية واحده دعونانعض
عليها بالنواجذوهى امنية العافيه والصحة
كل سنة والجميع بصحة وعافيه
|
مدثر قرجاج ...كل سنة وانت طيب ...
اهو دا العيد بالضبط تنتظرو وتتبادل التهانى مع القريب والبعيد
اهودا العيد تتذكر خالتك او عمتك الليك كم شهر ما شفتها تزورها وتتطيب
خاطرها وهى تدعو ليك بالصحة والعافية ..
بالعكس الامانى ما اتلاشت بقدر ما هى استقرت فى مكان ما جوااك وفى انتظار
العيد برضو .......
ربنا يديك الصحة والعافية
| |
|
|
|
|
|
|
|
|
|
Re: ناس بيتنا...........(امى دقيقة) (Re: sumah)
|
Quote: ومن بكره كل الى دوامه كما يقولون فى دوحتكم اليانعة
وخشمم ملح ملح .. والمغنى لم يكمل المقطع الاول من اغنيتة
الشهيرة التى يرد بها على الشاعر الشهير
الذى قال باى حال عدت يا عيد ...
والموسيقى لازالت تلعب المقطع الاول الذى يقول
جانا العيد وانت بعيد..
....
|
سمعة ...كل سنة وانت طيب ..
من بكرة شنو؟؟ انا من اول امس فى دوامهم وخشمى ملح ملح من يوم
فارقت اعز الناس وخشمى ملح من يوم فارقت صينية الغداء ودعوات امى وانا جنبها فى المصلاية
خشمى ملح ملح من يوم فارقت الشمس البتضربنى كل يوم فى نص الحوش واكر السرير كرررر لحد ضل
الحيطة ...خشمى ملح وملح وملح
| |
|
|
|
|
|
|
|
|
|
Re: ناس بيتنا...........(امى دقيقة) (Re: محمد ابو القاسم)
|
Quote: زولة من داك الزمان
اميرة الشيخ
كل سنة وانتي طيبة
ورد الله غربتك
مع ودي وسلامي
وتمتد الرؤيا بعد الرؤيا الي الابد |
محمدابو القاسم .....
كل سنة وانت طيب واهلك ....
ربنا يديك الصحة والعافية .....
مشتاقين ..... كتير
تحياتى
| |
|
|
|
|
|
|
|
|
|
Re: ناس بيتنا...........(امى دقيقة) (Re: Amira Elsheikh)
|
اميرة
كل سنة وانت طيبة
حضرت العيد هناك فى تندلتى
وصلينا فى ميدان الحرية.. ولاقينا كل الناس الذين جاءوا من الخرطوم ومن (بره)
ويا حليل لما كان الناس بجو من بره
يا هو طعم العيد.. ويا ها الشوارع.. ويا هم الناس زااتم.. تظهر على محياهم آثار هذه
السنوات العجاف من عمر السودان..
مشينا حلة قدام وعيدنا على الناس فى حوش العمدة.. كل الناس يا اميرة
السوق اتعولم شدييد طبعاً.. موش السوق الكان فيهو دكان ابو نظارات ودكان محمد سيد داك
عشرات البقالات الحديثة بدل بقالة عبد الله عمر الحديثة جداً فى ذلك الوقت
تغيرت ملامح المدينة القديمة..بعضها للاحسن .. وكثير منها للاسوأ للاسف.. وهذ حديث ربما اعود اليه
وحدها ريحة التراب وطعم تلك الايام الخوالى
انا مسعدابى.. الشفة بت الشيخ المنصور زوجة ادريس الفضل تبقى عمتى
اخوى الكبير استاذ احمد السنوسى واخوى الاكبر منى د. عبد الرازق
امير الشيخ صاحبى واتزاملنا فى تندلتى الشرقية المتوسطة
عيد سعيد ونلتقى
| |
|
|
|
|
|
|
|
|
|
Re: ناس بيتنا...........(امى دقيقة) (Re: حسن سنوسى)
|
| Quote: وحدها ريحة التراب وطعم تلك الايام الخوالى |
وحدها ريحة التراب وطعم تلك الايام الخوالى
وحدها ريحة التراب وطعم تلك الايام الخوالى
وحدها ريحة التراب وطعم تلك الايام الخوالى
وحدها ريحة التراب وطعم تلك الايام الخوالى
تسلم يا حسن وعرفتك تب ما بعيد يعنى لحم ودم .....
بجيك كمان راجعة تانى
| |
|
|
|
|
|
|
|
|
|
Re: ناس بيتنا...........(امى دقيقة) (Re: Abdlaziz Eisa)
|
Quote: سنين مع ناس آسيا ديل.. ما عندهم حاجاتنا دي..
في بيوتات متخصصة في صناعة الخبيز بكل المواصفات..
وتجدي الناس من أول شعبان بيعملوا حجوزاتهم من الكيك..
وست البيت الخبازة عندها دفتر كبير تسجل طلبات الناس المتنوعة وما دفعوه من عربون (ديبوسيت بكلامكم يا افندية).. وتبدأ عمليات استلام الخبيز من الأسبوع الأول في رمضان حتى صباح العيد.. وتلقاها زي الترزية.. سهر في سهر..
|
عبدالعزيز سلام....
تعرف نفس الافكار بدات تظهر فى السودان ويبدوانو انا الناس عاجباها
وشايفاها مظهر من مظاهر التمدن والقشرات العمياء ... فى بلدان زى اسيا او اوامريكا
ممكن لكن طبيعة مجنمعنا مسالة اللمة والتجهيز يعتبر فرصة من فرصة التواصل ... يعنى لمة خبيز
عندها الف معنى ومعنى ..... وانا بشوفها فيها مظهر من مظاهر المشاركة وخلق نوع من العلاقات
يعنى مسالة تمشى تجيب الدقيقة دى قصة ومراحل الخبيز لحدى الفرن ... ولحدى ما تشيل وتضوق الجيران
انا غايتوتقليدية شديد .. مسالة شراء الخبيز والدليفرى ومظاهر التعولم دى ما نافعة معاى اطلاقا
ووربنا يرحم الست الوالدة ويحسن اليها والبركة فيكم انتو
| |
|
|
|
|
|
|
|
|
|
Re: ناس بيتنا...........(امى دقيقة) (Re: Amira Elsheikh)
|
كلمات الشاعر
محجوب شريف
ألحان
شمت محمد نور
.........
صباح الخير مساء النور يا ست البيت
وست المكتب الفاتح على الجمهور
ختم الدولة جنبك هيبة قط لم تقبلى المصرور
حلال وبلال عليك يا أم مرتب بالتعب ممهور
وساعة رضاعة أجمل من سياحة شهور
النوم النوم نوم وتعال
اخر من تنومى وتقومى دغش بدرى قبل الشمس
ما تترك سرير النوم ويغادر عشتو العصفور
تحرسيها اللبينة تفور
تسوى الشاى يا ألاهى يا ألاهى كم من سندوتش فطور
للمتحنة والبهاتى جارى يحصل الطابور
وبرضو وراك مستنيك هم دفتر غياب وحضور
لفحنا العمة وخليناك بين الحلة والماسورة
رتبتى القميص والطرحة حفظتى النشيد والسورة
ولتعب البخلى الصورة فى عينك أجمل صورة
ديك الحجلة وداك البلى ياما تشرى ياما تبلى
ما بتكلى ما بتملى ما بنقص حنانك ملى
هل هذا عمل مأجور
ممرضة سسترة ودكتورة
توب السهرة ابيض ناصع بين الضاير نور
مدرسة حيث مدرستك
حنانك سور
كراريس الصبا الباكر تذاكر نحو بكرة مرور
سلاما عمتى الفراشة
المقشاشة جنبك كم بشوفة زهور
بت الشدة والوردية والمكنة التى ليلا ونهار تدور
تحت الشمس فى الحواشة
بين الحبة والزرزور
كليلك كليلك جمبك الكمبيوتر تكية
صبح الشاشة ياخد من عيونك نور
بين الكادحين وغلابة والعزابة
ست الكسرة أحب القرقريبة
القرقريبة .. القرقريبة قريبة فى أيدك فراشة تدور
والهبابة والعرق البنقط داك ذى قمرية فوق السور
تغازل فى الضحى النقاع
عشة وميرى مدرسة الحياة المعمورة
لا كراس ولا سبورة لا تقرير سمح رقاقى لا دبورة
تحيى تعيشى لا مقهورة لامنهورة
لا خاطر جناك مكسور بل مستورة
يا ذات الضرا المستور
سلاما يا غزالات العمل والبيت ملاياتك ضفاف النيل
هذا الحوش احب واديك و
أحب الشاى مع القرقوش
احب المستك الفواح
اهيم فى غمرة النعناع
بن ومدق وجمرو تسخن الايقاع
سلاماً يا نساء الارض قاطبة فى كل مكان
شكرا محجوب شريف وشكرا شمت محمد نور...
______________________________________________
شكرا حسين محى الدين وياريت تنزل لينا الاغنية دى
| |
|
|
|
|
|
|
|
|
|
Re: ناس بيتنا...........(امى دقيقة) (Re: انعام عبد الحفيظ)
|
Quote: عبدالعزيز سلام....
تعرف نفس الافكار بدات تظهر فى السودان ويبدوانو انا الناس عاجباها
وشايفاها مظهر من مظاهر التمدن والقشرات العمياء ... فى بلدان زى اسيا او اوامريكا
ممكن لكن طبيعة مجنمعنا مسالة اللمة والتجهيز يعتبر فرصة من فرصة التواصل ... يعنى لمة خبيز
عندها الف معنى ومعنى ..... وانا بشوفها فيها مظهر من مظاهر المشاركة وخلق نوع من العلاقات
يعنى مسالة تمشى تجيب الدقيقة دى قصة ومراحل الخبيز لحدى الفرن ... ولحدى ما تشيل وتضوق الجيران
انا غايتوتقليدية شديد .. مسالة شراء الخبيز والدليفرى ومظاهر التعولم دى ما نافعة معاى اطلاقا
ووربنا يرحم الست الوالدة ويحسن اليها والبركة فيكم انتو |
العزيزة/ بت الشيخ
سلام
مجتمعنا بيحفل بكثير من الحاجات الجميلة والما من مفترض تموت او تختفي مهما يحصل من تداخل لثقافات الغير.. لدينا أشياء جميلة وقوية تصارع وتصرع ثقافات الآخرين.. لكن للأسف ناسنا دائما بينبهروا بالأجنبي بغض النظر عن سلبية وتخلفه عنا..
من عاداتنا ومن مظاهرنا الجميلة اللمة.. وهي تعني النفير... التعاون والمساعدة بجانب ما ذكرتيه من خلق وتقوية أواصر الصداقة والعلاقات بين الناس..
لمة عواسة الآبرئ..
لمة الخبيز..
لمة عمل حنة العروس..
والكثير الكثير من اللمات الجميلة ..
كلمة تقليدية بيقولوها بعض الناس عشان يكسروا بيها همة ونشاط الزول.. يعني حسد عديل كدا..!!
تحياتي
عبدالعزيز
| |
|
|
|
|
|
|
| |
نوفل عبد الرحيم حسن
Elmosley
ياسر بيناوي
Omayma Alfargony
Abdlaziz Eisa
عمران حسن صالح
ASHRAF MUSTAFA
انعام حيمورة
smart_ana2001
رأفت ميلاد
حبيب نورة
محمد البشرى الخضر
محمد عبد الماجد الصايم
heba Elmahi
طارق جبريل
tarig almakki
عماد الشبلي
keiga2000
خدر
محمد ابو القاسم
sumah
مدثر قرجاج
فاروق أبوحوه
naeem ali
انعام عبد الحفيظ
فيس بوك
تويتر
انستقرام
يوتيوب
بنتيريست