الكاف يوجه ضربة جديدة للمريخ.......متي يرجع أهل المريخ للعب من داخل الملعب

Quote: في اجتماعها امس بكامل اعضائها لجنة الحكام »بالكاف« تشيد بحكام دورى الابطال خبراء التحكيم يؤكدون : الحكم الكاميروني لم يظلم المريخ ولم يجامل زيسكو كتب : عبده فزع أكد الدكتور كمال شداد رئيس الاتحاد العام في تصريحات خاصة لـ »قوون« والتي هاتفته في الساعات الاولى من فجر اليوم بعد وصوله الى القاهرة للمشاركة في اجتماعات الاتحاد الافريقي لكرة القدم »الكاف« انه علم من الاستاذ مجدي شمس الدين بعد ان التقاه مساء امس ان لجنة التحكيم »بالكاف« عقدت اجتماعاً امس وبكامل اعضائها بحثت خلاله كل الشكاوي المقدمة من الاندية المشاركة في دوري المجموعات الافريقي ضد الحكام وقامت بمراجعة تقارير مراقبي المباريات ومشاهدة شرائط الفيديو للمباريات مثار الشكوى ومن بينها مباراة المريخ السوداني وزيسكو الزامبي وقد امنت اللجنة على تقارير مراقبي المباريات حول اداء الحكام وحصول اقل حكم على نسبة ٩ درجات وأكدت اللجنة على تقريرها الكامل لاداء الحكام الذين شاركوا في ادارة مباريات ناديي القمة الكروية الهلال والمريخ بالسودان وحرصها على الاشادة بجهود كافة خبراء التحكيم في اللجنة على أن الحكم الكاميروني الذي ادار لقاء المريخ وزيسكو ادار المباراة بكفاءة عالية ولم يظلم المريخ ولم يجامل زيسكو .

Quote: اخا وبتاع الهلال وكانو برضو 9 /10

Quote: محكمة... رفعت الجلسة...!! عندما قلنا ان الإعلام الأحمر يسوق جماهيره للتمسك بالسراب كنا محقين فيما نقول.. قلنا لهم إن تمسك المريخ بشكواه ضد الهلال لا طائل وراءه.. قلنا لهم إن الهلال صاحب الاسم الكبير والتاريخ الناصع لا يمكن أن يكون مزورا.. قلنا لهم إن إدارة الهلال التي جعلت من (المسكوت عنه) أمرا واقعا سخروا من كتاباتنا.. وعندما قال الاستاذ عماد الطيب قولته المشهور (جاهزون لفتح مدرسة لتعليم الآخرين القانون) غضب أهل المريخ وظنوا أن الرجل أراد أن يستفز مشاعرهم.. ولكنها الحقيقة التي يسعى أهل المريخ على الدوام لإخفائها عن أنفسهم وعن جماهيرهم التي عاشت الوهم الكبير وَهْم أن يكسبوا الاستئناف الذي قدموه بعد أن رفضت شكواهم أو ان الاتحاد الأفريقي لم يكلف نفسة مشقة البحث والتحري عن الشكوى باعتبار أنها لم تكتب في الأورنيك الأصفر.. تصدقوا ناس المريخ الما عارفين وما ناقشين أي حاجه في القانون كتبوا الشكوى في ورق مروس بترويسة نادي المريخ قايلين الاتحاد الذي قدموا له الشكوى هو اتحاد البان جديد..! رفضت الشكوى وبات الإعلام الأحمر يحدث جماهيره عن يوم الخامس من سبتمبر موعد انعقاد اللجنة المنظمة للكاف للنظر في الاستئناف.. والله جد ناس المريخ ديل مساكين بشكل يا خي ديل ما عارفين الشكوى بقدموها كيف وما عارفين موعد انعقاد اللجنة المنظمة وبرضوا بوهموا في جماهيرهم بعبارتهم المشروخة يوم 5 قرررررررررب.. أها اللجنة المنظمة ما انتظرت يوم 5 وانعقدت يوم 3 وأصدرت القرار ورفضت شكوى كانو بيلرز باعتبار (المحرش ما بكاتل) ولأنو ناس كانو ديل ما عارفين حاجة.. ناس المريخ قالوا ليهم اشتكوا بس لازم تركزوا في الأورنيك الأصفر.. أها ناس كانو طلعوا مساكين زي ناس المريخ صدقوا انو الموضوع بس متعلق بالأورنيك الأصفر قاموا جابوا الاورنيك الاصفر وقدموا الشكوى قايلين ناس الاتحاد الأفريقي ديل ما عارفين...! إنتو طبعا عارفين إنو مجدي شمس الدين سكرتير الاتحاد السوداني وهو رئيس لجنة التسجيلات التي اعتمدت الثنائي سادومبا وكابوندي.. في اجتماع لجنة التسجيلات بالاتحاد السوداني مجدي اقر بصحة التسجيلات.. قامت لجنة التسجيلات رفعتها للاتحاد السوداني للمناقشة وطبعا مجدي رئيس لجنة التسجيلات كان قاعد في الاجتماع بتاع الاتحاد بوصفه سكرتيرا للاتحاد.. الاتحاد السوداني أقر بصحة قرار لجنة التسجيلات التي يترأسها مجدي.. قاموا ناس المريخ رفعوا الشكوى للاتحاد الأفريقي ناس الاتحاد الأفريقي رفضوا الشكوى.. قاموا ناس المريخ استأنفوا القرار قامت اللجنة المنظمة للاتحاد الأفريقي اجتمعت امبارح بحضور مجدي ايضا.. مش مجدي عضو في لجنة المسابقات بالاتحاد الأفريقي؟ قامت لجنة المسابقات التي يحتل فيها مجدي العضوية رفضت شكوى كانو.. بس اللجنة قبل ما ترفض الشكوى سألت مجدي سكرتير الاتحاد السوداني: تسجيلاتكم لسادومبا وكابوندي صاح؟ قام مجدي قال ليهم صاح بنسبة مليون المائة.. قاموا ناس الاتحاد الأفريقي طلعوا القرار ورفضوا الشكوى اعتمادا على إفادة سكرتير الاتحاد السوداني.. رفعت الجلسة..!! سبق وأن قلنا إن الإعلام الأحمر أثار موضوع شكوى سادومبا وكابوندي لصرف أنظار أهل المريخ عن فقدانهم لبطولة سيكافا التي استضافوها من أجل الحصول عليها وعندما فشلوا في تحقيقها قالوا لا بأس من عملية تخدير سريعة لجماهيرنا المسكينة.. وبالفعل ما في أي صحفي ناقش عبر الصحف الأسباب التي أدت لفقدان المريخ لهذه البطولة فساروا في غيهم لتكون النتيجة أن المريخ يحتل الآن المركز الاخير في روليت مجموعته ليس ذلك فحسب فالفريق لم يكسب أي مباراة حتى الآن.. ليس هذا فحسب فالمريخ هو الفريق الوحيد في المجموعتين الذي فشل في تحقيق فوز واحد على أرضه.. ده كلو بسبب هذا الإعلام المضلل الذي يعشق الغش والخداع بالنسبة لجماهيره الملغوبة على أمرها...! رفعت الجلسة..!! يا خي قبل كده قلنا وأكدنا ان مثل هذه المسائل التي تتعلق بإجراءات الإعارة مرجعيتها الأولى والأخيرة تبنى على ما تقدمه الاتحادات الوطنية من دفوعات ومستندات فيما يتعلق بالإجراءات القانونية التي اتبعها بشأن الإعارة والطبيعي أن يثبت الاتحاد السوداني بالمستندات صحة ما قام به من اجراءات..! رفعت الجلسة..!! الآن أوصد الاتحاد الأفريقي الباب بعد رفضه لشكوى كانو بيلارز (موضوعا) بعدما كان قد رفض شكوى المريخ (شكلا )..! رفعت الجلسة...!! أخيراً.. أخيراً..!! رسالة إلى الامين العام لمجلس إدارة نادي الهلال الاستاذ المحامي عماد الطيب: أخي سألتك بالله أن تسرع في فتح مدرسة تعليم أصول القانون لكافة الأندية السودانية التي لا تدرك ماهية القانون والكيفية التي تتبع في تقديم الشكاوي..! طبعا إنت يا عماد عارف ناس المريخ ديل أخوانا وجيرانا كمان فالبداية عايزنها تكون منهم مش السكرتير بتاعم خارج السودان من فترة طويلة وفي واحد برلوم في العمل الإداري قائم بأعباء السكرتارية؟ أنا عايز البدايه تكون بيهو.. نحن عارفين انو المسألة صعبه شديد عليهو لكن نشوف العقلاء بالمريخ يقنعوه بدخول مدرسة الهلال لتعليم أصول القانون وتقديم الشكاوي..!! رفعت الجلسة..!! أساتذة الهلال فتحوا المسكوت عنه.. قاموا البرالمه على طريقة الثقيل خالد عزالدين استفادوا من الدروس المجانية التي قدمها الهلال قاموا سجلوا الدافي.. والدافي ده هسع احسن واحد فيهم.. أي زول مريخابي بقي يقول الدافي وبس الباقين مشوا وين ما عارف وين كلتشي ووين الضباح ووييين الملايين؟ اقصد وين وارغو الماسورة بحسب افادة الأخ حسن محجوب؟..!! رفعت الجلسة..!! أخيراً جداً..!! بعد قرار الكاف برفض شكوى كانو بيلارز (المحرش) اقترح علي الأخ الحبيب مزمل أبو القاسم أن يركز في شكوى حبيب البلد يمكن يلقى حاجة..! رفعت الجلسة..!! هلال مريخ في الحادي عشر من سبتمبر طبعا ناس المريخ عارفين التاريخ ده كويس وعلى جماهير الهلال المعلمة ان تجهز (التابوت) يعني نحن حقيقة بقينا نتفاءل بإبداعات جماهير الهلال.. يوم مباراة الأهلي المصري جابوا التابوت.. ويوم مباراة كانوبيلارز النيجيري جابوا (عنقريب ودمية مكفنة) المرة دي عايزين حاجة جديدة مثلا جيبوا كم (عنقريب) وكم (كفن) وجيب من جو يا سادومبا..!! رفعت الجلسة..!! اذهبوا فأنتم الطلقاء..

Quote: رفض شكوى كانو!! رفضت اللجنة التنفيذية للاتحاد الأفريقي لكرة القدم الشكوى التي تقدم بها نادي كانو النيجيري بإيعاز من آخرين وعزز القرار صحة الاجراءات التي اتخذها الاتحاد السوداني بعد الاطمئنان على سلامة المستندات والاجراءات والطريقة التي تمت بها الاعارة للخارج والاستعارة للداخل. ولخص القرار الموضوع في أقل من سطرين ولم يأخذ كثيرا من الوقت حيث أعاد للاتحاد السوداني الحق الأصيل في تنظيم الشئون الداخلية وضوابط التسجيلات شريطة الا تخالف جوهر التعليمات الدولية المعمول بها. وبما أن الاتحاد السوداني يملك وحده سلطة تحديد عدد الخانات والأجانب وفتح الإعارة في منتصف الموسم وغيرها مما يندرج في اطار مسئولياته فإنه سمح لكل الأندية الراغبة بالاستعارة والإعارة في يونيو إعمالا للنصوص التي كشف عنها الهلال والتي سكتت عنها القواعد العامة وهو انتصار قانوني كبير للهلال يجب أن تحمده له الأندية وليس بالسعي المحموم لطعنه في ظهره. أنهى قرار تنفيذية الكاف أحلام أهل المريخ الذين حاولوا تدارك الخطأ الذي ارتكبوه وعدم معرفتهم بالأسس السليمة للتظلم وانتظروا كانو ليعطل لهم الهلال ولا يفرق معهم إذا كان القرار سيفيد المريخ أم لا إنما الغرض تعطيل الهلال وكفى. انتصر الكاف للاتحاد السوداني وللهلال وأثبتت القرارات أن الهلال ناد كبير ولا يقع في أخطاء ساذجة كما أن الاتحاد السوداني أحد الموسسين للاتحاد الافريقي وبما يتمتع به من مكانة كبيرة لدى الافارقة تتمثل في وجود حشد من البدور المضيئة على اللجان المختلفة وعلى رأسهم د. شداد ود. معتصم والاستاذ محمد الشيخ مدني ود. على قاقارين والمحامي الشاطر مجدي شمس الدين. واصل الهلال انتصاراته القانونية والإدارية وحقق لنفسه وللرياضيين جميعا وهو يؤكد قوة القانون وصحة الإجراءات ويقدم الدروس المجانية والفهم الرفيع في التسجيلات والتعاقدات ويجبر تنفيذية الكاف على رفع القبعات للاتحاد السوداني والهلال معا. اجتهد الهلال خلال التسجيلات التكميلية وقدم أنموذجا للفعل الاداري المتميز المبرأ من العيوب والأخطاء وحافظ على سجله صاغ سليم. أغلق الكاف بقراره الأخير باب المزايدات والتأليف والخداع والتضليل وقطع الطريق على كل الأندية الداخلية والخارجية وحسم ملف تسجيلات الهلال التكميلية وبرأ ساحة سادومبا وكابوندي معا، وعلى الفرق التي خسرت من الهلال داخل الملعب وباتت تبحث عن النقاط خارجها تحسين أدائها والارتقاء بمستواها لتكسب بالعرق والجهد وليس بالشكاوى الفالصو والانصياع للأباطيل والخزعبلات. التحية للجنة التسجيلات بالاتحاد السوداني فردا فردا ونخص الإخوة الطريفي الصديق وأسامة عطا المنان وعلى الأمين فقد تسلموا بالأمس شهادة نزاهة وأمانة وبراءة وشطارة تضاف لسلسلة الشهادت المعتمدة لديهم في الأمانة والصدق والحياد والعدل والاستقامة وتطبيق القانون. ونهنئ مجلس الهلال الذي كان واعيا ومدركا لواجباته ومسئولياته وعزل الفريق عن محيط الصراعات القانونية حتى يتفرغ للأداء الجاد فكان ان تربع على العرش بلا منازع رغم خسارته الأخيرة. القرار وجه ضربة موجعة لكانو ومن يتوارون خلفه ودفعوه الى مرمطة سمعته بينما أكد براءة الاتحاد السوداني بينما يتوجب على الاتحاد النيجيري إعادة ترتيب بيته من الداخل ومراجعة موقفه المهزوز أمام الكاف ولحس الخطابات التي صدعنا بها. أما السيد سكرتير نادي أوكبي فنتمنى له عملا مستقرا ودائما بعد ان خاب فأله وأفسد الهلال المخطط وأحبط المحاولة الفاشلة للتأثير على مسيرته الظافرة المنتصرة بحول الله. انتصار الهلال التأريخي علامة فارقة في مسيرة الكرة السوةدانية نتمنى ان تكون منهاجا للأندية الأخرى لتقتدي بها في مسيرتها القانونية حتى لا تتنكب الطريق مثلما يفعل البعض بغرض تعطيل الهلال وعرقلة انطلاقته القوية حيث لا يحيق المكر السيئ إلا بأهله. ونتوقع أن تزداد أفراح الأهلة عقب مباراة القمة القادمة يوم الفصل والحسم والفرقان وعندها سيعرف الكل موقعه وحقيقة موقفه ومستواه ومبروك للأهلة وللاتحاد السوداني. ياسر عائس

Quote: شكوي رفضوها شكلا وشكوي موضوعا محمد عبدالماجد الشاي والفول والجبنة دي بتذكرني بي شكاوى المريخ ومزاعم اعلامه عن عدم صحة تسجيل سادومبا وكابوندي نتيجة للتزوير الذي اشاعوه حول اعارة امولادي ودي سوزا. * يجوهم بي هنا ..يطلعوا ليك بي هناك. * شداد قال ليهم خطوات الهلال دي كلها صاح..قال ليهم في 30 عضو من كبار قادة الكرة في البلاد راجعوا خطوات اعارة امولادي ودي سوزا..وكلهم المريخي والهلالي منهم اكد صحة الاجراءات. * هم قالوا لا..في خطاب من الاتحاد النيجيري وصل عبر البريد الكتروني اتمسح. * شداد قال ليهم ما في كلام زي دا...خطاب يتمسح براه دا إلا يكون في الاصل ما اترسل. * جماعتكم قالوا انتظروا الـ (دي اتش ال). * انتظرنا الـ (دي اتش ال)...شداد استلم الخطاب ورماه في سلة المهملات. * الكلام دا ما عجبهم... قعدوا يطنطنوا. * الغريبة انو مع طنطنتهم دي عندهم (نقطتين). * شداد قال ليهم امشوا الاتحاد الافريقي ..اشتكوا هناك...نحن البطولة الافريقية دي ما عندنا فيها دخل. * الجماعة مشوا..وكمال شداد من خزينة الاتحاد دفع ليهم رسوم الشكوى. * في تعاون اكتر من كدا. * الاتحاد الافريقي عاين للشكوى كدا..قعدوا يضحك. * عرفوا ليك المريخ اول مرة يلعب في بطولة الاندية الافريقية للابطال. * رفضوا الشكوى (شكلا)...شكلا دي بتقطع المصارين. * الفصاحة ديك..كلها طلعت في الفاضي. * الشكوى ما بعرفوا يكتبوها. * طيب بتتفاصحوا في شنو؟. * شهرين بتتكلموا عن الموضوع دا وغالبكم تكتبوا الشكوى. * عماد الطيب قال ليهم: انتوا تلامذة ساكت..الشغل دا كبير عليكم. * انتوا ابعد حاجة يمكن تصلوا ليها (الطابق التاني). * نحن قبيل شن قلنا. * سا شنو؟.. سا سا سادومبا.. وكا شنو؟.. كا كا كابوندي. * المريخاب طبعا زي حكاية (الجبن) في فرنسا...فيه 150 نوع. * قالوا كانو بيلازر ح يشتكي ...وح يكتب الشكوى صاح. * لكن (شفوت) الهلال ديل مفتحين..عين مفتحة وعين مغمضة. * ما بتحورجوا لينا. * الاتحاد الافريقي رفض شكوى كانو بيلازر في سادومبا. * يعني شكوى رفضوها شكلا.. وشكوى رفضوها موضوعا. * قلنا ليكم سا.. شنو؟. * سا سا سادومبا...وكا ..شنو؟....كا كابوندي. * وشكوى رفضت شكلا وشكوى موضوعا. * موضوعا دي تقطع الطوحال. * نحن اي حاجة عندنا بي نظام...تاني بتقولوا شنو؟. * اقول ليكم حاجة ..قولوا النعيم رونالدينو بقي ما بربط شعرو. * يمكن يقبلوها ليكم المرة دي شكلا..ويرفضوها موضوعا.

Quote: سبع دقائق والبخت مائل ابلغ رد للمريخ ولاعلام المريخ قدمه الاتحاد الافريقي حينما رفض شكوى كانو ضد لاعب الهلال سادومبا في 7 دقائق. * 7 دقائق فقط حسمت قضية حاول المريخ واعلامه بكل ما يملك من قوة ومن سلطة ان يجعلها تنتهي لهم بمكسب. * لكن في النهاية الزبد يذهب جفاء ويبقي ما ينفع الناس. * المريخاب ظلوا علي مدي قارب من الثلاثة شهور يتحدثون عن الاعارات الوهمية. * سودوا صحفهم بهذا الضلال ونشروا مستندات وتصريحات لا حصر لها ولا عدد. * كل اتجاهاتهم وكل الاراء والمستندات التي قدموها كانت تؤكد شيء واحد. * كانوا جميعا يسيرون علي خطي رجل واحد..قال لهم (هجم النمر) فظلوا يرددون كلامه...اما عقولهم واقلامهم فقد كانت في اجازة مفتوحة. * حتي مجلس المريخ تبني القضية واشتكى وحرض كانو علي ان يشتكى. * لكن الحق يحصحص دائما..اذ رفض الاتحاد الافريقي شكوى كانو في سبع دقائق. * قبل ذلك كان الاتحاد الافريقي قد حسم شكوى المريخ في سادومبا في 25 ثانية. * عرفت الان لماذا يعرف سادومبا بانه اسرع لاعب في بلاده. * زول شكوتو يحسموها مرة في 25 ثانية ومرة في 7 دقائق ...اكتر من كدا يعمل ليكم شنو؟. * الغريبة ناس المريخ بقولوا سادومبا لسع ما جاب ليه قون. * انتو عاوزين قون اسرع من كدا. * نحن اكتر من الجهجهة البعمل ليكم فيها دي ما دايرين منو حاجة اكتر من كدا. * العملها فيكم سادومبا ما في محترف عملها فيكم قبل كدا. * شكوى رفضوها شكلا. * وشكوى رفضوها موضوعا. * تاني يعمل ليكم شنو؟. * قرابة الثلاثة شهور وهم بتحدثوا عن الموضوع دا. * سكرتير الاتحاد الافريقي يصرح..رئيس كانو يهدد والايميل اتمسح. * لا ما تسمح. * رد الـ دي اتش ال بصل الليلة. * لا بصل بكرة. * الرد وصل...والشكوى حسموها في 7 دقائق. * حالتها دي بدون (دي اتش ال). * يكون في زول مسح الايميل في مكاتب الاتحاد الافريقي في القاهرة. * ويكون شطة كمان رمي خطاب الاتحاد الافريقي الذي وصل عبر البريد السريع في (سلة المهملات). * لكن كل هذا لا يعطيهم الحق ان يحسمو الشكوى في 7 دقائق. * شكوى هي وإلا نتيجة فحص. * نتيجة الفحص بتاعة الملاريا عاوزة ليها نص ساعة عشان تظهر. * معقولة شكوى فيها ايميلات وفيها كمية من الدي اتشلات يحسموها في 7 دقائق. * في مريخابي قال لي انا ما غايظاني حكاية رفض الشكوى..فهذا امر مفروغ منه...لكن الحاجة الغايظاني انهم حسموا الشكوى في 7 دقائق. * الاتحاد الافريقي دا مع ناس المريخ وكانو ديل ممكن يغني. * اذا كان في 7 دقائق بدخل ليه 1200دولار ..تاني عاوز شنو؟. * غايتو اعلام المريخ دا بغش في المريخاب جنس غش. * تصوروا الاعلام دا صور لجماهير المريخ ان هناك تزوير في اعارات دي سوزا وامولادي. * وصور ليهم انو ممكن عادي جدا كانو يشتكي في تزوير في اعارة امولادي يقوموا يبطلوا تسجيل سادومبا. * اعلام ببيع للناس الوهم. * عليكم الله في وهم اكتر من البعملوا فيه دا. * تتخيلوا الناس ديل عندهم (نقطتين) وبعد كدا بوهموا ليك في الناس انهم ممكن يصعدوا للمربع الذهبي. * ويا ريت لو وقفوا علي كدا. * تتخيلوا الجماعة ديل قالوا ليهم ممكن المريخ يتصدر مجموعته. * يتصدر بي وين؟. * يتصدر بي نقتطين؟. * في (وهم) اكتر من كدا. * اخر حاجة الجماعة بتوع الوطنية ديل..قالوا نحن لو طرنا ما بنطير برانا. * من الله خلقكم شفتوا ليكم (ضل) بطير..يقوم يطير معاه الاصل. * نحن غايتو موضوع زي دا ما سمعنا بيه. * بعدين انتوا شكاويكم البحسموها في 7 دقائق دي مفروض ذاتو ما يلعبوكم معانا. * شوفوا كونفدراليتكم وين؟. * جماعتكم وقت فقدوا الامل ولقوا الموضع صعب عليهم قالوا : نحن ما بنطير برانا. * لا فالحين...ممتازين ...ما بتقصروا. * الاسمنت تجيبوه ..تشيلوه براكم. * الدولارات تجيبوها...تشيلوها براكم. * السيخ تجيبوها ..تشيله براكم. * سيكافا تعملوها ..تشاركوا فيها براكم. * وقت نجي علي (الطيران)..تقولوا : نحن ما بنطير برانا. * نحن عندنا سبع نقاط...وانتوا عندكم نقطتين...البلمنا معاكم شنو؟. * قرينا معاكم نحن..قعدنا في داخلية واحدة. * نحن (صدارة) وانتوا (طيش) البطيرنا معاكم شنو؟. * شن لم الشامي مع المغربي. * بعدين انتوا شكوى ما بتعرفوا تكتبوها. * بصم..ما بصم..بصم..ما بصم.

Quote: المريخ اول نادي افريقي يشتكي نادي من نفس بلده افتح صفحة واقفل صفحة ومن اول السطر اكتب ....... تكشفت الحقائق وكان الحصاد المر نقطتان فقط من اصل (12) .. ودقي يا مزيكا للبطل المسافر الي الامارات ..!! تحول نادي الكفاح والنضال والبطولات في عهدهم الي شركة بدون عقد تأسيس واضح .. وبدون شركاء ..!! تبقي اقل من اسبوع واحد لموعد مباراة القمة بين الهلال والمريخ في الجولة الخامسة بربع نهائي بطولة الاندية الافريقية الابطال .. تدور بعدها معركة تكسير العظام باستاد الهلال بامدرمان .. ويتقرر عقب صافرة الحكم مصير (المريخ) .. المريخ فقط وليس الهلال .. فمصير الهلال من الاستمرار في البطولة او الخروج منها لا تقرره نتيجة لقاء القمة حتي اذا خسر .. ولديه فرصة اخري في الجولة الاخيرة امام زيسكو هي التي ستقرر ..!!! وبالرغم من اقتراب موعد المباراة او الديربي السوداني كما اسماه الدكتور مصطفي فهمي سكرتير الاتحاد الافريقي لكرة القدم علي هامش قرعة ربع النهائي في مقر الكاف بالحي الدبلوماسي في مصر .. لا يوجد اهتمام اعلامي في المواقع الافريقية المختلفة المهتمة ببطولة الاندية الافريقية الابطال لانشغالها جميعها بالصدامات النارية في الجولة الرابعة لتصفيات افريقيا لكاس العالم .. فالسباق الافريقي الساخن نحو المونديال العالمي بجنوب افريقيا سحب البساط من المباريات الحاسمة بربع نهائي بطولة الابطال الي حين اشعار اخر ..!! وحتي رفض الكاف للشكوي التي تقدم بها المريخ وكانو بيلارز ضد الهلال طاعنين في صحة اشتراك اللاعبين سادومبا وكابوندي لم يحظي بالاهتمام المطلوب .. كما ان الكاف نفسه لم يشر الي القرار واكتفي باخطار الاطراف المعنية للعلم والتنفيذ ..!! نحن في (قوون) .. اشرنا الي ضعف الحجج التي اعتمد عليها المريخ في شكواه .. وذهبنا الي ابعد من ذلك واشرنا الي هشاشة المنطق الذي تعامل به المريخ وكانو بيلارز معا في هذه الشكوي .. واكدنا انها مرفوضة شكلا ومضمونا ..!! وللتذكير اشرنا الي عدة سوابق .. وشكاوى كان مصيرها الرفض منها الشكوي الشهيرة للاسماعيلي المصري ضد اينمبا النيجيري وغيرها الكثير والكثير جدا ..!! واشرنا كذلك الي شكاوى اخري كسبها اصحابها بالمنطق السليم والحجج القوية ..!! حذرنا من تبعات هذه الشكوي الركيكة علي مقدميها .. ورددنا ولم يرد علينا احد : لقد اسمعت اذ ناديت حيا لكن لا حياة لمن تنادي اصبح المريخ الان اول ناد في افريقيا يشتكي ناد من بلده .. لم يسبقه عليها احد .. ولا اعتقد ان يفعلها احد غيره .. فطوال مشوار الاندية في مسابقات الكاف لم تحرك مثل هذه الاجراءات من فريق ضد فريق ينتميان لبلد واحد ..!! وشاهدنا خلال السنوات الماضية اندية البلد الواحد تشارك في بطولات افريقيا وتكتفي فقط بالاحتجاج علي الحكام علي نحو ما فعل الزمالك العام الماضي قبل مباراته امام الاهلي ..!! لقد صاغ المريخ شكوي ومعه بيلارز حديث العهد ببطولات الكاف باسانيد هشة .. وادلة ضعيفة .. فالاصل عند الكاف ليس امولادي وكواريزما .. ولا يمهمه الي اين ذهبا او كيف تمت اعارتهما .. فالمهم هو تسجيل سادومبا وكابوندي .. وهل تم بشكل سليم ام لا ..!! تماما كما حدث في شكوي الاسماعيلي ضد اينمبا .. وحينها وجه الكاف سؤالا للاتحاد النيجيري هل اللاعب احمد جربا يارو يارو مقيد في كشف الفريق ام لا .. وحصل علي الاجابة من الجهة المختصة ورفض الشكوي .. فماذا كان يريد المريخ ..؟؟ الاجابة عندي ان المريخ لم يكن يعلم بالاصول والنظم واللوائح والقوانين المتبعة في مثل هذه الحالات وهذه مصيبة كبيرة .. وما اكثر مصائب المريخ في هذا الزمان ..!! حاولنا السكوت في بادئ الامر لعل وعسي تتحسن الامور وتعود الي نصابها الصحيح .. لكن مرت الايام واستفحلت الازمات .. وارتبط هذا النادي الكبير بمهازل تتجدد كل يوم ..!! انها فضيحة بكل ما تحمل الكلمة من معني .. ليس للمريخ وحده .. بل للكرة السودانية جمعاء .. اشتركت فيها مجموعة من العناصر .. والكوادر .. منهم من ظهر والاخر خارج الكادر ..!! والفضيحة ان تكون الاول في (الفضيحة) .. اول نادي في افريقيا يشكو ناد من بلده .. والمحزن ان الشكوي ساذجة ومضحكة .. اضحكت الذين ناقشوها .. ورفضوها شكلا .. ثم مضمونا ..!! واجابة اخري عندي حول هدف المريخ من هذه الشكوي .. واري انه اراد ان يشغل الهلال ويشتت افكاره كنوع من الاسلحة التقليدية التي تستعمل في البطولات ..!! وهذا الافتراض اقرب الي المهزلة .. اكد ان الادارة في المريخ ومن يواليها مشغولة بالهلال اكثر من فريقها .. تنظر الي الهلال اكثر من نظرتها الي فريقها (الغالي) الذي كلف ملايين الدولارات .. ولم يكلف نفسه عناء .. او جهد لاسعاد الجماهير ..!! فنظرة واحدة منهم للفريق الاحمر كانت كافية لسد الثغرات ومعالجة السلبيات والتقدم بقوة الي الامام في بطولة الابطال .. !! سنوات طويلة من عمر المريخ ارتبطت بالفشل .. ليس في الدوري فحسب بل في دوائر كثيرة .. وتحول نادي الكفاح والنضال والبطولات في عهدهم الي شركة بدون عقد تاسيس واضح .. وبدون شركاء ..!! عاني المريخ كثيرا من الاخطاء الادارية الساذجة .. منها علي سبيل المثال لا الحصر قصة تسجيل اللاعب النيجيري ستيفن وارغو .. وعندي حول هذه القصة المثيرة معلومات تبين بوضوح حجم الخسائر التي تعرض لها النادي بسبب هذه الصفقة المضروبة ..!! لم يحن الوقت بعد لاستعراضها ..!! قلنا ان المريخ غير مؤهل للاستمرار في بطولة الابطال حتي اذا فاز علي الهلال .. وشككوا في حبنا للاحمر .. واتهمونا بمجاملة من نعمل معهم في (قوون) .. فاذا كنا نجامل اهل (قوون) من اجل مصلحة المريخ .. فهم يجاملون من يديرون المريخ في غير مصلحة المريخ .. وعندي الكثير والكثير جدا حول هذا الملف وامسكوا الخشب ..!! فتحنا معهم صفحة سيكافا .. وقلنا ان المريخ (جمع) ارانب افريقيا في الخرطوم .. وقالوا سيكافا للابطال .. وسيكافا للرجال .. وسيكافا في الرد كاسل ..!! انتهت سيكافا بهدف قاتل من اتراكو الرواندي .. وقلنا اقلبوا الصفحة .. افتحوا صفحة جديدة .. بطولة الابطال اكبر من طموحات المريخ بشكله الحالي .. وقالوا لا فض فوهم الامارات تنادينا .. نحن اصحاب المستوي الاول .. نحن الابطال .. وتكشفت الحقائق وكان الحصاد المر نقطتين فقط من اصل (12) نقطة .. ودقي يا مزيكا للبطل المسافر الي الامارات ..!! افتحوا الان صفحة جديدة ايها الاحباب .. سنتوقف عندها كثيرا .. ماذا فعلتم للمريخ ..؟؟ او بمعني اصح ماذا فعلتم بالمريخ ..؟؟ كونوا معنا ..!! سنواصل .. لن نتوقف من اجل المريخاب اصحاب الوجعة ..!!