|
|
|
 Re: البلابل...... بالجد نور بيتنا (Re: ALGARADABI)
|
رمضان كريم يا قرضابي ..
ياخي البلابل ملونا شجن وطرب أصيل ..
أنا هسي جيت أعمل سبق لقيت بوستك عنهن ..
بالجد سهرة ولا أروع ..
سهرة أعادت لنا الزمن الجميل ..
رجعنالك ..
نور بيتنا ..
بالجد أنا مستمتع الآن حد الدهشة ..
بالإضافة للحوار الجميل من الأستاذ الصحفي والناقد الفني نجيب نورالدين والأستاذ المخرج عصام الدين الصايغ ..
هسي يا بكري نقول عليك شنو مع كوداتك الما شغاله دي غايتو رمضان كريم ..
| |
 
|
|
|
|
|
|
|
 Re: البلابل...... بالجد نور بيتنا (Re: ALGARADABI)
|
يا الهليتو وفرحتو قلوبنا
يا سلاااااااام
بالجد نور بيتنا
وشارع بيتنا
بالعودة للزمن الجميل
زمن بشير عباس
وعزيز التوم
وصلاح حاج سعيد
ورجعنالك سبدرات
واسحق الحلنقي
وحتي لما غنو بالنوبي
تمايلنا طربا كما الريحان حين غازل الزهرة (وعاين ليكم)
وكأن الترجمة على الشريط
لما لكم من قدرة على التوصيل و التواصل
باختصار كده
كل البيت خليتو في فرحة
ضاحكة عيون وقلوب منشرحة
جيتو
واكتملت بيكم اللوحة
مرحب (حبايبنا)
وأهلا بيكم
| |
|
|
|
|
|
|
|
|
|
Re: البلابل...... بالجد نور بيتنا (Re: baha eassa)
|
بهاء .. مسكاقمي .. حمدالله علي السلامة ...
يا عمر .. اهو عمك سهران وعاد بيهو الزمن كام وتلاتين سنة...مرة عمكم السر قدور قال الغناء الجميل بيحصل ليهو تراكم وجداني وما بيرتبط بزمن .. وقبل شوية عبيدالحليم من فرقة محمدية الجديدة والبتعزف مع البلابل اكد وظيفية الاغنية وليس ارتباطها بزمن وعمر..
البلابل معلم في تاريخ الاغنية الحديثة ورصيدهم الغنائي معشعش في وجدان الشعب السوداني وهو مخزون ابداعي يضاف الي معالم سابقة ولاحقة في تاريخ الاغنية السودانية ...
| |
|
|
|
|
|
|
|
|
|
Re: البلابل...... بالجد نور بيتنا (Re: abubakr)
|
يا سلااام يا باشمهندس أبوبكر
حضورك للسهرة حا يرفد البوست بمحاور كتيرة
عايزنك تكلمنا عن البيئة النوبية أثرها في تشكيل شخصية البلابل الفنية
مثل الغناء الجماعي و الرقص والاعتزاز بالنفس والثقة المفرطة(ولا أقول الزايدة)
و كلمنا عن عمك محمد عبد المجيد طلسم المربي ودوره في تشكيل شخصية البلابل
ننتظرك بعد أن يذهب الظمأ وتبتل العروق ويثبت الأجر بأذن الله
| |
|
|
|
|
|
|
|
|
|
Re: البلابل...... بالجد نور بيتنا (Re: ALGARADABI)
|
شكرا يا قرضابى
أنا كلمونى من السودان بإنه البلابل فى البلو نايل
وأول شى جا فى بالى بع قعدت مع البلابل، قلت
يا ربى ليك الحمدوالشكر، الزول عاش لغاية ما يشوف البلابل تانى مع بعض
كانت أمنية والله
كان عندى أمنيتين صعبات خالص فى حكاية الغناء ى
واحدة من الاتنين خليتها طبعا لأنها مستحيلة
وهى إنى احضر لى حفلة بغنى فيها كرومة
والأمنية التانية المعاها كانت إنه البلابل يرجعو تانى
والليلة اتحققت
يا الله على الزمن الباهى السمح النضيف والسعيدوالنبيل
ايام السودان الحقيقى
سودان الفرح والنفوس الطيبة المنشرحة المتفائلة
فى كلام كتير تانى حنقوله
هسه النمشى أنوم وأنا مشحون بالفرحة والطرب والتفائل
الواح الليلة دى وصل تخوم الجنة والله
| |
|
|
|
|
|
|
|
|
|
Re: البلابل...... بالجد نور بيتنا (Re: أبوذر بابكر)
|
وأبت السهرة أن تنتهي دون بصمة بوردابية
حبينا الموصلي بصم
ويا لها من بصمة من عمنا ابو قطاطي:
أنا لي زمن بتمني
ألقي يوم في عمري
من حبيبي محنة
و الفؤاد يتهنى
وبصمة بوردابية موصلية في ختام الحلقة:
بريدك يا حبيبي بريدك
| |
|
|
|
|
|
|
|
|
 Re: البلابل...... بالجد نور بيتنا (Re: ALGARADABI)
|
انا من اشد المعجبات بالبلابل ..معهم و بهم تشكلت وجدانياتنا..و كان لي شرف حضور اتنين من حفلات عودتهم للغناء
و استمتعت في كليهما ايما استمتاع..
لكن..
في سهرة اليوم كانت البلابل في قمة العصبية و التوتر..و دا ظهر اكتر حاجة في هادية طلسم ..
استحواذها على نواصي الكلام....اقتراحاتها و اصرارها على اشراك محمدية و غيرهم بمنتهى الصلف و الغرور...
مقاطعتها للمذيعة و حركات جسدها و تعابير يدينها..
ثم جاءت اغنية الختام...بريدك يا حبيبي بريدك...لتضع نهاية بائسة للسهرة..
رقص مبتذل...هز للكتوف لا يتناسب و عمر و وضع البلابل...عصبية و تشنج في الاداء...
تصوير غير محترف...زوايا سيئة لوجوه انهكتها السنين...
حقيقي...السهرة كانت مُحبطة !
| |
|
|
|
|
|
|
|
|
|
Re: البلابل...... بالجد نور بيتنا (Re: mamkouna)
|
مع الاعتذار للأخوة الفوق
حا أبدأ بالرد على الأخت ممكونة
رمضان كريم
هادية هي هادية منذ ظهور البلابل
روح الزعامة والقيادة
وذلك بحكم السن(أكبرهن عمرا)
وبحكم الامكانيات الصوتية و تكنيك الأداء
فمنذ أن عرفنا البلابل هادية هي المتحدث الرسمي بأسمهن
وهي التي تبدأ
وهي التي تختم
حتي تعليقها أمس حينما سألها سعد عن زعامتها في الفرقة
ردت رد معبر وقالت : ده كان زمان لما أمال وحياة كانو صغار
وواصلت:
آمال هسة بقت متلقية حجج وبتقول لي نحنا كورس معاك؟
أفتكر ده بوضح المسألة
وفي النهاية صلف الفنان وغرورو عمرو ما قلل من أبداعو
والا لما أصبح وردي معشوق الجماهير و فنان السودان الأول
وهنا تبدو ملاحظة هامة:
هل للمسألة علاقة بالجينات النوبية؟؟
السؤال للحبيب أبوبكر
ولي عزاز علينا
| |
|
|
|
|
|
|
|
|
|
Re: البلابل...... بالجد نور بيتنا (Re: ALGARADABI)
|
التياب دي كان تتثيت بدبوس بدل تقع كل مرة وكل واحدة تصلح توبها بعدها تبدا اختها
حركة موترة جدا للحضور وللمشاهدين
كان في توتر عام في الحلقة وطشاش للكلام من رشا ومحاولات من سعد للم الحلقة ولكن دون فائدة لان هادية استلمت منه الموضوع كاملا
| |
|
|
|
|
|
|
|
|
|
Re: البلابل...... بالجد نور بيتنا (Re: عفاف الصادق بابكر)
|
قضينا سهرة كاربة
بلابل الدوح
صدحن وغنن
واهدونا اريج الزمن الجميل
الحوار كان ضعيف
عودة البلابل حدث كان ممكن يشكل محور حوارات ممتعة
الصايغ حاول لكن ادارة الحوار ما ساعدتو
رشا الرشيد دى عندها صوت يضرس الواحد
سعد الدين بيقدم بطريقة كلاسيكية خالص
زى مقدم الجمعية الادبية فى مدرسة متوسطة
| |
|
|
|
|
|
|
|
|
|
Re: البلابل...... بالجد نور بيتنا (Re: فادية اليمني)
|
الاخت فادية
رمضان كريم
اللنك ما فتح معاي
بجرب تاني
شوفي حياة
لأنها حربية وعايشة في السودان حيث العصا لمن عصي التوب ماتحرك سنت
اما ناس امريكا
فالتوب مزعج
لانهم محتاجين فترة يتعودو عليهو تاني
قولنا ليكم الاصل ما ببقى صورة
| |
|
|
|
|
|
|
|
|
 Re: البلابل...... بالجد نور بيتنا (Re: ALGARADABI)
|
قرضابي يا عمكـ
رمضان كريم وكــدا
في الغنية الأخيرة للحلقة المخرج مرات مرات كان بجيب الاستوديو
الناس دي كانت جايطة ومخرخرة في حاجة .. يا ربي كان في شنو؟
سؤال تحت تحت كــدا!
سعد الدين قال: يضحكـ السمكـ؟
| |
|
|
|
|
|
|
|
|
|
Re: البلابل...... بالجد نور بيتنا (Re: فادية اليمني)
|
القرضابى رمضان كريم
اخوكم طبعا بموووت فى البلابل ،،،، بتعرف ولا ما بتعرف .... ترا را
بحكم وجودى خارج السودان كنت متابع جميع الحفلات التى اقاموها ومنتظر ظهورهن
على الشاشة بفارق الصبر وسعدت امس بمشاهدة الحلقة واستمتعت بها ولا يخلو ذلك
الاستمتاع من بعض التوتر ، يمكن لاسباب كتيرة
اولا من بداية السهرة انا كنت عاوز الزمن يمشى بسرعة عشان اعرف حيغنو شنو وكم اغنية
وفى نفس الوقت كنت عاوز الزمن يقيف عشان السهرة ما تخلص
ثانيا الحديث من الجانبين شكل جل وقت البرنامج ويمكن امال فى اول سؤال ليها قالت
الاسئلة بتاعت البدايات اتطرحت واتجاوب عليها كتير ، و معظم الاسئلة كانت متشابهة
بس بطرق مختلفة
سبب انفعال هادية انا برجعو بمدى احساس الظلم تجاههم من الاجهزة المرئية تحديدا"
ذى ما اشارت هى وقالتها بطريقة مقتضبة وانتهزت الفرصة وسجلت صوت لوم عبر البرنامج
اما حركات يديها وما اداراك ،،،،، هادية هى هادية ،،،، حتى سهرات زمان كانت لديها
قفشات وكلمات بتلطف بيها جو الحلقة
جميع الحفلات التى اقاموها بالاضافة لحلقة امس ، يشكل التوب وكذلك الطرح والرقيص والحركة
اثناء الغناء عائق كبير فى سلاسة الاداء
انا شخصيا" كنت اتمنى الختام باغنية نسيتنى انا وخلاص يعنى او البنريدو تايه
الكلام كتير بجيك راجع بعد الفطور
| |
|
|
|
|
|
|
|
|
|
Re: البلابل...... بالجد نور بيتنا (Re: ALGARADABI)
|
| Quote: هل للمسألة علاقة بالجينات النوبية؟؟ |
الجينات النوبية موجودة عند ناس كتار هنا ....
الانسان النوبي عرف باستقلالية في شخصيته وذاتية في الراي تبدو للبعض بانها غرور وهي ليست كذلك .فهو نتاج مجتمع اسري فالنوبيين هو مجموعات اسرة ممتدة متشابكة ولذا غابت عن مجتماعاتهم هرمية القبيلة السلطوية وبقي الفرد يتحرك في مساحات ماهلة من الاستقلالية ..المراة النوبية مارست استقلالية امتدت لفترات طويلة من الزمن حيث غاب الرجل النوبي بحثا عن العمل وبقيت المراة تديير شئوون الاسرة و الحياة باقتدار واستقلالية ..
ياممكونة هادية ياها هادية .. ربما غيابها والبلابل عن الحوارات التلفزيونية لما يقارب العقديين من الزمان لم يجعلك ان تلاحظي شخصيتها كالامس .. وهي حسب علمي المتواضع لا مغرورة ولا متعجرفة وانما شخصية طاغية وقلقة وشديدة الوضوح وعموما لا علم لي بان لفرد من هذه الاسرة خصوصا علاقة بالغرور والعجرفة متمثليين كلهم في المرحوم استاذنا وعمنا ومعلمنا محمد عبدالمجيد طلسم ...اها هادية كدة تمارس باقتدار سلطات المراة النوبية الكبيرة وسط اتنين من اخواتها الاصغر منها ...!! ومن الماخذ علي البرنامج امس هو ميكانيكية ادارة الحوار لدي رشا وقلة المامها به وبزمن البلابل وبامكانات الضيوف الحوارية (صحفي عارف ومخرج نضام وفرقة موسيقية يقودها محمدية والبلابل !) ولقد ظهر ذلك في مقاطعتها للصحفي وللاستاذ محمدية بحيث لم تختار الوقت المناسب الذي لا يضر بقيمة حديثهم وانما كدة بس "مقص" "ستوب "....
وياعمر .. البلابل نتاج اسرة فيها مقومات كثيرة دينية وعلمية وفنية ووالدهم عليه الرحمة كان معلما وفنانا متعدد المواهب وشخصية اجتماعية طاغية بانسانيتها ومرحها ...
| |
|
|
|
|
|
|
|
|
|
Re: البلابل...... بالجد نور بيتنا (Re: abubakr)
|
حبيب ورفيق الزمن الجميل \ القرضابي
رمضان كريم وكل سنة وانت طيب
للاسف لم اشاهد الحلقة لكن استمتعت بتعليق الاخوة المتاخلين
وخاصة الرجل صاحب الزوق الرفيع باشمهندس ابوبكر, متعكم الله
بالصحة والعافية ,, وربنا يخلي البلابل تغرد وتشجو بالحان حنينه
سلامي ليك وللاسرة يا عمر
| |
|
|
|
|
|
|
|
|
|
Re: البلابل...... بالجد نور بيتنا (Re: سيف الدولة كامل)
|
| Quote: وخاصة الرجل صاحب الزوق الرفيع باشمهندس ابوبكر, متعكم الله |
دة من رفيع ذوقك وادبك ورمضان كريم وربنا يديم المعروف
البلابل ابداع ومعلم و اضافة لمسيرة الغناء السوداني بمختلف تنوعاته ولهجاته ولغاته فلقد ارتبطن بزمن فاصل بين سودان كان ما يزال متماسكا رغم خلافات وحروب يحاول الحفاظ علي بعض من هدوء وسودان قد انجر الي تصنيفات ومحاور واشكالات جهوية واحقاد والام وجروح فكان غناء ذاك الزمان فيه من عفوية وانسانية المغني والشاعر والملحن والمتلقي فتسرب الي الوجدان متراكما مع ما كان قبله من ابداع منسجما معه ...فالوجدان هو مستودع كل الق وجميل.. وعندما اتي الشتات طوفانا فخرج وتخارجت مئات الالاف من السودانيين خرجت البلابل او ضلعيين من مثلث وبقي صوتهن خلال العقديين الماضيين في مستودع الابداع وحين قدر الله وعدن وجدن اجيالا عاصرتهن تجترئ ابداعهن من سنام وجدان واجيالا لم تكن هناك اصلا ضاقت بما هو ليس لها وبحثت فوجدت في مخزون ابداع اهل السودان اصوات البلابل فتحمست له وكان ما كان من استقبال ممزوج بحنين حذر ما ان غنت البلابل حتي عادت لسماوات الخرطوم ترانيم ذلك الزمان فذهب الحذر وانداحت المشاعر طوفانا فابدعت البلابل كعادتهن وبقي صوتهن رغم السنين والغربة وهجير زمن قاس ذاك الصوت والالق يذكرنا دائما بان الامل لم يغيب تماما في بقاء كل جميل سوداني وبكرة احسن ...
| |
|
|
|
|
|
|
|
|
|
Re: البلابل...... بالجد نور بيتنا (Re: abubakr)
|
شكرا يا باشمهندس على الاضافات القيمة
كنت متأكد من انو عندك الكتير لتقوله
لذلك لم نكتفي بمداخلتك الأولى
وطلبنا المزيد
وها انت توفي وتكفي
وانت دائما في الموعد
وما خاب من راهن عليك
| |
|
|
|
|
|
|
|
|
|
Re: البلابل...... بالجد نور بيتنا (Re: ALGARADABI)
|
| Quote: لان هادية استلمت منه الموضوع كاملا |
يحق لها ذلك ...فهي أجملهن وأطولهن قامة ..(وبتفهما وهي طايرة)..حفظهن الله لصنع الجمال في زمان قل فيه صناع الجمال
كل سنة وانتو طيبين ..وكل سنة والبلابل بخير.
| |
|
|
|
|
|
|
|
|
|
Re: البلابل...... بالجد نور بيتنا (Re: ALGARADABI)
|
شوف شتلاتك كيف نشوانة
والفل فرهد فرحان بيك
والريحان طربان يتمايل
غازل زهرة و يعاين ليك
كل البيت خليتو في فرحة
ضاحكة عيون وقلوب منشرحة
جيت واكتملت بيك اللوحة
تسلم سيدنا
وأهلا بيك
شكرا صلاح حاج سعيد
شكرا بشير عباس
شكرا هادية
شكرا آمال
شكرا حياة
| |
|
|
|
|
|
|
|
|
|
Re: البلابل...... بالجد نور بيتنا (Re: ALGARADABI)
|
أخخخخ يالقردابي...
عيد الأضحي المنصرم ،
كنت هناك وطنئذٍ
جهزت نفسي وبعض الأشياء التي خربتها الغربة
هيأت كل شئ لحضور هذا الحفل..
عند باب الخروج سألني أبوي الله يديه العافية:
- علي وين كان الله هون؟!!
- بصراحة يا أبوي ماشي حفلة البلابل ..
- البلابل؟
- أيوه.
- كان كدي عديله عليك أمش نضف (إضنيك) من وحل الغربة.
وقد كان ...........
يا سلااااااااااااام ،، ليلة عمر بحق وحقيقة..
وبرضو لون المنقة يالقردابي..
مشكور ... يديك ألف عافية
وعيدك مبارك.
| |
|
|
|
|
|
|
|
|
|
Re: البلابل...... بالجد نور بيتنا (Re: فاروق أبوحوه)
|
| Quote: وبرضو لون المنقة يالقردابي.. |
يا سلااااام
تمنيت لو كنت معاك هناك
لون المنقة برؤية جديدة
وروح جديدة
كأنو الواحد بستمع ليها لأول مرة
وتعاين ما بتقدر تعرف
مين أحلي من التاني و أنضر
شكرا اسحق الحلنقي
شكرا بشير عباس
وشكرا بلابل الدوح
وعيدك سعيد يا أبوحوة
| |
|
|
|
|
|
|
| |
ALGARADABI
معتصم دفع الله
baha eassa
abubakr
عمران حسن صالح
أبوذر بابكر
mamkouna
SHIBKA
عفاف الصادق بابكر
mohmmed said ahmed
فادية اليمني
محمد عبد الماجد الصايم
عبد الدائم سيد أحمد
عبدالحافظ سعد الطيب
سيف الدولة كامل
فتحي الصديق
فاروق أبوحوه
فيس بوك
تويتر
انستقرام
يوتيوب
بنتيريست