|
|
 وصية لكل بوردابية "إقراء بعيدا ً عن الشاشة ،،البوست يحمل كتابة مشعة"
|
التحية لي أخوات نسيبة ، والتحية لي أخوات الحاجات التانية.......
طرأت على البورد مؤخرا ً أنواع غريبة من البوستات ذات الطابع المخيف ، ودا عااادي جدا ً، لكن الشئ الغريب علينا المداخلات أصبحت بي قدرة قادر تأخذ لون "أحمر فاقع" ، وأنا قايل لامن تتلون بالأحمر لزوم قعادكن في محل الرجال شئ مو في محلو ، شان الأمة أملسانن فاكي دي تاخد راحتا.
تجن وترمن بي كل مالديكن من سهام الكلام ، شان البورد وناس البورد ، ويجوكن ناس فلان الذين نعرفهم أنا وأنتن ويدكون أركانه دكا ، لايحترمون كبير ولايوقرون صغير ، والغريب إنو المداخلات نتشة بس ، الواحدة منها لاتتعدى عدد أصابع اليدين من كلمات لكن تعال شوف المعنى حدث ولاحرج، لايفيد المراسلة عبر المسينجر ولاغيرو ، فإن أرسلت في المسينجر ، تجده قد وضعوه تحت رحمة "ساطور" الإقتباس ويختوه ليك في حنانك للعيان . يعنى مافي سرية ولا في خصوصية؟. والبجنن "بوبي"إنو ناس البورد دا معظمهم "يعرفون بعضهم" واظنو دي الورطة(1) الوقع فيها الأسد بي فعايل الثعلب ، والضحايا البنيات وأماتن والناس الجادين . والجادين هم الجماعة البتلاقيهم إقولو ليك "ياخي بقيتو تفتحو كلام كدا ميت شديد ، ناسين إنو دا ياهو البيفك حيرتنا وياهو البينفسنا من النفخ الفيهو دا،المهكور(2) في بلاد غربة فينا، والمفلس فينا ، والمشوكش فينا .
والماداير جنس دا يبعد بعيد ويخلي الفاكي يجي ودا مادايمن دا مرة مرة آجماعة شان كمان ماتجو بعد فترة وتقولوا أنا شجعتكن على الفارغة والمقدودة. وقولوا يالطيف من الهكر كمان مايسمع بالبوست دا ويجي خاشي فينا جوز ويكتب مالز وطاب له من حديث . وعلى الجنس اللطيف الإبتعاد كي لايصيبه رشاش أو حتى طل .
نعم إنه منبر الحرية كما اعتدنا عليه قراء ً قبل ان نصير أعضاء ، لكن كمان برضو تكون فينا شوية حنية بالجنس اللطيف ، والجماعة الجادين من الجنس أبجلابية(3) .
ــــــــــــــــ
شرح الكلمات:
(1)المهكور: خوفا ً من الهكر فإن هذه الكلمة لاعلاقة لها بإسمه .
(2)أبجلابية: ورددت كلمة "أبجلابية" كناية عن الرجل ولم ترد "أبوبنطال"نسبة لإشتراك النساء في ذلك "مؤخرا ً".
(3)الورطة: قيل أن الثعلب كان يجوب الغابة جئة وذهابا ، فوقعت عينه على "تور" قد أخذ الطين منه مآخد الثبات ، وبالطبع فإن
الثعلب لايستطيع النيل من الثور وأكله، فذهب للأسد يحدثه أن ثورا ً قد وحل في الطين وقد آثرت على نفسي بأن لا أنال منه مزعة
إلا تاتيه أنت أولا ً ، أثنى الأسد على الثعلب وتبعه إلى حيث الــ"تور" ، حينها جلس الثعلب خارجا بحجة الإحترام الأعمي لك أيها
لمبجل صاحب الشارب الأصفر ، وقبل بلوغه للثور لامست بطنه الطين وحلا ،،،وهذا ماكان يغشاه الثعلب ، والتفت للثعلب "دي ورطة دي
يالثعلب"... فقال الثعلب وهو يدير ظهره عن الأسد "الورطة مي هني الورطة وكتين إجيك سيد التور"..
|
|
 
|
|
|
|
جلال جبريل
فيس بوك
تويتر
انستقرام
يوتيوب
بنتيريست