أثقل صحفي سوداني... ولو مكذبني إقرأو هذا المقال..( البرلوم جاب لينا اللوم)

Quote: البرلوم جاب لينا اللوم.. وبمثلما للمهام الكبيرة اهلها.. فإن للبطولات الكبيرة اهلها ايضا.. في ناس اختصهم الله بالمسؤوليات الجسام وناس على قدرهم الله اداهم.. في عالم من البشر ناجح جدا في المهام الصغيرة.. ترسلوا الدكان يمشي ويجيك زي الصاروخ.. تقول ليهو جيب رغيف يجيبو ليك سخن من الطابونة.. بس اوع يغرك نجاحه في المهام الصغيرة تقوم ترسلو مشوار مهم..!! عاين المريخ دا في كأس السودان.. تلقاهو ما شاء الله فائز كتير خلاص.. عاين ليهو في سيكافا.. برضو نجاح رغم مشاكل المواصلات والتاكسي!! فتشوا في البطولات الصغيرة تلقاهو متميز جدا!! بس في البطولات الكبيرة الله لا وراك.. نحن في المريخ اخوة نعشق النقطة ونهوى!! دوري ابطال العرب.. لم ينجح احد.. الدوري الممتاز.. يظهر مرة ويغيب خمس سنين.. دوري ابطال افريقيا.. البرلوم جاب لينا اللوم.. لأول مرة في دوري ابطال افريقيا فريق مصنف اول مجموعة ثلاث مباريات بي نقطة.. والنقطة ذاتها هدية من اخوهو الكبير.. يعني لو نحن مافي كان دلجة سااااكت يا حسن محجوب!! ولأول مرة في دوري ابطال افريقيا وفي مرحلة المجموعات مباراة تستمر لأكثر من مائة وعشرين دقيقة.. خلوا بالكم.. مافي اشواط اضافية.. الامر متعلق بتصرفات صفوية وحجارة كريمة جابا معاهو الوالي في احدى رحلاته الخارجية!! ولأول مرة في احداث الشغب في دوري ابطال افريقيا يتعرض الاطفال حاملو الكرات للقذف بالحجارة.. منظمة فلسطينية اعلنت تضامنها مع هؤلاء الاطفال!! نتمنى من الاخ الاستاذ علي مهدي ان يتدخل لحماية اطفال الكرة من الاعتداءات!! كما نطالب الاخت عفاف حسن امين بممارسة مهامها كسفيرة للنوايا الحسنة.. خصوصا وان هيثم مصطفى مشغول بالتجهيزات للمباراة النهائية.. ولأول مرة في دوري ابطال افريقيا يهزم فريق مصنف اول على ارضه ووسط جمهوره في دوري المجموعات بثلاثية.. ولأول مرة يقود رئيس نادي فريقه من دكة البدلاء وبالزي القومي.. حي قيوم.. حي قيوم!! انا قايل روحي ثقيل.. لكن لقيت ليكم مهاجم زيسكو دا اثقل مني.. ياخي دا جاب ليهو قون ولا اثقل زول في الدنيا ما يجيبو.. من هناااااااااااك.. لعب الكورة لا عمل حساب للحارس المسكين دا!! ولا ختّ خاطر للجمهور!! ولا قال الهواء ممكن يغير اتجاه الكورة.. والله انا لو محل كمال دحية كان قطعت الكهرباء قبل الكورة تصل القون!! يا اخوانا المريخ دا ما فيهو زول مسؤول ولا شنو؟.. كورة ماشا ليها دقيقتين في الهواء ما تلقي زول يتصرف معاها!! قرصا ليك قرصة.. عقرب ما تقرصها.. انا قلت ناس المريخ يشتكو.. مش الحكم جاء مع زيسكو في نفس الطيارة؟! وانا اقول المريخ دا مالو اتغلب بدري بدري كدا.. انتو الحكم ما لقيتو طريقة تلاقوهو في الطيارة؟.. كان تكلموا ليهو علاء الدين طيارة.. وصديق ما طار من بدري لييه؟ اهو تلاتة نقاط وطارت.. إيه حكايتكم مع التلاتة؟.. وجن ماشات تلاتة.. البحلف بي حياتا.. وانا دستوري نازل في الخرطوم3 وجمال الوالي قال عديل كدا.. الاتحاد السوداني ظلمنا.. مش حرمنا نستضيف الحكم؟! يا اخوانا القصة دي كدا بتبقى ظاهرة.. يعني مرة واحدة بس الاتحاد السوداني عمل كريم وقام بالضيافة نيابة عنكم تقوموا تزعلوا للدرجة دي!! تتغلبوا تلاتة؟.. زيسكو الضعيف وينو؟..! الهلال التعبان وينو؟ يا نزيه اعمل لينا كاريكاتير.. نزل النجمة وارفع الموزة.. رايكم شنو تعملوا الموز ابو نقطة شعاركم؟.. اصلكم طولتوا لا غيرتو اسمكم لا شعاركم..! ابو شيبة قال الهلال شاطر في الادارة.. لكنو ما قال المريخ غبي في الادارة.. انا خايف ابو شيبة بكرة يقول المريخ (فاشل) في الادارة!! للمعلومية: النجاح في الابطال ما زي الكونفدرالية.. يعني لو ما جبتوا خمس نقاط ممكن تعيدوا السنة!! وصدقني ما بقدر اعيد اعذرني ما بقدر اعيد.. والغريبة الوالي بعيد في نفس الكلام كل مرة.. هزيمة عابرة ما بتهزنا.. عابرة قارات؟!! الهلال ضامن وصولو للنقطة العاشرة.. لكن المشكلة في كانو بيلارز الضامن وصولو للنقطة الحداشر.. اكبر خطأ وقع فيهو الهلال انو اتعادل مع طيش المجموعة.. الما بغلب المريخ تأهلو بكون صعب.. في داعي تحرجنا كدا؟ ما كان اخير ليك البطولات الصغيرة.. قلنا المريخ عندو مشكلة تلاتات طلع عندو مشكلة ستات برضو!! متخلف في الدوري الممتاز بست نقاط ومتخلف في دوري الابطال بست نقاط برضو!! لكن الفرق انو في الممتاز وصيف وفي الابطال الطيش.. اجمل حاجة في الابطال انو المريخ بفارق الست نقاط ما قادر يبقي وصيفنا.. يا سلام لو الدوري الممتاز فيهو اندية بتستغل الفارق!! كان ريحتنا من الوصيف دا!! وستة وستة جوني من النوم صحوني للبرلوم ودوني.. هنية للشجعوني وكية للاشتكوني.!! والشكوى الدفع قروشها منو؟ اوع يرفضوها شكلا برضو.. دي تبقي مصيبة!! وسادومبا دا ما قلتوا ما بلعب.. والهلال خايف ما يشركو.. وعامل فيها مصاب.. وسادومبا لعاب.. والله صاروخ بس.. دوري الابطال دا ما زي بطولات (الروضة) يا برلوم.. الشكاوي الكتيرة دي ما بتنفع فيهو.. شال قروشي واكل فطوري.. خليك كبير قدر البطولة الانت فيها دي يا برلوم.. بختكم.. قالوا الاتحاد الافريقي حيمنعكم من اللعب على استادكم.. علي الاقل تقدروا تتعادلوا.. انتوا استاد المريخ دا فيهو شنو بخليكم تتغلبوا طواااااااااالي؟.. كدي راجعو المقصورة ولا راجعو النجيلة.. ولا اقول ليكم: راجعو السراميك.. في حاجة غلط.. تكون التبرعات؟!! أزَسْكِسْكُمْ؟!!