|
لــــو في اجــمــل من عــيونـك قــولي لـي
|
لو في اجمل من عيونك
قولي لي !!
خلي في قلبي البريدك
مرة تهجع
ارتعاشات السؤال
اصلي واثق
بيقين عاشق
موشح بي جمالك
ان عينيك هي المثال
وانو اجمل من عيونك
ده المحال
اصلي في سفري الطويل
في المسافة البين ظنوني
وبين معاني الاكتمال
شفت في كل المجرات،
أجمل ثريات الكواكب
شايله من إشعاع
عينيك بعض الجمال
ورجعت بيك
حاجة بتهد جبل التوحش
تديني قوة احتمال
ورجعت ليك
شايل بدايات القصيد
الفيه من حسنك ظلال
منظومة بي عقد الحروف
الفيها كم ماج انفعال
روعة عيونك،
زي جمال النيل دغش
حين يغازل
في السحر
نخل الضفاف
ويتقاطر السمبر يخت
عنده الرحال .
زي
قمرية بتقوقي وتحن
لمن تهب نسمة دعاش
الهابة فال .
زي عاشق بجر النم
ويغزل الليل الستار
ويشتهي النوم المحال.
ولو في اجمل من عيونك !!
قولي لي
وبرضو ما تقولي احتمال
لانو في كل المدارات
والاساطير الحكايات
وجوة في بطن الخيال
زي عيونك اصلو ما اتوجدت
عيون
تهت فيها
واشتهيت فيك الدلال
|
|
|
|
|
|
|
|
Re: لــــو في اجــمــل من عــيونـك قــولي لـي (Re: ابو جهينة)
|
Quote: طبعا لما تقول ( لو في أجمل من عيونك قولي لي ) .. دة قمة أسلوب تأكيد الإقتناع بما يشبه إنتظار إجابة أنت مقتنع بأنها تصب في قناعاتك] |
حبيبي الرجل الاديب
بين وعيونها
قصة الوله الموزع بين نافذتي الضوء في عينينا
لك حبي واشتياقي
| |
|
|
|
|
|
|
|