|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: علاء الدين يوسف علي محمد)
|
Quote: إنعام حيمورة تعبتي تعب شديد لكن .. شفتي حفل الوداع كان كيف!!!؟ أرجي الراجيك |
هيييع انا بتك يا حيمورة والله خليهم ينزلوا ليك المحادثة ..
قلت ليهم - وعد- حا نستقبله (مع اني ما جبت سيرة اخوي ) استقبال اضخم من وداعكم ..
بورداب الرياض انا سعيدة جدا بالفرصة الاديتوني ليها ..
لو عارفة القصة كان فيها غنى كان غنيت ليهم - فرمالتي- على الهواء مباشرة ..
لكن بعد محادثتي زوول لذيذ رسل لي مسج منكم قال لي
قومي لفي (يكون منو ياربي) من الوش الاخدر دا
شكرا معتصم دفع الله
شكرا صديق الموج
شكرا بورداب الرياض ..
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: محمد عبد الماجد الصايم)
|
يا سلام يا بورداب الرياض .. ويا اسر بورداب الرياض .. ليلة جميلة اعادة لي ذكري ايام جميلة ح نفتقد فيها حنين وحيمورة .. .. للاسف ومن دون الأيام .. وفي ليلة خاصة بي بورداب الرياض .. اصل متأخر .. دخلت ولقيت الناس دي .. حت شديد. كأنهم ما شافو ليهم حفلة قبل كدا .. شئ صقرية .. وشي (كشف) بتاع الستينات داك .. وشئ (تويست ) بتاع ناس زمن كوستاوي .. وكل يغني على ليلاه .. كان يوم جميل ولحظات حلوة مرت بسرعة .. وداخلني يقين عجيب .. أنو اي زول عندو حاجة عايز يجضموها ليهو .. يكلم بورداب الرياض ..
الشئ الوحيد الأزعجني في المسالة دي .. صوت عمر الفاروق وهو يحاول أن يغني .. عملية متعبة جدا .. عندي ليها بوست خاص لو سمح لي الشباب .. ما كمان نحن بنعرف نسمع غنا وشفنا الفنانين بغنو كيف .. الحاجة المزعجة التانية بالنسبة لي .. الأخ الزميل محمد عبد الماجد الصايم .. ياخ دا امس التقول مسافر هو .. ياخ حفر الحتات دي حفر مبالغ فيهو .. لدرجو انو ماف اي واحد من الزملاء قدر يرقص بي راحتو .. انا بقترح انو الأستاذ الفنان عمر الفاروق والأستاذ محمد الصايم يعملو ليهم فرقة استعراضية يا عمر ومحمد اعملو ليكم فرقة استعراضية .. والله تدقو دق في الدنيا دي .. إنتو قايلين كل الناس ممكن تستحمل..؟
يوم جميل يا معتصم .. ابقو دائما رواد في صناعة اللحظات الجميلة ..
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: tmbis)
|
Quote: وداخلني يقين عجيب .. أنو اي زول عندو حاجة عايز يجضموها ليهو .. يكلم بورداب الرياض .. |
والله نفس الكلام الكنت بفكر فيهو يا تامبا .. حاجاتنا دائماً بتتم بترتيب عجيب وبسهولة شديدة .. ياخي اللجنة دي ربنا يديها العافية قاعدة تبذل مجهود مقدر وإكتسبوا خبرة كبيرة في تنظيم الحفلات والبرامج .. والبورداب من خلفهم ما قاعدين يقصروا دائماً حاضرين .. التحية لكل الذين وقفوا في إنجاح هذا الحفل .. والأماني الطيبة للأخوين علاء وحنين بحياة حلوة في البلد ..
بس تاني أعصر على روحك شويه ياخ عشان ما تفوت عليك حاجات حلوة زي دي
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: معاذ حسن)
|
هكذا هم بورداب الرياض
البارحه فاضت مشاعرنا نحوهم , كأنها عزمت لفظ انفاسها في حبهم العميق زفراتنا الحمئه لم يفتر توارتها , هي دائماً في الإستباق لأنها بالفعل تركض بالعزيمة كلها لتخصهم بالود ما هدأت بتاتاً علّها بالماء تغسل حزنها من فيض هذا الافتراق
حــنـين يا حنين وعلاء فاكهة المساء
لكم فى القلب مساحة ألف فرسخ من حدود فضاءنا الممهول . حنين لولا الحديث عن خيرة الاسماء ما ( حُمّد ) لاعتمدناك الحنين الي الحنين . ذلكم الرجل النقي السريرة مبتسماً كعادته التي لا تفارق محياه ابدا عالياً شامخاً كما وودنا له ان يكون فينا بذات السمات البديعة في الجمال . علاء الدين حيمورابي من سيشد أزر ( درش ) بعدك ؟ ومن يشاركه العناء ؟ أعرف ان (طارق نقد ) كعادته لا يهتم كثيراً لصرعات الدهر لان له شؤون تخصه فى الاساس فيا علاء الدين لك ما ترى أي الوسائل اقرب لتوصيل هذا الحب .
أحمد الحنين
غاص فينا في البعيد إذ تعلمنا منه كيف لنا أن نقول كلمتنا ملئ السمع , لمن اراد ان يسومنا سوء العذاب . ذلكم الرجل الابيض القلب كسارية الشراع يبحر دائماً صلباً , لا يخاف البحر والريح والامواج . عندما تحدث عنه احد اصدقائه معدداً صفاته التي لم تغب عنا جميعاً قاطعه مازحاً متسامياً بكل أدب وعفه أهذا انا يا محمد ...!! أم احمد حنين آخر ..؟ ذاك هو حنين لا يركن للتربيت على الكتف ولا المدح والإطراء دائماً في تجرد ونكران ذات وهذا ديدن الانقياء مثلك يا حنين هم دائماً لا ينصتون لصوت المديح حتي لاتقف مسيرتهم عند ذاك الحد تراهم ينظرون الي علٍ ويرون انفسهم صغاراً ضعافاً وفقراء يقنعون انفسهم بأنهم لم يقدموا شيئاً يستحق الاشادة لذلك تراهم في رحلة بحث مستديم عن ما هو افضل من ذلك حتي يتبينه القوم ولكنا نعرفهم تمام المعرفه
علاء الدين وحنين ..
بلاشك سنفتقد كوكبين فريدين تشهد لهما المجرات المضيئة في السماء بأنهما الاقرب الاشد توهجاً حينما تمسـّنا الحوجه للضوء وكما قال الموج عزاؤنا الوحيد انكما ستسطعان في سماء النيلين كبذرةٍ إكسير تم من غرسها بعناية فائقه لتتأكد لنا الاسطورة حميوره وأحمد كلاهما صافي القلب كلما اقتربت منه يكيل لك الف قنطار حب البارحه كان الغناء راقصاً لا فرحاً بوداعهما ولكن ليخفف عنّا حسراتنا الموجعه طربا واستعرضا فنون الحماسة كلها فها احمد يطرب ملء اشجانه وينشر ثوبه راقصاً كالطواويس رافعاً عصاة الي اعلي ناظراً لاعلي همة في الذرى فاقت خيال الناظرين كاد ان يغيبني النوم عن احتفالية الحنين الي الحنين ولكن صوت شكري لك ابو أواب إذ كانت مهاتفتك في الوقت المناسب نهضنا وصديقي متسارعين الي الحدث
ما ان سلم علينا حتي قال بشوق ...
جايني الساعه اطناشر ....!!!
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: إسماعيل وراق)
|
حقيقة وقبل شكر بورداب الرياض الذين حضروا اشكر الذين لم تسعفهم الظروف للحضور فقد كان الحضور انيقا مثل كل الاخوة بورداب الرياض ..
وبهذه الامسية الرائعة روعة البورداب اصبح الدين ثقيلا والجميل كبيرا فربنا يقدرنا على رد الجميل وان نكون قريبين منهم رغم بعد المسافات ...
شكرا لكم جميعا وشكر خاص للاخوة والاخوات الذين هاتفو الحفل لصادق دعواتهم ...
شكرا ابو جهينة وحكومته ....
ابقو عشرة على الوزارة السيادية ( وزارة الري ) ...
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: عمران حسن صالح)
|
أخي الشفيف معتصم تحياتي ،
فعلاً كانت ليلة من أحلى الليالي كيف لا تكون كذلك والمحتفى بهما هما حنين وحيمورة ، وكفى .
كانت لمة ظريفة ، تجلى فيها ود الباوقة وصغيرته بالصقرية أما ود الأرباب وأحمد حنين وحيمورة فقد تجادعوا في العرضة الجعلية ، بينما شاكسهم شحرفان وود الموج في (تويست) الستينات ؟!
(الناس ديل من الزمن دااااااك موجودين) ؟! لووووووول !؟
و .. شكراً الفنان مرزوق ، فقد كان رائعاً- كالعهد به- وهو يشدو بأغنيات متنوعة من عثمان حسين والجابري وغيرهم .
تخريمة :
Quote: طبعا دى ملاحظات لجنة التحكيم فى برنامج نجوم الغد |
الحمد لله ما كان هناك مستمعين متعصبين من المريخاب ، وإلا لهتفوا: (التحكيم فاشل ) ؟!؟!
لكن بالجد يا ود الفاروق .. صوتك حلو.. (مواهب ضائعة) ؟! بس .. ما عرفت تختار الأغنية المناسبة!
وعوداً حميداً ومظفراً للوطن يا حنين وحيمورة . ونحن من خلفكم لاحقون بإذن الله (متى ما نادى المنادي) ؟!
مودتي ،
( ليمو )
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: عمران حسن صالح)
|
ذلك ما كان من أمر الصور التي خرجت إلى الوجود بغير شوائب تمنع النشر .. والإعتذار بقوة إلى الحبايب : خالد سعيد ، ليمو ، تمبس ، حيمورة ، صديق ، معتصم ، حليمة ، يوسف السماني ، شحرفان ، داش ، ود الشيخ وأيضاً لكل من لم تسعفني الذاكرة التي شاخت لأن حال كاميرتي لم يكن يسر " فرصة لعمر " وبالتالي فصورهم لا تصلح للنشر رغم الإجتهاد في تعديلها .. . . أتمنى من ود الباوقة أن يقوم باللازم لباقي الشباب ...
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: خالد المحرب)
|
هذا هو حضوري للمرة الثانية لمناسبة يقيمها بورداب الرياض إلا أنها الأولى بعد نيلي عضوية المنبر ، كانت الأولى حضوري لها ضيف شرف ولم تكن بطعم الثانية بالأمس فلقد تجلى الحضور بأكمله وكانت آية من الروعة والجمال وما زاد من رونقها وجمالها تلك القفشات التي كانت تنطلق من كل الإخوة وخاصة صديق الموج بالرغم من لدغاته السامة إلا أنه وفي إعقادي كان نجما لهذه المناسبة وياريت نشوف واحدة ثانية بس ما تكون وداع لبورداي حتى لا يشوبها الحزن متع الله كل الحضور بالصحة والعافية وعودا حميدا لصديقي العزيز علاء حيمورة والأخ/ أحمد حنين وأسرته ودعواتنا لهم بالتوفيق والسداد بأرض الحبائب سوداننا الغالي مع تحياتي وتقديري لكل بورداب الرياض ونصرخ في أذن المهندس الراقي مهندس المناسبة الأخ/ معتصم دفع الله ومن عاونه في إخراج ليلة الأمس بأن يضعوا في حسبانهم إقامة مثلها كل شهر من أجل توطيد أواصر المحبة بين الجميع
مع تحياتي وتقديري
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: عمر صديق)
|
بورداب الرياض...........................ألق وجمال...
أحمد حنين وعلاء حيمورة...ربنا يحفظمك ويوصلكم سالمين...كنتو رائعين...
الريس أبوجهينة ..مبروك الماجستير....بعد درع البورداب..
ألأخ/دينق من امريكا..لقيناك زى ما إتخيلناك زول جميل محياك....
منى عوض خوجلى أختنا الحنينه..دائمآ حضور الله يحفظك...
ألعزيزة..أسيا ربيع...ألق وحضور وفن..شكرآ على المشاركة الرائعة...
ألأخت/إنعام حيمورة........مبادرة دائمآ بالخير..صوتك أطربنا...
صديقى الجميل عمران....دبلوماسى وطلبو قاسى...صديقى كسر لى وأنا أكسر ليك...
عمر الفاروق....موهبة...نجوم ألأمس.....حانجيب ليك فرقة ونريح مرزوق شوية.....
مرزوق دائمآ مبدع....
Quote: منعنا الشديد القوي و كمامة الاوكسجين |
ألأخت/عزاز..سلامتك..وكان حضورك سيزيد من البهجة.....
ألأسر الذين حضروا لهم منا خالص التقدير رغم صعوبة الجو....والذين لم يحضروا فاتتكم حاجة حلوه والجايات اكثر من الرايحات..
اللجنة المنظمة..للحفل..كنتم كما عهدناكم...
لجنة بورداب الرياض..عودتونا على الفرح قرضوا على كده....الله يفرحكم يارب دائمآ..
معتصم دفع الله الشفيف..سوى لينا التقيل وخفيف..جمال روحك مافى ليها مثيل..
التحية للجميع......................إسماعيل محمد احمد عباس....
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: معتصم دفع الله)
|
حبيبنا مــو ..
الشكر لك ياجميل .. وعودتك تفرح ياصديقي،
شكراً بورداب الرياض .. فقد كان يوماً يليق بكم وبضيوفكم .. في وداع حنين وحيمورة .. كان الجمال حاضراً في كل شئ .. في تألف الأخوان ..وصدق الكلمات .. وصفاء الأرواح .. والتفاعل الجميل مع المبدع مرزوق ..
نتمنى للأخوين علاء حيمورة وحنين التوفيق في الوطن .. وهم السابقون وإنا إنشاء الله بلهم لحاقون ..
نسأل الله لهم الثبات ..
تحياتي الأرباب
تخريمة فاروقية : والله ياود الفاروق إبداع في كل شئ .. بالمناسبة في واحد داير يربطك لي حفلة عديل كده ..
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: مصدق مصطفى حسين)
|
Quote: وقدامك خميس كمان ..
يا زول على راحتك الجمعة بعد باكر ...
والله يا وزير الري المرة دي الموية حارة .... |
لوووووووول عليك دينك يا مصدق اديها واحد كاركاتير مكرب في الحوار البين ود الباوقة وسيادة الوزير دا
مووووو الرايع و بورداب الرياض فقد عظيم لبورداب الرياض خاصة و السعودية عامة سفر العزيزين احمد حنين و علاء الدين ، و نتمنى ليهم التوفيق في بلدهم الثاني السودان
تحياتي لبورداب الرياض القدلمى منهم و الجدد ، المفصولين منهم و العائدين
لحين لقاء في اقرب سماية
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: ادريس خليفة علم الهدي)
|
أحمد حنين .. والوعد أن نلتقي ..
اتصلت به وهو يطوي الفيافي والوهاد طارحاً الرياض خلفه .. وأمامه النيل والنخيل والبلد الأمين .. متجهاً إلى حيث تشتهي الأمنيات .. " هكذا الميكادو قد علمنا أن نرى الأوطان أماً وأبا " .. فلا تلم كفي أبا مهند إذا السيف نبا .. فقد صح العزم مني والدهر أبى .. هكذا علمنا الأجداد أن "من كان حافظاً لأوطانه حامياً لها فذكره مسك في الأنام وعـــنبر"
هكذا يمضي أبومهند وهو يطوي الصفحة الأخيرة من مشوار طويل من التاريخ والعطاء والذكريات .. فكم رقص العشب على خطانا .. وكم انطفأت النار تحت أقدامنا الحافية .. .. ولكن شيئاً يبقى هنا رغم تهاليل الوداع .. لم يكن وداعاً .. إذ لا وداع للعائدين .. بل تكريم لوشائج حميمة ومشاعر نبيلة نبتت كحفنة ضوء على كتلة من الظلام .. أو كما قال أبو رامي يوسف السماني .. كان أن نحن التقينا على شطٍ لم يزل رطباً والأحلام ترفرف على نوافذ مفتوحة على ساحل ووعد ومدينة .. واليوم تمضي وعطاؤك الذهبي باذخ يشحذ همتنا الشحيحة .. وليلك القمري يحفِّز القرية النائمة على همٍ ووجعٍ صقيل .. ذلك ما كنت عنه تحيد .. وأنت الآن تروم تخوم يهش عشبها للمطر الغائب .. تدنو على خطوة لا تكبو .. تمشي وعلى كتفيك عبء الشمس المشرئبة للشروق .. قد كنت فينا محارباً أصيلاً يزينه بريق الرمح والسيف وصليل القلم والقرطاس .. ووعدك فينا لن يموت .. كنا .. إلا أنت .. تمزِّق فينا الهمة العاطلة والشتات وتستديم الفرح الموقوت .. كنت والرواد ودقاسم ..أبوجهينة.. حمزاوي تزرعون العهد لتولد القيمة من جديد عندما تفتر عزيمة الأشبال على قرع الطبول وهدير الرعود ..
هذا واليوم يأخذنا للبعيد .. قل للأمهات ما تزال القبلة على الجبين .. قل للآباء العزم موروث .. من الساقية والمنجل والشادوف .. قل لحمائم النيلين إن خيامنا في الصحراء مضروبة على عجل .. قل لها ألا تنسي نوتة الألحان وموسيقى الأجيال.. قل للحبيبة في المعامل والجسور الحقول .. قل لها لتطل على الشرفة كل صباح لتنسق نبات الظل .. وتدع الأبواب مفتوحة للرياح .. وتحتفظ بمصباح الغرفة مضيئاً .. قل لها ضئ عيونكم .. نور طريقنا .. فما نزال نحتفظ بالمناديل والعطر والخاتم الفيروز .. قل للتاكا وتوتيل .. للبحر والنهر .. للغابة والصحراء .. للغرب والجنوب .. أننا عائدون ..
أبومهند .. ها قد بلغ الجدول البحر .. وانطوى ظل الظهيرة على عجل .. لا نقول وداعاً .. بل إلى لقاء على الشط الآخر .. "فظلال النخيل التطاول على حدود الحلم في حلفا يعود ليورق في البداية عند قمبيلا" ..
"الراحل " علاء أيها الحيموري .. أبيت إلا أن توقِّع في كتاب الراحلين .. فدعنا نأخذ من أثرك قبضة .. وخذ من صوتنا همسة .. خذ من احتفالاتنا أغنية .. من صخبنا ضحكة .. من صفحاتنا كلمة .. واكتب على أوراق النيل جملة حب وسلام .. لك الود يا صديقي .. دربك أخدر .. وهناك نلتقي ..
معتصم .. شقيقي الجميل .. كل كتاب .. أنت الغلاف .. كل قصيدة .. أنت القافية .. وكل أغنية .. أنت اللحن .. كعادتك دائماً تترك بصمات جميلة ولو على جدران منسية .. أحبك جداً يا هذا ..
تمبس .. رفيق المتاهة الغامضة .. بين الاستقبال والوداع .. تتكسر أجنحتك وأياي .. والوقت يمضي بطيئاً .. عابثاً .. وثقيل .. .. اشفق علي نفسي وإياك .. " أصلو العمر شوقاً كان .. وحزناً كان .. وصبراً كان .. أصلو العمر كان درباً مشيتو كسيح .. كان غرساً سقيتو بكا وقبضت الريح" اصحى ياخي الزهور صاحية وانت نايم !!!!!
داش .. يا شقا .. تأسر الحروف وتأسرني .. تبكي وتبكيني .. تمزق ثياب القصيدة وتمزقني .. مصيرك يوم تموت مرفوعاً بالحزن .. منصوباً بالشوق .. مجروراً بالحنان .. ظرفك الأسى .. وصفتك الشقاء ..
عمران .. توقظني وأنا من يتوق كل يوم أن يأتي الصباح مخففاً من عبء المساء .. مجرداً من ثقل الهزيمة .. كالأطفال يولدون بلا خطيئة .. بريئاً كسواحل عذراء موسومة بالبراءة لم تدنسها الخطي الآثمة .. وهل من سبيل يغالب الكأبة أم أن الحياة خطيئة واليوم ذئب لليوم والأيام التالية .. تسألني وأسائل نفسي كيف للأكواب الفارغة أن تحتفظ بحرارة الأنامل الرقيقة عندما ينسى الوادعون ذلك اللقاء .. عندما يتم إغلاق المقهى على أقدام الجنود البرابرة وتقتلع العاصفة تلك الشتول اليانعة .. لا أدري ..
عمران .. يا لذيذ يا رايق .. مين أدك .. مين زيك انت يا ود .. توقظني دائماً يا عمران من غفوتي الساذجة .. ولا أدري فأنا لم تأتني الدنيا فأكون من الخائضين فيها ولم تغلب عليَّ الآخرة فأكون من العاملين لها .. زي ما قال ابوحيان التوحيدي .. كأن الدنيا فك مفترس فتح فكيه ولم يبتلعني .. كأن هناك هاوية تنتظرني .. أبكي وحيداً لجدراني وكتبي وأرففي .. الليل يلعنني والنهار يرفضني .. وحظي يصطف بعيداً عن صفي .. فيا حزني ويا أسفي .. تجدني دوماً لست راضياً أعاتب نفسي على كثير من الاخفاق والخيبات (يا ريت لو كانت زي خيبة ناس شيلر وماكس فيبر ..) بالله عليك الله يا عمران ادعو لي معاك ياخ .. تحياتي ..
معتصم بالله سلم لي على كل البورداب .. وكل الناس الهنا والهناك ..
وسلام ..
صلاح/ شتات
| |
|
|
|
|
|
|
Re: بورداب الرياض وليلة تكريم علاء حيمورة وأحمد حنين ( يوجد صقرية ) .. (Re: معتصم دفع الله)
|
الحبيب معتصم دفع الله وجميع الاوفياء / بورداب الرياض
لقد كانت ليلية ستخلد ذكراها ابد الدهر .. كنتم اخوتي البورداب كما توقعنا .. جميلين صفات واهل كرم .. عفوا اخوتي على التأخير فقد كنا انا والاخ احمد حنين في زيارة للمشاعر المقدسة وافترقنا في مكة فذهب الاخ حنين برفقة اسرته الكريمة الى جدة ليغادر بحرا وذهبت انا وبرفقة الدكتور عماد حيموره واسرته الى المدينة المنورة وها انا اعود اليوم الى الرياض لاحزم ما تبقى من حقائب استعدادا للمغادرة صباح الخميس .
سوف اعود اليكم اخوتي فردا فردا عسى ان اجد من الكلمات ما يليق بمقامكم ..
| |
|
|
|
|
|
|
|