في القاهرة كنت مساهم وشغال مع عم تجاني في كتاب حزبي عن الجنوب وكانت مهمتي طباعة كل كل كلمات الميدان بدقة وارسالها لعم تجاني في ايميلو في مرة ارسلت له حوالي عشرة مواد واتصلت عليه بانني ارسلت له الموضوع اتصل علي بعد فترة وقال: ايميلك لسه ما وصل ارسلتها مره تانية واتصل علي : ايميلك لسه ما وصل وفي المره الثالثة قال لي بي حزم : يا خالد انت ايميلك ده ماشي بي كرعينو !!
08-04-2009, 06:33 AM
Badreldin Ahmed Musa Badreldin Ahmed Musa
تاريخ التسجيل: 07-03-2008
مجموع المشاركات: 1467
في الليلة السابقة للركن ذهب محمد عثمان وزميلنا للعشاء خارج الداخلية اثناء العودة كان خلفهم مجموعة من الكيزان يحاولون توقيفهم بحجة المفاهمة معهم في بعض الامور لكن المحسي تفتيحة طبعا وحاول بقدر الامكان الدخول الى حرم الداخلية
اها الصباح في الركن قال للجماعة وين الناس العايزين يتفاهموا معانا بالليل مش ربنا قال وجعلنا الليل لباسا تعالوا اتفاهموا معانا بالنهار كاااااااااااك
تحياتي
زاتوووو
08-04-2009, 07:16 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
الباش مهندس الرفيق عمر البكري ابو حراز(شايف القصة لازم تضيف ليها رفيق وزميل) سكرتير نادي الهلالورئيس اتحاد كرة القدم السابق عندو صاحبو تاجر وكلل يوم شابكو ياباش مهندس عليك الله جيب لي مكييف موية عايزو للبيت .. اها ابوحراز جاب للراجل المكييف بي مبلغ وقدره وركبو ليهو في البيت .. بعد اسبوعين لاقاهو في السوق سألو : اها يا فلان المكيف كييييف معاك ؟؟؟ قال ليهو : يا باش مهندس انت مااا جبت لي مكيييف انت جبت لي بقرة ... اجيب ليهو موية يقولوا لي عايز قش..اجيب ليهو القش يقولوا عايز موية ..
08-04-2009, 09:36 AM
محمد الجزولي محمد الجزولي
تاريخ التسجيل: 08-16-2007
مجموع المشاركات: 2983
مرة في احد الإجتماعات الموسعة وكان يقوده استاذنا محمد عبد الله مشاوي ، والأجتماع اخد طول وقت غير معتاد واجندته كانت طويلة وتحدياً (اُخر) ، وعلى اخره في عِز مشاددة حوارية بدءت تصدر ثرثرة وهمهمات جانبية من الزملاء والزميلات فطلبا زميل من زميلنا الأستاذ مشاوي بــ أضبط الأجتماع ده يازميل .. فرد عليه مشاوي والله الأجتماع ده لينين لو جاء هسع مايضبطو !! ..
وعمق التقدير ..
08-04-2009, 10:05 AM
عاطف عبدالله عاطف عبدالله
تاريخ التسجيل: 08-19-2002
مجموع المشاركات: 2115
يا محمد تحياتي بالمناسبة عم تجاني ما مسيخ عم تجاني رجل لطيف جدا
وهاك دي عنو برضو
مرة طلعت من المجلس القومي للآداب والفنون وكانت معي الزميلة سلمى مامون سمعنا صوت رصاص كثيف وتجمع لطلاب جنوبين في احدى دور الاقليم الجنوبي شلنا الخبر وجري لجريدة الميدان صادفنا عم تجاني واخبرناه بالحدث وضرب الرصاص عاين لي سلمى وقال ليها انتي مش شغالة مع جريدة الايام قالت ليه ايوه عاين لي وقال لي وانت مش مع ناس الشبيبة قلت ليه ايوه قال لينا طيب الجابكم هنا شنو انتو عملاء .. وضحك
عشان أعمل ريفرش لذاكرتك أظن الطرفة كانت تتحدث عن أحد الزميلات كان من المفترض أن تقدم تقريراً عن نشاط الحزب الشيوعي وكان رمزه ( ح ش ) وتنطق ( حش ) والجبهة الديمقراطية ورمزها ( ج د ) وتنطق ( جد ) وفي أثناء قراءتها للتقرير تكرر كثيراً قولها حش جد جد حش حش جد جد حش
فانتبهت لنفسها وتوقفت عن قراءة التقرير ( وطلعت من النص ) قائلة
.............. .............
___________________
الباقي عليك يا معلم
08-05-2009, 02:51 PM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
الزميل حاتم قطان وفي احد اركان النقاش في جامعة القاهرة الفرع واحد مايوي بدافع عن الاتحاد الاشتراكي قال لحاتم قطان حبوبتي لما تزعل مني بتقول لي يا ولد انت شيوعي ولا شنو ؟ حاتم رد عليهو :- انت وحبوبتك لمن تكونوا عايزين تبولوا بتمشوا الاتحاد الاشتراكي
عليه وبعد اعتماد الحبيب أبو ساندرا تصبح ( المساخة ) كما يلي
كان من المفترض أن تقدم أحد الزميلات تقريراً عن نشاط الحزب الشيوعي وكان رمزه ( ح ش ) وتنطق ( حش ) والجبهة الديمقراطية ورمزها ( ج د ) وتنطق ( جد ) وفي أثناء قراءتها للتقرير تكرر كثيراً قولها حش جد جد حش حش جد جد حش
فانتبهت لنفسها وتوقفت عن قراءة التقرير ( وطلعت من النص ) قائلة
بإختصاراتكم دي الواحدة ممكن طوالي تحمل وتمشي الدايات
08-06-2009, 02:57 PM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
في سجن كوبر ضابط كوز سجل زيارة للمعتقلين عايز يعمل ظريف قال بي صوت عالي : الليلة نجيب ليكم الغدا شنو فرد عليه الزميل عباس وهبة سريع جدا: بط يا جنابو .. إندكم لحم بط !! فانفجر المعتقلين بالضحك !
08-07-2009, 03:51 AM
ibrahim alnimma ibrahim alnimma
تاريخ التسجيل: 03-28-2008
مجموع المشاركات: 5197
Quote: يا اخى انت شابكنا عروبة وعرب هسا فى عربى اسمو بريمة
الاستاذ محمد سيدأحمد تحياتي الرجل اسمه كوكو وليس بريمة.... لكن مرة هناك زميلنا في الزقازيق جاء المنصورة بعد اعتصام ناجح للطلاب ضد ايقاف الاعانة ....وقد استلموها وهنا سأل طالب المنصورة زميلنا ودالجعلي قائلاً له يعني انتو اختو الاعانة عديل كدة...قال له نعم اخدنا الاعانة عديل كدة .....ثم اردف الطالب يسأله مرة اخري اختوها من السفارة ...وهنا غضب ودالجعلي من كثرة الاسئلة وجدواها فقال للطالب ياخي يعني نكون اخدناها من عمر افندي ؟؟اقول ليك أخذنا الاعانة تقول من السفارة؟؟؟
08-07-2009, 04:08 AM
salah elamin salah elamin
تاريخ التسجيل: 04-07-2005
مجموع المشاركات: 1423
لمؤتمر التجمع الثاني بمصوع جاء وفد الحزب من الداخل وكان يضم الراحل كدودة ورشاد حامد وسعاد ابراهيم احمد اضافة لجوزيف موديستو المشهور بتعليقاته الطريفة
بعد نهاية المؤتمر كلفوني ان ارتب وثائق المؤتمر عشان وفد الداخل يشيلها السودان وفعلا جمعت الوثائق في فايل ومشيت عشان اديها للزملاء الدين رفضوا اخدها معهم بحجة التأمين والتفتيش في المطار
فقال لي جوزيف مدوديستو يا اخي جيبها انا بشيلها معي فأنا جنوبي ساكت ناس الامن ما بشكوا فيني. وفعلا استطاع موديستو ادخال الاوراق للداخل .
08-07-2009, 05:46 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
كنت سادي حراسة في بيت الزميل نقد بعد ساعة طلع نقد من البيت وقال لي حانطلع اجتماع مشينا ادرمان ودخل اجتماعو وخرج بعد اربعة ساعات طلع معاهو عم تجاني وصافحني وهو يتحدث مع نقد : ياهو ده الحارسك !! " لانو انا ضعيف الحجم " ورد عليه نقد : مالو .. الراجل ده قلبو حار ! فقال التجاني ضاحكا : لموه مع ود مصطفى الشيخ شوية كده يقدر يعمل حاجة !!
08-08-2009, 06:09 AM
elmahasy elmahasy
تاريخ التسجيل: 03-28-2003
مجموع المشاركات: 1049
المكان جامعة الجزيرة في منتصف التسعينات .. كوز زنق ليك زميل في ركن بيقول ليه انت شيوعي و لا مسلم ؟ الزميل عايز ينظر و داك شابكه يازول قولينا هسة انت شيوعي و لا مسلم الزميل قال ليه أنا هلالابي ...
و تحياتي للجميع
08-08-2009, 06:14 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
الزميل عبدالعظيم البلولة يتحدث عن دور المرأة السودانية و الاتحاد النسائي و علي رأسه الأستاذة فاطمة أحمد ابراهيم في النضال السياسي و الاجتماعي في السودان .. يقوم يدخل أبوسفيان كادر الكيزان المعروف و يتحدث عن أن الأستاذة فاطمة والاتحاد النسائي و الشيوعيين يدعون الي التبرج و انهم "عريانات" ... دخل الزميل عبد العظيم و سأل كل من في الركن ان رأي أحدهم زميلة "عريانة" .. و بعدين اتلفت لأبوسفيان و قال ليه ياخي دي ما مشكلة الزميلة انك ما بتشوفها الا جهاز تناسلي متحرك .. دي مشكلتك انت ياخي امشي اتعالج ..
مهداة الي الصنديدات منال خوجلي و لبني أحمد حسين .. وصحيح أنثي و لا دستة رجال ..
08-08-2009, 09:31 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
واحد من زملاء عندهم اجتماع والبلد مطره شديده في بعض الزملاء ما حضروا بسب المطرة فكلفوا زميل مسيخ بالتحقيق مع احدههم مشى ليهو وسألو يا زميل من جيت الاجتماع ليه؟ الزميل: والله يا زميل وقعت على كراع واتملخت ابو المساخه: يا زميا اصلو كراعك دي كراع صومالية شنو يعني لو اتملخت (صاحبنا كان مكسر في صوماليه)
08-10-2009, 08:10 PM
Rawia Rawia
تاريخ التسجيل: 11-23-2002
مجموع المشاركات: 8396
حيا الغمام الزميل خالد عبدالنور لانه مقيم في القاهرة إقامة دائمة كان بيكون مسؤل مكتب الصيف لما الزملاء يرجعوا السودان في الاجازة في واحدة من الاجازات (مكتب الصيف) لقى تجاوزات غريبة وكتيرة للزملا في المكتب الاصلي قاموا بتنظيم المكتب والارشيف وطلعوا بورقة للتنبيه للتجاوز ومقترحات لجعل العمل أكثر تنظيم وفعالية وتوصية بقيام المؤتمر المؤجل ومع الورقة توصية بمناقشة الورقة بواسطة مكتب الصيف قبل تسليم العمل للمكتب المنتخب (الاصلي) المهم مناقشة الورقة في الوحدتين عملت بلبلة و في ناس كانوا رافضين مناقشتها . وعملوا مافي وسعهم لرفض مناقشة الورقة ومن ضمنها مناقشة حامية جدا قال فيها زميل (هو مكتب الصيف دا ما إنتهى ؟ ماتسلموا خلاص.. الجامعة فتحت والمكتب الاصلي رجع) قام الزميل خالد وبكل هدوء قال ليهو (إوعى تفتكر عشان يعني جا شوية برد وغيرت قميصك النص كم ولبست شيرز يبقى الصيف إنتهى)
_____________________ برضو في مؤتمر القاهرة كان الكلام عن تجاوز المكتب لمرشحين الفرع في الذهاب للمؤتمر العام (كانت الشروط لاختيار مرشحين فرع القاهرة للمؤتمر (1) أن يكون الزميل ملتزم وبينجز تكليفاته (2) أن يكون ناجح في سنته الدراسية ومهتم بدراسته) وبالرغم من إختيار الفرع لمرشحينه والاحتياطي طبقا للشروط دي فوجئنا بذهاب زملا أخرين تماما قام الزميل خالد قال (كنتو تؤلولنا عاوزين واحد طوله 158 سم وبيدرس في هندسة وإحنا كنا بعتنهولكو على طول بدل إجتماعات الوحدات للترشيح والتعب دا كله)
________________ خالد عبد النور من أروع الشخصيات وأغناها وأكثرها ثقافة وإطلاع فخورة جدا بزمالته والعمل معه وفخورة بزمالتك برضو يامحمد سيداحمد فقد كنت غير متعصب بل متفهم جدا لكثير من المشكلات الحدثت في القاهرة
في مؤتمر عام للجبهة الديمقراطية وقف احد الزملاء يتحدث بانفعال عن : الثورية والنضال المسلح وضرب مثلا ببعض احداث المجابهة بين الجبهة الديمقراطية والكيزان فقال له نقد : هسه يا زميل ده نضال مسلح ؟ دي شكلة في بيت عرس !!
08-11-2009, 04:34 AM
ناظم ابراهيم ناظم ابراهيم
تاريخ التسجيل: 04-18-2008
مجموع المشاركات: 3734
في ندوة شعرية بعد الانتفاضة في الكلاكلة كان نجمها الراحل صلاح احمد ابراهيم و اثناء قراءته لقصائده عن شهداء يوليو 71 قام كوز و هتف : الخرطوم ليست موسكو..الخرطوم ليست موسكو.. فسكت صلاح و انتظره حتى انتهى من هتافه ثم قال : نعم الخرطوم ليست موسكو و لكنها ليست مكة ايضا فضج الحضور بالضحك و واصل الراحل القراءة .
08-11-2009, 05:41 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
عندما اعتقل الامن المصرى الزميل خالد ضابط الامن المصرى اراد ارهاب والد خالد وهو يقول انت عارف ابنك خالد دا شيوعى ردعمنا عبد النور بثبات وسخرية انا كمان شيوعى من زمن هنرى كورييل
08-11-2009, 09:56 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
في احدى اجتماعات اللجنة السياسية "التجمع" قبيل انتخابات الاتحاد كنت والزميل عادل الجعلي ممثلين عن الجبهة الديمقراطية الاجتماع كان حول توزيع مكاتب الاتحاد بين اعضاء التجمع وكان يتألف من الجبهة الديمقراطية،الاتحاديين "بعد الانشقاق" ، حزب الامة، والمستقلين وكانت هناك بوادر بفوز التجمع بحسب قراءة البعض للوضع طالب ممثل حزب الامة بـ 4 مكاتب من اصل 6 حاول معه زميلنا ود الجعلي وياسر السراج ممثل المستقلين المستحيل لاثنائه عن الطلب وسط الاصرار ده رد عادل الجعلي وبزعل شديد إنتو قايلين نفسكم نازلين الانتخابات دي في الجزيرة ابا - ده وسط طلابي.. وفي الزقازيق كمان - نحنا حانخرج من التجمع وننزل برانا فكان له ما اراد
08-13-2009, 06:17 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
محمد سيد أحمد لك التحية وللمشاركين والمارين عبر هذا البوست الظريف
فى الزقازيق – مصر تم اعتقال ثلاثة من أعضاء الجبهة الديمقراطية وطبعا قمنا وقتها بكل اجراءات التأمين ومن ضمنها عدم مشاركة الزملاء المعتقلين فى وحداتهم لفترة بعد الافراج عنهم وبعد فترة الحقوا بوحداتهم وفى أول اجتماع لأحد الزملاء المعتقلين بعد الافراج عنه وعند مناقشة التكليفات السابقة لأحد الزملاء بتقديم دراسة قلت ليهم أنه الزميل محتاج لوثائق مهمة من الأرشيف لانجاز الدراسة وتعذر ذلك بسبب ظروف تأمين الفرع المرينا بيها الفترة الفاتت
قبل ما أكمل كلامى طوالى الزميل نط فى حلقى وبطريقة ساخرة ...... يا زميل كرهتونا التأمين ذاته انتوا أصله الأرشيف ده داسنوا فى نيكاراجوا
وانفجر جميع الزملاء بالضحك
08-17-2009, 09:00 AM
mohmmed said ahmed mohmmed said ahmed
تاريخ التسجيل: 10-25-2002
مجموع المشاركات: 9342
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
mohmmed said ahmed
خالد العبيد
Abdlaziz Eisa
Mohamed Yassin Khalifa
Badreldin Ahmed Musa
ALZOLZATOO
عمر الفاروق
محمد الجزولي
عاطف عبدالله
عاطف عمر
Rihab Khalifa
ناظم ابراهيم
mayada kamal
محمد حيدر المشرف
أبو ساندرا
بخاري عثمان الامين
عصام علي أحمد
Aymen Tabir
ibrahim alnimma
salah elamin
elmahasy
Rawia
Abd Alla Elhabib
معتصم مكاوي
حيدر حسن ميرغني
mahdy alamin
ياسر شبيكة
محمد هشام
فيس بوك
تويتر
انستقرام
يوتيوب
بنتيريست