|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
أهل العوض تسمية شائعة وشهيرة
وعرفت على نطاق واسع بعد اطلاق
محمد موسي (فرقة تيراب) للنكتة
الشهيرة التى تحكى عن بعض اهل
المدينة الذين ضلوا فى احد المناطق
الريفية -- وهناك قابلوا العوض
الذى عزمهم على البيت وبدات المعرفة
بين القوم المتمدنين والعوض منذ ذاك
الحين -- ذهب القوم الى اهلهم بعد ان
وصفوا للعوض مكان بيتهم فى الخرتوم
-- ولكنهم ما ان وصلوا واستقروا حتى
لحق بهم العوض الى المدينة ومكث معهم
ما شاء الله له -- ولكن الامر لم يتوقف على
العوض -- فما ان يمر يومان حتى يطرق الباب طارق
لا يعرفونه وعند سؤاله من هو : انا ما من اهل العوض .......
_________________________________________
وهكذا اصبح المصلح واسع الشيوع
وهو فى العموم يطلق على اولئك القوم البسطاء
اهل الله القادمين من الارياف البعيدة الى كرش الفيل
(الخرتوم) -- وهم ناس مميزون تعرفهم بسيماهم
عليهم طيبة الناس واصالتهم الفجة التى لا يهضمها
اهل المدينه (المتفلهمين) فى نظر اهل العوض
(المتخلفين) بنظر اهل المدن .انتهى التعريف
_______________________________________
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
الان :
ولعلمى الكبير ان كما مهولا من اهل هذا البورد
من اهل العوض فانى قد فتحت هذا البوست
املا ان نجد هنا بعض ناسنا اهل الريف البسطاء
الناس الجاية من قلع النحل وحجر العسل
ومن شلعوها الخوالدة ومن الشكينيبة ومن عد الفرسان
ومن كاب الجداد والعفاض وام صفقا عراض ومن اللعوتة
واب جداد والبنكارى وود حامد وام كدادة وام قرع
وكل اهل العوض المحترمين
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
. .
الأخ / خالد....... كل عام وأنت وأهل العوض بخير
عموما أنا برضه حأسجل مع أهل العوض
. . .
وبهدى ليك ولأهل العوض رد شاعر البطانه / يوسف الشوبلى على محمد موسى ،
رسالة بليغة من أهل العوض مخصوصة للإبن الظريف ود المدن ود موسي بدور رد السؤال لو باللغة المهموسة فينا نقيصة ولا الصورة جات معكوسة ؟
جبتا الفتنة تعلن حرب بى جاسوسة والسبب الفنيلةالقلت في الوسخ مدسوسة نحن نفوسنا في بحور العفاف مغموسة مية غمسة لاعار لا دنس لا سوسة
نحنا أهل العوض والعزة ما بنكوسا أصحاب سمته وأصحاب فرسةً نحنا أنعامنا بتعاف ترتع المعفوسة ونحن جدودنا عادي بطيعوا الجاموسة
إيانا أهل العوض أهل النحاس أب رنّة أهل البَدر ة والمهيوب وأهل الشنّة أهل عزة وأهل سمتة وعروض ومحنة ناس البادية ناساً عشرتن تتمنى
نحن أهل العوض حافظين عهود ما خناّ وللجار و العشير بالشينه ما تعجلنا بيوتنا مسيد ضيوف زمن العدم ما بخلنا وما بصح الوليد في أعرافنا يجاهلنا
ونحنا أهل العوض والله لاتقينا ولا تبدلنا واثبين كالأسود من واجبة ما اتماهنا في البر في البحرتلقانا وين ما كنّا في قمم الرجال كذب البمِس لى حصونّا
ونحنا أهل العوض في الحالي و الفات كنا قج شرك الكلا م في مشينا ما بعطلنا بس بوعيك أكان دقس في أصولنا ومتجاهلنا نحسب في الجدود ستين ومن غير إنََّ
ونحنا ربّونا الشياب فوق ماما ماتعجنا حافظين لسان حافظين كرامة أهلنا أشبال من أسود في ضبعة ما تهجنا سايرين سير كرام لامن نلاقي اجلنا
ونحنا ذاتنا يا ود موسي ما بواخذونا بي بنولـِّد و الـما عندو رأي حقو يتبع ويقلد لو ما مخـّك المخمود وحسك المتبلد جامعة موسكو ما جابت دكاترة تولد ! ؟
ما راعيت شعور الناس شعورك فاترة بتسيء للعزار أهل السيوف الباترة أَمَانةً تَدخنك شطة ودموعك قاطرة ما سمعت بالولادة أتخصصولا دكاترة !؟
نحن والله عرب وأولاد عرب لينا الشرف والعز بنسرح بالرزق نحلب نصـُر ونجز ويوم الحارة والعركة السلاح برز ثابتين كالجبال الشامخة ما بنفز
المخسوفة والمرقوعة ياها لباسنا المجلوبة والمقنية من ميراثنا الجار والعشير من الكتف لى راسنا في المال والعروض تخشى الملوك من باسنا
ليه يا ود موسى بتذم الرجال بالعايلة ما بعشّوا الضيوف تحت السحابة الشايلة ؟ ما سمعت في أم همج كاكوم عقيد الزايلة ؟ ما سمعت بالنمر حرق الخديوي القايلة ؟
لكن لسانك فك يا إبني أصلو مابتستامن تشحن في النفوس من الغبينة مُداماً بس سمة المن مثالك في البحر بترامن العربي إن رقص ألبل قرونن قامن
دحين ياخي رغم الغطرسة بالتمثيل وحبة كاشك تلقى أصفارنا أكبر من مساحة داشك شبعانين طحين من الفطير ودراشك أخير تبعد بخاف من شوكنا يخرب شاشك
ومهما زعمت من عزة ونفخ فشفاشك أعلم طينّا أنصح من تراب خشخاشك شوف ليك ناس رخاس تاخد عليهم فاشك أول غلطة كان تنيتا بنعل خاشك
دحين ياخي اولاد عرب والغير عرب كلهم أخوانك إحذر واكترث شكل قوافي لسانك والرمي فوق الجماعة بالتعابير خانك في نص البحر بتدور تقج صيوانك ! ؟
نحنا نضافنا يا ود موسي مو صابون نحنا نضافنا فى عروض وشرف مصيون نحنا نضاف ضراع بالدكري المسنون طيبين عُشرة ولكن للخصيم طاعون
نحنا سماحنا يا ود موسي مو كريمات ولمعة لون نحنا ولدنا عاشميق عكس للعرجون نحنا ناس لينا أعراض بيحكما القانون سماحة الزول يفرّج كربة الممحون
نحنا دفعنا يا ودموسي ما جركان ونحنا ما بندفع الجبنة وحليب الكان ونحنا دفعنا فى النوق أمات سناماً بان نحنا ضربنا للعوق انفجار بركان
وكان كلمنا يا ود موسي بنقول الكلام حقاني وكان غنينا بنخت الشعر فى معاني عزيزين فى النسب من ذلة مابنعاني نحسب فى الجدود ستين ومن غير عاني
دحين يا غبار الكبرياء المن المعالم حاجب أحذر منّوا لا ينسيك حقوق الواجب ومن أمثال تراثنا الفي العرف والواجب مهما العين تطول مابتعلى فوق الحاجب
وعشان ما نغلط معاك ونشيل النقط من شينك أوعى تعضعض الناس البوضحوا شينك هسع وقعت في الحلة ووجب تكشينك شن ودّاك لشعراء البطانة تشينك
دحين ياخي الطامع في كثيرة الغير قليلتو تضيع وسيد بيت القزاز ما ببدأ بالجديع بولاد الحديد القاسي في القطيع العربي إن حرن وسط المحاص مابطيع
نحن والله لا بنخاف لا بنعاف ولا بنتهدد لا بنكل ولا بنمل ولا بنتردد كمان للزول البخون عُشرتنا ما بنتودد نبقالو البلا في كل فِجَة مَمَدَّد
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: emad altaib)
|
Quote: يا الله ,,,
يأخي خليتني أحسب فيها أربعة عشر رمضان لم أفطر مع أهلي أهل العوض أربع داخلية وعشرة خارجية
وكم أنا أشتاق لصوت أمي وقت السحور آآآآخ
سجل بالعريض عندك .. |
عماد الطيب :
ياخ اربعطاشر سنة !
يا زول انت مطوفش وين ومخلى الحلاوة الهنا دى
ياخ عليك امك السنة الجاية دى اكان ما جيت صمت
مع امك يا عماد واكلت عصيدتا الناااااعمة ديك
وقراصتا بي ملاح التقلية المو خمج ومعاها جك
حلو مر وابرى ابيض وقونقوليس -- يا زول هسع عليك
الله وعدك بي ملاح السبروق متين
الف تحية يا عماد
ونتمنى لك عودا حميدا الى ديارك ومراتع الصبا
مع العوضية اهل الله
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: بشير حسـن بشـير)
|
Quote: الأخ / خالد....... كل عام وأنت وأهل العوض بخير
عموما أنا برضه حأسجل مع أهل العوض |
الاخ بشير تحياتى النواضر لك ورمضان كريم
والف اهلا بيك بين رحاب اهلك اهل العوض
الذين نتشرف دوما بالانتماء اليهم
وشكرا على القصيدة الجميلة والمعبرة
للشاعر الكبير الشوبلى -----------
والشوبلى هنا رد على محمد موسي الكوميديست
المشهور باعتبار انه اساء لاهل العوض ونسي
الشاعر تان محمد موسي نفسه هو من اكبر اهل
العوض فى السودان لان جذوره تعود الى قرية
العوض ذاتا !!!!!!!!!!!!
وواضح جدا من سياق قصة العوض ذاتا انو محمد موسي
عايش القصة دى وهى بنت بيئته ولذا اجاد فى تصويرها
ويمكن ان تلاحظ انتماء محمد موسي لاهل العوض من خلال
لهجته (العوضية) المميزة وهذا لا يخفى على اى صاحب
فراسة.
__________________
اشكرك جدا يا بشير -- والبوست لا علاقة له بافطار
او الذى منو لكن قلنا نضحك شوية ونفرق ونستغرق
شوية فى المفهوم العام والمغازى والدلالات للكلمة
ونتناولها بقليل من الدراسة والتعمق -- حيث ولطالما
تهرب منها الكثيرين باعتبار ان اهل العوض هم مثال
للناس الغجر او المتخلفين دون النظر الى النصف
الاخر من الكوب او تسعة اعشار الكوب حسب وجهة نظرى
الممتلئة بقيم ومثل وموروثات نادرة كندرة الماس
والدر والالماس موجودة وتميز هؤلاء القوم البسطاء
_______________________________________________
ونحن هنا لنعرف من يقر بانتمائه لاصوله ممن ينكص
على عقبيه -- وانا عارف اهل العوض هنا لكن اخير
يجوا براهن -- انا قايل
ورمضان كريم
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: جعفر محي الدين)
|
الحبيب جعفر
ياخ والله انت قلت الحقيقة كل الحقيقة
Quote: أهلا يا خالد عنان العوض دا خالي لزم ياخي كرش الفيل كان قالوا لأهل العوض امرقوا لا تالا الصعيد ولا السافل ما يفضل فيها نفر ضمة
وحتى ناس أم درمان السمحين ديل فيهن صفات أهل العوض السمحة كلها |
والله نمرق اهل العوض من خرتوم سيدى دا الا تعدم طافى النار !!!!
اهلا بيك يا جعفر
ونتمنى تكون عضو فاعل فى الرابطة الشامخة
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: هويدا شرف الدين)
|
Quote: والله نحن ما من اهل العوض لكن ناسبنا اهل العوض اهل العوض بي بساطتهم وشهامتهم وكرمهم واي حاجه حلوه فيهم عندهم حاجات تغيظ تغيظ بي معني الكلمه حسب بساطتهم بياخدو الامور بي بساطه لدرجة الغيظ غايتو مافي داعي نكتر الكلام بس يجلونا معاكم في الفطور |
العزيزة هويدا اهلا بيك
ولو انتى منهم ولا لا نحن سجلناك
بعدين الناس ديل انتى ما دام عارفة حاجاتهم الحلوة الفيهم دي كلها
باقى حاجاتهم البتغيظك دى هينة وبتتحلحل لانهم ناس بسمعوا الكلام
وما بعديهم العيب -- وانتى بس شايفاهم من بعيد كدى قربي منهم شوية
والله تانى ما تفارقيهم
Quote: البشير دفع الله دا ما يغش عليكم لا من اهل العوض لا حاجه. |
انا ذاتى قلتا كدى لكن هو دايرنا يا جماعة نحن نقولو لا
انت ما عربشن ؟؟
هويدا اهلا بيك ومتشرفين كتير والله
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
Quote: عماد الطيب :
ياخ اربعطاشر سنة !
يا زول انت مطوفش وين ومخلى الحلاوة الهنا دى
ياخ عليك امك السنة الجاية دى اكان ما جيت صمت
مع امك يا عماد واكلت عصيدتا الناااااعمة ديك
وقراصتا بي ملاح التقلية المو خمج ومعاها جك
حلو مر وابرى ابيض وقونقوليس -- يا زول هسع عليك
الله وعدك بي ملاح السبروق متين
الف تحية يا عماد
ونتمنى لك عودا حميدا الى ديارك ومراتع الصبا
مع العوضية اهل الله |
قاعد جمنب النبي المابنبي , والأبري وصل والقراصة والعصيدة اليوم فطوري بجوار سور الحرم المدني بس كاتلني الشوق ليّ أمي ,
يا هويدا شرف الدين يا المناسبين أهل العوض الغياظين هههههه مش تحاملتي عليهم كثير ؟! ياختي رمضان كريم وحمداً علي السلامة , فتحت ليكِ بوست عريض طويل إفتقاد وكدا , وشلاقة أهل العوض ههههه
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: عبدالله ود البوش)
|
يازولة والله نحن بنجى دافرين ساى
لا بنسجل لا حاجة
شفتى ليك أهل عوض سجل
ديل إلا يسجلوا فى كشف العمرة ويملوا لينا باب شريف بالعراربق
لووووووووووووووووول
ويا بشير حسن بشير متعتنا والله بالقصيدة الرائعة المليانة شهامة وأخلاق وكرم أهل العوض
رغم أمدرمانيتى إلا أنى أعتز وأفتخر بأهلى أهل العوض حتى ظننت أننى العوض
وتحية خاصة لصاحبة البوست الذى يرد الروح فى شهر الروح
وكل سنة تامين لامين أهل عوض على أهل حضارة والعولمة شطبت حاجات كتيرة ويابخت أهل العوض المتعولمين
عمكم هشام شيخ الدين
قولو آمين
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: يازولyazoalيازول)
|
سلام ياخالد مابقول ليك سجل نعم إننا نحن أهل الجلد والراس ونحن البنسجل الناس
هاك أولاد الشلهمة ديل :
تِيرابــَـك طِيـنـُـــو عزيــز ماهـو مبَنقِر وَد نَاسَــاً رتـوت مَاهُـن عَـويـِت بَازنقِر ياأب ِرســوَة العَلي ضَهَر المِرَادفَة مصَنقِر ماخَتـّيت خَجـِلـتاً سِـيــدهَا يمشِـي مدنقِر *** نحنا جـدودنا يـا ( خالد ) قِبيـل دِيــدَان وأولاد ريشَة نَحَسِـب لاالحسين فرسان مانا عِـريـــب بننـقـَـاد للدُنا وننهــان وصقـّـار مِيتـَرا وافلـَـح من الغربــان
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: يازولyazoalيازول)
|
Quote: رغم أمدرمانيتى إلا أنى أعتز وأفتخر بأهلى أهل العوض حتى ظننت أننى العوض
وتحية خاصة لصاحبة البوست الذى يرد الروح فى شهر الروح
وكل سنة تامين لامين أهل عوض على أهل حضارة والعولمة شطبت حاجات كتيرة ويابخت أهل العوض المتعولمين |
الزول يا زوووول
والله انت من اسمك دا هيلنا كان ساكن ام درمان ولا جدك ليبرمان
وبالله قلت لى الناس اتعولمت -- والله لو شفت هسي انا بكتب من وين
تحتار الله يخليلنا العولمة والتعولم من اجل عوض متعولم
ودى خطتنا العشرية الحضارية القادمة تحت شعار لاب توب ودى اس ال
لكل عوض .
يا زول يا زول يا زول
انت الزول
مودتى تغشاك اينما حللت وارتحلت
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
الليلة البلد نارت بي ست السجايا السمحة
العالية سمية بت الحسن ود طلحــــــــة
بت عز القبايل اهل الدواى والسبحــــة
عزك من قديم تيلاد وماهو المنحـــــــة
_____________________________________
عندما جاء عمدة حجر العسل بن عمنا يوسف العوض ود بليلو من احدى اسفاره
مارا باحد عمد البطاحيتن فى منطقة الزاكياب بشرق النيل -- اعترضه عمدة
البطاحين وحلف الا يمضوا معهم باقى يومهم ذاك معه وكان العمدة ودبليلو
ومعه نفر قليل لا يتعدى عددهم الخمس رجال -- فوجئ العمدة ود بليلو ان
القوم قد ذبحوا له ما يقا رب الثلاث ثيران رباعا -- وهاش ود بليلو
واعجبه الكرم الفياض الذى غمره به اهله البطاحين -- فاقسم ود بليلو
انه عازم جميع عموديات البطاحين وعلى راسهم الناظر خالد محمد صديق
طلحة وحضرت جميع عموديات البطاحين وشيوخ عربا فى موكب مهيب منيف
على مائة عربة او تزيد وقد استقبلهم اهالى حجر العسل من مكان بعيد
وشهدت حجر العسل تظاهرة ما شهدنا مثلها فى ذلك اليوم -- يقال ان
العمدة ود بليلو قد نحر من الابل والبقر والغنم ما يقارب المائة
كان هذا فى العام 2002 على ما اذكر و قد قال شاعرنا ابو لكيلك
مخاطبا الناظر خالد ود طلحة وموثقا لهذا الحدث الكبير :
ود طلحة القبيل الريسة علا بنودا
جبل قيلى ساقية البتدوى رعودا
مرحبتين حبابك فى حجر العسل وبلودا
برضو قبايلو فى الجود والكرم معدودة
فيهو شوايقة فى الخلا والبحر موجودة
فيهو كواهلة حسانية عارفا حدودا
فيهو اولاد جعل اهل النحاس الدودا
وفيهو اولاد عجيب الدولتن مشهودة
وفيهو مسلمية قبيلة سابلة عروضا
وفيهو صواردة فوق النيل مخدر عودا
خيلان ود حسونة البرقع المقدودة
والقصيدة طويلة .......
___________________
وقد اصبحت علاقتنا بالبطاحين وبالعمدة ود طلحة
علاقة مميزة ولا ننقطع عنهم فى صغيرة او كبيرة
___________________
العالية الملكة بت ود طلحة
والله انا سعيد ايما سعادة بمرور جنابك من ناحيتنا
وتحايانا الباذخة لك وتغشي عبرك كل اهلنا عيال
بطحان ..
وقواسيب مودتى
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
الناس الخجلانين يقولوا نحن اهل العوض
خجلانين ليه والبخجل شنو وبالعكس كمان
يا جماعة انا واحد من الناس لو خيرونى
الان من اكون ما اخترت الا ما الذى انا
عليه ولا ارى ان ثمة ناس او قوم مهما
بلغوا هم اعلى منى شانا او شاوا
مهما تطاولت اموالهم او طال بهم
بنيان او عمران -- وهذا لب الموضوع
يا جماعة هل نحن راضون بما نحن عليه
ام اننا قد ضعنا فى وهج وبريق الحياة
الزائفة اللاهثة القصييرة الحقيرة؟؟؟
نواصل
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: Elawad)
|
Quote: العوض شخصيا ما أظنه محتاج تسجيل... ولا شنو يا خالد؟ بسيرة حجر العسل تأكدت من أنك شقيق ابن الدفعة الأخ المهندس السر عنان... تحياتي و سلامي الحار له أين ما كان. |
العوض بي جلالة قدرو .......
والله انت يا العوض حقو نسويك الرئيس
بس دا فى الدورة القادمة لانو دى حاجزا
اخوك لى طقوقو دا --
العزيز العوض -- نعم صدقت
اخوك هو شقيق زميلكم باشمهندس السر
والغريبة كان معى قبل دقائق وهو من
المتابعين لهذا البوست وكان كل يوم
يطلع عليه -- تحاياك وسلامك الحار
تبلغه باذن الله ويا ريت لو عرفتنا
بيك اكتر لانو العوض براها شوية
مش كدة --- سعدت بك قبيلة العوض
ودمت فى نعمة ربي وعافيته وامنه.
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: الطيب بشير)
|
Quote: : ابري احمر بتفلو تشرب وتفتف
بلدينا عبد الله ودّ البوش
أشهد أنـّـك قد وصفت حالة مزاجية بمنتهى دقـّـة و روعة السـّــرد
اللهم ارض عن هذا العريبي الذي وهبنالـذّة فقدناها لزمان ليس بالهيـّـن |
يابوليس والله نحن ناس العتامنة ديل جننا وجن بوليس طابت عشان بكتل علينا كلابنا كتلو لي جابنو واولادا الخمسة والكلب الضكر والله تكرفست جابنو من ضربة البندق لاسع بشوفا قدامي ولاقالت بغم بس كرفسة وموتة ادن جاي انكلمك ويومن اللجو لكتل الكلاب خدم اللنداية بخافن ساي جزارتي يوما داك بتبور على الطلاق كان امشي بيها انداية قوز الرهيد وديك كمان قالوا فيها شيتا على ذمة ميتة ود جرمة قال لمن امرق من انداية قوز الرهيد وامش لخالو امحد احمد ود اللطرش كان لاقتو العنز في الشارع اقوليها زيك يا خالتي . جنابو الطيب تحياتي واشواقي اخوك عبدالله محمد عبدالله ود البوش من حنتوب وافترقنا في 1982 انتو الدفعة الورانا ( داخلية ضيف الله )
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
مرحب ناس العمدة ود بليلو
Quote: الليلة البلد نارت بي ست السجايا السمحة العالية سمية بت الحسن ود طلحــــــــة بت عز القبايل اهل الدواى والسبحــــة عزك من قديم تيلاد وماهو المنحـــــــة |
منور بيكم ياالنوركم بروق متقدحة قضايين غرود في أقلّ من اللمحة الحالوكم تملي على وجوهم فرحة و للكازوكم حجّرتوا درب السرحة ... خالد يازول كان كدي أنا حبوبتك عديل نعمن أنا عمة الناظر خالد محمد صديق طلحة إن شاء تدوم تلك العلائق المتميزة ومادام في فرسان زيكم الأمل ممدود بي سلبة عشميق متلت ماها حبال رِمتة
تجدني أكثر سعادة بمروري بمضاربكم العفيّة .
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: سمية الحسن طلحة)
|
Quote: عندما جاء عمدة حجر العسل بن عمنا يوسف العوض ود بليلو من احدى اسفاره
مارا باحد عمد البطاحيتن فى منطقة الزاكياب بشرق النيل -- اعترضه عمدة
البطاحين وحلف الا يمضوا معهم باقى يومهم ذاك معه وكان العمدة ودبليلو
ومعه نفر قليل لا يتعدى عددهم الخمس رجال -- فوجئ العمدة ود بليلو ان
القوم قد ذبحوا له ما يقا رب الثلاث ثيران رباعا -- وهاش ود بليلو
واعجبه الكرم الفياض الذى غمره به اهله البطاحين -- فاقسم ود بليلو
انه عازم جميع عموديات البطاحين وعلى راسهم الناظر خالد محمد صديق
طلحة وحضرت جميع عموديات البطاحين وشيوخ عربا فى موكب مهيب منيف
على مائة عربة او تزيد وقد استقبلهم اهالى حجر العسل من مكان بعيد
وشهدت حجر العسل تظاهرة ما شهدنا مثلها فى ذلك اليوم -- يقال ان
العمدة ود بليلو قد نحر من الابل والبقر والغنم ما يقارب المائة
كان هذا فى العام 2002 على ما اذكر و قد قال شاعرنا ابو لكيلك
مخاطبا الناظر خالد ود طلحة وموثقا لهذا الحدث الكبير :
ود طلحة القبيل الريسة علا بنودا
جبل قيلى ساقية البتدوى رعودا
مرحبتين حبابك فى حجر العسل وبلودا
برضو قبايلو فى الجود والكرم معدودة
فيهو شوايقة فى الخلا والبحر موجودة
فيهو كواهلة حسانية عارفا حدودا
فيهو اولاد جعل اهل النحاس الدودا
وفيهو اولاد عجيب الدولتن مشهودة
وفيهو مسلمية قبيلة سابلة عروضا
وفيهو صواردة فوق النيل مخدر عودا
خيلان ود حسونة البرقع المقدودة
والقصيدة طويلة .......
___________________
وقد اصبحت علاقتنا بالبطاحين وبالعمدة ود طلحة
علاقة مميزة ولا ننقطع عنهم فى صغيرة او كبيرة
___________________
العالية الملكة بت ود طلحة
والله انا سعيد ايما سعادة بمرور جنابك من ناحيتنا
وتحايانا الباذخة لك وتغشي عبرك كل اهلنا عيال
بطحان ..
وقواسيب مودتى |
الاخ العزيز خالد العمدة يوسف بليلو نزل في ديار اولاد حاج حميد (جدي لوالدي) في منزل عمنا طه محمد الفكي (طه حاج حميد) بس بالغت عملتها عمودية عديل يا خالد!!! نحن بطاحين لم ولن تكون لنا عمودية فنحن اخوال نظار القبيلة والخال والد كما يقال لكن كلمتنا في القبيلة مسموعة ونرفض العموديات ونحب المركزية في القبيلة ممثلة بشيخها ليقضي امره بالتشاور مع اعيانها.
تصدق انا كنت موجود في المناسبتين في الزاكياب وحجر العسل لكن بالجد كرم العمدة ود بليلو فايت الحد. وكرم اهلكم والله خجلنا من الترحيب للبشاشة للتكريم للوداع. الله يخليكم ويخلي اهل العوض. تحياتي لك ومن خلالك للاخت سمية الحسن طلحة وكل اهل العوض المروا من هنا. والله من بدري عايزين نخش بس خفنا من جنس كلامك القلته للبشير.
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: محمد عمر الفكي)
|
Quote: الاخ العزيز خالد العمدة يوسف بليلو نزل في ديار اولاد حاج حميد (جدي لوالدي) في منزل عمنا طه محمد الفكي (طه حاج حميد) بس بالغت عملتها عمودية عديل يا خالد!!! نحن بطاحين لم ولن تكون لنا عمودية فنحن اخوال نظار القبيلة والخال والد كما يقال لكن كلمتنا في القبيلة مسموعة ونرفض العموديات ونحب المركزية في القبيلة ممثلة بشيخها ليقضي امره بالتشاور مع اعيانها. |
الاخ الكريم محمد عمر الفكى
تحياتى النواضر ورمضان كريم
وشكرا على الهذه المعلومات القيمة
والتى كنت انا فى حاجة لها منذان
بدات اكتب فى بداية هذا البوست
والغريبة اننى سالت ابن العمدة نفسه
عن من هو الرجل الذى عزم العمدة فى الزاكياب
ولكنى لم اجد اجابة -- الحمد لله انا وجدناك انت هنا
والحقيقة ان كل الذى تم من امر العزومة والعلاقة الكبيرة
التى نشات بيننا والبطاحين كان سببا فيها هؤلاء الرجال العظام من
منطقة الزاكياب اعمامك وابواتك اولاد حاج حميد -- فهم كانوا السبب
فى العلاقة كلها وكرمهم الفياض كان ملهما وكان السبب المباشر لعزومة ود بليلو
لناظر البطاحين ود طلحة وعموم مشايخ البطاحين فى ذلك الزمان الجميل :
شكرا محمد عمر
والتحايا عبرك لاهلنا الكرام كلهم بالزاكياب
ونخص منهم اولاد حاج حميد والعم طه حاج حميد
وسلام الله وامنه يغشاك وكل اهلنا الكرام بنواحى بالزاكياب والسرحة وكل عيال بطحان.
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: سيف الدولة كامل)
|
Quote: السودان كله اهل العوض ,, الخجله فوق شنو
اهل الجود والكرم, طيبة وسماحة اخلاق,,
فاطرين معاكم |
تمام يا سيف الدولة -- دا الكلام الصاح 100 %
الناس الاطلقوا التسمية بالمناسبة هم اهل العوض ذاتم
والحقيقة التسمية والقصة ست الاسم بتاعة العوض فيها
تشويه وظلم كبيرلهذه القبيلة من الناس -- ناس محمد
موسي ديل من قلب هذا الواقع بتاع العوض والذى منو
وانا فى الحقيقة بعتبرعم ناس مصابين بنوع من الفصام
اللا حضارى -- لانهم دايرين يعيشوا فى حالة انكار لى
واقعهم الحقيقى والنكتة وما صاحبها كان بمثابة كارثة
تحمل فى طياتها قدرا لا يستهان به من اللا اخلاق وظلمت
الى حد كبير اناس كثيرين من غير وجه حق .
شكرا سيف الدولة
ودمت فى نعمة وعافية
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: Elkalakla_sanga3at)
|
Quote: ما دايرينكممممممممممممم وبندركم بخيت وسعيد عليكم فطورنا فوق طهر الشارع انا اسمي مكتوب من السديرة وناس فريق وراء ورمضان كريم |
انت معانا ولا مع الخيانة هسي ؟؟
انا ما عرفت اسجلك ولا لا ولا الحكاية عندك شنو
ما فهمنا حاجة يا ناس السديرة الغربية يا زول
نحن اهل العوض ما ناس بندر كدى تعال لنا تانى
نحن راجينك بي فطورنا وحرم ان ما جيت لا الدغش
ما نفطر .
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: ودقاسم)
|
الحبيب ود قاسم
تحياتى تغشاك وتغشي العوض
ذلكم المسكين من منطقة الهامش
الذى لا يسمع له صوت ومتهم بجنحة ما هو من مقترفيها
ولا يكاد يسمع له صوت انه العوض المسكين المظلوم
شكرا ود قاسم ...............................................
Quote: الحكومة – رغما عنها - تعترف بالظلم الواقع على كثير من مناطق السودان ، واعترافها هذا يعتبر مدخلا لحلّ مشكلات هذه المناطق . وقد استنت الحركة الشعبية سنّة لا أعلم حتى الآن هل هي حميدة أم سيئة ، وهي قسمة السلطة والثروة على أسس جهوية ... والمناطق الأخرى التي تحمل السلاح ، أو تعلن بصورة ما عن عدم رضاها بنصيبها من التنمية ، كلها ستسهتدي بهدي الحركة الشعبية لتنال نصيبها من الثروة والسلطة ،،، وكل هذه المناطق ، الجنوب ، الغرب ، الشرق ، جبال النوبة ، النيل الأزرق ، كلها تري أن المركز استأثر بما لا يستحقه وبالتالي فهي تنازعه وتنادي بإعادة التقسيم وعدالته ،،،، لكن أليس من حقّ العوض ( مواطن من قريتنا بالنيل الأبيض ) ، أليس من حقه أن يقول أنه لا ينتمي للمركز ؟ لماذا تكون القرى التي لا تصلها أي خدمات - ماء ، علاج ، تعليم ، كهرباء ، طرق - ولا يستمتع أهلها بأ ي مشاريع تنموية ، ولم يعرف أبناءها التعليم إلا مؤخرا، ولا يتوفر فيها أمن إلا أمن الله ، ،، لماذا تعتبر هذه القرى جزءا من المركز الظالم ؟؟؟ وما هو حقها في الاقتسام الجديد للثروة والسلطة ؟؟ لماذا تعامل هذه القرى باعتبارات جغرافية لقربها من المركز وكأنها جزء من المركز وشريكة فيما استولى عليه ؟؟؟ ترى لماذا يكون العوض بهذا الشكل ، وبهذه البساطة ، وبهذه السذاجة إن كان المركز قد منحه حقوقه ؟ لماذا ننظر إلى العوض هكذا ونعتبره جزءا من المركز الظالم ، وهو مظلوم حتى سلب لحمه ؟ العوض مسكين ، ومسكين لآخر حد ... فلا أحد يعترف بظلامته ، ولا المركز يعطيه حقه ... والسؤال : هل سيضطر العوض لرفع السلاح في وجه الظالم ، والمتجاهلين لظلمه ؟ آمل أن يتم إنصاف العوض حتى لا يضطر إلى ذلك ... |
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: خالد عنان عمر)
|
وين ناس دارفور وكردفان والنيل الازرق
والجنوب ناس دينق وزكريا جوزيف وبلاير ...
يعنى هم ما عندهم (أواد) لكن بكون فى اسم
زيو زى ملوال ولا منقو يخيل لى ممكن ..
يا اخوانا العوض دا ما زول ولا اسم
العوض دا هو السودان
هو الانسان السودانى زى ما قال اخونا
سيف الدولة كامل
العوض هو كل السودان حتى اولئك الذين
بتنعمون فى قلب المدن او فى المهاجر
هم ناسنااو كانوا الى عهد قريب
ونحن ذاتنا حبينا فى البلاط زى ما قالت
واحدة اختنا قبل كدة --
المهم
عاوزين الناس تسجل حضورا هنا زى
ما قلت عشان نعرف (حاجة) !!
هاكم شوفو العوض الجنوبي دا :
http://www.youtube.com/watch?v=GWTdIqWe97Y
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: محي الدين جبريل)
|
الأخ ود عنان سلامات .. و رمضان كريم وربنا يزيد ويبارك دعوتك دى شفناها وفاتت إضنيننا... بس كنا عشمانين ترسل لنا الوليدات.. .فيشان قلنا المتل أولا د عمك خبارو بعزموه بالكروت وجرايد بكرى... وهسع خفنا رمضان يكمل.. وشايفين ضيوفك كتار وفيهم أكابر.... أها قلنا نصلكم فى بكانكم نكرم ضيوفكم معاكم ونلومك لى كبارك.. وعندنا طلب برضو... نحن جايين من بعيد ومعانا ضيوف... الزول الفى الصورة دا عمدتنا هنا .. نغشاكم نفطر معاكم وبعدين نسوقك أنت وضيوفك و نواصل لا سافل.. تحياتنا لكل أهل حجر العسل وكان ما خايفين من نتلوم ننسى زول كان ذكرنا أسامى صغاركم وكباركم.. تحياتى للجميع وأنشا الله عامرين سيف
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: SAIF MUstafa)
|
Quote: دعوتك دى شفناها وفاتت إضنيننا... بس كنا عشمانين ترسل لنا الوليدات |
حبيبنا سيف مصطفى
مساك سعيد ورمضان كريم
والله كان حارين الوليدات بقدرو يصلوك ما بنقصر اصلهم الوليدات من امس حمارتن وقعت فى عيش ود البصير وساقوها المسانيح ودوها سوكرة القريقريب وقالوا الا عشرة جنيه غرامتا -- ولا هسي نحن نحنس فى الغفير عشان يخليهن خمسة-- دحين امسحا لينا فى وشينا يا اخوى.
Quote: . الزول الفى الصورة دا عمدتنا هنا .. نغشاكم نفطر معاكم وبعدين نسوقك أنت وضيوفك و نواصل لا سافل..
|
يا اخوى تعال بي عمدتك وحرم كان ما ضوقنا كبدة البل ما يفوتنا بس خايفين ضيفك يضوق كرامتنا تانى يابا القومة وتروح علينا السفرة ...
Quote: تحياتنا لكل أهل حجر العسل وكان ما خايفين من نتلوم ننسى زول كان ذكرنا أسامى صغاركم وكباركم.. |
يا ريت يا سيف تذكر ناس لو بتعرف من ناس حجر العسل
ودمت فى نعمة ربي وعافيته
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: محي الدين جبريل)
|
Quote: سجل ياخالد
مع إنى جيت متأخر
لكت قيد اول زول
وماقلتوا المواعيد متين |
ازيك يا ود جبرين
ومنورين يا الارباب
الحقيقة انو الموضوع ما افطار بقدر ما هو طرق على الموضوع
بصورة فيها نوع من النقاش المباشر لمسالة العوض ومسالة الظلم
والعدوان اللفظى التم فى النكتة بتاعة محمد موسي -- نحن هنا يا
يا ود جبرين دايرين نقول انو محمد موسي كان غلطان وجانب الحقيقة
والصواب بتعميمه المخل وانو الوضع دا اضر بي ناس كتيرين جدا واساء
اليهم اساءات كبيرة -- فى حين انو بتلقى الناس ديل نفسهم والذين تاتيهم
المذمة من ناس محمد موسي -- تجدهم يعتبرون ناس المدن اى كلام -- تجد الواحد
منهم يقول لك : هه دا ود مدينة ساكت !!
دا هو كل الموضوع يا ود جبرين
وليس موضوع فطور او خلافه
ورضان كريم
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: شول اشوانق دينق)
|
Quote: سجل عندك يا ود عنان لسببين: 1- أخوى الكبير درس فى شيخ لطفى 2- شول بيعنى عوض
|
حبيبنا شول
العوض الجنوبي
ياخ والله انا اسعد ما اكون اليوم
بمداخلتك التى ادخلت على من السرور
ما لا يمكن وصفه -- وسعدت اكثر بالتعرف
على ثقافة الاسماء ومعانيها عند الجنوبيين
ويا ريت يا شول تقوم تجيب لينا امثلة تانى
للاسماء الجنوبية ومعانيها لانو دا رصيد معرفى
نحن فى اشد الحوجه ليهو .
شكرا شول وسعدنا بك جدا فى شدرة العوض الضليلة
وتغشاك مودتى وفائق تقديري
| |
|
|
|
|
|
|
Re: الإفطار السنوى لأهل العوض بالبورد -- أسرع سجل -- لا يوجد خجل (Re: يوسف الخضر)
|
خالد عنان عمر ...
Quote: وقراصتا بي ملاح التقلية المو خمج |
جابتليها صلبطه كمان يا خوي ... قُراصه شنو البعرِفوها <أهل العَوض> علشان جِنِس صلبطتكُم دي فوق الشي الماهو هيلكُم الواحِد بِتْجنبكُم القمِح أكان عِرفو <أهل العَوض> بِسوهو نِقيمات صباح العيد ، تاني شوقُم ليهو ... فيكُم كرم وفيكُم مُروة عِلا القُراصه خلها دي حقتنا تب
| |
|
|
|
|
|
|
|