|
|
 آخر الفونج
|
في تسعينات القرن الماضي وتحديدا في أواخر تسعيناته، ايام الناشيونال ديموقراتس الآينس NDA (التجمع الوطني الديمقراطي) كان طلبة الجامعات عصرئذ يفرون تباعا الى القاهرة في انتظار إعادة التوطين الي تتم على اثر توقيعات ناس فاروق أبو عيسى وكبار قادة التجمع، التوقيعات والحالات التي غيرت حياة الكثيرين من المجازفين معدومي الخيار وأيضاً المجازفين الذين كان لهم بعض الخيار ولكن جازفوا بها نحو آمال في الخاطر-في ذلك الوقت يحكي لي محدثي الشهير بالدهنون ، والدهنون زول نكره لغير طلاب جامعة الخرطوم في الفترة مابين أوائل التسعينات الى اواخرها، كان عضوا غير بارز بيد انه مؤثر في الجبهة الديمقراطية أيامها، وقد جمعتني به هرجلة ونقاشات وتمباك وونسات البحث عن ذات الخالق في السغما بكلية الاقتصاد مع نفرٍ كلما ذكرتهم هاجت الخواطر- يحكي لي في ونسة صوالين قبل سويعات جمعتنا مع احبه آخرين أغراب وأحباب وسناير في الكلية ولا اذكر كيف انتهى امرُ الحديث الى ما انا بصدده، غير أنني خرجتُ وانا مولع بمزيد من الإيضاحات حول أولئك الذين كان بيدهم تقرير مصير جماعة لم تلق حظها من الروايات ومن ما حاك بها من ظروف شتى، ويشكلون في ذات الوقت مصدرا هاما للعمل السياسي المؤثر في أعمال السودان، كونهم ظلوا يرفدون من مهاجرهم عالم الإعلام وغيره بمساهماتٍ غيرت بصورة او باخرى واقع حال البلاد،
قال لي مُحدثي، انو قادة الفصائل السياسية كانو عادي هم البحددوا كوتات مستحقي التهجير، وانو مالك عقار كان بجيب كميات كبيرة ويعتمدهم للجهة التي تقوم بدورها بتذكيتهم لإعادة توطينهم، المهم قال انو عقار مرة يجيب لوري عديل ومرات كم نفر الى ان أتى اليهم بزول قصير عجيب المنظر مجدوع الاضان جديرٌ بالتامل وحكي لهم ذلك الزول انو كان من ضمن مجموعة بشرية قطعت مفازة السدود (ظني بها جهات ضحلة كثيرة المستنقعات) سيرا على الأقدام لأسابيع طويلة اثر الحروب المرعبة التي دارت رحاها زمانئذ، ولأنهم كانوا ولايام طويلة يسيرون في مناطق ممطرة ومستنقعات متصلة ولا يرون أرضا ناشفة جافة، ولأنهم بالضرورة كانوا يحتاجون للاكل والملاحات فقد كانت المجموعة برمتها بتخت طين على راسه كونه أقربهم للارض وبتقوم تخت فوق الطين ده طين تاني مجفف وفوق الطين الجاف بتخت جمر وعويش مولع وبقوموا يختوا حلتهم فوق القصة دي كلها ويطبخوا ماتيسر من صيد السما والماء والاشجار، وموش كده وبس بل حكى لهم انو الجماعة كلها كانت وفي مسيرها نحو الخلاص بتقوم وتأكل من الحلة المختوتة فوق راسو دي وهم ماشيين نحو الخلاص..
إها اللذيذة في هذا الأمر كله، انو الزول الزول المسؤول من قبول حالات إعادة توطين السودانيين قال ليهم بعد سماعه لهذه القصة متأملا شكل الرواي واضانه وعموم هيئته: يخوانا الزول ده هو آخر الفونج، وتأني ماظنيت بعدو في زول من جماعة عقار في تلك الأصقاع، وقرر مايلي (يُقفل ملف إعادة توطين الفونج حيث ان آخر الفونج قد وفد الينا) نقطة ، الشاهد في هذا الامر ان آخر الفونج الآن في فلوريدا وعايش في أمان ربو..
شكرًا للاصدقاء الذين جعلوا ذلك اليوم جميلا بسردهم، جميلا بتناول مصاعب والام تلك الفترة بسماحة يتبينها المستمع في حكاويهم المتسامحة نحو ماتعرضوا له عبر سنين إعادة التوطين القاسية والتي بدات من جهاز الامن السوداني وامتدت الى شظف المعاناة في القاهرة وانتهت بهم الى حالٍ الإنسان الآمن في أزهى مظاهر التكريم ..وسلاما على اخونا "اخر الفونج" وقد صار مواطنا في دولة يمكن ان تتحرك اساطيلها لاجله..
هذا البوست في هذا الهزيع من الليل مهدى للاحبة : المعز المريود بنواحي نيو هامشير، وميرف ابوشيبة بنواحي الأيست كوست وعاصم شرزم بنواحي استراليا وروح صديقي وصاحبهم محمد عبد السلام عليه السلام بنواحي الله جل وعلا...
|
|
 
|
|
|
|
|
|
|
|
Re: آخر الفونج (Re: DKEEN)
|
وأنا بدورى أهديه لنفسى .. لأننى طالما حرضتك على الكتابه هنا .
بالله ماتعمل لينا الشفع والبمبرز والكلام الميت ده سبب .
يأخ نحن بنقرا هنا لناس بتعدوا بأصابع اليد الواحده , وأنت منهم .
عرفت إنك مؤخرا كنت متجدع مابين نيس وكان ومدريد ونواحى برايتون .
حمد لله على السلامه ,, وما أظنك تانى حترجع البلد .
يأخ تحياتى .
وتقبل أيضا تحيات دينا خالد .
| |
|
|
|
|
|
|
|
|
|
Re: آخر الفونج (Re: كمال سالم)
|
وانا برضو زي ما قال كمال سالم اعلاه في جزئه الاول (ولا شان لي بتجدعك في أي مكان) وشاني ان تكتب ثم تكتب حتى تُكتب عند الله كاتباً
| |
|
|
|
|
|
|
|
|
|
Re: آخر الفونج (Re: الصادق اسماعيل)
|
اخونا فى نواحى الصقيعة قامت عليه الحسادة ...
غايتو جنس حسادة ... حسادة من الطراز الاول ...
ــــــــــــــــــــــــ
دى يا كمال تبعات شكله طرفها الاخر بكون قاعد فى الواق واق
لعن الله الوسائط التى جعلت من الاشياء كمصباح علاء الدين فى الاساطير
تقل لها كن فتكون ...
| |
|
|
|
|
|
|
|
|
|
Re: آخر الفونج (Re: دينا خالد)
|
اها ياكمال وباعتبارك زول سرك باتع في أمر دينا خالد دي..
ولأنك دوما كنتا الأكثر إصرارا على انو دينا دي لماحة وذكية وكتاباتها ذات مدلولات عميقة..
كدو بلاي أنعصر لينا وورينا الدلالات الذكية ورا هذه المداخلة اللغز..
انا اول مرة اعرف انو دينا كانت عندها شكلة مع اول الفونج من ايام الواق الواق ومنطقة السدود..
بس ناس المعارضة ديل ماف شي بعيد عليهم..بكونوا اتلاقو في كمبالا وجامعة ماكرري..
| |
|
|
|
|
|
|
|
|
|
Re: آخر الفونج (Re: الصادق اسماعيل)
|
الحبيب الصادق..
انتظر بس لحدي ما نجيب إفادات حول تواقيع الإمام حول هذا الخصوص ( آخر الأنصار)..
أشياء تقع في مجاهيل الأحداث ولكنها تترك آثار بليغة حول تحركات الكرومزوم السوداني في نواحي هذا العالم ..اعتقد انو التوثيق للذين قاتلوا صدفة وخرجوا الى عوالم أخرى في صدفٍ أخرى مسالة تستحق ان يوثق عنها..
سلامات لكل الاخباب بطرفك وللحبيب وراق..
| |
|
|
|
|
|
|
|
|
|
Re: آخر الفونج (Re: كمال سالم)
|
سلامات ياكيمو...
وتحيا ونهدئ ليك الاجمل ياانيق..
محمد عزيز ده زي آخر الفونج راح يكون آخر العنقود بالانا شايفو منو ده ولله الحمد ..
اعتقد انو لو في زول وأخد مفروض يعرف حقيقة دينا خالد ويلاقيه/يلاقيها وجها لوجه فهو انتا، كونك وعبر كل هذه السنين لاتزال تشغل بال،،
وانا من هنا بناشد ستي دينا بانها لو فكرت تمرق وشيها من قناعا العاجي ده ..فاليكن لمعاليك..
وخليك ظاهر ياخ الدوحة بدون طلاتك دي افتقدت الحيوية..
| |
|
|
|
|
|
|
|
|
|
Re: آخر الفونج (Re: DKEEN)
|
سلام دكين
بالله ما تطول الغيبه لأنو في ناس كتيرين هنا راجين دكين يكتب ويستمتعوا....فما تخلينا ننتظر كتير بالله.
متابع في الصفوف امام الاماميه.
| |
|
|
|
|
|
|
|
|
|
Re: آخر الفونج (Re: الشيخ سيد أحمد)
|
وحين سئل كيف انتهى به الامر الى منطقة السدود، أجاب :مامتذكر ومامهم، تكون الجبخانة او اللوري، الجبخانة كانت في اللوري واللوري الله يلعن الجنازير أبت تركب فيهو ، المطرة رحلت البهائم واللوري غرس، شلنا الحلال خلينا اللوري والجبخانة..
لاقونا بي بهايم وكن (كان) كنا بي جبخانة مابقبضونا..قلبو اللوري وقفلونا في ضهر اللوري المقلوب .. نكرنا اللوري وقنا رواعية ما جياشة..أسبوعين ماف زول صدقنا،، بجي عسكري ود ح رام بشحد المرة المعانا وبتديهو. بين فرقات الحديد بتاع اللوري والمطر...بس زول بفتح ليك باب ماف..
يوم فكونا قالو لي : تعال يازول انتا ما بتمشي ساي إلا نقطع ليك اضنينك ديل..وماقطعوها كلها بس خرتوها فوق فوق..واحد بقولو ليهو فخر الدين قال: ان سبناكم المرافعين مابتسيبكم..ولو جريتو المرفعين ما بجري عبث..
واهو يا صحبي انا في امريكا بدون ضيق ولا المرافعين ما لاقتنا..بس اشتقنا للحلة..
انتهت إفادة المذكور..
أسرى صندوق اللوري الآخرين ماف زول فيهم وصل مع آخر الفونج...
| |
|
|
|
|
|
|
|
|
|
Re: آخر الفونج (Re: garjah)
|
| Quote: بجي عسكري ود ح رام بشحد المرة المعانا وبتديهو. بين فرقات الحديد بتاع اللوري والمطر |
ياربى العسكرى ود ا ل ح ر ا م ده العمله المهببه دى عملها كيف ؟!
اللورى ده كان مقلوب بالعرض ولا بالطول ؟
عايزين مزيد من الإيضاح .
الله لا كسبك يا دكين .
| |
|
|
|
|
|
|
|
|
|
Re: آخر الفونج (Re: كمال سالم)
|
Quote: دى يا كمال تبعات شكله طرفها الاخر بكون قاعد فى الواق واق
لعن الله الوسائط التى جعلت من الاشياء كمصباح علاء الدين فى الاساطير
تقل لها كن فتكون |
والله يا دينا دى فكره ما بطاله .
يلا خلينى أعمل ليكم المديده حاره إنتى ودكين ده .
عشان تدوروا لينا شكله كاربه .. وأنا متأكد إنو شكلتكم إنتو الإثنين
حتكون شكله راقيه وممتعه ,, على الأقل ترفعوا الفراش الفى بيت الدرويشه
بت ضياء داك ,, وتخلوا أهلوا يجوا هنا ويسنمتعوا بالدرويشه بت خا لد
والساحر دكين .
يلا يا دندون سخنى
وما تسكتى لدكين الحقار ده ,, شايفو إتهمك يإتهامات كتيره فوق .
على الأقل تعالى وريهو إنتى قاصده شنو بالواق واق دى !
يا دكين بالله إنت بقيت بتاع واق واق ,,, لا حوووووولا
والله أنا لو فى محلك أركب وأمشى الرياض شارع المشتل حيث منزل دينا
وأفرج فيها الشارع كلو ,,, واق واق عديل كده ,, بالغتى يادينا . وكمان مصباح سحرى !!
(عدل بواسطة كمال سالم on 06-01-2013, 05:04 PM)
| |
|
|
|
|
|
|
|
|
|
Re: آخر الفونج (Re: DKEEN)
|
Quote:
يابكري ياخ الدعايات الفي نص الكتابة دي بصراحة سخيفة..
ماتسك القروش في نص الكتابة ياخ..
اكتفي بي الاعلانات الفوق دي..
والمرة ام كرش مترهل دي ياخ مثيرة..حاول خفف من حدة الاثارة دي |
ينصر دييينك يا دكيين
ياخى متعه والله ما بعدها متعه الا متعة بتاع اللورى المقلوب بين فرقات الحديد فى الصى
:
:
:
:
:
زول جديد لكن معتق فى المتابعه
مع التحيات لله الزاكيات
| |
|
|
|
|
|
|
|
|
|
Re: آخر الفونج (Re: حيدر حسن ميرغني)
|
حيدر ياخ، هي رحل ولا رحلت؟؟
بلاي حدد..
ياكمال:
دينا دي لو فيها دين مفروض تحدثك النصيحة ياخ..ياخ انتا مخلص لفكرة دينا دي بشكل غريب..
| |
|
|
|
|
|
|
|
|
|
Re: آخر الفونج (Re: كمال سالم)
|
| Quote: بالعرض ولا بالطول ؟ |
البفرق شنو ياكميو..طول ولا عرض، لوري مقلوب في صي ، اي حتة ممكن تكون طول واي حتة ممكن تكون عرض..
المهم درجة سخانة الحديد في الصي..
| |
|
|
|
|
|
|
|
|
|
Re: آخر الفونج (Re: garjah)
|
انتامرقتا من وين ياقرجة؟
زمن..من زمن شرير بتاع البرتقالة تاني ماسمعناك بي حدانا..
تابع تابع ..
جاهزين جاهزين..
| |
|
|
|
|
|
|
|
|
|
Re: آخر الفونج (Re: الشيخ سيد أحمد)
|
ود سيد احمد..
والله انا تاني ماعندي البقولوا.. اصلا انا كانت عــــا########ي عبارة "اخرالفونج" دي وقدرتا بحمد الله عبرتا عن فرحي..
تاني غايتو إلا تلقوها من الرواة الثقاة ناس معروف ودينا خالد ديل..
| |
|
|
|
|
|
|
|
|
|
Re: آخر الفونج (Re: DKEEN)
|
دقيقة.. دقيقة.. دقيقية..
امس اتصلتا بي اخونا معروف، اخونا القادم من ميرلاند..
قتا ليهو: بما انك قريت الموضوع بتاع اخر الفونج، ماعندك شي تضيفو لي اخر الفونج صاحبكم ده..
قال لي: انتا القصة دي عايزة كده يعني؟
انا طبعا استغربتا، وقتا ليهو هي شنو الانا عايزا كده؟
معروف ردا: القصة دي. يعني انتا عايزا بالشكل ده..
قتا ليهو وانا مستغرب: شنو يامعروف ياخ انا قاعد قاعد احكي حواديت ولاقصدك شنو..هو على كيفي اكيف سير الخلق الذاتية ..ياخ كلامي ده جزء من سيرة ذاتية لي زول حقيقي ووضع حقيق..
قام قال لي بس ياخ القصة دي ما كده..انا ماعارف انتا فهمتا الحكاية الحكيناها ليك كيف..بس ماكده..
قمتا سبيت ليهو ولي تاريخو: يامعروف انتا جادي؟ يعني هسي انتا عايز تقول لي انا مصداقيتي حول توثيق الحقايق المعاصرة اتلعب بيها في مكان عام؟ّّ!
قال لي كده خلينا من المصداقية انتا اصلا ماعندك، وقنب يضحك، بس القصة فيها اختلاف مكاني كبير..
الراجل ده (اخر الفونج) والملابسات التي واكبت مشهد ظهوره كانت مختلفة..
قتا ليهو وانا متضايق: يامعروف ياخ ده الكلام الاتقال اول امس، سمع اضاني دي، شنو مشهد تاني وغير كده وانتا القصة عايزا كده؟!! من الاخر كده في اخر الفونج ولا ماف؟؟
ردا معروف: ايوا الفكرة العامة صاح بس التفاصيل فيها اختلافات قد تكون جوهرية غير انها لاتؤثر في عموم الوصف العام وفي نهاية مستقر امره..
قتا ليهو على مضض وانا حاسي بي انو معروف عايز يشتهر على حساب بوستي وعلى ضهر اخر الفونج : اها طيب ورينا الصاح وين..
قال لي بي طريقتو العجيبة في الحكي – واخونا معروف لمن لم يلتقيه- طريف الحكي، يعتدُ بجـده لامه السيد حسن جميل، وفي العادة، ُيحرك معروف قبضة يدينو الاتنين في اول الحديث ومنتصفه واخره، وغالبا في كل وقت الحكي بكون ضامي يدينو في شكل "بونية" الى الاعلى وهو بتكلم (بالضبط وضعية العريس المتحنن).. وهو ككل الزملاء والزميلات طلبة وطالبات الجامعات والرفاق، لامن يتكلم بسرح في الكلام في تركيز مستمر لايتخلله سوى حرف (آآ) وهو حرف اتصال، كان اولاد الجبهة الديمقراطية وناس "الزملاء والزميلات" بتمو بي هذا الحرف ما انقطع من حبل الافكار ليلصقوه بقادم الافكار.. المهم حكى لي ان الامر لم يتم في القاهرة ولم يتم بذلك الشكل..
وانما تم الامر برمته في لملمة جيش التجمع اول امره..
وهانذا وللدقة وتحري صدق الاحداث، ولاني زول بحب اقدم الحقايق كما هي من فم الرواة الثقاة، من امثال الصحبة الميمونة التي حباني بها ربي ناس دهنون ومعروف ومن فتح الله لي بهم..هانذا اعيد سرد جزء من القصة برواية معروف..وغالب ظني ان هذا الامر لسع ليهو سبع روايات خضر مزرورات في سنابلها وان الايام كفيلة بطرح حصاد ماتيسر.
اها قال فيما قال: لامن الجماعة بتوعين التجمع الوطني الديمقراطي قرروا انو النظام ده لابد من مجابهتو بي العمل المسلح وقالو نعمل جيش، وعلى اثر ذلك قدحت خيول رجال المرغينية في التاكا وتوكر وهمشكوريب ودرديب مهللين بغوث آل البيت وعترة ستي مريم ..وفزع الانصار بجيش الامة وابن الامام خريج الكلية العسكرية الملكية الأردنية، بعد ان دعاهم امامهم للهجرة والجهاد واعدا ومذكرا الصابرين والمجاهدين بفضل الجهاد ورفقة الصحبة الميامين، يقول المؤرخون لتلك الحقبة في مقتطف سريع :
"اما حزب الامة فلم يتاخر هو الاخر في اعلان موقفه بل كان السباق في تكوين جيشه بعد نداء السيد الامام الصادق لانصاره بماعرف " بالهجرة " من السودان الي اسمرا وقام بعدها انصاره بتكوين جيش الامة وذلك قبل الاتحادي بشهور عديده وكان ذلك في العام 1995 والتي كانت تحت قيادة الامير عبدالرحمن المهدي نجل الصادق وعلي عكس الاتحادي لم يكن السيد الامام الصادق يتبرا من قواته العسكرية بل اعتمد عليها في خروجه من السودان في عملية " تهتدون " التي خرج بموجبها عبر الحدود " السودانيه – الاريتريه " ليبدا مرحلة العمل المعارض قبل ان يعود في عام 2000 بموجب اتفاق جيبوتي مع الحكومة السودانية " انتهى المقتطف (ولو قوقلتوه بتلقو كاتب المقتطف)
اها وفي ظل تجييش اطراف التجمع لي ماتيسر من جيش، وفي ظل وجود جيش الحركة الشعبية، قدم عقار مايليه من حصته في جيش المعارضة فونج خُلص، من ابناء النيل الازرق وبقايا عترة عمارة دنقس والفضلوا من احفاد ابو لكيلك وحضارة القش التي استمرت حوالي اربعة قرون ومافي حيطة تدل على انو كانت هنا حضارة..
اها مالك بقى يشيل ويجيب العيال مارقين للدواس والتسلح، لوري اثر لوري وفوج اثر اخر، فتية اخيار فتوات، لو جالدت بهم الانقسنا لجالدوها، ولو خضت بهم بحر ازرق لخاضوه مع عقار لايسالونه علام ذلك..
واستمر مدد الفونج تباعا، وناس فتحي احمد علي يشيلو ويوزعو في الكلاشات..ثم قال: حتى اذا جاءهم رجلٌ قصير القامة، رخيص العمامة وتعلوه غبره، مجدوع الاضان، اضناه المسير يرتفع من الارض مسافة متر وبعض المتر، في احسن حالاته فهو يصلح لكي يكون رجلاً وديعاً، و لايمكن وصفه على أي حالٍ على انه مقاتل..
الزول بتاع التجنيد قال ليهم: ده منو الجاب الزول ده، جيش امة ولا فتح ولا شنو ده بالضبط؟ قالوا ليهو ديل من جماعة مجندين مالك..
رد بعد ان سرح طويلا في فكرة الجيش العامة: هسي ده كلام ؟؟..
خلاص تاني مالك ده ماظنيت يقدر يجيب لينا زول..ده اخر الفونج..
هذه هي الرواية التي تقدم بها الاخ معروف تم ايرادها لمزيد من الشفافية..
وانا احب تعدد الروايات للحادثة الواحدة، ربما في ذلك شي من تغبيش التاريخ، بس خصوبة اذهان المشاركين في صنع التاريخ بتدي الحدث التاريخي بُعد برامجي ودرامي ممتع..
كمثل رواية اخونا الحسن بكري حول (سمر الفتنة) والتي تناول فيها قصة عجوبا الخربت سوبا بشي من الدراما واحاجي الحبوبات خالطا الحقيقة بالوهم بالاهازيج بالزيطة والزمبريطة وبلغته شديدة البلاغة ، فمرقت رواية اقل مايقال عنها انها معجزة روائية تاريخية..غبس لي الحقايقي صاح بص الان بين يدي حقائق موغلة في شجوها..
وطبعا السودان ده مافي فيهو شي شفاف واي شي لازم تعلوه الضبابية وتتغبشها شي من الرواية الذاتية والاضافات الغير حريفة.. يعني ذي حادثة بيت الضيافة كده، بالرغم من التاريخ القريب جدا للحادثة ماتقدر تعرف راس الرواية الصاح من كرعيها..
هذا وسنحاول استدراج مايمكن استدراجه لتمحيص الروايات حول هذا الامر وحول امور اخرى قبل ان تمتد اليها ونسة الصالونات وفلاحي الخيال فتنبُ بعدها الروايات دغلاً من انصاف الحقايق واخماس الاوهام واسداس الاسرار في تلوت الليل البهيم..
طبعا انا العبارة بتاعة ( اخر الفونج) دي عاجبــاني شديد، وتقع في نفسي كموقع "اخر الرجال الابطال" و" اخر المحاربين" واخر الناجين من الذبح صار يعبد خنجرا" .. وانا على قناعة بان قائلها زول بليغ، نجيض الكلام، ليس له من اللغو حظ، ولاشك ان من يجتمع به في قعدة صوالين يحكون زول محظوظن كونه لن يكون مواجها بحديثٍ فيه ملل..
..
فكرة انو يكون في اخر لي امة من الصعب ان تجد لها اخراً محدداً، فكرة بليغة على الاقل بالنسبة لي، فحركت الفكرة هذا البوست..بالذات لو كانت الامة قد غُيبت سلفاً..
| |
|
|
|
|
|
|
|
|
|
Re: آخر الفونج (Re: حيدر حسن ميرغني)
|
حيدر ياخ خلعتني ساي..
كيمو قاصد دينا خالد كونها كانت ساكنة في الرياض شارع المشتل..
الرياض بتاعة الغبار والاتربة ..الرياض الجنب بري يامعلم..
طبعا كمال خالص مابين العمارات والرياض..لانو دينا ساكنة في العمارات شارع واحد..
باب بيتم اسود بي بني قبيح كده..
| |
|
|
|
|
|
|
|
|
|
Re: آخر الفونج (Re: سفيان بشير نابرى)
|
دكين
الرواية ما كانت بالشكل دا بل بطريقة مختلفة خالص، لكن انا ما حأقولها ليك، لسبب بسيط جداً ممكن اقولو ليك، اتخيل إنو أنا قاعد لي في جلسة سودانية هنا في امريكا وجا واحد من السودانيين الوناسين ديك ومسك الجو بالقصة دي، وأنا كزول كنت في جيش المعارضة واسمرا، وجيت امريكا وعملت لجوء، فلازم اخش في غلاط في الونسة دي لسحب البساط من السوداني الوناس (تُقرأ القدّاد أو البرّاي)، ولأنه (أي البراي) غالباً ما سيكون قد قرأ القصة في سودانيزاونلايز وقشر بيها في الونسة، فأنا ما داير اقول الرواية بتاعتي لـ(آخر الفونج) إنتظاراً للحظة التاريخية (لمقاطعة البراي أعلاه).
ولمزيد من التفاصيل حول اللحظة التى سأذكر فيها شهادتي عن (آخر الفونج) يمكن قراءة الرابط أدناه
خشم.....خشمين
| |
|
|
|
|
|
|
|
|
|
Re: آخر الفونج (Re: الصادق اسماعيل)
|
| Quote: ها ياكمال وباعتبارك زول سرك باتع في أمر دينا خالد دي.. |
| Quote: إصرارا على انو دينا دي لماحة وذكية |
| Quote: انا اول مرة اعرف انو دينا كانت عندها شكلة مع اول الفونج |
| Quote: مفروض يعرف حقيقة دينا خالد |
| Quote: وانا من هنا بناشد ستي دينا |
| Quote: دينا دي لو فيها دين مفروض |
| Quote: لفكرة دينا دي بشكل غريب. |
| Quote: ناس معروف ودينا خالد ديل.. |
| Quote: كيمو قاصد دينا خالد كونها كانت ساكنة في الرياض |
| Quote: لانو دينا ساكنة في |
هضربة شديدة ......................
ـــــــــــــــــــــــــــــــــــــ
ووسايلك ما شريفة ....
| |
|
|
|
|
|
|
|
|
|
Re: آخر الفونج (Re: دينا خالد)
|
| Quote: Ummoayad Moayad ·طيب وقت في طين جاف مالم مبهدلين الزول ما يختوحلتم محل جابو منو الطين الجاف ويعملو ملاحاتم . برضو في حاجة ناقصة هنا كانو بيختو البرش بتاع الاكل وين ؟؟برضو في راس الزول ده وبيقعدو ياكلو . شلت هم الزول ده بيكون مصدع ليوم الليلة. |
انا برضو لفتتني الحتة دي، لكن قلت لو الناس بتتعامل مع الحكايات بالشكل دا، التاريخ كان بقى رياضيات.
يا أم مؤيد مؤيد، تاريخنا مليان بالثقوب،، شبكة دار الرياضة بالنسبة ليهو بنطلون جينز.
| |
|
|
|
|
|
|
|
|
|
Re: آخر الفونج (Re: معاوية الزبير)
|
| Quote: هذا البوست في هذا الهزيع من الليل مهدى للاحبة : المعز المريود بنواحي نيو هامشير، وميرف ابوشيبة بنواحي الأيست كوست وعاصم شرزم بنواحي استراليا وروح صديقي وصاحبهم محمد عبد السلام عليه السلام بنواحي الله جل وعلا. |
| |
|
|
|
|
|
|
|
|
|
Re: آخر الفونج (Re: امجد محمد الأمين)
|
يا دطين في داعي تجيب لينا الكلام,,,
هو دا جيش شنو الناسو كلهم بتعارفو دا
كمان جابتلها قصص بشيلوهن من سودانيزاونلاين واقشرو بيهن, والله دي قصة
الكلام في بطني متل الجراد في البخسة*** والمغالتني اليجي يتصنط
أو كما قال السيل ام خميرة
| |
|
|
|
|
|
|
|
|
 Re: آخر الفونج (Re: Marouf Sanad)
|
يا دكين...
قلنا لكم لا تتركوني للسباعِ تهش عن جسدي ذؤابات الرجاء...
لو انصرفت للكتابة الأدبية لما لحق بك أحد في هذه البرية. ابرا قلمك وسنِّو واطلع بينا للرواية التي تملك ناصيتها ولكنك كسول!
عُد للكتابة الطااااعمة يا بُني ولا تشك لحظة واحدة أنك اهل للكتابة الجميلة وإن كنتَ أعجمياً مثلنا. فيا هداك الله اكتب اكتب حتى تضج الكتابة!
آخر الوصايا!
| |
|
|
|
|
|
|
|
|
|
Re: آخر الفونج (Re: Marouf Sanad)
|
Quote: هو دا جيش شنو الناسو كلهم بتعارفو دا
كمان جابتلها قصص بشيلوهن من سودانيزاونلاين واقشرو بيهن, والله دي قصة
الكلام في بطني متل الجراد في البخسة*** والمغالتني اليجي يتصنط
أو كما قال السيل ام خميرة |
هاهاهاهاها هاااااااااااااااااااااااااااي
| |
|
|
|
|
|
|
|
|
|
Re: آخر الفونج (Re: معاوية الزبير)
|
معاوية سلامات وحمدلا عالسلامة..
ياخ ماف طين جاف في السدود.. الطين ده اصلا نشف فوق راس الراجل المسكين قبل فكرة اعداد الحلة..
بعدين مافي برش للاكل ياخينا..انا قتا وكتبتا فوق انو من كوارث الرجل انهم كانو بياكلوا وهم ماشين مباشرة من الحلة ومباشرة من راس الرجل..
شفتا فكرة تاكل الطير من راسه ديك؟
بس ياكل الفونج من راسه..
يامعاوية ياخ دي مهمة توثيقية وحاولة لتحري الصدق في حق الرجل بايراد كافة الروايات المتوفرة لاثراء الخيال وتشجيع اي زول عندو معلومة..
بعدين في نهاية الامر حنمرق بي الرواية الحقيقة بعد عرض الروايات على مسامع الرجل شخصياً..
| |
|
|
|
|
|
|
|
|
|
Re: آخر الفونج (Re: DKEEN)
|
أظن أن هناك مقاربة بين هذا العنوان وعنوان لفلم أمريكي بعنوان the lasat of mohicans (آخر الموهيكنس) الذي يتناول قصة رجل شجاع مقاتل في أحدى الحروب الأمريكية وهو رجل من قبيلة الموهيكنس أحد قبائل الهنود الحمر في أمريكا و التي أوشكت على الإنقراض. الفونج (الشلك - البرنو - بني أمية) مثلث إذا ما تفاصلت وتباينت أضلاعه ورست الحقيقة على أحدى جوانبه سيكون للمشهد قصة جديدة, وفي آخر المطاف لا يصح إلا الصحيح, وما كان في الأصل سيظل في الفرع مهما تباعدت السنين.
| |
|
|
|
|
|
|
|
|
|
Re: آخر الفونج (Re: حاتم موسى عبدالعزيز)
|
الوقوف من اللعب لي فترة ليهو أثر في الأداء
حجوة أم ضبيبينة الحاصلة في أب كرشولا سعادتو بتخليك تقول ديل دياشة كديت
أو كما قلت في بوست في زمن سابق إنو الكيزان دخلوا في عضم الجيش ونخروهوا
دعايات بكري دي وقفتها كيف؟ الفي نص الكتابة قصدي لأنو المرة الفوق دي ما أظن الزول يقدر يوقفها بالهين
| |
|
|
|
|
|
|
|
|
|
Re: آخر الفونج (Re: tabaldy)
|
يا دكين
يبدو أـن لسفيان رواية أخرى
Quote: أو كما قلت في بوست في زمن سابق إنو الكيزان دخلوا في عضم الجيش ونخروهوا
|
صدقت يا تبلدي
| |
|
|
|
|
|
|
| |
كمال سالم
الصادق اسماعيل
دينا خالد
الشيخ سيد أحمد
Marouf Sanad
garjah
حيدر حسن ميرغني
محمد حمزة الحسين
سفيان بشير نابرى
معاوية الزبير
حاتم موسى عبدالعزيز
فيس بوك
تويتر
انستقرام
يوتيوب
بنتيريست