|
|
 موظفوووووووووون ولكن !!!!
|
جمعة سعيدة ومباركة أيها الموظفين النايمين كالعادة والصاحيين والفي سوق اللحم والخضار طاشين !
ياجماعة الخير أناالليلة اتوكلت على الحي الذي لا يموت وقررت أبستف ليكم بعض الموظفين في السودان
رغم أن بعض دي تعادل 99% لكن عشان ما نظلم الواحد في المية من ذوي الشعور الحية والإحساس بالوطنية
وعشان المسألة تبدو في ظاهرها نسبية وليست مطلقة أقول بعض على من يسمون مجازا بموظفين إذا ما
قورنو بالموظفين في الدول المتقدمة و طبعا البون شاسع ,,
الموظف ياأمة الأمجاد في الدول المتقدمة لا يعاني من هموم أسرية ولا واجبات إجتماعية ولا أمراض نفسية
مزمنة بسبب القهر السياسي والإضهاد الإجتماعي لذلك تجده ينام مبكرا ويصحو وهو قمة في النشاط يخرج
من بيته فتفوح منه رائحة الصابون المعطر والكلونيا والآفتر شيف يركب المترو وهو في غاية السعادة
حتى ولو كان وزيرا أو مديرا عاما يقرأ الصحف كلها داخل المترو ويتركها على الطاولة ليستفيد منها
غيره فالأنانية ليست من طبعه أما الموظف عندنا قولو يا لطيف يصحو وكأنه مضروب على قفاه يدخل
الحمام الموية قاطعة كالعادة يغسل وجهه بموية من الزير يلبس ملابسه على عجل ثم يركب سيارته
التاكسي لزوم توصيل الزملاء والزوغة الساعة 12 للعمل كسائق تاكسي بقية اليوم ,, يصل الموظف مكتبه
وهو شبه نايم يسلم على الزملاء يسمع خبر خبرين ثم يستغرق في ثبات عميق ليواصل بقية الحلمة التي
بدأت مع هبايب الصباح وهو موعد عودته للبيت لأنه غالبا ما يكون عائد من حفلة رابة أو قعدة خاصة
بها ما لذ وطاب وما لا يخطر على قلب إنس أو جان طبعا الحلمة بتدور حول أجمل واحدة كانت قاعدة في
الصف الأمامي جميلة ومستحيلة ولكن الحلم حق مشروع أماإذا كان متزوجا فمؤكد سيحلم بزيادة في
الراتب عشان يقدر يشتري لأم العيال التعبانة وشقيانة توب ( حنان عشراوي او هبة زاغت ) ومن لا يعرف
قصة هبة زاغت نقول ليه أن هبة المهندس وهي أشهر مذيعة تلفزيون سوداني أرسلت في مهمة إعلامية إلى
دبي لكنها لم تعد حتى الآن حيث زاغت ثم وجدت عملا في القناة الرابعة بعجمان ( تستاهلي ياهبة حلوة
وشاطرة وما بتشبهي تلفزيون السودان الكحيان) نعود لموظف الهنا بعد أن صحي من حلمته طبعا ماصحى
براهو صحوه عشان الفطور ( صحن فول كبير مليان زيت وطعمية ,, عشرة قرون شطة إضافة إلى كورية
كبيرة مليانة شطة بليمون و20 خبزة من النوع الجيد وهاك يا فطور وونسة وقرقراب وقطيعة في
الموظفات فلانة البايرة قالو جاها عريس ,, بالله ؟؟ ومنو الفدائي دة وفلانة ديك راجلها طلقها عشان
دخلت في ختة في المكتب وما كلمته ولقاها مشترية بيت من قروش الختات وهاوهاوها إلخ ثم الخروج إلى
ست الشاي التي تجلس في بؤس شديد بجانب مبنى الوزارة لشرب الشاي وطق الحنك آأأي هي ست شاي لكن
شديدة بشكل والله لو ماالظروف كان بقت ممثلة ! يعني ناعومي كامبل أحسن منها بشنو ؟ الساعة بقت
إتناشر ولم ينجز أي موظف واحد على الألف من المهام الموكلة إليه ثم خرجوا من المكتب للعمل الخاص
سائق تاكسي أو ركشة ,, وفي الثانية ظهرا عادوا ليوقعوا على كشف الحضور و الإنصراف !!!
نجي عاد للموظفات الحلوات ,, تياب بيضاء زي الفل كلها مستوردة إشترنها من رباب الموظفة معاهن
بالتقسيط المريح عشان رباب عندها أخت مغتربة في الخليج بترسل ليها تياب بدل المصاريف ,, طلعت
رباب التياب من الكيس كلو واحدة شالت التوب المناسب سجلت رباب الأسماء على الدفتر وموعد الدفع
لتبدأ الونسة والشمارات التقيلة والخفيفة حتى العاشرة موعد الفطور الماخمج فول بالزيت والشمار
والطعمية , سلطة دكوة بالبصل والشطة ,, كبدة ,, أم فتفت ,, سلطة خضرا, مشاوي ,, باسطة, بسبوسة
وهاك ياأكل الرسول شيلي من الطعمية دي ,, النبي كان تقومي ,, خصمتك بالله تاكلي من أم فتفت شوية
تدفنيني كان ما ضقتي الكبدة دي ويستمر المسلسل حتى الساعة 12 وبعدين الشاي ثم العودة إلى الونسة
وبعد ذلك تتذكر إحداهن أنو الليلة سماية سهير وعازماهن غدا فتتبرع إحداهن بأخذ إذن شكلي من
المدير الذي لا يمانع بالطبع لزوم التغطية الجماعية إذا كان غائبا وحضر مسئول كبير ولم يجده في
مكتبه خلال ساعات الدوام !! ياجماعة رغم أن الموضوع بقى طويل لكن لازم أمر شوية على موظفي جهاز
المغتربين طبعا ديل مش موظفين بل جباة ضرايب من قبيلة التتار أوكلت إليهم مهمة إزلال المغتربين
بشتى الصور من منطلق ليه إنتو ونحنا لا ! دون أن يدركوا أن المغترب مسحوق في الغربة من رأسه حتى
أخمص قدميه فضلا عن ذلك يعاني من أمراض نفسية وعضوية بسبب البعد عن الأهل والوطن وفتكم بعافية ,,
|
|
 
|
|
|
|
|
|
|
 Re: موظفوووووووووون ولكن !!!! (Re: عواطف ادريس اسماعيل)
|
الرائعة جدا جدا / عواطف ادريس اسماعيل
كتاباتك رغم انها حقيقة ومرة الا انها رائعة جدا
بس كلامك ده كان زمان خالص
اليوم الموظف المابيشتغل المواطنين ما بتريحوا
وهاك ياهرج ومرج اصلوا مشى يفطر شنو
وحقيقة الصورة الرائعة للموظفات ووتحديدا الموظفة
رباب الى يومنا هذا حاصلة
واحتمال ايضا بعض الموظفات يقمن بتجهيز حلة الملاح
من المكتب لزوم اختصار الزمن ..
ولكن ايضا في المقابل ظهرت موظفات من نوع جديد
يمتلكن افخر العربات وافخر الملابس وافخر الشغالات
ويلتزمن بالعمل بصورة رائعة جدا
كلامك كله جميل بس الما جميل كلامك عن ناس جهاز المغتربين وكده
وياريت برضو تشكروهم لانو هم مجرد موظفين وموظفات بيؤدى في واجبهم
على اكمل وجه علشان راحتكم وراحة المغتربين والمغتربات وله شنو بالله
وياريت كل الموظفين زى ناس جهاز المغتربين اذن لانصلح حال السودان
شكرا جزيلا لك استاذتى على هذا البوست الرائع وبجيك صاد ان شاء الله
| |
|
|
|
|
|
|
|
|
 Re: موظفوووووووووون ولكن !!!! (Re: سيف الدين حسن العوض)
|
أخي العزيز سيف !!!
سلام ومحبة ,,,
أشكر مرورك الجميل ولكن يا سيف تأكد تماما أن هذا النوع من الموظفين مازال موجودا وأكثر من مرة
استقليت فيها تاكسي كان صاحب التاكسي يقول لي في الحقيقة أنا موظف لكن المعايش جبارة أما
الموظفات فرغم السيارات لكن مازالن يعملن بمثل من خلى عادتو قلت سعادتو طبعا ما كلهم أو كلهن
لكن ناس جهاز المغتربين ديل عندي معاهم مواقف كتيرة جدا ولست وحدي كل من عبر هذا الجهاز لعن
اليوم اللي جاء فيه إجازة عشان كدة بقول ليك ما تشكر لي الراكوبة في الخريف ,, شكرا سيف اختلاف
الرأي لا يفسد للود قضية ,,
| |
|
|
|
|
|
|
|
|
|
Re: موظفوووووووووون ولكن !!!! (Re: Mustafa Mahmoud)
|
السيدة /عواطف صبحك الله بالخير والخيرات
.. كدى النشوف رأى موظفى الداخل شنو ..؟؟؟
وبالمقارنة نفس الموظف عندنا عندما يخرج للعمل فى بلاد برة
يكون الأداء مختلف تماما والإنضباط غير !!! والنشاط غير !!
بل الإنتاج محسوب ، وليس الحضور والتواجد الكامل من بداية ( الدوام ) أى العمل
الى نهايته هو المقياس ، ولكن تكون المحاسبة فيما أنتجت وأدخلت على المؤسسة إنتـاج مقدر
بقدر ما تأخذ من أجر .. وهكذا تطورت الشعوب وإرتقت بلدانهم وسمت أما نحن
فخلينا مع ( حشاش بدقنو ) أو تعال بكرة .. . أو يأخى الدنيا طايرة .. أو الموظف
المختص ما فى ، ما موجود أو راح يفطــر ، والساعة 12 ظهرا .. والله المدير ولدت
نفسـاء .. ( مرة واحد سأل من موعد قضيته ، قالوا ليه القاضية ولدت ..!! حولت القضية
الموظف عندنا عينه وفى الخارج ...... ( هيبة )
وتحيتى .. محمد مختار جعفر
| |
|
|
|
|
|
|
|
|
 Re: موظفوووووووووون ولكن !!!! (Re: محمد مختار جعفر)
|
عارف يا حمادة مرة نزلت السودان إجازة وقلت أمشي أبارك لصاحببتي العرس بعد الإنتظار الطويل ربنا
رزقها بعريس ولما دخلت المكتب ما لقيتها سألت الفراش وين سلوى ؟ قال ضحكا سلوى !! دي من عرسوها
قبال سبعة شهور ما جات المكتب قلت ليه وماهيتها ماشة ؟ قال لي كمان رقوها طبعا عذرت سلوى التي
تزوجت بعد أن تجاوزت الخامسة والأربعين فلابد أن تلحق ما قاتها من عرس خصوصا وأن العريس أصغر
منها بعشرة سنوات ثم حسدتها في الوقت نفسه لأنني لم أستمتع بشبابي مثلهافقد كنت قمة في الشلاقة
والخفة والطيارة عقدت قراني وأنا بالسنة النهائية ومن شخص يبكرني بعشرة سنوات الله يهنيك يا سلوى
آل شغل آل !
| |
|
|
|
|
|
|
|
|
 Re: موظفوووووووووون ولكن !!!! (Re: عواطف ادريس اسماعيل)
|
| Quote: طبعا عذرت سلوى التي تزوجت بعد أن تجاوزت الخامسة والأربعين فلابد أن تلحق ما قاتها من عرس خصوصا وأن العريس أصغر منها بعشرة سنوات ثم حسدتها في الوقت نفسه لأنني لم أستمتع بشبابي مثلهافقد كنت قمة في الشلاقة والخفة والطيارة عقدت قراني وأنا بالسنة النهائية ومن شخص يبكرني بعشرة سنوات الله يهنيك يا سلوى |
ده دخلو شنو بموضوع الموظفون ولكن ؟
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
.. طبعا لازم يتزوجها .. بس ما يكون ( راجل المره )
بعدين موظفة تجاوزت ال 45 سنه وجابت العريس أريته بتى
دى حالة تدرس ..
1 ـ .. الدوافع والأسباب
2 ـ المغريات ..
3 ـ الشروط .. ( إن كانت هناك شروط )
4 ـ أكيد عندها عمارة أو بت ذوات ..
5 ـ يمكن تكون ضابط أمن على أبواب معاش ..
المهم العريس أكيد كسبان .. لأنو 7 شهور دى فيها كلام ..
| |
|
|
|
|
|
|
|
|
 Re: موظفوووووووووون ولكن !!!! (Re: محمد مختار جعفر)
|
الصبر جبر يا محمد يعني هي قدرت تعمل ماجستير وسافرت واتفسحت مع أهلها ما خلت بلد مش زينا
اتكمكمنا واتدمدمنا وبقينا نحاحي في الشفع قبال يومنا عشان كدي الخفة ما سمحة أخير الواحدة
تعمل كل شي قبل العرس كان قراية كان شغل عشان العرس ملحوق والححاجات التانية ما بتتعمل
بسهولة بعد الزواج إلا إذا كانت هناك إرادة قوية ,,
هي ما عندها عمارة لكن عندها درجة وظيفية كبيرة وهو موظف عادي والدنيا مصالح يا اخوي ,,
| |
|
|
|
|
|
|
|
|
|
Re: موظفوووووووووون ولكن !!!! (Re: abubakr)
|
أبوبكر !!!
إنت ما شايف الناس في السودان لابسين أحسن لبس وماكلين أحسن أكل والبنات بسم الله ماشاء الله زي
الورد ؟ تعال شوف المناسبات والبكيات الأكل فايف استار أما القروش طبعا الصناديق والختات
والركشات والشغل الإضافي والمغتربين ربنا يزيد ويبارك ..
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
العزيزة عواطف ...
صبحك الله بالخير .. وجمعتك مباركة ...
تعرفي يا عواطف انا هسة اقتنعت اني ابدا ما محظوظة ...
عارفة ليه ؟؟؟ لاني ما عشت طقوس الموظفين دي في السودان ... ولا بعد ما جيت هنا ...
في السودان برغم انو الشركة كانت قطاع خاص .. لكن الدخول بمواعيد وتوقيع في دفتر حضور وغياب ومساءلة لو اتاخرت ...
في البداية كانت مواعيد الفطور هي المتنفس .. لمة سريعة على صحن الفول ابو شطة وتكون معاهو زيادات في بداية الشهر قبل ما الراتب يتلحس ...
بعد شويةادارةالشركة قررت انو الفطور دة بيضيع الوقت وجات اوامر بانو كلو يلزم محلو وياكل نارو براهو ..
مافيش طلعة نص الدوام الا لشغل ... ونهاية اليوم ممكن تمتد بعد المواعيد الرسمية اذا كان في ضرورة ...
جينا هنا لدوام حكومي وما اختلف الحال كتير .. بالعكس يمكن بقى اصعب ... المكتب بارتيشن مفتوح وكل حركة مراقبة ... الكلام في التلفون همس والسماعة بقت ضرورة لازمة ما شئ كمالي عشان تكون بتتكلم وتشتغل في نفس الوقت ..وممكن فجاة اضطر اقطع المكالمة او اعتذر لو مديري جا وقف في راسي كالمعتاد ... كرت يتدق بالدقيقة للحضور والانصراف ... طلعة في نص اليوم ؟؟ ( نو وي ) ...
انا كدة اكون في فئة المعذبين في الارض موش كدة ؟؟
مش قلت ليك ما محظوظة ...
تحياتي ليك وللاولاد ...
| |
|
|
|
|
|
|
|
|
 Re: موظفوووووووووون ولكن !!!! (Re: sanaa gaffer)
|
سنوية !!!
محبتي ياست البنات !!!
إنت فعلا ما عشت هذه الأشياء ما عايزة أقول ما محظوظة إنشاء الله دايما حظك حلو وجميل زي جمال روحك
وأخلاقك لكن فعلا اشياء بتحير يعني إذا مافي وطنية مافي ضمير؟ غايتو لما ترجعي السودان أبدي زي
مابقول ولدي ( بقصد نهائي) إشتغلي في الحكومة وشوفي الحكايات دي لايف لكن ما أظنك تقدري تمارسيها
عشان اتعودتي على الجدية والإنضباط ! مودتي ,,,
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
عطووووفة
صباحك زين وصباحك ما صباح ياسمين معطر بالعديل والزين , بصراحة الليلة برضو صحيت بدري لكن قلتا
عطوفة دي ما بتريحني اخير اخلي الناس تدخل الاول عشان انا من ناس البيت .
الكلام عن العمل الحكومي في السودان ما بيخلص والظبط والربط , إذا ما كان في ضمير حي اكيد ما في
اي فائدة , قصدي اقول احساس الفرد بالمجتمع وإحساس الحكومة بالشعب وعلي ذلك قيسي .
انا الحقيقة ما عملت في القطاع الحكومي إطلاقاً , مجرد إنتهاء دراستي في مصر ( إدارة فنادق ) عملت
مباشرة في فندق هليتون الخرطوم وعمل الفنادق مميز خاصة ان هناك دورات تدريبة مكثفة وكلها تصب في
مصلحة العمل ومصلحة الموظف وانا شخصياً إستفدت كتير جداً في عملي في الفندق كل شئ منظم واهم شئ عندي
النظافة والنظافة في الزي والنظافة في المكتب وسواه , إستفدت كيف أتعامل مع الناس بمختلف جنسياتهم
واعمارهم وحتي عندما قدمت للعمل في السعودية الحمدلله كانت لي لمساتي علي وظيفة اوكلت بإنجازها وحتي
اليوم ودي ما كشخرة .
مشكورة كتير يا عطووووفة يا ظريفة .
| |
|
|
|
|
|
|
|
|
 Re: موظفوووووووووون ولكن !!!! (Re: هاشم أحمد خلف الله)
|
هشومي !!
صباحك فل ,,
فعلا العمل في الفنادق يختلف كثيرا عن العمل في الدوائر الحكومية لأنه يعتمد على النوعية ولكل
مجتهد نصيب أما العمل في الدوائر الحكومية فلا حسيب ولا رقيب الا الضمير ولكن الموظف إذا ما كان
مرتاح نفسيا وماديا لن ينتج ومع ذلك الإحساس بالوطنية شي مهم جدا ,, شكرا هاشم .
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
بالمناسبة
لما كنت موظف حكومة
نقلوني الخرطوم للضعين
ليه ؟
ما عشان الكفاءة
او عدم الكفاءة
او .... الخ
القصة وما فيها
رئبسي المباشر
حب البنت الكنت بوصلها معاي وهي موظفة معانا
حلييييييييييييييييييييييوة
وخاف انو يكون ابوشنب ده كاسر فيها ضلعة
واجي يوم الصباح القى ليك الشباب يغنو لي دارفور بلدنا
في شنو
قالوا لي نقلوك اهلك
لو هاجرك طال
انا بهلك
اها ومن ديك وعيك
وهو عرس البنية السكرية
وانا جيت السعودية
| |
|
|
|
|
|
|
|
|
 Re: موظفوووووووووون ولكن !!!! (Re: د.محمد حسن)
|
ألف أهلا يا دكتور !!!
أنا لو كنت محلو كان نقلت نمولي ,, تفتكر لو ما نقلك كان عرسها؟؟ أهي دي أسمها الضربات الإستباقية
زي ضربت بوش للعراق وأفغانستان ,, وبعدين ما قلت لي نفذت النقلية ولا لا ؟ لزوم الشمشرة ,,,
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
Quote: الموظف ياأمة الأمجاد في الدول المتقدمة لا يعاني من هموم أسرية ولا واجبات إجتماعية ولا أمراض نفسية
مزمنة بسبب القهر السياسي والإضهاد الإجتماعي لذلك تجده ينام مبكرا ويصحو وهو قمة في النشاط يخرج
من بيته فتفوح منه رائحة الصابون المعطر والكلونيا والآفتر شيف يركب المترو وهو في غاية السعادة
ح |
مافيَ قدر ظروفك ولا شنو ياموظفي بلادي وأن جارت عليَ عزتين لموظف والموظفة
| |
|
|
|
|
|
|
|
|
 Re: موظفوووووووووون ولكن !!!! (Re: مجدي عبدالرحيم فضل)
|
الموظف في الدول المتقدمة يا أبو قصي ظروفو مقدرة لذلك يقدر الشغل ويعمل بضمير أما الموظف عندنا
حتى لما كانت ظروفو مقدرة أيام زمان كان في ناس بزوغو من الشغل وطبعا الحالة لما بقت بطالة
الزوغان بقى جماعي وكان الله في عونك يا بلد .
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
بت ادريس كيفنك شديدة انت
حنان عشراوي ده توب والله شنو
عشان بدور اوديهو لامي تتبوبر بيهو
انت عارفة كل اجازة امشي فيها السودان
عندي اصحابي في احد الرافق الحكومية
بمشي ليهم كل يوم افطر معاهم عارفة لي شنو
لانو بجوا من البيت على الكفتريا عدل
حتى رئيس القسم ظاتو معاهم والله بظبتوا
جنس بوش اها بعد الفطور نشرب الشاي
والقهوة وناخد لينا عشرة ونسة ونقوم نمشي
والغريب يسالو الرئيس الحوافز ماجات
قلت ليهم وروني انتو شغالين الكفتريا دي
قلوا ده نظامنا وكان جا شغل ينادونا
ماشفت لي واحد يوم قال ماشي اوقع حضور
والله انصراف اها شفتي جنس الهملا دي
رواتب ماشة وحوافز وبدلات كمان .
ودعتك الله
| |
|
|
|
|
|
|
|
|
|
Re: موظفوووووووووون ولكن !!!! (Re: حافظ العشا)
|
ود العشا!!!
شديدة ولضيضة ,,,
الله يعزك الدوام في الكافتيريا كوم والدوام في التاكسي والركشة كوم تاني لأنو بتاعين الكافتيريا
ممكن ينادوهم لكن بتاع التاكسي والركشة دة ينادوه كيف إلا يعملوا مس كول ,, مودتي ,,,
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
الجميلة عواطف
غايتو سادين دي بي طينة ودي عجينة ماعارفنها وين ترسي
انا اعمل في مؤسسة داخل السودان يمكن الوحيدة التي تطبق نظام
عطلة خميس \جمعة بعد دراسة وافية وجدت ان السودانيين يوم الخميس
يعملون حتي 1130 او12 بالكتير ولتوفير الاتي
وقود السيارات
الهواتف
الكهرباء
وجبه الافطار
استهلاك المبني
استهلاك العربات
قررو العمل بنظام اجازة الخميس
تسلمي
| |
|
|
|
|
|
|
|
|
|
Re: موظفوووووووووون ولكن !!!! (Re: السمؤال بدرالدين)
|
ودبدرالدين الراقي الرزين !!!
مليون سلام عليك وعلى نيل بلادنا ,,,
والله الشركة بتاعتك دي عاقلة بلحيل يعني لو الحكومة السودانية عملت دراسة وافية وشاملة حتدي
الموظفين إجازة يوم الخميس والجمعة والسبت والأحد لنفس الأسباب الذكرتها زايد الشغل الإضافي
وما تبقى من أسبوع هو عدد ساعات الدوام الحقيقية ,,
تشكرات يا فندم !!
| |
|
|
|
|
|
|
|
|
|
Re: موظفوووووووووون ولكن !!!! (Re: عواطف ادريس اسماعيل)
|
عطووفة سلامات
ما عارفك اذا انتي قاصدة بالإضهاد الإجتماعي الظلم الواقع من طرف صاحب العمل أم انه إضهاد آخر من أصحاب الوظائف الأخرى ذات الدخل العالي مقارنة بالموظف الكحيان!
عاوز اتكلم عن ظلم اصحاب العمل ليس من أجل التبرير لتسيب الموظفين و لا مبالاتهم التي باتت مضرب مثل !
فأنا أعتبر ان أصحاب العمل هم العامل الرئيسي و السبب الحقيقي وراء ما يجري من جرجرة و معاكسات حتى في مجال الخدمات المقدمة من قبل شركات القطاع الخاص !
شفتي يا ستي أول حاجة الموظف بيجي عشان يشتغل بعد ما يتلطع كم سنة كدى عاطل و خلاص لما يقول الفرج جا و في المعاينة الصوووووورية (هم زاتهم محتاجين معاينة)البيعملوها ليهو يقوموا يوروهو انهم أي نعم محتاجين لزول لكن حيجربوهو عشان لو ما نفع يقوموا يجيبو واحد غيرو لأنو الزول الكان ماسك الوظيفة دي كان منقًطها و كان موظف ممتاز و كان و كان و...و ... , لكن كان مامنضبط و كان بيغيب عشان كدة إحنا عملنا ليهو كش الولد ... هسع انت لو داير تبقى زولنا تلتزم لينا بالمواعيد و تقدم فروض الولاء و الطاعة و في رواية اخرى تدينا رقبتك, بعد ما يوافق ليهم على وهماتهم القديمة و البايخة دي (لأنهم في نفسهم ما منضبطين) .. صاحبنا المسكين طبعا بيكونوا بيسألو فيهو اذا كان اشتغل قبل كدة و للا ما اشتغل المهم لما يلقوهو ليك ما عندو خبرة تعالي شوفي الظلم الفرمالة انوهم بيجربو فيهو , وبعد ما خلاص يباركوها و يقولوا ليهو تجينا من بكرة تستلم الشغل (التقول عايزين يسلموهو ورث), صاحبنا طبعا الفرحة بتكون ما سايعاهو و زي ما بيقولوا اخوانا المصريين (مزأطط من الفرحة), يرجع البيت سرعة سرعة و يغسل بنطلونو و قميصو و ينتظرهم عشان يكويهم و البيت كلو يكون عرف خلاص .. فلان اتوظف وفي رواية اخرى الحلة كلها , وصاحبنا كل يوم ماشي الشغل و جاي من الشغل و طبعا هو لسة في فترة التجربة يعني لسة مكتوب بقلم الرصاص و في أي لحظة ممكن يمسحوهو و ترجع الورقة فاضية زي الما حصل حاجة .
طبعا أول أيام شوية دلع ومجاملات و ظرافات و عزومات فطور وش من هذا القبيل , شهر و شهرين صاحبنا بيبقى مقلق بخصوص المرتب لأنو الجماعة ما قالوا ليهو حاجة , طبعا خلال الفترة دي بيكونوا بيدوهو مصاريف بسيطة بسيطة و كلو تبع التجربة, صاحبنا يجي بخجلة كدة ويسأل وهو مدنقر عن المرتب , وبنفس خجلتو يردوا عليهو بطريقة زي بتاعة عادل امام (حيعيط من الإيمان و التقوى) ويقولوا ليهو لما ناس شئون المستخدمين يجيبو لينا العقد بتاعك , كلها كم يوم و يعملوا ليك العقد , ووحاتك ناس شئون المستخدمين ما جايبين خبر و للا عارفين اصلا انو اخونا ده اشتغل معاهم !
نواصل
(عدل بواسطة غباشي on 06-23-2007, 03:24 PM)
| |
|
|
|
|
|
|
|
|
 Re: موظفوووووووووون ولكن !!!! (Re: غباشي)
|
غباشي !!!
تحية عالماشي ,,,
كالعادة أنت جميل في طرحك للمواضيع وكما يقولون كفيت وفيت وأنا فعلا بقصد هذا النوع من الظلم
إضافة إلى ظلمه كمواطن له حقوق مثلما عليه واجبات كحق التعليم والعلاج المجاني حق السكن حق العيش
الكريم حق العدل والمساواة كل هذه الأشياء مفقودة تماما ولكن رغم ذلك المطلوب من الموظف أن لا
يعطل أعمال أناس أخرين لا ذنب لهم ,, شكرا غباشي مرورك يثري البوست ,,
| |
|
|
|
|
|
|
|
|
|
Re: موظفوووووووووون ولكن !!!! (Re: EMU إيمو)
|
إيمو العزيز !!!
حبابك عشرة ,,, نورت البوست ! مالك غيابك طول ؟؟
عارف يا إيمو بعد شوية يقولو ليك البنوك دي ذاتها ما في داعي ليها ما قلتو مفلسين وما عندكم
قروش بس فالحين لكتر الكلام في النلفون ؟؟ مودتي ,,,
| |
|
|
|
|
|
|
| |
عواطف ادريس اسماعيل
Mustafa Mahmoud
سيف الدين حسن العوض
محمد مختار جعفر
فيصل نوبي
abubakr
هاشم أحمد خلف الله
د.محمد حسن
مجدي عبدالرحيم فضل
السمؤال بدرالدين
غباشي
EMU إيمو
الطيب شيقوق
فيس بوك
تويتر
انستقرام
يوتيوب
بنتيريست