كتب الكاتب الفاتح جبرا المتوفرة بمعرض الدوحة
|
|
 سؤال مهم:بتعرفي تطبخي وتعوسي الكسرة؟
|
(1)
صديقي (م. أ.ع)الذي تزوج قبل شهور قلائل يعاني بشكل كبير ولكنه لا يستطيع أن يصارح زوجته التي عاش معها قصة حب طويلة أمتدت لما يقارب الستة أعوام..وصديقي هذا طيلة فتره (حبه)كان غارقاً في الرومانسية وأستنفذ كثيراً من كروت شحن الرصيد في المكالمات الليلية التي كان يصرف فيها الكثير من الكلام الغرامي..ولكنه طيلة تلك الفترة التي سبقت زواجه من حبيبة العمر لما يسألها عن قدرتها علي (الطبيخ)فهو تفاجأ بأن زوجته ـ حبيبته ـ سابقاً لا تعرف حتي كيف يسلق (البيض) ناهيك عن بقية فنون الطبخ ..هكذا ظل يحدثني بأنها تقضي معظم وقتها في المكياج والنوم الطويل فهي تصحي من النوم عند الحادية عشر ووقتها أكون خرجت وحينما أعود للمنزل أجدها تشاهد في القنوات الفضائية ..وحينما أسألها عن الغداء تقول لي ما كان (تجيب معاك أي حاجة ..أسع كان غشيت مطعم أمواج مالو؟)..
(2)
حالة صديقي (م. أ . ع) هي بالقطع ليست الوحيدة وهناك نماذج لا تحصي ولا تعد ولكن الجدران كفيلة بأن تخفي كل شئ..لذلك أتجهت لسؤال بعض الطالبات الجامعيات سؤالاً محدداً (بتعرفي تطبخي؟)..حيث قالت لي ناهد (أنا غايتو بعرف نص نص يعني ممكن أسوي ليك ملاحات وفي ملاحات ما بعرف ليها ذي الكمونية وملاح التقلية وكل انواع الويكة ما بعرف ليها والفسيخ ما بقرب منو مع أني بحبو شديد!!) ولكن عبير قالت في جرأة واضحة (أنا شخصياً ما عندي علاقة بالمطبخ لأنو من قمت صغيرة لقيت في طباخ في البيت وما أنا براي المابعرف أطبخ أخواتي كلهم ذيي كده واضافت (حأكون واضحة مع الزول الدايرني وبقول ليهو الحقيقة كلها ..لكن بيني وبينك راجل يقعد "يتشها" فيني ما بنفع معاي من اصلو).
(3)
عادل عوض شاب في طريقه للزواج قريباً قلت له: سألت زولتك عن معرفتها بالطبيخ فقال ضاحكاً(أي بت سودانية بتكون أخدت تمارين من أمها وعرفت تسوي اي حاجة ..وبصراحة انا ما سألتها سؤال مباشر لكن بفترض أنها مفروض تكون بتعرف تطبخ وكويس أنك سألتني قبل فترة كافية من العرس عشان أمشي أسألها..فقلت له (لو قالت ليك ما بعرف حتأجل العرس يعني؟) فقال عادل عوض (ما بأجلو لكن في فرصة كافية عشان تلحق المابتعرفو)..ولكن الحاجة أم سلمي قالت (ياولدي بت ما بتعرف تطبخ يسوو بيها شنو!! وعشان شنو يعرسوها..أنا غايتو ربيت بناتي التلاتة وعلمتهم الطبيخ وعواسة الكسرة..واسع ماسكات بيوتن ذي العجب لا راجل شكا لا شافع بكا)..
(5)
الأخصائية الأجتماعية هويدا الفاضل قالت في هذا الخصوص(هذا الأمر لم يكن شائعاً بين أمهاتن سابقاً ولكنه حالة حديثة جداً فرضتها ظروف العصر والحرية التي وجدتها المراءة في التعبير وحق العمل والخروج من البيت للدراسة أو العمل..ولكن هذا لا يعني بالقطع أن تهمل المطلوبات التي يجب أن تتوافر وأهمها التاهيل من الأسرة وخصوصاً الأم التي يجب أن تراعي سلوك البنت لأنها الأقرب والأقدر علي معالجة أي خلل يطرأ ..والأباء غير مسئولين من هذا..لذلك نحن ندعو لأهمية فترة الخطوبة التي من خلالها يمكن التعرف علي الآخر وسبر أغواره والتعارف مهم في هذه المسائل الحيوية حتي لا تكون النتيجة عكسية).
(6)
قضية فنون الطبخ قد يراها البعض هامشية ولا تستحق ولكنها في الأصل غير ذلك تماماً وربما تؤدي لنهاية الحياة الزوجية وتكون سبباً في نهاية الكثير من الأسر...لذلك يجب التوقف عندها وبحث الحلول لها.
|
|
 
|
|
|
|
|
| |
سراج الدين مصطفي
Hisham Ibrahim
فيس بوك
تويتر
انستقرام
يوتيوب
بنتيريست