|
|
 المشرور شويه شويه نار الشوق كتيره علي !!!..
|
ون .. تو .. ثري ..
كان شفتو الزول ..
ما الزول زولنا مسكين بلحيل ..
شبع مواعيد مشرور ديمه ..
دائماً يتلفت وما عارف ..
المرة كمان ياها الشره ..
ولا يقوم يشيل أحزان ..
ويأخذ بعضه ويتوكل ..
فور .. فايف .. سيكس ..
أصلك متعود يا مسكين ..
أدمنت الشره بدون مواعيد ..
لمان تتخيل هي تحن ..
ولو مرة ..
جاياك عديل تتبختر ليك ..
عشان مواعيد أول مره ..
لكنها هي وزي كل المرات ..
تقولك (.........) وما جاياك ..
لكنك إنت زي كل المرات ..
تتشر عديل وما بتفهم ..
وخليك يا زول قاعد تحلم ..
سيفن .. أيت .. ناين .. تن ..
حين تنوي تقوم تقول أقعد ..
أشربلك بارد مافي نفاع ..
أشرب ساخن أسخن أنا ..
يمسكني ضغط من زعلي عديل ..
أفكر أصفن تلقاني أقول ..
أقعد أركز يا مسكين ..
وأوعاك يا زول تفارق الحته ..
خليك مشرور ..
تجيك بعدين وما تلقاك ..
تولع نارك من جواك ..
تسوي الغاغه الما فايتاك ..
تفضل مشرور من دون فايده ..
وتقول ياريت لو قمت أنا ..
لكني بقولك يا مسكين ..
لا هي جاياك لا أصلك قايم ..
خليك متسمر في كرسيك ..
أخير تشربلك شيتاً نافع ..
يبرد ليك جوفاً محروق ..
وتقوم تمشي ..
وتعدها شره زي كل الشرات ..
الكانو قبيل ومن أول ..
وحليلك يازولي المسكين
أصلك أدمنت على الشرات ..
كان ما اتشريت ما بتستغفر ..
|
|
 
|
|
|
|
معتصم مكاوي
فيس بوك
تويتر
انستقرام
يوتيوب
بنتيريست